1-2. а) Ль гора тʹәмийа Иса кӧ Мәтта 28:18-20-да ньвисар ә, щабдарийа сәрәкә йа щьвата Мәсиһити чь йә? б) Ве готареда кʹижан пьрса әме шеԝьр кьн?

ИСА паши сахбуна хԝә, готьбу шандийед хԝә кӧ сәр чʹийе тʹоп бьн. Шанди бешьк бь шабунәкә мәзьн һивийе бун кӧ ԝи бьвиньн (Мәт. 28:16). Дьԛәԝьмә һьнге Иса «щарәкерʹа пенсьд хушк-бьрайи зедәтьрва хӧйа бу» (1 Корн. 15:6). Чьрʹа Иса готә шагьртед хԝә, ԝәки тʹәвайи тʹоп бьн? Әԝи тʹәмикә ну да ԝан: «Ләма һәрʹьн у һʹәму мьләта бькьн шагьртед мьн, ИМ». (Бьхунә Мәтта 28:18-20.)

² Шагьртед Иса йед кӧ гьлийед ԝи бьһистьн, бун пʹара щьвата пешьнә Мәсиһити йа ԛьрʹна йәке. Нета сәрәкә йа ве щьвате әԝ бу, кӧ һе зедә мәрьва бькьнә шагьртед Иса. * Иро нав тʹәмамийа тʹопа дьнйайе бь дәһа һʹәзара щьват һәнә, у нета ԝан щьвата диса жи әԝ ә. Ве готареда, әме ван пьрса шеԝьр кьн: Чьрʹа мәрьва бькьнә шагьрт, әԝ шьхӧләкә фәрз ә? Чь дькʹәвә нава ԝи шьхӧли? Гәло һʹәму Мәсиһи әԝи шьхӧли тиньн сери? У чьрʹа мәрʹа сәбьр лазьм ә, сәва мәрьва бькьнә шагьрт?

3. Ль гора Йуһʹәнна 14:6 у 17:3, чьрʹа мәрьва бькьнә шагьрт шьхӧләкә гәләк фәрз ә?

³ Ле чьрʹа мәрьва бькьнә шагьртед Мәсиһ, әв шьхӧләкә  гәләк фәрз ә? Чьмки тʹәне шагьртед Мәсиһ дькарьн бьбьнә достед Хԝәде. Хенщи ве йәке, әԝед кӧ пәй Мәсиһ дьчьн, әʹмьре хԝәда бәхтәԝар дьбьн, у ӧса жи һевийа ԝан һәйә кӧ ахьрийеда һʹәта-һʹәтайе бьжин. (Бьхунә Йуһʹәнна 14:6; 17:3.) Бешьк, Иса щабдарийа фәрз да мә, ле әԝи шьхӧли әм тʹәне накьн. Паԝлосе шанди дәрһәԛа хԝә у хушк-бьра ньвиси: «Әм һәвпʹаред Хԝәде йед хәбате нә» (1 Корн. 3:9, ИМ). Рʹасти жи Йаһоԝа у Мәсиһ ԛәдьрәки чьԛас мәзьн данә мәрьвед гӧнәкʹар!

4. Әм чь һин дьбьн жь мәсәла Иван у Матилда?

⁴ Әм шабунәкә мәзьн дьстиньн чахе али мәрьва дькьн кӧ бьбьнә шагьрт. Дина хԝә бьдьн мәсәла бьраки мә Иван у жьна ԝи Матилда, жь Коломбйайе. Ԝана шәʹдәти да мерәки щаһьл бь наве Девиер, йе кӧ ԝанрʹа гот: «Әз дьхԝазьм әʹмьре хԝә бьгӧһезьм, ле нькарьм». Девиер боксоре професионал бу, кʹижан кӧ наркотика дьда хәбате, гәләк ичʹкә вәдьхԝар, у тʹәви жьнәкә щаһьл дьжит, бь наве Ерика. Иван гьли дькә: «Әм дьчунә гӧндәки дур, сәва тʹәсәлийа ԝи бькьн. Әм рʹийа һәрʹирʹа пе бисиклете дьчунә мала ԝи. Паши ве йәке, чахе Ерика дит ԝәки һеди-һеди Девиер алийе башда те гӧһастьне, әԝе жи дәстпекьр Кʹьтеба Пироз һин бә». Ԝәʹдә дәрбаз бу, Девиер тʹәрька наркотикайе, ичʹке у боксе да. Ӧса жи Девиер у Ерика бь ԛануни зәԝьщин. Матилда дьбежә: «Чахе Девиер у Ерика сала 2016-да һатьнә ньхӧмандьне, һатә бира мә чахе Девиер һәр гав дьгот: ‹Әз дьхԝазьм бемә гӧһастьне, ле нькарьм›. Әм ӧса ша дьбун, ԝәки һесьр чʹәʹве мә дьһат». Бешьк дькарьн бежьн, ԝәки әм гәләк ша дьбьн чахе али мәрьва дькьн кӧ бьбьнә шагьртед Мәсиһ.

