1. Һʹәму хьзмәткʹаред Хԝәде чь дьхԝазьн бьԛәдиньн, у чьрʹа? (Бьньһерʹә шькле рʹуйе журнале.)

ИСА МӘСИҺ тʹәми да шагьртед хԝә кӧ «һәрʹьн һʹәму мьләта һин кьн» (Мәт. 28:19). Ләма жи һʹәму хьзмәткʹаред Хԝәдейи амьн, дьхԝазьн һин бьн кӧ чаԝа хьзмәтийа хԝә, кʹижан кӧ ԝанрʹа һатийә дайине, «бьԛәдиньн» (2 Тимтʹ. 4:5). Әʹмьре мәда әԝ шьхӧләкә лапә фәрз ә у лапә һежа йә. Ле дьбәкә мәрʹа чәтьн ә һаԛас ԝәхт хәрщ кьн сәр хьзмәтийе чьԛас әм дьхԝазьн.

2. Әм рʹасти чь чәтьнайа тен чахе хьзмәтийа хԝә тиньн сери?

² Әʹмьре мәда диса шьхӧлед майинә фәрз һәнә, кӧ ԝәʹдә у ԛәԝате жь мә дьстиньн. Мәсәлә, дьбәкә әм рʹоже гәләк сьһʹәта дьхәбьтьн, сәва әʹбура хԝә у нәфәред хԝә бькьн. Дьбәкә щабдарийед мәйә дьн һәнә, йан әм нәхԝәш ьн, йан депресийа мә һәйә, йан жи чәтьнайед жь бо әʹмьре мәзьн. Ԝан чәтьнайада, ча әм дькарьн хьзмәтийа хԝә бь тʹәмами биньн сери?

3. Әм жь гьлийед Иса кʹьтеба Мәтта 13:23-да, чь педьһʹәсьн?

³ Һәрге әм жь бо дәрәщед хԝә нькарьн гәләк хьзмәт кьн, әм гәрәке бәрхԝә нәкʹәвьн. Иса заньбу ԝәки әме һʹәмушк нькарьбьн мина һәв бәр бьдьн. (Бьхунә Мәтта 13:23.) Һәрге әм хьзмәтийеда алийе хԝәда һʹәму тьшти дькьн, Йаһоԝа гәләк ԛимәт дькә ве йәке (Ибрн. 6:10-12). Ле дьԛәԝьмә әм тʹәхмин дькьн, ԝәки дәрәща мә дьһелә хьзмәтийеда һе зедә бькьн. Ве готареда әме шеԝьр кьн, кӧ чаԝа әм дькарьн әʹмьре хԝәда хьзмәтийе дайньн щийе пешьн, чаԝа әʹмьре хԝә сьвьк кьн, у чаԝа бәлакьрьна мьзгинийеда у һинкьрьнеда һе щерʹьбанди бьн. Ле пешийе ԝәрә пебьһʹәсьн чь те һʹәсабе хьзмәтийа хԝә бьԛәдиньн.

4. Чь те һʹәсабе хьзмәтийа хԝә бьԛәдиньн?

 ⁴ Хьзмәтийа хԝә бьԛәдиньн те һʹәсабе мьзгинийе бәла кьн у мәрьва һин кьн, чьԛас кӧ дькарьн. Ле фәрз тʹәне әԝ нинә кӧ чьԛас ԝәʹдә әм хәрщ дькьн. Бона Йаһоԝа дьһа фәрз ә, кӧ әм бь чь нете жерʹа хьзмәт дькьн. Әм Йаһоԝа у мәрьва һʹьз дькьн, ләма бь дьл у щан хьзмәтийа хԝәйә Мәсиһити * тиньн сери (Марԛ. 12:30, 31; Колс. 3:23). Хԝәдерʹа бь дьл у щан хьзмәт кьн, те һʹәсабе кӧ ԛәԝат у фәрәсәтед хԝә бь щурʹе лапә баш бьдьнә хәбате. Чахе әм ԛимәт дькьн ԝи ԛәдьри кӧ мьзгинийе бәла дькьн, әм мәщале бәрʹнадьн у чьԛас дькарьн гәләк мәрьварʹа мьзгинийе гьли дькьн.

5-6. Ча мәсәла гәдәки дьдә кʹьфше, ԝәки мәрьв дькарә хьзмәтийе дайнә сәр щийе пешьн, һәрге жи ԝәʹде ԝи һьндьк ә?

