1-2. Әм дькарьн жь алийе кʹева рʹасти нәһәԛийе бен?

 ЩАРӘКЕ Иса сәрһатийа жьнәбике гьли кьр, йа кӧ бәрдәԝам дькьр жь һʹакьмәки һәԛийе бьхԝазә. Шагьртед Иса бе шьк һʹале ве жьнәбийе рʹьнд фәʹм дькьрьн, чьмки һьнге мәрьв гәләк щара рʹасти нәһәԛийе дьһатьн (Луԛа 18:1-5). Әв мәсәлә бона мә жи фәрз ә, чьмки әм жи щарна рʹасти нәһәԛийе тен.

² Иро мәрьв фьрԛийе дькьнә ортʹа һәв, у дьнйа бь нәһәԛийе у зорбәтийе тʹьжә йә, ләма жи әм әʹщебмайи наминьн гава жь алийе кәсед кӧ Йаһоԝа нас накьн, рʹасти нәһәԛийе тен (Ԝаиз 5:8). Ле гава хушк йан бьрак нәһәԛийе ль мә дькә, әм әʹщебмайи дьминьн. Хушк-бьред мә дьжмьнед рʹастийе ниньн. Проблем тʹәне ве йәкеда нә, кӧ әԝана мәрьвнә гӧнәкʹар ьн. Гәло әм чь гәрәке бькьн гава рʹасти дәрәщәкә ӧса бен? Ԝәрен әм дина хԝә бьдьне, кӧ чаԝа Иса бәр нәһәԛийе сәбьр дькьр у чаԝа әм дькарьн чʹәʹв бьдьнә ԝи. Һәрге әм бәр нәһәԛийа ве дьнйайе сәбьр дькьн, гәло нәлазьм ә ԝәки әм һьндава хушк-бьра жи бь сәбьр бьн? Гава әм жь алийе кәсед кӧ Йаһоԝа нас накьн, йан жь алийе хушк-бьра рʹасти нәһәԛийе тен, Йаһоԝа чаԝа сәр ве йәке дьньһерʹә? Гәло әԝ дькʹәвә һʹәйра мә?

3. Йаһоԝа ча дьньһерʹә сәр ве йәке, гава әм рʹасти нәһәԛийе тен?

³ Гава әм рʹасти нәһәԛийе тен, Йаһоԝа әʹщьз дьбә, чьмки әԝ рʹастийе у һәԛийе һʹәз дькә (Зәбур 37:28). Чаԝа кӧ Иса готьбу, ԝәʹде рʹастда Йаһоԝа ԝе һәԛийе вәгәрʹинә (Луԛа 18:7, 8). Зутьрәке әԝе һʹәму зьрара кӧ мә дитийә, бьдә һьлдане у ԝе ида нәһелә кӧ әм диса рʹасти нәһәԛийе бен (Зәбур 72:1, 2).

4. Иро Йаһоԝа ча али мә дькә?

⁴ Һʹәта Йаһоԝа һәԛийе вәгәрʹинә, Әԝ ида ньһа али  мә дькә, кӧ әм бәр нәһәԛийе сәбьр кьн (2 Пәтрус 3:13). Мәсәлә, әԝ мә һин дькә, ԝәки әм рʹуйе нәһәԛийа кӧ һьндава мәда һатийә кьрьне, тьштәки нәбаш нәкьн, ԝәки һʹале мә дьһа хьраб нәбә. Бь сайа Кʹьтеба Пироз Йаһоԝа мәрʹа нишан дькә, ԝәки Иса чь дькьр, кӧ бәр нәһәԛийе сәбьр кә. Ӧса жи әԝ мәрʹа ширәтед керһати дьдә, йед кӧ әм дькарьн бьдьнә хәбате, гава һьндава мәда нәһәԛи те кьрьне.

ХԜӘ РʹАСТ БЬДӘ КʹЬФШЕ ГАВА РʹАСТИ НӘҺӘԚИЙЕ ТЕЙИ

5. Чьрʹа әм гәрәке фәсал бьн гава рʹасти нәһәԛийе тен?

