1-2. Хьзмәткʹаред Йаһоԝа рʹасти чь дәрәща тен, у әԝ йәк ча дькарә сәр ԝан һʹӧкӧм кә?

БЬФЬКЬРЬН сәр ԝан се дәрәща: Бьраки щаһьл пеһʹәсийа, ԝәки нәхԝәшийа ԝи һәйә, кӧ ԝе һеди-һеди ԝи ԛьдум бехә. Бьраки жи кӧ ԝәкә 50 сали йә, хәбата хԝә ӧнда кьр, у чь жи дькә, нькарә хԝәрʹа хәбате бьвинә. Хушкәк жь бо әʹмьре хԝәйи мәзьн, һеди-һеди сьһʹәт-ԛәԝатеда сьст дьбә у нькарә һаԛас Йаһоԝарʹа хьзмәт кә ча бәре дькьр.

² Һәрге тӧ рʹасти дәрәщед ӧса һати, дьбәкә тӧ бьфькьри кӧ ида бекер и у кәсәкирʹа нәлазьм и. Әԝ дәрәщә дькарьн шабуне жь тә бьстиньн, тӧ ида ԛимәте хԝә ӧнда ки, у һәләԛәтийа тә ортʹа мәрьва хьраб бә.

3. Чаԝа Шәйтʹан у дьнйа ԝи сәр әʹмьре мәрьва дьньһерʹьн?

³ Ньһерʹандьна ве дьнйайе сәр әʹмьре мәрьва, мина йа Шәйтʹан ә. Шәйтʹан тʹьме һьндава мәрьвада ӧса нә, кӧ те бежи ԛимәта ԝан ԛә тʹӧнә у әԝана бекер ьн. Әԝи жь берʹәʹмтийа хԝә готә Һеԝайе кӧ әԝ дькарә бей Хԝәде аза бьжи, ле әԝи рʹьнд заньбу, ԝәки әԝ нәгӧһдарикьрьн ԝе ԝана бәрбь мьрьне бьвә. Система комерси, политики у рʹелиги тʹьме жи дәсте Шәйтʹанда бунә, ләма жи әм әʹщебмайи наминьн, ԝәки бизнесмен, политик, у сәрԝеред религийа, жийина мәрьва ԛимәт накьн у хәма ԝан нинә кӧ мәрьв чь тʹәхмин дькьн.

4. Әме ве готареда дәрһәԛа чь шеԝьр кьн?

⁴ Ле Йаһоԝа дьхԝазә әм хԝә ԛимәт кьн, у әԝ али мә дькә чахе әм жь бо һьнә дәрәща хԝә бекер тʹәхмин дькьн (Зәб. 136:23; Рʹом. 12:3). Ве готареда ԝе бе шеԝьркьрьне, ԝәки чаԝа Йаһоԝа ван се дәрәщада али мә дькә: 1) Чахе әм нәхԝәшийа гьран дькʹәвьн, 2) чахе алийе пʹәрәда проблемед мә һәнә, у 3) чахе жь бо  әʹмьре хԝәйи мәзьн әм дьфькьрьн, кӧ мә бона Йаһоԝа тьштәк нәкьрийә. Ле ԝәрә пешийе әм пебьһʹәсьн кӧ чьрʹа әм гәрәке дӧдьли нәбьн, ԝәки Йаһоԝа мә һәр кәси ԛимәт дькә.

5. Чь избат дькә, ԝәки Йаһоԝа мәрьва ԛимәт дькә?

⁵ Рʹаст ә әм жь халийе һатьнә чекьрьне, ле ԛимәте мә ԛимәте халийе нинә (Дәстп. 2:7). Дина хԝә бьдьнә тʹәне чәнд мәʹнийа, кӧ чьрʹа әм баԝәр ьн, ԝәки Йаһоԝа мә ԛимәт дькә у мә һʹьз дькә. Әԝи мәрьв пе хәйсәт-һʹӧнӧред хԝә әʹфьрандийә (Дәстп. 1:27). Пе ве йәке, әԝи мәрьв жь һʹәму әʹфьринед сәр әʹрде бьльнд гьрт у һʹӧкӧм да ԝан кӧ сәрԝертийе сәр әʹрде у сәр һʹәйԝана бькьн (Зәб. 8:4-8).

6. Диса кʹижан избаткьрьн һәйә, кӧ Йаһоԝа мәрьвед гӧнәкʹар ԛимәт дькә?