⁵ Бьдьнә бәр чʹәʹве хԝә, кӧ гәдәки щаһьл гәләк һʹьз дькә тʹәмбуре хә у һәма ча ԝәʹдә дьвинә, дьчә ледьхә. Әԝ хԝәрʹа кафеда хәбате дьвинә, ԝәки шәми-ләʹда ԝедәре тʹәмбуре хә. Ле хәрще ԝи гәләк ьн, пʹәре ве хәбате жи тʹера ԝи накә. Ләма әԝ дәстпедькә дькʹанеда рʹожед Дӧшәме һʹәта Инийе бьхәбьтә. Рʹаст ә ԝәʹде ԝи һʹәчʹи зәʹф дьчә сәр хәбата дькʹанеда, ле дьле ԝи сәр лехьстьна тʹәмбуре йә, кӧ әԝ зәʹф һʹьз дькә. Әԝ гәләк дьхԝазә бьбә һостәйе щерʹьбанди, сәва бь тʹәмами ԝи шьхӧлида бә. Әԝ һәма ча ԝәʹдә дьвинә, гоне һьнәки жи, хԝәрʹа тʹәмбуре дьхә у дьле ԝи ша дьбә.

⁶ Мина ве йәке, һун жи дьбәкә нькарьн хьзмәт кьн чьԛас дьхԝазьн. Йәкә, һун әԝи шьхӧли һʹьз дькьн. Һун алийе хԝәда һәр тьшти дькьн, сәва һе рʹьнд хьзмәт кьн, ԝәки мьзгинийе бьгьһиньн дьле мәрьва. Дьбәкә һун ньһа дьфькьрьн, ԝәки ча хьзмәтийе дайньн щийе пешьн, чьмки гәләк шьхӧлед дьн сәр стуйе ԝә нә.

7-8. Ча әм дькарьн чʹәʹв бьдьнә ньһерʹандьна Иса һьндава хьзмәтийе?

⁷ Иса мәсәла мәзьн мәрʹа һиштийә ве йәкеда, кӧ ча сәр хьзмәтийе бьньһерʹьн.  Тьште лапә фәрз әʹмьре ԝида әԝ бу, кӧ дәрһәԛа Пʹадшатийа Хԝәде мәрьварʹа гьли кә (Йуһʹн. 4:34, 35). Әԝ бь сәда километьра рʹе дьчу сәва чьԛас дькарә гәләк мәрьварʹа мьзгинийе бәла кә. Әԝи мәщал дьгәрʹийа сәва һьн дәрва һьн жи мал бь мал мәрьварʹа хәбәр дә. Тʹәмамийа әʹмьре Исада хьзмәти щийе пешьн бу.

⁸ Әм дькарьн чʹәʹв бьдьнә Иса, гава мәщале дьвиньн ԝәки мәрьварʹа дәрһәԛа мьзгинийе гьли кьн, фьрԛи тʹӧнә чь ԝәʹдә бә йан кʹидәре бә. Әм накʹәвьнә һʹәйра хԝә у комфорта хԝә, ле һазьр ьн сәва мьзгинийе бьгьһиньнә мәрьва (Марԛ. 6:31-34; 1 Пәт. 2:21). Һьнә хушк-бьред мә хьзмәт дькьн ча пешәнгед һәртʹьм, пешәнгед кʹомәкдар, йан жи пешәнгед мәхсус. Һьнәк жи зьмане тʹәзә һин дьбьн, йан жи дәрбази ԝан щийа дьбьн, кʹидәре һʹәԝщәти һәйә. Ле шьхӧле бәлакьрьна мьзгинийе дьһа зәʹф мьзгинванед ӧса дькьн, йед кӧ мина ԝан нькарьн һаԛас хьзмәт кьн, ле йәкә чьԛас дәсте ԝан те һаԛаси дькьн. Фьрԛи тʹӧнә әм дькарьн гәләки бькьн йан һьндьки, Йаһоԝа жь мә һаԛаси дәʹԝа накә чьԛас әм нькарьн. Әԝ дьхԝазә ԝәки әм гьшк жь хьзмәтийа пироз шабуне бьстиньн, чахе «мьзгинийа хԝәйирʹумәтә Хԝәдейе хԝәзьли» бәла дькьн (1 Тимтʹ. 1:11; Ԛан. Дщр. 30:11).

