1. Ль гора Колоси 2:4, 8, чаԝа Шәйтʹан дьхԝазә һʹьш-аԛьле мә бькә дилтийе?

ШӘЙТʹАН дьхԝазә, ԝәки әм пьшта хԝә бьдьнә Йаһоԝа. Әԝ сәва бьгьһижә нета хԝә, һәр тьшти дькә, ԝәки һʹьше мә бькә дилтийе, кӧ әм мина ԝи бьфькьрьн. Әԝ дьхԝазә мә бьхальфинә, ԝәки әм пәй хԝәстьнед хԝә кʹәвьн, у ӧса пәй ԝи һәрʹьн. (Бьхунә Колоси 2:4, 8.)

2-3. а) Чьрʹа әм гәрәке гӧһ бьдьнә гьлийед жь Колоси 2:8? б) Әме ве готареда дәрһәԛа чь шеԝьр кьн?

² Ле гәло бь рʹасти әм бьн ве хофеда ньн кӧ Шәйтʹан дькарә мә бьхальфинә? Бәле, хоф һәйә. Биньн бира хԝә, ԝәки Паԝлос нә кӧ мәрьвед нәбаԝәррʹа гьлийед жь Колоси 2:8 ньвиси, ле ԝан Мәсиһийарʹа, йед кӧ бь рʹӧһʹе пироз кʹьфшкьри бун (Колс. 1:2, 5). Бәле, әԝ Мәсиһийед һьнге бьн хофеда бун, ле әм иро бьн хофәкә дьһа мәзьнда ньн (1 Корн. 10:12). Чьрʹа? Чьмки Шәйтʹан һатә авитьне сәр әʹрде, у әԝ һʹәму тьшти дькә сәва хьзмәткʹаред Хԝәдейи амьн бькә тʹәльке (Әʹйан. 12:9, 12, 17). Хенщи ве йәке, мәрьвед хьраб у дӧрʹу «хьрабийеда» пешда дьчьн, чьмки әм рʹожед ахьрийеда дьжин (2 Тимтʹ. 3:1, 13).

³ Ве готареда әме шеԝьр кьн, кӧ чаԝа Шәйтʹан «хапандьна пʹучʹ» дьдә хәбате, сәва кӧ сәр һʹьш-аԛьле мә һʹӧкӧм кә. Әме дәрһәԛа се методед ԝи шеԝьр кьн, кӧ әԝ бона хапандьне дьдә хәбате (Әфәс. 6:11). Паше, готара дьнда әме шеԝьр кьн, кӧ әм ча дькарьн нәһельн ԝәки тʹәлькед ԝи сәр һʹьш-аԛьле мә һʹӧкӧм кьн. Йа пешьн, ԝәрә әм шеԝьр кьн кӧ Шәйтʹан  ча Исраели хальфандьн, чахе әԝана кʹәтьнә Әʹрде Создайи.

4-6. Ль гора Ԛануна Дӧщари 11:10-15, чахе Исраели кʹәтьнә Әʹрде Создайи, гәрәке чь тьштед тʹәзә һин буна?

⁴ Шәйтʹан бь һостәти Исраели бәрбь пʹутпʹарьстийе һелан кьр. Ле әԝи ча ӧса кьр? Әԝи заньбу, ԝәки ԝанрʹа хԝарьн лазьм ә у әԝ йәк да хәбате. Чахе Исраели кʹәтьнә Әʹрде Создайи, әԝана гәрәке һин буна бь щурʹе тʹәзә әʹрде бещәр кьн. Чахе әԝана Мьсьреда бун, ԝана бона әʹрдед хԝә ав жь чʹәме Нил һьлдьдан. Ле Әʹрде Создайида чʹәм тʹӧнә бу, ләма жи сәва авдане баран у шьли лазьм бу, ԝәки тьштед чанди шин бьн (Бьхунә Ԛануна Дöщари 11:10-15; Иша. 18:4, 5). Исраели гәрәке ида һин буна щурʹәки майин әʹрд у дәштед хԝә бещәр кьрана. Ле әԝ нәһеса бу, чьмки һʹәчʹи зәʹф Исраелийед кӧ заньбун әʹрде ча бещәр кьн, бәрʹийеда мьрьбун.

