1-2. Чь тьштәки мәхсус ԛәԝьми Рʹожа Пенщийә һʹәсаб сала 33 Д.М.?

САЛА 33 Д.М., шәмийе шәбәԛе, Рʹожа Пенщийә һʹәсаб бу. Оршәлимеда ԝәкә 120 шагьрт тʹоп бунә ода мәзьнә жорьнда (Кʹар. Шанд. 1:13-15; 2:1). Чәнд рʹож пешийа ԝе йәке, Иса готә ԝан, кӧ Оршәлимеда бьминьн, чьмки ԝана гәрәке пʹешкʹеша мәхсус бьстандана (Кʹар. Шанд. 1:4, 5). Ле паше чь ԛәԝьми?

² «Ньшкева жь әʹзмен мина дәнге байе ԛайим дәнгәк һат». Әԝи дәнги тʹәмамийа мале тʹьжи кьр. Паше «зьманед мина алава егьр» ԝанва хӧйа бун, сәр һәр йәки жь ԝан дани, у һʹәму «бь рʹӧһʹе пироз тʹьжи бун» (Кʹар. Шанд. 2:2-4). Бь ԝи щурʹе мәхсус, Йаһоԝа рʹӧһʹе хԝәйи пироз сәр ԝе кʹомеда рʹет (Кʹар. Шанд. 1:8). Әԝана йед пешийе бун, кӧ пе рʹӧһʹе пироз * һатьбун бьжартьне у һеви стандьн кӧ тʹәви Иса сәр әʹзмана сәрԝертийе бькьн.

3. Әԝед кӧ ԝәʹде Рʹожа Пенщийә һʹәсаб тʹоп бьбун, чьрʹа дӧдьли нибун, кӧ әԝана пе рʹӧһʹе пироз һатьнә бьжартьне?

³ Һәрге тӧ йәк жь ԝан шагьрта буйайи, йед кӧ отʹаха жорьнда ве рʹоже тʹоп бьбун, тәйе әв рʹож тʹӧ щар бир нәкьра. Бьдә бәр чʹәʹве хԝә, тьштәки мина зьмане алава егьр сәр сәре тә те данинe, у тӧ дәстпедьки  сәр щурʹә-щурʹә зьмана хәбәр ди (Кʹар. Шанд. 2:5-12). Ԛә шьк жи бал тә ԝе тʹӧнә буйа, кӧ тӧ пе рʹӧһʹе пироз һати бьжартьне. Ле гәло йед кӧ бь рʹӧһʹе пироз кʹьфшкьри нә, һʹәму жи бь щурʹе мәхсус у ԝәʹдәкида тенә бьжартьне? На. Ле әм әве йәке жь кʹӧ заньн?

4. Гәло һʹәму бьжартийед ԛьрʹна йәке, ԝәʹдәкида дьһатьнә кʹьфшкьрьне? Шьровәкьн.

⁴ Ԝәрен шеԝьр кьн кӧ кʹәнге мәрьв дьбә бьжарти. Рʹожа Пенщийә һʹәсаб, сала 33 Д.М., нә тʹәне әԝ кʹома жь 120  Мәсиһийа пе рʹӧһʹе пироз һатьнә кʹьфшкьрьне, ле ве рʹоже, ԝәкә 3 000 мәрьвед дьн жи рʹӧһʹе пироз стандьн. Әԝана һатьбун кʹьфшкьрьне, гава һатьн ньхӧмандьне (Кʹар. Шанд. 2:37, 38, 41). Ле паши ве йәке, ида нә һʹәму Мәсиһи ԝәʹде ньхӧмандьне дьһатьнә кʹьфшкьрьне. Мәсәлә, Самәри һьнә ԝәʹдә шунда паши ньхӧмандьне һатьнә кʹьфшкьрьне (Кʹар. Шанд. 8:14-17). Ле кʹьфшкьрьна Корʹнелйо у малбәта ԝи гәләк әʹщебмайи бу. Әԝана һәла һе жи пешийа ньхӧмандьне һатьбун кʹьфшкьрьне (Кʹар. Шанд. 10:44-48).

5. Ль гора 2 Корьнтʹи 1:21, 22, чь дьԛәԝьмә чахе кәсәк пе рʹӧһʹе пироз те кʹьфшкьрьне?

