1. Иро гәләк мәрьв һʹәчʹи зәʹф дина хԝә дьдьнә чь?

 ИРО гәләк мәрьв дьһа зедә дькʹәвьнә һʹәйра хԝә, нә кӧ һʹәйра кәсед дьн. Мәсәлә, малпәред сосйалида, һьнә мәрьв һәр тьшти дькьн, ԝәки дина кәсед дьн бькʹьшиньн сәр хԝә у пешдачуйинед хԝә. Ле кәсед кӧ шькьрийе дьдьнә Йаһоԝа Хԝәде һьндьк ьн. Ве готареда әме бьвиньн, кӧ чь те һʹәсабе шькьрийе бьдьнә Йаһоԝа у чьрʹа әм гәрәке ве йәке бькьн. Ӧса жи әме бьвиньн, кӧ әм ча дькарьн шькьрийе бьдьнә Йаһоԝа, у дәмәкә незикда Йаһоԝа ԝе ча наве хԝә рʹумәт кә.

ЧЬ ТЕ ҺʹӘСАБЕ ШЬКЬРИЙЕ БЬДЬНӘ ЙАҺОԜА?

2. Йаһоԝа бәр Чʹийайе Синайе чаԝа рʹумәта хԝә нишан кьр? (Ӧса жи бьньһерʹә шькьл.)

² Кʹьтеба Пироз дьдә кʹьфше, ԝәки Йаһоԝа Хԝәде һежайи шькьрийе у рʹумәте йә. Ԝәхтәки кьн, паши кӧ мьләте Исраеле жь дилтийа Мьсьре аза бу, Йаһоԝа рʹумәта хԝә бь щурʹе мәхсус әʹйан кьр. Һәла бьдә бәр чʹәʹве хԝә: Бь милйона Исраели бәр Чʹийайе Синайе щьвийан, кӧ дәнге Хԝәде бьбьһен. Сәр чʹийе әʹԝьред рʹәш тʹоп бун у ньшкева әʹрд ԛайим һʹәжийа, бьруске лехьст, дәнге гӧрʹә-гӧрʹа әʹзмана һат у дәнге борʹийейә бьльнд һатә бьһистьне (Дәркʹәтьн 19:16-18; 24:17; Зәбур 68:8). Гава Йаһоԝа рʹумәта хԝә бь ви щурʹәйи нишан кьр, бе шьк Исраели һʹәйр-һʹӧжмәкʹар ман.

3. Әм ча дькарьн рʹумәте бьдьнә Йаһоԝа?

³ Ле гәло мәрьв дькарьн рʹумәте бьдьнә Йаһоԝа? Бәле. Мәсәлә, гава әм кәсед дьнрʹа бәʹса ԛәԝат у дьлованийа ԝи дькьн, әм рʹумәте дьдьнә ԝи. Ӧса жи чахе әм бона аликʹарийа кӧ әԝ дьдә мә, пәсьне ԝи  дьдьн, әм рʹумәте дьдьнә ԝи (Ишайа 26:12). Даԝьд Пʹадша һәртʹьм шькьри дьда Йаһоԝа. Щарәке әԝи бәр щьмәʹта Исраеле ӧса дӧа кьр: «Йа Хӧдан, мәзьнайи у ԛӧдрәт у бьльндайи у сәрфьрази у рʹәԝнаԛи [рʹумәт] йа тә йә; жь бәр кӧ һәр тьштед ль әʹзман у ль әʹрде нә, йед тә нә». Паши дӧайе Даԝьд, тʹәмамийа щьмәʹте пәсьне Йаһоԝа да (1 Дирок 29:11, 20).

4. Иса ча рʹумәте дьда Йаһоԝа Хԝәде?

