1. Чь дькарә бьԛәԝьмә, гава кәсәк гӧне гьран кьрийә?

 ГОТАРА пешийа веда мә дит, кӧ гава щьвата Корьнтʹеда гӧнәки гьран һатә кьрьне, Паԝлосе шанди чь рʹебәри да щьвате. Жь бәр кӧ мәрьве кӧ гӧнә кьрьбу тʹобә нәкьр, әԝ жь щьвате һатә дәрхьстьне. Ле чаԝа кӧ рʹеза сәрәкә йа ве готаре дьдә кʹьфше, Хԝәде дькарә али ԝи мәрьви бькә, йе кӧ гӧнәки гьран кьрийә, ԝәки әԝ тʹобә кә (Рʹомайи 2:4). Гәло рʹуспи ча дькарьн али кәсед ӧса бькьн, кӧ әԝана тʹобә кьн?

2-3. Һәрге әм педьһʹәсьн кӧ хушк йан бьраки гӧнәки гьран кьрийә, әм гәрәке чь бькьн, у чьрʹа?

² Сәва кӧ рʹуспи бькарьбьн али кәсәки бькьн, әԝана гәрәке бьзаньбьн кӧ чь ԛәԝьми йә. Ләма жи һәрге әм педьһʹәсьн кӧ хушк йан бьраки гӧнәки гьран кьрийә, демәк тьштәки кӧ дькарә бьбә сәбәб ԝәки әԝ жь щьвате бе дәрхьстьне, әм гәрәке чь бькьн? Бәри пешьн әм гәрәке ԝирʹа бежьн ԝәки әԝ жь рʹуспийа аликʹарийе бьхԝазә (Ишайа 1:18; Кʹаред Шандийа 20:28; 1 Пәтрус 5:2).

³ Ле һәрге кәсе кӧ гӧнә кьрийә нахԝазә тʹәви рʹуспийа хәбәр дә, ԝи чахи әм гәрәке чь бькьн? Әм гәрәке һәрʹьн бал рʹуспийа, ԝәки әԝана аликʹарийе бьдьнә кәсе гӧнәкʹар. Һәма әв ә һʹәзкьрьн, чьмки әм нахԝазьн ԝәки хушк йан бьре хԝә ӧнда кьн. Һәрге кәсе гӧнәкʹар тʹәрка кьре хԝәйә хьраб надә, һәләԛәтийа ԝи тʹәви Йаһоԝа ԝе дьһа хьраб бә. Ӧса жи, наве щьвате дькарә хьраб бә. Ләма һәрге мәрʹа чәтьн бә жи, әм гәрәке һәрʹьн бал рʹуспийа, чьмки әм һьм Йаһоԝа һьм жи кәсе кӧ гӧнә кьрийә һʹәз дькьн (Зәбур 27:14).

 РʹУСПИ ЧА АЛИ КӘСЕД КӦ ГӦНЕ ГЬРАН КЬРЬНӘ, ДЬКЬН?

4. Гава рʹуспи тʹәви кәсәки гӧнәкʹар хәбәр дьдьн, нета ԝан гәрәке чь бә?

⁴ Гава хушк йан бьрак гӧнәки гьран кьрийә, кʹома рʹуспийа жь се рʹуспийед щерʹьбанди комитейәке a саз дькьн, ԝәки әԝана рʹасти ви мәрьви бен. Әв рʹуспи гәрәке мьлук бьн. Рʹаст ә әԝана һәр тьшти дькьн, кӧ али ԝи кәси бькьн ԝәки әԝ тʹобә кә, диса жи әԝана зоре ԝи накьн кӧ әԝ хԝә рʹаст кә (Ԛануна Дӧщари 30:19). Рʹуспи заньн кӧ нә һʹәму мәрьв һазьр ьн мина Даԝьд Пʹадша тʹобә кьн (2 Самуйел 12:13). Һьнә кәсед кӧ гӧнә дькьн, ԛә нахԝазьн гӧһ бьдьнә ширәта Йаһоԝа (Дәстпебун 4:6-8). Диса жи рʹуспи чь жь дәсте ԝан те дькьн, ԝәки али кәсе гӧнәкʹар бькьн кӧ әԝ тʹобә кә. Гава рʹуспи тʹәви ԝи хәбәр дьдьн, әԝана гәрәке кʹижан принсипа бьдьнә хәбате?

5. Гава рʹуспи рʹасти кәсе гӧнәкʹар тен, әԝана гәрәке чь бир нәкьн? (2 Тимотʹейо 2:24-26) (Бьньһерʹә ӧса жи шькьл.)

