ХУШКА мә бь наве Силвйана, йа кӧ 27 сали йә у пешәнг ә дьбежә: «Чахе һәвалед мьн кʹижан кӧ хьзмәт дькьрьн щийед кӧ һʹәԝщәти һәйә, мьнрʹа гьли дькьрьн ԛәԝьмандьнед һʹәԝас, мьн жи дьхԝәст әве шабуне тәʹм кьм. Ле әз дьтьрсийам кӧ жь бо дәрәща хԝә әзе нькарьбьм дәрбази ԝи щийи бьм кʹидәре кӧ һʹәԝщәти һәйә».

Ле бал ԝә жи һәбун фькьред мина йед Силвйана? Һун жи дьхԝазьн хьзмәт кьн щийе кӧ һе зедә мьзгинван лазьм ьн, ле дӧдьли нә кӧ нькарьбьн ви нети биньн сери? Һәрге һун ӧса дьфькьрьн, тʹӧ щар нәтьрсьн әве гаве бавежьн. Пе аликʹарийа Йаһоԝа, бь һʹәзара хушк-бьра әԝан чәтьнайа сафи кьрьн, кʹижан кӧ рʹийа ԝан дьгьрт ԝәки дәрбази ԝи щийи бьн кʹидәре кӧ һʹәԝщәти һәйә. Сәва кӧ пебьһʹәсьн ԝәки Йаһоԝа ча али һьнәка кьрийә, ԝәрә әм дәрһәԛа Мадагәскаре хәбәр дьн, кӧ дьнйайеда жь гьравед лапә мәзьн, әв йа чара йә.

Нава 10 салед пашԝәхтийеда, 70 мьзгинвана зедәтьр жь 11 ԝәлата * дәрбази Африкайе бунә. Африкайеда хьзмәти гәләк бәред баш тинә, чьмки гәләк мәрьвед ԝедәре ԛәдьре Кʹьтеба Пироз дьгьрьн. Ӧса жи гәләк мьзгинванед кӧ ԝедәре дьжин, дәрбази Мадагәскаре дьбьн, сәва мьзгинийе бәла кьн. Ԝәрә әм тʹәви һьнәка жь ԝан бьбьнә нас.

Луис у Перин, жьн-мер ьн жь Франсайе, дәрбази Мадагәскаре бунә. Нава салада, әԝана дьфькьрин кӧ хьзмәт кьн ԝәлате хәрибда, ле Перин дьтьрсийа дәрбаз бә. Әԝ шьровәдькә: «Әз дьтьрсийам дәрбази щийе нәнас бьм. Һьн жи әз бәрхԝә дькʹәтьм ԝәки әме бьһельн нәфәред хԝә, щьват, мала хԝә, щийед мәрʹа нас у графика хԝә жи. Рʹаст бежьм һʹәчʹи зәʹф әв фькьред мьн рʹе мьн дьгьртьн ԝәки дәрбаз бьм». Сала 2012-да, Перин тьрса хԝә алт кьр у әԝ тʹәви Луис дәрбази Мадагәскаре бун. Дәрһәԛа ве сафикьрьна ԝан, Перин гьли дькә: «Бь рʹастийе баԝәрийа мә дьһа ԛәԝи бу, чьмки мә әʹмьре хԝәда дәсте Йаһоԝа дит». Луис зедә дькә: «Бьдьнә бәр чʹәʹве хԝә, кӧ чахе щара пешьн әм Мадагәскареда чунә сәр Евара Биранине, 10 мәрьвед кӧ мә тʹәви ԝан һинбуна Кʹьтеба Пироз дәрбаз дькьр, һатьн ԝедәре!».

