1, 2. Сала 2018-да кʹижан ԛәԝьмандьн ԝе йәктийе бинә, у чьрʹа? (Бьньһерʹә шькле әʹԝльн.)

САЛА 2018, 31 Адаре, чахе рʹо һәрʹә ава, бь милйона мәрьв нав тʹәмамийа дьнйайе ԝе тʹоп бьн бона щәжьне кӧ сале щарәке дәрбаз дьбә. Ве еваре Шәʹдед Йаһоԝа у гәләк мәрьвед дьн ԝе бенә сәр Евара Биранина мьрьна Иса. Һәр сал әв щәжьн щьмәʹта Хԝәде дькә йәктийе. Тʹӧ щәжьн сәр әʹрде йәктийа ӧса найнә!

² Бьдьнә бәр чʹәʹве хԝә кӧ Йаһоԝа у Иса чьԛас ша дьбьн чахе дина хԝә дьдьн, кӧ ве рʹоже сьһʹәт пәй сьһʹәтерʹа нав тʹәмамийа дьнйайе, бь милйона мәрьв тенә сәр ве ԛәԝьмандьна мәхсус. Кʹьтеба Пироз пешда пʹехәмбәрти кьр кӧ «әʹлаләтәкә ӧса мәзьн, кӧ тʹӧ кәси [нькарьбуйа] бьжьмарта жь һәр мьләти, жь һәр бәрәке, жь һәр щьмәʹте у жь һәр зьмани», ԝе бь дәнге бьльнд бькьнә гази: «Хьлазбун жь дәсте Хԝәдейе мә йә, Йе кӧ ль сәр тʹәхт рʹуньшти йә у жь дәсте ԝи Бәрхи йә» (Әʹйан. 7:9, 10). Чьԛас баш ә ԝәки бь сайа  Евара Биранине кӧ һәр сал дәрбаз дьбә, Йаһоԝа у Иса тенә рʹумәткьрьне!

3. Ве готареда әме щаба кʹижан пьрса пебьһʹәсьн?

³ Ве готареда әме щаба ԝан пьрса пебьһʹәсьн: 1) Әм ча дькарьн бона Биранине хԝә һазьр кьн? 2) Чаԝа Биранин щьмәʹта Хԝәде дькә йәктийе? 3) Чаԝа хут әм хԝәха дькарьн йәктийе хԝәй кьн? 4) Гәло ԝе һәбә Биранина пашьн?

4. Чьрʹа фәрз ә кӧ әм бенә сәр Евара Биранине?

⁴ Чьрʹа фәрз ә кӧ әм бенә сәр Евара Биранине? Мәʹник әԝ ә кӧ щьвин пʹара һʹәбандьна мә йә. Бешьк, Йаһоԝа у Иса дина хԝә дьдьнә ԝан, йед кӧ алийе хԝәда һәр тьшти дькьн сәва бенә сәр ве щьвинәкә лапә фәрз. Бәле, әм дьхԝазьн ԝәки Йаһоԝа у Иса бьвиньн кӧ әме әʹсә бенә сәр Евара Биранине, хенщи ве мәʹнийе һәрге сьһʹәт-ԛәԝата мә ԝе нәһелә йан жи һәрге дәрәщәкә гьранда бьн. Чахе әм пе кьред хԝә нишан дькьн ԝәки щьвинед сәва һʹәбандьне бона мә фәрз ьн, әм диса мәщал дьдьнә Йаһоԝа сәва наве мә кʹьтеба «биранинеда» хԝәй кә. Әԝ кʹьтеб ӧса жи те навкьрьне «кʹьтеба жийине». Ве кʹьтебеда Йаһоԝа наве ԝан мәрьва дьньвисә, кʹижанарʹа әԝ дьхԝазә жийина һʹәта-һʹәтайе бьдә (Малх. 3:16; Әʹйан. 20:15).

5. Пешийа рʹожа Биранине, ча әм дькарьн баԝәрийа хԝә бьщерʹьбиньн?