⁵ Рʹуспи кәсе кӧ гӧнә кьрийә, һʹәсаб дькьн ча пәзәкә ԛимәт, кӧ ӧнда буйә (Луԛа 15:4, 6). Ләма жи әԝана гәрәке бь хәбәрдан у кьред хԝә һьндава ԝида сәрт у берʹәʹм нибьн. Хенщи ве йәке нета ԝан гәрәке әԝ нибә кӧ тʹәне пьрса бьдьнә ԝи у избатийа бьстиньн. Дәԝсе әԝана гәрәке ван һʹӧнӧра бьдьнә кʹьфше, йед кӧ 2 Тимотʹейо 2:24-26-да һатьнә ньвисаре (бьхунә). Рʹуспи дьхԝазьн али кәсе гӧнәкʹар бькьн, ԝәки әԝ ньһерʹандьна хԝә бьгӧһезә, ләма жи әԝана гәрәке һьндава ԝида рʹәʹм у мәʹрифәт бьн.

6. Пешийа кӧ рʹуспи рʹасти кәсед кӧ гӧнә кьрийә бен, әԝана гәрәке чь бькьн? (Рʹомайи 2:4)

⁶ Рʹуспи хԝә ль гора рʹебәрийа Йаһоԝа һазьр дькьн. Әԝана ван гьлийед Паԝлос бир накьн: «Ширьнайийа [ԛәнщийа, ДТʹ] Хԝәде тә дьбә бәрбь тʹобәкьрьне». У әԝана һәр тьшти дькьн ԝәки чʹәʹв бьдьнә Йаһоԝа, у һьндава кәсед кӧ гӧнә кьрьнә дьлован бьн (Бьхунә Рʹомайи 2:4). Рʹуспи шьван ьн у әԝана гәрәке ль гора рʹебәрийа Мәсиһ һәр тьшти бькьн у чʹәʹв бьдьнә ԝи, кӧ әԝ ча бона щьвате хәм дькә (Ишайа 11:3, 4; Мәтта 18:18-20). Пешийа кӧ рʹуспи рʹасти кәсе гӧнәкʹар бен, әԝана гәрәке дӧа бькьн, ԝәки бькарьбьн али ԝи бькьн кӧ әԝ тʹобә кә. Әԝана гәрәке Кʹьтеба Пироз у әʹдәбйәтед мә рʹьнд лекʹолин кьн у ӧса жи шеԝьр кьн, кӧ әԝана гәрәке чь дәрһәԛа ви мәрьви пебьһʹәсьн, ԝәки тедәрхьн чь сәр фькьр у ньһерʹандьна ԝи  һʹӧкӧм кьрийә, кӧ әԝи гавәкә ӧса авит (Мәтʹәлок 20:5).

7-8. Гава рʹуспи рʹасти кәсе гӧнәкʹар тен, әԝана ча дькарьн чʹәʹв бьдьнә сәбьра Йаһоԝа?

⁷ Рʹуспи чʹәʹв дьдьнә сәбьра Йаһоԝа. Әԝана гәрәке бир нәкьн кӧ Йаһоԝа һьндава гӧнәкʹарада чаԝа бу. Мәсәлә, Йаһоԝа бь сәбьр тʹәви Ԛайин хәбәр да у дина ԝи кʹьшандә сәр ве йәке, кӧ гӧнә ԝе ԝи бәрбь чь бьвә. Хенщи ве йәке, Йаһоԝа ԝирʹа гот, кӧ һәрге әԝ хԝә рʹаст кә, әԝе кʹәрәма бьстинә (Дәстпебун 4:6, 7). Йан жи сәрһатийа Даԝьд Пʹадша бьдә бәр чʹәʹве хԝә. Бь сайа Натʹан пʹехәмбәр, Йаһоԝа әԝ ширәт кьр. Ԝәʹде хәбәрдане Натʹан мәтʹәлокәк гот, кʹижане кӧ дьле Даԝьд гьрт (2 Самуйел 12:1-7). Ӧса жи гава мьләте Исраеле гӧрʹа Йаһоԝа нәдькьр, Йаһоԝа диса у диса пʹехәмбәр дьшандьн бал ԝан (Йерәмйа 7:24, 25). Дәԝса кӧ һивийе буйа һʹәта кӧ Исраели тʹобә кьн у паше али ԝан бькә, Йаһоԝа гава пешьн давит кӧ али ԝан бькә. Чахе ԝана һе гӧнә дькьр, әԝи ԝанрʹа дьгот кӧ тʹобә бькьн.

