1. Йаһоԝа дькарә чь бькә, сәва ԛьрара хԝә бинә сери?

ЙАҺОԜА дькарә бьбә кәсе лазьм, сәва кӧ ԛьрара хԝә бинә сери. Мәсәлә, Йаһоԝа дьбә Дәрсдар, Баве бәрдьлийе, у Мьзгиндар. Әԝ тʹәне чәнд мәсәлә нә, кӧ ча әԝ дькарә бьбә кәсе лазьм (Иша. 48:17; 2 Корн. 7:6; Галт. 3:8). Ле әԝ гәләк щар мәрьва дьдә хәбате, сәва ԛьрара хԝә бинә сери (Мәт. 24:14; 28:19, 20; 2 Корн. 1:3, 4). Йаһоԝа ӧса жи дькарә биланийе у ԛәԝате бьдә мә һәр кәси, ԝәки әм бьбьнә кәсед лазьм, сәва ԛьрара ԝи биньн сери. Наве ԝи һәма әԝ йәк те һʹәсабе, кӧ әԝ һьн хԝә, һьн жи әʹфьринед хԝә дькарә бькә кәсе лазьм, чаԝа кӧ гәләк зандар ве нета наве Йаһоԝа шьровәдькьн.

2. а) Чьрʹа щара әм дӧдьли дьбьн, кӧ әм бона Йаһоԝа керһати нә йан на? б) Әме ве готареда дәрһәԛа чь шеԝьр кьн?

² Һәр кәс жь мә дьхԝазә дәсте Йаһоԝада керһати бә. Ле һьнәк дьбәкә дӧдьли нә, кӧ Йаһоԝа ԝана дьдә хәбате йан на. Чьрʹа? Чьмки әԝана жь бо әʹмьре хԝәйи мәзьн, дәрәщед хԝә, йан жи фәрәсәтед хԝә һаԛас нькарьн бькьн чьԛас дьхԝазьн. Ле һьнәк жи дьфькьрьн, ԝәки әԝана епʹещәйи дькьн, у нахԝазьн һе зедә бькьн у пешда һәрʹьн. Ве готареда, әме шеԝьр кьн, ԝәки Йаһоԝа дькарә һәр тьшти бьдә мә, чь кӧ лазьм ә сәва ԛьрара ԝи биньн сери. Паше, әме шеԝьр кьн һьнә сәрһатийед жь Кʹьтеба Пироз, у пебьһʹәсьн кӧ Йаһоԝа ча хԝәстьн у ԛәԝат дайә хьзмәткʹаред хԝә, һьн мера һьн жи жьна, сәва ԛьрара ԝи биньн сери. Ле хьлазийеда әме шеԝьр кьн, кӧ ча әм дькарьн бьһельн, ԝәки Йаһоԝа мә бьдә хәбате.

3. Ль гора Филипи 2:13, Йаһоԝа ча дькарә хԝәстьне бьдә мә, сәва фьлан шьхӧли бькьн?

³ Бьхунә Филипи 2:13. * Йаһоԝа дькарә хԝәстьне бькә дьле мә, сәва фьлан шьхӧли бькьн. Ле ча әԝ ве йәке дькә? Мәсәлә, әм пеһʹәсийанә, ԝәки щьватеда кәсәкирʹа йан жи шьхӧләкида аликʹари лазьм ә. Йан жи рʹуспийа щьватеда нәʹма жь филиале хԝәндьнә, ԝәки щики һʹәԝщәти һәйә. Дьбәкә әм пьрсе дьдьнә хԝә: «Әз чьда дькарьм аликʹарийе бьдьм?» Йан жи дьбәкә мәрʹа шьхӧләки гьран данә, ле әм дӧдьли нә, әме бькарьбьн әԝи шьхӧли рʹьнд бькьн йан на. Йан жи паши хԝәндьна рʹезед жь Хәбәра Хԝәде, дьбәкә әм хԝәрʹа дьфькьрьн: «Чаԝа әз дькарьм пе ԝан рʹеза али мәрьва бькьм?» Фәʹмдари йә, Йаһоԝа ԝе тʹӧ щар зоре мә нәкә тьштәки бькьн. Ле чахе Йаһоԝа дьвинә кӧ әм хԝә дьщерʹьбиньн, демәк дьфькьрьн кӧ чь дькарьн алийе хԝәда бькьн, әԝ дькарә хԝәстьне у ԛәԝате бьдә мә, ԝәки әм бькьн ве йәке, дәрһәԛа чь кӧ фькьрин.

