1, 2. Йаһоԝа чь щурʹәйи мәрʹданийе дьдә кʹьфше?

ЙАҺОԜА Хԝәдайе мәрʹд ә. Һәр тьшт чь кӧ бал мә һәйә, жь ԝи йә. Һʹәму зер, зив у һʹәму тьштед ԛимәт чь кӧ әʹрд дьдә, йед ԝи нә, у әԝ ԝан тьшта дьдә хәбате сәва әʹмьр һәбә (Зәб. 104:13-15; Һаг. 2:8). Жь Кʹьтеба Пироз әм педьһʹәсьн кӧ Йаһоԝа ча ԝан тьштед ԛимәт бь кʹәрәмәт бона кʹара щьмәʹта хԝә дьда хәбате.

² Мәсәлә, 40 сала Йаһоԝа манна у ав дьда щьмәʹта Исраел, чахе әԝана бәрʹийеда бун (Дәркʹ. 16:35). Ләма жи «ԛәт кемасийед ԝан тʹӧнә бун» (Нәһәм. 9:20, 21). Йаһоԝа ӧса жи бь Елиша пʹехәмбәр, бь кʹәрәмәт ӧса кьр кӧ бьзьр мала жьнәбикә амьнда зедә бу. Хԝәде бь сайа ве йәке али ԝе кьр, ԝәки әԝ дәйне хԝә бьдә у сәва епʹещә пʹәре ԝе һәбә ԝәки хԝә у кӧрʹед хԝә хԝәй кә (2 Пʹадш. 4:1-7). Бь аликʹарийа Йаһоԝа, Иса али мәрьва дькьр бь хԝарьне у һәла һе жи бь пʹәра чахе әԝ йәк лазьм бу (Мәт. 15:35-38; 17:27).

3. Ве готареда әме дәрһәԛа чь шеԝьр кьн?

 ³ Йаһоԝа дькарә һәр тьшт бьдә хәбате сәва әʹфьрине хԝәйә сәр әʹрде хԝәй кә. Ле Йаһоԝа ӧса жи хьзмәткʹаред хԝә һелан дькә, ԝәки әԝана һәбука хԝә бьдьнә хәбате сәва пьштгьрийа тʹәшкиләта ԝи бькьн. (Дәркʹ. 36:3-7; бьхунә Мәтʹәлок 3:9.) Ле гәло чьрʹа Йаһоԝа дьхԝазә ԝәки әм пе һәбука хԝә рʹазибуна хԝә ԝирʹа бьдьнә кʹьфше? Чаԝа мәрьвед амьнә бәре аликʹари дьдан бона шьхӧле Йаһоԝа? Иро чаԝа тʹәшкиләта Йаһоԝа пʹәре ԛӧрбанкьри дьдә хәбате? Щаба ԝан пьрса әме ве готареда пебьһʹәсьн.

4. Чахе әм пьштгьрийа шьхӧле Йаһоԝа дькьн, бь ве йәке әм чь нишан дькьн?

⁴ Әм тьштед хԝәйә ԛимәт дьдьнә Йаһоԝа, чьмки ԝи һʹьз дькьн у ԛимәт дькьн. Чахе әм дьфькьрьн сәр ве йәке кӧ Йаһоԝа чь бона мә дькә, дьле мә бь рʹазибуне тʹьжә дьбә. Даԝьд Пʹадша чахе шьровәкьр кӧ чь лазьм ә сәва пʹарьстгәһе ава кьн, әԝи гот кӧ һәр тьшт әм жь Йаһоԝа дьстиньн, у чь жи әм дьдьнә ԝи, әԝ тьшт диса жи жь ԝи нә. (Бьхунә 1 Дирок 29:11-14.)

5. Кʹьтеба Пироз ча нишан дькә ԝәки мәрʹдани әԝ һәйә пʹара һʹәбандьна мә?