⁸ Гава рʹуспи һәр тьшти дькьн, ԝәки али кәсед кӧ гӧнед гьран кьрьнә, бькьн, әԝана гәрәке чʹәʹв бьдьнә Йаһоԝа. Ль гора 2 Тимотʹейо 4:2, әԝана гәрәке һьндава хушк йан бьраки гӧнәкʹар «бь тʹәмамийа сәбьре» бьн. Рʹуспи гәрәке һьндава кәсе гӧнәкʹар рʹьһʹәт у бь сәбьр бьн, ԝәки әԝ бьхԝазә ве йәке бькә, чь кӧ рʹаст ә. Һәрге рʹуспи һерс кʹәвьн, дьбәкә әԝ гӧһ нәдә ширәта ԝан у тʹобә нәкә.

9-10. Рʹуспи ча дькарьн али кәсе гӧнәкʹар бькьн, ԝәки әԝ дәрһәԛа сафикьрьн у кьред хԝә бьфькьрә?

⁹ Рʹуспи һәр тьшти дькьн ԝәки фәʹм кьн, кӧ чь бу мәʹни ԝәки мәрьв гӧнә кьр. Мәсәлә, чь бу мәʹни кӧ һәләԛәтийа ԝи тʹәви Йаһоԝа сьст бу? Гәло әԝи һинбуна шәхси дабу сәкьнандьне, йан жи нәдьчу хьзмәтийе? Гәло әԝ кʹәтьбу бьн һʹӧкӧме хԝәстьнед нәрʹаст? Гәло әԝ рʹәх һәвалед хьраб дькʹәт у ԝәʹдәдәрбазкьрьнед нәбаш дьжбарт? Әв бьжартьнед ԝийә нәбаш ча сәр фькьр у хԝәстьнед ԝи һʹӧкӧм кьрьнә? Гәло әԝ фәʹм дькә кӧ сафикьрьн у кьред ԝийә нәбаш дьле Баве ԝи, Йаһоԝа, ешандьнә?

¹⁰ Рʹуспи дькарьн пьрсед ӧса бьдьнә кәсе гӧнәкʹар, кʹижан кӧ ԝе али ԝи бькьн ԝәки әԝ фәʹм кә, кӧ достийа ԝи тʹәви Йаһоԝа чьрʹа сьст буйә у чьрʹа әԝи гӧнә кьр. Һәмьки әԝана гәрәке фәсал бьн, ԝәки пьрсед ӧса нәдьнә ԝи, чь кӧ ԝан накʹәвә (Мәтʹәлок 20:5). Ӧса жи чаԝа кӧ Натʹан бь сайа мәтʹәлоке тʹәви Даԝьд Пʹадша хәбәр да, рʹуспи жи дькарьн бь сайа мәсәла али кәсе гӧнәкʹар бькьн, ԝәки әԝ фәʹм кә ԝәки кьред ԝи чьԛас хьраб ьн. Дьбәкә ԝәʹде һәвдитьна пешьн тʹәви рʹуспийа, әԝ бона кьред хԝә пʹошман бә у һәла һе тʹобә кә жи.

11. Иса һьндава мәрьвед кӧ гӧнә дькьрьн, ча бу?

¹¹ Рʹуспи һәр тьшти дькьн, ԝәки чʹәʹв бьдьнә мәсәла Иса. Гава Иса тʹәви Шаԝуле жь Тарсусе хәбәр дьда, әԝи пьрси: «Шаԝул, Шаԝул! Тӧ чьма мьн дьзерини?» Бь ве пьрсе, Иса жерʹа да кʹьфше, ԝәки кьред ԝи нәрʹаст ьн (Кʹаред Шандийа 9:3-6). Ле чахе Иса бәʹса «Изабеле» кьр, әԝи гот: «Мьн ԝәхт да ԝе, ԝәки әԝ жь гӧнәкьрьне вәгәрʹә» (Әʹйанти 2:20, 21).

12-13. Рʹуспи ча дькарьн ԝәʹдә бьдьн кәсе гӧнәкʹар, ԝәки әԝ тʹобә кә? (Бьньһерʹә ӧса жи шькьл.)

¹² Мина Иса, рʹуспи гәрәке дәрберʹа нәфькьрьн, кӧ кәсе гӧнәкʹар нахԝазә тʹобә кә. Гава рʹуспи щара пешьн тʹәви кәсед гӧнәкʹар хәбәр дьдьн, һьнә мәрьв дәрберʹа тʹобә дькьн. Ле һьнәкарʹа жи дьһа зедә ԝәʹдә лазьм ә. Ләма жи  дьбәкә лазьм бә ԝәки рʹуспи чәнд щара рʹасти ԝи мәрьви бен. Паши һәвдитьна пешьн, дьбәкә кәсе гӧнәкʹар дәрһәԛа тьштед кӧ жерʹа һатьбунә готьне, кʹур бьфькьрә. Дьбәкә әԝ бь мьлукти Йаһоԝарʹа дӧа бькә (Зәбур 32:5; 38:18). Ԝәʹде һәвдитьнәкә дьн, дьԛәԝьмә ньһерʹандьна кәсе гӧнәкʹар ида бе гӧһастьне.

