1-2. (а) Һьнә хьзмәткʹаред Йаһоԝа дьбәкә бона чь бәр хԝә дькʹәвьн? (б) Ве готареда әме дина хԝә бьдьнә чь?

 ФЬРԚИ тʹӧнә әм чәнд сали нә, щара шьк a дькарә бькʹәвә дьле мә һәр кәси. Мәсәлә, щаһьләки бьдә бәр чʹәʹве хԝә, йе кӧ дӧдьли дьбә ԝәки Йаһоԝа бона ԝи хәм дькә. Ләма жи дьбәкә әԝ дьфькьрә кӧ әԝ бона ньхӧмандьне һазьр нинә. Йан жи дәрһәԛа бьраки бьфькьрә, йе кӧ щаһьлтийеда сафи кьрьбу пәй һәбуке нәкʹәвә, ле дина хԝә бьдә шьхӧле бәлакьрьне мьзгинийе. Ле ньһа ԝирʹа чәтьн ә әʹбура малбәта хԝә бькә у әԝ бәр хԝә дькʹәвә кӧ сафикьрьна ԝи баш бу йан на. Йан жи дәрһәԛа хушкәкә әʹмьрда мәзьн бьфькьрә, йа кӧ ида бе ԛәԝат ә. Дьбәкә әԝ дьлтәнг буйә, чьмки ида нькарә мина бәре хьзмәт кә. Гәло тә жи ԛә пьрсед ӧса дайә хԝә: «Гәло Йаһоԝа һаж һʹале мьн һәйә? Гәло һежа бу кӧ мьн һаԛас тьшт бона Йаһоԝа кьрийә? Гәло әз бона Йаһоԝа һәла һе ԛимәт ьм?»

² Сәва кӧ баԝәрийа мә сьст нәбә у әм хьзмәтийа Йаһоԝада хирәта хԝә ӧнда нәкьн, әм гәрәке щабед ԝан пьрса бьстиньн. Ве готареда әме дина хԝә бьдьнә чәнд принсипед Кʹьтеба Пироз, йед кӧ дькарьн али мә бькьн, һәрге әм дӧдьли дьбьн (1) кӧ Йаһоԝа бона мә хәм дькә,  (2) сафикьрьнед мәйә бәре баш бун йан на у (3) әм бәр чʹәʹве Йаһоԝа һәла һе ԛимәт ьн йан на.

ЧЬ ДЬКАРӘ АЛИ МӘ БЬКӘ?

3. Һәрге шьк дьле мәда һәбьн, әм гәрәке чь бькьн?

³ Сәва кӧ әм шькед хԝә алт кьн, әм дькарьн бь сайа Кʹьтеба Пироз щабед пьрсед хԝә бьгәрʹьн. Һәрге әм ӧса бькьн, әме ԛәԝате бьстиньн, рʹӧһʹанида пешда һәрʹьн у «баԝәрийеда һʹимгьрти бьн» (1 Корьнтʹи 16:13).

4. Әм чаԝа дькарьн «һәр тьшти бьщерʹьбиньн»? (1 Тʹесалоники 5:21)

⁴ Бьхунә 1 Тʹесалоники 5:21. Кʹьтеба Пироз мә һелан дькә «һәр тьшти бьщерʹьбиньн». Гәло әм ча дькарьн ве йәке бькьн? Чахе әм тьштәкида дӧдьли дьбьн, әм гәрәке лекʹолин кьн һәла әв йәк сәр һʹиме Кʹьтеба Пироз ә йан на. Мәсәлә, бьфькьрә дәрһәԛа щаһьле кӧ баԝәр нибу, ԝәки Йаһоԝа бона ԝи хәм дькә. Сәва кӧ избат бә һәла әв йәк рʹаст ә йан на, әԝ гәрәке ньһерʹандьна Йаһоԝа дәрһәԛа ве йәке пебьһʹәсә.

5. Әм ча дькарьн гӧһ бьдьнә дәнге Йаһоԝа, ԝәки щабед пьрсед хԝә бьстиньн?