⁵ Ԝәрә әм ӧса жи шеԝьр кьн, чь дьԛәԝьмә чахе кәсәк пе рʹӧһʹе пироз те кʹьфшкьрьне. Һьнә бьжартийарʹа дькарә пешийе чәтьн бә фәʹм кьн, кӧ чьрʹа Йаһоԝа әԝана бьжартьнә. Әԝана дьбәкә дьфькьрьн: ‹Гәло Хԝәде чьрʹа әз бьжартьм?› Ле бал һьнәка фькьред ӧса пешда найен. Фьрԛи тʹӧнә әԝана чь дьфькьрьн, ле Паԝлосе шанди шьровәкьр, кӧ һʹәму бьжарти чь тʹәхмин дькьн. Әԝи гот: «Ԝә баԝәрийа хԝә ԝи ани у бь рʹӧһʹе пирози создайи һатьнә моркьрьне *. Рʹӧһʹе пироз чаԝа бьһе һатийә дайине һʹәта әм созе Хԝәде ԝар бьн» (Әфәс. 1:13, 14). Демәк Йаһоԝа пе рʹӧһʹе хԝәйи пироз, ԝан Мәсиһийарʹа зәлал әшкәрә дькә, ԝәки Әԝи әԝана бьжартьнә. Бь ԝи щурʹәйи, рʹӧһʹе пироз ча «бьһе йә [нишан йан соз ә]» кӧ Хԝәде  дьдә ԝан, сәва ԝана бьдә баԝәркьрьне кӧ ахьрийеда әԝана ԝе һʹәта-һʹәтайе сәр әʹзмана бьжин, нә кӧ сәр әʹрде. (Бьхунә 2 Корьнтʹи 1:21, 22.)

6. Мәсиһийе пе рʹӧһʹе пироз кʹьфшкьри, чь гәрәке бькә, сәва хәлата хԝәйә әʹзмани бьстинә?

⁶ Һәрге Мәсиһи пе рʹӧһʹе пироз һатийә кʹьфшкьрьне, гәло әԝ те һʹәсабе кӧ ԝе әʹсә хәлата хԝәйә әʹзмани бьстинә? На. Рʹаст ә әԝ дӧдьли нинә, кӧ әԝ һатийә бьжартьне бона жийина сәр әʹзмана, ле әԝ гәрәке бир нәкә әве тʹәмийе: «Бона ве йәке хушк-бьрано, һе бькьн кӧ ԝе гази у жьбарәбуна хԝә тʹәстиԛ кьн. Һун кӧ ве йәке бькьн, тʹӧ щар накʹәвьн» (2 Пәт. 1:10). Демәк, һәрге Мәсиһи пе рʹӧһʹе пироз бьжарти йә, йане газикьри йә бона жийина сәр әʹзмана, әԝ ԝе хәлата хԝә тʹәне һьнге бьстинә, һәрге һʹәта мьрьне амьн бьминә (Фили. 3:12-14; Ибрн. 3:1; Әʹйан. 2:10).

7. Мәсиһи ча тедәрдьхә, ԝәки әԝ бона жийина сәр әʹзмана газикьри йә?

⁷ Ле ча Мәсиһи тедәрдьхә, ԝәки әԝ бона жийина сәр әʹзмана һатийә газикьрьне? Гьлийед Паԝлос щаба ве пьрсе әʹйан дькьн, кʹижан кӧ әԝи готә йед «пирозбунерʹа газикьри» кӧ Рʹомеда бун. Әԝи готә ԝан: «Ԝә рʹӧһʹәки ӧса нәстандийә, кӧ ԝә диса бькә хӧлам бьтьрсьн, ле ԝә әԝ рʹӧһʹ стандийә, йе кӧ ԝә дькә зарʹед Хԝәде, бь кʹижани гази ԝи дькьн: ‹Абба!› аԝа готи ‹Баво!› Һәма әԝ рʹӧһʹ хԝәха тʹәви рʹӧһʹе мә шә′дәтийе дьдә, кӧ әм зарʹед Хԝәде нә» (Рʹом. 1:7; 8:15, 16). Демәк, Хԝәде пе рʹӧһʹе хԝәйи пироз йед бьжартирʹа зәлал әʹйан дькә, ԝәки әԝана бона жийина сәр әʹзмана газикьри нә (1 Тʹеслн. 2:12).

