ГОТАРА БОНА ҺИНБУНЕ 3
КʹЬЛАМА 35 Кʹижан Һәрә Ԛәнщ ә Әм Ԝе Бьжберьн
Сафикьрьнед ӧса Бькә, йед кӧ Йаһоԝа Хԝәш Тен
«Сәре сәрԝахтийе хофа Хӧдан ә, Йе Һәри Пироз наскьрьн биланти йә» (МӘТʹӘЛОК 9:10).
ВЕ ГОТАРЕДА
Әме бьвиньн кӧ әм ча дькарьн бь сайа занәбуне, фәʹмдарийе у сәрԝахтийе сафикьрьнед билан бькьн.
1. Һәр рʹож лазьм ә кӧ әм чь бькьн?
ҺӘР РʹОЖ лазьм ә кӧ әм сафикьрьна бькьн. Һьнә сафикьрьн һеса нә. Мәсәлә, әм гәрәке сафи кьн кӧ әме чь хԝарьне чекьн у чьчах һәрʹьн рʹазен. Ле һьнә сафикьрьн жи һеса ниньн, у дькарьн сәр сьһʹәт-ԛәԝата мә, шабуна мә, мәрьвед мәйә һʹәзкьри у һʹәбандьна мә, һʹӧкӧм кьн. Әм дьхԝазьн ԝәки сафикьрьнед мә кʹаре ча мәрʹа ӧса жи малбәта мәрʹа биньн. У йа лапә фәрз, әм дьхԝазьн кӧ сафикьрьнед мә Йаһоԝа хԝәш бен (Рʹомайи 12:1, 2).
2. Чь дькарә али мә бькә, кӧ бь билани сафикьрьна бькьн?
2 Сәва кӧ әм сафикьрьнед баш бькьн, әм гәрәке (1) информасийайе дәрһәԛа ве йәке бьстиньн, (2) тедәрхьн кӧ ньһерʹандьна Йаһоԝа чь йә у (3) рʹьнд бьфькьрьн, кӧ кʹижан методе бьдьнә хәбате. Ве готареда әме дина хԝә бьдьнә ван гава у бьвиньн кӧ әм ча дькарьн бьбьнә мәрьвнә гьһишти (Мәтʹәлок 2:11).
ИНФОРМАСИЙАЙЕ БЬСТИНЬН
3. Бь сайа мәсәләке зәлал кә, кӧ чьрʹа фәрз ә ԝәки әм информасийайе бьстиньн пешийа кӧ тьштәки сафи кьн.
3 Сәва кӧ әм сафикьрьнед баш бькьн, бәри пешьн әм гәрәке информасийайе дәрһәԛа ве йәке бьстиньн. Гәло әв йәк чьрʹа фәрз ә? Бьдә бәр чʹәʹве хԝә кӧ кәсәк жь бо нәхԝәшийа хԝә дьчә бал дохдьр. Гәло дохдьр, һʹәта кӧ пьрса нәдә у пенәһʹәсә нәхԝәшийа ԝи чь йә, ԛә ԝе дәрберʹа сафи кә тьштәки бькә? Һәмьки на. Мина ве йәке, сәва кӧ әм сафикьрьнед баш бькьн, әм гәрәке пешийе рʹьнд бьзаньбьн кӧ һʹал чь йә. Гәло әм чаԝа дькарьн ве йәке бькьн?
4. Ль гора Мәтʹәлок 18:13, тӧ ча дькари зәлал фәʹм ки кӧ фьлан тьшти бьки йан на? (Бьньһерʹә ӧса жи шькьл.)