4. Чаԝа Йаһоԝа дькарә ԛәԝате бьдә мә, кӧ шьхӧл бькьн?

⁴ Йаһоԝа дькарә ӧса жи ԛәԝате бьдә мә, кӧ ԛьрара ԝи биньн сери (Иша. 40:29). Әԝ рʹӧһʹе хԝәйи пироз дьдә мә, сәва әм фәрәсәтед хԝә һе баш кьн (Дәркʹ. 35:30-35). Йаһоԝа бь сайа тʹәшкиләта хԝә мә һин дькә, кӧ чаԝа фьлан шьхӧлида һе пешда һәрʹьн у һе рʹьнд бькьн. Һәрге һун шьхӧләки ньзаньн ча бькьн, аликʹарийе бьхԝазьн. Ӧса жи һун һәр гав дькарьн жь Баве мәйи әʹзмана кӧ мәрʹд ә, һиви кьн сәва «зорайийа ԛәԝате жь Хԝәде» бьстиньн (2 Корн. 4:7; Луԛа 11:13). Кʹьтеба Пирозда һәнә гәләк мәсәлә, кӧ Йаһоԝа ча хԝәстьн у ԛәԝат дайә мера у жьна, сәва ԛьрара ԝи биньн сери. Чахе әм ԝан сәрһатийа шеԝьр кьн, бьфькьрьн кӧ Йаһоԝа ча дькарә ԝә жи бьдә хәбате мина ԝан.

5. Әм чь педьһʹәсьн жь ве йәке, кӧ Йаһоԝа чаԝа у кʹәнге Муса да хәбате, сәва әԝ щьмәʹта Ԝи хьлаз кә?

⁵ Йаһоԝа Муса кьрә хьлазкʹаре Исраелийа. Ле кʹәнге Йаһоԝа ԝи да хәбате, чахе Муса «тʹәмамийа сәрԝахтийа мьсьрийа һин бу», һьнге? (Кʹар. Шанд. 7:22-25). На, Йаһоԝа Муса да хәбате тʹәне һьнге, чахе али ԝи кьр, кӧ бьбә мәрьвәки шкәсти, нәрм у бь сәбьр (Кʹар. Шанд. 7:30, 34-36). Йаһоԝа мерхаси да Муса сәва бәр сәрԝере Мьсьрейи ԛәԝи бьсәкьнә (Дәркʹ. 9:13-19). Әм чь педьһʹәсьн жь ве йәке, кӧ Йаһоԝа чаԝа у кʹәнге Муса да хәбате? Йаһоԝа ԝан мәрьва дьдә хәбате, йед кӧ чʹәʹв дьдьнә хәйсәт-һʹӧнӧред ԝи у итʹбарийа хԝә ԝи тиньн кӧ ԛәԝате жь ԝи дьхԝазьн (Фили. 4:13).

6. Әм чь педьһʹәсьн жь ве йәке кӧ Йаһоԝа ча Барзиллай да хәбате сәва әԝ али Даԝьд Пʹадша бькә?