 Ле гәло чь али Луис у Перин кьр, ԝәки ԝәʹде чәтьнайа хьзмәтийа хԝә нәһельн? Ԝана бь дӧа-дьрозга жь Йаһоԝа аликʹарийе дьхԝәстьн ԝәки ԛәԝате бьдә ԝан сәбьр кьн (Фили. 4:13). Луис гьли дькә: «Мә дит кӧ Йаһоԝа ча щаба дӧайед мә да у әԝи ‹әʹдьлайийа Хԝәде› да мә. Бь сайа ве йәке, мә һʹьш-аԛьле хԝә да сәр ве шабуне, кӧ мә жь хьзмәтийа хԝә дьстанд. Ӧса жи һәвалед мә мәрʹа нәʹмәка дьньвисин сәва мә бьшьдиньн, ԝәки сьст нәбьн у ԛәԝи бьминьн» (Фили. 4:6, 7; 2 Корн. 4:7).

Йаһоԝа сәбьра Луис у Перин кʹәрәм кьр. Луис дьбежә: «Сала 2014-да әм һатьнә тʹәглифкьрьне Мәкʹтәба сәва Жьн-Меред Мәсиһи *, кӧ Франсайеда дәрбаз дьбу. Әԝ мәкʹтәб жь Йаһоԝа пʹешкʹешәкә ӧса мәзьн бу, кӧ әме тʹӧ щар бир нәкьн». Паши хьлазийа ве мәкʹтәбе, әԝана гәләк ша бун кӧ диса Мадагәскареда һатьнә кʹьфшкьрьне.

Дидийе у Надин, жьн-мер жь Франсайе, сала 2010-да дәрбази Мадагәскаре бунә. Һьнге әԝана 50 сали зедәтьр бун. Дидийе гьли дькә: «Щаһьлтийеда әм һәрдӧ жи пешәнг бун, ле паше мә се зарʹ мәзьн кьр. Чахе зарʹед мә ида мәзьн бун, әм фькьрин ԝәки дәрбази щийе хәриб бьн кӧ ԝедәре хьзмәт кьн». Надин зедә дькә: «Әз бәрхԝә дькʹәтьм чахе дьфькьрим кӧ әме жь зарʹед хԝә дур бьн, ле зарʹед мә мәрʹа готьн: ‹Һәрге һуне дәрбаз бьн щийе хәриб кʹидәре һʹәԝщәтийа мьзгинвана һәйә, әме ԝәрʹа фьрнаԛ бьн!› Гьлийед ԝан мә ԛәԝи кьрьн кӧ дәрбаз бьн. Рʹаст ә әм ньһа жь ԝана гәләк дур дьжин, ле әм ша нә ԝәки тʹьме дькарьн тʹәви зарʹед хԝә пе тʹеле у интернете хәбәр дьн».

Бона Дидийе у Надин чәтьн бу зьмане Малагаси һин бьн. Надин дькʹәнә у дьбежә: «Әм ньһа зарʹед 20 сали ниньн». Ле гәло чь али ԝан кьр ԝи зьмани һин бьн? Йа пешийе, әԝана дьчунә сәр щьвата зьмане Франси. Паше, чахе ԝана дит кӧ ида һазьр ьн у ԝәʹде ԝан һәйә зьмане ԝи щийи һин бьн, әԝана дәрбази щьвата зьмане Малагаси бун. Надин дьбежә: «Гәләк мәрьв рʹасти кʹе әм хьзмәтийеда тен, һʹьз дькьн Кʹьтеба Пироз һин бьн. Гәләк щар әԝана жь мә рʹази нә кӧ әм тенә щәм ԝан. Пешийе мьн тʹьре әз хәԝнеда бум. Әз һʹьз дькьм ԝьра хьзмәт кьм ча пешәнг. Чахе әз шәбәԛа рʹадьбьм, әз хԝәрʹа дьбежьм: ‹Чьԛас баш ә кӧ әз иро дьчьм хьзмәтийе!›».

