1. Чаԝа Әфәси 6:10-13-да те шьровәкьрьне, Йаһоԝа диса чь щурʹәйи һʹьзкьрьна хԝәйә мәзьн һьндава хьзмәткʹаред хԝә нишан дькә? Шьровәкьн.

ЙАҺОԜА һʹьзкьрьна хԝәйә мәзьн һьндава хьзмәткʹаред хԝә бь ԝи щурʹәйи жи избат дькә, кӧ али ԝан дькә нәкʹәвьнә дәсте дьжмьна у мьԛабьли ԝан бьсәкьньн. Дьжмьнед мәйи лапи мәзьн, әԝ һәнә Шәйтʹан у щьн. Йаһоԝа дәрһәԛа ԝан дьжмьна пешда мәрʹа готийә, у һьн жи ԝан тьшта дьдә мә, чь кӧ мәрʹа лазьм ьн сәва мьԛабьли ԝан бьсәкьньн. (Бьхунә Әфәси 6:10-13.) Һәрге әм аликʹарийа Йаһоԝа ԛәбул кьн у бь тʹәмами итʹбарийа хԝә ԝи биньн, әме бькарьбьн мьԛабьли Мире-щьна бьсәкьньн. Баԝәрийа мә дькарә мина йа Паԝлос ԛәԝи бә, кӧ гот: «Һәгәр Хԝәде пьшта мә йә, кʹи дькарә мьԛабьли мә бә?» (Рʹом. 8:31).

2. Әме ве готареда дәрһәԛа чь шеԝьр кьн?

² Әм Мәсиһийед рʹаст, һʹьш-аԛьле хԝә надьнә сәр Шәйтʹан у щьнед ԝи. Бона мә йа лапә фәрз әԝ ә, кӧ дәрһәԛа Йаһоԝа пебьһʹәсьн у жерʹа хьзмәт кьн (Зәб. 25:5). Ле әм гәрәке һаш жь кьред Шәйтʹан һәбьн. Чьрʹа? Сәва әм нәйенә хапандьне у нәкʹәвьнә тʹәлькед ԝи (2 Корн. 2:11). Ве готареда әме шеԝьр кьн тьштәки сәрәкә, бь чь жи Шәйтʹан у щьнед ԝи дьхԝазьн мәрьва бьхальфиньн. Әме ӧса жи шеԝьр кьн, кӧ чаԝа әм дькарьн мьԛабьли ԝан бьсәкьньн у хԝә жь ԝана хԝәй кьн.

3-4. а) Чь йә сербази? б) Иро сербази чьԛас бәлабуйи йә?

³ Тьштәки бәлабуйи бь чь жи Шәйтʹан у щьнед ԝи мәрьва дьхальфиньн, әԝ һәйә сербази. Әԝед кӧ сербазийе  дькьн, дьбежьн кӧ әԝана жь жор ԛәԝате дьстиньн, у заньн йан жи контрол дькьн ԝан тьшта, йед кӧ мәрьвед майин нькарьн бьзаньбьн у контрол кьн. Ле әԝ йәк жь Хԝәде нинә. Мәсәлә, һьнәк жь ԝан дьбежьн, ԝәки пе кʹочʹәктийе йан жи стәйрнасийе дькарьн ахьрийе бежьн. Һьнәк жи йанчь гази мьрийа дькьн у тʹәви ԝан хәбәр дьдьн. Һьнәкә майин жи пе сербазийе сәр мәрьва щәду у бәнька дькьн. *

⁴ Чаԝа баԝәрийа һьндава ԛәԝата сербазийе иро бәлабуйи йә? Ль гора һʹәсаба, кӧ 18 ԝәлатед Амәрикайа Латинида у Карибеда һатьнә кьрьне, әʹйан бу ԝәки ԝан щийада жь се мәрьва йәк, сербазийе у кʹочʹәктийе баԝәр дькьн, у ԝәкә һаԛас мәри жи баԝәр дькьн, ԝәки дькарьн тʹәви кәсед рʹӧһʹ хәбәр дьн. Дь 18 ԝәлатед Африкайеда жи, ль гора һʹәсаба, жь дӧ мәрьва мәрьвәк, һәла һе зедә жи, сербазийе баԝәр дькьн. Бәле, фьрԛи тʹӧнә әм кʹидәре дьжин, әм гәрәке фәсал бьн у хԝә жь сербазийе хԝәй кьн, чьмки Шәйтʹан һәр тьшти дькә сәва «тʹәмамийа дьне» бьхальфинә (Әʹйан. 12:9).