8. Ча 1 Йуһʹәнна 2:20, 27 дьдә кʹьфше, ԝәки Мәсиһийед бьжарти һʹәԝщә ниньн, ԝәки кәсәк ԝанрʹа избат кә кӧ әԝана бьжарти нә?

⁸ Йаһоԝа ԛә шьке наһелә һʹьш у дьле ԝан Мәсиһийада, йед кӧ бона жийина сәр әʹзмана һатьнә газикьрьне. (Бьхунә 1 Йуһʹәнна 2:20, 27.) Рʹаст ә әԝ Мәсиһийед бьжарти мина һʹәму Мәсиһийа гәрәке щьватеда алийе Йаһоԝада бенә һинкьрьне, ле әԝана һʹәԝщә ниньн, ԝәки кәсәк ԝанрʹа избат кә, кӧ әԝана бьжарти нә. Чьрʹа? Чьмки Йаһоԝа пе ԛәԝата хԝәйә һәрә мәзьн гәрдунеда, демәк пе рʹӧһʹе хԝәйи пироз, әшкәрә ԝана дьдә фәʹмкьрьне, кӧ әԝана бьжарти нә.

9. Чахе кәсәк те бьжартьне, ль гора Әфәси 1:18, чь гӧһастьн дьбә нав ԝи кәсида?

⁹ Иро гәләк хьзмәткʹаред Хԝәдерʹа чәтьн ә фәʹм кьн, кӧ чь дьԛәԝьмә тʹәви ԝи кәси, йе кӧ пе рʹӧһʹе пироз һатийә бьжартьне. Әԝ йәк нормал ә, чьмки әԝана хԝәха бьжарти ниньн. Һьн жи Хԝәде мәрьв ӧса әʹфьранд, ԝәки әԝана һʹәта-һʹәтайе сәр әʹрде бьжин, нә кӧ сәр әʹзмана (Дәстп. 1:28; Зәб. 37:29). Ле Йаһоԝа һьнәк бьжартьн, сәва сәр әʹзмана бьжин. Ләма жи чахе әԝ ԝана кʹьфш дькә, әԝ ида һевийа ԝан у щурʹе фькьрандьна ԝан дьгӧһезә, сәва әԝана һивийа жийина сәр әʹзмана бьн. (Бьхунә Әфәси 1:18.)

10. Чь те һʹәсабе тʹәзәда бенә буйине? (Бьньһерʹә спартьн.)

¹⁰ Чахе Мәсиһи пе рʹӧһʹе пироз тенә бьжартьне, әԝана ча бежи «ну дьбьн» *, йане бь симболик тʹәзәда тенә буйине. Иса ӧса жи гот, ԝәки ԝи мәрьвирʹа кӧ бьжарти нинә, нькари бь тʹәмами шьровәки, кӧ йе бьжарти чь тʹәхмин дькә  чахе «ну дьбә», демәк «жь рʹӧһʹ» те буйине (Йуһʹн. 3:3-8).

11. Шьровәкьн кӧ ча щурʹе фькьрандьна бьжартийа, те гӧһастьне.

¹¹ Ле чаԝа щурʹе фькьрандьна Мәсиһийед бьжарти те гӧһастьне? Пешийа кӧ Йаһоԝа әԝ Мәсиһи бьжбартана, әԝана һивийа жийина һʹәта-һʹәтайе сәр әʹрде бун. Әԝана бь дьл у щан һивийа ԝи ԝәʹдәйи бун, чахе Йаһоԝа һʹәму щурʹә хьраби бьдә һьлдане у әʹрде бькә щьнәт. Дьԛәԝьмә әԝана ӧса жи дьданә бәр чʹәʹве хԝә, кӧ ԝе чаԝа рʹасти нәфәред хԝә йан жи һәвалед хԝә бен, йед кӧ жь мьрьне рʹабьн. Ле чахе әԝана пе рʹӧһʹе пироз һатьнә кʹьфшкьрьне, әԝана ида щурʹәки майин дәстпекьрьн бьфькьрьн. Чь щурʹәйи? Әԝана нәфькьрин, ԝәки жийина сәр әʹрде ида һаԛас баш нинә, ԝана нә жи жь бо стресе йан жи кӧл-дәрда фькьрандьна хԝә гӧһастьн. Әԝана нә жи дьфькьрьн, ԝәки жийина һʹәта-һʹәтайе сәр әʹрде ԝе хԝәш нибә. Дәԝсе, Йаһоԝа пе рʹӧһʹе хԝәйи пироз, щурʹе фькьрандьна ԝан у һевийа ԝан кӧ әԝана ԛимәт дькьн, дьгӧһезә.