⁵ Дьбәкә әм жи гәләк әʹщьз у дьлтәнг дьбьн гава рʹасти нәһәԛийе тен (Ԝаиз 7:7). Мәсәлә, Ибо у Һәбаԛуԛ жи хԝә ӧса тʹәхмин дькьрьн (Ибо 6:2, 3; Һәбаԛуԛ 1:1-3). Һәрге әм жи щарна хԝә ӧса тʹәхмин дькьн әв тьштәки нормал ә, ле диса жи әм гәрәке фәсал бьн, ԝәки тьштәки нәрʹаст нәкьн, гава рʹасти нәһәԛийе тен.

6. Әм жь сәрһатийа Абшалом чь һин дьбьн? (Бьньһерʹә ӧса жи шькьл.)

⁶ Гава кәсәк һьндава мә, йан жи һьндава мәрьвед мәйи һʹәзкьри нәһәԛийе дькә, дьԛәԝьмә әм бьхԝазьн һʹәйфе һьлдьн. Ле һәрге әм ӧса бькьн, дәрәщә дькарә дьһа хьраб бә. Ԝәрен әм сәрһатийа Абшалом бькьнә бира хԝә. Гава хушка ԝи Тʹамар алийе кӧрʹе баве хԝә, Амнон, һатә хьрабкьрьне, Абшалом гәләк һерс кʹәт. Ль гора Ԛануна Муса, Амнон гәрәке сәва суще хԝә бьһата кӧштьне (Ԛануна Кʹаһинтийе 20:17). Һәмьки нормал бу кӧ Абшалом һерс кʹәт, ле изьна ԝи тʹӧнә бу, ԝәки бьре хԝә бькӧжә (2 Самуйел 13:20-23, 28, 29).

7. Зәбурбеж чаԝа хԝә да кʹьфше, гава нәһәԛи дит?

⁷ Щарна ӧса те кʹьфше, ԝәки кәсед кӧ нәһәԛийе ль мә дькьн, бе щәзакьрьне дьминьн. Дьԛәԝьмә жь бо ве йәке пьрс щәм мә пешда бе, һәла бь рʹасти һежа йә, ԝәки әм диса жи бәрдәԝам кьн тьштед рʹаст бькьн. Ԝәʹде бәре, зәбурбеж дьдит, кӧ мәрьвед баш рʹасти нәһәԛийе тен, ле кәсед кӧ нәһәԛи дькьрьн бәхтәԝар дьһатьнә кʹьфше. Әԝи гот: «Йед хьраб, һәргав рʹьһʹәт ьн» (Зәбур 73:12, ИМ). Гава әԝи нәһәԛи дьдит, әԝ гәләк әʹщьз бу у фькьри кӧ ида нәһежа йә Йаһоԝарʹа хьзмәт кә. Әԝи  гот: «Һьнге әз фькьрим кӧ ве йәке фәʹм бькьм, ле әв йәк сәр мьн гьран рʹуньшт» (Зәбур 73:14, 16). Әв йәк чаԝа сәр ԝи һʹӧкӧм дькьр? Әԝи гот: «Һьндьк мабу әз жь рʹе бькʹәтама у мук мабу гавед мьн бьшьмьтийана» (Зәбур 73:2). Тьштәки ви щурʹәйи һатә сәре бьраки мә жи, бь наве Алберто. a

8. Нәһәԛийе чаԝа сәр бьраки һʹӧкӧм кьр?

⁸ Алберто бь нәһәԛи һатә сущдаркьрьне, ԝәки йанчь әԝи пʹәре щьвате дьзибу. Ләма жи әԝи щабдарийед хԝә ӧнда кьр, у щьватеда гәләк кәсед кӧ әв йәк бьһистьн, ида ԛәдьре ԝи нәдьгьртьн. Әԝ дьбежә: «Әз хәмгин, һерс у бечʹарә бум». Хәмгинийа ԝи сәр һәләԛәтийа ԝи тʹәви Йаһоԝа жи һʹӧкӧм бу, у пенщ сала әԝ нәдьчу щьвата. Әв сәрһати нишан дькә, кӧ чь дькарә бьԛәԝьмә, һәрге әм жь бо нәһәԛике бь зедәйи һерс кʹәвьн.