¹³ Сәва кӧ али кәсе гӧнәкʹар бькьн, ԝәки әԝ тʹобә кә, рʹуспи гәрәке һьндава ԝида дьлшәԝати у ԛәнщийе нишан кьн. Әԝана гәрәке гӧмана хԝә ԝи нәбьрʹьн у дӧа бькьн кӧ Йаһоԝа хирәта ԝан кʹәрәм кә, ԝәки кәсе гӧнәкʹар бе сәр һʹьше хԝә у тʹобә кә (2 Тимотʹейо 2:25, 26).

14. Кʹе бь рʹасти али кәсе гӧнәкʹар дькә, кӧ әԝ тʹобә кә? Әм чьрʹа ӧса дьбежьн?

¹⁴ Чахе кәсе гӧнәкʹар тʹобә дькә, әм гәләк ша дьбьн (Луԛа 15:7, 10). Ле гәло кʹе бь рʹасти али ԝи дькә ԝәки әԝ тʹобә кә? Биньн бира хԝә кӧ Паԝлос дәрһәԛа кәсед гӧнәкʹар чь ньвисибу: «Бәлки Хԝәде мәщале бьдә ԝан, кӧ жь гӧнәкьрьне вәгәрʹьн» (2 Тимотʹейо 2:25). Бәле, йе кӧ али Мәсиһики дькә, ԝәки әԝ ньһерʹандьн у фькьред хԝә рʹаст кә, Йаһоԝа йә. Паԝлос бәʹса һьнә тьштед баш дькьр, йед кӧ дькарьн бьԛәԝьмьн гава кәсәк тʹобә дькә: Кәсе гӧнәкʹар дькарә рʹастийе һе рʹьнд фәʹм бькә, бе сәр һʹьше хԝә у әԝ дькарә жь тʹәлькед Мире-щьна бьрʹәвә (2 Тимотʹейо 2:26).

15. Рʹуспи ча дькарьн али ԝи мәрьви бькьн, йе кӧ тʹобә кьрийә?

¹⁵ Һәрге гӧнәкʹарәк тʹобә бькә, рʹуспи ԝе бәрдәԝам кьн сәрледана ԝи бькьн, ԝәки баԝәрийа ԝи дьһа ԛәԝи бә у әԝ хԝә жь тʹәлькед Мире-щьна дур бьгьрә у гавед рʹаст бавежә (Ибрани 12:12, 13). Һәмьки рʹуспи тʹӧ кәсирʹа гьли накьн, кӧ кәсе гӧнәкʹар чь кьрийә. Ле дьбәкә щьватеда чь әʹламәти лазьм бә бе кьрьне?

«ЛЬ БӘР ҺʹӘМУЙА ЛЕ ҺЬЛЕ»

16. Ль гора 1 Тимотʹейо 5:20, чь те һʹәсабе гьлийе Паԝлос «бәр һʹәмуйа»?

¹⁶ Бьхунә 1 Тимотʹейо 5:20. Паԝлосе шанди әԝ йәк Тимотʹейойе рʹуспирʹа  ньвиси бу, ԝәки әԝ чь бькә һьндава кәсед кӧ «нава гӧнада дьминьн». Гәло әԝ гьлийед ԝи дьһатьнә һʹәсабе кӧ гәрәке бәр тʹәмамийа щьвате ԝи гӧнәкʹари һьлатана, демәк рʹаст кьрана? На. Чахе Паԝлос гот «бәр һʹәмуйа», әԝи дьхԝәст бьгота дәрһәԛа ԝан һʹәму мәрьва, йед кӧ һаж гӧнед ԝи һәбун. Дьбәкә ԝан мәрьва пе чʹәʹве хԝә гӧнед ви мәрьви дитьбун, йан жи хԝәха кәсе гӧнәкʹар дәрһәԛа кьред хԝә ԝанрʹа гьли кьрьбу. Рʹуспи гәрәке тʹәне ԝанрʹа бежьн кӧ әв проблем ида һатийә сафикьрьне у кәсе гӧнәкʹар һатийә ширәткьрьн у рʹасткьрьне.

