ГОТАРА БОНА ҺИНБУНЕ 35
КʹЬЛАМА 123 Пәй Рʹебәрийа Тʹәшкиләта Хԝәде Дьчьн
Аликʹарийа бона Ԝан, Йед кӧ жь Щьвате Һатьнә Дәрхьстьне
«Ль әʹзмен бона гӧнәкʹарәки кӧ тʹобә дькә, ԝе шабунәкә һе мәзьн бә, нә кӧ бона 99 кәсед рʹаст, кʹижанарʹа тʹобәкьрьн нәлазьм ә» (ЛУԚА 15:7).
ВЕ ГОТАРЕДА
Әме бьвиньн кӧ чьрʹа лазьм ә, ԝәки һьнә кәс жь щьвате бенә дәрхьстьне у рʹуспи ча дькарьн али ԝан бькьн, кӧ әԝана тʹобә кьн, у диса ԛәбулкьрьна Йаһоԝа бьстиньн.
1-2. (а) Йаһоԝа сәр кәсед кӧ гӧнед гьран дькьн ле тʹобә накьн, чаԝа дьньһерʹә? (б) Гӧмана Йаһоԝа һәйә кӧ гӧнәкʹар чь бькьн?
ЙАҺОԜА чʹәʹве хԝә сәр һәр тьшти данадә, у әԝ гӧнә нәфрʹәт дькә (Зәбур 5:4-6). Әԝ дьхԝазә кӧ әм ԛәдьре ԛанунед ԝи бьгьрьн, йед кӧ Кʹьтеба Пирозда ньвисар ьн. Һәмьки Йаһоԝа занә кӧ әм ԛьсурдар ьн у әм нькарьн бекемаси бьн (Зәбур 130:3, 4). Алийе дьнва жи, әԝ чʹәʹве хԝә данадә сәр ве йәке, гава мәрьвед хьраб «бьн наве кʹәрәма Хԝәде» бенамусийе у тьштед мьрʹдарʹ дькьн (Щьһуда 4). Ләма жи Кʹьтеба Пироз дьбежә ԝәки кәсед «нәпʹак», кӧ гӧрʹа Хԝәде накьн, ԝе шәрʹе Һармәгәдонеда бенә ԛьрʹкьрьне (2 Пәтрус 3:7; Әʹйанти 16:16).
2 Ле Йаһоԝа нахԝазә кӧ кәсәк бьмьрә. Чаԝа мә готаред дьнда шеԝьр кьрьбу, Кʹьтеба Пироз әшкәрә дьбежә кӧ Йаһоԝа «дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9). Мина Йаһоԝа, рʹуспийед щьвате жи бь сәбьр али гӧнәкʹара дькьн, ԝәки әԝана бенә гӧһастьне у тʹәзәда незики Йаһоԝа бьн. Ле һьнә гӧнәкʹар тʹобә накьн (Ишайа 6:9). Рʹуспи чьԛас жи чь дәсте ԝан те дькьн, ԝәки али ԝан бькьн, ле йәкә һьнә кәс тʹәрка гӧнәкьрьне надьн у тʹобә накьн. Ԝи чахи гәло рʹуспи гәрәке чь бькьн?
«ЙЕ ХЬРАБ ЖЬ НАВА ХԜӘ ДӘРХЬН»
3. (а) Һәрге кәсәк тʹобә накә, рʹуспи гәрәке чь бькьн? (б) Чьрʹа әм дькарьн бежьн ԝәки кәсе гӧнәкʹар хԝәха дьжберә кӧ жь щьвате бе дәрхьстьне?
3 Һәрге кәсәк бона гӧне хԝәйи гьран тʹобә нәкә, лазьм ә кӧ рʹуспи ль гора ве рʹебәрийа жь 1 Корьнтʹи 5:13 бькьн: «Йе хьраб жь нава хԝә дәрхьн». Аликива, кәсе гӧнәкʹар хԝәха хԝә дькә ви һʹали у ахьрийа ӧса дьстинә. Бь рʹасти жи, әԝи чь чандийә, әԝ ԝе жи дьдьру (Галати 6:7). Әм чьрʹа ӧса дьбежьн? Чьмки рʹуспийа чьԛас дәсте ԝан дьһат али ԝи дькьрьн, ле әԝи аликʹарийа ԝан ԛәбул нәкьр у тʹобә нәкьр (2 Пʹадшати 17:12-15). Кьред ԝи нишан дькьн кӧ әԝ нахԝазә ль гора ԛанунед Йаһоԝа бьжи (Ԛануна Дӧщари 30:19, 20).