12. Ль гора 1 Пәтрус 1:3, 4, Мәсиһийед бьжарти ча дьньһерʹьн сәр һевийа хԝә?

¹² Мәсиһийе кӧ те бьжартьне, дькарә бьфькьрә, ԝәки әԝ һежайи ԝи ԛәдьре мәзьн нинә. Ле йәкә әԝ дәԛәке жи дӧдьли нинә, ԝәки Йаһоԝа ԝи бьжартийә. Чахе әԝ дьфькьрә дәрһәԛа һевийа хԝәйә ахьрийе, дьле ԝи бь шабуне у рʹазибуне тʹьжә дьбә. (Бьхунә 1 Пәтрус 1:3, 4.)

13. Йед бьжарти дәрһәԛа жийина хԝәйә сәр әʹрде чь дьфькьрьн?

¹³ Ле гәло әԝ те һʹәсабе, ԝәки йед бьжарти дьхԝазьн бьмьрьн? Паԝлосе  шанди щаба ве пьрсе дьдә. Әԝи бәдәна мәрьва бәрамбәри кон кьр у гот: «Бәле һʹәта кӧ әм ви конида дьминьн, бьн баре гьранда дьнәʹльн, нә кӧ әм дьхԝазьн ви жь хԝә бехьн, ле йе әʹзмани сәрда ԝәргьрьн, ԝәки йе хԝәйимьрьн ԝе жийинеда бәтавәбә һәрә» (2 Корн. 5:4). Әԝан Мәсиһийа һʹәԝаса хԝә һьндава жийине ӧнда нәкьрьнә, у нә жи дьхԝазьн ԝәки жийина ԝанә сәр әʹрде зу хьлаз бә. Әԝана жийина хԝәрʹа ша дьбьн у дьхԝазьн һәр рʹож Йаһоԝарʹа тʹәви нәфәред хԝә у һәвалед хԝә хьзмәт кьн. Ле йәкә һевийа ԝанә ахьрийе тʹьме бира ԝанда нә (1 Корн. 15:53; 2 Пәт. 1:4; 1 Йуһʹн. 3:2, 3; Әʹйан. 20:6).

14. Чь найе һʹәсабе, кӧ кәсәк пе рʹӧһʹе пироз бьжарти йә?

¹⁴ Дьԛәԝьмә тӧ дьфькьри, кӧ дьбәкә тӧ пе рʹӧһʹе пироз кʹьфшкьри йи. Һәрге әре, дәрһәԛа ԝан пьрсед фәрз бьфькьрә: «Тӧ бь дьл у щан дьхԝази ԛьрара Йаһоԝа бини сери? Тӧ шьхӧле бәлакьрьна мьзгинийеда гәләк хирәт и? Тӧ һʹьз дьки леколинкьрьна Хәбәра Хԝәде у педьһʹәси дәрһәԛа ‹нет-мәрәмед Хԝәдейә кʹур›»? (1 Корн. 2:10) Тӧ тʹәхмин дьки, ԝәки Йаһоԝа хьзмәтийа тә гәләк кʹәрәм дькә? Тӧ дьле хԝәда тʹәхмин дьки, ԝәки щабдарийа тә һәйә рʹӧһʹанида али мәрьва бьки? Тӧ әʹмьре хԝәда аликʹарийа Йаһоԝа дьвини? Һәрге щаба ԝан һʹәму пьрса әре йә, гәло әв йәк избат дькә, ԝәки тӧ бона жийина сәр әʹзмана газикьри йи? На, ӧса нинә. Чьрʹа? Чьмки һʹәму хьзмәткʹаред Хԝәде дькарьн хԝә ӧса тʹәхмин кьн, фьрԛи тʹӧнә әԝана бьжарти нә йан на. У Йаһоԝа пе рʹӧһʹе хԝәйи пироз дькарә һʹәму хьзмәткʹаред хԝәрʹа ԛәԝатәкә ӧса бьдә кӧ ԝан тьшта бькьн, фьрԛи тʹӧнә һевийа ԝан кʹижан ә. Бь рʹасти һәрге һун дӧдьли нә, кӧ һун пе рʹӧһʹе пироз бьжарти нә йан на, әԝ шьк ида избат дькә, кӧ һун бьжарти ниньн. Әԝед кӧ Йаһоԝа бьжарт, дӧдьли  набьн, ԝәки әԝана бьжарти нә! Әԝана сәд сәләфи ве йәкеда баԝәр ьн!