5. Йаһоԝа ча дьньһерʹә сәр сербазийе?

⁵ Йаһоԝа ча дьньһерʹә сәр сербазийе? Әԝ Хԝәдейе рʹастийе йә (Зәб. 31:5). Бешьк сербази бәр чʹәʹве ԝи рʹәш ә! Йаһоԝа готә Исраелийа: «Бьра нава тәда йе ӧса тʹӧнә бә, йе кӧ кӧрʹ йан ԛиза хԝә нава егьррʹа дәрбаз дькә, нә кʹочʹәк, нә сербаз, нә рʹәʹмьлдар, нә жи пирәсер, нә ньфьрʹкьр, нә йе кӧ гази рʹӧһʹа дькә, нә хԝәйиһʹӧньр, нә жи йе кӧ гази мьрийа дькә. Чьмки ль бәр чʹәʹве Хӧдан йе кӧ ве йәке дькә кʹьрет ә» (Ԛан. Дщр. 18:10-12). Рʹаст ә Мәсиһи бьн ве Ԛанунеда ниньн, кʹижан кӧ Йаһоԝа да Исраелийа, ле ньһерʹандьна Йаһоԝа сәр сербазийе нәһатийә гӧһастьне (Малх. 3:6).

6. а) Чаԝа Шәйтʹан сербазийе дьдә хәбате, сәва зийане бьдә мәрьва? б) Ль гора Ԝаиз 9:5, рʹасти дәрһәԛа мьрийа чь йә?

⁶ Йаһоԝа мәрʹа дьбежә, ԝәки хԝә жь сербазийе дур бьгьрьн, чьмки әԝ занә кӧ Шәйтʹан әԝе йәке дьдә хәбате, сәва зийане бьдә мәрьва. Шәйтʹан пе сербазийе дәрәԝа бәла дькә. Дәрәԝәкә ԝи әԝ ә, кӧ йанчь мьри сах ьн у щики дьжин. (Бьхунә Ԝаиз 9:5.) Шәйтʹан ӧса жи пе сербазийе тьрсе дькә сәр мәрьва, сәва ԝана жь Йаһоԝа дур хә. Нета Шәйтʹан ве йәкеда нә, ԝәки мәрьвед кӧ сербазийе дькьн, баԝәрийа хԝә рʹӧһʹед хьраб биньн, нә кӧ Йаһоԝа.

7. Йаһоԝа чь мәрʹа әʹйан дькә?

⁷ Чаԝа мә жоре гот, Йаһоԝа мәрʹа әʹйан дькә кӧ чь мәрʹа лазьм ә, сәва Шәйтʹан у щьнед ԝи мә нәхальфиньн. Дина хԝә бьдьн чәнд гава, кӧ дькарьн али мә бькьн, сәва мьԛабьли Шәйтʹан у щьнед ԝи бьсәкьньн.

8. а) Кʹижан ә тьштәкә сәрәкә, кӧ али мә дькә мьԛабьли рʹӧһʹед хьраб бьсәкьньн? б) Зәбур 146:4 ча дәрәԝа Шәйтʹан дәрһәԛа мьрийа әшкәрә дькә?

⁸ Хәбәра Хԝәде бьхуньн у сәр бьфькьрьн. Әԝ тьштәкә сәрәкә йә, бь сайа кʹижани әм инкʹар дькьн ԝан дәрәԝа кӧ рʹӧһʹед хьраб дьхԝазьн мәрьва бьдьнә баԝәркьрьне. Хәбәра Хԝәде мина шуре туж ә,  кӧ дькарә һʹәму дәрәԝед Шәйтʹан әшкәрә кә (Әфәс. 6:17). Мәсәлә, Хәбәра Хԝәде әшкәрә дькә әве дәрәԝе, кӧ йанчь мьри тʹәви саха дькарьн хәбәр дьн. (Бьхунә Зәбур 146:4.) Әԝ ӧса жи дьбежә, ԝәки тʹәне Йаһоԝа дькарә дәрһәԛа ахьрийе бежә (Иша. 45:21; 46:10). Һәрге әм Хәбәра Хԝәде һәртʹьм дьхуньн у сәр дьфькьрьн, әме һе һазьр бьн у ԛәԝи бьн бона ве йәке, ԝәки инкʹар кьн у нәфьрʹәт кьн дәрәԝед кӧ рʹӧһʹед хьраб дьхԝазьн әм баԝәр кьн.