⁴ Чахе Иса сәр әʹрде бу, әԝи тʹьме дьгот кӧ әԝ бь сайа ԛәԝата Баве хԝә кʹәрәмәта дькә у бь ве йәке Иса рʹумәт дьда Баве хԝә (Маркос 5:18-20). Ӧса жи Иса шькьри дьда Йаһоԝа, һьм бь ве йәке кӧ дәрһәԛа Баве хԝә мәрьварʹа гьли дькьр у һьм жи кӧ әԝ һьндава мәрьвада чаԝа бу. Щарәке чахе Иса кʹьништеда һин дькьр, нава гӧһдарада жьнькәк жи һәбу, йа кӧ 18 сала нәхԝәш бу, чьмки әԝ бьн һʹӧкӧме щьнәкида бу. Щьн әԝ ԛуз кьрьбу у әԝе нькарьбу пьшта хԝә рʹаст кьра. Бәләнгазе һʹаләки чьԛас гьранда бу! Иса бь дьловани жерʹа гот: «Тӧ жь нәхԝәшийа хԝә ԛәнщ буйи». Паше әԝи дәсте хԝә дани сәр ԝе, у жьньке дәрберʹа пьшта хԝә рʹаст кьр у «дәстпекьр пәсьне Хԝәде бьдә». Жьньк гәләк рʹази бу, кӧ Йаһоԝа ле ԛәнщ кьр (Луԛа 13:10-13). Мина ԝе жьньке, мә жи дәсте Йаһоԝа әʹмьре хԝәда дитийә у бона ве йәке әм жи дькарьн рʹумәте бьдьнә Йаһоԝа.

ӘМ ЧЬРʹА РʹУМӘТЕ ДЬДЬНӘ ЙАҺОԜА?

5. Чь мәʹни һәнә, кӧ әм гәрәке ԛәдьре Йаһоԝа бьгьрьн?

⁵ Әм рʹумәте дьдьнә Йаһоԝа, чьмки әм ԛәдьре ԝи дьгьрьн. Гәләк мәʹни һәнә кӧ әм ԛәдьре Йаһоԝа бьгьрьн. Йаһоԝа Һьмзор ә у ԛәԝата ԝи бесинор ә (Зәбур 96:4-7). Биланийа ԝийә мәзьн, жь тьштед кӧ әԝи чекьрьнә зәлал те кʹьфше. Йаһоԝа әʹмьр у һәр тьштед кӧ бона жийине лазьм ә, дайә мә (Әʹйанти 4:11). Әԝ амьн ә (Әʹйанти 15:4). Һʹәму кьред ԝи дьгьһижьнә нета хԝә у әԝ тʹьме созед хԝә тинә сери (Йешу 23:14). Ләма жи Йерәмйа пʹехәмбәр дәрһәԛа Йаһоԝа ӧса гот: «Нава һʹәму шәһрәзайед [биланен] мьләта у һʹәму ԝәлатада ԝәкә тә тʹӧнә йә»! (Йерәмйа 10:6, 7, ИМ) Бәле, гәләк мәʹни һәнә кӧ әм ԛәдьре Баве хԝәйи әʹзмана бьгьрьн. У әм нә кӧ тʹәне ԛәдьре ԝи дьгьрьн, ле ӧса жи ԝи һʹәз дькьн.

6. Әм чьрʹа Йаһоԝа һʹәз дькьн?

⁶ Әм рʹумәте дьдьнә Йаһоԝа, чьмки ԝи һʹәз дькьн. Гәләк һʹӧнӧред Йаһоԝа дьле мә дьгьрьн у мә бәрбь ԝи дькʹьшиньн. Мәсәлә, әԝ дьлшәԝат у рʹәʹм ә (Зәбур 103:13; Ишайа 49:15). Гава әм хәмгин ьн, әԝ жи хәмгин дьбә (Зәкәрйа 2:8). Әԝи рʹе вәкьрийә, кӧ әм бьбьнә достед ԝи (Зәбур 25:14; Кʹаред Шандийа 17:27). Ӧса жи, әԝ мьлук ә, ләма жи әԝ «хԝә ԛуз дькә, дина хԝә дьдә әʹрд у әʹзмана» у йед бәләнгаз «жь сәр хԝәлийе рʹадькә» (Зәбур 113:6, 7). Бәле, Йаһоԝа бь рʹасти жи һежайи йә, ԝәки әм рʹумәте бьдьнә ԝи! (Зәбур 86:12)

7. Чь мәщал мәрʹа һатийә дайине?