⁶ Һәла һе паши гӧнәкьрьна Адәм жи, мәрьв диса жи бәр чʹәʹве Йаһоԝа ԛимәт бун. Әԝ ӧса мә һʹьз дькә, ԝәки Кӧрʹе хԝәйи тайе тʹәне бона гӧнед мә ԛӧрбан кьр (1 Йуһʹн. 4:9, 10). Бь сайа ве ԛӧрбане, Йаһоԝа ԝе мәрьвед «һәԛ у нәһәԛ» жь мьрьне рʹакә, йед кӧ жь бо гӧне Адәм мьрьнә (Кʹар. Шанд. 24:15). Хәбәра Ԝи әшкәрә дькә, ԝәки әм бәр чʹәʹве ԝи гәләк ԛимәт ьн, һәрге жи әм нәхԝәш ьн, кʹәсиб ьн, йан жи әʹмьрда мәзьн ьн (Кʹар. Шанд. 10:34, 35).

7. Диса чь мәʹнийед мә һәнә баԝәр кьн, ԝәки Йаһоԝа хьзмәткʹаред хԝә ԛимәт дькә?

⁷ Диса мәʹни һәнә, кӧ дӧдьли нәбьн ԝәки Йаһоԝа мә ԛимәт дькә. Әԝи әм незики хԝә кьрьн у дина хԝә дайе кӧ мә ча хԝә да кʹьфше, гава мьзгини бьһист (Йуһʹн. 6:44). Чахе мә дәстпекьр незики Йаһоԝа бьн, әԝ дьһа незики мә бу (Аԛуб 4:8). Йаһоԝа ӧса жи ԝәʹдә у һәр мәщала дьдә хәбате сәва мә һин кә, у бь ве йәке дьдә кʹьфше кӧ мә һʹьз дькә. Әԝ занә әм ньһа мәрьвнә чь щурʹәйи нә, у занә әм ча алийе башда дькарьн бенә гӧһастьне. У әԝ ӧса жи мә ширәт дькә, чьмки мә һʹьз дькә (Мәтʹлк. 3:11, 12). Әԝ избаткьрьнәкә ԛәԝи йә, кӧ Йаһоԝа бь рʹасти мә ԛимәт дькә!

8. Чаԝа гьлийед жь Зәбур 18:27-29 дькарьн һʹӧкӧм бьн сәр ньһерʹандьна мә һьндава проблемед мә?

⁸ Һьнәка Даԝьд Пʹадша бәр тьштәки һʹәсаб нәдькьрьн, ле әԝи заньбу ԝәки Йаһоԝа ԝи һʹьз дькә у пьшта ԝи дьгьрә. Әве йәке али ԝи дькьр тәнгасийада ньһерʹандьна рʹаст хԝәй кә (2 Сам. 16:5-7). Чахе әм хԝә бекер тʹәхмин дькьн у дьлшкәсти нә, йан жи проблемед мә һәнә, Йаһоԝа дькарә али мә бькә, ԝәки ԝан чәтьнайада зәʹф дьлтәнг нәбьн у ӧса жи али мә бькә ԝан проблема һеса дәрбаз кьн. (Бьхунә Зәбур 18:27-29.) Чахе Йаһоԝа алийе мә йә, тʹӧ тьшт нькарә мә бьдә сәкьнандьне, кӧ бь шабуне ԝирʹа хьзмәт кьн (Рʹом. 8:31). Ԝәрә әм ньһа ԝан се дәрәща шеԝьр кьн, кʹидәреда мәрʹа илаһи лазьм ә бир нәкьн, ԝәки Йаһоԝа мә һʹьз дькә у ԛимәт дькә.

9. Нәхԝәши ча дькарә сәр мә һʹӧкӧм бә?

⁹ Нәхԝәши дькарә мә емосйалида сьст кә у әм дькарьн бьфькьрьн кӧ ида кери кәсәки найен. Дьбәкә әм ӧса жи шәрм дькьн бона нәхԝәшийа хԝә, чахе әм дьвиньн кӧ мәрьв ча сәр мә дьньһерʹьн, йан жи чахе жь бо нәхԝәшийе әм дькʹәвьнә стуйе кәсәки. Һәрге жи мәрьв ньзаньн дәрһәԛа нәхԝәшийа мә, йәкә әм бәрхԝә дькʹәвьн, чьмки әм ида нькарьн һаԛас бькьн чьԛас мә бәре дькьр. Ԝи һʹале гьранда, Йаһоԝа дькарә дьл бьдә мә у мә гәш кә. Чаԝа?

