1-2. Әм чаԝа жь дайине дьһа зедә шабуне дьстиньн, нә кӧ жь стандьне?

 ЙАҺОԜА әм ӧса әʹфьрандьнә кӧ әм жь дайине дьһа зедә шабуне дьстиньн нә кӧ жь стандьне (Кʹаред Шандийа 20:35). Гәло әв йәк те һʹәсабе кӧ гава әм тьштәки дьстиньн, әм ша набьн? Һәмьки на. Гава кәсәк пʹешкʹешәке дьдә мә, әм гәләк ша дьбьн. Ле гава әм тьштәки дьдьн кәсеки, әм дьһа ша дьбьн. Рʹасти жи бона кʹара мә йә, кӧ Йаһоԝа әм ӧса әʹфьрандьнә. Гәло чьрʹа?

² Йаһоԝа әм ӧса әʹфьрандьнә кӧ әм хԝәха дькарьн шабуна хԝә дьһа зедә кьн. Әв те һʹәсабе кӧ әм чьԛас дәствәкьри бьн, әме һаԛас бәхтәԝар бьн. Чьԛас баш ә, кӧ әм ӧса һатьнә әʹфьрандьнә (Зәбур 139:14).

3. Чьрʹа Йаһоԝа те навкьрьне «Хԝәдейе хԝәзьли»?

³ Кʹьтеба Пироз дьбежә ԝәки кәсед дәствәкьри бәхтәԝар ьн. Ләма жи әм һеса дькарьн фәʹм кьн, кӧ чьрʹа Кʹьтеба Пирозда Йаһоԝа те навкьрьне ча «Хԝәдейе хԝәзьли», демәк бәхтәԝар (1 Тимотʹейо 1:11). Йе һәри дәствәкьри әԝ ә. Чаԝа кӧ Паԝлосе шанди гот, «әм бь ԝи дьжин, дьмәшьн у һәнә» (Кʹаред Шандийа 17:28). Бәле, «һәр дайина ԛәнщ у һәр пʹешкʹеша кʹамьл» жь Йаһоԝа йә (Аԛуб 1:17).

4. Чь ԝе али мә бькә шабуна хԝә дьһа зедә кьн?

⁴ Һәмьки һәр кәс жь мә дьхԝазә һе зедә шабуне жь дайине бьстинә, у ве йәкеда әм дькарьн чʹәʹв бьдьнә мәрʹданийа Йаһоԝа (Әфәси 5:1). Ве готареда әме шеԝьр  кьн, кӧ әм ча дькарьн чʹәʹв бьдьнә ԝи. Ӧса жи әме бьвиньн, кӧ әм чь дькарьн бькьн һәрге һьнә мәрьв жь мәрʹданийа мә рʹази ниньн. Әв йәк ԝе али мә бькә, ԝәки әм шабуна кӧ жь дайине те, һьм хԝәй кьн һьм жи дьһа зедә кьн.

ЧʹӘʹВ БЬДЬНӘ МӘРʹДАНИЙА ЙАҺОԜА

5. Йаһоԝа чь щурʹәйи бона мә хәм дькә?

⁵ Йаһоԝа чаԝа мәрʹданийа хԝә дьдә кʹьфше? Ԝәрә әм дина хԝә бьдьнә чәнд мәсәла. Йаһоԝа бона һʹәԝщед мә хәм дькә. Дьԛәԝьмә әм дәԝләти ниньн, ле шькьр Йаһоԝарʹа чь кӧ бона жийине лазьм ә, бал мә һәйә. Мәсәлә, әԝ хԝарьне, кʹьнщ у щи-сьтʹаре дьдә мә (Зәбур 4:8; Мәтта 6:31-33; 1 Тимотʹейо 6:6-8). Гәло Йаһоԝа ван тьшта дьдә мә, чьмки әԝ мәщбур ә? Һәмьки на! Ле ԝәки ӧса нә Йаһоԝа чьрʹа бона мә хәм дькә?

6. Жь Мәтта 6:25, 26 әм чь һин дьбьн?