4 Сәва әм зәлал фәʹм бькьн кӧ фьлан тьшти бькьн йан на, әм дькарьн һьнә тьшта пебьһʹәсьн. Бәʹса хәбәре, кәсәки гази тә кьрийә сәр ԝәʹдәдәрбазкьрьнәке. Гәло тӧйе һәрʹи йан на? Һәрге тӧ ԝи кәси нас наки, йе кӧ гази тә кьрийә, йан жи ньзани кӧ әв ԝәʹдәдәрбазкьрьн ԝе чь щурʹәйи дәрбаз бә, тӧ гәрәке һьнә пьрса бьди ԝи кәси. Мәсәлә: «Әԝ йәк ԝе кʹәнге у кʹидәре бе дәрбазкьрьне? Чьԛас мәри ԝе бен? Кʹе ԝе бона организәкьрьне щабдар бә? Кʹе ԝе бен? Чь ԝе бе кьрьне? Гәло ичкә ԝе һәбә йан на?» Щабед ван пьрса ԝе али тә бькьн, кӧ тӧ сафикьрьнәкә рʹаст бьки (Бьхунә Мәтʹәлок 18:13).
Бь сайа пьрса информасийайе бьстинә (Бьньһерʹә абзаса 4) a
5. Паши кӧ тә информасийа станд, гәрәке тӧ чь бьки?
5 Паше тӧ чь пеһʹәсийайи, сәр ве йәке бьфькьрә. Мәсәлә, һәрге тӧ пеһʹәсийайи, ԝәки мәрьвед кӧ ԛәдьре принсипед Кʹьтеба Пироз нагьрьн ԝе бенә ԝедәре, йан жи һәрге ичкә ԝе һәбә, ле тʹӧ кәс ԝе контрол нәкә чьԛас ԝе бе вәхԝарьне, тӧйе чь бьки? Тӧ тедәрдьхи тʹәлька кӧ ԝедәре дькарә һәбә? (1 Пәтрус 4:3) Йан жи, һәрге сьһʹәта ԝәʹдәдәрбазкьрьне дькʹәвә сьһʹәта щьвате йан сьһʹәта хьзмәтийе, тӧйе чь бьки? Информасийед ӧса дькарьн али тә бькьн, ԝәки сафикьрьнед баш бьки. Ле тьштәки дьн жи һәйә, кӧ тӧ гәрәке һьлди һʹәсаб: Тӧ ньһерʹандьна хԝә дәрһәԛа ве дәрәще ида зани, ле гәло Йаһоԝа сәр ве йәке ча дьньһерʹә? (Мәтʹәлок 2:6)
НЬҺЕРʹАНДЬНА ЙАҺОԜА ҺЬЛДӘ ҺʹӘСАБ
6. Ль гора Аԛуб 1:5, әм чьрʹа гәрәке жь Йаһоԝа аликʹарийе бьхԝазьн?
6 Жь Йаһоԝа аликʹарийе бьхԝазә, ԝәки тӧ ньһерʹандьна ԝи фәʹм бьки. Йаһоԝа соз дайә кӧ әԝе «бь мәрʹдани» биланийе бьдә мә, ԝәки әм тедәрхьн һәла сафикьрьнәкә мә ԝе ԝи хԝәш бе йан на (Бьхунә Аԛуб 1:5).
7. Тӧ ча дькари тедәрхи, кӧ ньһерʹандьна Йаһоԝа чь йә? Мәсәле бинә.
7 Гава тә дӧа кьр ԝәки Йаһоԝа рʹебәрийа тә бькә, рʹьнд дина хԝә бьдә щаба ԝи. Ве мәсәле бьдә бәр чʹәʹве хԝә: Тә рʹийа хԝә ӧнда кьрийә у жь кәсәки аликʹарийе дьхԝази. Ԛә тӧйе жь ԝедәре бьчуйайи, пешийа кӧ әԝ щабе бьдә? Һәмьки на. Тәйе рʹьнд гӧһ бьда рʹебәрийа ԝи. Мина ве йәке, паши кӧ тә дӧа кьр ԝәки Йаһоԝа биланийе бьдә тә, тедәрхә кӧ кʹижан ԛанун у принсипед жь Кʹьтеба Пироз дәрәща тәва гьредайи нә. Бь ви щурʹәйи, тӧйе щаба ԝи бьстини. Мәсәлә, гава тӧ сафи дьки кӧ һәрʹи сәр ԝәʹдәдәрбазкьрьне йан на, гьлийед Кʹьтеба Пироз һьлдә һʹәсаб дәрһәԛа кʹефкьрьна нәщайиз, һәвалед хьраб у ве йәке кӧ әм гәрәке бәри пешьн бькʹәвьнә һʹәйра Пʹадшатийа Хԝәде (Мәтта 6:33; Рʹомайи 13:13; 1 Корьнтʹи 15:33).
