1. Дәмәкә незикда ԝе чь бьԛәԝьмә?

 ӘМ БЬ РʹАСТИ жи рʹожед мәхсусда дьжин! Дәмәкә незикда, Иса ԝе диԝана һәр кәсе кӧ сәр әʹрде дьжин, бькә. Ле сәва кӧ мәрʹа бьдә кʹьфше кӧ әв рʹож незик ә, Иса шагьртед хԝәрʹа гот, кӧ «нишана» һазьрбуна ԝи у «рʹожед хьлазийейә ве дьнйайе» ԝе чь бә (Мәтта 24:3). Әв пʹехәмбәртийа Иса кʹьтеба Мәтта сәре 24 у 25-да, кʹьтеба Маркос сәре 13, у кʹьтеба Луԛа 21-да һатийә ньвисаре.

2. Ве готареда әме дина хԝә бьдьнә чь у әв йәк ԝе ча али мә бькә?

² Иса бь сайа се мәтʹәлока али мә дькә, ԝәки хԝә бона ԝе рʹоже һазьр кьн. Мәтʹәлока ми у бьзьна, йа ԛизед сәрԝахт у ԛизед бефәʹм у йа тәланта. Әв һәр се мәтʹәлок жи нишани мә дькьн, ԝәки мәрьв ԝе ча сәр һʹиме кьред хԝә бенә диԝанкьрьне. Гава әм дина хԝә бьдьнә ван мәсәла, ԝәрә әм бьфькьрьн кӧ әм чь дәрса дькарьн һин бьн. Пешийе әме мәтʹәлока ми у бьзьна шеԝьр кьн.

МӘТʹӘЛОКА ДӘРҺӘԚА МИ У БЬЗЬНА

3. Иса ԝе кʹәнге диԝана мәрьва бькә?

³ Ве мәтʹәлока дәрһәԛа ми у бьзьнада, Иса гот кӧ әԝе сәр һʹиме кьред мәрьва диԝана ԝан бькә, демәк сәр һʹиме ԝе йәке кӧ әԝана ԝе чь щурʹәйи мьзгинийе у кәсед бь рʹӧһʹ кʹьфшкьри ԛәбул кьн (Мәтта 25:31-46). Иса ԝе ԝәʹде «тәнгасийа мәзьн» диԝана ԝан бькә, демәк пешийа Һармәгәдоне (Мәтта 24:21). Чаԝа кӧ  шьван мийа жь бьзьна вәдьԛәтинә, Иса жи ԝе кәсед кӧ бь амьни пьштгьрийа пәйчуйед ԝийи бь рʹӧһʹ кʹьфшкьри дькьн, жь кәсед нәамьн вәԛәтинә.

4. Ль гора Ишайа 11:3, 4, чьрʹа әм дькарьн баԝәр бьн, кӧ Иса ԝе бь һәԛи диԝана мәрьва бькә? (Ӧса жи бьньһерʹә шькьле сәр .)

⁴ Кʹьтеба Пирозда һатийә пʹехәмбәртикьрьне кӧ Иса Мәсиһ, йе кӧ жь алийе Йаһоԝада ча һʹакьм һатийә кʹьфшкьрьне, ԝе диԝана һәԛ бькә (Бьхунә Ишайа 11:3, 4). Әԝ рʹьнд дина хԝә дьдә ньһерʹандьн, гьли у кьред мәрьва у дьвинә кӧ әԝана һьндава бьред ԝийә бь рʹӧһʹ кʹьфшкьри у шьхӧлед ԝанда чь щурʹәйи нә (Мәтта 12:36, 37; 25:40). Иса ԝе бьзаньбә кӧ кʹе пьштгьрийа бьред ԝийи бь рʹӧһʹ кʹьфшкьри у шьхӧлед ԝан кьрийә. a Мәсәлә, кәсед кӧ тенә һʹәсабе ми, шьхӧле бәлакьрьна мьзгинийеда аликʹари дьданә бьред ԝийи бь рʹӧһʹ кʹьфшкьри. Мәрьвед ӧса ԝе бенә һʹәсабе «йед рʹаст» у ԝе сәр әʹрде «жийина һʹәта-һʹәтайе бьстиньн» (Мәтта 25:46; Әʹйанти 7:16, 17). Бәле, кәсед амьн ԝе хәлатәкә гәләк ԛимәт бьстиньн! Һәрге әԝана ԝәʹде тәнгасийа мәзьн у паше жи амьн бьминьн, наве ԝан ԝе «кʹьтеба жийинеда» бьминә (Әʹйанти 20:15).