⁵ Йаһоԝа Исраелийарʹа шьровәкьр, ԝәки дәрәща ԝан һатийә гӧһастьне, у паше чь кӧ гот, те бежи әԝ гьлийед ԝи, бещәркьрьна әʹрдева гьредайи нибун. Әԝи ԝанрʹа гот: «Һаш жь хԝә һәбьн, ԝәки дьле ԝә нәйе хапандьне у һун нәшьһʹьтьн, бәр хԝәдейе башԛә та нәбьн ԝанрʹа ԛӧльх нәкьн» (Ԛан. Дщр. 11:16, 17). Ле чьрʹа Йаһоԝа чахе тʹәви ԝан хәбәр дьда, кӧ ча әʹрде бещәр кьн, гот ԝәки сәре хԝә бәр хӧданед ԛәлп данәйньн?

⁶ Йаһоԝа заньбу, ԝәки Исраели дьбәкә бьхԝазьн һьнә методед бещәркьрьне жь мьләтед пʹутпʹарьст һин бьн, чьмки ԝана жь Исраелийа баштьр заньбун, кӧ чаԝа әʹрде бещәр кьн. Исраели дькарьбун жь ԝан мьләта, тьштед тʹәзә һин буна, ле ве йәкеда хоф жи һәбу. Кәнанийед кӧ хԝәйе әʹрд бун, хӧдане ԛәлп Баәʹл дьһʹәбандьн,  у тьштед ԛәлп баԝәр дькьрьн. Ԝана Баәʹл һʹәсаб дькьр ча хԝәйе әʹзмана, кʹижан кӧ баране дьбаринә. Йаһоԝа нәдьхԝәст, ԝәки щьмәʹта ԝи бькʹәвә бәр байе ԝан баԝәрийед ԛәлп. Ле диса жи Исраелийа бьжартьн, ԝәки Баәʹл бьһʹәбиньн (Жьмар 25:3, 5; Һʹакьм. 2:13; 1 Пʹадш. 18:18). Ньһа дина хԝә бьдьне, кӧ чаԝа Шәйтʹан әԝана кьрьнә тʹәлька хԝә.

7. Чахе Исраели кʹәтьнә Әʹрде Создайи, баԝәрийа ԝан ча һатә щерʹьбандьне?

⁷ Метода пешьн кӧ Шәйтʹан да хәбате, әԝ хԝәстьна нормал бу, ԝәки баран бьбарә у әʹрдед ԝан бенә авдане. Әʹрде Создайида һәр сал жь мәһа Нисане һʹәта Илоне баран кем дьбари. Сәва зәви у тьштед ԝани чанди шин буна, баранева гьредайи бу, ле баран гәләк щар незики мәһа Щотмәһе дәстпедьбу бьбарә. Шәйтʹан Исраели ӧса хальфандьн, кӧ ԝана тʹьре гәрәке кьред у әʹдәтед мьләтед пʹутпʹарьст бькьн, сәва кӧ әʹрде ԝан шин бә. Әԝ мьләтед пʹутпʹарьст баԝәр дькьрьн, кӧ һәрге әԝана хӧданед хԝә бьһʹәбиньн у фьлан әʹдәта бькьн, хӧданед ԝан ԝе ԝанрʹа баране бьбариньн. Исраелийед кӧ баԝәрийа хԝә һьндава Йаһоԝа сьст кьрьн, баԝәр дькьрьн ԝәки һьнге ԝе әʹрд һʹьшк нәбә, һәрге әԝана ԝан әʹдәтед пʹутпʹарьста бькьн, кʹижан кӧ бона хӧдане ԛәлп Баәʹл дькьрьн.

8. Кʹижан метода дӧда Шәйтʹан да хәбате? Шьровәкьн.

⁸ Метода дӧда кӧ Шәйтʹан һьндава Исраелийа да хәбате, әԝ һәбу хԝәстьнед бенамуси. Мьләтед пʹутпʹарьст пе кьред хԝәйи һʹәрам, хӧданед хԝә дьһʹәбандьн. Нава ԝан кьред һʹәрамда, ӧса жи ԛавийа жьна у мера бу, кӧ пʹарьстгәһеда дькьрьн. Әԝана сәр һомосексуалтийе у кьред дьнә бенамуси, нә кӧ тʹәне чʹәʹве хԝә дадьдан, ле әԝ йәк бона ԝан ида нормал дьһатә һʹәсабе! (Ԛан. Дщр. 23:17, 18; 1 Пʹадш. 14:24). Әԝ мьләтед пʹутпʹарьст баԝәр дькьрьн, ԝәки чахе әԝана әԝан әʹдәта биньн сери, әв йәк ԝе хӧданед ԝан һелан кә кӧ әʹрде ԝан кʹәрәм кьн, сәва гәләк бәр бьдә. Гәләк Исраели кʹәтьнә ве тʹәльке, у мина ԝан мьләтед хәриб, әʹдәтед бенамуси кьрьн, у дәстпекьрьн хӧданед ԛәлп бьһʹәбиньн. Һьнгеда әԝана кʹәтьнә дилтийа Шәйтʹан.

