Әз сала 1934-да ль Канадайе, ль бажарәки бь наве Тимминс, малбәтәкә кочʹбәрда жь Сԝисрәйе һатьмә буйине. Незики сала 1939, дийа мьн дәстпекьр журнала Бьрща Ԛәрәԝьлийе бьхунә. Ӧса жи, әԝе дәстпекьр һәрʹә щьвинед Шәʹдед Йаһоԝа, у әԝе әз у шәш хушк-бьред мьн жи тʹәви хԝә дьбьрьн. Һьнә ԝәʹдә шунда әԝ бу Шәʹда Йаһоԝа.

Баве мьн тʹәви сафикьрьна ԝе рʹази нибу, ле дийа мьн рʹасти һʹәз дькьр у дьхԝәст Йаһоԝарʹа амьн бьминә. Гава шьхӧле Шәʹдед Йаһоԝа сала 1940-да һатә ԛәдәхәкьрьне, әԝе диса жи бәрдәԝам дькьр Йаһоԝарʹа хьзмәт кә. Ӧса жи, баве мьн һәр чьԛас тʹәви дийа мьн сәрт хәбәр дьда, дийа мьн һәртʹьм ԛәдьре ԝи дьгьрт. Мәсәла ԝейә баш али мьн у хушк-бьред мьн кьр, кӧ әм жи Йаһоԝарʹа хьзмәт кьн. Ԝәʹдә шунда, баве мьн ньһерʹандьна хԝә гӧһаст у һьндава мәда рʹәʹм бу.

Һавине сала 1950, әз чумә щьвата мәзьн бь наве «Зедәбуна Теократийе», йа кӧ Нийу Йоркеда һатә дәрбазкьрьне. Паше әз тʹәви хушк-бьред жь гәләк ԝәлата бумә нас у мьн гӧһ да сәрһатийед ԝан хушк-бьра, йед кӧ Мәкʹтәба Гиләде хьлаз кьрьбун, әве йәке хԝәстьн дьле мьнда пешда ани ԝәки хьзмәтийа һәртʹьм дәстпекьм. Ләма жи, гава әз вәгәрʹийамә мале, мьн бланка бона хьзмәтийа пешәнге һәртʹьм тʹьжә кьр. Филиала Канадайе щаб да у гот кӧ әз гәрәке пешийе бемә ньхӧмандьне. Мьн һәма ӧса жи кьр, у 1 Щотмәһе, сала 1950-да һатьмә ньхӧмандьне. Мәһәк шунда, әз бумә пешәнге һәртʹьм у мьн кʹьфшкьрьн станд, кӧ һәрʹьм  бажаре Капускасинге, кʹижан кӧ гәләк дури мала мьн бу.

Бьһаре сала 1951, филиале жь хушк у бьред кӧ сәр зьмане Франси хәбәр дьдан, пьрсин һәла әԝана дькарьн дәрбази Кԝебеке бьн. Ԝедәре дәшта сәр зьмане Франси һʹәԝще мьзгинвана бу. Мьн жь зарʹотийе һьм Франси һьм жи Инглизи заньбу, ләма жи мьн гот кӧ әз һазьр ьм һәрʹьм ԝедәре. У тʹәшкиләте әз шандьмә бажаре Руйене. Ԝедәре, мьн тʹӧ кәс нас нәдькьр. Чаԝа мьн серида гот, дәсте мьнда тʹәне адрес һәбу, ле һәр тьшт баш дәрбаз бу. Әз у Марсел, әм бунә достед һәв, у әз чар сала ль Кԝебеке мам. Ԝәʹдә шунда әз бумә пешәнге мәхсус.