⁵ Гава әм Кʹьтеба Пироз дьхуньн, әм ча бежи дәнге Йаһоԝа дьбьһен. Ле сәва кӧ әм тедәрхьн ԝәки ньһерʹандьна Йаһоԝа дәрһәԛа пьрсәкә мәйә шәхси чь йә, хирәт лазьм ә. Әм гәрәке рʹезед ӧса бьгәрʹьн, йед кӧ дәрәща мәва гьредайи нә. Бона лекʹолине әм дькарьн ԝан һащәта бьдьнә хәбате, йед кӧ тʹәшкиләта Йаһоԝа дьдә мә (Мәтʹәлок 2:3-6). Пешийа кӧ әм лекʹолине бькьн, ԝе баш бә әм дӧа кьн, ԝәки Йаһоԝа али мә бькә, кӧ әм щаба пьрса хԝә бьвиньн. Паше әм дькарьн принсипед Кʹьтеба Пироз у информасийа керһати бьгәрʹьн. Ӧса жи әм дькарьн Кʹьтеба Пирозда сәрһатийед ԝан хьзмәткʹаред Хԝәде бьхуньн, дәрәщед кʹижана мина йед мә бун.

6. Щьватед мә ча дькарьн али мә бькьн, ԝәки әм дӧдьлибуна хԝә алт кьн?

⁶ Йаһоԝа бь сайа щьвата жи тʹәви мә хәбәр дьдә. Һәрге әм бәрдәԝам кьн һәрʹьнә щьвата, әм дьбәкә готарәкеда йан жи щаба хушк йан бьракида тьштәки ӧса бьбьһен, чь кӧ дькарә али мә бькә, ԝәки дӧдьлибуна хԝә алт кьн (Мәтʹәлок 27:17). Ньһа ԝәрә әм бьвиньн, кӧ әм ча дькарьн щабед һьнә пьрсед хԝә бьстиньн.

ГӘЛО ЙАҺОԜА БОНА МӘ ХӘМ ДЬКӘ?

7. Һьнә мәрьв бона чь бәр хԝә дькʹәвьн?

⁷ Ԛә бал тә пьрсәкә ӧса пешда һатьбу, кӧ Йаһоԝа бь рʹасти һаж тә һәйә йан на? Дьбәкә тӧ хԝә беԛимәт һʹәсаб дьки у дьфькьри кӧ наԛәԝьмә ԝәки тӧ бьби досте Әʹфьрандаре әʹрд у әʹзмана. Дьԛәԝьмә Даԝьд Пʹадша жи ӧса дьфькьри. Бона ԝи әʹщебмайи бу, кӧ Йаһоԝа һәла һе бона инсанәте жи хәм дькә. Әԝи гот: «Хӧдано! Инсан чи йә Тӧ дина Хԝә дьдейи, бәни-адәм кӧ Тӧ бона ԝи хәм дьки?» (Зәбур 144:3). Гәло тӧ ча дькари щаба ве пьрсе бьстини?

8. Ль гора 1 Самуйел 16:6, 7, 10-12, Йаһоԝа нава мәрьвада чь ԛимәт дькә?

⁸ Кʹьтеба Пирозда те готьне, кӧ Йаһоԝа бона ԝан мәрьва жи хәм дькә, йед кӧ бәр чʹәʹве кәсед дьн беԛимәт ьн. Мәсәлә, Йаһоԝа Самуйел пʹехәмбәр шандьбу мала мәрьвәки бь наве Йеша, ԝәки кӧрʹәки ԝи ча пʹадше Исраеле кʹьфш кә. Самуйел жерʹа гот, кӧ гази кӧрʹед хԝә бькә. Жь һʹәйшт кӧрʹед хԝә, Йеша тʹәне гази һʹәфт кӧрʹед хԝә кьр, ле әԝи гази йе һәри бьчʹук, Даԝьд,  нәкьр. b Йе кӧ жь алийе Йаһоԝада һатә бьжартьне, Даԝьд бу, чьмки Йаһоԝа дьле ԝи дьдит у заньбу, кӧ Даԝьд гәләки ԝи һʹәз дькә (Бьхунә 1 Самуйел 16:6, 7, 10-12).

