ЧАХЕ щьмәʹта Исраел гәрәке чʹәме Урдӧнерʹа дәрбаз буна, сәва бькʹәвьнә әʹрде кӧ Хԝәде соз дабу ԝан, һьнә жьнед хәриб рʹасти ԝан һатьн. Ԝана меред Исраели тʹәглифи сәр щәжьне кьрьн. Дьбәкә Исраели дьфькьрин, кӧ әԝ мәщаләкә рʹьнд ә сәва һәвалед тʹәзә хԝәрʹа ԛазанщ кьн, бьрәԛьсьн, у хԝарьнәкә баш бьхԝьн чь кӧ ԝе гәләк дьле ԝан бе. Әʹдәтед ԝан жьна у принсипед ԝанә намусийе, мина йед Исраелийа нибун, кʹижана кӧ пе ԛануна Хԝәде дьжитьн. Ле һьнә меред Исраели дьԛәԝьмә дьфькьрин: «Әԝана ԝе сәр мә һʹӧкӧм нәкьн, әме фәсал бьн».

 Ле чь ԛәԝьми? Кʹьтеба Пироз гьли дькә: «Мьләт дәстпекьр тʹәви ԛизед Моԝаб беәʹсьли кьр». Бь рʹасти, әԝ жьнед хәриб дьхԝәстьн, ԝәки меред Исраели хӧданед ԛәлп бьһʹәбиньн. У әԝана гьһиштьнә нета хԝә. Ләма жи «һерса Хӧдан ль Исраел рʹабу» (Жьмар 25:1-3).

Әԝан Исраелийа дӧ тьштада Ԛануна Хԝәде тʹәрьбандьн: Ԝана сәре хԝә бәр пʹута данин, у бенамуси кьрьн. Бь һʹәзара Исраели мьрьн, чьмки гӧрʹа Хԝәде нәкьрьн (Дәркʹ. 20:4, 5, 14; Ԛан. Дщр. 13:6-9). Ԝана ӧса жи ԝәʹдә пьшт гӧһе хԝәва авитьн. Ԝәʹдәки кьнда әԝана ида ԝе бькʹәтана Әʹрде Создайи, ле әԝан мера ԛануна Хԝәде тʹәрьбандьн, ләма жи бь һʹәзара Исраели нәкʹәтьнә ԝи әʹрди (Жьмар 25:5, 9).

Дәрһәԛа ԝан ԛәԝьмандьна Паԝлосе шанди ньвиси: «Әв һʹәму тьшт чаԝа мәсәлед готи дьһатьнә сәре ԝан, ле бона мә кӧ әм ахьрийа ван дәԝрада дьжин, чаԝа ширәт һатьнә ньвисаре» (1 Корн. 10:7-11). Бешьк, Шәйтʹан гәләк ша бу чахе әԝан Исраелийа әв гӧне гьран кьрьн у жь бо ве йәке нәкʹәтьнә Әʹрде Создайи. Ле ԝе чьԛас аԛьлайи бә, һәрге әм жь ве йәке хԝәрʹа дәрсе һин бьн, чьмки иро жи Шәйтʹан гәләк дьхԝазә, ԝәки әм нәкʹәвьнә дьнйа тʹәзә, йа кӧ Хԝәде соз дьдә мә!

Шәйтʹан нечʹира Мәсиһийа дькә, у тʹәлькед ӧса дьдә хәбате, кʹижан кӧ бәреда һʹәта иро жерʹа ләв тен. Чаԝа мә жоре гот, ԝәʹде Исраелийа Шәйтʹан тʹәлька бенамусийе да хәбате. Иро жи әԝ бәрдәԝам дькә әве тʹәлька хоф дьдә хәбате. Әԝ сәва мә бькә тʹәлька бенамусийе, мәтодәкә гәләк ԛәԝи дьдә хәбате, әԝ һәйә порнографийа.