⁵ Һʹәфтийед пешийа Евара Биранине, ԝе керһати бә кӧ ԝәʹдә хԝәрʹа башԛә кьн, сәва дӧа бькьн у кʹур бьфькьрьн дәрһәԛа һәләԛәтийа хԝә тʹәви Йаһоԝа. (Бьхунә 2 Корьнтʹи 13:5.) Ле чаԝа ве йәке бькьн? Баԝәрийа хԝә бьщерʹьбиньн. Ԝе баш бә пьрсед ӧса бьдьнә хԝә: «Гәло әз бь рʹастийе баԝәр дькьм кӧ әз нава ве тʹәшкиләтеда мә, бь сайа кʹижани Йаһоԝа ԛьрара хԝә тинә сери? Гәло әз һәр тьшти дькьм сәва мьзгинийе бәла кьм у мәрьва һин кьм? Гәло пе кьред мьн те кʹьфше ԝәки әз баԝәр дькьм кӧ рʹожед ахьрийеда дьжим, у кӧ хьлазийа һʹӧкӧме Шәйтʹан незик ә? Гәло әз иро жи ԛайим итʹбарийа хԝә Йаһоԝа у Иса тиньм, чаԝа дәстпека хьзмәтийа хԝә Хԝәдерʹа?» (Мәт. 24:14; 2 Тимтʹ. 3:1; Ибрн. 3:14). Һәрге әм сәр пьрсед ԝи щурʹәйи бьфькьрьн, әԝ йәк ԝе али мә бькә кӧ дьле хԝә бьщерʹьбиньн.

6. а) Ча әм дькарьн жийина һʹәта-һʹәтайе бьстиньн? б) Рʹуспик чаԝа һәр сал хԝә һазьр дькә бона рʹожа Биранине? Һун жи ча дькарьн мина ԝи хԝә һазьр кьн бона ве рʹоже?

⁶ Диса ча һун дькарьн хԝә һазьр кьн бона рʹожа Биранине? Бьхуньн готаред дәрһәԛа Евара Биранине, у бьфькьрьн сәр. (Бьхунә Йуһʹәнна 3:16; 17:3.) Жийина һʹәта-һʹәтайе әм дькарьн тʹәне һьнге бьстиньн, һәрге Йаһоԝа «нас кьн», у баԝәрийа хԝә Иса биньн, демәк Кӧрʹе Ԝийи тайе тʹәне. Сәва хԝә бона Биранине һазьр кьн, һун дькарьн хԝәрʹа готара бьжберьн сәва леколинкьрьне, кʹижан кӧ али ԝә бькьн һе незики Йаһоԝа у Иса бьн. Дина хԝә бьдьнә мәсәла бьраки мә, кӧ гәләк ԝәхт рʹуспи йә. Ида гәләк сал ә әԝ готаред жь «Бьрща Ԛәрәԝьлийе» тʹоп дькә, кʹижан кӧ хут дәрһәԛа Евара Биранине нә, у дәрһәԛа һʹьзкьрьна Йаһоԝа у Иса һьндава мәда. Һʹәфтийед пешийа рʹожа Биранине, әԝ бьра әван готара диса дьхунә, у кʹур дьфькьрә кӧ әв щәжьн чьԛас фәрз ә. Ԝәʹдә дәрбаз дьбә у әԝ диса готарәк йан дӧдӧ зедә дькә. Әԝ рʹуспи тедәрхьст ԝәки һәр сал әԝ тьштед тʹәзә педьһʹәсә чахе ԝан готара дьхунә, у ӧса жи дьфькьрә сәр рʹезед Кʹьтеба Пироз кӧ Евара Биранинева гьредайи нә. Ле йа лапә фәрз әԝ ә, кӧ әԝ дьвинә ԝәки чаԝа һәр сал һʹьзкьрьна ԝи һьндава Йаһоԝа у Иса һе ԛәԝи дьбә. Һәрге һун  жи пешийа рʹожа Биранине ԝи щурʹәйи леколина бькьн, һʹьзкьрьн у рʹазибуна ԝә жи һьндава Йаһоԝа у Иса ԝе дьһа ԛәԝи бә, у жь рʹожа Биранине һуне һе зедә кʹаре бьстиньн.