⁷ Әм рʹумәте дьдьнә Йаһоԝа, чьмки дьхԝазьн ԝәки кәсед дьн жи ԝи нас кьн. Гәләк мәрьв рʹастийа дәрһәԛа Йаһоԝа ньзаньн. Гәло чьрʹа? Чьмки Мире-щьна дәрһәԛа Ԝи гәләк дәрәԝ бәла кьрьнә у ча бежи фәʹме мәрьва кор кьрийә (2 Корьнтʹи 4:4). Мире-щьна мәрьв данә баԝәркьрьне, ԝәки Йаһоԝа йәки сәрт у бехәм ә, у әԝ ә сәбәбе кӧл-дәрдед дьнйайе. Ле әм рʹастийа дәрһәԛа Хԝәде  заньн! Әм дькарьн мәрьварʹа бежьн, кӧ Хԝәде бь рʹасти йәки чаԝа йә у бь ви щурʹәйи рʹумәте бьдьнә ԝи (Ишайа 43:10). Жь Зәбур 96 әме пебьһʹәсьн, кӧ әм ча дькарьн рʹумәте бьдьнә Йаһоԝа.

ӘМ ЧА ДЬКАРЬН РʹУМӘТЕ БЬДЬНӘ ЙАҺОԜА?

8. Гәло диса чь щурʹәйи әм дькарьн рʹумәте бьдьнә Йаһоԝа? (Зәбур 96:1-3)

⁸ Бьхунә Зәбур 96:1-3. Әм дькарьн бь зар-зьмане хԝә рʹумәте бьдьнә Йаһоԝа. Ван рʹезада те готьне кӧ бьра хьзмәткʹаред Йаһоԝа жерʹа «бьстьрен, пәсьне наве Ԝи бьдьн, рʹож бь рʹож хьлазкьрьна Ԝи данасин кьн» у «нава һʹәму мьләтада кʹәрәмәтед Ԝи» бькьнә дәнги. Бь ви щурʹәйи, әм дькарьн рʹумәте бьдьнә Баве хԝәйи әʹзмана. Щьһуйед амьн у Мәсиһийед ԛьрʹна йәке, бь хирәт кәсед дьнрʹа бәʹса ԛәнщийа Йаһоԝа дькьрьн у наве ԝи дьпʹарастьн (Данийел 3:16-18; Кʹаред Шандийа 4:29). Гәло әм ча дькарьн чʹәʹв бьдьнә ԝан?

9-10. Әм жь сәрһатийа Ангелинайе чь һин дьбьн? (Бьньһерʹә ӧса жи шькьл.)

⁹ Ԝәрә әм дина хԝә бьдьнә сәрһатийа хушкәкә мә бь наве Ангелина, a йа кӧ ль Америкайе дьжи. Сәр хәбате жерʹа мәщал чебу, ԝәки бь мерхаси наве Йаһоԝа бьпʹарезә. Гава әԝ тʹәзә һатә сәр ве хәбате, ле тʹәглифи сәр кʹомщьвинәке кьрьн, кʹидәре хәбатчийед тʹәзә гәрәке хәбатчийед дьнрʹа дәрһәԛа хԝә гьли кьрана. Ангелинайе, сәва кӧ ԝанрʹа бьдә кʹьфше, кӧ ча Шәʹде Йаһоԝа әԝ йәкә чьԛас бәхтәԝар ә, әԝе һьнә шькьл һазьр кьрьн, ԝәки нишани ԝан кә. Ле пешийа ԝе, һәвалхәбатчики дьн дәрһәԛа хԝә гьли кьр у гот кӧ әԝ малбәтәкә Шәʹдед Йаһоԝада мәзьн буйә, у дәстпекьр ԛәрфед хԝә баԝәрийа мә бькә. Ангелина дьбежә: «Әз гәләк тʹәвльһәв бум у мьн хԝәрʹа гот: ‹Ньһа әзе чь бькьм? Әзе изьне бьдьм, ԝәки кәсәк бӧхдана бавежә Йаһоԝа, йан әз һазьр ьм наве Йаһоԝа бьпʹарезьм?›»