4. Гава кәсәки кӧ гӧне хԝә тʹобә накә, жь щьвате те дәрхьстьне, чьрʹа щьватеда әʹламәти те кьрьне?
4 Гава гӧнәкʹарәки кӧ тʹобә накә жь щьвате те дәрхьстьне, әʹламәти те кьрьне, ԝәки щьват бьзаньбә кӧ әԝ ида Шәʹде Йаһоԝа нинә. Нета ве әʹламәтийе әв нинә кӧ кәсе гӧнәкʹар ньмьз кә. Мәʹни әв ә, ԝәки хушк-бьра бьзаньбьн кӧ әԝана гәрәке ида тʹәви ԝи һәвалтийе нәкьн у «һʹәта нен жи нәхԝьн» (1 Корьнтʹи 5:9-11). Чьрʹа гәрәке щьват ӧса бькә? Паԝлосе шанди ньвиси: «Һьнәк һәвиртьрʹшк тʹәмамийа шкәве һьлтинә» (1 Корьнтʹи 5:6). Һәрге кәсед кӧ тʹобә накьн, жь щьвате нәйенә дәрхьстьне, йед дьн дькарьн бьфькьрьн, кӧ әʹсәйи нинә ԝәки хԝә ль ԛанунед Йаһоԝа бьгьрьн (Мәтʹәлок 13:20; 1 Корьнтʹи 15:33).
5. Әм гәрәке сәр кәсәки кӧ жь щьвате һатийә дәрхьстьне чаԝа бьньһерʹьн, у чьрʹа?
5 Ԝәки ӧса нә, әм гәрәке сәр кәсәки кӧ жь щьвате һатийә дәрхьстьне чаԝа бьньһерʹьн? Рʹаст ә әм тʹәви ԝи ида һәвалтийе накьн, ле әм гәрәке нәфькьрьн кӧ һʹале ԝи ида бечʹарә йә. Дәԝсе әм гәрәке ԝи һʹәсаб кьн ча пәза ӧндабуйи. Пәза кӧ жь ахле пез дур кʹәтийә у рʹийа хԝә ӧнда кьрийә, дькарә вәгәрʹә. Бир нәкьн, кӧ пәза ӧндабуйи сонд хԝарьбу кӧ әԝе ль гора хԝәстьна Йаһоԝа бьжи. Ньһа әԝ ль гора сонда хԝә нажи, у әв йәк һʹаләки хоф ә (Һәзәԛел 18:31). Диса жи, һәрге Йаһоԝа һе һазьр ә рʹәʹме һьндава ԝида бьдә кʹьфше, гӧман һәйә кӧ әԝе вәгәрʹә. Ԝәки ӧса нә, рʹуспи чаԝа дькарьн али ԝи кәси бькьн, йе кӧ жь щьвате һатийә дәрхьстьне?
РʹУСПИ ЧАԜА АЛИ ԜАН ДЬКЬН, ЙЕД КӦ ЖЬ ЩЬВАТЕ ҺАТЬНӘ ДӘРХЬСТЬНЕ?
6. Рʹуспи ча али ԝан дькьн, йед кӧ жь щьвате һатьнә дәрхьстьне?
