1. Чьрʹа Йаһоԝа һежа йә кӧ тʹәне ԝи бьһʹәбиньн?

ЙАҺОԜА һежа йә кӧ тʹәне ԝи бьһʹәбиньн у жерʹа амьн бьн, чьмки әԝ ә Әʹфьрандар у Жийиндаре мә (Әʹйан. 4:11). Ле әԝ йәк һеса нинә. Рʹаст ә әм Йаһоԝа һʹьз дькьн у ԝи һӧрмәт дькьн, ле дьбәкә бона мә тьштед майин дьһа фәрз бьн, у әԝ йәк рʹе мә бьгьрә кӧ тʹәне Йаһоԝа бьһʹәбиньн. Әм гәрәке бьзаньбьн, кӧ ча дькарә ӧса бьԛәԝьмә. Пешийе ԝәрә әм шеԝьр кьн чәнд тьшта, кӧ чь те һʹәсабе тʹәне Йаһоԝа бьһʹәбиньн.

2. Ль гора Мәтта 4:10, һәрге әм бь тʹәмамийа дьле хԝә Йаһоԝарʹа амьн ьн у тʹәне ԝи дьһʹәбиньн, әме чь бькьн?

² Кʹьтеба Пирозда чахе те готьне дәрһәԛа амьнийа һьндава Хԝәде, әԝ те һʹәсабе һʹьзкьрьна ԛайим һьндава ԝи. Һәрге әм тʹәне Йаһоԝарʹа амьн бьн, әме тʹәне ԝи бьһʹәбиньн. Әме нәһельн, кәсәк йан жи тьштәк дьле мәда щийе ԝи бьгьрә. (Бьхунә Мәтта 4:10.)

3. Чьрʹа әм чʹәʹвгьрти Йаһоԝа һʹьз накьн?

³ Ле әм чʹәʹвгьрти Йаһоԝа һʹьз накьн. Чьрʹа? Чьмки әԝ һʹьзкьрьн сәр һʹиме ԝан тьшта йә, чь кӧ әм дәрһәԛа ԝи пеһʹәсийанә. Һʹӧнӧред ԝийи баш мә гәләк хԝәш тен. Әм заньн әԝ чь һʹьз дькә у чь һʹьз накә, у әм жи пәй рʹийа ԝи дьчьн кӧ мина ԝи бьн. Әм фәʹм дькьн ԛьрара ԝи һьндава мәрьва у пьштгьрийа ԛьрара ԝи дькьн. Бона мә ԛәдьр ә, ԝәки әԝ мәщале дьдә мә кӧ әм бьбьн достед ԝи (Зәб. 25:14). Һәр тьшт чь кӧ әм дәрһәԛа Әʹфьрандаре хԝә педьһʹәсьн, мә һе незики ԝи дькә (Аԛуб 4:8).

4. а) Чьрʹа Шәйтʹан дьхԝазә һʹьзкьрьна мә һьндава Йаһоԝа бь тʹәмами нибә? б) Әме ве готареда дәрһәԛа чь шеԝьр кьн?

⁴ Әԝ дьнйа бьн дәсте Мире-щьнада нә, у әԝ дьхԝазә ԝәки тьштед кӧ мә хԝәш тен, әʹмьре мәда щийе фәрз бьгьрьн,  у әм пәй хԝәстьнед хԝәйи нәрʹаст кʹәвьн (Әфәс. 2:1-3; 1 Йуһʹн. 5:19). Нета ԝи әԝ ә кӧ һʹьзкьрьна мә һьндава Йаһоԝа бь тʹәмами нибә, у әм тьштед дьн жи һʹьз бькьн. Ԝәрә әм дӧ тьшта шеԝьр кьн, кʹижан кӧ Шәйтʹан дьдә хәбате сәва бьгьһижә ве нета хԝә. Йа пешийе, әԝ дьхԝазә әм пәй һәбуке у пʹәра кʹәвьн, йа дӧда, әԝ дьхԝазә, ԝәки әм ԝәʹдәдәрбазкьрьна нәрʹаст бьжберьн.

