ГОТАРА БОНА ҺИНБУНЕ 5
КʹЬЛАМА 108 Һʹьзкьрьна Хԝәдейә Һʹәлал
Әм Ча жь Һʹәзкьрьна Йаһоԝа Кʹаре Дьстиньн?
«Мәсиһ Иса һатә дьне, гӧнәкʹара хьлаз бькә» (1 ТИМОТʹЕЙО 1:15).
ВЕ ГОТАРЕДА
Әме шеԝьр кьн, кӧ әм жь ԛӧрбана Иса чь кʹаре дьстиньн у әм ча дькарьн рʹазибуна хԝә Йаһоԝарʹа бьдьнә кʹьфше.
1. Әм ча дькарьн дьле Йаһоԝа ша кьн?
БЬДӘ бәр чʹәʹве хԝә, ԝәки тӧ пʹешкʹешәкә мәхсус, йа кӧ һьм бәдәԝ ә һьм жи керһати йә, дьди һәваләки хԝә. Һәрге һәвале тә ве пʹешкʹеше бькә ԛӧтʹийе у паше жи дәрһәԛа ве бир кә, гәло тӧйе хәмгин нәби? Ле һәрге һәвале тә пʹешкʹеша тә бьдә хәбате у рʹазибуна хԝә тәрʹа бьдә кʹьфше, тӧйе гәләк ша би! Мина ве йәке, Йаһоԝа Кӧрʹе хԝә шандә сәр әʹрде, ԝәки әԝ әʹмьре хԝә бона мә бьдә. Һәрге әм бона ве пʹешкʹеша ԛимәт у бона һʹәзкьрьна Йаһоԝа рʹази бьн, Йаһоԝа жи ԝе ша бә! (Йуһʹәнна 3:16; Рʹомайи 5:7, 8)
2. Ве готареда әме чь шеԝьр кьн?
2 Һәмьки әм ша нә, кӧ әв пʹешкʹеша ԛимәт мәрʹа һатийә дайине, ле дьԛәԝьмә һеди-һеди сал пәй саларʹа рʹазибуна мә бона ԛӧрбана Иса кем бә, у ча бежи әм ве пʹешкʹеша Хԝәде бькьнә ԛӧтʹийе у бир кьн. Сәва кӧ әв йәк нәԛәԝьмә, әм гәрәке тьштед кӧ Хԝәде у Иса бона мә кьрьнә, тʹьме биньн бира хԝә. Әва готара ве йәкеда ԝе али мә бькә. Әме бьвиньн, кӧ иро әм жь ԛӧрбане чь кʹаре дьстиньн у ахьрийеда әме чь кʹаре бьстиньн. Ӧса жи әме шеԝьр кьн, кӧ әм ча дькарьн илаһи ԝәʹде Евара Биранине бьдьнә кʹьфше, ԝәки әм бона һʹәзкьрьна Йаһоԝа гәләк рʹази нә.
ИРО ӘМ ЖЬ ԚӦРБАНЕ ЧЬ КʹАРЕ ДЬСТИНЬН?
3. Әм ида иро жь ԛӧрбане чь кʹаре дьстиньн?
3 Әм ида иро жь ԛӧрбана Иса кʹаре дьстиньн. Мәсәлә, сәр һʹиме ԛӧрбане, Йаһоԝа гӧнед мә дьбахшинә мә. Әԝ борщдар нинә бьбахшинә мә, ле әԝ жь дьл дьхԝазә ве йәке бькә. Зәбурбежәки бь рʹазибуне ӧса ньвиси: «Тӧ Хӧдано, ԛәнщ у афу кьр и» (Зәбур 86:5; 103:3, 10-13).
4. Йаһоԝа бона кʹе Кӧрʹе хԝә кьрә ԛӧрбан? (Луԛа 5:32; 1 Тимотʹейо 1:15)
4 Һьнә мәрьв хԝә һежайи бахшандьне һʹәсаб накьн. Һәмьки тʹӧ кәс һежайи бахшандьне нинә. Паԝлосе шанди ӧса гот: «Нә лайиԛ ьм шанди жи бемә готьне. . . . Ле әз бь кʹәрәма Хԝәде мә чь жи һәмә» (1 Корьнтʹи 15:9, 10). Чахе әм гӧнед хԝә тʹобә дькьн, Йаһоԝа дьбахшинә мә. Гәло чьрʹа? Нә кӧ әм һежайи ве йәке нә, ле чьмки әԝ мә һʹәз дькә. Һәрге тӧ дьлтәнг дьби, чьмки хԝә һежайи бахшандьне һʹәсаб наки, бинә бира хԝә ԝәки Йаһоԝа ԛӧрбан нә кӧ бона мәрьвед бе гӧнә дайә, ле бона гӧнәкʹаред кӧ тʹобә дькьн (Бьхунә Луԛа 5:32; 1 Тимотʹейо 1:15).
