1. Һьнә пʹешкʹешед кӧ мә жь Иса стандийә, чь нә?

 ИСА жь һәр кәси зедәтьр али мәрьва кьрийә. Гава әԝ сәр әʹрде бу, әԝи гәләк щар бь сайа кʹәрәмәта али мәрьва дькьр (Луԛа 9:12-17). Әԝи пʹешкʹеша лапә ԛимәт дайә мә, демәк әʹмьре хԝә бона мә бәрва дайә (Йуһʹәнна 15:13). Паши сахкьрьне жи Иса бәрдәԝам дькә али мә бькә. Чаԝа кӧ әԝи соз дабу, әԝи жь Йаһоԝа рʹәща кьр ԝәки рʹӧһʹе пироз бьдә мә, кӧ мә һин кә у бәр дьле мәда бе (Йуһʹәнна 14:16, 17; 16:13). Ӧса жи Иса бь сайа щьвата мә һин дькә, кӧ әм мьзгинийе бәла кьн у шагьрта һин кьн (Мәтта 28:18-20).

2. Ль гора Әфәси 4:7, 8 пʹешкʹешед бь щурʹе мәрьва кʹе нә?

² Иса пʹешкʹешәкә дьн жи дайә мә. Паԝлосе шанди ньвиси, кӧ гава Иса чу сәр әʹзмана, әԝи пʹешкʹешед бь щурʹе мәрьва данә мә (Бьхунә Әфәси 4:7, 8). Паԝлос зәлал кьр кӧ Иса әԝ пʹешкʹеш дан, сәва кӧ әԝана щурʹә-щурʹә алийада аликʹарийе бьдьнә щьвате (Әфәси 1:22, 23; 4:11-13). Иро әв пʹешкʹеш тенә һʹәсабе бәрдәстийед щьвате, рʹуспийед щьвате у бәрпьрсийаред мьһале. a Һәмьки әԝана беԛьсур ниньн, ләма жи әԝана шашийа дькьн (Аԛуб 3:2). Ле диса жи Ахайе мә Иса Мәсиһ, бь сайа ван бьред ԛимәт али мә дькә.

3. Шьровәкьн кӧ әм ча дькарьн пьштгьрийа бьред щабдар бькьн, йед кӧ ча «пʹешкʹеш» һатьнә дайине?

³ Иса бь сайа бьред кӧ ча пʹешкʹеш һатьнә дайине, щьвате дьшьдинә (Әфәси 4:12). Әм жи дькарьн али ԝан бькьн, ԝәки әԝана ве щабдарийа фәрз биньн сери. Ԝәрә әм дина хԝә бьдьнә мәсәләке. Һьнә хушк-бьра рʹастә-рʹаст авакьрьна Одед Щьватада кʹар дькьн. Ле һьнә кәс жи хԝарьне һазьр дькьн, авакʹара бь әʹрәбед хԝә дьбьн-тиньн,  йан жи шьхӧлед дьн дькьн, у бь ви щурʹәйи пьштгьрийа шьхӧле авакьрьне дькьн. Мина ве йәке, әм гьшк дькарьн бь гьли у кьред хԝә пьштгьрийа бәрдәстийед щьвате, рʹуспийа у бәрпьрсийаред мьһале бькьн. Ве готареда әме бьвиньн, кӧ әм ча жь хирәта ԝан кʹаре дьстиньн у әм ча дькарьн бьдьнә кʹьфше, кӧ әм ԝана ԛимәт дькьн. Ӧса жи әме бьвиньн, кӧ әм ча дькарьн Исарʹа нишан кьн, ԝәки әм бона ве пʹешкʹеше жь ԝи рʹази нә.

БӘРДӘСТИЙЕД ЩЬВАТЕ КʹОМӘКЕ ДЬДЬН

4. Ԛьрʹна йәкеда, һьнә шьхӧлед «кʹомәкдарийе», йед кӧ бәрдәстийед щьвате дькьрьн, чь бун?