¹⁰ Гава хәбатчи хәбәрдана хԝә хьлаз кьр, Ангелинайе кьн дьле хԝәда дӧа кьр. Паше әԝе бь нәрми гот: «Мина тә, әз жи малбәтәкә Шәʹдед Йаһоԝада мәзьн бумә у әз бумә Шәʹде Йаһоԝа». Рʹаст ә дәрәщәкә һеса нибу, ле диса жи Ангелинайе дьлрʹьһʹәти хԝәй кьр.  Әԝе һьм бь мьлукти бәʹса баԝәрийа хԝә кьр, һьм жи һьнә шькьл нишани ԝан кьр, сәр кʹижана әԝ тʹәви Шәʹдед Йаһоԝа бь шабуне Йаһоԝарʹа хьзмәт дькьн (1 Пәтрус 3:15). Гәло паши ве йәке чь ԛәԝьми? Гава Ангелинайе хәбәрдана хԝә хьлаз кьр, дьле ви хәбатчи һьнәки нәрм бу. Әԝи һәла һе һьнә тьштед баш жи жь бьчʹуктайа хԝә гьли кьр, чахе әԝи тʹәви Шәʹдед Йаһоԝа ԝәʹдә дәрбаз дькьр. Ангелина дьбежә: «Йаһоԝа һежа йә кӧ әм ԝи бьпʹарезьн. Бона мьн ԛәдьрәки гәләк мәзьн ә, кӧ рʹастийе дәрһәԛа Йаһоԝа бежьм у наве ԝи бьпʹарезьм». Әм жи дькарьн пәсьне Йаһоԝа бьдьн у наве ԝи рʹумәт кьн, гава кәсед дьн наве ԝи рʹәш дькьн.

11. Хьзмәткʹаред Йаһоԝа чаԝа ль гора принсипа жь Зәбур 96:8, дьжин?

¹¹ Бьхунә Зәбур 96:8. Әм дькарьн бь мал у мьлкʹе хԝә рʹумәте бьдьнә Йаһоԝа. Хьзмәткʹаред Йаһоԝайә амьн тʹьме ӧса дькьн (Мәтʹәлок 3:9). Мәсәлә, Исраелийа пе пʹәра у тьштед дьн пьштгьрийа шьхӧле авакьрьн у хԝәйкьрьна пʹарьстгәһе дькьрьн (2 Пʹадшати 12:4, 5; 1 Дирок 29:3-9). Һьнә шагьртед Иса «пе мал-мьлкʹе хԝә» али Иса у шандийед ԝи дькьрьн (Луԛа 8:1-3). Шагьртед Иса, йед ԛьрʹна йәке аликʹари дьданә хушк-бьра жи (Кʹаред Шандийа 11:27-29). Иро әм жи дькарьн бь ԛӧрбанкьрьнед рʹәзәдьли рʹумәте бьдьнә Йаһоԝа.

12. Ԛӧрбанкьрьнед мә, ча дькарьн рʹумәте бьдьнә Йаһоԝа? (Бьньһерʹә ӧса жи шькьл.)