10. Ль гора Мәтʹәлок 12:25, чахе әм нәхԝәш ьн чь дькарә али мә бькә?

 ¹⁰ Чахе әм нәхԝәш ьн, «готьнәкә ԛәнщ» дькарә ԛәԝате бьдә мә. (Бьхунә Мәтʹәлок 12:25.) Йаһоԝа Кʹьтеба Пирозда готьнед ԛәнщ бона мә дайә ньвисаре, кʹижан кӧ тиньн бира мә, кӧ әԝ мә ԛимәт дькә чахе әм нәхԝәш ьн жи (Зәб. 31:19; 41:3). Һәрге әм әԝ гьлийед кӧ жь бина бәр Хԝәде нә, бьхуньн, илаһи гәләк щар, Йаһоԝа ԝе али мә бькә кӧ фькьред нәбаш жь һʹьше хԝә дәрхьн у бона нәхԝәшийа хԝә гәләк бәрхԝә нәкʹәвьн.

11. Чаԝа бьраки мә аликʹарийа Йаһоԝа станд?

¹¹ Дина хԝә бьдьн сәрһатийа Щорщ кӧ 30 сали йә. Әԝ пеһʹәсийа, ԝәки нәхԝәшикә ԝийә ӧса һәйә, кӧ зу пешда дьчә у дьһа гьран дьбә. Жь бо ве йәке, әԝ дьфькьри кӧ ида кери тьштәки найе у кәсәкирʹа нәлазьм ә. Щорщ гьли дькә: «Әз емосийалида һазьр нибум, чьмки мьн ньзаньбу әԝ нәхԝәши ԝе ӧса сәр мьн һʹӧкӧм бә. Мьн шәрм дькьр, чьмки нәхԝәшийа мьн дина мәрьва дькʹьшанд сәр мьн. Гава нәхԝәшийа мьн дьһа гьран бу, әз дьфькьрим кӧ әʹмьре мьн ԝе ча бе гӧһастьне. Әз гәләк дьлшкәсти у беһʹал бум. Мьн лавайа Йаһоԝа дькьр, ԝәки али мьн бькә». Ле гәло Йаһоԝа ча али ԝи кьр? Щорщ гьли дькә: «Мьнрʹа чәтьн бу һʹьш-аԛьле хԝә бьдьм сәр хԝәндьне, ләма мьн чәнд рʹезед жь Зәбур дьхԝәнд, кʹидәре те готьне кӧ Йаһоԝа ча бона хьзмәткʹаред хԝә хәм дькә. Мьн һәр рʹож диса әԝ рʹез тʹәзәда дьхԝәндьн, у мьн тедәрдьхьст, ԝәки дьле мьн рʹьһʹәт дьбу у мьн дьлбини дьстанд. Һьнә ԝәʹдә шунда, мәрьва дьдитьн кӧ бәшәра мьн хԝәш дьбә у һе зедә дәвкʹән бумә. Ԝана һәла һе жи мьнрʹа дьготьн, ԝәки ньһерʹандьна мьнә позитив ԝана дьшьдинә. Мьн фәʹм кьр, ԝәки Йаһоԝа щаба дӧайед мьн да! Әԝи али мьн кьр, кӧ әз ньһерʹандьна хԝә  бьгӧһезьм. Мьн һʹьш-аԛьле хԝә да сәр Хәбәра Хԝәде, у мьн фәʹм кьр әԝ ча дьньһерʹә сәр һʹале мьн».

12. Чахе әм нәхԝәш ьн, ча әм дькарьн аликʹарийа Йаһоԝа бьстиньн?

¹² Һәрге сьһʹәт-ԛәԝата ԝә хьраб ә, дӧдьли нәбьн, ԝәки Йаһоԝа занә кӧ һун чь һʹалида ньн. Һиви жь ԝи бькьн, ԝәки али ԝә бькә кӧ сәр дәрәща хԝә рʹаст бьньһерʹьн. Паше Кʹьтеба Пирозда бьгәрʹьн ԝан готьнед ԛәнщ, кӧ Йаһоԝа бона ԝә хԝәй кьрийә. Кʹур бьфькьрьн сәр ԝан рʹеза кӧ нишан дькьн, ԝәки Йаһоԝа ча хьзмәткʹаред хԝә ԛимәт дькә. Гава һун ӧса бькьн, һуне бьвиньн, ԝәки Йаһоԝа һьндава һʹәму хьзмәткʹаред хԝәйи амьнда, ԛәнщ ә (Зәб. 84:11).