Иро мәрьв дькарьн ӧса дьзикава порнографийайе бьньһерʹьн, кӧ тʹӧ кәс нә жи пебьһʹәсә. Бәре, чахе мәрьва дьхԝәстьн порнографийайе бьньһерʹьн, дьчунә кинотеатра, кʹидәре кӧ филмед нәщайиз нишан дькьрьн, йан жи дьчунә дькʹанед бона мәзьна, кʹидәре кʹьтебед порнографи дьфьротьн. Гәләк мәрьв дьбәкә шәрма нәдьчунә ԝан щийа, чьмки нәдьхԝастьн кәсәк ԝана бьвинә. Ле иро бь сайа интернете, мәрьв дькарә порнографийайе бьньһерʹә, мәсәлә сәр хәбате йан жи автеда. У гәләк ԝәлатада, жьн йан жи мер, мала хԝәда дькарьн порнографийайе бьньһерʹьн.

Ле тʹәне әԝ нинә. Пе тʹела у планшета жи иро дькарьн һеса порнографийайе бьньһерʹьн. Пе ԝан һащәта мәрьв дькарьн кʹучеда, отобуседа йан жи метроеда, шьклед бенамуси бьньһерʹьн.

Порнографийа иро һе зедә зийане дьдә мәрьва, нә кӧ ԝәʹде бәре, чьмки рʹожа иройин һеса дькарьн бьньһерʹьн, кӧ тʹӧ кәс пенәһʹәсә. Беһʹәсаб мәрьвед кӧ порнографийайе дьньһерʹьн, зийане дьдьнә зәԝаща хԝә, ԛәдьре хԝә дехьн у исафа хԝә сьст дькьн. Ле һе хьраб әԝ ә, кӧ әԝана һәләԛәтийа хԝә тʹәви Хԝәде хьраб дькьн. Дӧдьли нәбьн, ԝәки мәрьве кӧ порнографийайе дьньһерʹә, зийанәкә мәзьн дьстинә. Гәләк щар мәрьв жь ньһерʹандьна порнографийайе, емосийалида ча бежи кʹур бьриндар дьбьн. Әԝ бьрин дьбәкә һеди-һеди ԛәнщ бьн, ле дәхмә дькарьн гәләк ԝәхт бьминьн.

Әм гәрәке бир нәкьн, ԝәки Йаһоԝа дькарә али мә бькә, сәва әм хԝә жь ве тʹәлька Шәйтʹан хԝәй кьн. Һәрге әм дьхԝазьн Йаһоԝа мә хԝәй кә, әм гәрәке ве йәке бькьн, чь кӧ Исраелийед бәре нәкьрьн, демәк әм гәрәке «рʹаст гӧрʹа» Йаһоԝа бькьн (Дәркʹ. 19:5). Әм гәрәке фәʹм бькьн кӧ порнографийа бәр чʹәʹве Хԝәде рʹәш ә. Ле чьрʹа әм дькарьн ӧса бежьн?

Бьфькьрьн сәр ве йәке: Ԛанунед Хԝәде кӧ ԝәʹде бәре Исраелийарʹа һатьнә дайине, гәләк щӧдә дьбун жь ԛанунед мьләтед хәриб. Әԝан ԛануна мина диԝар Исраели хԝәй  дькьрьн жь мьләтед дор-бәре ԝан у кьред ԝани һʹәрам у мьрʹдарʹ (Ԛан. Дщр. 4:6-8). Әԝан ԛануна әшкәрә әʹйан дькьрьн, ԝәки һәр щурʹә бенамуси бәр чʹәʹве Йаһоԝа рʹәш ә.

Чахе Йаһоԝа дәрһәԛа кьред һʹәрам, йед мьләтед хәриб Исраелийарʹа гот, паше зедә кьр: «Мина ԝан кьред ԝәлате Кәнане, кʹижани кӧ әзе ԝә бьбьме, нәкьн . . . Әʹрд һʹәрʹьми, әзе бәла ԝи биньмә сәре ԝи». Бона Хԝәдейе пироз, щурʹе жийина Кәнанийа ӧса хьраб бу, ԝәки әʹрде ԝан бәр чʹәʹве ԝи һʹәрам у ԛьреж бу (Ԛан. Кʹаһ. 18:3, 25).

