1. Гәло Йаһоԝа чьрʹа зәԝащ саз кьрийә?

 ЙАҺОԜА Хԝәдайе ша йә, у әԝ дьхԝазә кӧ әм жи ша бьн (1 Тимотʹейо 1:11). Сәва кӧ әм жь әʹмьре хԝә шабуне у ләзәте бьстиньн, әԝи гәләк пʹешкʹеш дайә мә (Аԛуб 1:17). Зәԝащ йәк жь ван пʹешкʹеша йә. Гава жьн у мерәк һәвдӧ дьстиньн, әԝана соз дьдьнә һәв, кӧ ԝе һәвдӧ һʹәз бькьн, ԛәдьре һәвдӧ бьгьрьн у һәвдӧ бьбьнә хԝәйи. Һәрге һʹәзкьрьна ортʹа ԝанда ԛәԝи бьминә, әԝана ԝе гәләк бәхтәԝар бьн (Мәтʹәлок 5:18).

2. Гәләк мер һьндава жьнед хԝәда чаԝа ньн?

² Сәд һʹәйф кӧ иро гәләк жьн у мер созе кӧ ԝана рʹожа зәԝаще дабунә һәв, найньн сери, ләма жи әԝана бәхтәԝар ниньн. Ль гора һʹәсабәке, гәләк мер һьндава жьнед хԝәда сәрт ьн, ԝана дьхьн, пе гьлийа ԝана беһӧрмәт дькьн у зордарийе ль ԝан дькьн. Һьнә мер бәр хәлԛе жьна хԝәрʹа баш ьн, ле малда ле дьзериньн. Ӧса жи һьнә мер порнографийе дьньһерʹьн у жь бо ве йәке жьнед ԝан хәмгин дьбьн у һʹәзкьрьна мере хԝә тʹәхмин накьн.

3. Һьнә мер чьрʹа жьнед хԝәрʹа нәбаш ьн?

³ Һьнә мер чьрʹа жьнед хԝәрʹа нәбаш ьн? Дьбәкә баве ԝан һьндава дайика ԝанда сәрт бу, ләма жи әԝана дьфькьрьн кӧ әв йәк нормал ә, ԝәки һьндава жьна хԝәда сәрт бьн. Һьнә мер жь бо култура хԝә дьфькьрьн, кӧ «мерәки щамер» гәрәке сәрт бә у жьна хԝәрʹа бьдә кʹьфше, кӧ кʹе йә сәре малбәте. Һьнәк жи һин нәбунә һерса хԝә зәфт кьн. У һьнә мер жи, порнографийайе дьньһерʹьн у ләма жи ньһерʹандьна ԝан сәр жьна у сексе хьраб буйә. У ль гора һьнә һʹәсаба, ԝәʹде пандәмийа COVID-19, дьһа зедә мер дәстпекьрьнә жьнед хԝә беһӧрмәт кьн. Ле чь жи һәбә, мер гәрәке тʹӧ щар һьндава жьна хԝәда сәрт нибә.

4. Меред кӧ Шәʹдед Йаһоԝа нә, гәрәке чь нәкьн у чьрʹа?

 ⁴ Меред кӧ Йаһоԝарʹа хьзмәт дькьн, гәрәке фәсал бьн, ԝәки нәкʹәвьнә бәр байе ньһерʹандьна хьраб һьндава жьна, йа кӧ ве дьнйайеда бәлабуйи йә. a Гәло чьрʹа? Чьмки ньһерʹандьна кәсәки дькарә сәр кьред кәсәки дьн һʹӧкӧм кә. Ләма жи Паԝлосе шанди ԝан хушк-бьрарʹа, йед кӧ Рʹомеда дьжитьн, готьбу, ԝәки «нәкʹәвьнә кьрасе бәнде ве дьнйайе» (Рʹомайи 12:1, 2). Гава Паԝлос Мәсиһийед Рʹомерʹа дьньвиси, әԝана ида гәләк сал нава рʹастийеда бун, ле гьлийед Паԝлос дьдьнә кʹьфше, ԝәки һьнә хушк-бьра һе бьн һʹӧкӧме әʹдәт у фькьред дьнйайеда бун. Ләма жи әԝи тʹәми да ԝан, ԝәки ньһерʹандьн у кьред хԝә бьгӧһерʹьн. Һәмьки әв ширәт бона ԝан меред Мәсиһи жи һатийә дайине, йед кӧ рʹожед мәда дьжин. Сәд һʹәйф, кӧ һьнәк жь ԝан дькʹәвьнә бәр байе ве дьнйайе у зордарийе жьнед хԝә дькьн. b Йаһоԝа дьхԝазә, ԝәки мер һьндава жьна хԝәда чаԝа бә? Щаба ве пьрсе рʹеза сәрәкәда һәйә, йа кӧ ве готареда һатийә дайине.