¹² Ԝәрә әм дина хԝә бьдьнә сәрһатике, йа кӧ нишан дькә ԝәки ԛӧрбанкьрьнед мә чаԝа рʹумәте дьдьнә Йаһоԝа. Сала 2020-да Зимбабԝәйеда дәмәкә дьреж баран нәдьбари у һʹьшкайи бу. Бь милйона мәрьв бьрʹчи мабун, у һʹале хушкәкә мә бь наве Приска жи гәләк чәтьн бу. Диса жи ԝәʹде бещәркьрьна әʹрд әԝ рʹожа Чаршәме у Инийе дьчу хьзмәтийе. Щинаред ԝе ԛәрфед хԝә ле дькьрьн, чьмки әԝ дьчу хьзмәтийе у әʹрд бещәр нәдькьр, у ԝана дьгот: «Тӧйе бьрʹчина бьмьри!» Ле Прискайе бь сәрбьльнди дьгот: «Йаһоԝа тʹӧ щара хьзмәткʹаред хԝә наһелә!» Паши ве йәке гәләк ԝәхт дәрбаз нәбу, кӧ әԝе жь тʹәшкиләта мә хԝарьн у тьштед дьнә лазьм станд. Әв йәк бь сайа ԛӧрбанкьрьнед мәйә  рʹәзәдьли һатьнә кьрьне. Щинаред Прискайе әʹщебмайи ман, у жерʹа готьн: «Әм дьвиньн кӧ Хԝәде тʹӧ щар тә наһелә, ләма жи әм дьхԝазьн дәрһәԛа ԝи һе зедә пебьһʹәсьн». Ԝәхт шунда, һʹәфт щинаред ԝе дәстпекьрьн һәрʹьнә щьвина.

13. Рʹабун-рʹуньштьна мә, ча дькарә рʹумәте бьдә Йаһоԝа? (Зәбур 96:9)

¹³ Бьхунә Зәбур 96:9. Әм дькарьн бь рʹабун-рʹуньштьна хԝә рʹумәте бьдьнә Йаһоԝа. Кʹаһинед кӧ пʹарьстгәһа Йаһоԝада хьзмәт дькьрьн, гәрәке тʹәмьзайа физики хԝәй кьрана (Дәркʹәтьн 40:30-32). Ле әм гәрәке нә тʹәне жь алийе физикида тʹәмьзайе хԝәй кьн, ле ӧса жи хԝә жь ван тьшта дур бьгьрьн, чь кӧ бәр чʹәʹве Йаһоԝа рʹәш ьн (Зәбур 24:3, 4; 1 Пәтрус 1:15, 16). Әм гәрәке сәр хԝә бьхәбьтьн, ԝәки хәйсәт-һʹӧнӧред кʹәвьн жь хԝә дур хьн, у йед кӧ Хԝәде хԝәш тен нав хԝәда пешда биньн (Колоси 3:9, 10). Бь аликʹарийа Йаһоԝа, кәсед бенамус у зӧлм жи дькарьн тʹәрка кьред хԝәйә хьраб бьдьн у алийе башда бенә гӧһастьне.

14. Әм жь сәрһатийа Щек чь һин дьбьн? (Бьньһерʹә ӧса жи шькьл.)