9. Тӧ чьрʹа дькари баԝәр би, кӧ Йаһоԝа бона тә хәм дькә? (Бьньһерʹә ӧса жи шькьл.)

⁹ Бьфькьрә кӧ Йаһоԝа ча ида нишан кьрийә, ԝәки әԝ бона тә хәм дькә. Гава тӧ һʹәԝщә йи, әԝ һазьр ә ширәта бьдә тә (Зәбур 32:8). Әв йәк нишан дькә, ԝәки әԝ рʹьнд тә нас дькә (Зәбур 139:1). Һәрге тӧ ль гора ширәтед Йаһоԝа һәрәкʹәт бьки у бьвини кӧ әԝ чьԛас керһати нә, тӧйе баԝәр би кӧ Йаһоԝа бь рʹасти бона тә хәм дькә (1 Дирок 28:9; Кʹаред Шандийа 17:26, 27). Йаһоԝа хирәта тә у хәйсәт-һʹӧнӧред тәйә баш дьвинә (Йерәмйа 17:10). Әԝ дьхԝазә ԝәки тӧ тʹәглифкьрьна ԝи ԛәбул ки, у әԝ һазьр ә бьбә Досте тә (1 Йуһʹәнна 4:19).

ГАВА ДӦДЬЛИ ДЬБЬН ԜӘКИ САФИКЬРЬНЕД МӘ НӘРʹАСТ БУН

10. Гава әм дәрһәԛа сафикьрьнед хԝәйә бәре дьфькьрьн, дьбәкә кʹижан пьрс щәм мә пешда бен?

¹⁰ Һьнә мәрьв бәр хԝә дькʹәвьн ԝәки әв сафикьрьна кӧ ԝана бәре кьрьбу, баш бун йан на. Дьԛәԝьмә ԝана хәбатәкә баш жь дәсте хԝә бәрʹда бун, ԝәки дьһа зедә Йаһоԝарʹа хьзмәт кьн. Ле ньһа, ида ԝәхт дәрбаз буйә, у әԝана дьвиньн кӧ һʹале материали йед һьнә һәвалед ԝан дьһа баш ә, нә кӧ йа ԝан. Ләма жи дьбәкә әԝана пьрсәкә ӧса дьдьнә хԝә: «Гәло бь рʹасти һежа бу, кӧ әз сәва хатьре Йаһоԝа һаԛас тьшт дәсте  хԝә дькьн? Йан ԝе дьһа баш буйа кӧ мьн жи дьһа зедә хәбат бькьра, ԝәки ньһа һʹәԝще тʹӧ тьшти нибума?»

11. Ньвискʹаре Зәбура 73 чьрʹа хәмгин дьбу?

¹¹ Һәрге тӧ жи щарна пьрсед ӧса дьди хԝә, жь кʹәрәма хԝә дина хԝә бьдә ньвискʹаре Зәбура 73. Әԝи дьдит кӧ әʹмьре һьнә мәрьва рʹьһʹәт у бе дәрд ә (Зәбур 73:3-5, 12). Гава әԝи дина хԝә дьда ԝан, әԝ дьфькьри кӧ бадиһәԝа Йаһоԝарʹа хьзмәт дькә. Ләма жи әԝ гәләк хәмгин бу (Зәбур 73:13, 14). Ле гәло әԝи чаԝа әв фькьред негатив жь һʹьше хԝә дәрхьст?

12. Ль гора Зәбур 73:16-18, зәбурбеж чаԝа жь фькьред негатив аза бу?