⁶ Гәләк ԛьрʹнә шунда, Йаһоԝа Барзиллай да хәбате, сәва али Даԝьд Пʹадша бькә. Чахе Даԝьд у мәрьвед кӧ тʹәви ԝи бун, жь кӧрʹе ԝи Абшалом дьрʹәвийан, әԝана тʹи, бьрчи у ԝәстийайи бун. Мерәки әʹмьрда мәзьн Барзиллай тʹәви мәрьвед дьн, әʹмьре хԝә кьрә бьн ԛәзийе, сәва аликʹарийе бьдә Даԝьд у йед кӧ тʹәви ԝи бун. Барзиллай нәфькьри кӧ әԝ әʹмьрда мәзьн ә, бона Йаһоԝа керһати нинә у нькарә тьштәки бькә. Дәԝсе, чь кӧ дәсте ԝида һәбу, әԝи бь мәрʹдани да хәбате, сәва али хьзмәткʹаред Хԝәде бькә, чьда әԝана һʹәԝщә бун (2 Сам. 17:27-29). Әм жь ве йәке чь дәрсе хԝәрʹа һин дьбьн? Фьрԛи тʹӧнә әм чәнд сали нә, Йаһоԝа дькарә мә бьдә хәбате, сәва әм һьн мьһала хԝәда ӧса  жи ԝәлатед майинда, али хушк-бьра бькьн чьда әԝана һʹәԝщә нә (Мәтʹлк. 3:27, 28; 19:17). Һәрге жи әм рʹастә-рʹаст нькарьн али ԝан бькьн, әм дькарьн бона шьхӧле һʹәмдьнйайе пʹәра ԛӧрбан кьн, кʹижан кӧ те хәрщкьрьне бона аликʹарийа ԝан хушк-бьра, йед кӧ ԝәʹде хәзәбе зийане дьстиньн, у щийе кӧ һʹәԝщәти һәйә (2 Корн. 8:14, 15; 9:11).

7. Чаԝа Йаһоԝа Шьмһʹун да хәбате, у чьрʹа әԝ йәк мә дьшьдинә?

⁷ Йаһоԝа соз да Шьмһʹуне каләмер жь Оршәлиме, йе кӧ амьн бу, ԝәки һʹәта әԝ Мәсиһ пе чʹәʹве хԝә нәвинә, ԝе нәмьрә. Әԝ соз ԝе гәләк Шьмһʹун бьшьданда, чьмки әԝ ида гәләк сала һивийа Мәсиһ бу. Баԝәри у сәбьра ԝи һатә кʹәрәмкьрьне. Рʹожәке, «әԝ бь рʹебәрийа рʹӧһʹ» һатә пʹарьстгәһе. Ԝедәре әԝи Исайе бьчʹук дит, у Йаһоԝа Шьмһʹун да хәбате сәва дәрһәԛа ве зарʹе пʹехәмбәртийе бькә, йе кӧ ԝе бьбә Мәсиһ (Луԛа 2:25-35). Рʹаст ә дьбәкә Шьмһʹун перʹа нәгьһишт кӧ хьзмәтийа Исайә сәр әʹрде бьвинә, ле әԝ гәләк рʹази бу сәва ԝи ԛәдьре мәзьн, кӧ Йаһоԝа ԝи да хәбате. Ле диса һе зедә кʹәрәм һивийа Шьмһʹун ьн! Дьнйа тʹәзәда, әԝ мере амьн ԝе сәрԝертийа Иса бьвинә, кʹижан кӧ ԝе һʹәмуйед сәр әʹрдерʹа кʹәрәма бинә (Дәстп. 22:18). Әм жи дькарьн бона һәр щурʹә шьхӧл жь Йаһоԝа рʹази бьн, ԝәки әԝ мә дьдә хәбате.

8. Чаԝа Йаһоԝа дькарә мә мина Барнабас бьдә хәбате?

⁸ Ԛьрʹна йәкеда Д.М., мәрьвәки мәрʹд Усьв, һишт ԝәки Йаһоԝа ԝи бьдә хәбате (Кʹар. Шанд. 4:36, 37). Ча те кʹьфше Усьв йәки гәләк дьлшәԝат бу, ләма жи шандийа әԝ нав кьрьн Барнабас, кӧ те һʹәсабе «Йе Дьлдайине». Мәсәлә, чахе Шаԝул бу Мәсиһи, йәкә гәләк бьра дьтьрсийан незики ԝи бьн, чьмки әԝи бәре Мәсиһи дьзерандьн. Ле Барнабасе дьлован чу али Шаԝул бькә. Бешьк, Шаԝул ԛәнщийа ԝи гәләк шекьранд (Кʹар. Шанд. 9:21, 26-28). Паше, рʹуспийед Оршәлимеда дитьн, ԝәки хушк-бьред жь Әнтакйа Сурйайерʹа дьлдайин лазьм ә. Ле ԝана кʹе шанд бона ве йәке? Бәле, Барнабас! У ԝана рʹасти жи мәрьвәки ӧса бьжартьн, кʹижан кӧ лазьм бу. Кʹьтеба Пироз дьбежә, ԝәки Барнабас «дьл дьда ԝан һʹәмуйа кӧ бь тʹәмамийа дьле хԝәва Хӧданрʹа амьн бьминьн» (Кʹар. Шанд. 11:22-24). Иро жи, Йаһоԝа дькарә али мә бькә, ԝәки бона хушк-бьра бьбьнә «йе дьлдайине». Мәсәлә, Йаһоԝа бь сайа мә дькарә бәрдьлийе бьдә ԝан хушк-бьра, кʹижана кӧ мәрьве хԝәйи незик ӧнда кьрьнә. Йан жи әԝ дькарә мә һелан кә, сәва әм тʹәсәлийа ԝан хушк-бьра бькьн, йан жи тʹелехьн, йед кӧ нәхԝәш ьн йан жи депресийада ньн, у ԝанрʹа гьлийед ширьн бежьн. Ле һуне бьһельн, ԝәки Йаһоԝа ԝә жи бьдә хәбате чаԝа Барнабас да хәбате? (1 Тʹеслн. 5:14).