6 Мәрьве кӧ жь щьвате һатийә дәрхьстьне, гәло әԝ һатийә һиштьне у мәщбур ә кӧ хԝәха бе аликʹари вәгәрʹә бал Йаһоԝа? Һәмьки на. Гава рʹуспи ԝи кәсирʹа йе кӧ тʹобә накә, дьбежьн ԝәки әԝе жь щьвате бе дәрхьстьне, әԝана ӧса жи жерʹа шьровәдькьн кӧ әԝ дькарә чь бькә, ԝәки диса вәгәрʹә щьвате. Ле тʹәне әԝ нинә. Гәләк дәрәщада рʹуспи ԝе ԝи кәсирʹа бежьн, кӧ чәнд мәһ шунда әԝана дьхԝазьн диса тʹәви ԝи хәбәр дьн, ԝәки тедәрхьн һәла әԝи ньһерʹандьна хԝә гӧһастийә йан на. Һәрге кәсе гӧнәкʹар ԛәбул кә кӧ диса тʹәви рʹуспийа хәбәр дә, әԝана ԝе ԝәʹде сәрледане бь һʹәзкьрьн ле һелан кьн, ԝәки әԝ гӧне хԝә бинә рʹуйе хԝә у вәгәрʹә. Һәрге әԝ һе ньһерʹандьна хԝә нәгӧһезә жи, рʹуспи ԝе хирәт кьн, ԝәки паше жи щар-щара диса рʹасти ԝи бен.
7. Паши кӧ кәсәк жь щьвате һатийә дәрхьстьне, рʹуспи ча чʹәʹв дьдьнә дьлшәԝатийа Йаһоԝа? (Йерәмйа 3:12)
7 Рʹуспи хирәт дькьн ԝәки чʹәʹв бьдьнә дьлшәԝатийа Йаһоԝа һьндава кәсе кӧ жь щьвате һатийә дәрхьстьне. Мәсәлә, гава мьләте Исраеле жь рʹийа Хԝәде дәрдькʹәт, Йаһоԝа һивийе нибу һʹәта әԝана хԝәха гава пешьн бавежьн у вәгәрʹьн щәм ԝи. Һʹәта кӧ ԝана тʹобә кьра жи, Йаһоԝа һазьр бу али ԝан бькә. Готара дӧда йа ве журналеда мә шеԝьр кьрьбу, кӧ Йаһоԝа чаԝа Һосәйа пʹехәмбәррʹа готьбу, ԝәки әԝ тʹәви жьна хԝә диса ль һәв бе. Һьнге жьна ԝи һе гӧне гьран дькьр у тʹобә нәкьрьбу. Бь сайа ве мәсәле Йаһоԝа нишан кьр, кӧ әԝ чьԛас дьлрʹәʹм у дьлшәԝат ә (Һосәйа 3:1; Малахи 3:7). Мина Йаһоԝа, рʹуспийед щьвате жи жь дьл дьхԝазьн ԝәки кәсе гӧнәкʹар вәгәрʹә, у әԝана нахԝазьн рʹийа ԝи чәтьн кьн кӧ әԝ вәгәрʹә щәм Йаһоԝа (Бьхунә Йерәмйа 3:12).
8. Мәтʹәлока дәрһәԛа кӧрʹе ӧндабуйи чаԝа рʹәʹм у дьлшәԝатийа Йаһоԝада әʹйан дькә? (Луԛа 15:7)
8 Биньн бира хԝә мәтʹәлока кӧрʹе ӧндабуйи, йа кӧ мә готара дӧда йа ве журналеда шеԝьр кьрьбу. Гава бав кӧрʹе хԝә дит, йе кӧ вәдьгәрʹийа мале, әԝ «бь ләз чу пешийа ԝи, әԝ һʹәмез кьр у пачʹ кьр» (Луԛа 15:20). Дина хԝә бьдьне кӧ бав һивийе нибу һʹәта кӧрʹе ԝи бахшандьне жь ԝи бьхԝазә. Әԝ бавәки бь һʹәзкьрьн бу, ләма жи әԝи гава пешьн авит. Рʹуспи жи гәрәке һьндава кәсед кӧ жь рʹийа рʹаст дур кʹәтьнә, ӧса бьн. Әԝана дьхԝазьн кӧ пәзед ӧндабуйи «вәгәрʹьн мале» (Луԛа 15:22-24, 32). Гава гӧнәкʹарәк вәдьгәрʹә, Йаһоԝа, Иса, мәләк у тʹәмамийа щьвате гәләк ша дьбьн! (Бьхунә Луԛа 15:7)
9. Йаһоԝа дьхԝазә ԝәки кәсед кӧ гӧнә дькьн, чь бькьн?