7. а) Ԝәʹде Евара Шива Хӧдан йа пешьн, Иса дәрһәԛа чь дӧа кьр? б) Чь дьдә кʹьфше кӧ Йаһоԝа щаба дӧайе Иса да?

⁷ Ԝәʹде Евара Шива Хӧдан йа пешьн, Иса дӧа кьр кӧ һʹәму шагьртед ԝи ԝе бьбьнә йәк, чаԝа Иса тʹәви Баве хԝә йәктийеда нә. (Бьхунә Йуһʹәнна 17:20, 21.) Йаһоԝа бь рʹастийе щаба дӧайе Кӧрʹе хԝәйи дәлал да, у ньһа бь милйона мәрьв баԝәр дькьн кӧ Йаһоԝа Кӧрʹе хԝә шандә сәр әʹрде. Евара Биранине әʹйан избат дькә кӧ Шәʹдед Йаһоԝа йәктийеда ньн. Мәрьвед жь щурʹә-щурʹә мьләта, сәр тʹәмамийа әʹрде ве рʹоже тʹоп дьбьн. Һьнә щийада бона гәләка әԝ тьштәки әʹщеб ә кӧ мәрьвед жь щурʹә-щурʹә раса тʹәвайи тʹоп бьн, һьнәк мәрьв жи дьфькьрьн кӧ әԝ нә лайиԛ ә. Ле Йаһоԝа у Иса ӧса сәр ве йәке наньһерʹьн. Бәр чʹәʹве ԝан әԝ йәкти тьштәки бәдәԝ у хԝәш ә.

8. Йаһоԝа бь сайа Һәзәԛел пʹехәмбәр дәрһәԛа йәктийе кʹижан әʹламәти да?

⁸ Әм щьмәʹта Йаһоԝа нә, ләма әм әʹщебмайи наминьн кӧ йәктийа мә һәйә. Йаһоԝа хԝәха ве йәке пʹехәмбәрти кьр. Дина хԝә бьдьнә әʹламәтийа кӧ Хԝәде бь сайа Һәзәԛел пʹехәмбәр да. Йаһоԝа готә Һәзәԛел кӧ дӧ дар тʹәви һәв кә, демәк дара «бона Щьһудайе» у дара «бона Усьв». (Бьхунә Һәзәԛел 37:15-17.) «Бьрща Ԛәрәԝьлийеда» йа мәһа Тирмәһе сала 2016-да, дьһатә шьровәкьрьне: «Йаһоԝа бь Һәзәԛел пʹехәмбәр гот кӧ щьмәʹта Исраел, ԝе вәгәрʹьнә Әʹрде Создайи у чаԝа щьмәʹтәк диса бьбьнә йәк. Әԝ пʹехәмбәрти ӧса жи һатә готьне дәрһәԛа йәктийа щьмәʹта Хԝәде, ԝәʹде рʹожед ахьрийеда».

9. Һәр сал ԝәʹде Евара Биранине пʹехәмбәртийа Һәзәԛел дәрһәԛа йәктийе ча те сери?