15. Әм жь кʹӧ заньн, ԝәки нә һʹәму кӧ рʹӧһʹе пироз стандьн, дьһатьнә бьжартьне бона жийина сәр әʹзмана?

¹⁵ Кʹьтеба Пирозда һәнә гәләк мәсәлед ԝан мәрьва, йед кӧ рʹӧһʹе пироз стандьбун, ле йәкә һевийа ԝан жийина сәр әʹзмана нибу. Мәсәлә, рʹӧһʹе пироз рʹебәрийа Даԝьд дькьр (1 Сам. 16:13). Рʹӧһʹе пироз али ԝи кьр, ԝәки рʹастийед кʹур дәрһәԛа Йаһоԝа фәʹм кә у ӧса жи һьнә пʹаред Кʹьтеба Пироз бьньвисә (Марԛ. 12:36). Ле йәкә Пәтрус гот, ԝәки Даԝьд «нәчубу әʹзмана» (Кʹар. Шанд. 2:34). Йуһʹәннайе Ньхӧмдар жи «бь рʹӧһʹе пироз тʹьжи» бу (Луԛа 1:13-16). Иса гот кӧ тʹӧ мәрьв жь Йуһʹәнна мәзьнтьр нибу, ле паше әԝи гот, ԝәки Йуһʹәнна накʹәвә нав Пʹадшатийа әʹзмана (Мәт. 11:10, 11). Йаһоԝа пе рʹӧһʹе хԝәйи пироз ԝанрʹа ԛәԝат дьда, ԝәки кьред мәзьн бькьн, ле әԝи пе ви рʹӧһʹи ԝана бона жийина сәр әʹзмана нәжьбарт. Гәло әԝ те һʹәсабе, кӧ әԝана һаԛас амьн нибун у ләма нәһатьнә бьжартьне сәва сәр әʹзмана сәрԝертийе бькьн? На. Әԝ те һʹәсабе, ԝәки Йаһоԝа ԝе ԝана жь мьрьне рʹакә, сәва Щьнәтеда сәр әʹрде бьжин (Йуһʹн. 5:28, 29; Кʹар. Шанд. 24:15).

16. Иро гәләк хьзмәткʹаред Хԝәде һивийа кʹижан хәлате нә?

¹⁶ Һʹәчʹи зәʹф хьзмәткʹаред Хԝәде һивийа жийина сәр әʹрде нә. Әԝана мина Бьраһим, Сәрайе, Даԝьд, Йуһʹәннайе Ньхӧмдар у диса гәләк жьн у мер кӧ бәре дьжитьн, һивийа жийина сәр әʹрде нә, чахе Пʹадшатийа Хԝәде ԝе сәрԝертийе бькә (Ибрн. 11:10).

17. Кʹижан пьрса әме готара дьнда шеԝьр кьн?

¹⁷ Иро һьнә бьжарти һе нава щьмәʹта Хԝәдеда ньн, ләма жи һьнә пьрс пешда тен (Әʹйан. 12:17). Мәсәлә, йед бьжарти һьндава хԝәда гәрәке ча бьн? Һәрге щьвата ԝәда кәсәк дәстпедькә ԝәʹде Биранине симбола бьхԝә у вәхԝә, һун ча гәрәке һьндава ԝида бьн? Лазьм ә әм бәрхԝә кʹәвьн, һәрге һәжмара ԝан зедә дьбә, йед кӧ симбола дьхԝьн у вәдьхԝьн? Әме щаба ԝан пьрса готара дьнда шеԝьр кьн.