13. Һәрге малхе мале хәбата хԝә ӧнда кьрийә, әԝ ча дькарә хԝә тʹәхмин кә?

¹³ Һәр малхеки мале дьхԝазә, ԝәки әʹбура нәфәред хԝә бькә. Бьдьнә бәр чʹәʹве хԝә, бьраки хәбата хԝә ӧнда кьрийә. Әԝ һәр тьшти дькә сәва хԝәрʹа хәбата тʹәзә бьвинә, ле нькарә. Ве дәрәщеда әԝ дькарә дьлтәнг бә у бьфькьрә кӧ кери тьштәки найе. Ле ча созед Йаһоԝа дькарьн али ԝи бькьн?

14. Чьрʹа Йаһоԝа хԝәйе созе хԝә йә?

¹⁴ Йаһоԝа тʹьме хԝәйе созед хԝә йә (Йешу 21:45; 23:14). Чәнд мәʹни һәнә, кӧ чьрʹа әԝ созе хԝә тинә сери. Йа пешьн, әв йәк дькарә сәр наве ԝи һʹӧкӧм бә. Йаһоԝа соз да, ԝәки ԝе бона хьзмәткʹаред хԝәйи амьн хәм бькә, у әԝ хԝә борщдар һʹәсаб дькә, ԝәки әԝи сози бинә сери (Зәб. 31:1-3). Хенщи ве йәке, Йаһоԝа занә ԝәки әме дьлшкәсти бьн һәрге әԝ бона мә хәм нәкә, чьмки әм нәфәред малбәта ԝи нә. Әԝ соз дьдә, ԝәки ча матерйалида ӧса жи рʹӧһʹанида ԝе али мә бькә, у тʹӧ тьшт нькарә рʹийа ԝи бьгьрә,  кӧ ви созе хԝә бинә сери (Мәт. 6:30-33; 24:45).

15. а) Мәсиһийед ԛьрʹна йәке рʹасти чь чәтьнайе һатьн? б) Зәбур 37:18, 19, мә чьда дьдә баԝәркьрьне?

¹⁵ Һәрге әм бир нәкьн, кӧ чьрʹа Йаһоԝа созед хԝә тʹьме тинә сери, әме дӧдьли нәбьн, кӧ ԝәде проблемед алийе пʹәрәда, әԝ ԝе али мә бькә. Дина хԝә бьдьнә мәсәла Мәсиһийед ԛьрʹна йәке. Чахе щьвата Оршәлиме рʹасти зерандьнәкә гьран һат, «пештьри шандийа һʹәмуйед баԝәрмәнд» һәв бәла бун (Кʹар. Шанд. 8:1). Бьфькьрьн, әԝана жь бо ве йәке кʹәтьнә чь тәнгасийе. Әԝана економикида рʹасти чәтьнайа һатьн. Әԝан Мәсиһийа дьԛәԝьмә мал у хәбатед хԝә ӧнда кьрьн. Ле Йаһоԝа әԝана нәһиштьн, нә жи ԝана шабуна хԝә ӧнда кьр (Кʹар. Шанд. 8:4; Ибрн. 13:5, 6; Аԛуб 1:2, 3). Йаһоԝа али ԝан Мәсиһийед амьн дькьр, у әԝ ԝе али мә жи бькә. (Бьхунә Зәбур 37:18, 19.)

16. Жь бо кʹижан дәрәще әм дьбәкә бьфькьрьн, ԝәки Йаһоԝа ида хьзмәтийа мә ԛимәт накә?

¹⁶ Чахе әм кал-пир дьбьн, әм дьбәкә дәстпедькьн бьфькьрьн, ԝәки әм бона Йаһоԝа һьндьк дькьн у ида ԛимәт ниньн. Даԝьд Пʹадша жи чахе ида кал дьбу, дьбәкә бона ве йәке бәрхԝә дькʹәт (Зәб. 71:9). Ле ча Йаһоԝа дькарә али мә бькә?

17. Әм жь сәрһатийа хушка Щери чь һин дьбьн?