⁴ Ԛьрʹна йәкеда, һьнә бьра ча бәрдәстийед щьвате дьһатьнә кʹьфшкьрьне (1 Тимотʹейо 3:8). Ча те кʹьфше, йед кӧ ль гора гьлийед Паԝлос «кʹомәкдарийе» дьдан, әԝана бун (1 Корьнтʹи 12:28). Бәрдәстийед щьвате һьнә шьхӧлед фәрз дькьрьн, ԝәки мәщала рʹуспийа һе зедә һәбә, кӧ дина хԝә бьдьнә шьхӧле һинкьрьне у шьвантийе. Мәсәлә, дьбәкә бәрдәстийед щьвате копийед Ньвисаред Пироз чедькьрьн, йан жи тьштед кӧ бона копикьрьне лазьм бун, дькʹьрʹин.

5. Иро бәрдәстийед щьвате чь шьхӧла дькьн?

⁵ Ԝәрә әм шеԝьр кьн һьнә шьхӧла, йед кӧ бәрдәстийед щьвате дькьн (1 Пәтрус 4:10). Әԝана дьбәкә бона һʹәсаб йан жи мьһалед щьвате щабдар ьн, әʹдәбйәта сьфарәш дькьн у дьдьнә мьзгинвана, бона система дәнг у видеойа щабдар ьн, щурʹә-щурʹә шьхӧлада кʹар дькьн, йан жи бона хԝәйкьрьна Ода Щьвате аликʹарийе дьдьн. Әв һʹәму шьхӧл гәләк фәрз ьн, сәва кӧ хушк-бьра жь щьвате шабуне бьстиньн, у шьхӧле бәлакьрьна мьзгинийе бь организә бе кьрьне (1 Корьнтʹи 14:40). Ӧса жи һьнә бәрдәстийед щьвате ԝәʹде Бәрнама Щьвине Бьжин у Хьзмәт кьн пе готара дәрдькʹәвьн. Һьнә бәрдәстийед щьвате жи ча щабдаре кʹоме тенә кʹьшфкьрьне, йан жи тʹәви рʹуспийа дьчьнә сәрледана шьвантийе.

6. Әм чьрʹа бона шьхӧлед бәрдәстийед щьвате рʹази нә?

⁶ Гәло щьват чь кʹаре дьстиньн жь шьхӧлед кӧ бәрдәстийед щьвате дькьн? Хушкәкә бь наве Беберли, b йа кӧ Боливйайеда дьжи, ӧса дьбежә: «Бь сайа бәрдәстийед щьвате, әз жь щьвата шабуне дьстиньм. Бь сайа шьхӧлед ԝан әз дькарьм кʹьлама бьстьрем, щаба хԝә бьдьм, гӧһ бьдьмә готара у ӧса жи жь шькьл у видеойа һин бьм. Әԝана бона бехофийа әндәмед щьвате хәм дькьн у али ԝан мәрьва дькьн, йед кӧ нькарьн бенә Ода Щьвате, кӧ әԝана бь сайа видеоконференсийайе гӧһ бьдьнә щьвина. Паши щьвате, әԝана оде паԛьж дькьн, һʹәсаба дьньһерʹьн у избат дьбьн һәла һʹәму әʹдәбйәт һәнә чь кӧ мәрʹа лазьм ьн. Әз гәләк жь ԝан рʹази мә!» Хушкәкә бь наве Лесли, йа кӧ ль Коломбйайе дьжи, дәрһәԛа мере хԝә, йе кӧ щьватеда рʹуспи йә, ӧса дьбежә: «Мере мьн бь рʹасти жи һʹәԝще бәрдәстийед щьвате йә. Бе ԝан, ԝе дьһа зедә шьхӧл стуйе ԝида буйа, ләма жи әз бона аликʹари у хирәта ԝан бьра, гәләк рʹази мә». Бь рʹасти һәр кәс жь мә бона шьхӧлед бәрдәстийед щьвате гәләк рʹази йә (1 Тимотʹейо 3:13).

7. Әм чаԝа дькарьн нишан кьн, кӧ әм бәрдәстийед щьвате ԛимәт дькьн? (Бьньһерʹә ӧса жи шькьл.)