5. Әм жь мәтʹәлока ми у бьзьна чь дәрсе дькарьн һин бьн, у диса кʹе жь ве мәтʹәлоке дькарә кʹаре бьстинә?

⁵ Амьн бьминьн. Мәтʹәлока Исайә дәрһәԛа ми у бьзьна бәри пешьн дәрһәԛа ԝан мәрьва йә, гӧмана кʹижана һәйә һʹәта-һʹәтайе сәр әʹрде бьжин. Хенщи ве йәке кӧ әԝана шьхӧле бәлакьрьна мьзгинийеда кʹар дькьн, әԝана ӧса жи бь амьни рʹебәрийа хӧламе амьн у сәрԝахт ԛәбул дькьн, кʹижан кӧ Иса бьжартийә (Мәтта 24:45). Ле гьлийед жь ве мәтʹәлоке бона кәсед кӧ ԝе һәрʹьнә әʹзмана жи фәрз ә. Гәло чьрʹа? Чьмки Иса дина хԝә дьдә ньһерʹандьн, рʹабун-рʹуньштьн у хәбәрдана ԝан жи. Әԝана жи гәрәке амьн бьминьн. Иса дӧ мәтʹәлокед дьн жи ани, пе кʹижана әԝи кәсед бь рʹӧһʹ кʹьфшкьри һьнә тьшт һин кьрьн. Әв мәтʹәлок кʹьтеба Мәтта сәре 25-да һатийә ньвисаре. Ньһа әм дина хԝә бьдьнә мәтʹәлока ԛизед сәрԝахт у бефәʹм.

МӘТʹӘЛОКА ДӘРҺӘԚА ԚИЗЕД СӘРԜАХТ У БЕФӘʹМ

6. Пенщ ԛизька ча данә кʹьфше ԝәки әԝана сәрԝахт ьн? (Мәтта 25:6-10)

⁶ Мәтʹәлока дәрһәԛа ԛизед сәрԝахт у бефәʹмда, Иса бәʹса 10 ԛиза кьр, йед кӧ чунә пешийа зәʹваки (Мәтта 25:1-4). Ԝана дьхԝәст тʹәви зәʹва һәрʹьнә дәʹԝате. Жь ван ԛиза, пенщ «сәрԝахт» бун у пенщ «бефәʹм» бун. Ԛизед сәрԝахт һазьр у һʹьшйар бун. Әԝана һазьр бун кӧ чьԛас лазьм бә һивийа ԝи бьн, һәла һе һʹәта ниве шәве жи. Ләма жи ԝана ԛәндилед хԝә тʹәви хԝә анин, ԝәки шәв бона ԝан рʹонайи һәбә. Ӧса жи, ԝана дьһа зедә рʹун тʹәви хԝә анин, ԝәки һәрге зәʹва дәрәнги кʹәвә, әԝана тәʹрийеда нәминьн (Бьхунә Мәтта 25:6-10). Гава зәʹва һат, ԛизед сәрԝахт тʹәви ԝи чунә дәʹԝате. Мәсиһийед бь рʹӧһʹ кʹьфшкьри жи, йед кӧ һʹәта һатьна Мәсиһ амьн у һʹьшйар бьминьн, ԝе бькарьбьн тʹәви Зәʹве, демәк Мәсиһ,  бькʹәвьнә Пʹадшатийа ԝийә әʹзмани b (Әʹйанти 7:1-3). Ле һʹале пенщ ԛизед бефәʹм ча бу?

7. Чь һатә сәре пенщ ԛизед бефәʹм у чьрʹа?

⁷ Гава зәʹва һат, пенщ ԛизед бефәʹм һазьр нибун кӧ тʹәви ԝи һәрʹьнә дәʹԝате. Рʹуне ԝан һьндьк бу, у ԛәндилед ԝан ида дьтәмьрин. Ләма жи, гава ԝана бьһист кӧ зәʹва ида те, әԝана мәщбур бун һәрʹьн у хԝәрʹа рʹун бькʹьрʹьн. Чахе зәʹва һат, ԛизед бефәʹм һе вәнәгәрʹийабун. Һьнге «ԛизед кӧ һазьр бун, тʹәви ԝи кʹәтьнә щийе дәʹԝате у дәри һатә дадане» (Мәтта 25:10). Паше, гава ԛизед бефәʹм вәгәрʹийан, ԝана жи хԝәст бькʹәвьн щийе дәʹԝате, ле зәʹва ԝанрʹа гот: «Әз ԝә нас накьм» (Мәтта 25:11, 12). Сәд һʹәйф, кӧ әԝ ԛизьк һазьр нибун, ԝәки һʹәта хьлазийе һивийа зәʹве буна. Гәло жь ве мәсәле кәсед бь рʹӧһʹ кʹьфшкьри чь дәрсе дькарьн бьстиньн?