Рʹаст ә Йаһоԝа Кәнанийа щәза кьр, ле мьләтед майин бәрдәԝам дькьрьн кьред бенамуси бькьн. Ԝәкә 1 500 сал шунда, Паԝлос сәр ԝан мьләта, кӧ ԝәʹде Мәсиһийа дьжитьн, гот ԝәки ԝана «шәрма рʹуйе хԝә ӧнда кьрьнә». Ԝана «хԝә данә дохине, һʹәта кӧ һәр щурʹә кьрьнед һʹәрам дькьн у тʹер набьн» (Әфәс. 4:17-19). Иро гәләк мәрьв бенамусийе дькьн у нә жи шәрм дькьн. Ле хьзмәткʹаред рʹаст гәрәке хԝә дур бьгьрьн жь ньһерʹандьна тьштед бенамуси.

Порнографийа гӧнә йә һьмбәри Хԝәде. Хԝәде мәрьв пе хәйсәт-һʹӧнӧред хԝә әʹфьранд у фәрәсәтәки ӧса дайә мә, ԝәки тедәрхьн чь рʹаст ә, чь нәрʹаст ә. Хԝәде жь сәрԝахтийа хԝә, ԛанунед дәрһәԛа һәләԛәтийа сексуали дайә. Әԝи дьхԝәст, ԝәки ве һәләԛәтийерʹа, тʹәне жьн у мере кӧ һәврʹа зәԝащеда ньн, ләзәте бьвиньн (Дәстп. 1:26-28; Мәтʹлк. 5:18, 19). Әԝед кӧ порнографийайе дәрдьхьн у бәла дькьн, ԛанунед намусийе кӧ Хԝәде дайә, бь тʹәмами пьшт гӧһе хԝәва давежьн. Бәле, әԝ мәрьв Йаһоԝа беһӧрмәт дькьн. Хԝәде ԝе диԝана ԝан мәрьва бькә, йед кӧ ԛанун у принсипед ԝи бәр тьштәки һʹәсаб накьн, кӧ тьштед бенамуси дәрдьхьн у бәла дькьн (Рʹом. 1:24-27).

Ле чь дькарьн бежьн дәрһәԛа ԝана, йед кӧ бь һʹәмде хԝә порнографийайе дьхуньн йан жи дьньһерʹьн? Һьнә мәрьв дьфькьрьн, ԝәки әԝ ԛә зийане надә. Ле бь рʹасти әԝана пьштгьрийа ԝан дькьн, йед кӧ принсипед Хԝәде пьшт гӧһе хԝәва давежьн. Дьбәкә чахе ԝана дәстпекьр порнографийайе бьньһерʹьн, дәрһәԛа ве йәке нә жи дьфькьрин. Ле йәкә Кʹьтеба Пироз әшкәрә дьдә кʹьфше, ԝәки хьзмәткʹаред рʹаст гәрәке порнографийайе ԛайим нәфьрʹәт кьн. Кʹьтеба Пироз дьбежә: «Гәли Хӧдан һʹьзкьрийа, бьжәньнә хьрабийе!» (Зәб. 97:10).

 Йед кӧ дьхԝазьн хԝә жь порнографийайе дур бьгьрьн, һәла һе ԝанрʹа жи чәтьн ә ве йәке бькьн. Әм гьшк гӧнәкʹар ьн, у дьбәкә шәрʹ дькьн мьԛабьли хԝәстьнед сексуали. Хенщи ве йәке, дьле мә дькарә мә бьхальфинә, кӧ ве йәкеда тьштәки хьраб тʹӧнә (Йерәм. 17:9). Ле гәләкед кӧ бунә Мәсиһи, ԝи шәрʹида сәркʹәтьнә. Әԝ йәк дьдә кʹьфше, кӧ һун жи дькарьн тʹәрка порнографийайе бьдьн. Дина хԝә бьдьне, кӧ ча Хәбәра Хԝәде дькарә али ԝә бькә, хԝә жь ве тʹәлька Шәйтʹан хԝәй кьн.