⁶ Бь рʹасти Йаһоԝа бона мә хәм дькә, чьмки әԝ мә һʹәз дькә. Дина хԝә бьдьне, кӧ Иса Мәтта 6:25, 26-да чь готийә (Бьхунә). Ван рʹезада Иса бәʹса һьнә әʹфрина кьр. Әԝи дәрһәԛа чʹьвика ӧса гот: «Әԝана нә дьчиньн, нә дьдьрун у нә жи әʹмбарада тьштәки тʹоп дькьн». Ле дина хԝә бьдьне, кӧ әԝи паше чь гот: «Баве ԝәйи әʹзмана ԝана тʹер дькә». Паше Иса гот: «Нә һун жь ԝан ԛимәттьр ьн». Бәле, бәр чʹәʹве Йаһоԝа хьзмәткʹаред ԝи жь гәләк һʹәйԝана ԛимәттьр ьн. Һәрге Йаһоԝа бона һʹәԝщед һʹәйԝана хәм дькә, һәмьки әԝе бона мә жи хәм бькә. Мина бавәки кӧ малбәта хԝә дьбә хԝәйи, Йаһоԝа жи малбәта хԝә һʹәз дькә у ле дьбә хԝәйи (Зәбур 145:16; Мәтта 6:32).

7. Әм ча дькарьн мина Йаһоԝа дәствәкьри бьн? (Бьньһерʹә ӧса жи шькьл.)

⁷ Мина Йаһоԝа Хԝәде, әм жи дькарьн бона кәсед дьн хәм кьн у али ԝан бькьн, чьмки әм ԝана һʹәз дькьн. Мәсәлә, гәло тӧ хушк йан бьраки ӧса нас дьки, йе кӧ һʹәԝще кʹьнщ йан хԝарьне йә? Йаһоԝа дькарә тә бьдә хәбате, ԝәки али ԝан бькә. Ԝәʹде чәтьнда Шәʹдед Йаһоԝа бь мәрʹдани бона һʹәԝщед мәрьва хәм дькьн. Мәсәлә, ԝәʹде пандәмийа COVID-19, хушк-бьра хԝарьн, кʹьнщ у тьштед дьн, ԝан мәрьварʹа дьшандьн, йед кӧ һʹәԝщә бун. Ӧса жи гәләка бона шьхӧле һʹәмдьнйайе пʹәрә ԛӧрбан дькьрьн. Бь сайа ван ԛӧрбана аликʹари дьданә хушк-бьред сәр  тʹәмамийа дьнйайе, йед кӧ зьрар стандьбун. Әв хушк-бьред дәствәкьри бь рʹасти жи ль гора ве ширәте һәрәкʹәт дькьрьн: «Ԛәнщи у алиһәвкьрьне бир нәкьн, чьмки ԛӧрбанед ӧса ль Хԝәде хԝәш тен» (Ибрани 13:16).

8. Әм чаԝа жь ԛәԝата кӧ Йаһоԝа дьдә мә кʹаре дьстиньн? (Филипи 2:13)

⁸ Йаһоԝа ԛәԝате дьдә. Йаһоԝа ԛәԝата хԝәйә бесинор бь мәрʹдани дьдә хьзмәткʹаред хԝәйә амьн (Бьхунә Филипи 2:13). Гәло тә ԛә дӧа кьрийә, кӧ Йаһоԝа ԛәԝате бьдә тә, ԝәки тӧ тьштед рʹаст бьки йан тәнгасикә гьранда тәйах ки? Йан жи дьбәкә тә дӧа кьрийә кӧ Йаһоԝа ԛәԝате бьдә тә, ԝәки ве рʹоже жи тәйах ки. Гава тә щаба дӧайе хԝәйи дәрһәԛа ԛәԝате, станд, тә фәʹм кьр кӧ әв гьлийед Паԝлосе шанди чьԛас рʹаст ьн: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13).

9. Әм ча дькарьн мина Йаһоԝа ԛәԝата хԝә бь мәрʹдани бьдьнә хәбате? (Бьньһерʹә ӧса жи шькьл.)

⁹ Рʹаст ә әм мәрьвнә нәкʹамьл ьн, диса жи әм дькарьн чʹәʹв бьдьнә Йаһоԝа у ԛәԝата хԝә бь мәрʹдани бьдьнә хәбате. Һәмьки әм нькарьн рʹастә-рʹаст ԛәԝате бьдьнә мәрьва, ле әм дькарьн ԛәԝата хԝә бона кʹара ԝан хәрщ кьн. Мәсәлә, әм дькарьн шьхӧле маледа али хушк йан бьраки әʹмьрда мәзьн йан жи нәхԝәш, бькьн, йан жи бона ԝан һәрʹьнә дькʹане. У чьԛас дәсте мә те, әм дькарьн бона тʹәмьзкьрьн у хԝәйкьрьна Ода Щьвате аликʹарийе бьдьн. Гава әм ԛәԝата хԝә бь ви щурʹәйи дьдьнә хәбате, әм кʹарәкә мәзьн дьдьнә хушк-бьра.