9. Әм хԝә жь кʹижан шьхӧлед сербазийева гьредайи дур дьгьрьн?

⁹ Инкʹар кьн һʹәму тьштед кӧ сербазийева гьредайи нә. Чаԝа Мәсиһийед рʹаст, әм тʹӧ щурʹә сербазийе накьн. Мәсәлә, әм начьнә бал кʹочʹәка у нә жи тьштәки дькьн сәва йанчь тʹәви мьрийа хәбәр дьн. Чаԝа мә готара пешийа веда дит, әм ԛәйд-әʹдәтед чʹәлкьрьна мьрийава гьредайи, накьн, чьмки әԝана сәр һʹиме һинкьрьна ԛәлп ьн, кӧ йанчь мьри бәрдәԝам дькьн щики дьжин. У әм ӧса жи стәйрнасийе у кʹочʹәктийе надьнә хәбате сәва дәрһәԛа ахьрийе пебьһʹәсьн (Иша. 8:19). Әм заньн ԝәки әԝ һʹәму шьхӧл гәләк хоф ьн у дькарьн мә незики Шәйтʹан у щьна бькьн.

10-11. а) Мәсиһийед ԛьрʹна йәке чь кьрьн чахе дәрһәԛа рʹастийе пеһʹәсийан? б) Ль гора 1 Корьнтʹи 10:21, чьрʹа әм гәрәке чʹәʹв бьдьнә Мәсиһийед пешьн, у чаԝа ве йәке бькьн?

¹⁰ Һʹәму тьштед кӧ сербазийева гьредайи нә, бал хԝә нәһельн, кʹӧта кьн. Ԛьрʹна йәкеда һьнә мәрьвед кӧ Әфәседа дьжитьн, сербази дькьрьн. Ле чахе әԝана дәрһәԛа рʹастийе пеһʹәсийан, һатьнә гӧһастьне. «Йед сербазийева . . . кӧ мьжул дьбун, гәләка кʹьтебед хԝә тʹоп дькьрьнә щики у ль бәр һʹәмуйа дьшәԝьтандьн» (Кʹар. Шанд. 19:19). Әԝан мәрьва алийе хԝәда һәр тьшт кьрьн, ԝәки мьԛабьли рʹӧһʹед хьраб бьсәкьньн. Кʹьтебед ԝанә сербазийе гәләк бьһа бун, ле йәкә ԝана әԝ кʹьтеб нә кәсәкирʹа дан нә  жи фьротьн, ле бь тʹәмами кʹӧта кьрьн. Ԝанрʹа фәрз нибу кӧ баһе ԝан кʹьтеба чьԛас ә, ле фәрз бу ԝәки дьле Йаһоԝа ша кьн.

¹¹ Ле ча әм дькарьн чʹәʹв бьдьнә ԝан Мәсиһийед ԛьрʹна йәке? Ԝе аԛьлайи бә һәр тьштед кӧ сербазийева гьредайи нә, кʹӧта кьн. Мәсәлә, тʹәлисмә, чʹәʹвшинк, у тьштед майин кӧ мәрьв хԝә дькьн йан жи хԝәй дькьн, сәва рʹӧһʹед хьраб зийане нәдьнә ԝан. (Бьхунә 1 Корьнтʹи 10:21.)

12. Дәрһәԛа ԝәʹдәдәрбазкьрьна хԝә, әм гәрәке кʹижан пьрса бьдьнә хԝә?

¹² Ԝәʹдәдәрбазкьрьне фәсал бьжберьн. Пьрсе бьдьнә хԝә: «Әз дьхуньм ԝан кʹьтеба, журнала йан жи готаред интернетеда, кʹижан кӧ дәрһәԛа сербазийе нә? Ле кʹьламед кӧ әз дьбьһем, филм у TV шоу кӧ дьньһерʹьм, сербазийева гьредайи нә? Гәло ԝәʹдәдәрбазкьрьна мьн тьштәки сербазийева гьредайи йә, мәсәлә вампир, зомби йан жи тьштед нәмәрьвайива? Йан дьбә кӧ ԝедәре кʹочʹәкти, ньфьрʹ, йан жи бәньк, ча тьштәки һʹәԝас дьдьнә кʹьфше?» Ле нә һʹәму чʹирок йан жи сәрһатийед нәбуйи, сербазийева гьредайи нә. Чахе һун сафи кьн кӧ кʹижан ԝәʹдәдәрбазкьрьна бьжберьн, йед ӧса бьжберьн, кӧ һун дур бьн жь ԝан тьшта, кӧ бәр чʹәʹве Йаһоԝа рʹәш ьн. Әм дьхԝазьн ԝәки һәр тьшти бькьн, сәва бәр Хԝәде исафа мә рʹьһʹәт бә (Кʹар. Шанд. 24:16). *

13. Әм гәрәке хԝә жь чь дур бьгьрьн?

