1-2. Чьрʹа Иса стресәкә гьранда бу?

ИСА рʹожа пашьн йа жийина хԝәйә сәр әʹрде, гәләк бәрхԝә дькʹәт. Әԝ гәрәке зутьрәке бь дәсте нәпʹака, щәфе гьран бькʹьшанда у бьмьра. Ле дьһа зәʹф әԝ сәва ве йәке бәрхԝә дькʹәт, кӧ дьхԝәст хԝәстьна Баве хԝә бинә сери, чьмки әԝи Баве хԝә гәләк һʹьз дькьр. Иса заньбу кӧ һәрге әԝ нава ԝан тәнгасийада кӧ пешийа ԝи бун, амьн бьминә, әԝ ԝе наве Йаһоԝа һәԛ дәрхә у бьльнд кә. Иса ӧса жи мәрьв һʹьз дькьрьн, у әԝи заньбу ԝәки жийина мәйә һʹәта-һʹәтайе ԝива гьредайи йә, демәк амьнийа ԝива һʹәта мьрьне.

² Рʹаст ә Иса стресәкә гәләк гьранда бу, ле дьле ԝи рʹьһʹәт бу. Әԝи готә шандийед хԝә: «Әз . . . әʹдьлайийа хԝә дьдьмә ԝә» (Йуһʹн. 14:27). Дьле Исада «әʹдьлайийа Хԝәде» һәбу, демәк дьлрʹьһʹәти, кʹижан кӧ әԝи дьстанд бь сайа һәләԛәтийа хԝә тʹәви Йаһоԝа. Әве әʹдьлайе али Иса кьр, кӧ гәләк бәрхԝә нәдькʹәт у тʹәвһәв нәдьбу (Фили. 4:6, 7).

3. Әме ве готареда дәрһәԛа чь шеԝьр кьн?

³ Тʹӧ кәс жь мә ԝе рʹасти щерʹьбандьна ӧса нәйе, кʹижан кӧ рʹасти Иса һат, ле һʹәму шагьртед ԝи ԝе рʹасти чәтьнайа бен (Мәт. 16:24, 25; Йуһʹн. 15:20). Мина Иса, әме жи щара бәрхԝә кʹәвьн. Ле әм чь гәрәке бькьн, ԝәки зәʹф бәрхԝә нәкʹәвьн у дьлрʹьһʹәтийе ӧнда нәкьн? Ԝәрә әм се тьшта шеԝьр кьн, кӧ Иса ԝәʹде хьзмәтийа хԝәйә сәр әʹрде дькьр, у пебьһʹәсьн кӧ чаԝа әм дькарьн ԝәʹде тәнгасийа чʹәʹв бьдьнә ԝи.

4. Ль гора 1 Тʹесалоники 5:17, һьнә мәсәла биньн, кӧ дьдьнә кʹьфше, ԝәки Иса рʹожа пашьн йа әʹмьре хԝәйи сәр әʹрде гәләк дӧа дькьр.

⁴ Бьхунә 1 Тʹесалоники 5:17. Иса тʹәмамийа рʹожа пешийа мьрьна хԝә, дӧа дькьр. Чахе әԝи шагьртед хԝәрʹа нишан кьр, кӧ биранина мьрьна ԝи ча дәрбаз кьн, әԝи сәр нан у шәраве дӧа кьр (1 Корн. 11:23-25). Ӧса жи пешийа кӧ әԝана жь ԝи щийи дәркʹәтана, кʹидәре кӧ ԝана Щәжьна Дәрбазбуне дәрбаз кьр, әԝи тʹәви шагьртед хԝә дӧа кьр (Йуһʹн. 17:1-26). Паше, чахе ве шәве әԝ тʹәви шагьртед хԝә чу бахче Гетшәмани, әԝи ԝедәре жи гәләк щар дӧа кьр (Мәт. 26:36-39, 42, 44). Иса һәла һе бәр мьрьне бу жи, дӧа кьр (Луԛа 23:46). Ве рʹожа гьран, Иса дәрһәԛа һәр тьштед кӧ ве рʹоже дьԛәԝьмин, дӧада Йаһоԝарʹа дьгот.