9. а) Паԝлос ча шьхӧле бәлакьрьна мьзгинийе датани сәр щийе пешьн, гава дьхәбьти жи? б) Кʹаред Шандийа 28:16, 30, 31 чь әʹйан дькә дәрһәԛа ньһерʹандьна Паԝлос сәр хьзмәтийе?

⁹ Паԝлосе шанди мәсәла баш һишт хьзмәтийеда, чьмки әʹмьре ԝида әԝ шьхӧләкә лапә фәрз бу. Чахе әԝ ԝәʹде рʹеԝитийа мисйонерти Корьнтʹеда бу, пʹәре ԝи һьндьк бу у әԝ гәрәке сәр чекьрьна кона бьхәбьтийа. Ле йәкә бона Паԝлос әԝе хәбате щийе пешьн нәдьгьрт. Әԝ дьхәбьти сәва әʹбура хԝә бькә у бькарьбә хьзмәт кә, ԝәки «бе һәԛ» Корьнтʹийарʹа мьзгинийе бәла кә (2 Корн. 11:7). Рʹаст ә Паԝлосрʹа лазьм бу кӧ бьхәбьтә сәва әʹбура хԝә бькә, йәкә әԝи бәрдәԝам дькьр хьзмәтийа хԝә дайнә сәр щийе пешьн, у һәр Шәми хьзмәт дькьр. Ле чахе дәрәща Паԝлос һатә гӧһастьне, әԝ ида дькарьбу һе зедә хьзмәт кьра. Әԝи дәстпекьр «бь хирәт тʹәмамийа ԝәхте хԝә да һинкьрьна хәбәре у щьһуйарʹа шәʹдәти дьда кӧ Мәсиһ, Иса йә» (Кʹар. Шанд. 18:3-5; 2 Корн. 11:9). Паше, чахе Паԝлос Рʹомеда дӧ сала мала хԝәда гьрти бу, әԝи шәʹдәти ԝанрʹа дьда, йед кӧ тʹәсәлийа ԝи дькьрьн у ӧса жи нәʹмә дьньвисин. (Бьхунә Кʹаред Шандийа 28:16, 30, 31.) Паԝлос нә дьһишт, тʹӧ тьшт һʹьш-аԛьле ԝи жь хьзмәтийе бьрʹәвинә. Әԝи ньвиси: «Әм жь ви ԛӧльхе кӧ мә . . . станд вәнакʹьшьн» (2 Корн. 4:1). Мина Паԝлос, һәрге жи лазьм ә ԝәʹде хԝә зедә сәр хәбате хәрщ кьн, әм йәкә диса жи дькарьн әʹмьре хԝәда шьхӧле Пʹадшатийе дайньн щийе пешьн.

10-11. Чаԝа һун дькарьн хьзмәтийа хԝә биньн сери, һәрге жи сьһʹәт-ԛәԝата ԝә нәбаш ә?

¹⁰ Һәрге әм нькарьн мал бь мал гәләк хьзмәт кьн, чьмки дьбәкә әʹмьрда мәзьн ьн йан жи сьһʹәт-ԛәԝата мә хьраб ә, йәкә әм щурʹәки майин дькарьн хьзмәт кьн. Мьзгинванед ԛьрʹна йәке һʹәму щийа мәрьварʹа мьзгини бәла дькьрьн. Ԝана тʹӧ мәщал дәсте хԝә нәдькьрьн сәва рʹастийе гьли кьн. Ԝана һʹәму щийа, мал бь мал, дәрва кʹидәре мәри һәбун, демәк рʹасти кʹе жи дьһатьн, мьзгини бәла дькьрьн (Кʹар. Шанд. 17:17; 20:20). Һәрге әм нькарьн гәләк рʹе һәрʹьн, әм дькарьн дәрва кʹидәре мәрьв дьчьн-тен, рʹунен, у кʹе дәрбаз дьбә ԝанрʹа мьзгинийе гьли кьн. Әм ӧса жи дькарьн нәформал шәʹдәтийе бьдьн, нәʹма бьньвисьн, йан жи пе тʹеле хьзмәт кьн. Гәләк мьзгинван  кӧ нькарьн мал бь мал хьзмәт кьн, ԝан щурʹе хьзмәтийеда шабуне у дьлрʹьһʹәтийе дьстиньн.