5. Кʹижан ә гава пешьн кӧ мәрьва бькьнә шагьрт?

⁵ Гава пешьн сәва мәрьва бькьнә шагьрт, әԝ ә кӧ мәрьвед дьлсах бьвиньн, йед кӧ бьхԝазьн дәрһәԛа Йаһоԝа пебьһʹәсьн (Мәт. 10:11). Чахе әм һәр мәрьвәкирʹа кӧ рʹасти мә те, шәʹдәтийе дьдьн, әм избат дькьн кӧ әм бь рʹасти Шәʹдед Йаһоԝа нә. Чахе әм гӧрʹа тʹәмийа Иса дькьн кӧ мьзгинийе бәла дькьн, әм избат дькьн, ԝәки әм Мәсиһийед рʹаст ьн.

6. Әм чь дькарьн бькьн сәва хьзмәтийеда пешдачуйи бьн?

⁶ Һьнә мәрьварʹа һʹәԝас ә дәрһәԛа рʹастийа жь Кʹьтеба Пироз пебьһʹәсьн, һьнәкарʹа жи һʹәԝас нинә. Әм дькарьн ӧса бькьн, ԝәки һʹәԝаса ԝан пешда биньн. Сәва хьзмәтийеда пешдачуйи бьн, әм гәрәке хԝә рʹьнд һазьр кьн. Бона ве йәке, чәнд тʹемед конкрет бьжберьн, кӧ ԝе ԝан мәрьварʹа һʹәԝас бьн, рʹасти кʹижана һуне бен. Паше бона ԝан һәр тʹема, пешхәбәра һазьр кьн.

7. Чаԝа һун дькарьн хәбәрдане дәстпекьн тʹәви мәрьва, у чьрʹа фәрз ә кӧ һун гӧһ бьдьнә ԝан у ԛәдьре ԝан бьгьрьн?

⁷ Мәсәлә, һун дькарьн жь хԝәйе мале бьпьрсьн: «Изьн ә әз тьштәки жь ԝә бьпьрсьм? Гәләк мәрьв иро рʹасти проблемед мәзьн тен. Бь тʹәхмина ԝә, чь щурʹә сәрԝерти лазьм ә, сәва проблемед инсанәте сафи кә?». Паше һун дькарьн тʹәви ԝан Данийел 2:44 шеԝьр кьн. Йан жи дьбәкә һун жь хԝәйе мале бьпьрсьн: «Ча һун дьфькьрьн, мәрьв ча дькарьн зарʹед хԝә ӧса мәзьн кьн, ԝәки рʹабун-рʹуньштьна ԝан баш бә? Әз дьхԝазьм фькьред ԝә пебьһʹәсьм һәрге изьн ә». Паше шеԝьр кьн Ԛануна Дӧщари 6:6, 7. Фьрԛи тʹӧнә һун чь тʹемайе бьжберьн, бьфькьрьн дәрһәԛа ԝан мәрьва, йед кӧ  ԝе гӧһ бьдьнә ԝә. Бьдьнә бәр чʹәʹве хԝә, кӧ чахе әԝана пебьһʹәсьн кӧ бь рʹасти Кʹьтеба Пироз чь һин дькә, ԝе кʹарәкә чьԛас мәзьн бьстиньн. Чахе һун тʹәви ԝан хәбәр дьдьн, гәләк фәрз ә кӧ гӧһ бьдьнә ԝан у ԛәдьре ньһерʹандьна ԝан бьгьрьн. Ӧса һуне ԝана һе рʹьнд фәʹм бькьн, у әԝана ԝе бьхԝазьн һе зедә гӧһ бьдьнә ԝә.

8. Чьрʹа лазьм ә сәрледанед дӧбарә бькьн?