5. Чьрʹа мерхасийа шандийа кем бу?

⁵ Мәʹник кӧ Иса чьрʹа сәбьр кьр ԝәʹде тәнгасийа, әԝ бу, кӧ әԝи итʹбарийа хԝә Баве хԝә дьани, у ԝирʹа дӧа дькьр ԝәки али ԝи бькә. Ле шандийа ве шәве дӧада хирәт нибун. Ләма жи чахе әԝана кʹәтьнә щерʹьбандьне, мерхасийа ԝан кем бу (Мәт. 26:40, 41, 43, 45, 56). Әм жи чахе рʹасти тәнгасийа бен, дькарьн мина Иса амьн бьминьн, тʹәне һәрге «һәр гав дӧа бькьн». Ле бона чь әм дькарьн дӧа бькьн?

6. Чь щурʹәйи баԝәри ԝе али мә бькә әʹдьлайеда бьминьн?

⁶ Әм дькарьн Йаһоԝарʹа дӧа бькьн, ԝәки «баԝәрийа мә зедә кә» (Луԛа 17:5; Йуһʹн. 14:1). Мәрʹа баԝәри лазьм ә, чьмки Шәйтʹан ԝе һʹәму шагьртед Иса бьщерʹьбинә (Луԛа 22:31). Ле гәло чаԝа баԝәри дькарә али мә бькә, кӧ әм  дьлрʹьһʹәт бьминьн һьнге жи, чахе әм тʹәхмин дькьн кӧ чәтьнайи пәй чәтьнайа те? Һәрге мә алийе хԝәда һʹәму тьшт кьрийә, ле диса жи проблем майә, баԝәри ԝе али мә бькә бәрхԝә нәкʹәвьн, әве чәтьнайе бьдьнә дәсте Йаһоԝа у һивийа ԝи бьн. Чахе әм итʹбарийа хԝә ԝи тиньн, кӧ әԝ жь мә четьр занә чь гәрәке бькә, әме дьлрʹьһʹәт бьминьн у әʹдьлайеда бьн (1 Пәт. 5:6, 7).

7. Жь сәрһатийа Роберт һун чь һин бун?

⁷ Фьрԛи тʹӧнә әм рʹасти чь тәнгасийа жи тен, дӧа али мә дькә дьлрʹьһʹәтийе ӧнда нәкьн. Дина хԝә бьдьнә мәсәла Роберт, рʹуспики амьн, кӧ 80 сали зедәтьр ә. Әԝ гьли дькә: «Ширәта жь Филипи 4:6, 7, гәләк тәнгасийада али мьн дькьр. Мәсәлә, алийе пʹәрада чәтьнайед мьн һәбун, у ӧса жи ԝәʹдәки әз ида рʹуспи нибум». Ле гәло чь али Роберт дькә, ԝәки нава чәтьнайада дьлрʹьһʹәтийе ӧнда нәкә? Әԝ дьбежә: «Һәма чаԝа кӧ әз дәстпедькьм бәрхԝә кʹәвьм, әз дәрберʹа дӧа дькьм. Әз тʹәхмин дькьм ԝәки чьԛас дӧа дькьм, һаԛас һе дьле мьн рʹьһʹәт дьбә».

8. Анәгори Йуһʹәнна 8:29, диса мәʹник чь бу кӧ Иса дьлрʹьһʹәт дьма?

⁸ Бьхунә Йуһʹәнна 8:29. Гава пәй Иса дькʹәтьн, әԝ һьнге жи дьлрʹьһʹәт дьма, чьмки заньбу кӧ әԝ дьле Баве хԝә ша дькә. Әԝ гӧрʹа Баве хԝәда дьма, гава жерʹа чәтьн бу. Әԝи Баве хԝә һʹьз дькьр, у хьзмәтийа Йаһоԝарʹа әʹмьре ԝида щийе пешьн дьгьрт. Пешийа кӧ әԝ бьһата сәр әʹрде, әԝ һостәйе Хԝәде бу  (Мәтʹлк. 8:30). У чахе әԝ сәр әʹрде бу, әԝи бь хирәт мәрьв дәрһәԛа Баве хԝә һин дькьрьн (Мәт. 6:9; Йуһʹн. 5:17). Әԝи шьхӧли Исарʹа шабунәкә лапә мәзьн дьани (Йуһʹн. 4:34-36).