⁷ Рʹаст ә әм шьхӧлед бәрдәстийед щьвате дьшекьриньн, ле Кʹьтеба Пироз мә һелан дькә, кӧ әм ве йәке ԝанрʹа бежьн (Колоси 3:15). Рʹуспики бь наве Кристофер, йе кӧ ль Финландайе дьжи, бь ви щурʹәйи рʹазибуна хԝә дьдә кʹьфше: «Әз щарна бь сайа нәʹмә йан жи смс-е бәрдәстийе  щьватерʹа рʹезәке дьньвисьм у дьбежьм кӧ әԝи ча дьле мьн ԛәԝи кьрийә, йан жи чьрʹа әз хьзмәтийа ԝи ԛимәт дькьм». Щил у Паскал, йед кӧ ль Каләдонйа Ну дьжин, гәләк щар бона бәрдәстийед щьвате дӧа дькьн. Паскал дьбежә: «Ван пашԝәхтийа, әм гәләк щар дәрһәԛа бәрдәстийед щьвате дӧа дькьн. Әм жь ԝан рʹази нә у дӧа дькьн кӧ Йаһоԝа али ԝан бькә». Йаһоԝа гӧһ дьдә дӧайед ӧса у тʹәмамийа щьвате жь ве йәке кʹаре дьстинә (2 Корьнтʹи 1:11).

РʹУСПИ БЬ ДЬЛ У ЩАН ЩЬВАТЕДА КʹАР ДЬКЬН

8. Ԛьрʹна йәкеда рʹуспийа чь дькьрьн? (1 Тʹесалоники 5:12, 13)

⁸ Ԛьрʹна йәкеда рʹуспи бь хирәт щьватеда кʹар дькьрьн (Бьхунә 1 Тʹесалоники 5:12, 13; 1 Тимотʹейо 5:17). Ԝана рʹебәрийа щьвате дькьр, демәк щьват дәрбаз дькьрьн у ча кʹома рʹуспийа тьшт сафи дькьрьн. Ӧса жи ԝана бь дьловани ширәт дьданә хушк-бьра, ԝәки щьват хԝәйкьри бә (1 Тʹесалоники 2:11, 12; 2 Тимотʹейо 4:2). Хенщи ве йәке, рʹуспи дьхәбьтин, ԝәки әʹбура малбәта хԝә бькьн у хирәт дькьрьн кӧ баԝәрийа хԝә у достийа хԝә тʹәви Йаһоԝа ԛәԝи кьн (1 Тимотʹейо 3:2, 4; Тито 1:6-9).

9. Һьнә щабдарийед рʹуспийа чь нә?

⁹ Иро жи гәләк шьхӧлед рʹуспийа һәнә. Мәсәлә, әԝана мьзгинван ьн (2 Тимотʹейо 4:5). Әԝана мьзгинийе бь дьл у щан бәла дькьн, шьхӧле бәлакьрьна мьзгинийе организә дькьн у мә һин дькьн кӧ әм жи бьбьнә мьзгинван у дәрсдаред баш. Ӧса жи әԝана чаԝа һʹакьм ьн у ве щабдарийа хԝә бь дьловани тиньн сери у фьрԛийе накьнә ортʹа мәрьва. Гава Мәсиһик гӧне гьран дькә, рʹуспи һәр тьшти дькьн кӧ али ԝи бькьн, ԝәки әԝ диса бьбә досте Йаһоԝа. Ӧса жи әԝана чь жь дәсте ԝан те дькьн, ԝәки щьват һәр алийава паԛьж бьминә (1 Корьнтʹи 5:12, 13; Галати 6:1). Ле бәри пешьн рʹуспи шьван ьн (1 Пәтрус 5:1-3). Әԝана готаред сәр һʹиме Кʹьтеба Пироз дьхуньн, хирәт дькьн кӧ хушк-бьра рʹьнд нас кьн у сәрледанед шьвантийе дькьн. Һьнә рʹуспи жи кʹар дькьн сәр авакьрьн у хԝәйкьрьна Одед щьвата, бона организәкьрьна щьватед мәзьн щабдар ьн, йан жи Комитейед Һәвкʹарийа Нәхԝәшхана у Кʹома Тʹәсәликьрьна Нәхԝәшада кʹар дькьн. Бәле, рʹуспи гәләки бона мә кʹар дькьн!