ҺӘԚИЙЕДА ЧʹӘʹВ БЬДӘ ИСА

9. Иса рʹасти чь нәһәԛийа дьһат? (Бьньһерʹә ӧса жи шькьл.)

⁹ Иса мәсәләкә баш һишт ве йәкеда, кӧ чаԝа бәр нәһәԛийе сәбьр кьн. Бинә бира хԝә кӧ әԝи һьм алийе малбәта хԝәда,  һьм жи алийе кәсед дьнда чьԛас нәһәԛи дьдит. Мәрьвед ԝи дьготьн кӧ әԝ дин буйә, сәрԝеред религи дьготьн ԝәки әԝ щьна кʹәтийә, у әскәред Рʹомайи ԛәрфед хԝә ԝи дькьрьн у ле дьхьстьн. Паше жи ԝана әԝ кӧшт (Маркос 3:21, 22; 14:55; 15:16-20, 35-37). Диса жи Иса сәбьр дькьр у һʹәйфе жь ԝан һьлнәдьда. Гәло әм жь мәсәла ԝи чь дькарьн һин бьн?

10. Иса бәр нәһәԛийе чаԝа сәбьр дькьр? (1 Пәтрус 2:21-23)

¹⁰ Бьхунә 1 Пәтрус 2:21-23. b Гава әм рʹасти нәһәԛийе тен, ԝәрен әм мина Иса һәрәкʹәт бькьн. Әԝи рʹьнд заньбу, кӧ гәрәке кʹәнге хәбәр нәдә у кʹәнге хәбәр дә (Мәтта 26:62-64). Әԝи щаб нәдьда сәр һʹәму щурʹә дәрәԝа, кӧ мьԛабьли ԝи дьһатә готьне (Мәтта 11:19). Иса хәбәрдана хԝәда ньфьрʹ ль ԝан мәрьва нәдькьр, йед кӧ зӧлми ль ԝи дькьрьн у нә жи ԝана дьда тьрсандьне. Иса тʹьме хәбәрдана хԝә контрол дькьр, чьмки әԝи «хԝә спартьбу һʹакьме» кӧ бь рʹастийе диԝане дькә. Әԝи заньбу ԝәки тьште һәри фәрз әв ә, кӧ Йаһоԝа сәр ԝан тьшта ча дьньһерʹә, у әԝ баԝәр бу кӧ ԝәʹде рʹастда, Әԝе нәһәԛийе бьдә һьлдане.

11. Әм чаԝа дькарьн мьԛати гьлийед хԝә бьн? (Бьньһерʹә ӧса жи шькьл.)

¹¹ Гава нәһәԛи ль мә те кьрьне, ԝәрен әм мина Иса мьԛати гьлийед хԝә бьн. Һьнә нәһәԛи һаԛас мәзьн ниньн у дьбәкә мәрʹа чәтьн нинә чʹәʹве хԝә сәр ве йәке бьгьрьн. Йан жи дьбәкә әм дәнге хԝә нәкьн, ԝәки дәрәще дьһа хьраб нәкьн (Ԝаиз 3:7; Аԛуб 1:19, 20). Ле щарна дьбәкә лазьм ә,  кӧ әм кәсәки бьпʹарезьн, йе кӧ рʹасти нәһәԛийе һатийә, йан жи лазьм бә кӧ әм бь хәбәрдана хԝә пьштгьрийа рʹастийе бькьн (Кʹаред Шандийа 6:1, 2). Һәрге жи лазьм бә кӧ әм тьштәки бежьн, ԝәрен әм һәр тьшти бькьн, кӧ рʹьһʹәт у бь ԛәдьр хәбәр дьн (1 Пәтрус 3:15). c

12. Әм ча дькарьн хԝә бьсперьнә Йаһоԝа?