⁸ Ԝәрʹа дьбәкә ԝәʹдә лазьм бә, сәва сәрледана бькьн, һʹәта мәрьв ԛайил бә Кʹьтеба Пироз һин бә. Ле чьрʹа? Чьмки мәрьв дьбәкә малда ниньн чахе әм дьчьнә мала ԝан. Ӧса жи дьбәкә лазьм бә чәнд щара сәрледана бькьн, сәва кӧ хԝәйе мале тʹәви мә хԝә һеса тʹәхмин кә у һинбуна Кʹьтеба Пироз ԛәбул кә. Бир нәкьн, шинкайи һьнге мәзьн дьбә, чахе һәр гав авдьдьн. Мина ве йәке, һʹьзкьрьна мәрьва жи һьндава Йаһоԝа у Иса Мәсиһ һьнге мәзьн дьбә, чахе һәр гав дәрһәԛа Хәбәра Хԝәде тʹәви ԝан шеԝьр дькьн.

9-10. Чьрʹа әм дькарьн бежьн, ԝәки һәр Мәсиһи аликʹарийе дьдә сәва мәрьвед дьлсах бьвиньн?

⁹ Һәр Мәсиһи дьхәбьтә у аликʹарийе дьдә ве йәкеда, ԝәки мәрьвед дьлсах бьвиньн. Әԝе йәке әм дькарьн бәрамбәри легәрина зарʹа ӧндабуйи бькьн. Чь щурʹәйи? Дина хԝә бьдьнә сәрһатике йа кӧ рʹасти ԛәԝьмийә. Гәде се сали чахе жь мал дәрдькʹәвә, ӧнда дьбә. Ԝәкә 500 мәрьв ԝи дьгәрʹьн. Ахьрийеда, паши ԝәкә 20 сьһʹәта, йәк жь ԝан мәрьва әԝе зарʹе чоле дьвинә. Ле әԝи мәрьви нәхԝәст пәсьна бьдьнә ԝи, чьмки әԝи гот: «Бь сәда мәрьва ԝи дьгәрʹийан».

¹⁰ Гәләк мәрьв мина ве зарʹе нә, демәк ча  бежи ӧндабуйи нә. Һевийа ԝан тʹӧнә йә, у әԝана аликʹарийе дьхԝазьн (Әфәс. 2:12). Әм һʹәйшт милйон мәрьва зедәтьр, ԝан мәрьвед дьлсах дьгәрʹьн. Дьбәкә һун хԝәха нәвиньн мәрьвәки, кӧ һинбуна Кʹьтеба Пироз ԛәбул кә, ле мьзгинванед майин мьһала ԝәда дькарьн ԝан мәрьва бьвиньн, йед кӧ дьхԝазьн дәрһәԛа рʹастийа жь Хәбәра Хԝәде пебьһʹәсьн. Чахе хушк йан бьрак мәрьвәки дьвинә, кʹижан кӧ дьбә шагьрте Мәсиһ, һәр кәс жь мә кӧ легәринеда аликʹари дайә, ша дьбә.

11. Һәрге жи һун һинбуна Кʹьтеба Пироз тʹәви тʹӧ кәси дәрбаз накьн, чь щурʹәйи һун дькарьн аликʹарийе бьдьн, сәва мәрьва бькьнә шагьрт?

¹¹ Һәрге һун тʹәви тʹӧ кәси һинбуна Кʹьтеба Пироз дәрбаз накьн, һун щурʹәки майин дькарьн аликʹарийе бьдьн. Мәсәлә, һун дькарьн бь бәшәра хԝәш у бь дьл у щан сьлав кьн ԝан мәрьва, йед кӧ тʹәзә тенә щьвате. Ԝи щурʹәйи һун али ԝан дькьн, кӧ әԝана бьвиньн, ԝәки һʹьзкьрьн мә ча Мәсиһийед рʹаст әʹйан дькә (Йуһʹн. 13:34, 35). Щабед кӧ һун сәр щьвата дьдьн, һәла һе щабед кьн жи, дькарьн ԝан мәрьвед тʹәзә һин кьн, кӧ чаԝа бь дьл у бь ԛәдьр баԝәрийа хԝә нишан кьн. Һун ӧса жи дькарьн тʹәви мьзгинване тʹәзә дәркʹәвьнә хьзмәтийе, у али ԝи бькьн кӧ рʹезед жь Кʹьтеба Пироз бьдә хәбате, чахе мәрьва һин дькә. Ԝи щурʹәйи, һуне ԝи һин кьн, ԝәки чʹәʹв бьдә Мәсиһ (Луԛа 10:25-28).