10. Әм ча дькарьн бь гьлийед хԝә мәрьва ԛәԝи кьн?

¹⁰ Ӧса жи бир нәкьн, кӧ әм дькарьн бь гьлийед хԝә жи мәрьва бьшьдиньн. Гәло тӧ кәсәки нас дьки, йе кӧ һʹәԝще пәсьна йан бәрдьлийе йә? Һәрге әре, тӧ дькари рʹу бь рʹу, йан пе тʹеле, йан жи пе смс-е пәсьне ԝи бьди у бәр дьле ԝида бейи. Дәрәщед ӧсада нәлазьм ә бәр хԝә кʹәви, кӧ тӧйе чь бежи. Һәма чәнд гьлийед тәйә жь дьл жи дькарьн али кәсәки бькьн, ԝәки әԝ Йаһоԝарʹа амьн бьминә, йан жи ньһерʹандьна позитив хԝәй кә (Мәтʹәлок 12:25; Әфәси 4:29).

11. Йаһоԝа биланийа хԝә ча дьдә хәбате?

¹¹ Йаһоԝа биланийе дьдә. Аԛуб ӧса ньвисибу: «Һәгәр сәрԝахтийа йәки жь ԝә тʹера ԝи накә, бьра һиви жь Хԝәде бькә у ԝе жь ԝирʹа бе дайине. Әԝ  бь мәрʹдани дьдә һʹәмуйа у тʹӧ кәси беԛәдьр накә» (Аԛуб 1:5). Әв рʹез нишан дькә, кӧ Йаһоԝа сәрԝахти йан биланийа хԝә вәнашерә, ле бь мәрʹдани дьдә кәсед дьн жи. Ӧса жи гава әм жь Йаһоԝа биланийе дьхԝазьн, әԝ мә «тʹӧ кәси беԛәдьр накә», демәк мә нәһежа һʹәсаб накә. Бәле, әԝ хԝәха дьбежә ԝәки әм рʹебәрийа ԝи бьгәрʹьн (Мәтʹәлок 2:1-6).

12. Әм ча дькарьн биланийа хԝә кәсед дьнрʹа пʹарәвәкьн?

¹² Әм жи мина Йаһоԝа дькарьн биланийа хԝә кәсед дьнрʹа пʹарәвәкьн (Зәбур 32:8). Гәләк мәщалед хьзмәткʹаред Йаһоԝа һәнә, ԝәки дәрһәԛа тьштед кӧ һин бунә, бежьн. Мәсәлә, әм гәләк щар али кәсед тʹәзә дькьн, ԝәки хьзмәтийеда кʹар бькьн. Рʹуспи бь сәбьр али аликʹарчийед щьвате у бьред дьнә ньхӧманди дькьн, ԝәки әԝана щьватеда щабдарийед хԝә биньн сери. Ӧса жи кәсед кӧ шьхӧле авакьрьнеда йан хԝәйкьрьна авайед тʹәшкиләтеда щерʹьбанди нә, дькарьн кәсед дьн һин кьн, ԝәки әԝана жи ви шьхӧлида бькарьбьн кʹар бькьн.

13. Гава әм кәсед дьн һин дькьн, әм ча дькарьн чʹәʹв бьдьнә Йаһоԝа?

¹³ Хушк-бьред кӧ кәсед дьн һин дькьн, гәрәке чʹәʹв бьдьнә Йаһоԝа. Чаԝа кӧ мә дит, Йаһоԝа бь мәрʹдани биланийе дьдә мә. Ләма әм жи дьхԝазьн занәбуна хԝә бь мәрʹдани тʹәви кәсед дьн пʹарәвәкьн. Әм хԝә паш нахьн жь ве йәке, кӧ кәсед дьн һин кьн, чьмки әм натьрсьн кӧ дьбәкә паше әԝана щийе мә бьгьрьн. Әм ӧса жи гәрәке нәбежьн: «Тʹӧ кәси әв шьхӧл әз һин нәкьрьмә! Бьра әԝ жи хԝәха һин бә». Нав хьзмәткʹаред Йаһоԝада гәрәке фькьред ӧса пешда нәйен. Әм һазьр ьн нә кӧ тʹәне занәбуна хԝә, «ле әʹмьре хԝә жи» бьдьн бона ԝан мәрьва, кʹижана кӧ әм һин дькьн (1 Тʹесалоники 2:8). Әм баԝәр ьн кӧ ԝәхт шунда әԝе жи «бькарьбьн һьнәкед дьн һин кьн» (2 Тимотʹейо 2:1, 2). Һәрге әм бь мәрʹдани ԝан тьшта чь кӧ әм һин бунә кәсед дьн һин кьн, һьм әме билан у бәхтәԝар бьн, һьм жи әԝана.