5. Ль гора 1 Пәтрус 3:7, мер гәрәке һьндава жьна хԝәда чаԝа бә?

⁵ Бьхунә 1 Пәтрус 3:7. Йаһоԝа тʹәми дьдә мера, кӧ «ԛәдьре» жьнед хԝә бьгьрьн. Мере кӧ ԛәдьре жьна хԝә дьгьрә, әԝ һьндава ԝеда сәрт нинә у ле һʹәз дькә. Ве готареда әме бьвиньн, кӧ мер гәрәке ча ԛәдьре жьна хԝә бьгьрә. Ле бәри пешьн, ԝәрә әм шеԝьр кьн, кӧ рʹабун-рʹуньштьна чь щурʹәйи ԛәдьре жьна дехә, чь кӧ мер гәрәке тʹӧ щара нәкьн.

ЖЬНА ХԜӘ НӘЕШИНӘ

6. Йаһоԝа чаԝа нә һьндава меред кӧ зӧлмийе жьнед хԝә дькьн? (Колоси 3:19)

⁶ Зийане нәдә жьна хԝә. Йаһоԝа кәсед кӧ зӧлмийе дькьн, нәфрʹәт дькә (Зәбур 11:5). Әԝ илаһи меред кӧ зордарийе жьнед хԝә дькьн, инкʹар дькә (Малахи 2:16; бьхунә Колоси 3:19). Ль гора 1 Пәтрус 3:7, һәрге мер жьна хԝәрʹа нәбаш бә, достийа ԝи тʹәви Хԝәде ԝе хьраб бә. У Йаһоԝа ԝе һәла һе гӧһ нәдә дӧайед ԝи жи.

7. Ль гора Әфәси 4:31, 32, мер гәрәке тʹәви жьна хԝә ча хәбәр нәдә? (Ӧса жи бьньһерʹә «Хәбәра Шьровәкьри».)

⁷ Тʹәви жьна хԝә сәрт хәбәр нәдә. Һьнә мер бь һерс у сәрт тʹәви жьнед хԝә хәбәр дьдьн. Ле Йаһоԝа хәбәрдана бь «һерс, бәрзәԛи, ԛарʹә-ԛарʹ у кʹьфьри-зьфьри» c нәфрʹәт дькә (Бьхунә Әфәси 4:31, 32). Йаһоԝа һәр тьшти дьбьһе. Бона ԝи фәрз ә, кӧ мер малда тʹәви жьна хԝә ча хәбәр дьдә. Һәрге мер тʹәви жьна хԝә һерс хәбәр дә, әԝе зьраре бьдә һьм зәԝаща хԝә һьм жи достийа хԝә тʹәви Йаһоԝа (Аԛуб 1:26).

8. Ньһерʹандьна Йаһоԝа сәр порнографийайе чь щурʹәйи йә у чьрʹа?

⁸ Порнографийайе нәньһерʹә. Йаһоԝа порнографийайе нәфрʹәт дькә. Ләма жи мере кӧ тьштед хьраб дьньһерʹә, һьм зьраре дьдә достийа хԝә тʹәви Йаһоԝа һьм жи ԛәдьре жьна хԝә нагьрә. d Йаһоԝа дьхԝазә, кӧ мер нә тʹәне пе кьред хԝә, ле пе фькьред хԝә жи жьна хԝәрʹа  амьн бьминә. Иса гот, ԝәки кәсе кӧ пе чʹәʹве хьраб жьнәкә дьн дьньһерʹә, әԝи «ида дьле хԝәда тʹәви ԝе ԛави кьрийә» e (Мәтта 5:28, 29).