9. Чахе әм һәр гав нав шьхӧле бәлакьрьна мьзгинийеда ньн, әԝ йәк ча али мә дькә дьлрʹьһʹәтийе хԝәй кьн?

⁹ Әм чʹәʹв дьдьнә Иса, гава гӧрʹа Йаһоԝада дьминьн у «һәр гав шьхӧле Хӧданда» пешда дьчьн (1 Корн. 15:58). Чахе әм «бь хирәт» мьзгинийе бәла дькьн, әм сәр проблемед хԝә дьһа сьвьк дьньһерʹьн (Кʹар. Шанд. 18:5). Хьзмәтийеда әм рʹасти мәрьвед ӧса тен, проблемед кʹижана жь йед мә зедәтьр у хьрабтьр ьн. Ле чахе әԝана һин дьбьн Йаһоԝа һʹьз бькьн у ширәтед ԝи биньн сери, әʹмьре ԝан дьһа баш дьбә у әԝана дьһа бәхтәԝар дьбьн. Һәр щар чахе әм әԝе йәке дьвиньн, баԝәрийа мә һе ԛәԝи дьбә кӧ Йаһоԝа ԝе тʹӧ щар мә нәһелә у али мә бькә. У әԝ баԝәри али мә дькә дьлрʹьһʹәтийе ӧнда нәкьн. Хушкәкә мә, кʹижан кӧ тʹәмамийа әʹмьре хԝә бәр депресийе тәйах дькә у хԝә бекер тʹәхмин дькә, фәʹм кьр кӧ әԝ йәк ӧса нә. Әԝ гьли дькә: «Чахе әз нав шьхӧле хьзмәтийеда ньм, әз емосийед хԝә һе рʹьнд контрол дькьм у шабуне дьстиньм, чьмки чахе әз хьзмәт дькьм, һьнге хԝә һе незики Йаһоԝа тʹәхмин дькьм».

10. Жь сәрһатийа Брендайе һун чь һин бун?

¹⁰ Дина хԝә бьдьнә мәсәла хушкәке, наве кʹижане Бренда йә. Әԝ у ԛиза ԝе пе нәхԝәшийа гьран нәхԝәш ьн. Бренда нькарә рʹе һәрʹә, ләма пе кʹӧрсийа сәԛәта дьгәрʹә у ԛәԝата ԝе жи сьст ә. Әԝ мал бь мал хьзмәт дькә гава дькарә, ле һʹәчʹи зәʹф пе нәʹма шәʹдәтийе дьдә. Әԝ дьбежә: «Чахе мьн фәʹм кьр у ԛәбул кьр әԝ йәк, кӧ һʹале мьн ве дьнйайеда ԝе нәйе гӧһастьне, һьнге мьн һʹьш-аԛьле хԝә һе зедә да сәр хьзмәтийа хԝә. У гава әз шәʹдәтийе дьдьм, әз чәтьнайед хԝә бир дькьм у кем бәрхԝә дькʹәвьм. Әз һʹьш-аԛьле хԝә дьдьм сәр ԝан мәрьва, кʹерʹа шәʹдәтийе дьдьм. Бь ԝи щурʹәйи хьзмәти ӧса жи али мьн дькә, кӧ әз бир нәкьм ԝәки ахьрийа баш һивийа мә йә».

11-13. а) Ча шандийа у йед майин нишан дькьрьн, кӧ бь рʹасти һәвалед Исайи баш ьн? б) Һәвалед Иса ча сәр ԝи һʹӧкӧм дькьрьн?