¹² Ԝәрә әм жи мина Иса хԝә бьсперьн Хԝәде, йе кӧ бь һәԛийе диԝане дькә. Гава кәсед дьн дәрһәԛа мә нәрʹаст дьфькьрьн йан нәһәԛийе ль мә дькьн, әм баԝәр ьн кӧ Йаһоԝа рʹастийе занә. Әв йәк али мә дькә кӧ әм сәбьр кьн, чьмки әм заньн ԝәки рʹожед хьлазийа ве дьнйайе, Йаһоԝа ԝе һәр тьшти рʹаст кә. Һәрге әм һәр тьшти бьдьнә дәсте Йаһоԝа, һерс у хәйд ԝе дьле мәда мәзьн нәбьн. Жь бо ве йәке һʹалхԝәшийа мә ԝе хьраб нәбә, әв йәк ԝе нәбә сәбәб ԝәки әм тьштәки нәрʹаст бькьн, у зийане нәдьнә һәләԛәтийа хԝә тʹәви Йаһоԝа (Зәбур 37:8).

13. Чь дькарә али мә бькә, кӧ әм бәр нәһәԛийе сәбьр кьн?

¹³ Һәмьки әм нькарьн бь тʹәмами чʹәʹв бьдьнә Иса у мина ԝи һәрәкʹәт бькьн. Щарна дьбәкә әм һьнә тьшта бежьн йан бькьн у паше пʹошман бьн (Аԛуб 3:2). Ӧса жи һьнә нәһәԛи, йед кӧ һьндава мәда тенә кьрьне, дькарьн бьбьнә сәбәбе еш у дәрдед гьран, йед кӧ ԝе һʹәта хьлазийа ве дьнйа хьраб дәрбаз нәбьн. Һәрге ӧса бә, баԝәр бә кӧ Йаһоԝа дәрдед тә занә. Һьм жи Иса һʹале тә рʹьнд фәʹм дькә, чьмки әԝ хԝәха жи рʹасти нәһәԛийе дьһат (Ибрани 4:15, 16). Хенщи мәсәла Исайә беԛьсур, Йаһоԝа ӧса жи ширәта дьдә мә, ԝәки әм бькарьбьн бәр нәһәԛийе сәбьр кьн. Ԝәрә әм дина хԝә бьдьнә дӧ рʹезед жь кʹьтеба Рʹомайи.

«ЩИ БЬДЬНӘ ҺЕРСА ХԜӘДЕ»

14. Чь те һʹәсабе «щи бьдьнә һерса Хԝәде»? (Рʹомайи 12:19)

¹⁴ Бьхунә Рʹомайи 12:19. Паԝлосе шанди Мәсиһийарʹа готьбу, ԝәки әԝана «щи бьдьнә һерса Хԝәде». Әв те һʹәсабе кӧ әм гәрәке һивийе бьн, һʹәта кӧ әԝ ль гора ԛьрара хԝә у ԝәʹде рʹастда һәԛийе вәгәрʹинә. Гава бьраки бь наве Щон рʹасти нәһәԛийе һат, әԝи гот: «Мьнрʹа лазьм бу һерса хԝә контрол кьм, сәва кӧ тьштед нәрʹаст нәкьм, ле әв йәк һеса нибу. Рʹомайи 12:19 али мьн кьр, ԝәки әз һивийа Йаһоԝа бьм».

15. Чьрʹа дьһа баш ә, кӧ әм һивийе бьн һʹәта Йаһоԝа дәрәще сафи кә?

¹⁵ Кәсед кӧ дьфькьрьн, ԝәки хԝәха чәтьнайике сафи кьн, гәләк щара дькʹәвьнә стресе. Ләма жи бона мә дьһа баш ә, кӧ әм һивийе бьн һʹәта Йаһоԝа проблема мә сафи кә. Йаһоԝа ча бежи мәрʹа ӧса дьбежә: «Әве нәһәԛийе бьдә дәсте мьн, әзе һәр тьшти сафи кьм». Чь жи һәбә, Йаһоԝа ԝе хԝәйе созе хԝә бә. Әве йәке али бьре мә Щон кьрийә, ԝәки сәбьр кә. Әԝ дьбежә: «Һәрге әз һивийа Йаһоԝа бьм, әԝе проблема мьн бь щурʹе һәри баш сафи кә».