17. Һәрге тʹәмамийа щьвате занә кӧ гӧнәки гьран һатийә кьрьне, йан жи щьват дьбәкә пебьһʹәсә кӧ чь ԛәԝьмийә, гәрәке чь әʹламәти бе кьрьне, у чьрʹа?

¹⁷ Щарна дьбәкә тʹәмамийа щьвате занә, кӧ гӧнәки гьран һатийә кьрьне, йан жи тʹәмамийа щьвате дьбәкә пебьһʹәсә кӧ чь ԛәԝьмийә. Һәрге ӧса бә, готьна «һʹәмуйа» те һʹәсабе тʹәмамийа щьвате. Һьнге рʹуспик гәрәке әʹлам кә, ԝәки хушк йан бьре гӧнәкʹар һатийә леһьлатьне. Гәло чьрʹа? Чаԝа Паԝлосе шанди готьбу, «ԝәки йед майин жи бьтьрсьн», демәк гӧнә нәкьн.

18. Һәрге щаһьләки ньхӧманди кӧ жь 18 сали бьчʹуктьр ә, гӧнәки гьран кьрийә, гәрәке рʹуспи чь бькьн? (Бьньһерʹә ӧса жи шькьл.)

¹⁸ Һәрге щаһьләки ньхӧманди, йе кӧ жь 18 сали бьчʹуктьр ә, гӧнәки гьран кьрьбә, кʹома рʹуспийа гәрәке дӧ рʹуспийа бьшинә, ԝәки тʹәви ԝи у де-баве b ԝийә баԝәрмәнд хәбәр дьн. Рʹуспи гәрәке тедәрхьн һәла де-бав алийе хԝәда  чь кьрьнә, кӧ али зарʹа хԝә бькьн ԝәки әԝ тʹобә кә. Һәрге щаһьл гӧһ дьдә ширәткьрьна де-баве хԝә у хԝә рʹаст дькә, дӧ рʹуспи дькарьн сафи кьн кӧ әве пьрсе ида дадьн. Рʹуспи заньн кӧ Хԝәде щабдарийа ширәткьрьна зарʹа дайә де-бава (Ԛануна Дӧщари 6:6, 7; Мәтʹәлок 6:20; 22:6; Әфәси 6:2-4). Паши ве йәке, рʹуспи гәрәке щар-щара тʹәви де-баве ԝи текли бьн, ԝәки баԝәр бьн кӧ зарʹ аликʹарийе дьстинә. Алийе дьнва жи, һәрге щаһьләки ньхӧманди тʹобә накә у тʹәрка хьрабийе надә, комитейәкә рʹуспийа гәрәке тʹоп бьн тʹәви ԝи у де-баве ԝи, йед кӧ Шәʹдед Йаһоԝа нә.

ЙАҺОԜА «ГӘЛӘК ДЬЛОВАН У ТʹЬЖӘ РʹӘʹМ Ә»

19. Рʹуспи ча дькарьн чʹәʹв бьдьнә Йаһоԝа, чахе тʹәви кәсед гӧнәкʹар хәбәр дьдьн?

¹⁹ Рʹуспийед кӧ комитейада хьзмәт дькьн бәр Йаһоԝа щабдар ьн, ԝәки алийе рʹӧһʹанида щьвате тʹәмьз хԝәй кьн (1 Корьнтʹи 5:7). Ӧса жи рʹуспи дьхԝазьн ԝәки кәсед гӧнәкʹар тʹобә кьн. Ләма жи әԝана гӧман ьн, ԝәки йед гӧнәкʹар ԝе хԝә рʹаст кьн. Гәло чьрʹа? Чьмки әԝана дьхԝазьн чʹәʹв бьдьнә Йаһоԝа, йе кӧ «гәләк дьлован у тʹьжә рʹәʹм ә» (Аԛуб 5:11, ИМ). Гава Йуһʹәннайе шанди ида кал бу, әԝи ӧса ньвиси: «Зарʹокед мьн, әз ве йәке ԝәрʹа дьньвисьм, ԝәки һун гӧна нәкьн, ле һәгәр йәк гӧнә бькә, ль щәм Баве пьштгьре мә, Иса Мәсиһ, Йе Һәԛ һәйә» (1 Йуһʹәнна 2:1).

20. Готара пашьнда әме чь шеԝьр кьн?

²⁰ Сәд һʹәйф кӧ щарна хушк йан бьрак нахԝазә тʹобә кә. Һәрге ӧса бә, гәрәке әԝ жь щьвате бе дәрхьстьне. Гәло рʹуспи дәрәщед ӧсада чь сафи дькьн? Готара пашьнда әме щаба ве пьрсе бьстиньн.