¹² Бьхунә Зәбур 73:16-18. Гава әԝ чу пʹарьстгәһа Йаһоԝа, ньһерʹандьна ԝи һатә гӧһастьне. Әԝи фәʹм кьр, кӧ жийина һьнә мәрьва чьԛас рʹьһʹәт бе кʹьфше жи, йәкә гӧмана ԝан тʹӧнә йә. Паше әʹдьлайи кʹәтә дьле ԝи, у әԝ избат бу ԝәки сафикьрьна ԝи кӧ Йаһоԝарʹа хьзмәт кә, сафикьрьнәкә лапә баш бу. Ләма жи әԝи сафи кьр, ԝәки бәрдәԝам кә Йаһоԝарʹа хьзмәт кә (Зәбур 73:23-28).

13. Һәрге тӧ баԝәр нини кӧ сафикьрьнед тәйә бәре баш бун, тӧ чь дькари бьки ԝәки әʹдьлайи бькʹәвә дьле тә? (Бьньһерʹә ӧса жи шькьл.)

¹³ Бь аликʹарийа Кʹьтеба Пироз, әʹдьлайи дькарә бькʹәвә дьле тә жи. Гәло чь щурʹәйи? Бьдә бәр чʹәʹве хԝә ԝәки һәр тьштед кӧ щәм тә һәнә чьԛас ԛимәт ьн. Тӧ досте Йаһоԝа йи, у Йаһоԝа соз дайә кӧ әԝе тә кʹәрәм кә. Рʹаст ә мәрьвед кӧ Йаһоԝа нас накьн, щәм ԝан хәбата баш у әʹмьрәки комфорт һәйә, ле гӧмана ԝан бона ахьрийа баш тʹӧнә йә  (Зәбур 145:16). Һәла бьфькьрә: Һәрге мә сафи нәкьра ԝәки Йаһоԝарʹа хьзмәт кьн, әм ньзаньн әʹмьре мә ԝе чь щурʹәйи буйа. Ле әм заньн кӧ һәрге әм сәр һʹиме һʹәзкьрьна һьндава Хԝәде у мәрьва сафикьрьна бькьн, тьштед кӧ шабуне мәрʹа тиньн ԝе тʹӧ щар жь мә кем нәбьн.

ЧЬ БЬКЬН ГАВА ӘМ ДЬФЬКЬРЬН КӦ ӘМ КЕРИ ЙАҺОԜА НАЙЕН

14. Бал һьнә мәрьва чь пьрс пешда те?

¹⁴ Һьнә хьзмәткʹаред Йаһоԝа ида кал-пир бунә, сьһʹәт-ԛәԝата ԝан нәбаш ә, йан жи проблемед ԝанә дьн һәнә. Ләма жи дьԛәԝьмә әԝана бәр хԝә дькʹәвьн у дӧдьли дьбьн, кӧ әԝана бона Йаһоԝа ԛимәт ьн. Дьԛәԝьмә бал ԝан пьрсәкә ӧса пешда те: «Гәло әз һәла һе бона Йаһоԝа керһати мә, йан на?»

15. Ньвискʹаре Зәбура 71 чьда баԝәр бу?

¹⁵ Ньвискʹаре Зәбура 71 ӧса дӧа кьр: «Ԛӧдумнәкьрьнеда мьн бәрʹнәдә» (Зәбур 71:9, 18). Әԝ нава чәтьнайада жи баԝәр бу, кӧ һʹәта әԝ бь амьни Хԝәдерʹа хьзмәт кә, Йаһоԝа ԝе рʹебәрийа ԝи бькә у али ԝи бькә. Зәбурбеж дьдит кӧ Йаһоԝа ԝан мәрьва ԛимәт дькә, йед кӧ нава чәтьнайада жи бәрдәԝам дькьн жерʹа хьзмәт кьн (Зәбур 37:23-25).