⁵ Әм ӧса жи тьштед ԛимәт дьдьнә Йаһоԝа, чьмки ԝи щурʹәйи жи әм ԝи дьһʹәбиньн. Йуһʹәннайе шанди хәԝн-хәйаледа бьһист кӧ чаԝа әʹзменда хьзмәткʹаред Йаһоԝа дьготьн: «Йа Хӧдан Хԝәдейе мә, тӧ һежа йи кӧ рʹумәт, һӧрмәте у ԛәԝате бьстини. Чьмки тә һәр тьшт әʹфьрандьн у бь хԝәстьна тә әԝ әʹфьрин у һәнә» (Әʹйан. 4:11). Бешьк, Йаһоԝа һежайи һʹәму рʹумәт-һӧрмәте йә, ләма әм дьхԝазьн тьштед лапи баш бьдьнә ԝи. Йаһоԝа бь Муса щьмәʹта Исраелрʹа тʹәми да, кӧ сале се щара щәжьне дәрбаз кьн, у бәр Йаһоԝа бьсәкьньн. Әԝ щәжьн бун пʹара һʹәбандьна ԝан. Исраели ԝәʹде ԝан щәжьна «дәст вала ль бәр Хӧдан» гәрәке нәсәкьнийана (Ԛан. Дщр. 16:16). Иро жи ӧса нә, мәрʹданийа рʹәзәдьли дькʹәвә нава һʹәбандьна мә, у ӧса әм нишан дькьн кӧ тʹәшкиләта Йаһоԝа ԛимәт дькьн у пьштгьрийа шьхӧле ԝи дькьн.

6. Чьрʹа чахе әм мәрʹд ьн әм кʹаре дьстиньн? (Бьньһерʹә шькле әʹԝльн.)

⁶ Чахе әм бь мәрʹданийе дьдьн, нә кӧ тʹәне дьстиньн, әԝ мәрʹа жи кʹаре тинә. (Бьхунә Мәтʹәлок 29:21.) Бьдьнә бәр чʹәʹве хԝә зарʹа кӧ де-баве хԝәрʹа пʹешкʹешәки дьдә, кʹижан кӧ әԝи пе пʹәре ԝан кʹьрʹийә. Бона де-бав әв пʹешкʹеш гәләк ԛимәт ә! Ӧса жи бьдьнә бәр чʹәʹве хԝә ԛиз йан кӧрʹ кʹижан кӧ пешәнг ә, мала де-баве хԝәда дьжи у пʹәрә дьдә де-баве хԝә сәва хәрще мале дадьн йан жи хԝарьне бькʹьрʹьн. Рʹаст ә де-бав жь зарʹе дәʹԝа накьн ве йәке, ле әԝана ԛәбул дькьн пʹешкʹеша ԝи. Чьрʹа? Чьмки де-бав заньн кӧ ӧса зарʹ дьдә кʹьфше кӧ әмәке ԝан дьшекьринә. Мина ве йәке, Йаһоԝа жи занә кӧ чахе әм тьштед хԝәйә ԛимәт дьдьн, әԝ бона мә кʹар ә.

7, 8. Ԝәʹде бәре щьмәʹта Йаһоԝа чь мәсәлә һишт ԛӧрбанкьрьнеда а) бона шьхӧлед мәхсус? б) бона пьштгьрийа шьхӧле хьзмәтийе?

⁷ Жь Кʹьтеба Пироз әм педьһʹәсьн кӧ сәва шьхӧле Хԝәде, щьмәʹта Йаһоԝа тьштед хԝәйә ԛимәт ԛӧрбан дькьр. Мәсәлә, Муса Исраелийа һелан кьр ԝәки бона кончекьрьне ԛӧрбана бькьн. Паше чахе Даԝьд Пʹадша дьхԝәст пʹарьстгәһе ава кьра, әԝи жи  щьмәʹт һелан кьр ԝәки ԛӧрбанкьрьна бькьн (Дәркʹ. 35:5; 1 Дир. 29:5-9). Ӧса жи ԝәʹде Йоаш Пʹадша, кʹаһина пе пʹәре ԛӧрбанкьри пʹарьстгәһе тʹәзә кьрьн (2 Пʹадш. 12:4, 5). Ԛьрʹна йәкеда, Мәсиһи бьһистьн кӧ Щьһустанеда хәлайи дәстпедьбу у хушк-бьрарʹа аликʹари лазьм ә. Ләма жи ԝана хԝәрʹа ԛьрар кьр, кӧ «жь дәсте кʹева чьԛас те аликʹарийе бона баԝәрмәндед Щьһустане бьшиньн» (Кʹар. Шанд. 11:27-30).