12. Гәло мәрʹа лазьм ьн фәрәсәтед мәхсус, сәва мәрьва бькьнә шагьрт? Шьровәкьн.

¹² Тʹӧ кәс жь мә гәрәке нәфькьрә, кӧ фәрәсәтед мәйә мәхсус гәрәке һәбьн, сәва мәрьва һин кьн у бькьн шагьртед Иса. Чьрʹа? Дина хԝә бьдьнә мәсәла Фаустинайе, йа кӧ Боливйайеда дьжи. Чахе әԝ рʹасти Шәʹдед Йаһоԝа һат, әԝе хԝәндьн ньзаньбу. Ԝәʹдә шунда, әԝ һьнәки хԝәндьне һин бу. Ньһа әԝ мьзгинвана ньхӧманди йә, у әԝ гәләк һʹьз дькә мәрьва һин кә. Һәр һʹәфти Фаустина 5 һинбунед Кʹьтеба Пироз дәрбаз дькә. Рʹаст ә Фаустина һе нькарә рʹьнд бьхунә чаԝа кӧ һʹәчʹи зәʹф шагьртед ԝе дькарьн, ле әԝе али шәш мәрьва кьр, ԝәки бенә ньхӧмандьне (Луԛа 10:21).

13. Һәрге жи ԝәʹде мә гәләк тʹӧнә, әм ча дькарьн һазьркьрьна шагьртада кʹәрәма бьстиньн?

¹³ Гәләк Мәсиһи иро бәтал ниньн, чьмки щабдарийед ԝанә фәрз һәнә. Ле йәкә әԝана жи ԝәʹдә хԝәрʹа башԛә дькьн, сәва һинбунед Кʹьтеба Пироз дәрбаз кьн, у шабунәкә мәзьн бьстиньн. Дина хԝә бьдьн мәсәла Меланийе, йа кӧ Аласкайеда дьжи. Әԝ бе мер ма у тʹәне ԛиза хԝәйә һʹәйшт сали хԝәй дькьр. Әԝ жь Дӧшәме һʹәта Инийе дьхәбьти, у һьн жи мьԛати баве хԝәйи нәхԝаш дьбу, нәхԝәшийа ԝи рʹәԛ бу. Ԝи шәһәрида Мелани тʹәне  Шәʹде Йаһоԝа бу. Әԝе һәр гав Хԝәдерʹа дӧа дькьр, сәва ԛәԝате бьстинә ԝәки бькарьбә сӧр-сәрмада һәрʹә хьзмәт кә, чьмки әԝе дьхԝәст кәсәки бьвинә, сәва һинбуна Кʹьтеба Пироз тʹәв дәрбаз кә. Ахьрийеда әԝ рʹасти жьнькәке һат наве кʹижане Сара бу. Сара әʹщебмайи ма у ша бу чахе наве Хԝәде бьһист. Һьнә ԝәʹдә шунда, Сарайе һинбуна Кʹьтеба Пироз дәстпекьр. Мелани гьли дькә: «Рʹожед Инийе еваре, әз гәләк ԝәстийайи бум, ле йәкә әз тʹәви ԛиза хԝә дьчум һинбуна Кʹьтеба Пироз дәрбаз дькьр, у мә һәрдӧ жи жь ве йәке кʹар дьстанд. Мәрʹа һʹәԝас бу, ԝәки пьрсед Сарайе леколин бькьн, сәва щаба ԝе бьдьн. Әм пʹьрʹ ша дьбун чахе мә дьдит, кӧ әԝ дьбә доста Йаһоԝа». Рʹаст ә мәрьвед Сарайе у һәвалед ԝейә дере мьԛабьли ԝе бун, йәкә әԝе дер һишт у һатә ньхӧмандьне.

14. а) Чаԝа мьзгинван мина мәʹсигьра нә? б) Гьлийед Паԝлос кӧ 2 Тимотʹейо 4:1, 2-да ньвисар ьн, ча сәр ԝә һʹӧкӧм дьбьн?