5. Гәло әм дькарьн һежайи бахшандьна Йаһоԝа бьн? Шьровәкә.
5 Һәрге мә ида гәләк сал Йаһоԝарʹа хьзмәт кьрийә жи, йәкә әм гәрәке нәфькьрьн ԝәки әм һежайи рʹәʹма Ԝи нә. Һәмьки Йаһоԝа амьнийа мә дьшекьринә (Ибрани 6:10). Ле әԝи әʹмьре Кӧрʹе хԝә ча пʹешкʹеш дайә, нә кӧ ча һәԛе хьзмәтийа мә. Ләма жи әм гәрәке нәфькьрьн, кӧ һәрге мә бона Йаһоԝа гәләк тьшт кьрийә, әм ида һежайи бахшандьна Ԝи нә. Һәрге әм ӧса дьфькьрьн, демәк әм дьдьнә кʹьфше, ԝәки ԛӧрбана Иса мәрʹа нә жи лазьм бу, чьмки әм хԝәха жи дькарьн бахшандьна Йаһоԝа ԛазанщ кьн (Бәрамбәр кә Галати 2:21).
6. Паԝлос чьрʹа бь дьл у щан Йаһоԝарʹа хьзмәт дькьр?
6 Паԝлосе шанди заньбу, кӧ әԝ нькарә бь хирәта хԝә рʹазибуна Хԝәде ԛазанщ кә. Ле һәрге ӧса нә, әԝ чьрʹа хьзмәтийеда һаԛас хирәт бу? Әԝи дьхԝәст бьдә кʹьфше, кӧ әԝ бона рʹәʹма Йаһоԝа гәләк рʹази йә, нә кӧ избат кә ԝәки әԝ һежайи рʹәʹма ԝи йә (Әфәси 3:7). Мина Паԝлос, әм жи бәрдәԝам дькьн бь хирәт хьзмәт кьн, нә кӧ сәва ве йәке ԝәки рʹәʹма Хԝәде ԛазанщ кьн, ле сәва кӧ рʹазибуна хԝә жерʹа бьдьнә кʹьфше.
7. Диса чь щурʹәйи әм жь ԛӧрбане кʹаре дьстиньн? (Рʹомайи 5:1; Аԛуб 2:23)
7 Ӧса жи бь сайа ԛӧрбана Иса, мәщал мәрʹа һатә дайине, ԝәки бьбьнә достед Йаһоԝа. a Чаԝа мә жь готара пешийа ве дит, чахе әм һатьнә буйине, әм достед Йаһоԝа нибун. Ле бь сайа ԛӧрбане, «әʹдьлайийа мә тʹәви Хԝәде һәйә» у әм дькарьн незики ԝи бьн (Бьхунә Рʹомайи 5:1; Аԛуб 2:23).
8. Әм чьрʹа рʹази нә, кӧ дькарьн Йаһоԝарʹа дӧа кьн?
8 Бь сайа ве йәке, кӧ әм достед Йаһоԝа нә, мәрʹа ԛәдьрәки мәзьн һатийә дайине кӧ жерʹа дӧа бькьн. Йаһоԝа нә тʹәне ԝан дӧайед хьзмәткʹаред хԝә дьбьһе, йед кӧ тʹәвайи дӧа дькьн, ле ӧса жи дӧайед мәйә шәхси. Рʹаст ә, дӧа дькарә дьле мә ԛәԝи у рʹьһʹәт кә, ле кʹара дӧа тʹәне әв йәк нинә. Дӧа али мә дькә, ԝәки әм дьһа незики Хԝәде бьн (Зәбур 65:2; Аԛуб 4:8; 1 Йуһʹәнна 5:14). Гава Иса сәр әʹрде бу, әԝи гәләк щара дӧа дькьр, чьмки заньбу ԝәки Йаһоԝа гӧһ дьдә дӧайед ԝи, у бь сайа ве йәке әԝ дькарә һәләԛәтийа незик тʹәви Баве хԝә хԝәй кә (Луԛа 5:16). Гәло әм рʹази ниньн, кӧ сәр һʹиме ԛӧрбана Иса, әм дькарьн бьбьнә достед Йаһоԝа у бь сайа дӧа тʹәви ԝи хәбәр дьн?