5. Чьрʹа әм гәрәке фәсал бьн, ԝәки нәбьнә пʹәрәһʹьз?

⁵ Әм гьшк дьхԝазьн, ԝәки хԝарьн, кʹьнщед лайиԛ у мала мә һәбә. Ле әм гәрәке фәсал бьн, кӧ нәбьнә пʹәрәһʹьз. Гәләкед ве дьнйа Шәйтʹанда «пʹәрәһʹьз» ьн у ԝан тьшта һʹьз дькьн, кӧ пе пʹәра тенә кʹьрʹине (2 Тимтʹ. 3:2). Иса заньбу, ԝәки ве йәкеда шагьртед ԝи ԝе бенә щерʹьбандьне. Ләма жи әԝи гот: «Тʹӧ кәс нькарә дӧ ахарʹа хӧламтийе бькә, чьмки йан ԝе һʹиле ԝи жь йәки һәрʹә у йе дьне һʹьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʹа, һьн жи һәбукерʹа хӧламтийе бькьн» (Мәт. 6:24). Мәрьве кӧ Йаһоԝа дьһʹәбинә, у ӧса жи гәләк ԝәʹдә у ԛәԝат хәрщ дькә сәва дәԝләти бә, бь рʹасти дьхԝазә дӧ ахарʹа хӧламтийе бькә. Һʹьзкьрьна ԝи һьндава Йаһоԝа ԝе бь тʹәмами нибә.

6. Әм жь гьлийед Иса кӧ әԝи щьвата Лаԝдькйарʹа гот, чь дәрс һин дьбьн?

⁶ Незики хьлазийа ԛьрʹна йәке, щьвата шәһәре Лаԝдькйайе хԝә ԛӧрʹә дькьр: «Әз дәԝләти мә, ԝе йәкеда гәләк пешда чумә, ԛәт һʹәԝще тʹӧ тьшти нимә». Ле чʹәʹве Йаһоԝа у Исада әԝана «мәʹрьм, рʹәбән, бәләнгаз, кор у тәʹзи» бун. Иса әԝана ширәт кьрьн, нә сәва ве йәке кӧ әԝана дәԝләти бун, ле чьмки һʹьзкьрьна ԝанә һьндава һәбуке, һәләԛәтийа ԝан тʹәви Йаһоԝа хьраб дькьр (Әʹйан. 3:14-17). Һәрге әм  тедәрхьн кӧ әм дьле хԝәда дьхԝазьн пәй һәбуке кʹәвьн, әм гәрәке дәрберʹа ньһерʹандьна хԝә рʹаст кьн (1 Тимтʹ. 6:7, 8). Һәрге әм ве йәке нәкьн, дьле мә ԝе пʹаравәбә, демәк һʹьзкьрьна мә һьндава Йаһоԝа ԝе бь тʹәмами нибә, у Йаһоԝа ԝе ида һʹәбандьна мә ԛәбул нәкә. Йаһоԝа дьхԝазә әм ԝи «бь тʹәмамийа дьле хԝә» һʹьз бькьн (Марԛ. 12:30). Ле ча пʹәрә дькарә әʹмьре мәда щийе фәрз бьгьрә?

7-9. Һун жь мәсәла Девид чь һин бун?

⁷ Дина хԝә бьдьнә мәсәла бьраки мә Девид жь Амәрикайе, йе кӧ рʹуспи йә. Әԝ гьли дькә, ԝәки әԝ йәки гәләк хәбатһʹьз бу. Компанийа кӧ әԝ теда дьхәбьти, хәбатәкә һе баш жерʹа да, у әԝи һе зедә пʹәрә дьстанд. Ве хәбатеда әԝ ӧса пешда чу, кӧ ԝәлате хԝәда, әԝ бу йәк жь хәбатчийед лапи баш. Девид гот: «Һьнге мьн тʹьре әԝ пешдачуйин кʹәрәм ә жь Йаһоԝа». Ле гәло рʹасти әԝ йәк жь Йаһоԝа бу?