¹¹ Ԝәʹде тʹәмамийа хьзмәтийа Иса, шандийед ԝийи амьн избат кьрьн, кӧ бь рʹасти һәвалед ԝи нә. Әԝана һәвалед ӧса бун, дәрһәԛа кʹижана кӧ Мәтʹәлокда те готьне: «Һәвал жи һәнә жь бьраки четьр ьн» (Мәтʹлк. 18:24). Иса әԝ һәвалед хԝә гәләк ԛимәт дькьр. Ԝәʹде хьзмәтийа ԝи, жь бьред ԝи ԛә йәки жи ԝи баԝәр нәдькьр (Йуһʹн. 7:3-5). Ԝәʹдәки мәрьвед ԝийи незик һәла һе жи дьготьн, ԝәки әԝи һʹьше хԝә ӧнда кьрийә (Марԛ. 3:21). Ле Иса дәрһәԛа шандийед хԝәйи амьн, шәва пешийа мьрьна хԝә гот: «Һун ьн, йед кӧ нава щерʹьбандьнед мьнда һʹәта ньһа тʹәви мьн манә» (Луԛа 22:28).

¹² Рʹаст ә щара шагьртед Иса дьле ԝи дешандьн, ле әԝи дина хԝә нәдьда шашийед ԝан, дәԝсе әԝи нав ԝанда баԝәри һьндава хԝәда дьдит (Мәт. 26:40; Марԛ. 10:13, 14; Йуһʹн. 6:66-69). Иса пешийа мьрьна хԝә шәва пашьн, готә шандийед хԝәйи амьн: «Мьн һун дост һʹәсаб кьрьн, чьмки һәр тьштед кӧ мьн жь Баве хԝә бьһистьн ԝәва данә әʹйанкьрьне» (Йуһʹн. 15:15). Бешьк, һәвалед Иса гәләк дьл дьданә ԝи. Әԝ аликʹарийа ԝан хьзмәтийа Исада, шабун жерʹа дьани (Луԛа 10:17, 21).

¹³ Хенщи шандийа һәвалед Исайи дьн жи һәбун, һьн жьн һьн жи мер. Ԝана шьхӧле бәлакьрьна мьзгинийеда  пьштгьрийа ԝи дькьрьн у тьштед майинда жи аликʹари дьданә ԝи. Һьнәка ԝи тʹәглифи мала хԝә дькьрьн сәр нанхԝарьне (Луԛа 10:38-42; Йуһʹн. 12:1, 2). Һьнәка жи тʹәви ԝи рʹеԝити дькьрьн у бь һәбука хԝә ԝирʹа бәрдәсти дькьрьн (Луԛа 8:3). Иса хԝәха һәвале баш бу, у ләма жи һәвалед ԝийә баш һәбун. Әԝи ԝанрʹа ԛәнщи дькьр у жь ԝана гәләк дәʹԝа нәдькьр. Иса беԛьсур бу, ле әԝи аликʹарийа достед хԝәйә нәԛәданди дьшекьранд. Бешьк Иса бь сайа ԝана дьлрʹьһʹәти хԝәй дькьр.

14-15. Ча әм дькарьн һәвалед баш ԛазанщ кьн, у чьда әԝана дькарьн али мә бькьн?

¹⁴ Һәвалед баш ԝе али мә бькьн Йаһоԝарʹа амьн бьминьн. Һәрге әм дьхԝазьн кӧ һәвалед мәйи баш һәбьн, әм хԝәха гәрәке һәвалед баш бьн (Мәт. 7:12). Мәсәлә, Кʹьтеба Пироз мәрʹа дьбежә, кӧ ԝәʹдә бьвиньн ԝәки илаһи али ԝан бькьн, йед кӧ сьст ьн у чәтьнайада ньн (Әфәс. 4:28). Ле бь тʹәхмина ԝә һун щьвата хԝәда дькарьн аликʹарийе бьдьнә кʹе? Дьбәкә кәсәк нькарә жь мал дәре у лазьм ә бона ԝи һәрʹьн дькʹане. Йан жи дьбәкә малбәтәкә дәсттәнгьрʹа лазьм ә хԝарьне бьвьн. Һәрге һун заньн ча малпәра jԝ.org^® у «JW Library^® app» бьдьнә хәбате, аликʹарийе бьдьнә хушк-бьред щьвате, сәва әԝана жи һин бьн ԝан һащәта рʹьнд бьдьнә хәбате (Кʹар. Шанд. 20:35).