Чаԝа мә жоре гот, гәләк Исраелийа ахьрийа хьраб стандьн, чьмки һиштьн ԝәки хԝәстьнед нәрʹаст ԝана бәрбь кьред хьраб бьвьн. Әԝ йәк тʹәви мә жи дькарә бьԛәԝьмә. Дәрһәԛа ве хофе Аԛуб шьровәкьр: «Һәр кәс дьбә машоԛе дьлһавьжийед хԝә, . . . у те щерʹьбандьне. Һьнге дьлһавьжи кәле хԝә дьстинә, гӧнә же дьфьрькә» (Аԛуб 1:14, 15). Һәрге мәрьв дәрберʹа тʹәрка хԝәстьна хьраб нәдә, әԝ хԝәстьн дькарә дьле ԝида кʹокед хԝә бьдә у ԝи бәрбь гӧнә бьвә. Ләма жи әм гәрәке һәр фькьред бенамуси жь һʹьше хԝә дәрхьн, нә кӧ бәрдәԝам кьн ԝан фькьра һʹьше хԝәда бьзвьриньн.

Һәрге фькьред нәтʹәмьз тенә һʹьше ԝә, дәрберʹа тьштәки бькьн. Иса гот: «Һәгәр дәсте тә йан ньге тә, тә жь рʹе дәрхә, ԝи жекә у жь хԝә бавежә . . . У һәгәр чʹәʹве тә, тә жь рʹе дәрдьхә, ԝи дәрхә у бавежә» (Мәт. 18:8, 9). Иса нәдьгот, ԝәки әм гәрәке рʹастә-рʹаст зийане бьдьнә бәдәна хԝә. Әԝи ԝи щурʹәйи дьхԝәст бьда кʹьфше, ԝәки әм гәрәке һәр тьште кӧ мәрʹа дьбә лькʹӧмандьн, дәрберʹа кʹӧта кьн. Ле ча әм дькарьн әве ширәта ԝи, һьндава порнографийайе бьдьнә хәбате?

Чахе һун рʹасти порнографийайе тен, нәфькьрьн ԝәки «Ԝе тьштәк нәбә». Дәрберʹа бәре хԝә бьгӧһезьн. Һәма ве дәме телевисйоне весиньн. Дәрберʹа компӧтәре йан жи тʹеле весиньн. Һʹьш-аԛьле хԝә бьдьнә сәр тьштәки баш у тʹәмьз. Һәрге һун ӧса бькьн, әԝ йәк ԝе али ԝә бькә кӧ һун фькьред хԝә контрол кьн, дәԝса кӧ хԝәстьнед хьраб ԝә контрол кьн.

Һәрге ԝә тʹәрка порнографийайе дайә, ле щар-щара әԝ тьшт дькʹәвьнә бира ԝә,  һун гәрәке чь бькьн? Шьклед порнографи йан жи фькьр, дькарьн гәләк ԝәхт һʹьше мәрьвада бьминьн. Әԝана дькарьн ньшкева бькʹәвьнә бира ԝә. Һәрге ӧса дьԛәԝьмә, дьбәкә хԝәстьна нәтʹәмьз бал ԝә пешда бе, кӧ мәсәлә мастурбасийайе бькьн. Ләма жи бир нәкьн, ԝәки әԝ фькьр дькарьн ньшкева бькʹәвьнә бира ԝә. Һазьр бьн ԝәки дәрберʹа ԝан фькьра жь һʹьше хԝә дәрхьн.

Ԛәԝи хԝәрʹа сафи кьн, ԝәки фькьред ԝә у кьред ԝә ль Хԝәде хԝәш бен. Мина Паԝлосе шанди бьн, йе кӧ «зордарийе ԛальбе хԝә» дькьр у хԝә «зәфт» дькьр (1 Корн. 9:27). Нәһельн ԝәки хԝәстьнед нәтʹәмьз ԝә контрол кьн. «Һʹьш-аԛьле хԝә ну кьн у бь ве йәке ԝәрьн гӧһастьн, сәва фәʹм кьн чь йә ԛьрара Хԝәде, кӧ ԛәнщи, хԝәши у кʹамьли йә» (Ром. 12:2, ДТʹ). Бир нәкьн: Һуне бәхтәԝар нибьн, һәрге тьштед бенамуси бькьн, ле һәрге һун пе фькьред хԝә у кьред хԝә дьле Хԝәде ша кьн, һьнге һуне бь рʹасти бәхтәԝар бьн.