⁹ Дәстпека сала 1919, Йаһоԝа Мәсиһийед бьжарти диса тʹәзәда саз кьр у кьрә йәк. Әԝана бь симболик дара «бона Щьһудайе» бун. Паше ве йәке, һе зедә у зедә мәрьвед кӧ һивийа жийина һʹәта-һʹәтайе нә, тʹәви ԝан бьжартийа бунә йәк. Әԝана бь симболик дара «бона Усьв» ьн, у әԝ һәрдӧ кʹом бунә «кәрик» (Йуһʹн. 10:16; Зәкәр. 8:23). Йаһоԝа пʹехәмбәрти кьр кӧ әԝ һәрдӧ дар ԝе бькә йәк, у дәсте ԝида әԝ бьбьнә дарәк (Һәзԛл. 37:19). Иро әԝ һәрдӧ кʹом йәктийеда тʹәвайи хьзмәт дькьн бьн рʹебәрийа Пʹадшаки, демәк Иса Мәсиһ, кʹижан кӧ бь пʹехәмбәрти һатә навкьрьне «Даԝьде хьзмәткʹаре» Хԝәде (Һәзԛл. 37:24, 25, ДТʹ). Һәр сал рʹожа Евара Биранина мьрьна Иса, чахе әм тʹәвайи тʹоп дьбьн, әм ве йәктийе нава ван дӧ кʹомада пе чʹәʹве хԝә дьвиньн, чаԝа кӧ пʹехәмбәртийа Һәзәԛелда те готьне. Ле гәло әм алийе хԝәда чь дькарьн бькьн ԝәки йәктийе хԝәй кьн?

10. Нава щьмәʹта Хԝәдеда ча әм дькарьн йәктийе хԝәй кьн?

¹⁰ Чь щурʹәйи әм дькарьн нава щьмәʹта Хԝәдеда йәктийе хԝәй кьн? Йа пешьн, әм гәрәке шкәсти бьн. Чахе Иса сәр әʹрде бу, әԝи шагьртед хԝә ширәт кьр ԝәки әԝана шкәсти бьн (Мәт. 23:12). Һәрге әм дьлда шкәсти у мьлук ьн, әме тʹӧ щар чʹәʹв нәдьдә мәрьвед ве дьнйайе, йед кӧ хԝә сәр мәрьварʹа дьгьрьн у хԝә бьльнд һʹәсаб дькьн. Шкәстибун али мә дькә ԝәки ԛәдьре ԝан бьгьрьн у гӧрʹа ԝанда бьн, йед кӧ рʹебәрийе дьдьн. Әԝ йәк щьват йәктийеда хԝәй дькә. Хенщи ве йәке, һәрге әм шкәсти нә, бь ве йәке әм  дьле Хԝәде ша дькьн, чьмки әԝ «мьԛабьли кʹӧбар-бабаха йә, ле кʹәрәме дьдә шкәстийа» (1 Пәт. 5:5).

11. Чахе әм дьфькьрьн дәрһәԛа симболед рʹожа Биранине, әԝ йәк ча али мә дькә йәктийе хԝәй кьн?

¹¹ Йа дӧда, кӧ чаԝа әм дькарьн йәктийе хԝәй кьн, әԝ һәйә фькьрандьна сәр симбола, кʹижан кӧ ԝәʹде Биранине тенә хәбьтандьне. Ԝе баш бә әм ве йәке бькьн пешийа Биранине у илаһи рʹожа Биранине. Симбол әԝ һәнә нане шкәва у шәрава сор (1 Корн. 11:23-25). Нан бь симболик те һʹәсабе бәдәна Исайә бегӧнә, кʹижан кӧ әԝи ча ԛӧрбан бәрва да. Шәрав те һʹәсабе хуна ԝи кӧ һатә рʹетьне. Ле бәс нинә тʹәне фәʹм кьн әв симбол чь тенә һʹәсабе. Бир нәкьн кӧ ԛӧрбана Мәсиһ дӧ щурʹе һʹьзкьрьна мәзьн әʹйан дькә. Әԝ һәйә һʹьзкьрьна Йаһоԝа кӧ әԝи Кӧрʹе хԝә бона мә ԛӧрбан кьр, у һʹьзкьрьна Иса кӧ әԝ бь рʹәзәдьли әʹмьре хԝә да бона мә. Һәрге әм бьфькьрьн сәр һʹьзкьрьна ԝан, дьле мә жи ԝе һьндава ԝан бь һʹьзкьрьне тʹьжә бә. Һʹьзкьрьна мә һәр кәси һьндава Йаһоԝа, чаԝа тʹел мә тʹәвайи гьредьдә у йәктийа мә ԛәԝи дькә.