¹³ Сәрһатийед дәрһәԛа щьна гьли нәкьн. Ԝе йәкеда Иса мәсәләкә баш мәрʹа һишт, у әм гәрәке чʹәʹв бьдьнә ԝи  (1 Пәт. 2:21). Пешийа кӧ Иса һатә сәр әʹрде, әԝи сәр әʹзмана дьжит, ләма әԝи гәләк тьшт заньбу дәрһәԛа Шәйтʹан у щьна. Ле Иса дәрһәԛа ԝан рʹӧһʹед хьраб у кьред ԝан, гьли нәдькьр. Әԝи дьхԝәст мәрьва дәрһәԛа Йаһоԝа һин кә, нә кӧ дина ԝан бьдә сәр Шәйтʹан. Әм дькарьн чʹәʹв бьдьнә Иса кӧ бәла нәкьн сәрһатийед дәрһәԛа щьна. Дәԝсе әм пе гьлийед хԝә гәрәке нишан кьн, ԝәки «жь дьле» мә «хәбәра ԛәнщ бьлԛ вәдьдә» (Зәб. 45:1).

14-15. а) Чьрʹа әм гәрәке жь рʹӧһʹед хьраб нәтьрсьн? б) Чь избат дькә ԝәки Йаһоԝа иро щьмәʹта хԝә хԝәй дькә?

¹⁴ Жь рʹӧһʹед хьраб нәтьрсьн. Ве дьнйа хьрабда, әм дькарьн рʹасти тәнгасийа бен. Мәсәлә, дьбәкә әм бькʹәвьнә ԛәзийе, нәхԝәш кʹәвьн, йан жи ньшкева мәрьве хԝәйи незик ӧнда кьн. Ле әм гәрәке нәфькьрьн, ԝәки ве йәкеда рʹӧһʹед хьраб нәһәԛ ьн. Кʹьтеба Пироз дьбежә, ԝәки ԝәхт у ԛәԝьмандьнед ньшкева дькарьн рʹасти һәр кәси бен (Ԝаиз 9:11). Йаһоԝа әʹйан дькә, ԝәки әԝ жь Шәйтʹан у щьна ԛәԝаттьр ә. Мәсәлә, Хԝәде изьн нәда Шәйтʹан ԝәки Ибо бькӧжә (Иб. 2:6). Ԝәʹде Мусада жи, Йаһоԝа сербазед Мьсьрерʹа нишан кьр, ԝәки әԝ жь ԝана ԛәԝаттьр ә (Дәркʹ. 8:18; 9:11). Ӧса жи Йаһоԝа һʹӧкӧм да Иса, у әԝи Шәйтʹан у щьн жь әʹзмана авитьнә сәр әʹрде. Зутьрәке, әԝана ԝе бенә авитьне гәлийе һәй-ԝайе, кʹидәре кӧ ԝе нькарьбьн зийане бьдьнә кәсәки (Әʹйан. 12:9; 20:2, 3).

¹⁵ Әм иро әшкәрә дьвиньн кӧ Йаһоԝа ча щьмәʹта хԝә хԝәй дькә. Бьфькьрьн дәрһәԛа ве йәке: Әм нав тʹәмамийа дьнйайеда мьзгинийе бәла дькьн у мәрьва рʹастийе һин дькьн (Мәт. 28:19, 20). Бь сайа ве йәке, әм кьред Шәйтʹанә хьраб әшкәрә дькьн. Һәрге дәсте Шәйтʹан бьһата, әԝи әԝ шьхӧле мә ԝе бьда сәкьнандьне, ле әԝ нькарә ве йәке бькә. Ләма әм гәрәке тʹӧ щар жь рʹӧһʹед хьраб нәтьрсьн. Әм заньн ԝәки «чʹәʹвед Йаһоԝа сәр тʹәмамийа дьнйайе нә, сәва кӧ ԛәԝата хԝә бона кʹара ԝан нишан кә, дьле кʹижана бь тʹәмами тʹәви ԝи йә» (2 Дир. 16:9, ДТʹ). Һәрге әм Йаһоԝарʹа амьн ьн, щьн ԝе нькарьбьн тʹӧ зийане бьдьнә мә.

