1. Биранина мьрьна Иса чьрʹа бона мә фәрз ә?

 ЙАҺОԜА бона мә пʹешкʹешәкә гәләк ԛимәт дайә, әԝи Кӧрʹе хԝә шандә сәр әʹрде, ԝәки әԝ әʹмьре хԝә бона мә ԛӧрбан кә! (2 Корьнтʹи 9:15) У бь сайа ԛӧрбана Иса, әм дькарьн бьбьнә достед Йаһоԝа Хԝәде у һʹәта-һʹәтайе бьжин. Гәло әв йәк мә һелан накә, ԝәки рʹазибуна хԝә Йаһоԝарʹа бьдьнә кʹьфше, йе кӧ жь бо һʹәзкьрьна мәзьн, ԛӧрбанәкә ӧса ԛимәт бона мә дайә? (Рʹомайи 5:8) Сәва кӧ әм тʹӧ щара ԛимәта ԛӧрбане бир нәкьн, Иса дьхԝазә ԝәки әм һәр сал Биранина мьрьна ԝи дәрбаз кьн (Луԛа 22:19, 20).

2. Ве готареда әме чь шеԝьр кьн?

² Исал, Биранина Мьрьна Иса ԝе 12 Нисане, рʹожа Шәмийе бе дәрбазкьрьне у әм гьшк дьхԝазьн һәрʹьн сәр ве щәжьне. Пешийа у паши Биранине мәщаләкә баш мәрʹа те дайине, ԝәки кʹур сәр ван тьшта бьфькьрьн, чь кӧ Йаһоԝа у Иса бона мә кьрьнә. Ве готареда әме шеԝьр кьн, кӧ кʹьрʹин дәрһәԛа Йаһоԝа у Кӧрʹе ԝи чь мә һин дькә. Готара дьнда әме бьвиньн, кӧ әм ча дькарьн жь кʹьрʹине кʹаре бьстиньн у ча әм дькарьн рʹазибуна хԝә бона ве йәке бьдьнә кʹьфше.

ԚӦРБАН ДӘРҺӘԚА ЙАҺОԜА ЧЬ МӘ ҺИН ДЬКӘ?

3. Мьрьна мәрьвәки ча рʹе вәкьр, ԝәки бь милйона мәрьв жь гӧнә у мьрьне хьлаз бьн? (Бьньһерʹә ӧса жи шькьл.)

³ Ԛӧрбана Иса нишани мә дькә, ԝәки Йаһоԝа һәԛийе һʹәз дькә (Ԛануна Дӧщари 32:4). Гәло чь щурʹәйи? Чаԝа кӧ әм заньн, Адәм гӧрʹа Хԝәде нәкьр, ләма жи гӧнә у мьрьн дәрбази сәр мә жи бу (Рʹомайи 5:12).  Сәва кӧ мә жь гӧнә у мьрьне хьлаз кә, Йаһоԝа Иса шандә сәр әʹрде. Ле ԛӧрбанбуна мәрьвәки беԛьсур, ча дькарә бь милйона мәрьв хьлаз кә? Паԝлосе шанди ӧса гот: «Чаԝа бь нәгӧһдарийа йәки [Адәм] гәләк бунә гӧнәкʹар, ӧса жи бь гӧһдарийа йәки [Иса] гәләк ԝе рʹаст бенә һʹәсабе» (Рʹомайи 5:19; 1 Тимотʹейо 2:6). Демәк жь бо ве йәке, кӧ мәрьвәки беԛьсур гӧһ нәда Хԝәде, әм гьшк бунә мәрьвнә гӧнәкʹар у дьмьрьн. Ләма жи сәва кӧ әм жь гӧнә у мьрьне хьлаз бьн, лазьм бу ԝәки мәрьвәки беԛьсур гӧһ бьда Хԝәде.

4. Йаһоԝа чьрʹа изьн нәда, ԝәки зарʹед Адәм, йед амьн у гӧһдар һʹәта-һʹәтайе бьжин?

⁴ Сәва кӧ әм жь гӧнә у мьрьне хьлаз бьн, гәло бь рʹасти лазьм бу, ԝәки Иса әʹмьре хԝә бона мә бьда? Гәло Йаһоԝа нькарьбу изьн бьда, ԝәки зарʹед Адәм, йед амьн у гӧһдар һʹәта-һʹәтайе бьжитана? Дьԛәԝьмә бона инсанед ԛьсурдар, әв йәк ча сафикьрьнәкә баш у бь логики буйа. Ле әв йәк ԝе нә ль гора һәԛийа Йаһоԝайә кʹамьл буйа. Йаһоԝа Хԝәдейе һәԛ ә, ләма жи әԝи нькарьбу чʹәʹве хԝә сәр нәгӧһдарибуна Адәм бьгьрта.