9. Әм чь пеһʹәсийан жь ве йәке, кӧ Йаһоԝа али Васили кьр сәва әԝ бьбә рʹуспийе баш?

⁹ Йаһоԝа али бьраки кьр, наве кʹижани Васили йә, кӧ бьбә шьване рʹӧһʹанийи баш. Чахе әԝ 26 салийа хԝәда бу рʹуспи, әԝ дьтьрсийа кӧ ԝе ча рʹӧһʹанида али хушк-бьра бькә, илаһи али ԝан, йед кӧ тәнгасийада ньн. Әԝ жь рʹуспийед щерʹьбанди гәләк тьшт һин бу, у ӧса жи Мәкʹтәба Хьзмәтийе дәрбаз бу. Васили алийе хԝәда һәр тьшт дькьр, сәва пешда һәрʹә. Мәсәлә, әԝи хԝәрʹа башԛә нетед хԝәйә бьчʹук ньвиси. Гава әԝ дьгьһиштә һәр нетәке, һеди-һеди хԝәда баԝәр дьбу у ида тьрса ԝи тʹӧнә бу. Ньһа әԝ дьбежә: «Чь кӧ бәре әз дьдамә тьрсандьне, иро мьнрʹа шабунәкә мәзьн тинә. Чахе Йаһоԝа али мьн дькә, кӧ рʹезәкә лазьм бьвиньм, сәва бәрдьлийе бьдьмә хушк йан бьраки, әв йәк дьле мьн гәләк ша дькә». Бьрано, һәрге һун  мина Васили һазьр ьн, кӧ Йаһоԝа ԝә бьдә хәбате, әԝ дькарә фәрәсәте ӧса бьдә ԝә, кӧ һун бькарьбьн щьватеда дьһа зәʹф шьхӧл бькьн.

10. Абигаиле чь кьр, у әм жь ԝе чь дәрсе һин дьбьн?

¹⁰ Чахе Даԝьд у меред амьн кӧ тʹәви ԝи бун, жь Шаԝул дьрʹәвийан, ԝанрʹа аликʹари лазьм бу. Әԝ мәрьвед тʹәви Даԝьд, чун бал Набал, йе кӧ дәԝләти бу, у һьнә хԝарьн жь ԝи хԝәстьн. Ԝана аза әԝ аликʹари жь ԝи хԝәстьн, чьмки бәрʹийеда кәрийед ԝи хԝәй дькьрьн. Ле Набал мәрьвәки хԝәһʹьз бу у ԛайил нәбу тьштәки бьдә ԝан. Сәва ве йәке Даԝьд гәләк һерс кʹәт у сафи кьр Набал у һʹәму меред мала ԝида, бькӧжә (1 Сам. 25:3-13, 22). Ле Абигаила жьна Набал, хенщи кӧ бәдәԝ бу, ӧса жи йәкә сәрԝахт бу. Әԝе мерхаси да кʹьфше кӧ чу бал Даԝьд. Әԝ кʹәтә сәр чока у һиви ԝи кьр, ԝәки гӧне хуна кәсәк нәкә стуйе хԝә. Әԝе бь мәʹрифәти Даԝьд ширәт кьр, ԝәки әве дәрәще бьдә дәсте Йаһоԝа. Әԝ гьлийед ԝейә бь мьлукти у кьред ԝейә бь билани, дьле Даԝьд гьртьн. Әԝи тедәрхьст, ԝәки Йаһоԝа әԝ шандийә бал ԝи (1 Сам. 25:23-28, 32-34). Абигаиле хәйсәт-һʹӧнӧред ӧса нав хԝәда пешда анибу, кӧ али ԝе кьрьн дәсте Йаһоԝада керһати бә. Иро жи хушкед кӧ сәр хԝә дьхәбьтьн, ԝәки мәʹрифәт у сәрԝахт бьн, Йаһоԝа дькарә ԝана бьдә хәбате, сәва әԝана нәфәред хԝә у хушк-бьред щьватеда бьшьдиньн (Мәтʹлк. 24:3; Тито 2:3-5).