⁸ Щьмәʹта Йаһоԝа ӧса жи аликʹари дьда ԝан, йед кӧ рʹебәрийа шьхӧле ԝи дькьрьн. Пе Ԛануна Муса, Леԝи хԝәйе ԝар нибун мина бәрәкед майин. Ле Исраели жь һәбука хԝә дәһәк дьданә Леԝийа, у әԝ йәк али ԝан дькьр ԝәки һʹьш-аԛьле хԝә бь тʹәмами бьдьнә сәр хьзмәтийа хԝә (Жьмар 18:21). Мина ве йәке, ԛьрʹна йәкеда жьн бь мәрʹдани Исарʹа у шандийарʹа «бь һәбука хԝәва . . . бәрдәсти дькьрьн» (Луԛа 8:1-3).

9. Бәре чь щурʹәйи ԛӧрбан дькьрьн?

⁹ Бәле, щурʹе ԛӧрбанкьрьне кӧ хьзмәткʹаред бәре дькьрьн, жь һәв щӧдә дьбун. Чахе Исраели бәрʹийеда ԛӧрбан анин сәва авакьрьна кон, дьԛәԝьмә ԝана әԝ тьшт анин, кʹижан кӧ жь Мьсьре тʹәви хԝә бьрьбун (Дәркʹ. 3:21, 22; 35:22-24). Ԛьрʹна йәкеда, һьнә Мәсиһи һәбука хԝә дьфьротьн, мәсәлә әʹрде хԝә йан жи малед хԝә, у әԝ пʹәрә дьданә шандийа. Шанди жи әԝ пʹәрә дьданә хәбате бона хушк-бьред кӧ һʹәԝщә бун (Кʹар. Шанд. 4:34, 35). Ле йед дьн пʹәрә башԛә дькьрьн у тʹьме ԛӧрбан дькьрьн сәва пьштгьрийа шьхӧле Хԝәде бькьн (1 Корн. 16:2). Ԝи щурʹәйи һʹәму мәрьв, һьн мәрьвед дәԝләти һьн жи йед кʹәсиб алийе хԝәда дькарьбун ԛӧрбана бькьн (Луԛа 21:1-4).

10, 11. а) Чаԝа әм дькарьн чʹәʹв бьдьнә мәрʹданийа хьзмәткʹаред бәре? б) Һун чь дьфькьрьн дәрһәԛа ви ԛәдьри кӧ дькарьн пьштгьрийа шьхӧле Пʹадшатийе бькьн?

¹⁰ Иро жи дьбәкә жь мә бе хԝәстьне кӧ бона проектәки мәхсус ԛӧрбана бькьн. Мәсәлә, дьбәкә щьвата ԝә дьхԝазә Ода Щьвата тʹәзә ава кә йан жи тʹәзә бькә. Ӧса жи дьбәкә пʹәрә лазьм ә сәва филиала ԝә тʹәзә кьн, йан жи хәрще щьвата мәзьн дадьн, йан жи аликʹари бьдьнә хушк-бьра ԝәʹде тʹәшԛәлед тʹәбийәте. Ԛӧрбанкьрьнед мә ӧса жи аликʹари дьдьнә мисйонера, пешәнгед мәхсус, бәрпьрсийаред мьһале, хьзмәткʹаред филиала сәрәкә у ӧса жи филиалед дьн нав тʹәмамийа дьнйайе. Щьвата ԝә ӧса жи дьбәкә тʹьме пʹәрә дьшинә бона авакьрьна Одед Щьвата у щьватед мәзьн, сәва хушк-бьред нав тʹәмамийа дьнйайе кʹаре бьстиньн.