16. Хушк-бьред әʹмьрда мәзьн ча дькарьн бьдьнә кʹьфше, ԝәки әԝана бона Йаһоԝа керһати нә? (Зәбур 92:12-15)

¹⁶ Гәли хушк-бьред әʹмьрда мәзьн, бь чʹәʹве Йаһоԝа сәр дәрәща хԝә бьньһерʹьн! Һәрге ԛәԝата ԝә мина йа бәре нинә жи, баԝәр бьн кӧ Йаһоԝа дькарә али ԝә бькә, ԝәки һун бәрдәԝам кьн бь амьни ԝирʹа хьзмәт кьн (Бьхунә Зәбур 92:12-15). Дәԝса кӧ бь зедәйи дина хԝә бьдьнә тьштед кӧ һун ида нькарьн бькьн, дьһа баш ә дина хԝә  бьдьнә ван тьшта, чь кӧ һун дькарьн бькьн. Мәсәлә, һун дькарьн бь амьнийа хԝә али мәрьва бькьн у бькʹәвьнә һʹәйра ԝан. Һун дькарьн хушк-бьрарʹа дәрһәԛа ԝан тьшта гьли кьн, кӧ чаԝа Йаһоԝа али ԝә кьрийә, у бежьн кӧ һун һивийа пекһатьна кʹижан созед жь Кʹьтеба Пироз ьн. Ӧса жи бир нәкьн, кӧ ԛәԝата дӧайед ԝәйә жь дьл дькарә гәләк ԛәԝи бә (1 Пәтрус 3:12). Бәле, фьрԛи тʹӧнә әм чь дәрәщада ньн, диса жи һәр кәс жь мә дькарә тьштәки бона Йаһоԝа у кәсед дьн бькә!

17. Чьрʹа әм гәрәке хԝә бәрамбәри кәсед дьн нәкьн?

¹⁷ Һәрге тӧ бәр хԝә дькʹәви кӧ нькари дьһа зедә хьзмәт ки, баԝәр бә кӧ Йаһоԝа ԝе жь тә рʹази бә һәрге тӧ ве йәке бьки, чь кӧ жь дәсте тә те. Жь кʹәрәма хԝә шьхӧлед хԝә бәрамбәри шьхӧле кәсед дьн нәкә! Гәло чьрʹа? Чьмки Йаһоԝа жи ӧса накә (Галати 6:4). Мәсәлә, бинә бира хԝә кӧ Мәрйәме чаԝа рʹуне бинхԝәш, кӧ гәләк бьһа бу, пʹешкʹеши Иса кьр (Йуһʹәнна 12:3-5). Жь алийе дьнва жи, жьнәбикә бәләнгаз тʹәне дӧ ԛӧрʹушед бьчʹук авитә пʹәрәданга пʹарьстгәһе (Луԛа 21:1-4). Ле Иса пʹешкʹешед ван дӧ кʹӧлфәта бәрамбәри һәв нәкьр. Әԝи заньбу кӧ һәрд жи мәрьвнә амьн ьн. Баԝәр бә, кӧ Йаһоԝа һәр тьшти ԛимәт дькә чь кӧ тӧ дьки, һәла һе һьнге жи һәрге тӧ дьфькьри ԝәки тӧ һьндьки дьки.

18. Чь ԝе али мә бькә жь дӧдьлибуне аза бьн? (Бьньһерʹә ӧса жи чаргошә « Кʹьтеба Пироз Дькарә Али Тә Бькә ԝәки Тӧ Дӧдьли Нәби».)

¹⁸ Һәрге әм тьштәкида дӧдьли дьбьн, Кʹьтеба Пироз дькарә али мә бькә, кӧ әм дӧдьлибуне жь дьле хԝә дәрхьн. Хирәт бькә кӧ щабед пьрсед хԝә бьстини, ԝәки дьле тә рʹьһʹәт бә. Баԝәр бә кӧ Йаһоԝа бона тә хәм дькә. Әԝ һәр тьшти ԛимәт дькә чь кӧ тӧ дьки, у әԝе әʹсәйи тә кʹәрәм кә. Бәле, Йаһоԝа һʹәму хьзмәткʹаред хԝәйә амьн һʹәз дькә у ԝан дьбә хԝәйи.