¹⁷ Дина хԝә бьдьн мәсәла хушкәкә мә бь наве Щери, кӧ әʹмьрда мәзьн ә. Әԝ һатә тʹәглифкьрьне сәр щьвина бона хԝәйкьрьна Ода Щьвата, ле әԝе нәдьхԝәст бьчуйа ԝедәре. Әԝе гот: «Әз ида пир ьм, жьнәби мә, у һьн жи бона ԝи шьхӧли әзе кери Йаһоԝа нәйем, чьмки дәрһәԛа ԝи шьхӧли тьштәки ньзаньм». Еваре пешийа ве щьвине, әԝе бь дӧа дьле хԝә Йаһоԝарʹа  вәкьр. Сьбәтьре әԝ һатә Ода Щьвате, ле әԝ диса жи дӧдьли дьбу, ԝәки гәло һежа бу әԝ һат. Ле ԝәʹде бәрнама щьвине, готарванәки фькьрәкә ӧса гот, ԝәки фәрәсәтәки мәйи лапи фәрз әԝ ә, кӧ бь дьл у щан бьхԝазьн жь Йаһоԝа һин бьн. Щери тинә бира хԝә: «Әз хԝәрʹа фькьрим: ‹Фәрәсәте мьни ӧса һәйә!› Әз гьрийам, чьмки мьн тедәрхьст, ԝәки Йаһоԝа щаба дӧайе мьн да. Әԝи әз дамә баԝәркьрьне, ԝәки әз дькарьм тьштәки ԛимәт бьдьмә Йаһоԝа у кӧ әԝ дьхԝазә мьн һин кә!» Щери тинә бира хԝә әԝе ԛәԝьмандьне, у дьбежә: «Әз чахе чумә сәр ве щьвине, әз бәрхԝә дькʹәтьм, у дьлтәнг дьбум, ле чахе әз жь оде дәркʹәтьм, әз хԝәда баԝәр бум, дьлгәш бум, у мьн фәʹм кьр, кӧ әз бекер ниньм».

18. Кʹьтеба Пироз ча нишан дькә, ԝәки ԝәʹде кал-пирбуна мә жи, Йаһоԝа бәрдәԝам дькә хьзмәтийа мә ԛимәт кә?

¹⁸ Чахе әм кал-пир дьбьн, әм дькарьн дӧдьли нәбьн, ԝәки Йаһоԝа диса жи шьхӧл дьдә мә (Зәб. 92:12-15). Иса һин дькьр, ԝәки фьрԛи тʹӧнә чь фәрәсәтед мә һәнә йан жи чьԛас һьндьк әм дькьн, Йаһоԝа ԛимәт дькә һәр тьштед кӧ чьԛас дәсте мә те, әм бона ԝи дькьн (Луԛа 21:2-4). Ләма жи һʹьш-аԛьле хԝә бьдьнә сәр ве йәке чь кӧ һун дькарьн бькьн. Мәсәлә, һун дькарьн мәрьварʹа дәрһәԛа Йаһоԝа хәбәр дьн, бона хушк-бьра дӧа бькьн, у ԝана һелан кьн кӧ амьн бьминьн. Йаһоԝа ԝә һʹәсаб дькә ча һәвалхәбаткʹаред хԝә нә жь бо ве йәке, кӧ һун чь дькарьн бькьн, ле чьмки һун бь дьл у щан дьхԝазьн гӧрʹа ԝи бькьн (1 Корн. 3:5-9).

19. Рʹомайи 8:38, 39 чьда мә дьдә баԝәркьрьне?

¹⁹ Әм чьԛас рʹази нә у бәхтәԝар ьн, ԝәки әм Йаһоԝа, демәк Хԝәдеки ӧса дьһʹәбиньн, кӧ хьзмәткʹаред хԝә һʹьз дькә у ԛимәт дькә! Әԝи әм әʹфьрандьнә, ԝәки ԛьрара ԝи биньн сери, у әԝ йәк мә бәхтәԝар дькә (Әʹйан. 4:11). Рʹаст ә әԝ дьнйа дьбәкә мә һʹәсаб дькә ча нәтʹӧтьшт, ле Йаһоԝа тʹӧ щар ӧса нафькьрә (Ибрн. 11:16, 38). Чахе әм жь бо нәхԝәшийа хԝә, жь бо чәтьнайед алийе пʹәрәда, йан жи жь бо кал-пирбуне бинтәнг дьбьн, ԝәрә әм бир нәкьн, ԝәки тʹӧ тьшт тʹӧ щар нькарә мә жь һʹьзкьрьна Баве мәйи әʹзмана бьԛәтинә. (Бьхунә Рʹомайи 8:38, 39.)