Гава әз ль Кԝебеке бум, мьн тʹәглифкьрьн станд ԝәки һәрʹьм Мәкʹтәба Гиләде, кʹома 26, йа кӧ гәрәке ль бажаре Лансингайа Башуре дәрбаз буйа (Нийу Йорк). Мә мәкʹтәб мәһа 12 Сьбате, сала 1956-да хьлаз кьр, у тʹәшкиләте әз шандьм ԝәлатәки ль Африкайа Рʹоавайе, йе кӧ ньһа те навкьрьне Гана. b Ле пешийа кӧ әз бьчума, лазьм бу кӧ әз вәгәрʹьм Канадайе у «чәнд һʹәфтийа» ль Торонтойе бьминьм, һʹәта кӧ документед мьн һазьр буна.

Һʹәта кӧ документед мьн һазьр бун, һʹәфт мәһ дәрбаз бу. Ԝи чахи, малбәтәке ԛәнщийа хԝә мьнрʹа да кʹьфше у әз һьлдамә мала хԝә. Дьле мьн кʹәтә ԛиза ԝан Шейлайе. Чахе мьн хԝәст ле нишан кьм, ви чахи виза мьн һат. Мьн тʹәви Шейлайе дӧа кьр у мә сафи кьр ԝәки әз кʹьфшкьрьна хԝә наһельм. Ӧса жи, мә гот кӧ әме һәвдӧрʹа нәʹма бьньвисьн у паше ида сафи кьн кӧ әме бьзәԝьщьн йан на, у кʹәнге. Бона мә һеса нибу, ле паше мә фәʹм кьр, кӧ мә сафикьрьнәкә баш кьрьбу.

Рʹеԝитийа мьн бь трене, бь гәмийе у тәйаре мәһәке кʹьшанд. Гава әз гьһиштьмә бажаре Акрайе (Гана), әз ча бәрпьрсийаре нәһийе һатьмә кʹьфшкьрьне. Сәва кӧ мьн әв щабдари бьанийа сери, лазьм бу кӧ мьн рʹеԝити бькьра, һьм ль Ганайе һьм жи ль ԝәлатед Пәраве Дьранфил (ньһа те  навкьрьне Кот Девуар) у Тоголенде (ньһа те навкьрьне Того). Ԝәʹдә рʹеԝитийе, һʹәчʹи зәʹф мьн тʹәне хьзмәт дькьр пе әʹрәба кӧ филиале дабу мьн, у мьн жь хьзмәтийа хԝә гәләк шабун дьстанд.

Хьлазийа һʹәфтийе, әз дьчумә щьватед мәзьн. Ԝедәре Одед бона Щьватед Мәзьн тʹӧнә бун, ләма жи хушк-бьра һолькед жь бамбука у чʹьԛьлед даред хӧрме чедькьрьн, ԝәки бьбә си. Жь бо ве йәке, кӧ ван щийа, кʹидәре кӧ нан дьхԝарьн сарьнщә тʹӧнә бун кӧ хԝарьне теда хԝәй кьн, ләма жи һʹәйԝан һьнә ԝәхт пешийа нанхԝарьне сәржедькьрьн, ԝәки хԝарьне чекьн.

Сәр ԝан щьватед мәзьн, щарна тьштед әʹщеб дьԛәԝьмин. Щарәке, гава мисйонерәки бь наве Һерб Женнингс, c готара хԝә дьхԝәнд, мозькәк жь ви щийи, кʹидәре кӧ хԝарьн дьһатә чекьрьне, рʹәвийа у кʹәтә ортʹа сене у тʹәмашәвана. Бьре Һерб готара хԝә да сәкьнандьне, һʹәта кӧ чар бьред ԛәԝи әв мозьк зәфт кьрьн. Дә бьдьнә һʹәсабе хԝә хушк-бьра чьԛас ша дьбун!