«БЬ ԚӘНЩИЙЕ ТӦ СӘР ХЬРАБИЙЕ КʹӘВӘ»

16-17. Дӧакьрьн чаԝа дькарә али мә бькә, кӧ әм ‹бь ԛәнщийе сәр хьрабийе› кʹәвьн? (Рʹомайи 12:21)

¹⁶ Бьхунә Рʹомайи 12:21. Ӧса жи, Паԝлосе шанди хушк-бьрарʹа готьбу ԝәки әԝана «бь ԛәнщийе . . . сәр хьрабийе» кʹәвьн. Ԝәʹде Готара сәр Чʹийе, Иса ӧса готьбу: «Дьжмьнед хԝә һʹәз бькьн, у бона ԝан дӧа бькьн, йед кӧ  пәй ԝә дькʹәвьн» (Мәтта 5:44). Әԝи хԝәха жи һәма ӧса кьр. Һәла бьдә бәр чʹәʹве хԝә, кӧ гава әскәред Рʹомайи Иса сәр даре мьх дькьрьн, әԝи чьԛас еш дькʹьшанд. Тьштед кӧ һатьнә сәре ԝи, нәһәԛийа гәләк мәзьн бу!

¹⁷ Иса амьни у һʹәзкьрьна хԝә һьндава Йаһоԝада хԝәй кьр һәла һе һьнге жи, гава гәләк чәрчьри. Дәԝса кӧ әԝ ньфьрʹа ль ԝан әскәра бькә, әԝи ӧса дӧа кьр: «Баво, бьбахшинә ԝан, чьмки әԝана ньзаньн чь дькьн» (Луԛа 23:34). Дӧакьрьна дәрһәԛа кәсед кӧ нәһәԛийе ль мә дькьн, дькарә һерса мә дайнә. Дӧайед ӧса дькарьн һәла һе жи бьбьнә сәбәб, ԝәки ньһерʹандьна мә дәрһәԛа мәрьвед кӧ дьле мә ешандьнә, бьгӧһезә.

18. Дӧакьрьне чаԝа али Алберто у Щон кьр, ԝәки бәр нәһәԛийе сәбьр кьн?

¹⁸ Дӧакьрьне али бьред мә Алберто у Щон кьр, ԝәки әԝана бәр нәһәԛийа сәбьр кьн. Алберто дьбежә: «Мьн дӧа дькьр бона ԝан бьра, йед кӧ һьмбәри мьн нәһәԛи кьрьбун. Ӧса жи мьн чәнд щара жь Йаһоԝа аликʹари дьхԝәст, ԝәки әз жь бо нәһәԛийа кӧ һатә сәре мьн, һерсе жь дьле хԝә дәрхьм». Иро Алберто диса жи бь амьни Йаһоԝарʹа хьзмәт дькә. Щон дьбежә: «Мьн гәләк щара сәва бьре кӧ дьле мьн ешандьбу, дӧа дькьр. Дӧакьрьне али мьн кьр, ԝәки әз бьбахшиньмә ԝи. Йаһоԝа али мьн кьр һерс нәкʹәвьм сәр бьре хԝә у ԝи сущдар нәкьм. Хенщи ԝе йәке, бь сайа ԝан дӧа әʹдьлайи кʹәтә дьле мьн».

19. Һʹәта хьлазийа ве дьнйа хьраб, әм гәрәке чь бькьн? (1 Пәтрус 3:8, 9)

¹⁹ Әм ньзаньн кӧ һʹәта хьлазийа ве дьнйа хьраб, әме диса рʹасти чь нәһәԛийа бен. Ле чь жи бьбә, ԝәрен әм һәртʹьм дӧа бькьн, ԝәки Йаһоԝа али мә бькә. Ӧса жи гава әм рʹасти нәһәԛийе тен, ԝәрен әм мина Иса һәрәкʹәт бькьн у хԝә ль принсипед Кʹьтеба Пироз бьгьрьн. Һәрге әм ӧса бькьн, Йаһоԝа ԝе мә кʹәрәм кә (Бьхунә 1 Пәтрус 3:8, 9).