5. Әм чьрʹа дькарьн баԝәр бьн, ԝәки Йаһоԝа ԝе һәр тьшти бь һәԛи сафи кә?

⁵ Гәло чь дькарьбу бьԛәԝьмийа, һәрге Йаһоԝа ԛӧрбан нәда, мьԛабьли һәԛийа хԝә бьчуйа у изьн бьда, ԝәки зарʹед Адәмә ԛьсурдар һʹәта-һʹәтайе бьжитана? Һәрге ӧса буйа, дьԛәԝьмә мәрьв бәр хԝә кʹәтана у дьшьрмиш буна, кӧ Хԝәде ԝе диса һәԛийа хԝә бьтʹәрʹьбинә у созед хԝә нәйнә сери. Ле әм гәрәке бона тьштед ӧса бәр хԝә нәкʹәвьн. Йаһоԝа сәва кӧ һәԛийе бькә, һазьр бу Кӧрʹе хԝәйи дәлал бькә ԛӧрбан, ләма жи әм дькарьн баԝәр бьн, кӧ әԝе тʹьме бь һәԛи тьшта сафи кә.

6. Ԛӧрбана Иса ча һʹәзкьрьна Йаһоԝа мәрʹа дьдә кʹьфше? (1 Йуһʹәнна 4:9, 10)

⁶ Хенщи ве йәке кӧ ԛӧрбана Иса али мә дькә һәԛийа Йаһоԝа фәʹм кьн, әв ӧса жи али мә дькә кʹурайа һʹәзкьрьна ԝи бьвиньн (Йуһʹәнна 3:16; бьхунә 1 Йуһʹәнна 4:9, 10). Йаһоԝа Кӧрʹе хԝә шанд, ԝәки әʹмьре хԝә бона мә бьде, чьмки Әԝ дьхԝазә ԝәки әм һʹәта-һʹәтайе бьжин у бьбьнә пʹара малбәта ԝи. Гава Адәм гӧнә кьр, Йаһоԝа әԝ жь малбәта хԝә дәрхьст. Ләма жи әм гьшк малбәта Йаһоԝада нәһатьнә буйине. Ле бь сайа ԛӧрбане, Йаһоԝа гӧнед мә дьбахшинә мә, у һьнә ԝәхт шунда Әԝе һʹәму мәрьвед кӧ баԝәрийа хԝә ԝи тиньн у гӧһ дьдьнә ԝи, диса бькә пʹара малбәта хԝә. Иро жи әм дькарьн  һәләԛәтийа хԝә тʹәви Йаһоԝа у хушк-бьра ԛәԝи кьн. Рʹасти жи Йаһоԝа мә гәләк һʹәз дькә! (Рʹомайи 5:10, 11)

7. Еша кӧ Иса кʹьшанд ча нишани мә дькә, ԝәки Йаһоԝа гәләки мә һʹәз дькә?

⁷ Гава Иса дьчәрчьри, дьле Йаһоԝа гәләк дешийа. Әв йәк дьдә кʹьфше, ԝәки Йаһоԝа гәләки мә һʹәз дькә. Мире-щьна гот, кӧ дәрәща чәтьнда, тʹӧ хьзмәткʹаре Хԝәде ԝе ԝирʹа амьн нәминә. Сәва кӧ избат кә ԝәки Мире-щьна дәрәԝин ә, Йаһоԝа изьн да кӧ Иса пешийа мьрьна хԝә бьчәрчьрә (Ибо 2:1-5; 1 Пәтрус 2:21). Йаһоԝа дьдит ԝәки чаԝа сәрԝеред религи ԛәрфед хԝә Иса дькьн, у ча әскәр ԝи данә бәр ԛамчийа у паше сәр стуне мьх кьрьн. Паше Йаһоԝа дит, кӧ ча Иса ешәкә гьран кʹьшанд у мьр (Мәтта 27:28-31, 39). Һәрге Йаһоԝа бьхԝәста, ԝе изьн нәда ԝәки Кӧрʹе ԝи бькӧжьн. Мәсәлә, гава дьжмьна гот, кӧ «һәрге Хԝәде жь ԝи рʹази йә, дә бьра ԝи хьлаз кә», Хԝәде дькарьбу ве йәке бькә (Мәтта 27:42, 43). Ле һәрге Йаһоԝа ӧса бькьра, Иса ԝе нькарьбуйа әʹмьре хԝә ча ԛӧрбан бона мә бьда у гӧмана мә ԝе тʹӧнә буйа. Ләма жи Йаһоԝа изьн да, ԝәки Кӧрʹе ԝи һʹәта мьрьне щәфе бькʹьшинә.