8. Тӧ чь дькари бьки һәрге тӧ дьхԝази информасийайе бьстини, йа кӧ тәрʹа лазьм ә? (Бьньһерʹә ӧса жи шькьл.)
8 Диса жи дьбәкә щарна тәрʹа аликʹари лазьм бә, ԝәки фьлан информасийайе бьстини, йа кӧ тӧ дьгәрʹи. Мәсәлә, тӧ дькари жь хушк йан бьраки щерʹьбанди һьнә ширәта бьхԝази. Ле тӧ гәрәке хԝәха жи лекʹолина бьки, соз мәсәлә бь сайа һащәтед ӧса ча Рʹебәрийа Лекʹолинкьрьне бона Шәʹдед Йаһоԝа у Кʹьтеба Пироз Дькарә Али Ԝә Бькә. Ле бир нәкә, ԝәки тӧ дьхԝази сафикьрьнәкә ӧса бьки, йа кӧ Йаһоԝа хԝәш те.
Ньһерʹандьна Йаһоԝа пебьһʹәсә (Бьньһерʹә абзаса 8) b
9. Әм ча дькарьн избат бьн, һәла сафикьрьна мә ԝе Йаһоԝа хԝәш бе йан на? (Әфәси 5:17)
9 Әм ча дькарьн избат бьн, кӧ сафикьрьна мә ԝе Йаһоԝа хԝәш бе йан на? Йа пешьн, әм гәрәке рʹьнд ԝи нас кьн. Кʹьтеба Пироз ӧса дьбежә: «Йе Һәри Пироз наскьрьн биланти йә» (Мәтʹәлок 9:10). Бәле, занәбуна рʹаст әм ԝи чахи дьстиньн, гава дәрһәԛа һʹӧнӧред Йаһоԝа, нета ԝи у тьштед кӧ әԝ һʹәз дькә йан нәфрʹәт дькә, педьһʹәсьн. Мәсәлә жь хԝә бьпьрсә: «Сәр һʹиме ве йәке, кӧ әз чьԛас Йаһоԝа нас дькьм, гәло әз дькарьм сафикьрьна ӧса бькьм, йа кӧ ԝе ԝи хԝәш бе?» (Бьхунә Әфәси 5:17).
10. Чьрʹа принсипед Кʹьтеба Пироз дьһа фәрз ьн, нә кӧ әʹдәтед мьләте мә?
10 Сәва кӧ әм дьле Йаһоԝа ша кьн, щарна дьбәкә лазьм бә, ԝәки әм һьмбәри хԝәстьна һәвал йан мәрьвед хԝә дәрен. Мәсәлә, дьбәкә һьнә де-бав бь нетәкә баш бьхԝазьн ԝәки ԛиза ԝан хортәки дәԝләти бьстинә, йан жи йәки ӧса кʹе ԝе ԛәләнәки мәзьн пеш ԝева бьдә, у нә жи дина хԝә бьдьне һәла әԝ йәки рʹӧһʹанида гьһишти йә йан на. Әв йәк нормал ә, ԝәки де-бав дьхԝазьн кӧ ԛиза ԝан жь алийе материалида һʹәԝще тʹӧ тьшти нибә. Ле ԛизьк гәрәке жь хԝә бьпьрсә: «Гәло әԝ хорт ԝе али мьн бькә, ԝәки әз һәләԛәтийа хԝә тʹәви Йаһоԝа ԛәԝи кьм? Гәло Йаһоԝа ча сәр ве йәке дьньһерʹә? Щаб кʹьтеба Мәтта 6:33-да һатийә дайине. Мәрʹа те готьне, кӧ әм «бәре пешьн бькʹәвьнә һʹәйра Пʹадшатийа Хԝәде». Һәмьки әм ԛәдьре де-баве хԝә у мәрьвед ль дәр-доре хԝә дьгьрьн, ле диса жи бона мә йа лапә фәрз әв ә, кӧ әм дьле Йаһоԝа ша кьн.
