Паул: Мәһа Мьждаре, сала 1985, әм бона кʹьфшкьрьна хԝәйә пешьн дәрбази Либәрйайе бун, Африкайа Рʹоавайе, у әм гәләк ша бун! Тәйарә ль Сәнәгале сәкьни, у Ене ӧса гот: «Сьһʹәтәк шунда, әме бьгьһижьнә Либәрйайе!» Ле һьнге әʹламәти һат кӧ Либәрйайеда, тʹәвльһәвбунәкә һьмбәри сәрԝеред дәԝләте чебуйә у ләма жи тәйарә нькарә бьфьрʹә ԝедәре. Әм дәһ рʹожа Сәнәгаледа щәм һьнә мьзгинванед мисйонер ман. Мә нучәйада бьһист кӧ ль Либәрйайеда гәләк мәрьв һатьнә кӧштьне, у сәрԝеред дәԝләте изьн нәдьдан кӧ мәрьв шәв дәркʹәвьнә дәрва. Һәр кәсе кӧ гӧрʹа сәрԝера нәдькьр, дьһатә кӧштьне!

Ен: Әм мәрьвнә ӧса ньн, кӧ һәр тьштида гәләк фәсал ьн. Һәла һе жь зарʹотийеда мьнрʹа дьбежьн «Ена Тьрсонәк». Һәла һе чахе әз рʹе жи дәрбаз дьбьм, тьрс дькʹәвә дьле мьн! Ле диса жи мә гәләк дьхԝәст һәрʹьнә Либәрйайе.

Паул: Әз у Ен, әм ль рʹоавайа Инглистане һатьнә буйине. Малед мә гәләк незики һәв бун. Де-баве мьн у дийа Ене әм һелан дькьрьн кӧ әм бьбьнә пешәнг, ләма жи мә паши хьлазкьрьна мәкʹтәбе дәстпекьр ча пешәнг хьзмәт кьн. Бона ве йәке, де-баве мә гәләки ша бун. Гава әз 19 сали бум, мьн дәстпекьр Бәйтʹәледа хьзмәт кьм. Паши кӧ әм сала 1982-да зәԝьщин, Ен жи һатә Бәйтʹәле.

Ен: Мә хьзмәтийа Бәйтʹәледа гәләк һʹәз дькьр, ле мә тʹьме дьхԝәст һәрʹьн щики ӧса, кʹидәре кӧ һʹәԝщәтийа мьзгинвана һәбу. Бәйтʹәледа һьнә хушк-бьред мә бәре мисйонер бун. У мәсәла ԝан хԝәстьна мә дьһа зедә кьр, кӧ әм жи бьбьнә мисйонер. Се сала мә һәр евар бона ве йәке дӧа дькьр. У чахе сала 1985-да мә тʹәглифи кʹома 79, йа Мәкʹтәба Гиләде кьрьн, шабуна ньгед мә әʹрд нәдьгьрт! Паши хьлазкьрьна Гиләде, тʹәшкиләте әм шандьн Либәрйайе, Африкайа Рʹоавайе.

Паул: Гава рʹе вәбу, әм дәрберʹа пе тәйаре чунә Либәрйайе. Ԝедәре мәрьв гәләк дьтьрсийан, у һәла һе изьн тʹӧнә бу кӧ мәрьв шәв дәркʹәтана дәрва. Щарна гава әʹрәбә дәнг дәрдьхьстьн, мәрьв дьтьрсийан у  дьрʹәвийан. Сәва кӧ дьле мә рʹьһʹәт буйа, мә һәр евара кʹьтеба Зәбур дьхԝәнд. Ԝи ԝәлатида һʹале мә чьԛас зәʹмәт бу жи, диса жи мә щабдарийа хԝә гәләки һʹәз дькьр. Ен һәр рʹож дьчу хьзмәтийе, у мьн жи Бәйтʹәледа хьзмәт дькьр. Һәвалкʹаре мьн Щон Чарук бу. Жь бәр кӧ әԝ гәләк сал Либәрйайеда дьжит у һʹале хушк-бьра рʹьнд заньбу, әз жь ԝи гәләк тьшт һин бум.