12. Чаԝа Иса мәсәледа дәрһәԛа пʹадша у хӧламед ԝи әʹйан кьр, ԝәки Йаһоԝа дьхԝазә кӧ әм бьбахшиньнә мәрьва?

¹² Йа сьсийа, чаԝа әм дькарьн йәктийе хԝәй кьн, әԝ һәйә чахе әм бь дьл дьбахшиньн мәрьва. Чахе әм дьбахшиньнә ԝан, йед кӧ мә данә хәйидандьне, әм нишан дькьн ԝәки ԛимәт дькьн бахшандьна гӧнед мә, кӧ бь сайа ԛӧрбана Мәсиһ мә стандийә. Дина хԝә бьдьнә мәсәла Иса кӧ Мәтта 18:23-34-да ньвисийә. Пьрсед ӧса бьдьнә хԝә: «Гәло әз дьхԝазьм әԝ ширәта Иса биньм сери? Әз бь сәбьр ьм у бь фәʹмдарийе мә тʹәви хушк-бьред хԝә? Әз һазьр ьм бьбахшиньмә ԝан, йед кӧ һьндава мьнда гӧнә кьрьнә?». Щара мәрʹа ча мәрьвед гӧнәкʹаррʹа гәләк чәтьн ә бьбахшиньн. Ле йәкә әԝ мәсәла Иса рʹьнд нишан дькә, ԝәки Йаһоԝа дьхԝазә әм ве йәке бькьн. (Бьхунә Мәтта 18:35.) Иса әшкәрә дьдә кʹьфше кӧ Йаһоԝа ԝе нәбахшинә мә, һәрге әм нәбахшиньнә хушк-бьред хԝә чахе әԝана гӧне хԝә  тиньн рʹуйе хԝә. Әԝе йәке әм гәрәке бир нәкьн. Чахе әм дьбахшиньнә мәрьва чаԝа Иса мә һин кьр, әм йәктийа хԝәйә ԛимәт хԝәй дькьн.

13. Һәрге әм әʹдьлайе дькьн, ча әԝ йәк йәктийа мә хԝәй дькә?

¹³ Чахе әм дьбахшиньнә йед дьн, әм нишан дькьн кӧ әм әʹдьлайе дькьн. Биньн бира хԝә ширәта Паԝлосе шанди, әԝи гот: «Бьщәʹдиньн, кӧ йәктийа рʹӧһʹ пе һәвгьредана әʹдьлайийе хԝәй кьн» (Әфәс. 4:3). Пешийа Евара Биранине у рʹожа Биранине, кʹур бьфькьрьн кӧ һун ча ньн һьндава мәрьва. Жь хԝә бьпьрсьн: «Гәло мьн нас дькьн ча мәрьве кӧ зу һерс накʹәвә у хәйде хԝәй накә? Гәло мәрьв дькарьн бьвиньн кӧ әз алийе хԝәда һәр тьшти дькьм, сәва әʹдьлайе у йәктийе хԝәй кьм?». Бәле, гәләк фәрз ә кӧ әм сәр ԝан пьрса кʹур бьфькьрьн.

14. Чаԝа әм дькарьн «һʹьзкьрьнеда ль бәр һәв дахьн»?