9 Бәле, әм пеһʹәсийан кӧ Йаһоԝа наһелә ԝәки кәсед кӧ гӧнед хԝә тʹобә накьн, щьватеда бьминьн. Ле әԝ найе һʹәсабе кӧ әԝ пьшта хԝә дьдә ԝан мәрьва. Әԝ дьхԝазә ԝәки әԝана вәгәрʹьн щәм ԝи. Дина хԝә бьдьнә һәстед Йаһоԝа һьндава мәрьвед кӧ тʹобә дькьн: «Әзе нәамьнийа ԝан ԛәнщ кьм. Әзе ԝана жь дьл һʹәз бькьм, чьмки һерса мьн дәрбаз буйә» (Һосәйа 14:4, ДТʹ). Әԝ йәк дәрс ә бона рʹуспийа кӧ чʹәʹв бьдьнә Йаһоԝа, у һәла һе нишанед бьчʹук жи, кӧ әԝ дьхԝазә тʹобә кә, ԝида бьвиньн. У әв гьлийед Йаһоԝа ӧса жи кәсе гӧнәкʹаррʹа избат дькьн, кӧ Йаһоԝа ԝи һʹәз дькә у дьхԝазә ԝәки әԝ зу вәгәрʹә щәм ԝи.
10-11. Рʹуспи ча дькарьн али ԝан бькьн, йед кӧ ида гәләк сал ә жь щьвате дәрхьсти нә?
10 Ле гәло рʹуспи чаԝа дькарьн али ԝан бькьн, йед кӧ ида гәләк сал ә жь щьвате һатьнә дәрхьстьне? Дьбәкә ԝана ида тʹәрка ԝи гӧнәйи дайә, жь бо кʹижани жь щьвате һатьнә дәрхьстьне. Һәла һе дьбәкә ԝана бир кьрийә жи, кӧ рʹуйе чьда жь щьвате һатьбунә дәрхьстьне. Фьрԛи тʹӧнә чьԛас ԝәхт дәрбаз буйә, йәкә рʹуспи ԝе һәр тьшти бькьн, ԝәки ԝан мәрьва бьвиньн у тʹәсәлийа ԝан бькьн. Гава рʹуспи рʹасти кәсәки ӧса бен, әԝана ԝе жерʹа бежьн кӧ тʹәвайи дӧа кьн, у ԝе ле һелан кьн ԝәки вәгәрʹә щьвате. Ле һәрге кәсәк ида гәләк сал ә жь щьвате дур кʹәтийә, фәʹмдари йә кӧ әԝ рʹӧһʹанида гәләк сьст буйә. Дьбәкә лазьм ә ԝәки әԝ Йаһоԝа тʹәзәда нас кә у Кʹьтеба Пироз тʹәзәда лекʹолин кә. Ләма жи һәрге әԝ бежә кӧ дьхԝазә вәгәрʹә щьвате, рʹуспи дькарьн организә кьн, ԝәки кәсәк тʹәви ԝи һинбуна Кʹьтеба Пироз дәстпекә, һәрге жи әԝ һе жь щьвате дәрхьсти йә. Ван дәрәщада рʹуспи гәрәке организә кьн, ԝәки тʹәви кәсед ӧса һинбуна Кʹьтеба Пироз бе дәрбазкьрьне.
11 Бәле, рʹәʹма Йаһоԝа гәләк мәзьн ә, у рʹуспи дьхԝазьн ве йәкеда чʹәʹв бьдьнә ԝи, кӧ али ԝан бькьн, йед кӧ жь щьвате һатьнә дәрхьстьне. Бьра әԝ кәс бьзаньбьн, ԝәки дәри бәр ԝан вәкьри йә у әԝана дькарьн вәгәрʹьнә щьвате. Һәрге кәсәк тʹобә дькә у тʹәрка рʹийа хьраб дьдә, әԝ дькарә щьватеда зу бе ԛәбулкьрьне (2 Корьнтʹи 2:6-8).
12. (а) Илаһи кʹәнге лазьм ә кӧ рʹуспи фәсал бьн? (б) Чьрʹа гәрәке әм нәфькьрьн кӧ һьнә гӧнәкʹар нькарьн алийе Йаһоԝада бенә бахшандьне? (Ӧса жи бьньһерʹә спартьн.)