11. Ԛизед Шаллум чь кьрьн, у иро кʹе чʹәʹв дьдә ԝан?

¹¹ Гәләк ԛьрʹнә шунда, ԛизед Шаллум нава ԝан мәрьвада бун, йед кӧ Йаһоԝа әԝ данә хәбате, сәва диԝаред Оршәлиме тʹәзә кьн (Нәһәм. 2:20; 3:12). Рʹаст ә баве ԝан сәрԝер бу, йәкә ԛизед Шаллум һазьр бун әԝ шьхӧле гьран у хоф бькьн (Нәһәм. 4:15-18). Әԝана нә мина меред Тәкоайа бун, кʹижан кӧ навдар бун у хԝә ньмьз нәкьрьн, ԝәки ве хәбатеда кʹомәке бьдьн (Нәһәм. 3:5). Бьдьнә бәр чʹәʹве хԝә, ԛизед Шаллум чьԛас ша бун, чахе диԝар нава 52 рʹожада һатә хьлазкьрьне! (Нәһәм. 6:15). Иро жи, хушкед хирәт шабуне дьстиньн чахе хьзмәтийа мәхсусда шьхӧл дькьн, әԝ һәйә авакьрьн у тʹәзәкьрьна ԝан авайа, кʹижан кӧ тʹәсмили Йаһоԝа кьрьнә. Сәва әԝ шьхӧл пешда һәрʹә, мәрʹа хушкед ӧса хирәт, зен у амьн лазьм ьн.

12. Йаһоԝа ча дькарә мә бьдә хәбате чаԝа Табитʹа да хәбате?

¹² Йаһоԝа Табитʹа һелан кьр, ԝәки «ԛәнщи у херкьрьнада» мәрʹд бә, илаһи һьндава жьнәбийада (Кʹар. Шанд. 9:36). Әԝ мәрьвәкә гәләк дәствәкьри у һʹәйф бу, ләма чахе әԝ мьр, гәләка шина ве дькьрьн. Ле гава Пәтрус әԝ жь мьрьне рʹакьр, шабуна ньге ԝан әʹрд нәдьгьрт (Кʹар. Шанд. 9:39-41). Әм жь Табитʹайе чь һин дьбьн? Фьрԛи тʹӧнә әм щаһьл йан мәзьн ьн, мер йан жьн ьн, әм гьшк жи дькарьн тьштәкида аликʹарийе бьдьнә хушк-бьра (Ибрн. 13:16).

13. Йаһоԝа ча хушкәкә шәрмокә Рут да хәбате, у әԝе дәрһәԛа ве йәке чь гот?

¹³ Хушкәкә мә наве кʹижане Рут ә, кӧ йәкә шәрмокә бу, дьхԝәст бьбә мисйонер. Чахе әԝ бьчʹук бу, әԝе мал бь мал зу-зу бәлавок бәла дькьрьн. Әԝе гьли кьр: «Мьн хьзмәти бь рʹасти һʹьз дькьр». Ле йәкә жерʹа чәтьн бу бәр дәрийа тʹәви мәрьва дәрһәԛа Пʹадшатийа Хԝәде хәбәр дә. Рʹаст ә әԝ шәрмокә бу, ле 18 салийа хԝәда бу пешәнг. Сала 1946, әԝ Мәкʹтәба Гиләд дәрбаз бу у паше Һаԝаида у Жапонйайеда хьзмәт дькьр. Йаһоԝа әԝ хушк хьзмәтийеда гәләк да хәбате, сәва әԝ ԝан  ԝәлатада мьзгинийе бәла кә. Паши ԝәкә 80 салед хьзмәтийеда, Рут гот: «Йаһоԝа бәрдьли дьда мьн у бона мьн пьштован бу. Әԝи али мьн кьр кӧ бал хԝә шәрме бьдьмә һьлдане. Әз ԛайим баԝәр дькьм, ԝәки Йаһоԝа дькарә һәр кәси бьдә хәбате, кʹе кӧ итʹбарийа хԝә ԝи тинә».