ДӘРҺӘԚА АХЬРИЙА САФИКЬРЬНЕД ХԜӘ БЬФЬКЬРӘ
11. Филипи 1:9, 10 бәʹса кʹижан һʹӧнӧри дькә у әв һʹӧнӧр бона тә чьрʹа фәрз ә?
11 Паши ве йәке кӧ тә дит, ԝәки кʹижан принсипед Кʹьтеба Пироз дәрәща тәва гьредайи нә, бьфькьрә кӧ бь сайа кʹижан метода тӧ дькари сәр һʹиме ван принсипа дәрәща хԝә сафи ки (Бьхунә Филипи 1:9, 10). Сәрԝахти дькарә али тә бькә, ԝәки тедәрхи кӧ сафикьрьнед тә бәрбь чь дькарьн бьвьн. Һьнә тьшт һеса йә сафи кьн, ле һьнәк жи на. Ле сәрԝахти ԝе али тә бькә, ԝәки тӧ дәрәщед чәтьнда жи сафикьрьнед баш бьки.
12-13. Сәрԝахти чаԝа дькарә али тә бькә, ԝәки тӧ хԝәрʹа хәбатәкә лайиԛ бьжбери?
12 Ве мәсәле бьдә бәр чʹәʹве хԝә: Сәва кӧ тӧ әʹбура мала хԝә бьки, тәрʹа хәбат лазьм ә. Дӧ хәбат тәрʹа дәст дькʹәвьн, у һәрдӧ жи мьԛабьли принсипед Кʹьтеба Пироз ниньн. Тӧ һʹәму информасийа дәрһәԛа ван хәбата һьлдьди һʹәсаб у сәр дьфькьри, мәсәлә сьһʹәтед хәбате, рʹийа һʹәта хәбате ԝе чьԛас бькʹьшинә у һьнә тьштед дьн. Йәк жь ԝан хәбата дьԛәԝьмә дьһа тә хԝәш те, чьмки һәԛе хәбате һе зедә йә. Ле һьнә тьштед дьн жи һәнә, йед кӧ тӧ гәрәке сәр ԝан бьфькьри пешийа кӧ сафи ки кʹижан хәбате бьжбери.
13 Мәсәлә, гәло йәк жь ԝан хәбата дькʹәвә сьһʹәта щьвате? Йан жи ԝе мәщале нәдә тә, ԝәки тӧ ча бәре бона һʹәԝщед нәфәред хԝә, алийе емосийали у рʹӧһʹанида хәм бьки? Бь сайа пьрсед ӧса, тӧ дькари һе зедә дина хԝә бьди, нә кӧ пʹәре кӧ тӧйе ԛазанщ ки, ле тьштед һәри фәрз, демәк һʹәбандьн у һʹәԝщед малбәта хԝә. Паше тӧ дькари сафикьрьнәкә ӧса бьки, кʹижан кӧ Йаһоԝа ԝе кʹәрәм кә.
14. Сәрԝахти у һʹәзкьрьн чаԝа дькарьн али мә бькьн, ԝәки әм кәсед дьн нәлькʹӧминьн?