8. Йаһоԝа чь тʹәхмин дькьр, гава дьдит ԝәки Кӧрʹе ԝи дьчәрчьрә? Шьровәкә (Бьньһерʹә ӧса жи шькьл.)

⁸ Ԛәԝата Хԝәде гәләк мәзьн ә, ле әв йәк найе һʹәсабе кӧ һәстед ԝи тʹӧнә нә. Хԝәде мәрьв бь һәст у емосийа әʹфьрандьнә, у жь Кʹьтеба Пироз әм заньн, ԝәки Әԝи әм бь щурʹе хԝә әʹфьрандьнә, ләма жи бь логики йә кӧ һәстед Ԝи жи һәнә. Кʹьтеба Пироз дьбежә, ԝәки мәрьва ‹һерса Ԝи рʹадькьрьн› у «бинтәнг дькьрьн» (Зәбур 78:40, 41). Мәсәлә, сәрһатийа Бьраһим у Исһаԛ бьдә бәр чʹәʹве хԝә. Хԝәде готә Бьраһим, ԝәки әԝ кӧрʹе хԝә ча ԛӧрбан бинә (Дәстпебун 22:9-12; Ибрани 11:17-19). Бьраһим гәләк дьлтәнг бу, чахе кʹер һьлда, ԝәки Исһаԛ сәржекә. Дә бьдә бәр чʹәʹве хԝә Йаһоԝа чь тʹәхмин кьр, гава мәрьвед зӧльм Кӧрʹе ԝи дьзерандьн у кӧштьн! Сәр jw.org, бьньһерʹә видео бь наве Чʹәʹв Бьдьнә Баԝәрийа Ԝан—Бьраһим, Пʹара 2.

9. Әм жь Рʹомайи 8:32, 38, 39 дәрһәԛа һʹәзкьрьна Йаһоԝа чь педьһʹәсьн?

⁹ Ԛӧрбана Иса мәрʹа дьдә кʹьфше, ԝәки һʹәзкьрьна Йаһоԝа һьндава мәда дьһа ԛәԝи йә, нә кӧ һʹәзкьрьна һәвал у мәрьвед мәйә незик (Бьхунә Рʹомайи 8:32, 38, 39). Бе шьк, Йаһоԝа мә дьһа зедә һʹәз дькә, нә кӧ әм хԝәха хԝә һʹәз дькьн. Һәрге тӧ дьхԝази һʹәта-һʹәтайе бьжи, баԝәр бә кӧ Йаһоԝа жь тә зедәтьр ве йәке  дьхԝазә. Һәрге тӧ дьхԝази гӧнед тә бенә бахшандьне, дӧдьли нәбә кӧ Йаһоԝа дьһа зедә дьхԝазә гӧнед тә бьбахшинә тә. Гәло әм ча дькарьн рʹазибуна хԝә бона һәр тьшти Йаһоԝарʹа бьдьнә кʹьфше? Әм дькарьн пе баԝәри у гӧһдарибуна хԝә рʹазибуна хԝә Ԝирʹа нишан кьн. Бәле, ԛӧрбана Иса һʹәзкьрьна Хԝәде нишани мә дькә. Дьнйа тʹәзәда әме дәрһәԛа һʹәзкьрьна Йаһоԝа һе зедә тьшта пебьһʹәсьн (Ԝаиз 3:11).

КʹЬРʹИН ДӘРҺӘԚА ИСА ЧЬ МӘ ҺИН ДЬКӘ?

10. (а) Иса пешийа мьрьна хԝә бона чь бәр хԝә дькʹәт? (б) Иса ча наве Баве хԝә пʹараст? (Ӧса жи бьньһерʹә чаргошә « Наве Йаһоԝа бь Сайа Амьнийа Иса Һатә Рʹумәткьрьне».)

¹⁰ Иса нәдьхԝәст ԝәки ләкʹә бе сәр наве Хԝәде (Йуһʹәнна 14:31). Иса дьлтәнг бу, чьмки ԝе мина кәсәки кӧ кʹьфьри ль Хԝәде дькә, бьһата сущдаркьрьне. Әԝи нәдьхԝаст ԝәки ләкʹә бе сәр наве Баве ԝи, ләма жи әԝи ӧса дӧа кьр: «Баво, һәрге дьбә, ве кʹасе жь мьн дур хә» (Мәтта 26:39). Ле йәкә Иса һʹәта мьрьне Йаһоԝарʹа амьн ма у избат кьр, ԝәки Мире-щьна бӧхдана давежә сәр Баве ԝи.