⁸ Девид тедәрхьст, ԝәки әԝ хәбат сәр достийа ԝи тʹәви Йаһоԝа, хьраб һʹӧкӧм дьбә. Әԝ дьбежә: «Сәр щьвата у һәла һе жи ԝәʹде хьзмәтийе, әз дьфькьрим дәрһәԛа проблемед хәбатеда. Мьн гәләк пʹәрә чедькьр, ле әз һе зедә дькʹәтьмә стресе у зәԝаща мьнда жи проблем пешда һатьн».

⁹ Девид фәʹм кьр, ԝәки әԝ гәрәке сафи кә бона ԝи чь лапи фәрз ә. Әԝ гьли дькә: «Мьн хԝәрʹа ԛәԝи сафи кьр, ԝәки дәрәща хԝә бьгӧһезьм». Девид дьхԝәст ԝәʹде хәбата хԝә бьгӧһаста, у әԝи дәрһәԛа ве йәке готә мәзьне хәбата хԝә. Ахьри чь бу? Девид жь хәбате дәрхьстьн. Ле әԝи чь кьр? Әԝ гьли дькә: «Һәма рʹожа дӧда, мьн бланк тʹьжә кьр, ԝәки бьбьмә пешәнге кʹомәкдар».  Девид у жьна ԝи сәва әʹбура хԝә бькьн, дәстпекьрьн авайед мәзьнда шьхӧле тʹәмьзайе бькьн. Һьнә ԝәʹдә шунда, әԝ бу пешәнг, у ахьрийеда жьна ԝи жи тʹәви ԝи бу пешәнг. Ԝана бьжарт кӧ хәбата ньмьз бькьн, чьмки бона ԝан щурʹе хәбате фәрз нинә. Рʹаст ә әԝана һьмбәри хәбата бәре, дәһ щара кемтьр пʹәрә дьстиньн, ле һәр мәһ пʹәре ԝана тʹера ԝан дькә. Әԝана дьхԝазьн Йаһоԝа әʹмьре ԝанда щийе пешьн бьгьрә, у ԝана хԝәха пе чʹәʹве хԝә дит, кӧ Йаһоԝа хәм дькә бона ԝан мәрьва, йед кӧ Пʹадшатийа ԝи датиньн щийе пешьн (Мәт. 6:31-33).

10. Әм ча дькарьн дьле хԝә хԝәй кьн?

¹⁰ Фьрԛи тʹӧнә пʹәре мә гәләк ә йан жи һьндьк ә, йәкә әм гьшк гәрәке дьле хԝә хԝәй кьн. Чь щурʹәйи? Әм гәрәке нәһельн дьле мәда һʹьзкьрьн һьндава пʹәрада пешда бе. У нәһельн ԝәки хәбата мә жь хьзмәтийа Йаһоԝарʹа фәрзтьр бә. Ле ча һун дькарьн тедәрхьн, ԝәки һун кʹәтьнә тʹәлькәкә ӧса? Һьнә пьрса бьдьнә хԝә: «Чахе әз щьватеда мә йан жи хьзмәт дькьм, әз тʹьме дәрһәԛа хәбата хԝә дьфькьрьм? Дьбә әз тʹьме дьтьрсьм, кӧ ахьрийеда алийе пʹәрада чәтьнайи бал мьн пешда бен? Мьн у зәԝаща мьнрʹа пʹәрә у һәбук проблема пешда тиньн? Әз һазьр ьм хәбатәкә ӧса бькьм, кӧ бәр чʹәʹве мәрьва ньмьз ә, һәрге әԝ хәбат ԝе али мьн бькә һе зедә Йаһоԝарʹа хьзмәт кьм?» (1 Тимтʹ. 6:9-12). Чахе әм дәрһәԛа ԝан пьрса дьфькьрьн, ԝәрә әм бир нәкьн, кӧ Йаһоԝа мә һʹьз дькә у созәки ӧса дьдә ԝан, йед кӧ ԝи һʹьз дькьн: «Әзе тʹӧ щар жь тә нәчьм у тʹӧ щар тә бәрʹнадьм». Ләма жи Паԝлосе шанди ньвиси: «Пʹәрәһʹьзи бьра нава жийина ԝәда щи нәгьрә» (Ибрн. 13:5, 6).