14. Ль гора Колоси 1:29, әм гәрәке чь бькьн сәва кӧ Йаһоԝа мә бьдә хәбате?

¹⁴ Нава тʹәрихийеда, Йаһоԝа хьзмәткʹаред хԝә щурʹә-щурʹә ролада дьдә хәбате. Ле гәло әԝ ԝе тә ча бьдә хәбате? Дьһа зәʹф тәва гьредайи йә, кӧ тӧ чьԛас хирәт и у чьԛас сәр хԝә дьхәбьти. (Бьхунә Колоси 1:29.) Һәрге тӧ бьһели, Йаһоԝа дькарә тә бькә мьзгинване хирәт, дәрсдаре баш, мәрьве бәрдьлийе, хәбатеда һостә, һәвале баш, у һәр кәсе кӧ жерʹа лазьм ә сәва ԛьрара хԝә бинә сери.

15. Ль гора 1 Тимотʹейо 4:12, 15, бьред щаһьл гәрәке жь Йаһоԝа һиви кьн, кӧ чьда али ԝан бькә?

¹⁵ Гәли бьред щаһьл, ле һун чь дькарьн бькьн? Щьватада һʹәԝщәтийа бьред щаһьл һәйә, йед кӧ дькарьн һе зедә щабдарийа һьлдьнә сәр хԝә, мәсәлә бьбьнә бәрдәстийед щьвате. Гәләк щьватада рʹуспи һе зедә һәнә, нә кӧ бәрдәстийед щьвате. Бьрано, һун дькарьн нав хԝәда хԝәстьна ӧса пешда биньн, кӧ щьватеда һе зедә щабдарийа һьлдьнә сәр хԝә? Щара һьнә бьра дьбежьн: «Әз ша мә кӧ әз һәма тʹәне ча мьзгинван хьзмәт дькьм». Һәрге һун ӧса дьфькьрьн, һиви жь Йаһоԝа бькьн, ԝәки хԝәстьна ӧса нав ԝәда пешда бинә, кӧ бьбьнә бәрдәстийе щьвате, у ӧса жи ԛәԝате бьдә ԝә, ԝәки чь кӧ дькарьн хьзмәтийеда бькьн (Ԝаиз 12:1). Бьрано, мәрʹа аликʹарийа ԝә лазьм ә! (Бьхунә 1 Тимотʹейо 4:12, 15.)

16. Әм жь Йаһоԝа гәрәке чь һиви кьн, у чьрʹа?

¹⁶ Йаһоԝа дькарә ԝә бькә әԝ кәс, кʹе дькарә ԛьрара ԝи бинә сери. Ләма жь ԝи һиви кьн, ԝәки хԝәстьне бьдә ԝә, кӧ шьхӧле ԝи бькьн, у паше жь ԝи һиви кьн, ԝәки ԛәԝате бьдә ԝә, чь кӧ ԝәрʹа лазьм ә. Фьрԛи тʹӧнә һун щаһьл ьн йан әʹмьрда мәзьн ьн, ԝәʹдә, ԛәԝат у фәрәсәтед хԝә бьдьнә хәбате, бона пәсьндайина Йаһоԝа (Ԝаиз 9:10). Жь бо тьрсе йан жи дӧдьлибуне, мәщале дәсте хԝә бәрʹнәдьн, сәва шьхӧле Йаһоԝада һе зедә бькьн. Рʹасти жи ԛәдьрәки чьԛас мәзьн ә бона мә һʹәмушка, кӧ һәла һе шьхӧлед бьчʹукда жи әм дькарьн пәсьне Баве хԝәйи һʹьзкьри бьдьн, кӧ һежайи ве йәке йә!