КʹЬТЕБА ПИРОЗДА һәнә гәләк готьнед ԝан мәрьва, кʹижан кӧ мәрьвнә «мина мә» бун (Аԛуб 5:17). Мәсәлә, әм дькарьн рʹьнд фәʹм кьн гьлийед Паԝлос жь Рʹомайи 7:21-24, кʹидәре әԝи гот: «Гава дьхԝазьм кӧ ԛәнщийе бькьм, бе һʹәмде мьн дьбә хьраби. . . . Әз чь мәрьвәки һесир-бәләнгаз ьм!». Әԝ гьлийед ԝийи бь дьлсахи мә дьшьдиньн ве йәкеда, ԝәки әм тʹәне ниньн кӧ мьԛабьли гӧнәкʹарийе шәрʹ дькьн.

Паԝлос бь һʹәлали дәрһәԛа хԝә тьштед майин жи гот. Галати 2:20-да әԝи да кʹьфше, ԝәки әԝи баԝәр дькьр кӧ Иса «әԝ» һʹьз кьр у «щанийа хԝә бона» ԝи да! Ле һун жи һьндава хԝә ӧса дьфькьрьн? Дьбәкә нә һәр гав.

Һәрге әм бона шашийед хԝәйә бәре, хԝә сущдар дькьн у хԝә нәһежа һʹәсаб дькьн, мәрʹа ԝе щара чәтьн бә баԝәр кьн, ԝәки Йаһоԝа мә һʹьз дькә у гӧне мә дьбахшинә. Дьбәкә мәрʹа ӧса жи чәтьн бә баԝәр кьн, ԝәки ԛӧрбана Иса хут пʹешкʹеша бона мә йә жи. Ле гәло рʹасти Иса дьхԝазә, ԝәки ньһерʹандьна мә сәр ԛӧрбане, ӧса бә? Һәрге әре, чь дькарә али мә бькә, ԝәки рʹаст бьньһерʹьн сәр ԛӧрбане? Ԝәрә әм ԝан дӧ пьрса шеԝьр кьн.

Бәле, Иса дьхԝазә, ԝәки әм ԛӧрбана ԝи һʹәсаб кьн ча пʹешкʹеш бона мә һәр кәси. Ле чьрʹа әм дькарьн ве йәкеда дӧдьли нибьн? Бьдьнә бәр чʹәʹве хԝә, дәрәща кӧ Луԛа 23:39-43-да те гьликьрьне. Мерьк кʹеләка Иса дардакьри йә. Әԝ тинә сәр хԝә, ԝәки әԝи бәре хьраби кьрийә. Фәʹмдари йә, әԝи хьрабийа мәзьн кьрьбу, ԝәки щәза ӧса мәзьн стандьбу, кӧ һатьбу дардакьрьне. Әԝ мерьк гәләк бәрхԝә дькʹәвә у лавайа Иса дькә: «Мьн бир бини, гава бь Пʹадшатийа хԝәва бейи».

Ле Иса ча щаба ԝи да? Бьдьнә бәр чʹәʹве хԝә, Иса чьԛас еш кʹьшанд гава сәре хԝә бәрбь ԝи зьвьранд сәва чʹәʹве ԝи бьньһерʹә. Рʹаст ә Исарʹа нәһесабу, ле әԝ бь бәшәра хԝәш бәр дьле ԝида һат: «Әз тәрʹа рʹаст иро дьбежьм, те тʹәви мьн Щьнәтеда би, ДТʹ». Иса дькарьбу жерʹа бьгота, ԝәки «Кӧрʹе Инсан» һатийә, ԝәки «әʹмьре хԝә бьдә, кӧ гәләка бькʹьрʹә» (Мәт. 20:28). Ле ԝә дина хԝә дайе, кӧ Иса ча бь нәрми жерʹа да кʹьфше, ԝәки ԛӧрбана ԝи хут бона ԝи жи бу? Әԝи ча һәвал жерʹа хәбәр да, чахе гот «те» у «мьн». У һьн жи әԝи ԝи мерькирʹа гот, ԝәки әԝ ԝе сәр әʹрде, щьнәтада бьжи.

Бешьк, Иса дьхԝәст, ԝәки әԝ мерьк ԛӧрбана ԝи һʹәсаб кә ча пʹешкʹеша бона хԝә. Һәрге Иса һьндава ԝи мәрьве ԛачах ӧса бу, мәщала кʹижани тʹӧнә бу Хԝәдерʹа хьзмәт кә, әԝ илаһи һьндава ԝан Мәсиһийед ньхӧманди ԝе ча бә, йед кӧ Хԝәдерʹа хьзмәт дькьн. Чь дькарә али мә бькә дӧдьли нәбьн, ԝәки һәрге жи мә бәре гӧнә кьрийә, ԛӧрбана Иса хут бона кʹара мә йә?