¹⁴ Йа чара, кӧ чаԝа әм дькарьн йәктийе хԝәй кьн, әԝ ә кӧ һʹьзкьрьнеда чʹәʹв бьдьнә Йаһоԝа, йе кӧ Хԝәдейе һʹьзкьрьне йә (1 Йуһʹн. 4:8). Әм тʹӧ щар нахԝазьн бежьн сәр хушк-бьра гьлийед ӧса: «Әз гәрә ԝана сәбьр кьм, чьмки хушк-бьред мьн ьн, ле әʹсә нинә әз ԝана һʹьз бькьм!». Бьфькьрьн сәр ширәта Паԝлос, йе кӧ гот «һʹьзкьрьнеда ль бәр һәв дахьн» (Әфәс. 4:2). Дина хԝә бьдьн, әԝи нә гот тʹәне «ль бәр һәв дахьн», демәк һәв сәбьр кьн, ле әԝи гот кӧ «һʹьзкьрьнеда» ве йәке бькьн. Демәк фьрԛи һәйә. Щьвата мәда һʹәму щурʹә мәрьв һәнә кʹижана Йаһоԝа незики хԝә кьрийә (Йуһʹн. 6:44). Әԝана дьле ԝи һатьн, ләма әԝи ԝана незики хԝә кьр. Ԝәки ӧса нә, чь изьна мә һәйә кӧ лома хушк-бьред хԝә бькьн, у бежьн кӧ әԝана һежайи һʹьзкьрьна мә ниньн? Дәԝсе, әм гәрәке тʹӧ щар хԝә паш нәхьн һʹьзкьрьне бьдьнә кʹьфше, чьмки Йаһоԝа ве йәке жь мә дәʹԝа дькә (1 Йуһʹн. 4:20, 21).

15. Әм жь кʹӧ заньн ԝәки Евара Биранина пашьн ԝе һәбә?

¹⁵ Щарәке ԝе бе әԝ рʹож, чахе Евара Биранине щара пашьн бе дәрбазкьрьне. Ле әм жь кʹӧ ве йәке заньн? Паԝлос Мәсиһийед бьжартирʹа ньвиси кӧ һәр сал бь дәрбазкьрьна Биранина мьрьна Иса, әԝана ԝе «мьрьна Хӧдан бькьнә дәнги, һʹәта һатьна ԝи» (1 Корн. 11:26). Иса жи дьгот бона ве «һатьна» хԝә, чахе пʹехәмбәртийа дәрһәԛа рʹожед ахьрийе гьли дькьр. Дәрһәԛа тәнгасийа мәзьн кӧ пешийа мә йә, Иса гот: «Нишана Кӧрʹе Инсан ԝе ль әʹзмен хӧйа бә у һʹәму мьләтед дьнйайе ԝе шине бькьн, гава бьбиньн Кӧрʹе Инсан ль сәр әʹԝред әʹзмен бь ԛәԝат у рʹумәта мәзьн те. Әԝе [Иса] мьлйакʹәтед хԝә бь борʹийа дәнге бьльнд бьшинә у ԝе бьжартийед ԝи жь һәр чар ԛӧлба бәрәв кьн, жь пʹәрʹәки әʹзмана һʹәта пʹәрʹе дьн» (Мәт. 24:29-31). Щьвандьна йед бьжартийа ԝе һьнге бә, чахе һʹәму Мәсиһийед бьжарти йед кӧ сәр әʹрде манә, хәлата хԝәйә әʹзмани бьстиньн. Әԝ йәк ԝе бьԛәԝьмә ԝәʹде дәстпека тәнгасийа мәзьн, ле пешийа Һармәгәдоне. Паше Иса у 144 000, ԝе тʹәви пʹадшед дьнйайе шәрʹ бькьн (Әʹйан. 17:12-14). Евара Биранине ԝе щара пашьн дәрбаз бә, пешийа кӧ Иса бьжартийа бьщьвинә.

16. Чьрʹа һун дьхԝазьн бенә сәр Евара Биранине?

¹⁶ Дә ԝәрә әм хԝәрʹа нете дайньн ԝәки бенә сәр Евара Биранине кӧ ԝе 31 Адаре бә, сала 2018-да. У ԝәрә әм Йаһоԝарʹа дӧа бькьн сәва нава щьмәʹта ԝида йәкти бе хԝәйкьрьне. (Бьхунә Зәбур 133:1.) Бир нәкьн, ԝе бе рʹожәкә ӧса кӧ әме щара пашьн бенә сәр Евара Биранине. Ле һʹәта әԝ рʹож бе, ԝәрә әм алийе хԝәда һʹәму тьшти бькьн, сәва кӧ бенә сәр ве щьвине у йәктийа хԝәрʹа ша бьн ԝәʹде Евара Биранине.