9. Ль гора Һосәйа 2:16, 17, чаԝа Шәйтʹан ӧса кьр кӧ Исраелийа Йаһоԝа бир кьрьн?

⁹ Шәйтʹан метода сьсийа жи да хәбате. Әԝи ӧса кьр, ԝәки Исраелийа бир кьрьн Йаһоԝа кʹе йә. Ԝәʹде рʹожед Йерәмйа пʹехәмбәр, Йаһоԝа әʹлам кьр, ԝәки пʹехәмбәред ԛәлп, жь бо Баәʹл ӧса кьрьн, кӧ щьмәʹта Ԝи наве Ԝи бир кьрьн (Йерәм. 23:27). Ча те кʹьфше щьмәʹта Хԝәде ида наве Йаһоԝа һьлнәдьдан у дәԝсе наве Баәʹл дьданә хәбате, кʹижан кӧ те һʹәсабе «Хԝәйи» йан жи «Аха». Жь бо ве йәке, Исраели ида фьрԛийа ортʹа Йаһоԝа у Баәʹл нәдьдитьн, ләма жи ида ԝана әʹдәтед бона һʹәбандьна Баәʹл тʹәви һʹәбандьна Йаһоԝа хьстьн. (Бьхунә Һосәйа 2:16, 17.)

10. Шәйтʹан иро кʹижан метода дьдә хәбате?

¹⁰ Шәйтʹан әԝан метода иро жи дьдә хәбате. Әԝ мәрьва дькә дилтийе бь сайа хԝәстьнед ԝанә тʹәбийәти, хԝәстьнед бенамуси у ӧса дькә, ԝәки әԝана Йаһоԝа бира бькьн. Ԝәрә әм шеԝьр кьн метода пашьн.

11. Чаԝа Шәйтʹан ӧса дькә, ԝәки мәрьв Йаһоԝа бир кьн?

¹¹ Шәйтʹан ӧса дькә, ԝәки мәрьв Йаһоԝа бир кьн. Паши мьрьна шандийед Иса, һьнәкед кӧ хԝә Мәсиһи һʹәсаб дькьрьн,  дәстпекьрьн һинкьрьнед ԛәлп бәла кьн (Кʹар. Шанд. 20:29, 30; 2 Тʹеслн. 2:3). Әԝ мәрьвед рʹабәр, һеди-һеди ӧса кьрьн, ԝәки Хԝәдейе рʹаст бе биркьрьне. Мәсәлә, ԝана ида наве Хԝәде Кʹьтеба Пирозда нәдьданә хәбате у дәԝса наве ԝи, сәрнав дьньвисин, бәʹса хәбәре «Хӧдан». Жь бо ве йәке кӧ ԝана наве Хԝәде данә һьлдане у дәԝса наве ԝи ньвисин «Хӧдан», хԝәндәванед Кʹьтеба Пирозрʹа чәтьн бу Йаһоԝа башԛә кьн жь «хӧданед» майин, дәрһәԛа кʹижана Кʹьтеба Пирозда те гьликьрьне (1 Корн. 8:5). Ԝана әԝ термин, демәк «Хӧдан», һьн сәр Йаһоԝа һьн жи сәр Иса дьготьн, чь кӧ мәрьварʹа чәтьн дькьр фьрԛийа ортʹа Йаһоԝа у Исада бьвиньн (Йуһʹн. 17:3). Әԝе хальфандьне, һинкьрьна дәрһәԛа Сейәканә пешда ани, чь кӧ Хәбәра Хԝәде һин накә. Ахьрийа ве йәке әԝ ә, кӧ гәләк мәрьв баԝәр дькьн, ԝәки әԝана нькарьн Хԝәде нас кьн. Ле әԝ дәрәԝәкә мәзьн ә! (Кʹар. Шанд. 17:27).