АХЬРИЙЕДА ӘМЕ ЖЬ ԚӦРБАНЕ ЧЬ КʹАРЕ БЬСТИНЬН?
9. Ахьрийеда хьзмәткʹаред Йаһоԝа ԝе жь ԛӧрбана Иса чь кʹаре бьстиньн?
9 Ахьрийеда хьзмәткʹаред Йаһоԝа ԝе ча жь ԛӧрбана Иса кʹаре бьстиньн? Кʹьтеба Пироз дьбежә, кӧ әԝана ԝе әʹмьре һʹәта-һʹәтайе бьстиньн. Гәләк мәрьв дьфькьрьн, кӧ тьштәки ӧса нькарә бьԛәԝьмә, чьмки мәрьв ида бь һʹәзара сала дьмьрьн. Ле бь рʹасти, сәре-серида нета Йаһоԝа әв бу, кӧ мәрьв һʹәта-һʹәтайе бьжин. Һәрге Адәм гӧнә нәкьра, тʹӧ кәс ԝе дьшьрмиш нәбуйа, ԝәки әʹмьре һәрһәйи тьштәки нәбуйи йә. У Йаһоԝа Кӧрʹе хԝә, әʹмьре кʹижани гәләк ԛимәт бу, бона мә ԛӧрбан кьр, ләма жи әм дькарьн сәд сәләфи баԝәр бьн, ԝәки ԝе бе ԝәʹдә кӧ әме бькарьбьн һʹәта-һʹәтайе бьжин (Рʹомайи 8:32).
10. Кәсед бь рʹӧһʹе пироз бьжарти у «пәзед дьн» һивийа жийина чь щурʹәйи нә?
10 Рʹаст ә әм һәла һе нәгьһиштьнә ве рʹоже у һʹәта-һʹәтайе нажин, ле диса жи Йаһоԝа дьхԝазә ԝәки әм ида ньһада дәрһәԛа ве йәке бьфькьрьн. Кәсед бь рʹӧһʹе пироз бьжарти һивийа жийина сәр әʹзмана нә у ԝедәре әԝана ԝе тʹәви Иса сәрԝертийе бькьн (Әʹйанти 20:6). Ле «пәзед дьн» һивийа жийина сәр әʹрде щьнәте нә, кʹидәре һʹәму кӧл-дәрд ԝе ида тʹӧнә бьн (Әʹйанти 21:3, 4). Гәло тӧ жи йәк жь ԝан и? Һәрге әре, нәфькьрә ԝәки хәлата жийина сәр әʹзмана жь йа тә четьр ә. Бь рʹасти, мәрьв бона жийина ль сәр әʹрде һатьнә әʹфьрандьне, ләма жи әме жь ԝи әʹмьри шабун у ләзәте бьстиньн.
11-12. Кʹижан ьн һьнә кʹәрәмед дьнйа тʹәзә, йед кӧ әм һивийе нә? (Бьньһерʹә ӧса жи шькьл.)
11 Бьдә бәр чʹәʹве хԝә, кӧ жийина Щьнәтеда ԝе чь щурʹәйи бә. Тӧйе ида жь нәхԝәши у мьрьне нәтьрси (Ишайа 25:8; 33:24). Йаһоԝа ԝе һәр хԝәстьнед тәйи рʹаст бинә сери. Гәло тӧйе дьнйа тʹәзәда чьва мьжул би? Бь физике? Бь кʹимйайе? Бь музике? Йан һин би тьшта нәԛьш ки? Һәмьки ԝи чахи архитектор, авакʹар у щоткʹар ԝе гәләк лазьм бьн. Ӧса жи ԝе лазьм бә, кӧ һьнә кәс сәбзә у бахед емиша бьчиньн у бәред ԝан тʹоп кьн, һащәта чекьн, бахча бәдәԝ кьн у ԝан бьбьнә хԝәйи (Ишайа 35:1; 65:21). Ԝәʹде тә ԝе ӧса зәʹф бә, кӧ тӧйе бькарьби, чь кӧ дьле тә бьхԝазә, ве йәкева жи мьжул би.