10. Әм чьрʹа щәфе рʹуспийа ԛимәт дькьн?

¹⁰ Йаһоԝа пешда готьбу, кӧ шьван ԝе мә бьбьнә хԝәйи у ләма жи әме «ида нәтьрсьн у нәшкен» (Йерәмйа 23:4, ИМ). Гава дийа хушкәкә бь наве Щоанна, йа кӧ ль Финландайе дьжи, гьран нәхԝәш кʹәт, әԝе пе чʹәʹве хԝә дит кӧ әв гьли чьԛас рʹаст ьн. Щоанна дьбежә: «Мьнрʹа чәтьн ә дьле хԝә кәсед дьнрʹа вәкьм. Ле рʹуспики кӧ мьн ле һаԛас рʹьнд нас нәдькьр бь сәбьр гӧһ да мьн, тʹәви мьн дӧа кьр у мьнрʹа гот кӧ Йаһоԝа мьн һʹәз дькә. Найе бира мьн кӧ әԝи чь готьбу, ле бь сайа гьлийед ԝи, әʹдьлайи кʹәтә дьле мьн. Әз баԝәр ьм кӧ Йаһоԝа ԝәʹдәда ԝи шандә бал мьн». Гәло рʹуспийед щьвата тә ча али тә дькьн?

11. Әм ча дькарьн нишан кьн, ԝәки әм бона щәфе рʹуспийа рʹази нә? (Бьньһерʹә ӧса жи шькьл.)

¹¹ Йаһоԝа дьхԝазә ԝәки әм жь дьл рʹазибуна хԝә рʹуспийарʹа «бона шьхӧле ԝан» бьдьнә кʹьфше (1 Тʹесалоники 5:12, 13). Хушкәкә бь наве Һенрийета, йа кӧ ль Финландайе дьжи, ӧса дьбежә: «Рʹуспи һазьр ьн али мә бькьн, ле әв йәк найе һʹәсабе ԝәки ԝәʹдә у ԛәԝата ԝан бесинор ә, йан жи проблемед ԝан тʹӧнә нә. Щарна әз ԝанрʹа дьбежьм: ‹Тӧ зани, тӧ бь рʹасти жи рʹуспики баш и›». Хушкәкә бь наве Сара, йа кӧ ль Тʹьркйәйе дьжи, ӧса дьбежә: «Рʹуспи һʹәԝще һелане нә, ԝәки әԝана бькарьбьн бәрдәԝам кьн щабдарийед  хԝә биньн сери. Ләма жи әм дькарьн смс ԝанрʹа бьшиньн, ԝана тʹәглифи сәр нанхԝарьне кьн, йан жи тʹәви ԝан һәрʹьнә хьзмәтийе». Һәрге тӧ конкрет бона щәфе рʹуспики рʹази йи, жь кʹәрәма хԝә мәщале бьгәрʹә ԝәки дәрһәԛа ве йәке жерʹа бежи (1 Корьнтʹи 16:18).

БӘРПЬРСИЙАРЕД МЬҺАЛЕ ЩЬВАТА ԚӘԜИ ДЬКЬН

12. Ԛьрʹна йәкеда щьват чаԝа дьһатьнә шьдандьне? (1 Тʹесалоники 2:7, 8)

¹² Һьнә меред кӧ Иса ча «пʹешкʹеш» данә щьвате, щабдарикә дьн тиньн сери. Бьн рʹебәрийа Исада, рʹуспийед ль Оршәлиме, мәсәлә Паԝлос, Барнабас у һьнә бьред дьн бәрпьрсийаред мьһале кʹьфш дькьрьн (Кʹаред Шандийа 11:22). Гәло чьрʹа? Чаԝа кӧ бәрдәстийед щьвате у рʹуспи дьһатьн кʹьфшкьрьне кӧ щьвата бьшьдиньн, бәрпьрсийаред мьһале жи бь ве нете дьһатьнә кʹьфшкьрьне (Кʹаред Шандийа 15:40, 41). Ԝан бьра гәләк тьшт ԛӧрбан дькьрьн у һәла һе әʹмьре хԝә жи дькьрьнә бьн хофе, ԝәки кәсед дьн һин кьн у ԝана бьшьдиньн (Бьхунә 1 Тʹесалоники 2:7, 8).