¹⁵ Чахе әм рʹасти чәтьнайа бен, һәвалед мә ԝе кʹеләка мә бьн у али мә бькьн кӧ дьлрʹьһʹәтийе ӧнда нәкьн. Әԝана ԝе мина Әлиһуйе, кӧ гӧһ дьда Ибо чахе әԝи кӧла хԝә жерʹа гьли дькьр, бь сәбьр  гӧһ бьдьнә мә, гава әм дьле хԝә ԝанрʹа вәкьн (Иб. 32:4). Ле әм гәрәке һивийе нибьн, ԝәки һәвалед мә дәԝса мә сафикьрьна бькьн. Ԝе билани бә әм гӧһ бьдьнә ширәтед ԝан, кӧ сәр һʹиме Кʹьтеба Пироз ьн (Мәтʹлк. 15:22). Чаԝа кӧ Даԝьд Пʹадша бь мьлукти жь һәвалед хԝә аликʹари ԛәбул дькьр, әм жи ԝәʹде тәнгасийа гәрәке ԛӧрʹә нибьн у аликʹарийа һәвалед хԝә ԛәбул кьн (2 Сам. 17:27-29). Бь рʹасти һәвалед баш пʹешкʹеш ьн жь Йаһоԝа (Аԛуб 1:17).

16. Ль гора Филипи 4:6, 7, чьчах әм дькарьн әʹдьлайе бьстиньн? Шьровәкьн.

¹⁶ Бьхунә Филипи 4:6, 7. Чьрʹа Йаһоԝа дьбежә, ԝәки әм дькарьн дьлрʹьһʹәтийе у әʹдьлайе бь сайа «Мәсиһ Иса» бьстиньн? Чьмки әм әʹдьлайа дьреж тʹәне һьнге ԛазанщ дькьн, чахе баԝәрийа хԝә Иса тиньн у фәʹм дькьн рола ԝи ԛьрара Хԝәдеда. Мәсәлә, бь сайа ԛӧрбана Иса, һʹәму гӧнед мә дькарьн бенә бахшандьне (1 Йуһʹн. 2:12). Әԝ йәк дьле мә гәләк рʹьһʹәт дькә! Иса чаԝа Пʹадша Пʹадшатийа Хԝәдеда, ԝе һʹәму кӧл-дәрда кӧ Шәйтʹан у дьнйа ԝи мәрʹа анинә, кʹӧта кә (Иша. 65:17; 1 Йуһʹн. 3:8; Әʹйан. 21:3, 4). Әԝ йәк ԝе мәрʹа ахьрийа гәләк баш бинә, кʹижан кӧ әм гәләк һивийе нә! Рʹаст ә Иса шьхӧләкә нәһеса дайә дәсте мә, ле әԝ тʹәви мә йә у нава ԝан рʹожед ахьрийеда али мә дькә (Мәт. 28:19, 20). Әԝ йәк мерхасикә мәзьн дьдә мә! Дьлрʹьһʹәти, баԝәри һьндава ахьрийа баш у мерхаси, әԝ һәнә тьштед сәрәкә бь сайа кʹижана әм дьле хԝәда әʹдьлайе хԝәй дькьн у дәрһәԛа тьштед нәбаш нафькьрьн.

17. а) Мәсиһи чь щурʹәйи дькарә әʹдьлайеда бьминә? б) Анәгори созе жь Йуһʹәнна 16:33, әме бькарьбьн чь бькьн?

¹⁷ Ле чаԝа һун дькарьн дьлрʹьһʹәтийе ӧнда нәкьн һьнге жи, гава тәнгаси пәй тәнгасийарʹа те? Чʹәʹв бьдьнә Иса. Йа пешьн, дӧа бькьн, һәр гав дӧа бькьн. Йа дӧда, гӧрʹа Йаһоԝада бьминьн у бь хирәт мьзгинийе бәла кьн, гава ԝәрʹа чәтьн ә жи. У йа сьсийа, итʹбарийа хԝә һәвалед хԝә биньн, йед кӧ тәнгасийада али ԝә бькьн. Паше, ԝе әʹдьлайа Хԝәде дьл у фькьред ԝә хԝәй кә у һуне мина Иса бькарьбьн һәр тәнгасийеда сәркʹәвьн. (Бьхунә Йуһʹәнна 16:33.)