Ԝе керһати бә һьнә рʹезед жь Кʹьтеба Пироз әзбәри һин бьн. Паше чахе фькьред хьраб бькʹәвьнә һʹьше ԝә, зоре хԝә бькьн, ԝәки дәрһәԛа рʹезед жь Кʹьтеба Пироз бьфькьрьн. Әԝ рʹезед жере ԝе али ԝә бькьн, ԝәки ньһерʹандьна ԝә сәр порнографийайе, мина йа Йаһоԝа бә, у фәʹм кьн әԝ чь жь ԝә дәʹԝа дькә: Зәбур 119:37; Ишайа 52:11; Мәтта 5:28; Әфәси 5:3; Колоси 3:5; у 1 Тʹесалоники 4:4-8.

Ле һун чь гәрәке бькьн, һәрге тʹәхмин дькьн, ԝәки нькарьн тʹәрка ньһерʹандьн, йан жи фькьрандьна дәрһәԛа тьштед бенамуси бьдьн? Чʹәʹв бьдьнә Иса, кӧ мәсәләкә мәзьн ә бона мә (1 Пәт. 2:21). Паши ньхӧмандьна Иса, Шәйтʹан ԝи дьщерʹьбанд. Ле Иса чь кьр? Әԝи бәрдәԝам дькьр мьԛабьли ԝи һәрʹә. Әԝ бь сайа рʹезед жь ньвисара, мьԛабьли щерʹьбандьнед Шәйтʹан дьсәкьни. Әԝи гот: «Дури мьн һәрʹә Шәйтʹан». Чаԝа Иса тʹӧ щар нәдьсәкьни, һун жи нәсәкьньн, бәрдәԝам кьн мьԛабьли Шәйтʹан шәрʹ бькьн (Мәт. 4:1-11, ДТʹ). Шәйтʹан у дьнйа ԝи ԝе бәрдәԝам кьн фькьред бенамуси бькьнә һʹьше ԝә, ле һун тʹӧ щар сьст нәбьн у нәԝәстьн кӧ шәрʹ бькьн. Һун дькарьн ԝи шәрʹида сәркʹәвьн у мьԛабьли порнографийайе бьн. Пе аликʹарийа Йаһоԝа һун дькарьн дьжмьне хԝә алт кьн.

Бәрдәԝам кьн Йаһоԝарʹа дӧа бькьн. Паԝлос гот: «Хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә» (Фили. 4:6, 7). Әʹдьлайа Хԝәде ԝе али ԝә бькә мьԛабьли тьштед хьраб шәрʹ бькьн. Һәрге һун хԝә ль Йаһоԝа бьгьрьн, «әԝ жи ԝе хԝә ль ԝә бьгьрә» (Аԛуб 4:8).

Әме нәкʹәвьнә тʹәлькед Шәйтʹан, һәрге һәләԛәтийа мә тʹәви Хԝәдейе Һәри Жорьн, ԛәԝи бә. Иса гот: «Ва йә сәрԝере ве дьнйайе [Шәйтʹан] те. Һʹӧкӧме ԝи ԛәт сәр мьн тʹӧнә» (Йуһʹн. 14:30). Чьрʹа Иса ве йәкеда ӧса баԝәр бу? Әԝи шьровәкьр: «Йе кӧ әз шандьмә тʹәви мьн ә у ԝи әз тʹәне нәһьштьмә, чьмки әз һәр гав кьрьнед кӧ ԝи хԝәш тен, дькьм» (Йуһʹн. 8:29). Чахе һун ԝан тьшта бькьн, чь кӧ Хԝәде хԝәш тен, әԝ ԝе тʹӧ щар ԝә нәһелә. Нәкʹәвьнә тʹәлька порнографийайе, у Шәйтʹан ԝе нькарьбә ԝә бьгьрә.