8-9. Кәсед бь рʹӧһʹ кʹьфшкьри дькарьн жь мәсәла дәһ ԛиза чь һин бьн? (Бьньһерʹә ӧса жи шькьл.)

⁸ Һазьр бьн. Бь ве мәтʹәлоке Иса нәдьхԝәст бьгота, кӧ дӧ кʹомед бь рʹӧһʹ кʹьфшкьри ԝе һәбьн, кʹомәк ԝе һазьр бә һʹәта хьлазийа ве дьнйа хьраб һивийе бә у йа дьн жи ԝе һазьр нибә. Иса дьхԝәст зәлал кьра, кӧ һәрге кәсед бь рʹӧһʹ кʹьфшкьри һʹәта хьлазийе бь амьни сәбьр нәкьн, әԝана ԝе хәлата хԝә нәстиньн (Йуһʹәнна 14:3, 4). Бәле, әв йәк гәләк фәрз ә! Фьрԛи тʹӧнә гӧмана мә һәйә һʹәта-һʹәтайе сәр әʹрде бьжин йан сәр әʹзмана, әм гәрәке жь мәсәла дәрһәԛа дәһ ԛиза дәрсе һин бьн. Әм гәрәке һазьр у һʹьшйар бьн у һʹәта хьлазийе сәбьр кьн (Мәтта 24:13).

⁹ Паши мәтʹәлока дәрһәԛа ԛиза, кӧ нишани мә дькә ԝәки әм гәрәке һазьр у һʹьшйар бьн, Иса мәтʹәлока дәрһәԛа  тәланта ани. Әв мәсәлә нишани мә дькә, кӧ әм гәрәке хирәт бьн.

МӘТʹӘЛОКА ДӘРҺӘԚА ТӘЛАНТА

10. Дӧ хӧламед амьн чь кьрьн? (Мәтта 25:19-23)

¹⁰ Мәтʹәлока дәрһәԛа тәлантада, Иса бәʹса се хӧлама кьр, дӧ хӧлам ахайе хԝәрʹа амьн бун, ле хӧламәк жерʹа амьн нибу (Мәтта 25:14-18). Дӧ хӧламед амьн бь дьл у щан хәбьтин, ԝәки пʹәре ахайе хԝә зедә кьн. Пешийа кӧ ахайе ԝан бьчуйа ԝәлатәки дьн, әԝи чәнд тәлант тʹәсмили ԝан кьр. Дӧ хӧлам хирәт у амьн бун у пʹәред кӧ ԝанрʹа һатьбунә дайине, бь билани данә хәбате. Гава аха вәгәрʹийа, әԝи пʹәред кӧ тʹәсмили ԝан кьрьбу, дӧ щар зедәтьр станд. Аха пʹайе ԝан да у һәр йәкерʹа гот «тʹәви ахайе хԝә ша бә» (Бьхунә Мәтта 25:19-23). Ле гәло хӧламе сьсийа, әв пʹәре кӧ тʹәсмили ԝи кьрьбун, ча кьр?

11. Чь һатә сәре хӧламе «тʹәмбәл», у чьрʹа?

¹¹ Хӧламе сьсийа, йе кӧ тәлантәк стандьбу, йәки «тʹәмбәл» бу. Ахайе ԝи дьхԝәст, ԝәки әԝ ви тәланти бь билани бьдә хәбате, ле дәԝсе әԝ чу у тәлант әʹрдеда чʹәʹл кьр. Гава аха вәгәрʹийа, әԝи тʹәне тәлантәк жерʹа вәгәрʹанд. Сәрда жи, дәԝса кӧ жь ахайе хԝә бахшандьне бьхԝәста, чьмки әԝи пʹәрә нәкьрьбу нава шьхӧл у зедә нәкьрьбу, әԝи ахайе хԝә нәһәԛ кьр у жерʹа гот, кӧ әԝ мәрьвәки сәрт ә. Ләма жи аха сәр ԝи һерс кʹәт, тәлант жь ԝи станд у гот кӧ ле бавежьнә дәрва (Мәтта 25:24, 26-30).

12. Рʹожед мәда дӧ хӧламед амьн кʹе тенә һʹәсабе?