¹¹ Һәрге сьһʹәт-ԛәԝата ԝә хьраб ә, һун һьнге жи дькарьн хьзмәтийа хԝә биньн сери. Дина хԝә бьдьнә мәсәла Паԝлосе шанди. Әԝи гот: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Фили. 4:13). Паԝлосрʹа әԝ ԛәԝат лазьм бу, чахе ԝәʹде рʹеԝитийа хԝә әԝ нәхԝәш кʹәт. Әԝи Галатийарʹа шьровәкьр: «Щара пешьн бесьһʹәтийа ԛальбе мьн бу мәʹни, мьн мьзгини да ԝә» (Галт. 4:13). Мина ве йәке, һәрге жи сьһʹәт-ԛәԝата ԝә нәбаш ә, йәкә гәләк мәщалед ԝә һәнә кӧ мьзгинийе бәла кьн. Мәсәлә һун дькарьн һʹәкимарʹа, бәрдәстийед һʹәкимарʹа, у ԝанрʹа кʹе мьԛати ԝә дьбә шәʹдәтийе бьдьн, чьмки чахе мьзгинван мал бь мал хьзмәт дькьн у тен мала ԝан, һьнге әԝана сәр хәбате нә.

12. Чь те һʹәсабе чʹәʹве хԝә «пʹак» хԝәй кьн?

¹² Иса гот: «Чʹьра бәдәне чʹәʹв ә. Һәгәр чʹәʹве тә пʹак ә, тʹәмамийа бәдәна тәйе рʹонайи бә» (Мәт. 6:22). Ле гәло әԝ гьли чь тенә һʹәсабе? Иса дьхԝәст бьгота, ԝәки бь әʹмьре сьвьк бьжин у һʹьш-аԛьле хԝә у нетед хԝә бьдьнә сәр хьзмәтийе, нә кӧ сәр тьштед дьн. Хьзмәти әʹмьре Исада щийе лапә фәрз дьгьрт, у әԝи шагьртед хԝә һин дькьр ԝәки һʹьш-аԛьле хԝә бьдьнә сәр Йаһоԝа у Пʹадшатийа Ԝи. Әме чʹәʹв бьдьнә Иса һәрге хьзмәтийе һʹәсаб кьн шьхӧле лапә фәрз, демәк «бәре пешьн ль Пʹадшатийа Хԝәде бьгәрʹьн у бькьн кӧ рʹастийа ԝи бьԛәдиньн» (Мәт. 6:33).

13. Чь дькарә али мә бькә, ԝәки хьзмәтийа хԝә дайньн щийе пешьн?

 ¹³ Әм дькарьн хьзмәтийе дайньн щийе пешьн, һәрге тьштед нәфәрз кем кьн, у һе зедә хьзмәт кьн, ԝәки али мәрьва бькьн кӧ әԝана Йаһоԝа нас кьн у һʹьз бькьн. * Мәсәлә, дьбәкә әм дькарьн сьһʹәтед хәбата хԝә кем кьн, сәва хенщи шәми-ләʹда рʹожед дьн жи хьзмәт кьн. Йан жи дьбәкә әм ԝәʹде һесабуна хԝә кем кьн, кʹижан кӧ гәләк ԝәʹдә жь мә дьстинә.

14. Жьн-мерәк чь гӧһастьн кьрьн, ԝәки бона хьзмәтийе ԝәʹде ԝан һе зедә бьминә?

¹⁴ Дина хԝә бьдьнә мәсәла рʹуспики у жьна ԝи. Наве ԝи рʹуспи Елиас ә, әԝ гьли дькә: «Чахе мә сафи кьр хьзмәтийеда һе зедә бькьн, һьнге мә һе нькарьбу ча пешәнг хьзмәт кьра. Ле йәкә мә дәстпекьр гӧһастьна бькьн. Мә бона ве йәке чәнд гав авит, сәва ԝәʹде мә һе зедә бьминә бона хьзмәтийе. Мәсәлә, мә хәрще хԝә у ԝәʹде һесабуна хԝә жи кем кьр, кʹижан кӧ гәләк ԝәʹдә жь мә дьстанд. Һьн жи мә жь мәзьнед хәбата хԝә һиви кьр, ԝәки сьһʹәтед хәбата мә кем кә, сәва ԝәʹде мә бона хьзмәтийе һе зедә бьминә. Ахьрийа ве йәке әԝ бу, кӧ мә дькарьбу евара хьзмәт кьн, тʹәви һе зедә мәрьва һинбуна Кʹьтеба Пироз дәрбаз кьн, у һәла һе жи хенщи шәми-ләʹде, мәһеда дӧ рʹожед дьн жи мә хьзмәт дькьр. Мә рʹасти жи шабунәкә мәзьн дьстанд!».