11. Иса ча нишан дькьр, ԝәки мәрьва һʹәз дькә? (Йуһʹәнна 13:1)

¹¹ Хенщи ве йәке кʹьрʹин нишани мә дькә, ԝәки Иса гәләки мәрьва һʹәз дькә, илаһи шагьртед хԝә (Мәтʹәлок 8:31; бьхунә Йуһʹәнна 13:1). Мәсәлә, Иса пешда заньбу ԝәки хьзмәтийа ԝи у илаһи мьрьна ԝи, ԝе ԛә һеса нибә. Диса жи әԝи нә тʹәне жь бо ве йәке хьзмәт дькьр, чьмки Йаһоԝа әԝ щабдари дабу ԝи, ле чьмки әԝи мәрьв һʹәз дькьрьн. Әԝи бь дьл у щан мьзгини бәла дькьр, мәрьв һин дькьрьн у кәсед дьнрʹа хьзмәт дькьр. Рʹожа мьрьна хԝә жи, Иса ԝәʹдә вәԛәтанд ԝәки ньгед шандийед хԝә бьшо, ԝана  һелан кә у бәрдьлийе бьдә ԝан (Йуһʹәнна 13:12-15). У гава әԝ сәр стуне дардакьри бу, әԝи ԛачахәкирʹа, йе кӧ кʹеләка ԝи дардакьри бу, дәрһәԛа щьнәте гот. Ӧса жи Иса Йуһʹәннарʹа гот, ԝәки дийа ԝи бьбә хԝәйи (Луԛа 23:42, 43; Йуһʹәнна 19:26, 27). Бәле, һʹәзкьрьна Исайә мәзьн нә тʹәне жь мьрьна ԝи, ле жь тʹәмамийа әʹмьре ԝийә сәр әʹрде дьһатә кʹьфше.

12. Иса бәрдәԝам дькә бона кʹара мә чь бькә?

¹² Рʹаст ә, Иса тʹәне «щарәке» бона мә әʹмьре хԝә кьрә ԛӧрбан, ле ньһа жи әԝ гәләк тьшт бона мә дькә (Рʹомайи 6:10). Гәло чь щурʹәйи? Әԝ ԝәʹдә у ԛәԝата хԝә хәрщ дькә, сәва кӧ әм жь ԛӧрбана ԝи кʹаре бьстиньн. Мәсәлә, әԝ Пʹадша, Кʹаһине Мәзьн у сәре щьвате йә (1 Корьнтʹи 15:25; Әфәси 5:23; Ибрани 2:17). Әԝ щабдар ә бона тʹопкьрьна кәсед кӧ ԝе сәр әʹзмана бьжин у кәсед кӧ ԝе сәр әʹрде бьжин. Әв шьхӧл ԝе бе тʹәмамкьрьне, пешийа кӧ тәнгасийа мәзьн хьлаз бә a (Мәтта 25:32; Маркос 13:27). Ӧса жи Иса ван рʹожед хьлазийе бь сайа хӧламе амьн у сәрԝахт рʹӧһʹанида мә тʹер дькә (Мәтта 24:45). Ԝәʹде Сәрԝертийа Һʹәзарсали, Иса ԝе диса бона кʹара мә гәләк тьшт бькә. Бәле, Йаһоԝа бь рʹасти жи Кӧрʹе хԝә бона мә дайә!

БӘРДӘԜАМ КӘ ТЬШТЕД ТʹӘЗӘ ҺИН БӘ

13. Тӧ ча дькари дьһа зедә дәрһәԛа һʹәзкьрьна Йаһоԝа у Иса пебьһʹәси?

¹³ Сәва кӧ тӧ дьһа зедә дәрһәԛа һʹәзкьрьна Йаһоԝа у Иса пебьһʹәси, бәрдәԝам кә дәрһәԛа ве йәке кʹур бьфькьрә. Ԝәʹде Биранине, дьԛәԝьмә тӧ дькари кʹьтеба Мәтта, Маркос, Луԛа у Йуһʹәнна бьхуни, йан жи йәк жь ԝан кʹьтеба. Ле щарәкерʹа гәләки нәхунә. Һеди бьхунә у лекʹолин кә, кӧ чьрʹа әм гәрәке Йаһоԝа у Иса һʹәз бькьн. У чь кӧ тӧ педьһʹәси, кәсед дьнрʹа жи бежә.

14. Ль гора Зәбур 119:97, лекʹолин ча дькарә али мә бькә, ԝәки бәрдәԝам кьн дьһа зедә тьштед тʹәзә дәрһәԛа ԛӧрбане у тьштед дьн пебьһʹәсьн? (Бьньһерʹә ӧса жи шькьл.)