12 Чахе мәрьвед мәйи һʹәзкьри бенә сахкьрьне, шабуна ньгед мә ԝе әʹрд нәгьрә! (Кʹаред Шандийа 24:15) Ӧса жи бьдә бәр чʹәʹве хԝә, кӧ гава әм тʹәбийәте лекʹолин бькьн у дәрһәԛа Йаһоԝа һе зедә тьшт пебьһʹәсьн, әме шабунәкә чьԛас мәзьн бьстиньн (Зәбур 104:24; Ишайа 11:9). Йа лапә баш жи әв ә, кӧ әме ида гӧнә нәкьн у ԝе нә лазьм бә ԝәки әм жь Йаһоԝа бахшандьне бьхԝазьн! Гәло тӧйе ван кʹәрәма сәр «ԝәхтәки кьн нава кʹефа гӧнада» бьгӧһези? (Ибрани 11:25) Һәмьки на! Кʹәрәмед создайи һежайи һʹәму ԛәԝат у ԛӧрбана нә. Бир нәкә, әме тʹьме һивийа дьнйа тʹәзә нибьн. Әв рʹож ԝе әʹсәйи бе, у әв йәк ԝе реали бә, чьмки Йаһоԝа ӧса мә һʹәз дькә, ԝәки сәва мә әʹмьре Кӧрʹе хԝәйә һʹәзкьри ча ԛӧрбан дайә!
Тӧ һʹәчʹи зәʹф һивийа кʹижан кʹәрәма йи, йед кӧ әме Щьнәтеда бьстиньн? (Бьньһерʹә абзаса 11-12)
НИШАН КӘ ԜӘКИ ТӦ ҺʹӘЗКЬРЬНА ЙАҺОԜА ДЬШЕКЬРИНИ
13. Әм ча дькарьн нишан кьн, кӧ әм бона һʹәзкьрьна Йаһоԝа рʹази нә? (2 Корьнтʹи 6:1)
13 Гәло әм чаԝа дькарьн нишан кьн, ԝәки әм бона ве ԛӧрбане, йа кӧ Йаһоԝа сәва мә дайә, шекьрдар ьн? Гәрәке әм жь һәр тьшти зедәтьр дина хԝә бьдьнә шьхӧлед Пʹадшатийа ԝи (Мәтта 6:33). Иса «бона һʹәмуйа мьр, ԝәки әԝед сах бона хԝә сах нибьн, ле бона ԝи, йе кӧ бона ԝан мьр у жь мьрьне рʹабу» (2 Корьнтʹи 5:15). Йаһоԝа бь рʹәʹма хԝәйә мәзьн, бахшандийә мә. Ләма жи әм дьхԝазьн хьзмәтийеда чь жь дәсте мә те бькьн, ԝәки рʹазибуна хԝә жерʹа нишан кьн (Бьхунә 2 Корьнтʹи 6:1).
14. Әм ча дькарьн хԝә бьсперьн рʹебәрийа Йаһоԝа?
14 Сәва кӧ бьдьнә кʹьфше, ԝәки әм бона һʹәзкьрьна Йаһоԝа рʹази нә, әм гәрәке хԝә бьсперьн рʹебәрийа ԝи. Гәло чь щурʹәйи? Гава лазьм ә ԝәки әм сафикьрьнәке бькьн, мәсәлә хԝәндьна чь щурʹәйи бьстиньн, йан жи кʹижан хәбате ԛәбул кьн, пешийе әм гәрәке ньһерʹандьна Йаһоԝа сәр ве пьрсе пебьһʹәсьн (1 Корьнтʹи 10:31; 2 Корьнтʹи 5:7). Чахе әм хԝә дьсперьн рʹебәрийа Йаһоԝа, достийа мә тʹәви ԝи дьһа незик дьбә, баԝәри у гӧмана мә жи дьһа ԛәԝи дьбә (Рʹомайи 5:3-5; Аԛуб 2:21, 22).
15. Ԝәʹде Биранине әм ча дькарьн рʹазибуна хԝә нишан кьн?