¹² Дӧ хӧламед амьн тенә һʹәсабе Мәсиһийед амьн, йед бь рʹӧһʹ кʹьфшкьри. Аха, демәк Иса Мәсиһ, ԝанрʹа дьбежә кӧ «тʹәви ахайе хԝә ша» бьн. Әԝана бь сайа рʹабуна мьрийайә пешьн, хәлата хԝәйә әʹзмани дьстиньн (Мәтта 25:21, 23; Әʹйанти 20:5б). Жь алийе дьнва жи, кәсед бь рʹӧһʹ кʹьфшкьри гәрәке жь мәсәла  хӧламе тʹәмбәл дәрсе һин бьн. Гәло чь щурʹәйи?

13-14. Кәсед кʹьфшкьри жь мәсәла дәрһәԛа тәланта чь һин дьбьн? (Бьньһерʹә ӧса жи шькьл.)

¹³ Хирәт бьн. Иса бь ван һәрдӧ мәтʹәлокед дәрһәԛа дәһ ԛиза у тәланта нәдьхԝәст бьгота кӧ һьнә кәсед бь рʹӧһʹ кʹьфшкьри ԝе тʹәмбәл бьн. Бь рʹасти әԝи дьхԝәст бьгота, кӧ һәрге кәсед кʹьфшкьри хирәта хԝә ӧнда кьн, әԝана ԝе нькарьбьн һежайи хәлата хԝә бьн у бькʹәвьнә Пʹадшатийа әʹзмани (2 Пәтрус 1:10).

¹⁴ Жь мәтʹәлокед Исайә дәрһәԛа дәһ ԛиза у тәланта те кʹьфше, ԝәки һʹәму кәсед кʹьфшкьри гәрәке һазьр, хирәт у һʹьшйар бьн. Ле гәло Иса диса бәʹса һьнә тьшта кьр, чь кӧ ԝе бона кәсед кʹьфшкьри бьбуйа дәрс? Бәле, Мәтта 24:40, 41-да Иса һьнә тьштед фәрз готьн, йед кӧ диԝанкьрьна хьлазийе, йа кәсед кʹьфшкьрива гьредайи йә.

КʹЕ ԜЕ БЕНӘ ҺЬЛДАНЕ?

15-16. Чаԝа Мәтта 24:40, 41 нишан дькә, ԝәки кәсед кʹьфшкьри гәрәке һʹьшйар бьминьн?

¹⁵ Пешийа кӧ Иса бәʹса ван се мәтʹәлока бькьра, әԝи дәрһәԛа диԝанкьрьна пашьн йа кәсед бь рʹӧһʹ кʹьфшкьри кьр. Әԝи бәʹса дӧ меред кӧ нав зәвийеда дьхәбьтьн у дӧ жьнед кӧ гәньм дьһерьн, кьр. Әԝана шьхӧләкива мьжул дьбун, ле Иса гот, кӧ «йәк ԝе бе һьлдане у йа дьн ԝе бе һиштьне» (Бьхунә Мәтта 24:40, 41). Паше, әԝи шагьртед хԝәрʹа гот: «Һʹьшйар бьминьн, чьмки һун ньзаньн Хӧдан ԝе кʹижан рʹоже бе» (Мәтта 24:42). Иса әв йәк паши мәсәла дәрһәԛа дәһ ԛизька жи гот (Мәтта 25:13). Гәло әв гьлийед ԝи һәвва гьредайи бун? Бәле, ӧса те кʹьфше. Тʹәне кәсед амьн у рʹаст, йед бь рʹӧһʹ кʹьфшкьри ԝе бенә «һьлдане», демәк Иса ԝе ԝана бона Пʹадшатийа әʹзмани ԛәбул кә (Йуһʹәнна 14:3).

¹⁶ Һʹьшйар бьминьн. Кәсед бь рʹӧһʹ кʹьфшкьри, йед кӧ һʹьшйар наминьн, ԝе нәйнә ԛәбулкьрьне (Мәтта 24:31). Һәмьки лазьм ә, кӧ һʹәму хьзмәткʹаред Хԝәде, демәк нә тʹәне кәсед кӧ һивийа жийина сәр әʹзмана нә, һʹьшйар у амьн бьминьн.

17. Чьрʹа әм әʹщебмайи наминьн, кӧ Йаһоԝа кʹәнге мәрьва бь рʹӧһʹе пироз кʹьфш дькә?

