МУЗИКА култура Исраела бәреда тьштәки фәрз бу. Кʹьтеба Пироз чәнд щара бәʹса музика у кʹьлама дькә. Ньвисаред Пироз ԝәкә жь сәди дәһ жь кʹьлама пек тен. Мәсәлә, кʹьтебед Зәбур, Стьранед Сьлеман у Луринед Йерәмйа гьшк кʹьлам ьн. Ль гора каникә Кʹьтеба Пироз, Исраелийа щурʹә-щурʹә дәрәщед әʹмьре хԝәда музика дьданә хәбате (Music in Biblical Life).

Жийина һәррʹожида. Исраелийа һәстед хԝә бь музике дьданә кʹьфше (Ишайа 30:29). Чахе пʹадшед тʹәзә дьһатьнә кʹьфшкьрьне, сәр щәжьна у паши сәркʹәтьнед әскәри, жьна бь шабуне кʹьлам дьготьн у дәфе дьхьстьн (Һʹакьмти 11:34; 1 Самуйел 18:6, 7; 1 Пʹадшати 1:39, 40). Ӧса жи гава кәсәк дьмьр, Исраелийа дирок дьготьн (2 Дирок 35:25). Чаԝа кӧ каникеда те готьне, «Ибранийа гәләк музика һʹәз дькьрьн» (McClintock and Strong’s Cyclopedia).

Пʹадшед Исраеле музика һʹәз дькьрьн. Пʹадшед Исраеле жи жь музике шабун дьстандьн. Мәсәлә, Шаԝул Пʹадша гази Даԝьд кьр, ԝәки әԝ бона ԝи ль чәнге хә (1 Самуйел 16:18, 23). Чахе Даԝьд бу пʹадша, әԝи һащәтед музике чедькьрьн, кʹьламед хԝәш дьньвисин у оркестьр бона пʹарьстгәһа Йаһоԝа саз кьр (2 Дирок 7:6; Амос 6:5). Ԛәсьра Сьлеман Пʹадшада стьранбеж һәбун, һьм жьн һьм жи мер (Ԝаиз 2:8).

Музика һʹәбандьнеда. Исраелийа музика дьданә хәбате, ԝәки Йаһоԝа бьһʹәбиньн. Пʹарьстгәһа Оршәлимеда 4 000 сазбәнд һәбун (1 Дирок 23:5). Ԝана ль зил, саз, чәнг у пе борʹийа мьԛам ледьхьстьн (2 Дирок 5:12). Хенщи ван кәсед һостә, щьмәʹте жи бь музике Йаһоԝа дьһʹәбанд. Мәсәлә, ӧса те фәʹмкьрьне, кӧ гава Исраели бона щәжьна дьчунә Оршәлиме, ԝана кʹьлам дьготьн. Әԝ кʹьлам дьһатьн навкьрьне ча «Кʹьламед Һьлкʹьшандьне» (Зәбур 120-134). Ӧса жи, ль гора ньвисаред Щьһуйа, ԝәʹде шива Щәжьна Дәрбазбуне, Исраелийа Зәбуред Һалеле a дьготьн.

Иро жи музика бона хьзмәткʹаред Хԝәде фәрз ә (Аԛуб 5:13). Әм сәр щьвата кʹьлама дьбежьн (Әфәси 5:19). Музика йәктийа нав мәда дьһа ԛәԝи дькә (Колоси 3:16). Ӧса жи гава әм дькʹәвьнә дәрәщед чәтьн, музика ԛәԝате дьдә мә (Кʹаред Шандийа 16:25). Бь сайа музикайе, әм дькарьн нишан кьн, кӧ әм Йаһоԝа һʹәз дькьн у баԝәрийа хԝә ԝи тиньн.