12 Һьнә дәрәщада рʹуспи гәрәке фәсал бьн пешийа кӧ кәсәки диса щьватеда ԛәбул кьн. Мәсәлә, һәрге кәсәк һьндава зарʹе зорбәти кьрийә, йан рʹабәр бу, йан жи мьхәнәти кьрийә, ԝәки жь зәԝаща хԝә аза бә, рʹуспи гәрәке тедәрхьн у избат бьн, һәла әԝи бь рʹасти тʹобә кьрийә йан на (Малахи 2:14; 2 Тимотʹейо 3:6). Рʹуспи гәрәке кәри, демәк щьвате бьпʹарезьн. Ле ӧса жи әԝана гәрәке фәʹм бькьн кӧ һәрге кәсәк жь дьл тʹобә бькә у тʹәрка гӧнәкьрьне бьдә, Йаһоԝа һазьр ә ԝи диса ԛәбул кә. Рʹаст ә лазьм ә кӧ рʹуспи фәсал бьн һьндава гӧнәкʹаре кӧ хьраби йан мьхәнәти кәсәки кьрийә, ле диса жи әԝана гәрәке нәфькьрьн кӧ гӧнәкʹаред ӧса ԝе тʹӧ щар рʹәʹма Йаһоԝа нәстиньн a (1 Пәтрус 2:10).
ЩЬВАТ ДЬКАРӘ ЧЬ БЬКӘ?
13. Әм хԝә ча дьдьнә кʹьфше һьндава кәсе кӧ һатийә леһьлатьне у кәсе кӧ жь щьвате һатийә дәрхьстьне?
13 Чаԝа мә готара пешийа ԝеда дит, һәрге бе әʹламкьрьне кӧ кәсәк һатийә леһьлатьне, әм һәләԛәтийа хԝә тʹәви ԝи набьрʹьн, чьмки әм заньн кӧ әԝи тʹобә кьрийә у тʹәрка гӧнәкьрьне дайә (1 Тимотʹейо 5:20). Әԝ һе пʹара щьвате йә, у һʹәԝще һелана хушк-бьра йә (Ибрани 10:24, 25). Ле һʹале кәсәки кӧ жь щьвате һатийә дәрхьстьне щурʹәки майин ә. Әм гәрәке ида тʹәви йе ӧса һәвалтийе нәкьн, «һʹәта нен жи нәхԝьн» (1 Корьнтʹи 5:11).
14. Мәсиһи ль гора исафа хԝә дькарьн чь сафи кьн? (Бьньһерʹә ӧса жи шькьл.)
14 Гәло әв йәк те һʹәсабе кӧ һәрге кәсәк жь щьвате һатьбә дәрхьстьне, гәрәке әм жь ԝи бь тʹәмами бьрʹәвьн? На. Һәмьки әм гәрәке перʹа һәвалтийе нәкьн. Ле Мәсиһи дькарьн ль гора исафа хԝә, йа кӧ сәр һʹиме Кʹьтеба Пироз һатийә һинкьрьне, сафи кьн кӧ кәсе жь щьвате дәрхьсти, йе кӧ дьбәкә мәрьве ԝан ә йан һәвале ԝан бу, тʹәглифи сәр щьвате кьн. Һәрге әԝ бе, гәрәке әм чь бькьн? Бәре мә сьлав нәдьда кәсед ӧса. Ле ньһа мә ида фәʹм кьрийә, кӧ гәрәке һәр Мәсиһи ль гора исафа хԝә, йа кӧ сәр һʹиме Кʹьтеба Пироз һатийә һинкьрьне, хԝәха сафи кә чь бькә. Чахе йе жь щьвате дәрхьсти те щьвате, һьнә кәс дьбәкә сафи кьн, кӧ сьлаве бьдьнә ԝи йан һьнә гьлийед дьлгәрми жерʹа бежьн. Ле гәрәке әм дьреж жерʹа хәбәр нәдьн у тʹәви ԝи ԝәʹдә дәрбаз нәкьн.