Ен: Бь сайа хушк-бьра, мә щабдарийа хԝәйә Либәрйайеда гәләк һʹәз дькьр. Баԝәрийа ԝан гәләк ԛәԝи бу у әԝана гәләк дьлгәрм бун. Әм гәләки ԝанва һатьнә гьредане у әԝана бунә малбәта мә. Ширәтед ԝанә баш әм баԝәрийеда ԛәԝи дькьрьн. Бәлакьрьна мьзгинийе гәләк һеса бу. Гава лазьм дьбу кӧ әм жь хԝәйе мале хатьре хԝә бьхԝазьн, әԝана дьхәйидин! Һәр дәра мәрьва дәрһәԛа Кʹьтеба Пироз хәбәр дьда у гәләк һеса бу тʹәви ԝан бькʹәтана хәбәрдане. Һаԛас хԝәндәкʹаред мә һәбун, кӧ ԝәʹде мә тʹера һәр кәси нәдькьр. Мә ԝәʹдәки гәләк хԝәш дәрбаз дькьр!

Паул: Чар сала Либәрйайеда әʹдьлайи һәбу. Ле сала 1989 һӧндӧрʹе ԝәлатда шәрʹ дәстпебу. Сала 1990, 2 Тирмәһе, әскәра щийед дәр-доре Бәйтʹәле зәфт кьрьн. Се мәһа мәщал тʹӧнә бу кӧ әм жь Бәйтʹәле дәркʹәтана, мә нә дькарьбу малбәтед хԝә бьдита, нә жи офиса сәрәкә. Ԝәлат бе сәрԝер мабу, хәлайи дәстпебу, у гәләк жьн һатьнә хьрабкьрьне. Тʹәвльһәвбун тʹәмамийа Либәрйайеда бәла бу у 14 сала кʹьшанд.

Ен: Мәрьвед жь бәрәкәки мьԛабьли бәрәкәкә дьн дәрдькʹәтьн у һәвдӧ дькӧштьн. Бал әскәра гәләк чʹәк һәбун у ԝана кʹьнщед әʹщеб ль хԝә дькьрьн у һʹәму кʹучʹада малед хәлԛе тʹалан дькьрьн. Бона һьнә кәса, кӧштьна мәрьва ӧса һеса бу, кӧ ча бежи ԝана «сәре мьришкәке» сәржедькьр. Щьнйазе гәләк мәрьва бәр синор сәр һәвда ԛучʹ кьрьбун. Тьштед ӧса незики Бәйтʹәле жи һәбун. Сәд һʹәйф кӧ һьнә хушк-бьред мә жи һатьнә кӧштьне, у нав ԝанда дӧ мьзгинванед мисйонер жи һәбун.

Һьнә кәса әʹмьре хԝә дькьрьнә бьн хофе, сәва кӧ хушк-бьред жь бәрәкәкә дьн бьпʹарезьн. Мьзгинванед мисйонер у Бәйтʹәлвана жи ӧса дькьр. Бәйтʹәледа һьнә хушк-бьра сәр ԛате жере у һьнәк жи одед мәйә сәр ԛатед жоре дьман. Һʹәфт хушк-бьра ода мәда дьман.

Паул: Һәр рʹож әскәра һәр тьшт дькьрьн, ԝәки бькʹәвьнә Бәйтʹәле. Ԝана дьхԝәст  бьвиньн һәла әм кәсед дьн теда вәдьшерьн, йан на. Чар нобәдаред мә һәбун. Дӧ кәса жь пʹәнщәре дьньһерʹин у дӧ кәс жи дьчунә бәр дәргәһ. Гава кәсед бәр дәргәһ дәстед хԝә пешийа хԝә дьгьртьн, мә фәʹм дькьр, кӧ һәр тьшт баш ә. Ле гава ԝана дәстед хԝә ль пьшт хԝә дьгьртьн, мә фәʹм дькьр кӧ әскәр һерс кʹәтьнә. Һьнге кәсед ль бәр пʹәнщәре хушк-бьра зу вәдьшартьн.

Ен: Гәләк һʹәфте шунда, кʹомәкә әскәра зоре кʹәтьнә Бәйтʹәле. Әз у хушкәкә дьн, әм кʹәтьнә һʹәмаме, у мә дәри кʹьлит кьр. Һʹәмамеда дәхләкә бь дәрики вәшарти һәбу. Хушка мә хԝә теда вәшарт. Әскәр бь чʹәкед хԝә пәй мьн һатьнә ԛате жоре. Әԝана һерскʹәти бун у дәре һʹәмаме хьстьн. Паул хԝәст рʹийа ԝан бьгьрә, у ӧса гот: «Жьна мьн һʹәмамеда йә!» Чахе мьн хушк дәхледа вәдьшарт дәнг дәрдькʹәт у һʹәта мьн дараке дәхле пашда тʹьжә дькьр, әв йәк һьнә ԝәʹдә кʹьшанд, ләма жи тьрсәкә ӧса мәзьн кʹәтә дьле мьн, кӧ тʹәмамийа бәдәна мьн дьләрьзи. Лазьм бу кӧ әз рʹьһʹәт бьм у дәре һʹәмаме вәкьм, ле чь щурʹәйи? Мьн Йаһоԝарʹа дӧа кьр, у әԝи али мьн кьр. Мьн дәри вәкьр у бь дьләки рʹьһʹәт сьлав да ԝан. Әскәрәки әз дәʹф дам, кʹәтә һӧндӧрʹ у һәр тьшт һәв хьстьн, ле әԝи тʹӧ тьшт нәдит. Әԝ у әскәред дьн дәрбази одед дьн жи бун, ле ԝедәре жи ԝана тьштәк нәдит.