9. Йаһоԝа чь нәфрʹәт дькә у чьрʹа?

⁹ Ԝәʹде һәләԛәтийа сексуали жьна хԝә беһӧрмәт нәкә. Һьнә мер зоре жьна хԝә дькьн, ԝәки ԝәʹде һәләԛәтийа сексуали әԝ тьштед ӧса бькә, чь кӧ әԝ нахԝазә бькә, йан жи исафа ԝе ле дьчәрчьринә. Йаһоԝа тьштед ӧса нәфрʹәт дькә. Әԝ дьхԝазә кӧ мер жьна хԝә һʹәз бькә, ле бьбә хԝәйи у ԛәдьре һәстед ԝе бьгьрә (Әфәси 5:28, 29). Һәрге бьрак зордарийе жьна хԝә дькә, йан порнографийайе дьньһерʹә, әԝ ча дькарә ньһерʹандьн у кьред хԝә бьгӧһезә?

ТʹӘРКА ТЬШТЕД ХЬРАБ БЬДӘ

10. Мер ча дькарьн жь мәсәла Иса кʹаре бьстиньн?

¹⁰ Мер ча дькарә тʹәрка зӧльм у зордарийе бьдә? Мәсәлә, әԝ дькарә хирәт бькә кӧ чʹәʹв бьдә Иса. Иса азәп бу, ле әв йәк кӧ әԝ һьндава шагьртед хԝәда чаԝа бу нишан дькә, кӧ мер гәрәке һьндава жьна хԝәда чаԝа бә (Әфәси 5:25). Ԝәрә әм дина хԝә бьдьне, кӧ Иса һьндава шандийед хԝәда чаԝа бу у ча тʹәви ԝан хәбәр дьда.

11. Иса һьндава шандийед хԝәда чаԝа бу?

¹¹ Иса тʹьме һьндава шандийед хԝәда рʹәʹм бу у ԛәдьре ԝан дьгьрт. Әԝ һьндава ԝанда тʹӧ щара сәрт нибу. Рʹаст ә Иса жь ԝан ԛәԝаттьр бу, ле әԝи тʹӧ щара ԛәԝата хԝә нәдьда хәбате, ԝәки әԝана хԝә һьмбәри ԝи сьст һʹәсаб кьн йан жи ԝи бьтьрсьн. Дәԝсе әԝи бь мьлукти ԝанрʹа хьзмәт дькьр (Йуһʹәнна 13:12-17). Иса шандийед хԝәрʹа ӧса гот: «Жь мьн һин бьн, чьмки әз йәки шкәсти у мьлук ьм, у һуне хԝәрʹа рʹьһʹәтийе бьвиньн» (Мәтта 11:28-30). Иса мәрьвәки дьлрʹәʹм бу. Мәрьве дьлрʹәʹм нә кӧ сьст ә, ле ԛәԝи йә, чьмки әԝ дькарә хԝә контрол кә. Гава кәсәки дьн һерса ԝи рʹадькә, әԝ рʹьһʹәт дьминә у емосийед хԝә контрол дькә.

12. Иса ча тʹәви мәрьва хәбәр дьда?

¹² Иса дьле кәсед дьн бь гьлийед хԝә рʹьһʹәт у ԛәԝи дькьр. Әԝи шагьртед хԝәрʹа сәрт хәбәр нәдьда (Луԛа 8:47, 48). Гава дьжмьна ԝи рʹәзил дькьрьн, әԝи ԝана «рʹәзил нәдькьр» (1 Пәтрус 2:21-23). Щарна дәԝса кӧ сәрт щаба ԝан бьдә, Иса ԛә хәбәр нәдьда (Мәтта 27:12-14). Иса бона мера мәсәләкә чьԛас баш ә!

13. Ль гора Мәтта 19:4-6, чь те һʹәсабе кӧ мер гәрәке «тʹәви жьна хԝә бьжи»? (Бьньһерʹә ӧса жи шькьл.)