¹¹ Һәр кәс жь мә дькарә алийе хԝәда пьштгьрийа шьхӧле Йаһоԝа бькә, кʹижан кӧ ԝан рʹожед ахьрийеда те кьрьне. Чахе әм пʹәрә ԛӧрбан дькьн ԛӧтʹийед Ода Щьватеда йан жи малпәра мә jԝ.org-да, әм тʹӧ кәсирʹа навежьн кӧ мә пʹәрә ԛӧрбан кьрийә. Дьбәкә әм дьфькьрьн ԝәки пʹәре кӧ әм ԛӧрбан дькьн, ԛә тьштәки нинә чьмки һьндьк ә. Ле бь рʹастийе һʹәчʹи зәʹф пʹәре ԛӧрбанкьри кӧ тенә тʹәшкиләте, бь сайа ԛӧрбанкьрьнед һьндьк тʹоп дьбьн, нә кӧ чәнд ԛӧрбанкьрьнед мәзьн. Хушк-бьред мә, һәла һе йед дәсттәнг жи, мина мәрьвед Мәкәдони нә, кʹижан кӧ «кʹәсибийа хԝәйә гьранда жи», бь дьл у щан бь мәрʹданийе ԛӧрбана дькьрьн (2 Корн. 8:1-4).

12. Чаԝа тʹәшкиләта мә ԛӧрбанкьрьна хәрщ дькә?

¹² Әԝ йәк кӧ чаԝа Кʹома Рʹебәрийе пʹәре тʹәшкиләте хәрщ дькә, амьни у  сәрԝахти дьдә кʹьфше (Мәт. 24:45). Әԝана дӧа дькьн, ԝәки ԝан пʹәра кӧ тенә ԛӧрбанкьрьне рʹаст хәрщ кьн (Луԛа 14:28). Ԝәʹде бәре, мәрьвед амьн йед кӧ щабдар бун бона тьштед ԛӧрбанкьри, дина хԝә дьдан ԝәки әԝ тьшт хут тʹәне бона шьхӧле Йаһоԝа бенә хәрщкьрьне. Мәсәлә, Әзра жь Пʹадше Фарьси вәдьгәрʹийа Оршәлиме пе тьштед ԛӧрбанкьри, демәк зер, зив у тьштед дьнә ԛимәт. Баһе ԝан тьшта иро 100 милйон долара зедәтьр ә. Әзра һʹәсаб дькьр кӧ әԝ тьштед ԛӧрбанкьри хут бона Йаһоԝа бун, у әԝи рʹебәри кьр сәва әԝ тьштед ԛимәт ӧнда нәбьн, чьмки рʹийед ԝедәре хоф бун (Әзр. 8:24-34). Ԛьрʹна йәкеда, Паԝлосе шанди пʹәрә тʹоп кьр, ԝәки аликʹари бьдә хушк-бьред Щьһустанеда. Әԝи алийе хԝәда һәр тьшт кьр сәва әԝ пʹәрә рʹаст бе хәрщкьрьне, «нә кӧ тʹәне ль бәр Хӧдан, ле ль бәр мәрьва жи». (Бьхунә 2 Корьнтʹи 8:18-21.) Иро жи тʹәшкиләта мә чʹәʹв дьдә Әзра у Паԝлосе шанди ве йәкеда, кӧ рʹаст у бь аԛьлайи ԛӧрбанкьрьна хәрщ дькә.

13. Чьрʹа тʹәшкиләта мәда гӧһастьн һатьнә кьрьне?