ЧЬ БЬКЬН ЧАХЕ МӘРЬВ ШЕКЬРДАР НИНЬН

14. Гәләк хушк-бьра чь дькьн чахе әм һьндава ԝанда мәрʹд ьн?

¹⁴ Гәләк хушк-бьра бона мәрʹданийа мә шекьрдар ьн. Дьбәкә әԝана бь сайа смс-е йан жи щурʹәки майин рʹазибуна хԝә мәрʹа бьдьнә кʹьфше (Колоси 3:15). Гава мәрьв жь мә рʹази нә, әв йәк гәләк дьле мә ша дькә.

15. Һәрге кәсәк бона мәрʹданийа мә шекьрдар нинә, әм гәрәке чь биньн бира хԝә?

¹⁵ Ле дьбәкә һьнә кәс бона мәрʹданийа мә шекьрдар нибьн. Щарна чахе әм ԝәʹдә, ԛәԝат йан пʹәре хԝә бона кәсәки хәрщ дькьн, дьбәкә ӧса бе кʹьфше кӧ ԛә хәма ԝи жи нинә. Һәрге тьштәки ӧса дьԛәԝьмә, әм чь дькарьн бькьн, ԝәки дьлтәнг нәбьн у шабуна хԝә ӧнда нәкьн? Биньн бира хԝә гьлийед жь Кʹаред Шандийа 20:35. Шабуна кӧ әм жь дайине дьстиньн, шекьрдарийа мәрьвава гьредайи нинә. Һәрге ӧса те кʹьфше кӧ мәрьв рʹази нинә, диса жи әм дькарьн жь дайине шабуне бьстиньн. Гәло чь щурʹәйи?

16. Сәва кӧ әм шабуна хԝә ӧнда нәкьн, әм гәрәке чь бир нәкьн?

¹⁶ Чʹәʹв бьдьнә мәрʹданийа Йаһоԝа. Йаһоԝа тьштед баш дьдә һәр кәси, һәла һе кәсед бешекьр жи (Мәтта 5:43-48). Йаһоԝа соз дьдә кӧ һәрге әм мина ԝи  дәствәкьри бьн, у «һивийа вәгәрʹандьне нибьн . . . хәлата [мә] ԝе мәзьн бә» (Луԛа 6:35). Ләма жи дьлтәнг нәбьн гава мәрьв ԛәнщийа ԝә нашекьриньн, у баԝәр бьн кӧ Йаһоԝа ԝе ԝә хәлат кә, чьмки һун дәствәкьри нә у «дьл у әшԛ» дьдьн (Мәтʹәлок 19:17; 2 Корьнтʹи 9:7).

17. Чахе әм ԛәнщийе дькьн, нета мәйә сәрәкә гәрәке чь бә? (Луԛа 14:12-14)

¹⁷ Методәк жи кӧ чаԝа әм дькарьн чʹәʹв бьдьнә Йаһоԝа әв ә, кӧ принсипа жь Луԛа 14:12-14 әʹмьре хԝәда бьдьнә хәбате (Бьхунә). Һәмьки нәхьраб ә кӧ ԛәнщийе йан меванһʹәзийе кәсәкирʹа бьдьнә кʹьфше, кʹижан кӧ дькарә ԛәнщийе бона мә бькә. Ле һәрге әм тедәрхьн кӧ щарна әм бь ве нете бона кәсәки ԛәнщийе дькьн, чьмки һивийе нә кӧ әԝе жи тьштәки бона мә бькә, дьһа баш ә әм ль гора ширәта Иса һәрәкʹәт бькьн. Мәсәлә, әм дькарьн һьндава кәсед кӧ мәщала ԝан тʹӧнә тьштәки бона мә бькьн, дәствәкьри бьн. Һьнге әме ша бьн, чьмки әм чʹәʹв дьдьнә Йаһоԝа. У гава паше жи кәсәк бона ԛәнщийа мә шекьрдар нибә, әме шабуна хԝә ӧнда нәкьн.

18. Әм гәрәке чь нәфькьрьн у чьрʹа?