Паул: Чәнд мәһа хԝарьна мә гәләк һьндьк бу, ле тʹер-тʹьжә хԝарьна мәйә рʹӧһʹани һәбу. Щарна тәʹште тʹӧнә бу кӧ мә бьхԝара, ле ԛӧльхкьрьна шәбәԛе мина тәʹштейа рʹӧһʹани бу. Әв йәк ԛәԝатәкә мәзьн дьда мә.

Һәрге әм дәркʹәтана, кӧ хԝәрʹа ав у хԝарьне бькʹьрʹьн, әме мәщбур буна ԝәки хушк-бьред кӧ хԝә Бәйтʹәледа вәдьшартьн, тʹәне бьһельн. Гәләк щара Йаһоԝа тьштед кӧ мәрʹа лазьм бун бь кʹәрәмәти дьда мә. Йаһоԝа мә дьбу хԝәйи у али мә дькьр ԝәки әм дьлрʹьһʹәт бьминьн.

Һʹале ԝәлет чьԛас хьраб дьбу жи, рʹонайа рʹастийе ԛәԝат у һеви дьда мә. Диса у диса лазьм бу кӧ хушк у бьра бьрʹәвьн, ле баԝәрийа ԝан ԛәԝи бу у ԝана рʹьһʹәти хԝәй дькьр. Гәләка дьгот кӧ әв һʹале чәтьн ԝана бона тәнгасийа мәзьн һазьр дькә. Рʹуспийед щьвате у бьред щаһьл бь дьләки ԛәԝи аликʹари дьданә хушк-бьра. Хушк-бьред кӧ мәщбур бун бьрʹәвьн, тʹәвайи дьман у бәрдәԝам дькьрьн мьзгинийе бәла кьн. Ԝана мешәда бона ԛӧльхкьрьне щи чедькьрьн у щьват дәрбаз дькьрьн. Ԝи ԝәʹде чәтьнда, хушк-бьра жь щьвата у жь бәлакьрьна мьзгинийе ԛәԝат у һелан дьстандьн. Чахе мә хԝарьн, кʹьнщ у тьштед дьн хушк-бьрарʹа бәла дькьр, һьнә хушк у бьра нә кӧ кʹьнщ, ле чәнтʹед бона хьзмәтийе дьхԝәстьн. Кәсед  кӧ гәләк тьштед хьраб дитьбун, һазьр бун гӧһ бьдьнә мьзгинийе. Әԝана әʹщебмайи дьман кӧ Шәʹдед Йаһоԝа һʹаләки ӧса хьрабда чьԛас бәхтәԝар ьн. Рʹонайа хушк-бьра тәʹрийеда шәԝԛ дьда (Мәтта 5:14-16). Жь бо хирәта хушк-бьра, һьнә әскәред зордар жи бунә Шәʹдед Йаһоԝа.

Паул: Щарна лазьм дьбу кӧ әм жь ԝәлет дәркʹәвьн, се щара сәр ԝәхтәки кьн у дӧ щара сәр саләке. Хушкәкә мисйонер ӧса гот: «Гиләдеда мәрʹа готьбун, кӧ әм гәрәке бь тʹәмамийа дьле хԝә хушк-бьра һʹәз бькьн, у мә жи ӧса кьр. Ижа гава мә хатьре хԝә жь ԝан дьхԝәст, әм гәләк хәмгин дьбун». Ле диса жи мәщала мә һәбу, кӧ жь ԝәлатед дьнва аликʹарийе бьдьнә хушк-бьред Либәрйайеда.