Чахе Дидийе тинә бира хԝә ԝәʹдә гава әԝи дәстпекьр зьмане Малагаси һин бә, бәшәра ԝи хԝәш дьбә. Әԝ дьбежә: «Мьн щьват дәрбаз дькьр, ле чахе хушк-бьра щаба хԝә дьдан, мьн тьштәк фәʹм нәдькьр. Мьн тʹәне дьгот ‹Зәʹф рʹази мә›. Щарәке чахе хушкәке щаба хԝә да у мьн ԝе спас кьр, әԝед кӧ пьштва рʹуньштьбун пе дәсте хԝә нишани мьн кьрьн ԝәки щаба ԝе нәрʹаст бу. Һьнге мьн бьрак пьрси, у ча әз дьфькьрьм әԝи рʹаст щаба хԝә да».

Сала 2005-да сәр щьвата мәзьн, драма һатә нишан кьрьне бь наве «Бьра Нетед Тә Хԝәде Һӧрмәт  кьн». Әԝ драма сәр һʹиме Кʹьтеба Пироз дәрһәԛа Тимотʹейо бу. Жьн-мер Тери у Надйа чахе әве драмайе дитьн, әԝ йәк дьле ԝан гьрт у ԝана һе зәʹф хԝәст кӧ хьзмәт кьн ԝи щийи кʹидәре кӧ һʹәԝщәтийа мьзгинвана һәйә. Тери гьли дькә: «Чахе драма хьлаз бу у мә дәсте хԝә һәвдьхьст, мьн жьна хԝә бь дәнге ньмьз пьрси, ‹Ле әм кʹӧда һәрʹьн?› Жьна мьн жи мьнрʹа гот ԝәки әԝ жи һәма ве йәке фькьри». Зутьрәке ԝана дәстпекьр бьгьһижьнә нета хԝә. Надйа дьбежә: «Һеди-һеди мә һур-муре хԝә ӧса кем кьр, кӧ һʹәта чар чәмәданада щи бун».

Әԝ жьн-мер сала 2006-да дәрбази Мадагәскаре бун у жь дәстпека хьзмәтийа хԝәда шабуне дьстиньн. Надйа дьбежә: «Мәрьвед кӧ хьзмәтийеда рʹасти мә тен, шабунәкә гәләк мәзьн мәрʹа тиньн».

Паши шәш сала әԝ жьн-мер рʹасти чәтьнайе һатьн. Дийа Надйа, Мари-Мадлен кӧ Франсайеда дьжит, кʹәт мьле хԝә шькенанд у сәре хԝә гәләк ешанд. Чахе әԝ жьн-мер тʹәви һʹәкиме ԝе хәбәр дан, ԝана жь Мари-Мадлен пьрсин һәла әԝ ԛайил ә йан на, ԝәки дәрбази Мадагәскаре бә у ԝедәре бьжи. Һьнге әԝ 80 сали бу, ле йәкә бь дьл у щан ԛәбул кьр әве тʹәглифкьрьне. Ле гәло әԝ чь дьфькьрә дәрһәԛа жийина ԝедәре? Әԝ гьли дькә: «Щара мьнрʹа чәтьн ә һини тьштәки бьм. Рʹаст ә синоред ԛәԝата мьн һәнә, ле йәкә әз тʹәхмин дькьм ԝәки әз щьватерʹа кʹаре тиньм. У лапә баш бона чь жи әз гәләк ша мә, әԝ ә кӧ жийина мьнә ԝедәре мәщале дьдә зарʹед мьн, ԝәки әԝана хьзмәтийа хԝәйә һәртʹьм нәһельн».

Бьраки мә бь наве Риан кӧ 22 сали йә, мәзьн бу Алаотра Мангорода. Әԝ һәйә региона кӧ Мадагәскара рʹоһлатеда йә. Мәкʹтәбеда әԝ гәләк рʹьнд һин дьбу у дьхԝәст хԝәндьна бьльнд бьстинә. Ле чахе әԝи дәстпекьр Кʹьтеба Пироз һин бә, әԝи нета хԝә гӧһаст. Әԝ гьли дькә: «Мьн гәләк дьхԝәст ԝәки зу екзамина хԝәйә пашьн хьлаз кьм у мьн соз да Йаһоԝа кӧ ‹Һәрге әз әԝ екзамин дәрбаз бьм, әзе бьбьмә пешәнг›». Чахе Риан мәкʹтәб хьлаз кьр, әԝи созе хԝә ани сери. Әԝ дәрбази бал бьраки мәйи пешәнг бу, хәбата ниврʹожи хԝәрʹа дит, у дәстпекьр пешәнгти. Риан гьли дькә: «Әв сафикьрьна лапә баш бу кӧ мьн әʹмьре хԝәда кьр».