¹³ Малбәт дькарә гӧһастьна бькә, ԝәки пʹәре хԝә гәләк хәрщ нәкьн, йан жи әʹмьре хԝә дьһа һеса кьн, сәва һе зедә Йаһоԝарʹа хьзмәт кьн. Дькарьн бежьн тʹәшкиләта Йаһоԝа жи ве йәке дькә. Салед пашԝәхтийеда, һәбун гәләк проектед тʹәзә, у чәнд щара пʹәрә һе зедә һатә хәрщкьрьне, нә кӧ чьԛас һатә стандьне. Ләма жи тʹәшкиләт һәр тьшти дькә ԝәки хәрщ дьһа кем бьн у хәбат жи сьвьк бә. Бь ԝи щурʹәйи пе пʹәре ԝәйи ԛӧрбанкьри кӧ һун бь мәрʹданийе дьдьн, һе зедә шьхӧл те кьрьне.

¹⁴ Гәләк хушк-бьред мә йед кӧ епʹещә ԝәхт нава рʹастийеда ньн, дьбежьн кӧ жь тʹәшкиләта мә тʹӧ щар һаԛас зәʹф пʹешкʹешед рʹӧһʹани нәстандьбун. Бьфькьрьн, иро бал мә һәйә малпәра jԝ.org у ӧса жи JԜ Бродкастинг. Хенщи ве йәке, сәр гәләк зьмана «Ԝәлгәрʹандьна Дьнйа Тʹәзә» һатийә дәрхьстьне. Һьн жи сала 2014/2015-да, нав тʹәмамийа дьнйайеда 14 шәһәрада, щьвата мәзьнә се рʹожи йа һʹәмдьнйайе дәрбаз бу, бь наве «Бәре Пешьн Пʹадшатийа Хԝәде Бьгәрʹьн». Әԝед кӧ һатьн сәр ве щьвате, шабунәкә гәләк мәзьн стандьн.

¹⁵ Гәләк хушк-бьра готьн кӧ әԝана зәʹф  рʹази нә сәва ԝан тьшта, кʹижан кӧ жь тʹәшкиләта Йаһоԝа дьстиньн. Мәсәлә, дәрһәԛа JԜ Бродкастинге, жьн-мерәк кӧ Асйайеда хьзмәт дькьн, ньвисин: «Әм һатьнә кʹьфшкьрьне шәһәрәки бьчʹукда. Щара әм хԝә тʹәне тʹәхмин дькьн чьмки дур дьминьн, у бир дькьн кӧ шьхӧле Йаһоԝа чьԛас мәзьн ә. Ле гава әм сәр JԜ Бродкастинге щурʹә-щурʹә програма дьньһерʹьн, әм тиньн бира хԝә ԝәки әм пʹара бьратийа һʹәмдьнйайе нә. Хушк-бьред мәйи дәлал ве мьһаледа, гәләк ша дьбьн чахе JԜ Бродкастинге дьньһерʹьн. Гәләк щар әԝана мәрʹа дьбежьн кӧ паши Бродкастинге, әԝана хԝә һе незики Кʹома Рʹебәрийе тʹәхмин дькьн. Ньһа әԝана дьһа фьрнаԛ дьбьн кӧ нава тʹәшкиләта Хԝәдеда ньн».

¹⁶ Нав тʹәмамийа дьнйайе, ԝәкә 2 500 Одед Щьвата тенә авакьрьне йан жи тʹәзәкьрьне. Әндәмед щьвата Һондурас, чахе Ода Щьвата хԝәйә тʹәзә дәстпекьрьн бьдьнә хәбате, ньвисин: «Әм бь рʹастийе гәләк бәхтәԝар ьн кӧ әм жи дькʹәвьнә нава малбәта Йаһоԝа, у әм бьратийа хԝәйә һʹәмдьнйайерʹа ша дьбьн, чьмки бь сайа ве йәке хԝәстьна дьле мә һатә сери кӧ Ода Щьвата тʹәзә бал мә һәйә». Гәләк хушк-бьред мә ӧса жи рʹази нә сәва Кʹьтеба Пироз у әʹдәбйәта, кʹижан кӧ сәр зьмане ԝан һатьнә ԝәлгәрʹандьне. Гәләк жи рʹази нә сәва аликʹарийа ԝәʹде тʹәшԛәлед тʹәбийәте, у ӧса жи бона хьзмәтийа пе стенда, кʹижан кӧ бәред баш тинә.