Иса щабдари да Паԝлос, ԝәки хьзмәт кә, у әԝе йәке али Паԝлос кьр кӧ әԝи фәʹм кьр,  ԝәки Иса хут бона ԝи мьр. Ле чаԝа? Әԝи шьровәкьр: «Әз жь Мәсиһ Исайе Хӧдане мә рʹази мә, йе кӧ ԛәԝат да мьн, әз амьн һʹәсаб кьрьм, данимә сәр ве хьзмәткʹарийе. Әз жи бәре ль ԝи дькʹьфьрим, әԝ дьзеранд у нәйарти ль ԝи дькьр» (1 Тимтʹ. 1:12-14). Әԝ йәк кӧ Паԝлосрʹа әԝ шьхӧл һатә дайине, жерʹа избат дькьр, кӧ Иса хут һьндава ԝи рʹәʹм у бь һʹьзкьрьн бу у ӧса жи итʹбарийа хԝә ԝи дьани. Иса мәрʹа жи шьхӧл у щабдари дайә, кӧ мьзгинийе бәла кьн (Мәт. 28:19, 20). Ле гәло әԝ йәк сәр мә жи дькарә ӧса һʹӧкӧм бә, ча сәр Паԝлос?

Алберт, йе кӧ ԝәкә 34 сала жь щьвате дәрхьсти бу у ԝан пашԝәхтийа вәгәрʹийа бал Йаһоԝа, гьли дькә: «Гӧнед мьн тʹьме ль бәр чʹәʹве мьн ьн. Ле чахе әз хьзмәтийеда мә, әз хԝә мина Паԝлос тʹәхмин дькьм, кʹижан кӧ хут жь Иса щабдари станд кӧ хьзмәт кә. Әԝ йәк мьн дьшьдинә, бәхтәԝар дькә у әз сәр ахьрийа хԝә һе позитив дьньһерʹьм» (Зәб. 51:3).

Алан, пешийа кӧ рʹасти пебьһʹәсийа, ԛачах у зорбәт бу, гьли дькә: «Әз һе дьфькьрьм дәрһәԛа һʹәму ԝан зийана кӧ мьн дайә мәрьва. Щара бона ве йәке әз дькʹәвьмә депресийе. Ле шькьр Йаһоԝарʹа, кӧ әԝ изьне дьдә, ԝәки мәрьве мина мьн гӧнәкʹар, мьзгинийе мәрьварʹа бәла кьн. Әз чахе дьвиньм кӧ мәри ча мьзгинийе ԛәбул дькьн, әԝ йәк тинә бира мьн, ԝәки Йаһоԝа чьԛас ԛәнщ у һʹьзкьрьн ә. Әз тʹәхмин дькьм, ԝәки әԝ мьн дьдә хәбате, сәва әз али ԝан мәрьва бькьм, йед кӧ ӧса дьжин, чаԝа мьн бәре дьжит».

Хьзмәтийа мә али мә дькә, ԝәки әм һʹьш-аԛьле хԝә бьдьнә сәр тьштед баш у фькьред баш. Әԝ йәк жи мә дьдә баԝәркьрьне, ԝәки Иса һьндава мә рʹәʹм у бь һʹьзкьрьн ә, у итʹбарийа хԝә мә тинә.

Һʹәта кӧ дьнйа Шәйтʹан кʹӧта бә, дьле мә ԝе бәрдәԝам кә мә сущдар кә бона шашийед мәйи бәре. Ле чь дькарә али мә бькә, мьԛабьли ԝан фькьра дәрен?

Щен, йа кӧ гәләк щар хԝә сущдар дькә, чьмки щаһьлтийеда мина мәрьвәкә дӧрʹу дьжит, дьбежә: «Әз дьлрʹьһʹәт дьбьм, чьмки заньм ԝәки ‹Хԝәде жь дьле мә мәстьр ә›» (1 Йуһʹн. 3:19, 20). Әм жи дькарьн дьлбинийе бьстиньн жь ве йәке, кӧ заньн Йаһоԝа у Иса мә фәʹм дькьн, ԝәки әм мәринә гӧнәкʹар ьн. Бир нәкьн, ԝәки ԝана жь һʹьзкьрьне ԛӧрбан бона мә да, нә кӧ бона мәрьвед бекемаси, ле бона йед гӧнәкʹар, кӧ тʹобә дькьн (1 Тимтʹ. 1:15).

Һәрге әм бьфькьрьн сәр һәләԛәтийа Иса һьндава мәрьвед гӧнәкʹар, у һәр тьшти бькьн, сәва хьзмәтийа хԝә биньн сери, әме һе баԝәр бьн, ԝәки ԛӧрбан пʹешкʹеш ә бона һәр кәси. Ԝи щурʹәйи әме жи мина Паԝлос бежьн: Иса «әз һʹьз кьрьм у щанийа хԝә бона мьн да».