14 Хенщи ве йәке, сәрԝахти али мә дькә кӧ әм пешда тедәрхьн, ԝәки сафикьрьна мә ча дькарә сәр мәрьвед дьн һʹӧкӧм кә, чьмки әм нахԝазьн кәсәки бьлькʹӧминьн (Филипи 1:10). Мәсәлә, гава әм пьрсед дәрһәԛа кʹьнщ у хәмьландьне сафикьрьна дькьн, фәрз ә әм ве йәке һьлдьн һʹәсаб. Дьбәкә стиләкә кʹьнща йан пʹорʹчекьрьне мә хԝәш те. Ле һәрге бьжартьна мә ԝе хушк-бьред мә йан кәсед дьн әʹщьз кә, һьнге әме чь бькьн? Сәрԝахти ԝе али мә бькә, кӧ әм һәстед ԝан жи һьлдьн һʹәсаб. Һʹәзкьрьна һьндава мәрьва ԝе али мә бькә, кʹара ԝан бьгәрʹьн у синоред хԝә жи бьзаньбьн (1 Корьнтʹи 10:23, 24, 32; 1 Тимотʹейо 2:9, 10). Һьнге сафикьрьна мә ԝе нишан кә, ԝәки әм мәрьва һʹәз дькьн у ԛәдьре ԝан дьгьрьн.
15. Пешийа кӧ әм сафикьрьнәкә фәрз бькьн, әм гәрәке чь бькьн?
15 Пешийа кӧ тӧ сафикьрьна фәрз бьки, һәр тьшти ‹бьдә бәр һʹәсаб› (Луԛа 14:28). Демәк, бьфькьрә чьԛас ԝәхт, пʹәрә у ԛәԝат ԝе лазьм бә, ԝәки ве сафикьрьна хԝә бини сери. Һьнә дәрәщада, ԝе лазьм бә кӧ тӧ жь нәфәред хԝә бьпьрси, һәла әԝана ԝе ча аликʹарийе бьдьнә тә ԝәки ве сафикьрьне бьки. Чьрʹа баш ә, ԝәки тӧ дәрһәԛа ван һʹәму тьшта пешда бьфькьри? Чьмки әԝ йәк дькарә али тә бькә, фәʹм бьки кӧ дьбәкә тӧ гәрәке сафикьрьна хԝә һьнәки бьгӧһези йан жи сафикьрьнәкә дьн бьки. Ӧса жи һәрге тӧ ве пьрсе тʹәви нәфәред хԝә шеԝьр ки у ньһерʹандьна ԝан бьбьһейи, әԝана ԝе һе зедә бьхԝазьн пьштгьрийа сафикьрьна тә бькьн (Мәтʹәлок 15:22).
САФИКЬРЬНӘКӘ БАШ БЬКӘ
16. Сәва кӧ әм сафикьрьнәкә баш бькьн, әм дькарьн кʹижан гава бавежьн? (Ӧса жи бьньһерʹә чаргошә « Тӧ Чаԝа Дькари Сафикьрьнед Баш Бьки?».)
16 Һәрге тә гавед кӧ ве готареда һатьнә шеԝьркьрьне, авитьнә, тӧ ида һазьр и сафикьрьна баш бьки. Тә рʹьнд фәʹм кьрийә, кӧ дәрәщә чь у ча нә, у тә дина хԝә дайә принсипед кӧ дькарьн али тә бькьн, ԝәки сафикьрьнәкә ӧса бьки, йа кӧ ԝе Йаһоԝа хԝәш бе. Ньһа тӧ дькари жь Йаһоԝа аликʹарийе бьхԝази, кӧ сафикьрьна хԝә бини сери.
17. Әм ча дькарьн сафикьрьнед баш бькьн?
17 Һәрге тә бәре гәләк сафикьрьнед баш кьрийә, диса жи бир нәкә, ԝәки сәва тӧ сафикьрьнед баш бьки, тӧ гәрәке хԝә бьспери, нә кӧ аԛьл у щерʹьбандьна хԝә, ле биланийа жь Йаһоԝа. Тʹәне әԝ дькарә занәбун, фәʹмкʹари у сәрԝахтийе бьдә тә. Әв һʹӧнӧр биланийева гьредайи нә (Мәтʹәлок 2:1-5). Йаһоԝа дькарә али тә бькә, ԝәки тӧ сафикьрьнед баш бьки, йед кӧ ԝи хԝәш тен (Зәбур 23:2, 3).
КʹЬЛАМА 28 Достийе Тʹәви Йаһоԝа Ԛазанщ кьн