Нава һʹәфтийеда, мьн филма мәйә, бь наве Шьхӧле Щьвака Дьнйа Тʹәзә Пешда Дьчә, ль гӧндед дәр-дор нишани мәрьва дькьр. Бона ве йәке, мьн ортʹа дӧ стунада йан жи дӧ бахада пʹәрчʹәки сьпи дарда дькьр у сәр ве филм нишан дькьр. Гӧндийа гәләки филм һʹәз дькьрьн! Гәләк жь ԝан әʹмьре хԝәда щара пешийе филм дьньһерʹин. Гава филмеда мәрьв дьһатьнә ньхӧмандьне, гӧндийа дәстед хԝә һәв дьхьстьн. Бь сайа ве филме, мәрьва рʹьнд фәʹм дькьрьн, кӧ әм бь рʹасти жи тʹәшкиләтәкә һʹәмдьнйайе нә.

Паши кӧ әз ԝәкә дӧ сала Африкайеда бум, сала 1958-да әз чумә Щьвата Мәзьнә Һʹәмдьнйайе, ль бажаре Нийу Йорке. Әз гәләк ша бум кӧ Шейла жи ԝедәре бу. Әԝ жь Кԝебеке һатьбу. Ԝедәре әԝе ча пешәнга мәхсус хьзмәт дькьр у мә һәвдӧрʹа нәʹмә дьшанд, ле чахе әм ида тʹәвайи бун, мьн жерʹа гот кӧ әз дьхԝазьм әм һәвдӧ бьстиньн. Әԝе жи ԛәбул кьр. Мьн бьре Нейтан Норрʹа d нәʹмә ньвиси у пьрси һәла мәщал һәйә, ԝәки Шейла жи һәрʹә Мәкʹтәба Гиләде у бе щәм мьн Африкайе. Бьре Нор ԛайил бу. Ахьрийеда Шейла һатә Ганайе. Сала 1959-да, 3 Щотмәһе әм ль Акрайе зәԝьщин. Мә фәʹм кьр кӧ Йаһоԝа бь рʹасти жи әм кʹәрәм кьрьн, чьмки мә жь һәр тьшти зедәтьр дина хԝә дьда хԝәстьна ԝи.

Сала 1961, әм шандьнә ԝәлате Камеруне. Әз ԛә вала нибум, чьмки мьнрʹа готьн, ԝәки әз бона авакьрьна филиала тʹәзә аликʹарийе бьдьм. Жь бәр кӧ мьн чаԝа бәрпьрсийаре ви шьхӧли кʹьфш кьрьн, лазьм бу кӧ әз гәләк тьшт һин бьм. Сала 1965-да, әм пеһʹәсийан ԝәки Шейла һʹәмлә йә. Мәрʹа чәтьн бу бьдьнә бәр чʹәʹве хԝә, кӧ әме бьбьнә де у бав. Ле чахе әм ида бона ве йәке ша дьбун, у мә кʹаре хԝә дькьр ԝәки вәгәрʹьн Канадайе, тьштәки гәләк хьраб ԛәԝьми.

Йазьх зарʹ бәр жьна мьн чу. Дохдьр мьнрʹа гот, кӧ әԝ зарʹа кӧрʹин бу. Әв йәк 50 сал пешда ԛәԝьми, ле әԝ рʹожа хьраб тʹӧ щар бира мә нәдьчу. Диса жи мә сафи кьр, ԝәки ль Камеруне бьминьн, чьмки мә әв щи гәләк һʹәз дькьр.

Ль Камеруне хушк у бьра гәләк щара жь алийе дәԝләтева рʹасти пәйкʹәтьна дьһатьн, чьмки ԝана тʹәвнәбуйин хԝәй дькьр. Илаһи ԝәʹде бьжартьна сәрԝерәки дәԝләте, һʹале хушк у бьра дьһа хьраб дьбу. Сала 1970-да, 13 Гӧлане, Шәʹдед Йаһоԝа һатьнә ԛәдәхәкьрьне. Дәԝләте филиала мәйә тʹәзә, йа кӧ мә тʹәне пенщ мәһа дабу хәбате, жь дәсте мә гьртьн. Нава һʹәфтекида, һʹәму мьзгинванед мисйонер, әз у Шейла жи, жь Камеруне дәрхьстьн. Мә хушк-бьред ԝедәре гәләки һʹәз дькьр у әм бәр хԝә дькʹәтьн, кӧ һʹале ԝан ԝе ча бә.