¹⁴ Ԝәрә әм ньһа дина хԝә бьдьнә сәрһатийа мерәки бь наве Щек. Әԝ мәрьвәки гәләк зӧльм бу, ләма жи жерʹа дьготьн «Щьн». Жь бо зӧлмийа кӧ Щек кьрьбу, щәзайа мьрьне данә ԝи. Ле һʹәта кӧ рʹожа щәзайа ԝи бьһата, Щек ԛәбул кьр ԝәки тʹәви бьраки, йе кӧ дьһатә кәле, Кʹьтеба Пироз һин бә. Щек һеди-һеди тʹәрка хәйсәт-һʹӧнӧред хԝәйә хьраб да у һатә ньхӧмандьне. Әԝ ӧса һатә гӧһастьне, кӧ гава әв рʹож һат ԝәки ԝи бькӧжьн, чʹәʹвед һьнә нобәдара тʹьжи һесьр бун. Әскәрәки кӧ кәледа дьхәбьти, ӧса гот: «Бәре, Щек гьртийе һәри хьраб бу, ле ньһа әԝ йе һәри баш ә». Һʹәфтек шунда паши кӧштьна Щек, бьред кӧ чунә кәле, сәва кӧ щьвине дәрбаз кьн, гьртик дитьн, йе кӧ щара пешьн һатә сәр щьвате. Гәло әԝ чьрʹа һатә сәр щьвате? Әԝ гәләк әʹщебмайи мабу кӧ Щек ча һатьбу гӧһастьне, у әԝи дьхԝәст бьзаньбә кӧ әԝ гәрәке чь бькә, ԝәки Йаһоԝарʹа хьзмәт кә. Бәле, рʹабун-рʹуньштьна мә дькарә рʹумәте бьдә Баве мәйи әʹзмана! (1 Пәтрус 2:12)

 ЙАҺОԜА ԜЕ ЧА НАВЕ ХԜӘ РʹУМӘТ КӘ?

15. Дәмәкә незикда Йаһоԝа ԝе ча наве хԝә рʹумәт кә? (Зәбур 96:10-13)

¹⁵ Бьхунә Зәбур 96:10-13. Хьлазийа Зәбура 96-да те готьне, кӧ Йаһоԝа Пʹадша йә у Һʹакьме һәԛ ә. Гәло дәмәкә незикда, Йаһоԝа ԝе чаԝа наве хԝә рʹумәт кә? Әԝе диԝана дьнйайе бькә. Пешийе әԝе ԛьрʹа Бабилона Мәзьн бинә, чьмки әԝе наве Ԝийи пироз рʹәш кьрийә (Әʹйанти 17:5, 16; 19:1, 2). Паши ԛьркьрьна Бабилона Мәзьн, дьбәкә һьнә мәрьв сафи кьн, кӧ тʹәви мә Хԝәдерʹа хьзмәт кьн. Паши ве йәке, Һармәгәдонеда, Йаһоԝа ԝе тʹәмамийа дьнйа Мире-щьна ԛьрʹ кә. Әԝе һʹәму дьжмьнед хԝә, йед кӧ наве ԝи рʹәш дькьн, кʹӧта кә, ле ԝан кәса, йед кӧ ԝи һʹәз дькьн, гӧһ дьдьнә ԝи у бь мерхаси наве ԝи рʹумәт дькьн, ԝе хьлаз кә (Маркос 8:38; 2 Тʹесалоники 1:6-10). Паши Сәрԝертийа Һʹәзарсали щерʹьбандьна хьлазийе ԝе бьԛәԝьмә у паши ве йәке, наве Йаһоԝа ԝе бь тʹәмами бе рʹумәткьрьне (Әʹйанти 20:7-10). Ԝе дәме, «чаԝа ав дәрйайа [бәʹр] тʹьжә дькә, дьнйа жи ԝе бь занина рʹумәта Хӧдан тʹьжә бьбә» (Һәбаԛуԛ 2:14, ИМ).

16. Әм гәрәке чь нет дайньн пешийа хԝә? (Бьньһерʹә ӧса жи шькьл.)

¹⁶ Дә бьдьнә һʹәсабе хԝә ԝе дәмәкә чьԛас хԝәш бә, гава һәр кәс рʹумәте бьдә наве Йаһоԝа! Ле һʹәта әв рʹож бе, ԝәрә әм чь жь дәсте мә те бькьн, кӧ наве Хԝәде рʹумәт кьн. Сәва кӧ дина мә бькʹьшинә сәр ве щабдарийа фәрз, Кʹома Рʹебәрийе Зәбур 96:8, ча рʹеза сала 2025 бьжартийә: «Шькьрийе бьдьнә Йаһоԝа, чьмки наве ԝи рʹумәт ә».