17. Әм жь кʹӧ заньн ԝәки Йаһоԝа пьштгьрийа тʹәшкиләта хԝә дькә?

¹⁷ Гәләк мәрьвед кӧ нә Шәʹдед Йаһоԝа нә, нькарьн баԝәр кьн ԝәки һʹәму шьхӧл кӧ әм дькьн, тʹәне пе ԛӧрбанкьрьна рʹәзәдьли тенә кьрьне. Щарәке директоре компанийәкә мәзьн һатә щийед кӧ әʹдәбйәтед мә тенә нәшьркьрьне. Әԝ гәләк әʹщебмайи ма ԝәки һʹәму шьхӧл хушк-бьра бь рʹәзәдьли дькьн, пе ԛӧрбанкьрьнед рʹәзәдьли, у бе тʹопкьрьна пʹәра. Әԝи гот ԝәки чь кӧ әм дькьн, әԝ тьштәки нәбуйи йә. Рʹасти жи ӧса нә! Әм заньн кӧ әԝ һʹәму шьхӧл тʹәне пе аликʹарийа Йаһоԝа пешда дьчә (Иб. 42:2).

18. а) Әм чь кʹәрәма дьстиньн чахе пьштгьрийа шьхӧле Пʹадшатийе дькьн? б) Ча әм дькарьн зарʹед хԝә у йед тʹәзә һин кьн ԝәки шьхӧле Хԝәдеда мәрʹд бьн?

¹⁸ Йаһоԝа мәщал у ԛәдьрәки мәзьн да мә, кӧ әм дькарьн пьштгьрийа шьхӧле ԝи бькьн. Әԝ соз дьдә мә кӧ һәрге әм пьштгьрийа Пʹадшатийа ԝи бькьн, әԝ ԝе әʹсә мә кʹәрәм кә (Малх. 3:10). Йаһоԝа ӧса жи соз дьдә ԝәки мәрьве мәрʹд, ԝе пешда һәрʹә. (Бьхунә Мәтʹәлок 11:24, 25.) Чахе әм мәрʹд ьн әм бәхтәԝар дьбьн, чьмки Кʹьтеба Пироз дьбежә «хԝәзи ль дайийа, нә кӧ ль стандийа» (Кʹар. Шанд. 20:35). Пе хәбәрдан у кьред хԝә, әм ӧса жи дькарьн зарʹед хԝә у йед кӧ тʹәзә һатьнә нава рʹастийе һин кьн, ԝәки шьхӧле Хԝәдеда мәрʹд бьн у гәләк кʹәрәма бьстиньн.

19. Әв готар чьда ԝә һелан кьр?

¹⁹ Һәр тьшт чь кӧ бал мә һәйә, жь Йаһоԝа йә. У чахе әм пашда ԝан тьшта дьдьнә ԝи, бь ве йәке әм дьдьнә кʹьфше кӧ ԝи һʹьз дькьн у ԛимәт дькьн һәр тьшт кӧ әԝ бона мә дькә (1 Дир. 29:17). Чахе Исраели ԛӧрбан анин сәва авакьрьна пʹарьстгәһе, әԝана чь жи «бь дьле хԝәва пʹешкʹеши кьрьн кʹефхԝәш бун, жь бәр кӧ бь һʹәмуйа дьле хԝә жь Хӧданрʹа пʹешкʹеш кьрьн» (1 Дир. 29:9). Дә ԝәрен әм жи бь дьл ша бьн у ләзәте бьстиньн кӧ Йаһоԝарʹа, демәк хԝәйе һәр тьштирʹа, ԝан тьшта бьдьн кʹижан кӧ жь дәсте ԝи тен.