11. Ԝәʹдәдәрбазкьрьн ча дькарә сәр мәрьва һʹӧкӧм бә?

¹¹ Йаһоԝа дьхԝазә әм әʹмьре хԝәрʹа ша бьн, у ве йәкеда ԝәʹдәдәрбазкьрьн дькарьн али мә бькьн. Хәбәра Хԝәде дьбежә, ԝәки «бона зьлам жь хԝарьн у вәхԝарьне у жь кʹәде щане хԝә ша кьрьне ԛәнщтьр тьштәк нинә» (Ԝаиз 2:24). Ле һʹәчʹи зәʹф ԝәʹдәдәрбазкьрьнед ве дьнйайе, дькарьн сәр мә хьраб һʹӧкӧм бьн. Әԝ ԝәʹдәдәрбазкьрьн нормед намусийе хьраб дькьн, у һелан дькьн ԛәбул кьн у һәла һе жи һʹьз бькьн ԝан тьшта, кʹижан кӧ Хәбәра Хԝәде ԛәдәхә дькә.

12. Ль гора 1 Корьнтʹи 10:21, 22, чьрʹа әм гәрәке ԝәʹдәдәрбазкьрьна фәсал бьжберьн?

 ¹² Әм дьхԝазьн, ԝәки тʹәне Йаһоԝа бьһʹәбиньн у жерʹа амьн бьн, ләма жи әм нькарьн һьн «жь сьфра» Йаһоԝа у һьн жи «жь сьфра щьна» бьхԝьн. (Бьхунә 1 Корьнтʹи 10:21, 22.) Чахе әм хԝарьне тʹәви кәсәки дьхԝьн, гәләк щар әԝ нишана һәвалтийе йә. Һәрге әм ԝәʹдәдәрбазкьрьнед ӧса дьжберьн, кʹидәреда һәйә зорбәти, сербази, бенамуси, йан жи хԝәстьнед бәдәне у ньһерʹандьнед нәрʹаст, бь рʹасти әԝ те һʹәсабе, ԝәки әм тʹәви дьжмьнед Хԝәде хԝарьне дьхԝьн, кʹижан кӧ ԝана һазьр кьрийә. Ахьрийа ве йәке әԝ ә, кӧ әм нә кӧ тʹәне хԝәрʹа зийане тиньн, ле ӧса жи һәләԛәтийа мә тʹәви Йаһоԝа хьраб дьбә.

13-14. Сәр һʹиме Аԛуб 1:14, 15, чьрʹа әм гәрәке фәсал ԝәʹдәдәрбазкьрьна бьжберьн? Мәсәле биньн.

¹³ Дина хԝә бьдьне, кӧ һьнә тьштада ԝәʹдәдәрбазкьрьн мина хԝарьне йә. Чахе әм дьхԝазьн хԝарьне бьхԝьн, әм хԝәха дьжберьн чь бьхԝьн. Ле гава әм хԝарьне дадьԛӧрчʹиньн, әԝ хԝарьн ча жи сәр мә һʹӧкӧм бә, ида әм нькарьн контрол кьн. Хԝарьна баш дькарә сьһʹәт-ԛәԝата мә баш кә, ле хԝарьна нәкерһати, ԝе сьһʹәт-ԛәԝата мә хьраб кә. Әԝ йәк рʹожәкеда ԝе нәйе кʹьфше, ле ԝәʹдә дәрбаз бә, әԝ йәк ԝе әʹйан бә.