13. Кʹижан ьн һьнә щабдарийед бәрпьрсийаред мьһале?

¹³ Бәрпьрсийаред мьһале тʹьме рʹеԝитийеда ньн. Һьнәк жь ԝан бь сәда километра рʹеԝитийе дькьн кӧ бьгьһижьнә щьвата. Һәр һʹәфтийе, бәрпьрсийаред мьһале чәнд готара дьхуньн у сәрледанед шьвантийе дькьн. Ӧса жи әԝана щьвинәке тʹәви пешәнга дәрбаз дькьн, щьвинәке тʹәви рʹуспийа у чәнд щьвинед бона хьзмәтийе дәрбаз дькьн. Әԝана готара һазьр дькьн у щьватед мәзьн организә дькьн. Әԝана мәкʹтәба бона пешәнга дәрбаз дькьн, бона һʹәму пешәнгед мьһале щьвинәкә мәхсус дәрбаз дькьн у ӧса жи  щабдарийед дьн тиньн сери, кʹижан кӧ гәрәке зу бенә кьрьне, йед кӧ әԝана жь Бәйтʹәле дьстиньн.

14. Әм чьрʹа шьхӧлед бәрпьрсийаред мьһале ԛимәт дькьн?

¹⁴ Щьват чаԝа жь шьхӧлед кӧ бәрпьрсийаред мьһале дькьн, кʹаре дьстиньн? Бьраки кӧ ль Тʹьркйәйе дьжи, дәрһәԛа сәрледана бәрпьрсийаре мьһале ӧса дьбежә: «Һәр щар чахе әԝ сәрледана мә дькә, хԝәстьна мьн дьһа мәзьн дьбә кӧ али хушк-бьра бькьм. Мьн гәләк бәрпьрсийаред мьһале нас кьрьнә, ле ԛә йәк жь ԝана нәготийә ԝәки ԝәʹде ԝи тʹӧнә йә кӧ гӧһ бьдә мьн». Щоанна, йа кӧ мә жоре бәʹса ԝе кьрьбу, тʹәви бәрпьрсийарәки мьһале чубу хьзмәтийе, ле тʹӧ кәс мал нибу. Әԝ ӧса дьбежә: «Диса жи әзе тʹӧ щара ве рʹоже бир нәкьм. Дӧ хушкед мьн тʹәзә дәрбази щики дьн бьбун, у мьн гәләки бира ԝан дькьр. Бәрпьрсийаре мьһале бәр дьле мьнда һат у гот, ԝәки әԝ йәк ԝәʹдәлу йә кӧ әм дури малбәт у һәвалед хԝә нә, ле дьнйа тʹәзәда мәщала мә ԝе һәбә, кӧ һʹәта-һʹәтайе тʹәвайи ԝәʹдә дәрбаз кьн». Бәле, гәләк хушк-бьра жь сәрледана бәрпьрсийаред мьһале кʹар стандьнә (Кʹаред Шандийа 20:37–21:1).

15. (а) Ль гора 3 Йуһʹәнна 5-8, әм ча дькарьн нишан кьн, кӧ әм жь бәрпьрсийаред мьһале рʹази нә? (Бьньһерʹә ӧса жи шькьл.) (б) Әм чьрʹа гәрәке жьнед бьред щабдар ԛимәт кьн, у ча әм дькарьн ве йәке бькьн? (Бьньһерʹә чаргошә « Жьнед Бьред Щабдар Бир Нәкьн».)