15-16. Ль гора 1 Тимотʹейо 4:13, 15, чаԝа әм дькарьн бьбьнә мьзгинванед щерʹьбанди? (Бьньһерʹьн чаргошә бь наве « Нет Кʹижан кӧ Ԝе Али Мьн Бькьн Хьзмәтийа Хԝә Биньм Сери».)

¹⁵ Хьзмәтийа хԝә биньн сери щурʹәк жи әԝ ә, кӧ хьзмәтийеда һе щерʹьбанди бьн.  Һәнә пʹешә кӧ лазьм ә мәрьв тʹьме һе зедә у зедә һин бә, у ве йәкеда пешда һәрʹә, сәва занәбуна хԝә зедә кә у бьбә һостә. Әм жи сәва бьбьнә мьзгинванед щерʹьбанди, гәрәке тʹьме һин бьн, кӧ фәрәсәтед хԝә хьзмәтийеда дьһа баш кьн (Мәтʹлк. 1:5; бьхунә 1 Тимотʹейо 4:13, 15.)

¹⁶ Ле чаԝа әм дькарьн бәрдәԝам кьн хьзмәтийеда пешда һәрʹьн? Әм гәрәке рʹьнд гӧһ бьдьнә ԝан рʹебәрийа у ширәта, кʹижан кӧ әм һәр һʹәфте дьстиньн ԝәʹде «Бәрнама Щьвине: Бьжин у Хьзмәт кьн». Ԝәʹде ве щьвине әм тьштед ԛимәт һин дьбьн, сәва хьзмәтийеда һе пешдачуйи у щерʹьбанди бьн. Бәʹса хәбәре, чахе бәрпьрсийаре бәрнаме ширәте дьдә ԝан, йед кӧ пе дәрса дәрдькʹәвьн, әм жи жь ԝан ширәта дькарьн һин бьн, кʹижан кӧ ԝе хьзмәтийеда али мә бькьн. У әԝе йәке әм дькарьн бьдьнә хәбате, чахе кәсәкирʹа шәʹдәтийе дьдьн. Әм дькарьн жь бәрпьрсийаре кʹома хьзмәтийа хԝә аликʹарийе бьхԝазьн йан жи тʹәви ԝи дәркʹәвьнә хьзмәтийе. Әм ӧса жи дькарьн тʹәви мьзгинване щерʹьбанди, пешәнг йан жи бәрпьрсийаре мьһале хьзмәт кьн. Чахе әм хьзмәтийеда һе щерʹьбанди бьн, у бькарьбьн һащәтед сәрәкә рʹьнд бьдьнә хәбате, әме хьзмәтийеда у һинкьрьнеда һе зедә шабуне бьстиньн.

17. Чахе һун хьзмәтийа хԝә бьԛәдиньн, һуне чь кʹаре бьстиньн?

¹⁷ Йаһоԝа изьн дайә мә, ԝәки әм бьбьнә һәвалхәбаткʹаред ԝи. Бәле, әԝ ԛәдьрәки гәләк мәзьн ә! (1 Корн. 3:9). Һәрге һун «кʹижан һәрә ԛәнщ ә, . . . ԝе бьбьжерьн» у һʹьш-аԛьле хԝә дайньн сәр хьзмәтийа хԝә, һуне «бь шабуне Хӧдан бьһʹәбиньн» (Фили. 1:10; Зәб. 100:2). Һун гәрәке дӧдьли нәбьн, ԝәки Хԝәде ԝе ԛәԝате бьдә ԝә, кӧ һун хьзмәтийа хԝә биньн сери, чь чәтьнайи йан синоред ԝә жи һәбьн (2 Корн. 4:1, 7; 6:4). Фьрԛи тʹӧнә дәрәща ԝә дьһелә һун зәʹфи хьзмәт кьн йан һьндьки, йәкә мәʹнийа ԝә һәйә ша бьн, һәрге дьле ԝә сәр хьзмәтийе йә (Галт. 6:4). Чахе һун хьзмәтийа хԝә дьԛәдиньн, һун һʹьзкьрьна хԝә һьндава Йаһоԝа у мәрьва дьдьнә кʹьфше. Кʹьтеба Пироз дьбежә: «Бь ви тьһәри те хԝә жи хьлаз ки у ԝан жи, кʹижанед гӧһдарийа тә дькьн» (1 Тимтʹ. 4:16).