¹⁴ Мина ве йәке, чахе әм ԝәʹдәдәрбазкьрьна дьжберьн, әм хԝәха дьжберьн чь бькьнә һʹьше хԝә. Ле паше ида әм нькарьн контрол кьн, кӧ әԝ ԝәʹдәдәрбазкьрьн ча һʹӧкӧм бә сәр һʹьше мә у дьле мә. Ԝәʹдәдәрбазкьрьна баш дькарә мәрʹа кʹаре бинә, ле йа хьраб зийане тинә. (Бьхунә Аԛуб 1:14, 15.) Әм нькарьн дәрберʹа тедәрхьн кӧ ԝәʹдәдәрбазкьрьна хьраб ча сәр мә һʹӧкӧм дькә, ле ԝәʹдә шунда әԝ йәк ԝе әшкәрә бе кʹьфше. Ләма жи Кʹьтеба Пироз мәрʹа пешда дьбежә: «Нәхапьн, Хԝәде набә пекʹәни. Чьмки мәрьв чь дьчинә, ԝе жи дьчьнә. Кʹи кӧ бона бьнйатʹа хԝә дьчинә, әԝе жь ԝе бьнйатʹе мьрьне бьчьнә» (Галт. 6:7, 8). Рʹасти жи чьԛас фәрз ә әм һәр щурʹә ԝәʹдәдәрбазкьрьна бьтʹәрькиньн, кʹижанада тьштед ӧса һәнә, кӧ бәр чʹәʹве Йаһоԝа рʹәш ьн! (Зәб. 97:10).

15. Йаһоԝа чь пʹешкʹеш дайә мә?

¹⁵ Гәләк хьзмәткʹаред Хԝәде һʹьз дькьн JW Бродкастинге бьньһерʹьн, кӧ керһати йә. Хушкәке, наве кʹижане Мерилин ә, гот: «JW Бродкастинге али мьн кьр, кӧ һе позитив бьм, у ԝедәре әз дькарьм һʹәму тьшти бьньһерʹьм, чьмки әԝ һʹәму тьшт бона кʹара мьн ә. Чахе әз хԝә тʹәне тʹәхмин дькьм, йан жи дьлтәнг ьм, готар у Ԛӧльхкьрьна Шәбәԛе кӧ ԝедәре һәнә, мьн гәләк дьшьдиньн. Әԝ йәк мьн һе незики Йаһоԝа у тʹәшкиләта ԝи дькә. JW Бродкастинге бь тʹәмами әʹмьре мьн гӧһаст». Ле һун әԝе пʹешкʹеша Йаһоԝа дьдьнә хәбате? Хенщи бәрнама һәр мәһи, сәр JW Бродкастинге гәләк аудио у видео тенә дәрхьстьне, ӧса жи кʹьламед кӧ дьл дьдьнә мә.

16-17. Чьрʹа әм гәрәке контрол кьн кӧ әм чьԛас ԝәʹдә хәрщ дькьн сәр ԝәʹдәдәрбазкьрьне?

¹⁶ Әм гәрәке фәсал бьн нә тʹәне ве йәкеда, кӧ чь щурʹә ԝәʹдәдәрбазкьрьн бьжберьн, ле ӧса жи чьԛас ԝәʹдә әм сәр хәрщ кьн. Һәрге әм дина хԝә нәдьн ве йәке, әм дькарьн ԝәʹде хԝә һе зедә сәр ԝәʹдәдәрбазкьрьна хәрщ кьн, нә кӧ сәр хьзмәтийа Йаһоԝарʹа. Гәләкарʹа чәтьн ә контрол кьн, кӧ чьԛас ԝәʹдә хәрщ кьн сәва һесабуне. Хушкәкә мә Абигаил дьбежә: «Чахе әз ԝәстийайи мә, ньһерʹандьна телевисйоне али мьн дькә хԝәрʹа һеса бьм. Ле һәрге әз фәсал нибьм, әзе гәләк сьһʹәт бәр телевисйоне  хәрщ кьм». Бьраки щаһьл Самуйел дьбежә: «Мьн тʹәхмин кьр, ԝәки әз гәләк ԝәʹдә хәрщ дькьм сәр видеойед кьн Интернетеда. Әз ча дәстпедькьм йәке бьньһерʹьм, паше ида әз тʹәхмин накьм, ԝәки ча мьн 3-4 сьһʹәта сәр ве йәке хәрщ кьр».