12. Дине ԛәлп пьштгьрийа чь дькә, у ль гора Рʹомайи 1:28-31, ахьрийа ве йәке чь йә?

¹² Шәйтʹан мәрьва бәрбь хԝәстьнед бенамуси һелан дькә. Ԝәʹде Исраела бәре, Шәйтʹан дине ԛәлп да хәбате, сәва ԝана бькә нав бенамусийе. Иро жи әԝ ӧса дькә. Динед ԛәлп чʹәʹве хԝә дадьдьн сәр бенамусийе у һәла һе жи кьред бенамуси ԛәбул дькьн. Ахьрийа ве йәке әԝ ә, кӧ гәләк мәрьв дьбежьн, ԝәки Хԝәдерʹа хьзмәт дькьн, ле гӧрʹа принсипед ԝийә намусийе накьн. Паԝлосе шанди Рʹомайарʹа нәʹма хԝәда гот, кӧ ахьрийа ве йәке чь йә. (Бьхунә Рʹомайи 1:28-31.) Һʹәму щурʹә бенамуси, демәк һомосексуалти жи, дькʹәвьн нава ԝан «тьштед нәщайиз» (Рʹом. 1:24-27, 32; Әʹйан. 2:20). Чьԛас фәрз ә, ԝәки әм хԝә ԛәԝи ль һинкьрьнед Кʹьтеба Пироз бьгьрьн.

13. Шәйтʹан диса кʹижан методе дьдә хәбате?

¹³ Шәйтʹан хԝәстьнед мәрьвайә тʹәбийәти дьдә хәбате. Мәсәлә, хԝәстьна мәйә тʹәбийәти һәйә, кӧ пʹешә йан тьштед тʹәзә һин бьн, сәва кӧ әʹбура хԝә у нәфәред хԝә бькьн (1 Тимтʹ. 5:8). Гәләк щар әм ԝан пʹеша йан фәрәсәта ԛазанщ дькьн, чахе мәкʹтәбеда рʹьнд һин дьбьн. Ле әм гәрәке ве йәкеда фәсал бьн. Гәләк ԝәлатада, мәкʹтәбада у университетада хенщи пʹешә, ӧса жи философийайе һин дькьн, демәк биланийа мәрьвайи. Мәкʹтәбада шьке дькьнә дьле шагьрта, кӧ  Хԝәде тʹӧнә йә, у ԛәдьре Кʹьтеба Пироз дехьн. Ԝанрʹа дьбежьн, ԝәки һʹәму мәрьвед аԛьл баԝәр дькьн, кӧ әʹмьр пе еволусийайе пешда һатийә (Рʹом. 1:21-23). Ле әԝ һинкьрьн бь тʹәмами мьԛабьли «сәрԝахтийа Хԝәде» нә (1 Корн. 1:19-21; 3:18-20).

14. Философийа ве дьнйайе мәрьва чь һин дькә?

¹⁴ Философийа мәрьва, принсипед Йаһоԝа пьшт гӧһе хԝәва давежә у һьн жи мьԛабьли ван принсипа дәрдькʹәвә. Әԝ һелан накә, ԝәки әм бәре рʹӧһʹе Хԝәдейи пироз нав хԝәда пешда биньн, ле бәрбь «кьред бьнйатʹа инсен» һелан дькә (Галт. 5:19-23). Әԝ философийа мәрьва һелан дькә, ԝәки ԛӧрʹә у бабах бьн. Ахьрийа ве йәке әԝ ә, кӧ мәрьв дьбьнә «хԝәһʹьз» (2 Тимтʹ. 3:2-4). Әԝ һʹӧнӧр мьԛабьли шкәстибуне, демәк мьлуктийе йә, кӧ бал хьзмәткʹаред Хԝәде гәрәке һәбә (2 Сам. 22:28). Һьнә Мәсиһийед кӧ дьчьнә университете у пәй хԝәндьна бьльнд дькʹәвьн, һеди-һеди ньһерʹандьна ве дьнйайе ԛәбул кьрьнә, нә кӧ йа Хԝәде. Ԝәрә әм дина хԝә бьдьнә мәсәләке, кӧ ча әԝ йәк дькарә бьԛәԝьмә.