Ле мәрьвед Риан фәʹм нәдькьрьн кӧ чьрʹа әԝ хԝәрʹа хәбатәкә баш нагәрʹә ԝәки пʹәре мәзьн чекә. Риан дьбежә: «Баве мьн, апе мьн у хушка пирька мьн, гьшк мьн ширәт дькьрьн ԝәки әз хԝәндьна бьльнд бьстиньм. Ле мьн нәдьхԝәст пешәнгтийа хԝә бьдьмә сәкьнандьне». Пешийа ве йәке, Риан, дьхԝәст хьзмәт кьра щийе кӧ һʹәԝщәти һәбу. Ле гәло чь ԝи һелан кьр кӧ ви нети бинә сери? Әԝ дьбежә: «Дьз кʹәтьнә мала мә у гәләк һур-муред мьн дьзин. Әԝ ԛәԝьмандьн мьн һелан кьр кӧ бьфькьрьм сәр гьлийед Иса, чахе гот кӧ хьзне хԝәрʹа ль әʹзмен тʹоп кьн. Мьн хԝәрʹа нет дани ԝәки алийе хԝәда һәр тьшти бькьм сәва хьзна рʹӧһʹани ԛазанщ кьм» (Мәт. 6:19, 20). Риан дәрбази алийе башуре бу, кʹижан кӧ щики һʹьшкайи йә у 1 300 километьр дур ә жь ԝи щийи кʹидәре әԝ дьжит. Ви щийи щьмәʹта Антандрои дьжи. Ле гәло чьрʹа әԝ чу һәма ԝедәре?

Мәһәк пешийа кӧ дьз кʹәтьнә мала Риан, әԝи тʹәви 2 мәрьвед Антандрои һинбуна Кʹьтеба Пироз дәстпекьр. Әԝи чәнд гьли сәр зьмане ԝан һин бу у дьфькьри дәрһәԛа мәрьвед Антандрои, йед кӧ тʹӧ щар мьзгинийа Пʹадшатийе нәбьһистьбун. Әԝ дьбежә: «Мьн Йаһоԝарʹа дӧа дькьр ԝәки али мьн бькә дәрбази щийе ӧса бьм, кʹидәре мәрьв сәр зьмане Тандрои хәбәр дьдьн».

Чаԝа кӧ Риан дәрбаз бу, әԝ дәрберʹа рʹасти чәтьнайе һат. Әԝи нькарьбу хԝәрʹа хәбат бьдита. Мәрьвәки жерʹа гот: «Тӧ ԝьра чь дьхԝази? Бона хәбате мәрьв жь ԝьра дьчьнә ԝи щийи, жь кʹӧ тӧ һати!». Паши дӧ һʹәфтийа, Риан чу сәр щьвата мәзьн. Пʹәре ԝи гәләк һьндьк бун, у әԝ ньзаньбу чь бькә. Рʹожа пашьн сәр щьвата мәзьн, бьраки тьштәки кьрә щева Рианда. Әԝ пʹәрә бу кӧ бәси ԝи бу сәва пашда һәрʹә Антандроида, у дәстпекә хԝәрʹа хәбата бьчʹук бькә кӧ ԛатʹьх бьфьрошә. Риан дьбежә: «Һәма ԝәʹдәда мьн сәр хԝә дәсте Йаһоԝа тʹәхмин кьр. Мьн дькарьбу бәрдәԝам кьра али ԝан мәрьва бькьм, йед кӧ тʹӧ щар дәрһәԛа Йаһоԝа нәбьһистьбун!». Ле ӧса жи гәләк шьхӧл һәбу кӧ щьватеда гәрәке бьһата кьрьне. Риан дьбежә: «Мьн щабдари станд  кӧ дӧ һʹәфте щарәке готаре бьхуньм. Йаһоԝа бь сайа тʹәшкиләта хԝә мьн һин дькьр». Риан һʹәта иро мьзгинийе бәла дькә мәрьвед кӧ сәр зьмане Тандрои хәбәр дьдьн у дьхԝазьн дәрһәԛа Йаһоԝа пебьһʹәсьн.