¹³ Иса готә мера, ԝәки жьнед хԝәрʹа амьн бьн. Әԝи гьлийед Баве хԝә ԝәкʹьланд, йе кӧ готьбу ԝәки мер гәрәке «тʹәви жьна хԝә бьжи, у һәр дӧ ԝе бьбьнә йәк» (Бьхунә Мәтта 19:4-6). Хәбәра Йунани «тʹәви жьна хԝә бьжи» те һʹәсабе «хԝә ԛәԝи ль һәв бьгьрьн», демәк һәләԛәтийа ортʹа жьн у мерда гәрәке ӧса ԛәԝи бә, кӧ те бежи ԝана ԛәԝи хԝә ль һәв гьртийә. Һәрге һәләԛәтийа ԝан хьраб дьбә, һәрдӧ жи зьраре дьстиньн. Ле мер гәрәке чь бькә, ԝәки һәләԛәтийа ԛәԝи тʹәви жьна хԝә хԝәй кә? Әԝ гәрәке һʹәму щурʹә порнографийайе инкʹар кә у дәрберʹа чʹәʹве хԝә жь һʹәму «бош-бәталийе» дур хә (Зәбур 119:37). Мина Ибо әԝ тʹәви чʹәʹве хԝә пәймане гьредьдә, ԝәки пе чʹәʹве хьраб жьнед дьн нәньһерʹә (Ибо 31:1).

14. Мере кӧ зийане дьдә жьна хԝә, гәрәке кʹижан гава бавежә, сәва кӧ диса һәләԛәтийа хԝә тʹәви Йаһоԝа у тʹәви жьна хԝә баш кә?

¹⁴ Мере кӧ бь гьли йан кьред хԝә дьле  жьна хԝә дешинә, гәрәке һьнә гавед фәрз бавежә, ԝәки диса һәләԛәтийа хԝә тʹәви Йаһоԝа у тʹәви жьна хԝә баш кә. Йа пешьн, әԝ гәрәке фәʹм кә, кӧ проблемәкә ԝийә мәзьн һәйә. Йаһоԝа һәр кьред ԝи дьвинә у һәр гьлийед ԝи дьбьһе (Зәбур 44:21; Ԝаиз 12:14; Ибрани 4:13). Йа дӧда, әԝ гәрәке зийане нәдә жьна хԝә у сәр хԝә бьхәбьтә, ԝәки бе гӧһастьне (Мәтʹәлок 28:13). Йа сьсийа, әԝ гәрәке бахшандьне жь жьна хԝә у жь Йаһоԝа бьхԝазә (Кʹаред Шандийа 3:19). Ӧса жи әԝ гәрәке жь Йаһоԝа лава кә, кӧ хԝәстьна ԝи пешда бе, ԝәки әԝ бькарьбә фькьр, хәбәрдан у кьред хԝә контрол кә (Зәбур 51:10-12; 2 Корьнтʹи 10:5; Филипи 2:13). Йа чара, әԝ гәрәке ль гора дӧайед хԝә гава бавежә, ԝәки бькарьбә һʹәму хәбәрдан у кьред хьраб нәфрʹәт кә (Зәбур 97:10). Йа пенща, әԝ гәрәке һәрʹә щәм рʹуспийа у аликʹарийе жь ԝан бьхԝазә (Аԛуб 5:14-16). Йа шәша, әԝ гәрәке хԝәрʹа нет дайнә, ԝәки ида ван тьштед хьраб нәкә. Ӧса жи мере кӧ порнографийайе дьньһерʹә, гәрәке ван шәш гава бавежә, у Йаһоԝа ԝе али ԝи бькә, ԝәки хԝә рʹаст кә (Зәбур 37:5). Ле бәс нинә ԝәки мер тʹәне хԝә жь гьли у кьред хьраб дур бьгьрә. Әԝ гәрәке һин бә ԛәдьре жьна хԝә бьгьрә. Ле гәло әԝ ча дькарә ве йәке бькә?

ТӦ ЧА ДЬКАРИ ԚӘДЬРЕ ЖЬНА ХԜӘ БЬГЬРИ?

15. Мер ча дькарә бьдә кʹьфше, ԝәки әԝ жьна хԝә һʹәз дькә?