¹⁷ Әм Йаһоԝа Хԝәде рʹьнд нас дькьн у итʹбарийа хԝә сафикьрьнед ԝи тиньн, ләма жи әм әʹщебмайи наминьн, ԝәки Әԝи сафи кьрийә рʹожед мәда жи һьнә мәрьва бь рʹӧһʹ кʹьфш кә. c Һәла бинә бира хԝә, кӧ мәтʹәлока дәрһәԛа рʹәзда, Иса дәрһәԛа хәбатчийа чь гот (Мәтта 20:1-16). Кәсед кӧ дәрәнг дәстпекьрьн рʹәзда бьхәбьтьн у кәсед кӧ зу дәстпекьрьбун, мина һәв һәԛ стандьн. Мина ве йәке, фьрԛи тʹӧнә кәсед кʹьфшкьри кʹәнге тенә бьжартьне, тʹәне һьнге әԝана ԝе хәлата хԝәйә әʹзмани бьстиньн, һәрге амьн бьминьн.

ДӘРСА ҺИН БЬН

18-19. Ве готареда мә чь дәрс хԝәрʹа станд?

¹⁸ Ве готареда әм пеһʹәсийан, ԝәки бона кәсед кӧ гӧмана ԝан жийина һәрһәйи сәр әʹрде йә, мәтʹәлока ми у бьзьна нишан дькә, кӧ әԝана гәрәке һьм ньһа һьм жи тәнгасийа мәзьнда Йаһоԝарʹа амьн бьминьн. Ԝи чахи, Иса ԝе бь һәԛи диԝана кәсед амьн бькә, у әԝана «ԝе жийина һʹәта-һʹәтайе бьстиньн» (Мәтта 25:46).

 ¹⁹ Ӧса жи мә дина хԝә да дӧ мәтʹәлока, кӧ илаһи бона кәсед бь рʹӧһʹ кʹьфшкьри керһати нә. Мәтʹәлока Исада дәрһәԛа дәһ ԛизед сәрԝахт у бефәʹм, пенщ ԛизьк сәрԝахт бун. Әԝана һазьр у һʹьшйар бун, һʹәта зәʹва һат. Ле ԛизед бефәʹм һазьр нибун. Ләма жи зәʹва изьн нәда, кӧ әԝана бькʹәвьнә щийе дәʹԝате. Гәләк фәрз ә кӧ әм жи бь сәбьр һивийе бьн, һʹәта кӧ Иса ве дьнйа хьраб ԛьрʹ кә. Хенщи ве йәке, мәтʹәлока Исада дәрһәԛа тәланта, мә дина хԝә да дӧ хӧламед амьн, йед кӧ хирәт у хәбатһʹәз бун. Әԝана бона ахайе хԝә бь хирәт хәбьтин, у аха жь ԝан рʹази бу. Ле хӧламе тʹәмбәл һатә инкʹаркьрьне. Жь ве йәке һин дьбьн, кӧ әм гәрәке һʹәта хьлазийе Йаһоԝарʹа хьзмәт кьн. Ӧса жи мә дит, ԝәки кәсед бь рʹӧһʹ кʹьфшкьри гәрәке һʹьшйар бьминьн, ԝәки Иса ԝана ԛәбул кә у хәлата әʹзмани бьдә ԝан. Паши шәрʹе Һармәгәдоне, әԝана ԝе бь симболик бьбьнә бука Бәрх, демәк Иса Мәсиһ (2 Тʹесалоники 2:1; Әʹйанти 19:9).

20. Мәрьвед кӧ гӧһ дьдьнә дәрсед жь мәтʹәлокед Иса, ԝе чь хәлате бьстиньн?

²⁰ Чьԛас дьчә, һаԛас әв рʹож незик дьбә кӧ Иса ԝе диԝана мәрьва бькә, ле әм гәрәке нәтьрсьн. Һәрге әм амьн бьминьн, Баве мәйи дьлован ԝе «зорайийа ԛәԝате» бьдә мә, ԝәки әм бькарьбьн «бәр Кӧрʹе инсен бьсәкьньн» (2 Корьнтʹи 4:7; Луԛа 21:36). Фьрԛи тʹӧнә гӧмана мә жийина һʹәта-һʹәтайе сәр әʹрде йә, йан сәр әʹзмана йә, әм гәрәке гӧһ бьдьнә дәрсед жь мәтʹәлокед Иса, ԝәки Йаһоԝа жь мә рʹази бә. Бь сайа кʹәрәма Йаһоԝа, наве мә ԝе кʹьтеба жийинеда бьминә (Данийел 12:1; Әʹйанти 3:5).