Мәсиһи дькарьн ль гора исафа хԝә, йа кӧ сәр һʹиме Кʹьтеба Пироз һатийә һинкьрьне, сафи кьн ԝәки йе жь щьвате дәрхьсти тʹәглифи щьвате кьн, йан жи сьлаве бьдьнә ԝи (Бьньһерʹә абзаса 14)
15. Гәло 2 Йуһʹәнна 9-11-да дәрһәԛа кʹижан гӧнәкʹара те готьне? (Бьньһерʹә чаргошә « Гәло Йуһʹәнна у Паԝлос Дәрһәԛа Гӧнәки Дьготьн?»)
15 Дьбәкә һьнә кәс жь хԝә бьпьрсьн: «Гәло Кʹьтеба Пироз набежә кӧ Мәсиһи, йе кӧ сьлаве дьдә кәсәки ӧса, ‹тʹәви кьред ԝийә хьраб дьбьн›?» (Бьхунә 2 Йуһʹәнна 9-11). Контекста 2 Йуһʹәнна нишан дькә, кӧ әв рʹебәри дәрһәԛа рʹабәра йә у дәрһәԛа ԝан, йед кӧ кәсед дьн жь рʹийа рʹаст дәрдьхьн (Әʹйанти 2:20). Ләма жи, һәрге кәсәк һинкьрьнед ԛәлп бәла дькә, йан кәсед дьн бәрбь кьред хьраб һелан дькә, рʹуспи ԝе тʹәсәлийа ԝи нәкьн. Һәмьки гӧман һәйә кӧ рʹожәке әԝе бе сәр һʹьше хԝә. Ле һʹәта һьнге, әме сьлаве нәдьнә ԝи у нә жи тʹәглифи щьвате кьн.
ДЬЛШӘԜАТИ У РʹӘʹМТИЙЕДА ЧʹӘʹВ БЬДЬНӘ ЙАҺОԜА
16-17. (а) Йаһоԝа дьхԝазә ԝәки кәсед гӧнәкʹар чь бькьн? (Һәзәԛел 18:32) (б) Рʹуспи чаԝа дькарьн бьдьнә кʹьфше, ԝәки әԝана тʹәви Йаһоԝа һәвкʹарийе дькьн?
16 Әм жь ван пенщ готара чь һин бун? Йаһоԝа нахԝазә кӧ кәсәк ԛьрʹ бә (Бьхунә Һәзәԛел 18:32). Әԝ дьхԝазә кӧ кәсед гӧнәкʹар диса һәләԛәтийа хԝә тʹәви ԝи баш кьн (2 Корьнтʹи 5:20). Ләма жи нава тʹәрихийеда Йаһоԝа тʹьме жь хьзмәткʹаред хԝә, йед кӧ жь ԝи дур кʹәтьнә, рʹәща кьрийә ԝәки әԝана тʹобә кьн у вәгәрʹьн бал ԝи. Рʹуспийарʹа ԛәдьрәки мәзьн һатийә дайине ԝәки тʹәви Йаһоԝа һәвкʹарийе бькьн у али ԝан мәрьва бькьн, йед кӧ гӧнә кьрьнә, ԝәки тʹобә кьн у вәгәрʹьн щьвате (Рʹомайи 2:4; 1 Корьнтʹи 3:9).
17 Дә бьдьнә бәр чʹәʹве хԝә, гава кәсед гӧнәкʹар тʹобә дькьн, сәр әʹзмен шабунәкә чьԛас мәзьн пешда те. Чахе пәзәкә ӧндабуйи вәдьгәрʹә щьвате, Йаһоԝа гәләк ша дьбә. Гава әм дьфькьрьн дәрһәԛа рʹәʹмти, дьлшәԝати у ԛәнщийа Йаһоԝа, һʹәзкьрьна мә һьндава ԝи һе мәзьн дьбә! (Луԛа 1:78)
КʹЬЛАМА 111 Мәʹнийа Шабуне
a Кʹьтеба Пирозда те готьне кӧ һьнә мәрьв ԝе тʹӧ щар нәйнә бахшандьне. Мәʹни әв нинә кӧ ԝана чь гӧнә кьрийә, ле әв ә, кӧ әԝана бь сәрһʹьшки бәрдәԝам дькьн мьԛабьли Хԝәде дәрен. Бәле, тʹәне Йаһоԝа у Иса дькарьн сафи кьн, кӧ кʹижан мәрьв һежайи бахшандьне ниньн (Маркос 3:29; Ибрани 10:26, 27).