¹⁵ Жьна хԝәрʹа бьдә кʹьфше, ԝәки тӧ ле һʹәз дьки. Һьнә бьра хԝәрʹа кьрьнә хәйсәт, ԝәки һәр рʹож жьнед хԝәрʹа бьдьнә кʹьфше, кӧ чьԛас ԝан һʹәз дькьн, у бь сайа ве йәке малбәта ԝан бәхтәԝар ә (1 Йуһʹәнна 3:18). Мер дькарә пе тьштед бьчʹук жи бьдә кʹьфше, ԝәки әԝ жьна хԝә һʹәз дькә. Мәсәлә, әԝ дькарә дәсте ԝе бьгьрә, йан жи ле һʹәмез кә. Йан жи әԝ дькарә смс жерʹа бьшинә у жерʹа бежә «Әʹмьре мьн, мьн бира тә кьрийә» йан жи «Рʹожа тә чаԝа дәрбаз дьбә?».  Щарна сәва кӧ һʹәзкьрьна хԝә нишан кә, әԝ дькарә пʹешкʹешәкә бьчʹук, йан жи кӧлирка жерʹа бинә. Бь ви щурʹәйи мер дьдә кʹьфше, ԝәки әԝ ԛәдьре жьна хԝә дьгьрә у дьхԝазә зәԝаща хԝә дьһа бәхтәԝар кә.

16. Чьрʹа мер гәрәке пʹайе жьна хԝә бьдә?

¹⁶ Жьна хԝәрʹа бежә, ԝәки тӧ ле ԛимәт дьки. Мере кӧ ԛәдьре жьна хԝә дьгьрә, нишани ԝе дькә, кӧ әԝ сәва чь ле ԛимәт дькә. Мәсәлә, чахе жьна ԝи тьштәкида пьштгьрийа ԝи дькә, әԝ рʹазибуна хԝә жерʹа дьдә кʹьфше (Колоси 3:15). Гава мер жь дьл пʹайе жьна хԝә дьдә, әԝ дьле ԝе ша дькә у нишани ԝе дькә, кӧ ле һʹәз дькә у ԛәдьре ԝе дьгьрә (Мәтʹәлок 31:28).

17. Мер чаԝа дькарә ԛәдьре жьна хԝә бьгьрә?

¹⁷ Һьндава жьна хԝәда һʹәйф у бь ԛәдьр бә. Мере кӧ жьна хԝә һʹәз дькә, бь дьл ле ԛимәт дькә у ча пʹешкʹеша жь Йаһоԝа һʹәсаб дькә (Мәтʹәлок 18:22; 31:10). Бәле, әԝ тʹьме жерʹа һʹәйф ә у ԛәдьре ԝе дьгьрә. Мәсәлә, ԝәʹде һәләԛәтийа сексуали, мер гәрәке зоре жьна хԝә нәкә ԝәки әԝ тьштед ӧса бькә, чь кӧ әԝ нахԝазә бькә, тьштед кӧ ԝе ньмьз дькә йан тьштед кӧ исафа ԝе дьчәрчьри нә. f Һәмьки исафа мер жи гәрәке бәр Йаһоԝа тʹәмьз бьминә (Кʹаред Шандийа 24:16).

18. Мер гәрәке чь нете бьдьнә пешийа хԝә? (Ӧса жи бьньһерʹә чаргошә « Чар Гавед Фәрз бона Мера».)

¹⁸ Мерно, баԝәр бьн кӧ Йаһоԝа хирәта ԝә дьвинә у дьшекьринә, гава һун һәр алийава ԛәдьре жьна хԝә дьгьрьн. Жьна хԝә нәешиньн, ле һьндава ԝеда рʹәʹм, дьлгәрм у бь ԛәдьр бьн. Ӧса һуне бьдьнә кʹьфше, кӧ һун жьна хԝә һʹәз дькьн у ле ԛимәт дькьн. Ӧса жи һуне һәләԛәтийа хԝәйә лапә фәрз ӧнда нәкьн, демәк һәләԛәтийа хԝә тʹәви Йаһоԝа (Зәбур 25:14).