16-17. Мәсәле биньн кӧ чаԝа хушк бь мерхаси мьԛабьли рʹӧһʹед хьраб дәркʹәт.

¹⁶ Рʹасти жи мерхаси лазьм ә сәва мьԛабьли рʹӧһʹед хьраб дәрен, илаһи чахе һәвал йан жи мәрьватийа мә мьԛабьли мә дәртен, чьмки дьфькьрьн кӧ һәрге әм тʹәви ԝан ԛәйд-әʹдәта нәкьн, ԝе тьштед хьраб бенә сәре мә. Ле йед кӧ Йаһоԝарʹа амьн дьминьн, әԝ ԝана кʹәрәм дькә. Дина хԝә бьдьнә мәсәла хушкәке жь Ганайе, наве кʹижане Ерика йә. Әԝ 21 сали бу чахе дәстпекьр Кʹьтеба Пироз һин бә. Баве ԝе кʹәшише сербаз ә, у жь ԝе дьһатә дәʹԝакьрьне, ԝәки әʹдәтәки сербазийева гьредайи бькә. Әԝе гәрәке гошт бьхԝара, кʹижан кӧ баве ԝе хӧданед хԝәрʹа ԛӧрбан дькьр. Чахе Ерика гот кӧ ԝе ида ве йәке нәкә, малбәта ԝе һʹәсаб кьр, кӧ әԝ хӧданед ԝан беһӧрмәт дькә. Әԝана дьтьрсийан, ԝәки хӧданед ԝан, ԝе ԝана пе нәхԝәшийе щәза кьн.

¹⁷ Малбәта ԝе дьхԝәст зоре ле бькьра, ԝәки әԝи әʹдәти бькә у әԝ данә тьрсандьне кӧ ԝе ле жь мал дәрхьн. Ле Ерика сәр йа хԝә сәкьни, кӧ әԝи әʹдәти нәкә. Малбәта ԝе бь рʹасти әԝ жь мал дәрхьстьн, ле һьнә Шәʹдед Йаһоԝа гази ԝе кьрьн кӧ мала ԝанда бьминә. Бь ԝи щурʹәйи Йаһоԝа малбәтәкә тʹәзә да ԝе, демәк хушк-бьред рʹӧһʹани (Марԛ. 10:29, 30). Мәрьвед ԝе әԝ инкʹар кьрьн у һәла һе жи тьштед ԝе шәԝьтандьн, ле йәкә әԝ Йаһоԝарʹа амьн ма, һатә ньхӧмандьне у ньһа пешәнга һәртʹьм ә. Ерика жь щьна натьрсә у дәрһәԛа малбәта хԝә дьбежә: «Әз һәр рʹож дӧа дькьм, ԝәки малбәта мьн жи Йаһоԝа нас кә, азайе у кʹәрәма бьстинә, кʹижан кӧ әм дьстиньн жь ве йәке кӧ Йаһоԝарʹа хьзмәт дькьн».

18. Әме чь кʹәрәма бьстиньн, һәрге хԝә бьсперьнә Йаһоԝа?

¹⁸ Дьбәкә баԝәрийа мә һʹәмушка ԝи щурʹәйи нәйе щерʹьбандьне, ле йәкә әм гьшк жи гәрәке мьԛабьли рʹӧһʹед хьраб дәрен у хԝә бьсперьнә Йаһоԝа. Һәрге әм ӧса бькьн, әме гәләк кʹәрәма бьстиньн, у Шәйтʹан ԝе нькарьбә пе дәрәԝед хԝә мә бьхапинә. Ӧса жи әме тʹӧ щар жь щьна нәтьрсьн у нәләрьзьн, ле достийа хԝә тʹәви Йаһоԝа ԛәԝи кьн. Аԛуб гьлийед ӧса ньвиси: «Бәр Хԝәде шкәсти бьн. Мьԛабьли Мирещьн бьсәкьньн у әԝе жь ԝә бьрʹәвә. Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:7, 8).