Ен: Мәһа Гӧлане, сала 1996, әм тʹәви дӧ кәсед дьн бь әʹрәба Бәйтʹәле рʹе кʹәтьн. Әʹрәбеда тʹьжи документед фәрз һәбун дәрһәԛа хьзмәтийа Либәрйайеда. Мә хԝәст дәрбази алийе дьнә бажер бьбьн, чьмки һʹале ԝедәре дьһа бехоф бу, әв щи ԝәкә 16 километра дур бу. Ле ньшкева әскәра һʹьщуми сәр мә кьрьн. Ԝана гӧлә бәри һәԝайе дан, әм данә сәкьнандьне у әм жь әʹрәбе дәрхьстьн, ле Паул һе һӧндӧрʹе әʹрәбеда бу. Әм гәләк тьрсийан. Ньшкева Паул бәрбь мәва һат. Сәр әʹнийа ԝи хун һәбу. Пешийе әм фькьрин кӧ сәре ԝи гӧлә кьрьнә, ле паше мә фәʹм кьр, кӧ һәрге ӧса буйа, әԝе нькарьбуйа бьмәшә. Сәре ԝи хун бьбу, чьмки гава әскәр әԝ жь әʹрәбе авит, әԝи лехьстьбу. Шькьр кӧ әԝ гәләк бьриндар нәбу.

Мә әʹрәбәкә әскәред ԝәлет дит, кʹидәреда тʹьжи мәрьв бун. Мә жи хԝәст бькʹәвьнә ве әʹрәбе, ле теда щи тʹӧнә бу. Ләма жи мә хԝә әʹрәбева гьрт. Әʹрәбә ӧса ләз дьчу, кӧ һьндьк мабу әм бькʹәвьн. Мә жь ажован рʹәща кьр кӧ әԝ бьсәкьнә, ле әԝ гәләк дьтьрсийа у нәсәкьни. Чьԛас зор бу жи йәкә мә хԝә ль әʹрәбева гьртьбу. Гава әʹрәбә гьһиштә щи, әм һаԛас ԝәстийайи бун, кӧ дәст-ньгед мә дьләрьзин.

Паул: Хенщи кʹьнщед мәйә чʹьрʹанди, дәсте мәда тʹӧ тьшт нәмабу. Мә баԝәр нәдькьр кӧ әм һе сах ьн! Шәв әм бәр фьрʹьндәкә гӧләкьри рʹазан, бь кʹижане сьбәтьре әм фьрʹийанә Сиерра-Леоне. Әм ша бун кӧ әм сах ман, ле әм бона хушк-бьред Либәрйайеда бәр хԝә дькʹәтьн.

Ен: Гава әм гьһиштьнә Бәйтʹәла Сиерра-Леоне, әм ида бехофийеда бун, у хушк-бьра мә дьбунә хԝәйи. Ле щарна ньшкева биранинед хьраб дькʹәтьнә сәре мьн. Рʹож әз гәләк дьтьрсийам у сәре мьн геж дьбу. Шәв әз ньшкева жь тьрсәкә мәзьн һʹьшйар дьбум у худанәкә сар сәр мьнрʹа давит. Паул әз һʹәмез дькьрьм у тʹәви мьн дӧа дькьр. Һʹәта кӧ әз рʹьһʹәт дьбум, мә тʹәвайи кʹьламед бона пәсьндайина Йаһоԝа дьстьра. Әз дьфькьрим кӧ әз дин дьбьм у ида нькарьм хьзмәтийа хԝә ча мисйонер бәрдәԝам кьм.

Ле паше тьштәки баш ԛәԝьми. Әз ве йәке ԛә бир накьм. Ве һʹәфтийе дӧ журналед тʹәзә кʹәтьнә дәсте мә. Журнала Һʹьшйар Бьн!, йа 8 Һʹәзиране, сала 1996. Ве журналеда готарәк һәбу бь наве «Әз Ча Дькарьм Һьмбәри Атакед Панике Сәбьр кьм?». Бь аликʹарийа ве готаре, мьн һʹале хԝә фәʹм кьр. Готара дьн Бьрща Ԛәрәԝьлийеда, йа 15 Гӧлане, сала 1996 дәркʹәт, бь наве «Әԝана жь Кʹӧ Ԛәԝате Дьстиньн?». Теда шькьле пʹьрʹпʹьрʹикәкә бьриндар һәбу. Һәрге пʹәрʹед ԝан бьриндар бьн жи, әԝана дькарьн бьфьрʹьн у хԝарьне бьхԝьн. Һәма бь ви щурʹәйи, әм жи дькарьн бь аликʹарийа рʹӧһʹе пироз бь дьләки бьриндар сәр ньга бьсәкьньн у али кәсед дьн жи бькьн. Бь сайа ван готара Йаһоԝа ԝәхта рʹастда ԛәԝат да мьн (Мәтта 24:45). Дәрһәԛа ве тʹемайе, мьн готаред дьн жи дьгәрʹийа у тʹоп дькьр. Ԝәʹдә шунда әз ида һаԛас жь биранинед хьраб нәдьчәрчьрим.