Паши ве йәке, әм шәш мәһа филиала Франсайеда ман. Мьн ԝедәре чь жь дәсте мьн дьһат дькьр, ԝәки бона һʹәԝщед хушк-бьред ль Камеруне хәм бькьм. Сала 1970-да, мәһа Кануна Пешьн, әм шандьнә филиала Нижәрйайе, йа кӧ ида бона шьхӧлед Камеруне щабдар бу. Хушк у бьред ль Нижәрйайе әм бь дьлгәрми ԛәбул кьрьн, у мә чәнд сал бь шабуне ԝедәре хьзмәт кьр.

Сала 1973, лазьм бу кӧ мә сафикьрьнәкә чәтьн бькьра, чьмки Шейла гьран нәхԝәш кʹәт. Гава әм Нийу Йорке сәр щьвата мәзьн бун, әԝ беһʹал кʹәт, у мьнрʹа гот: «Ԛәԝата мьн нәмайә! Әз тʹьме ԝәстийайи мә у нәхԝәш ьм». Әԝе 14 сала зедәтьр тʹәви мьн ль Африкайа Рʹоавайе хьзмәт кьрьбу, у әз бь амьнийа ԝе сәрбьльнд бум, ле ида лазьм бу ԝәки әм щурʹе жийина хԝә бьгӧһерʹьн. Паши кӧ мә дәрһәԛа әʹмьре хԝә хәбәр да у гәләк щар дӧа кьр, мә сафи кьр вәгәрʹьн Канадайе, ԝәки дьһа баш сьһʹәт-ԛәԝата ԝе бьбьнә хԝәйи. Бона мә гәләк чәтьн бу, жь щийе кӧ әм һатьбун кʹьфшкьрьн, һәрʹьн у хьзмәтийа һәртʹьм бьһельн.

Гава әм гьһиштьнә Канадайе, мьн ль щәм достәки хԝәйи кәвьн, йе кӧ ль бажарәки незики Торонтойе әʹрәбә дьфьротьн, дәстпекьр бьхәбьтьм. Мә маләк кʹьре гьрт, һур-муред хәбьтанди кʹьрʹи у дәйн нәкьрә стуйе хԝә, у мә жийина тʹәзә дәстпекьр. Мә дьхԝәст бь жийинәкә садә бьжин, чьмки гӧмана мә һәбу, ԝәки рʹожәке әме диса бьбьнә хьзмәткʹаред һәртʹьм. Әм гәләк әʹщебмайи ман гава әв хԝәстьна мә ӧса зу һатә сери!

 Рʹожед Шәмийе, мьн ль бажаре Норвале (Онтарйо) сәр шьхӧлед авакьрьна Одед Щьватед Мәзьн кʹар дькьр. Ԝәʹдә шунда, әз ча бәрпьрсийаре Одед Щьватед Мәзьн һатьмә кʹьфшкьрьне. Сьһʹәт-ԛәԝата Шейлайе һеди-һеди баш дьбу, у әм дьфькьрин кӧ әԝе ида бькарьбә ви шьхӧлида кʹар бькә. Ләма жи сала 1974-да, мәһа Һʹәзиране, әм дәрбази одәкә ль Ода Щьвата Мәзьн бун. Әм гәләк ша бун кӧ әм диса бунә хьзмәткʹаред һәртʹьм.

Сьһʹәта Шейлайе чьԛас дьчу баш дьбу, ләма жи дӧ сал шунда, мә кʹьфшкьрьнәкә тʹәзә ԛәбул кьр, кӧ чаԝа бәрпьрсийаре һәреме хьзмәт кьн. Һәрема кӧ әм һатьнә кʹьфшкьрьне ль Манитобайе бу. Ԝедәре зьвьстане гәләк сар ә. Ле жь һәвалтийа тʹәви хушк-бьред ԝедәре дьле мә гәрм дьбу у мә гәләк шабун дьстанд. Әм һин бун, ԝәки йа лапә фәрз нә кӧ әв ә, һәла әм кʹидәре хьзмәт дькьн, ле әв ә, кӧ әм Йаһоԝарʹа хьзмәт бькьн.