Йаһоԝа мәрʹа дьбежә ԝәки әԝед кӧ дьхԝазьн кʹәрәма сәр әʹрде бьстиньн, ԝе жь Хԝәдейе һәԛ бенә кʹәрәмкьрьне (Иша. 65:16). Чахе әм алийе хԝәда һәр тьшти дькьн сәва һе зедә хьзмәт кьн, әм сәр хԝә кʹәрәмед Йаһоԝа тʹәхмин дькьн. Дина хԝә бьдьн мәсәла Силвйанайе, бәʹса кʹижане мә дәстпека ве готареда кьр. Биньн бира хԝә ԝәки әԝ дьтьрсийа кӧ ԝе нькарьбә хьзмәт кә ԝи щийи кʹидәре һʹәԝщәти һәйә. Ле чьрʹа әԝ ӧса дьфькьри? Әԝ шьровәдькә: «Ньге мьнә чʹәпе ԝәкә 9 сантиметр жь ньге рʹасти кьнтьр ә. Ләма әз дькӧльм у зу дьԝәстьм».

Ле йәкә сала 2014-да Силвйана тʹәви хушкәкә щаһьл жь щьвата ԝе бь наве Силви Анн, тʹәвайи дәрбази гӧндәки бьчʹук бун, кʹижан кӧ 85 километр жь шәһәре ԝан дур бу. Рʹаст ә Силвйанайерʹа чәтьн бу, ле йәкә нета дьле ԝе һатә сери, у әԝе гәләк кʹәрәмед баш станд! Әԝ гьли дькә: «Паши саләкә хьзмәтийа мьнә ԝедәре, жьнькәкә щаһьл бь наве Доратин, тʹәви кʹе мьн һинбуна Кʹьтеба Пироз дәрбаз дькьр, сәр щьвата мәзьн һатә ньхӧмандьне».

Сәрһатийа ԝан мәрьва кӧ мә шеԝьр кьр, нишан дькьн кӧ чахе әм һәр тьшти дькьн сәва тʹӧ тьшт рʹе мә нәгьрә һе зедә хьзмәт бькьн, әм хԝәха сәр хԝә тʹәхмин дькьн кӧ чаԝа әв созе Йаһоԝа те сери: «Әзе тә хԝәй кьм, бәле әзе али тә бькьм» (Иша. 41:10, ДТʹ). Бь ве йәке һәләԛәтийа мә тʹәви Йаһоԝа һе ԛәԝи дьбә. Хенщи ве йәке, чахе әм бь рʹәзәдьли дьчьн хьзмәт дькьн щийед дьнда йан жи ԝәлате хәрибда, әԝ йәк мә һазьр дькә бона шьхӧлед кӧ дьнйа тʹәзәда әме бькьн. Чаԝа Дидийе гот, бәʹса кʹижани мә жоре кьр, «хьзмәткьрьна ԝи щийи кʹидәре кӧ һʹәԝщәти һәйә, бона ахьрийе гәләк тьшт мә һин дькә!». Ԝе чьԛас баш бә ԝәки дьһа зәʹф хьзмәткʹар ԝи щурʹәйи хьзмәт кьн у әԝе йәке сәр хԝә тʹәхмин кьн!