Паул: Һәр щар гава мәщал дькʹәтә дәсте мә, кӧ әм вәгәрʹьн Либәрйайе, әм гәләк ша дьбун. Хьлазийа сала 2004, әм ида ԝәкә 20  сал ве кʹьфшкьрьнеда бун. Шәрʹ жи ида хьлаз бьбу. Бона авайед Бәйтʹәле планед тʹәзә һәбун. Ле ве дәме мә ньшкева кʹьфшкьрьнәкә тʹәзә станд.

Әв йәк бона мә гәләк зәʹмәт бу, чьмки мә хушк-бьра һʹәз дькьр, у мә нәдьхԝәст жь ԝан дур кʹәвьн. Ле гава мә сафи кьр, ԝәки һәрʹьн Мәкʹтәба Гиләде у жь малбәтед хԝә дур бьн, мә дит кӧ Йаһоԝа ча али мә дькә. Ләма жи мә кʹьфшкьрьна тʹәзә ԛәбул кьр у әм чунә Ганайе.

Ен: Гава әм жь Либәрйайе дәркʹәтьн, әм гәләки гьрийан. Ле бьраки әʹмьрда мәзьн у билан, ӧса гот: «Һун гәрәке мә бир кьн! Әм заньн кӧ һун мә һʹәз дькьн, ле чьмки кʹьфшкьрьна ԝә жь Йаһоԝа йә, һун гәрәке ида бь дьл у щан дина хԝә бьдьнә ве йәке, у хушк-бьред ль Ганайе һʹәз кьн». Ганайеда мә тʹӧ кәс нас нәдькьр у һәр тьшт бона мә тʹәзә бу, ле гьлийед ԝи бьрайи дьле мә ԛәԝи кьр.

Паул: Гәләк ԝәʹдә дәрбаз нәбу, кӧ мә хушк-бьред ль Ганайе гәләк һʹәз кьр. Ԝедәре гәләк мьзгинван һәбун! Әм жь амьни у баԝәрийа ԝан гәләк тьшт һин бун. Мә 13 сала ль Ганайе хьзмәт кьр. Паши ве йәке мә диса кʹьфшкьрьнәкә тʹәзә станд. Әм шандьнә филиала Африкайа Рʹоһьлате, йа кӧ ль Кәнйайе йә. Рʹаст ә, мә бира хушк-бьред ль Гана у Либәрйайе дькьр, ле мә хушк-бьред ль Кәнйайе дәрберʹа һʹәз кьр. Кәнйайеда шьхӧл гәләк ә у һʹәта иро жи әм ль вьр ьн.

Ен: Әʹмьре хԝәда әз рʹасти гәләк чәтьнайа һатьмә. Тьштед ӧса дькарьн сьһʹәт-ԛәԝате сьст кьн. Йаһоԝа нә һәр тʹьм мә жь дәрәщед ӧса дьпʹарезә. Гава әз дәнге чʹәк дьбьһем, еш дькʹәвә дьле мьн у дәстед мьн сьст дьбьн. Ле әз һин бумә, кӧ хԝә бьсперьм аликʹарийа Йаһоԝа у хушк-бьра. Һәрге әм бәрдәԝам кьн лекʹолин кьн, дӧа бькьн у һәрʹьн щьвата, Йаһоԝа дькарә али мә бькә, кӧ әм кʹьфшкьрьна хԝәда бьминьн.

Паул: Һьнә кәс ӧса дьпьрсьн: «Гәло тӧ кʹьфшкьрьна хԝә һʹәз дьки?» Рʹаст ә һьнә ԝәлат бәдәԝ ьн, ле щарна һʹале ԝәлатәки дькарә бе гӧһастьне. Ләма жи әм дьһа зедә нә кӧ ԝәлата, ле хушк-бьред хԝәйә дәлал һʹәз дькьн. Кʹок у култура мә чьԛас жь һәв щӧдә бә жи, әм гьшк Йаһоԝа һʹәз дькьн. Нета мә әв бу, кӧ әм дьле ԝан ԛәԝи кьн, ле бь рʹасти ԝана дьле мә ԛәԝи дькьр.

Малбәта мәйә рʹӧһʹани бь рʹасти жи кʹәрәмәта жь Йаһоԝа йә! Һәр щар чахе әм мала хԝә бар дькьн, әм ве йәкеда избат дьбьн. Һʹәта кӧ әм пʹара щьвате нә, әм бехԝәйи ниньн. Чь жи бьбә, һәрге әм хԝә бьсперьн Йаһоԝа, әԝе ԛәԝата кӧ мәрʹа лазьм ә бьдә мә (Филипи 4:13).