Паши кӧ мә чәнд сала чаԝа бәрпьрсийаре рʹеви хьзмәт кьр, сала 1978 әм һатьнә тʹәглифкьрьне, ԝәки Бәйтʹәла Канадайеда хьзмәт кьн. Паше, гәләк ԝәʹдә дәрбаз нәбу, кӧ мьн дәрсәкә фәрз станд. Сәр щьвинәкә мәхсус ль Монреале, мьн готарәк хԝәнд, йа кӧ сьһʹәт-нивәке кʹьшанд. Сәд һʹәйф, ԝәки мьн ӧса готара хԝә хԝәнд кӧ бона гӧһдарвана һʹәԝас нибу. Ләма жи, бьраки жь Идара Хьзмәтийе ширәт да мьн. Ԝе дәме, гәрәке мьн фәʹм кьра, кӧ әз готарванәки баш ниньм. Ле мьн ширәта ԝи бь мьлукти ԛәбул нәкьр. Әв йәк кӧ әԝи чаԝа тʹәви мьн хәбәр да, мьн хԝәш нәдьһат, у әз дьфькьрим кӧ әԝ йәки сәрт ә. Шашийа мьн әв бу кӧ мьн бь зедәйи дина хԝә дьда хәйсәте кәсе кӧ ширәт дьда мьн у ве йәке кӧ ширәт чаԝа һатә дайине.

Чәнд рʹож шунда, әндәмәки Комитейа филиале тʹәви мьн дәрһәԛа ве йәке хәбәр да. Мьн жерʹа гот, ԝәки әз пʹошман бумә, кӧ мьн ширәт ԛәбул нәкьр. Паше әз чумә бал бьре кӧ ширәт дабу мьн, у мьн бахшандьн жь ԝи хԝәст. Әԝи жи бь дьловани бахшандә мьн. Жь ве сәрһатийе, әз һин бум кӧ мьлукти һʹӧнӧрәки чьԛас фәрз ә (Мәтʹәлок 16:18). Мьн гәләк щар дәрһәԛа ве йәке Йаһоԝарʹа дӧа кьрийә, у мьн сафи кьрийә кӧ гава ширәт мьнрʹа бенә дайине, әзе тʹӧ щара инкʹар нәкьм.

Ида 40 сала зедәтьр ә, кӧ әз Бәйтʹәла Канадайеда мә. Сала 1985 әз бумә әндәме Комитейа филиале. Сала 2021, Шейла, кʹӧлфәта мьнә дәлал бь хәԝа мьрьне рʹаза. Хенщи ве йәке кӧ әз жь бо мьрьна ԝе хәмгин ьм, сьһʹәта мьн жи ида һаԛас баш нинә. Ле жь бәр кӧ әз бь шабуне Йаһоԝарʹа хьзмәт дькьм, әз дәрһәԛа «рʹожед жийина хԝә пʹьрʹ» нафькьрьм (Ԝаиз 5:20, ИМ). Кʹәрәмед кӧ мьн жийина хԝәда стандьнә, жь тәнгасийед кӧ рʹасти мьн һатьнә, зедәтьр ьн. Әз ԛә пʹошман ниньм, кӧ мьн әʹмьре хԝәда жь һәр тьшти зедәтьр дина хԝә дайә хԝәстьна Йаһоԝа у 70 сала ча хьзмәткʹарәки һәртʹьм жерʹа хьзмәт кьрийә. Әз баԝәр ьм ԝәки хушк у бьред мәйә щаһьл жи ԝе жь һәр тьшти зедәтьр дина хԝә бьдьнә хԝәстьна Йаһоԝа, ԝәки жийина ԝан жи хԝәш бә!