¹⁸ Нәфькьрьн кӧ нета мәрьва хьраб ә (1 Корьнтʹи 13:7). Һәрге кәсәк рʹазибуна хԝә надә кʹьфше, пьрсе бьдә хԝә: «Гәло әԝ бь рʹасти йәки бешекьр ә, йан әԝи бир кьр рʹазибуна хԝә бьдә кʹьфше?» Дьԛәԝьмә мәʹнийед дьн жи һәнә, кӧ чьрʹа әԝи рʹазибуна хԝә нәда кʹьфше. Һьнә мәрьв шекьрдар ьн, ле ньзаньн кӧ чаԝа рʹазибуна хԝә әʹйан кьн. Дьԛәԝьмә әԝана шәрм дькьн, чьмки ида нькарьн мина бәре али кәсед дьн бькьн, у ида хԝәха һʹәԝще ве йәке нә. Мәʹни чь бьн жи, әм гәрәке нәфькьрьн кӧ нета ԝан хьраб ә, чьмки әм хушк-бьред хԝә һʹәз дькьн (Әфәси 4:2).

19-20. Гава әм бона кәсәки ԛәнщийе дькьн, чьрʹа әм гәрәке сәбьр кьн? (Бьньһерʹә ӧса жи шькьл.)

¹⁹ Сәбьр кьн. Сьлеман Пʹадша дәрһәԛа  мәрʹданийе ӧса ньвиси: «Нане хԝә бавежә сәр аве, чьмки паши гәләк рʹожа те бьвини» (Ԝаиз 11:1, ИМ). Ча ве рʹезеда те кʹьфше, дьбәкә һьнә мәрьв шекьрдарийа хԝә «паши гәләк рʹожа» нишан кьн. Тьштәки ӧса һатьбу сәре хушкәкә мә.

²⁰ Гәләк сал пешда, жьна бәрпьрсийарәки мьһале хушкәкә тʹәзә ньхӧмандирʹа нәʹмәкә бь гьлийед дьлгәрми ньвиси. Ле әве хушке ԝәкә һʹәйшт сал шунда, бь нәʹме щаба ве да у гот: «Тӧ ньзани, ле әв нәʹма тә гәләк сала али мьн дькьр. Нәʹма тә гәләк бь дьлгәрми бу, ле тьште кӧ һәри зедә гьһиштә дьле мьн, рʹез бу. Мьн әв рʹез тʹӧ щар бьр нәдькьр». a Әве хушке бәʹса һьнә проблемед хԝә кьр у гот: «Щарна, мьн дьхԝәст жь рʹастийе дәрем. Ле рʹеза кӧ тә мьнрʹа ньвисибу сәр дьле мьн һʹӧкӧм дькьр у али мьн дькьр, кӧ әз Йаһоԝарʹа амьн бьминьм. Нава ван һʹәйшт салада, тьштәки дьн һаԛас ԛәԝи сәр мьн һʹӧкӧм нәкьрийә». Һәла бьдә бәр чʹәʹве хԝә кӧ гава жьна бәрпьрсийарәки мьһале әв нәʹмә «паши гәләк рʹожа» станд, әԝ чьԛас ша бу! Мина ве йәке, һәрге мә бона кәсәки ԛәнщи кьрийә, дьбәкә гәләк ԝәʹдә дәрбаз бьбә һʹәта кӧ әԝ рʹазибуна хԝә мәрʹа бьдә кʹьфше.

21. Тӧ чьрʹа дьхԝази чʹәʹв бьди мәрʹданийа Йаһоԝа?

²¹ Чаԝа әм пеһʹәсийан Йаһоԝа әм ӧса әʹфьрандьнә, кӧ әм жь дайине дьһа зедә шабуне дьстиньн нә кӧ жь стандьне. Гава мәщала мә һәйә кӧ али хушк-бьра бькьн, әм шабуне дьстиньн. У гава әԝана рʹазибуна хԝә мәрʹа дьдьнә кʹьфше, әв йәк дьле мә ша дькә. Ле һәрге әԝана рʹази нибьн, диса жи әм дькарьн ша бьн кӧ мә тьштәки рʹаст кьрийә. Тʹӧ щар бир нәкә кӧ тӧ чь бьди жи, Йаһоԝа дькарә һе зедә бьдә тә (2 Дирок 25:9). Әм тʹӧ щар нькарьн жь Йаһоԝа зедәтьр мәрʹд бьн. У хәлата кӧ Йаһоԝа дьдә, хәлата һәрә баш ә. Ләма жи, ԝәрә әм чʹәʹв бьдьнә мәрʹданийа Баве хԝәйи әʹзмана!