¹⁵ Йуһʹәннайе шанди готә Гайос, ԝәки әԝ һьмбәри бьред кӧ тенә щьвате ԝәки хушк-бьра һелан кьн, меванһʹәз бә у ӧса ԝана вәрʹекә, «чаԝа кӧ ль Хԝәде хԝәш те» (Бьхунә 3 Йуһʹәнна 5-8). Әм жи гәрәке ӧса бькьн. Мәсәлә, әм дькарьн бәрпьрсийаре мьһале тʹәглифи мала хԝә кьн сәр нанхԝарьне. Йан жи гава әԝ те щьвата мә, әм дькарьн һәрʹьн сәр щьвинед бона хьзмәтийе. Лесли, йа кӧ мә жоре бәʹса  ԝе кьрьбу, рʹазибуна хԝә бь щурʹәки майин жи дьдә кʹьфше. Әԝ дьбежә: «Әз дӧа дькьм, ԝәки Йаһоԝа бона һʹәԝщед ԝан хәм бькә. Ӧса жи мьн тʹәви малхе хԝә нәʹмә ԝанрʹа шанд у гот, кӧ мә жь сәрледана ԝан кʹарәкә мәзьн станд». Бир нәкә ԝәки бәрпьрсийаред мьһале жи рʹасти чәтьнайа тен у мина мә дьԝәстьн. Щара әԝана нәхԝәш дькʹәвьн, бәр хԝә дькʹәвьн у һәла һе дьлтәнг жи дьбьн. Гьлийед тәйә дьлгәрм йан жи пʹешкʹешәкә бьчʹук, дькарә щаба дӧайед бәрпьрсийаре мьһале бьдә (Мәтʹәлок 12:25).

ӘМ ҺʹӘԜЩЕ ԜАН ЬН

16. Бьра дькарьн кʹижан пьрса бьдьнә хԝә? (Мәтʹәлок 3:27)

¹⁶ Сәр тʹәмамийа дьнйайе, гәләк бьра ча «пʹешкʹеш» һатьнә дайине, у һе зедә бьред ӧса лазьм ьн. Һәрге тӧ бьраки ньхӧманди йи гәло тӧ дькари «аликʹарийа дәсттәнга бьки» (Бьхунә Мәтʹәлок 3:27). Гәло тӧ дьхԝази бьби бәрдәстийе щьвате йан рʹуспи, ԝәки али хушк-бьра бьки? c Гәло тӧ дькари әʹмьре хԝәда һьнә гӧһастьна бьки, ԝәки Мәкʹтәба бона Мьзгинванед Пʹадшатийе дәрбаз би? Әв һинбун ԝе мәщале бьдә тә, ԝәки Иса һе зедә шьхӧла тʹәсмили тә кә. Һәрге тӧ дьфькьри ԝәки тӧ һәла һе бона ве һинбуне һазьр нини, Йаһоԝарʹа дӧа бькә. Аликʹарийа рʹӧһʹе пироз бьхԝазә, ԝәки тӧ бькарьби һʹәму щабдарийед кӧ тәрʹа тенә дайине бини сери (Луԛа 11:13; Кʹаред Шандийа 20:28).

17. Меред кӧ ча «пʹешкʹеш» һатьнә дайине дәрһәԛа Пʹадше мә Иса Мәсиһ чь избат дькьн?

¹⁷ Шьхӧлед кӧ бьред кʹьфшкьри ван рʹожед хьлазийе дькьн, избат дькьн ԝәки Иса рʹебәрийа мә дькә (Мәтта 28:20). Гәло тӧ рʹази нини, кӧ Пʹадше мә бь дьловани бьред баш у щерʹьбанди кʹьфш кьрьнә, йед кӧ мә дьбьнә хԝәйи? Ләма жи мәщала бьгәрʹә кӧ ԝанрʹа бежи ԝәки тӧ щәфе ԝан гәләк дьшекьрини. Рʹазибуна хԝә Йаһоԝарʹа жи бьдә кʹьфше, чьмки әԝ ә Канийа «һәр дайина ԛәнщ у һәр пʹешкʹеша кʹамьл» (Аԛуб 1:17).