¹⁴ Һәрге жи ԝә хьзмәтийеда һе кәсәк нәдитийә, кӧ тʹәв һинбуна Кʹьтеба Пироз дәрбаз кьн, бәрдәԝам кьн бьгәрʹьн. Бир нәкьн, ԝәки Иса әԝ мәрьв, йед кӧ шагьрта дьгәрʹьн, бәрамбәри мәʹсигьра кьр. Мәʹсигьр дькарьн гәләк сьһʹәта жи хәрщ кьн, һʹәта кӧ мәʹсики бьгьрьн. Гәләк щар әԝана шәв йан жи бәрбанге нечʹире дькьн, у щара әԝана дьчьнә щийед дур жи (Луԛа 5:5). Мина ве йәке, һьнә мьзгинван епʹещә ԝәʹдә хәрщ дькьн, сәва бь сәбьр щурʹә-щурʹә ԝәʹдәда у щийада «нечʹирванийе» бькьн. Ле чьрʹа? Сәва кӧ әԝана һе зедә мәрьва бьвиньн. Әԝед кӧ ԝи шьхӧлида чьԛас дькарьн һәр тьшти дькьн, тенә кʹәрәмкьрьне, демәк  ԝан мәрьва дьвиньн, йед кӧ гӧһ дьдьнә мьзгинийе. Ле һун дькарьн нава рʹоже, ԝәʹде ӧса хьзмәт кьн, кӧ бькарьбьн рʹасти мәрьва бен, йан жи щийед ӧса, кʹидәре гәләк мәрьва дькарьн бьвиньн? (Бьхунә 2 Тимотʹейо 4:1, 2.)

15. Чьрʹа мәрʹа сәбьр лазьм ә чахе мәрьва һин дькьн?

¹⁵ Чьрʹа мәрʹа сәбьр лазьм ә, чахе һинбуна Кʹьтеба Пироз тʹәви мәрьва дәрбаз дькьн? Мәʹник әԝ ә, ԝәки әм гәрәке нә кӧ тʹәне али мәрьва бькьн һинкьрьнед Кʹьтеба Пироз пебьһʹәсьн, ле али ԝан бькьн ԝәки әԝана Ньвискʹаре Кʹьтеба Пироз, демәк Йаһоԝа Хԝәде, нас кьн у һʹьз бькьн. Хенщи ве йәке, сәва мәрьва һин кьн кӧ Иса чь жь шагьртед хԝә дәʹԝа дькә, әм гәрәке али шагьрта бькьн кӧ әԝана бьзаньбьн Мәсиһийед рʹаст гәрәке чаԝа бьжин. Әм гәрәке бь сәбьр али ԝан бькьн кӧ принсипед Кʹьтеба Пироз әʹмьре хԝәда бьдьнә хәбате. Һьнәк дькарьн ньһерʹандьн у хәйсәтед хԝә чәнд мәһада бьгӧһезьн, ле һьнәкарʹа жи һе зедә ԝәʹдә лазьм ә.

16. Жь сәрһатийа Раул һун чь пеһʹәсийан?

¹⁶ Мисйонерәки кӧ Перуйеда хьзмәт дькә, ԛәԝьмандьнәк гьли кьр кӧ дьдә кʹьфше, ԝәки чьԛас фәрз ә бь сәбьр бьн. Әԝ дьбежә: «Мьн тʹәви мерәки бь наве Раул, һинбуна Кʹьтеба Пироз дәрбаз дькьр, мә дӧ кʹьтеб дәрбаз кьр, ле йәкә диса жи чәтьнайед ԝийи мәзьн һәбун. Малбәта ԝида шәрʹ-дәʹԝ һәбун, әԝи чʹер дькьр, у зарʹед ԝи ԛәдьре ԝи нәдьгьртьн. Ле әԝ һәр гав дьһатә щьвате, у мьн бәрдәԝам дькьр тʹәсәлийа ԝи бькьм, сәва али ԝи у нәфәред ԝи бькьм. Паши се сала зедәтьр, ахьрийеда әԝ һатә ньхӧмандьне».

17. Әме готара дьнда дәрһәԛа чь шеԝьр кьн?

¹⁷ Иса готә шагьртед хԝә, кӧ «һәрʹьн у һʹәму мьләта бькьн шагьрт, ИМ». Сәва кӧ әве тʹәмийе биньн сери, әм тʹәви ԝан мәрьва хәбәр дьдьн, ньһерʹандьна кʹижана жь йа мә щӧдә йә, ӧса жи тʹәви ԝан, йед кӧ тʹӧ рʹелигийа ԛәбул накьн, йан жи баԝәр накьн, ԝәки Хԝәде һәйә. Готара дьнда әме шеԝьр кьн, кӧ чаԝа әм дькарьн ԝан мәрьварʹа мьзгинийе бәла кьн.