15 Әм дькарьн рʹазибуна хԝә һьндава һʹәзкьрьна Йаһоԝа бь щурʹәки майин жи бьдьнә кʹьфше. Мәсәлә, ԝәʹде Биранине, әм дькарьн нишани Йаһоԝа кьн, кӧ әм бона ԛӧрбане гәләк рʹази нә. Хенщи ве йәке кӧ әм хԝәха һәрʹьнә сәр Биранине, әм дькарьн гази кәсед дьн жи бькьн у ԝанрʹа шьровәкьн, кӧ Биранин ча дәрбаз дьбә (1 Тимотʹейо 2:4). Мәсәлә, тӧ дькари бона ве йәке бьди хәбате видеойа бь наве Иса Мәсиһ Чьма Мьр? у Мьрьна Иса, Бира Хԝәда Хԝәй кьн. Рʹуспи гәрәке гази хушк у бьред нәактиф жи бькьн. Дә бьдә бәр чʹәʹве хԝә, кӧ гава пәзед ӧндабуйи вәдьгәрʹьн щәм Йаһоԝа, сәр әʹзмана у сәр әʹрде шабунәкә чьԛас мәзьн пешда те! (Луԛа 15:4-7) Ԝәрә әм сәр Евара Биранине нә тʹәне һәвдӧ сьлав кьн, ле ԝан кәса жи, йед кӧ щара пешьн һатьнә у йед кӧ дәмәкә дьреж нәһатьбун. Әм дьхԝазьн кӧ әԝана хԝә нав мәда рʹьһʹәт тʹәхмин кьн (Рʹомайи 12:13).
16. Ԝәʹде Биранине ԝе чьрʹа баш бә, кӧ әм дьһа зедә хьзмәт кьн?
16 Гәло тӧ дькари һʹәфтийед пешийа у паши Биранине, дьһа зедә хьзмәт ки? Бь ви щурʹәйи тӧ дькари бьди кʹьфше, ԝәки бона һʹәзкьрьна Хԝәде у Иса, гәләк рʹази йи. Чьԛас зәʹф әм Йаһоԝарʹа хьзмәт кьн, һаԛас һе зедә әме аликʹарийа ԝи бьвиньн, у баԝәрийа мә ԝе дьһа ԛәԝи бә (1 Корьнтʹи 3:9). Ӧса жи бир нәкә рʹезед бона Биранине бьхуни жь брошура Һәр Рʹож Ньвисаред Пироз Лекʹолин Бькьн у жь Бәрнама Щьвине, Бьжин у Хьзмәт кьн. Дьбәкә тӧ сафи ки, сәр һʹиме ван рʹеза лекʹолине бьки.
17. Сәва кӧ Йаһоԝа жь мә рʹази бә, әм гәрәке чь бькьн? (Ӧса жи бьньһерʹә чаргошә « Тӧ Ча Дькари Рʹазибуна Хԝә Бьди Кʹьфше?»)
17 Дьбәкә дәрәща тә изьне надә тә, ԝәки тӧ һʹәму ширәтед жь ве готаре бьди хәбате. Ле бир нәкә, кӧ Йаһоԝа тә бәрамбәри тʹӧ кәси накә, әԝ дьле тә дьвинә. Һәрге тӧ бона ԛӧрбане бь дьл шекьрдар би, әԝе жь тә рʹази бә (1 Самуйел 16:7; Маркос 12:41-44).
18. Әм чьрʹа жь Йаһоԝа у жь Иса рʹази нә?
18 Бь сайа ԛӧрбане, гӧнед мә тенә бахшандьне, әм дьбьнә достед Йаһоԝа у гӧмана жийина һʹәта-һʹәтайе дьстиньн. Ԝәрә әм тʹьме бьдьнә кʹьфше, ԝәки әм бона һʹәзкьрьна Йаһоԝа гәләк рʹази нә, чьмки жь бо һʹәзкьрьне әԝи гәләк кʹәрәм сәр мәда барандийә (1 Йуһʹәнна 4:19). Ӧса жи ԝәрә әм рʹазибуна хԝә Исарʹа бьдьнә кʹьфше, чьмки әԝ мә ӧса һʹәз дькә, кӧ әʹмьре хԝә бона мә ԛӧрбан кьрийә! (Йуһʹәнна 15:13)
КʹЬЛАМА 154 Һʹьзкьрьн Хьлаз Набә
a Пешийа кӧ Иса Мәсиһ әʹмьре хԝә ԛӧрбан кьра, Йаһоԝа ида дьбахшандә хьзмәткʹаред хԝә, чьмки әԝ баԝәр бу, ԝәки Кӧрʹе ԝи ԝе һʹәта мьрьне жерʹа амьн бьминә. Ләма жи бона Хԝәде, ԛӧрбан ча бежи ида һатьбу дайине (Рʹомайи 3:25).