¹⁷ Ле әм ча дькарьн ԝәʹде хԝә контрол кьн, кӧ чьԛаси сәр ԝәʹдәдәрбазкьрьне хәрщ кьн? Пешийе әм гәрәке пебьһʹәсьн, кӧ әм сәр ве йәке чьԛас ԝәʹдә хәрщ дькьн. Ԝе баш бә ԝәки һун бьньвисьн, кӧ сәр ԝәʹдәдәрбазкьрьне һун һәр һʹәфти чьԛас ԝәʹдә хәрщ дькьн. Салнәʹмеда бьньвисьн, кӧ һун чьԛас ԝәʹдә хәрщ дькьн сәр телевисйоне, Интернете, у сәр листька тʹеледа. Һәрге ԝә тʹәхмин кьр, кӧ һун гәләк ԝәʹдә хәрщ дькьн сәр ԝан тьшта, хԝәрʹа сафи кьн, кӧ сәр чь, чьԛас ԝәʹдә хәрщ кьн. Пешийе ԝәʹдә башԛә кьн, сәва тьштед фәрз бькьн, паше бона ԝәʹдәдәрбазкьрьне ԝәʹдә башԛә кьн. Паше, жь Йаһоԝа аликʹарийе бьхԝазьн сәва али ԝә бькә, һун ӧса бькьн чаԝа ԝә сафи кьрийә. Ԝи щурʹәйи бал ԝә ԝе һе зедә ԝәʹдә у ԛәԝат бьминә сәр леколинкьрьна Кʹьтеба Пироз, ԛӧльхкьрьна тʹәви малбәте, щьвате у сәр хьзмәтийа Йаһоԝарʹа. Ԝи щурʹәйи һуне жь һесабуна хԝә һе ләзәте бьстиньн, чьмки һун шьхӧле Йаһоԝа датиньн щийе пешьн.

18-19. Әм ча дькарьн бьдьнә кʹьфше, кӧ әм тʹәне Йаһоԝа дьһʹәбиньн?

¹⁸ Чахе Пәтрусе шанди ньвиси дәрһәԛа ахьрийа дьнйа Шәйтʹан у дьнйа тʹәзә кӧ зутьрәке ԝе бе, әԝи гот: «Аԝа дәлално, һун кӧ һивийа ван йәка нә, бькьн кӧ әԝ ԝә беләкʹә у беԛӧсур әʹдьлайийеда тʹәви хԝә бьбинә» (2 Пәт. 3:14). Һәрге әм гӧрʹа ве ширәте бькьн у һәр тьшти бькьн, сәва намусийеда у рʹӧһʹанида хԝә тʹәмьз хԝәй кьн, әме избат кьн ԝәки әм тʹәне Йаһоԝа дьһʹәбиньн у бь тʹәмамийа дьле хԝә ԝи һʹьз дькьн.

¹⁹ Шәйтʹан у дьнйа ԝи, ԝе бәрдәԝам кьн мә бьхальфиньн, ԝәки әм әʹмьре хԝәда дәԝса Йаһоԝа, тьштед майин дайньн щийе пешьн (Луԛа 4:13). Ле әм тʹӧ щар гәрәке нәһельн, ԝәки хенщи Йаһоԝа кәсәк йан тьштәк дьле мәда щийе йәке бьгьрә. Әм бь дьл у щан дьхԝазьн, ԝәки ве йәке бьдьнә Йаһоԝа, чь кӧ тʹәне әԝ һежа йә, демәк бь тʹәмамийа дьле хԝә ԝи һʹьз кьн у тʹәне ԝи бьһʹәбиньн!