¹⁴ Һәрге тӧ ида гәләк сал Шәʹде Йаһоԝа йи, дьԛәԝьмә тӧ бьфькьри ԝәки ида тʹӧ тьштед тʹәзә тʹӧнә йә, кӧ дәрһәԛа ԛӧрбане, һәԛийа Хԝәде у һʹәзкьрьна ԝи пебьһʹәси. Ле бь рʹасти гәләк тьшт һәнә,  чь кӧ әм дькарьн лекʹолин кьн. Мәсәлә, тӧ дькари әʹдәбйәтед сәр һʹиме Кʹьтеба Пироз бьхуни у лекʹолин ки. Гава тӧ рʹезәкә ӧса дьхуни, йа кӧ рʹьнд фәʹм наки, ве рʹезе кʹур лекʹолин кә. Паше нава рʹожеда сәр ван тьштед тʹәзә кʹур бьфькьрә, чь кӧ тӧ дәрһәԛа Йаһоԝа, Иса у һʹәзкьрьна ԝан пеһʹәсийайи (Бьхунә Зәбур 119:97).

15. Чьрʹа әм гәрәке бәрдәԝам кьн дәрһәԛа тьштед тʹәзә жь Кʹьтеба Пироз пебьһʹәсьн?

¹⁵ Һәрге тӧ тʹьме әʹдәбйәтед мә дьхуни у лекʹолин дьки, ле тьштед тʹәзә у һʹәԝас пенаһʹәси, диса жи хәмгин нәбә. Мәсәлә, кәсед кӧ зерʹ дьгәрʹьн бьдә бәр чʹәʹве хԝә. Әԝана гәрәке бь сьһʹәта у һәла һе гәләк рʹожа жи зерʹ бьгәрʹьн, һʹәта кӧ зерʹәки бьчʹук бьвиньн. Диса жи әԝана бь хирәт дьхәбьтьн, чьмки зерʹ тьштәки гәләк ԛимәт ә. Ле ԛимәта һәр тьштед тʹәзә, йед кӧ әм жь Кʹьтеба Пироз педьһʹәсьн, дьһа мәзьн ә! (Зәбур 119:127; Мәтʹәлок 8:10) Ләма жи бь сәбьр бәрдәԝам кә тьштед тʹәзә жь Кʹьтеба Пироз пебьһʹәсә (Зәбур 1:2).

16. Әм ча дькарьн чʹәʹв бьдьнә Йаһоԝа у Иса?

¹⁶ Гава тӧ лекʹолине дьки, бьфькьрә ԝәки тӧ ча дькари ль гора тьштед кӧ тӧ һин дьби, бьжийи. Мәсәлә, тӧ дькари чʹәʹв бьди һәԛийа Йаһоԝа у фьрԛийе нәки ортʹа мәрьва. Чаԝа кӧ Иса Баве хԝә у кәсед дьн һʹәз дькә, тӧ жи дькари бона хатьре наве Йаһоԝа али хушк-бьра бьки, һәла һе ԝи чахи жи, гава тәрʹа һеса нинә. У мина Иса, тӧ жи дькари мьзгинийе бәла ки. Бь ви щурʹәйи мәщала ԝан жи ԝе һәбә кӧ пебьһʹәсьн, ԝәки Йаһоԝа бона инсанәте чь кьрийә, у ӧса жи ԝе бькарьбьн баԝәрийа хԝә һьндава ԛӧрбана Иса бьдьнә кʹьфше.

17. Готара дьнда әме чь шеԝьр кьн?

¹⁷ Һәрге әм бәрдәԝам кьн дьһа зедә дәрһәԛа ԛӧрбана Иса пебьһʹәсьн, әме һе зедә Йаһоԝа у Кӧрʹе ԝи һʹәз кьн. Һәрге әм ӧса бькьн, Йаһоԝа у Иса жи ԝе һе зедә мә һʹәз бькьн (Йуһʹәнна 14:21; Аԛуб 4:8). Ләма жи ԝәрә әм ван тьшта, чь кӧ Йаһоԝа данә мә, рʹьнд бьдьнә хәбате, ԝәки бәрдәԝам кьн дәрһәԛа ԛӧрбана Иса һе зедә пебьһʹәсьн. Готара дьнда әме бьвиньн, кӧ әм ча дькарьн жь ԛӧрбане кʹаре бьстиньн у бьдьнә кʹьфше, ԝәки әм бона һʹәзкьрьна Йаһоԝа рʹази нә.