ГӘЛО тәрʹа чәтьн ә кӧ лекʹолина Кʹьтеба Пироз тʹьме дәрбаз ки у жь ве йәке ләзәте бьстини? Щара мә гьшкарʹа жи чәтьн ә. Ле һәла дәрһәԛа ван тьшта бьфькьрә, чь кӧ әм һәр рʹож дькьн. Мәсәлә, әм гәрәке һәр рʹож сәре хԝә бьшон. Бона ве йәке ԝәʹдә у хирәт лазьм ә, ле паши кӧ әм сәре хԝә дьшон, әм хԝә рʹьһʹәт тʹәхмин дькьн! Мина ве йәке, лекʹолина Кʹьтеба Пироз жи мә мина «аве» рʹьһʹәт дькә (Әфәси 5:26). Ԝәрә әм дина хԝә бьдьнә һьнә ширәтед керһати:

• Хԝәрʹа ԝәʹдә бьжберә. Лекʹолина Кʹьтеба Пироз йәк жь тьштед «һәрә ԛәнщ ә», чь кӧ әм гәрәке тʹьме бькьн (Филипи 1:10). Сәва кӧ тӧ тʹьме хԝә ль графика хԝә бьгьри, тӧ дькари ве графике бузханева бьзәльԛини йан жи щики дьнва дарда ки. Йан жи тӧ дькари бона лекʹолине сәр телефона хԝә ԝәʹдә кʹьфш ки, ԝәки бькә бира тә.

• Бона хԝә метода рʹаст бьжберә. Тӧ чь щурʹәйи һʹәз дьки лекʹолине дәрбаз ки? Дьԛәԝьмә тәрʹа дьһа дәст дьдә ԝәки сьһʹәтәке бона лекʹолине башԛә ки? Йан бона тә дьһа һеса йә, кӧ дьһа кем ԝәʹдә бона ве йәке хәрщ ки, мәсәлә ԝәкә 10 дәԛа, ле гәләк щар. Тӧ дьһа рʹьнд һаж дәрәща хԝә һәйи у ль гора ве йәке хԝәрʹа графике чекә. Ӧса жи паши кӧ тӧ дәстпеки лекʹолине бьки, дьбәкә әв йәк ӧса тә хԝәш бе, кӧ хԝәстьна тә пешда бе, ԝәки лекʹолине бәрдәԝам ки (Филипи 2:13).

• Тʹемайе пешда бьжберә. Һәрге тӧ ԝәʹде лекʹолине дәстпеки бьфькьри кӧ чь лекʹолин ки, дьбәкә тӧ нькарьби ‹дәст бьди бәр ԝәхт›, демәк ԝәʹде хԝә бадиһәԝа хәрщ ки (Әфәси 5:16). Дьһа баш нинә ԝәки тӧ пешда һазьр ки, кӧ кʹижан готаре йан тʹемайе тӧ дьхԝази лекʹолин ки? Гава пьрсәк бал тә пешда те, ве йәке хԝәрʹа бьньвисә. Хьлазийа һәр лекʹолине, тӧ дьԛәԝьмә һьнә фькьред дьн жи хԝәрʹа бьньвиси, йед кӧ тӧ дьхԝази паше лекʹолин ки.

• Һәрге лазьм бә, гӧһастьна бькә. Тьште һәри фәрз нә әв ә кӧ тӧ кʹәнге, чьԛас йан чь лекʹолин дьки, ле әв ә кӧ тӧ ве йәке тʹьме бьки. Ләма жи һәрге лазьм бә, һазьр бә кӧ графика хԝәда гӧһастьна бьки.

Лекʹолина кӧ мәрьв тʹьме дәрбаз дькә бь рʹасти жи кʹарәкә мәзьн тинә. Лекʹолина Кʹьтеба Пироз али мә дькә дьһа незики Йаһоԝа бьн, бь билани сафикьрьна бькьн у рʹӧһʹанида бьшьдьн (Йешу 1:8).