15-16. Һун чь пеһʹәсийан жь ԛәԝьмандьна хушкәке?

¹⁵ Хушкәк кʹижан кӧ 15 сала зедәтьр хьзмәткʹара һәртʹьм ә, гьли дькә: «Әз ньхӧманди бум, у мьн һьн хԝәндьбу у һьн жи бьһистьбу, кӧ чьԛас хоф ә пәй хԝәндьна бьльнд кʹәвьн, ле мьн әԝ һʹәму тьшт пьшт гӧһе хԝәва авит. Әз дьфькьрим, ԝәки әԝ ширәт бона мьн нинә». Ле әԝ хушк рʹасти кʹижан чәтьнайа һат? Әԝ дьбежә: «Мьн һаԛас ԝәʹде хԝә хәрщ дькьр, ԝәки дәрсед хԝә һин бьм, кӧ ида ԝәʹде мьн тʹӧнә бу, ԝәки Йаһоԝарʹа дӧа кьм ча мьн һәр гав  дькьр. Ӧса жи әз ӧса дьвәстийам, ԝәки мьн тʹаԛә нәдькьр мәрьварʹа дәрһәԛа баԝәрийа хԝә хәбәр дьм, у һәла һе жи нькарьбум хԝә бона щьвате рʹьнд һазьр кьра. Шькьр, ԝәки әз сәр һʹьше хԝәда һатьм у мьн фәʹм кьр, ԝәки әԝ хԝәндьна бьльнд һәләԛәтийа мьн тʹәви Йаһоԝа хьраб дькә, у мьн ида заньбу ԝәки әз гәрәке жь университете дәрем. Мьн һәма ӧса жи кьр».

¹⁶ Ле ча хԝәндьна бьльнд сәр һʹьш-аԛьле ԝе хушке һʹӧкӧм кьр? Әԝ гьли дькә: «Мьнрʹа шәрм ә бежьм, ԝәки хԝәндьна бьльнд кӧ мьн гәләк дьхԝәст, әз һин кьрьм, ԝәки дина хԝә бьдьм сәр кемаси у шашийед мәрьва, илаһи йед хушк-бьред хԝә, ӧса жи жь ԝана гәләк дәʹԝа кьм, у хԝә жь ԝана дур бьгьрьм. Мьнрʹа гәләк ԝәхт лазьм бу, сәва әԝе ньһерʹандьна хԝәйә нәрʹаст бьгӧһезьм. Әԝ йәк чь кӧ һатә сәре мьн, мьнрʹа нишан кьр, ԝәки чьԛас хоф ә, ширәтед Баве мәйи әʹзмана пьшт гӧһе хԝәва бавежьн, кʹижан кӧ әԝ бь тʹәшкиләта хԝә дьдә. Йаһоԝа дьһа рʹьнд әз нас дькьрьм, нә кӧ мьн хԝәха хԝә. Хԝазьл мьн пешда гӧһ бьда ԝи!».

17. а) Әм гәрәке хԝәрʹа ԛьрар кьн чь бькьн? б) Әме готара дьнда дәрһәԛа чь шеԝьр кьн?

¹⁷ Хԝәрʹа ԛьрар кьн, ԝәки тʹӧ щар нәкʹәвьнә бәр байе философийа у «хапандьна пʹучʹ» йа ве дьнйа Шәйтʹан. Тʹӧ щар нәһельн, ԝәки Шәйтʹан ԝә бьхальфинә (1 Корн. 3:18; 2 Корн. 2:11). Тʹӧ щар изьне нәдьнә ԝи, ԝәки ӧса бькә, кӧ һун Йаһоԝа бир кьн. Пе принсипед Йаһоԝа бьжин. Тʹӧ щар изьне нәдьн Шәйтʹан, ԝәки ԝә бькә ве тʹәльке, кӧ һун ширәтед Йаһоԝа пьшт гӧһе хԝәва бавежьн. Ле һәрге ԝә тедәрхьст, ԝәки ньһерʹандьна ԝә мина йа ве дьнйайе йә, һун гәрәке чь бькьн? Готара дьн ԝе нишан кә, ԝәки Хәбәра Хԝәде али мә дькә һәла һе жи ԝан фькьр у хәйсәт-һʹӧнӧра кʹӧта кьн, кʹижан кӧ нав мәда кʹур рʹуньштьнә (2 Корн. 10:4, 5).