Бьред Бәйтʹәледа дәстпекьрьн авакьрьна радио-стансйайе бь наве WBBR, Стеитед Аилендеда (Нийу Йорк), йа кӧ ԝәкә саләк зедәтьр кʹьшанд. Гава ԝана щийе авакьрьне һазьр кьр, ԝана маләкә бона хәбатчийа жи ава кьр у авайикә дьн жи бона хԝәйкьрьна һащәта. Паши хьлазкьрьна ван шьхӧла, бьра һащәтед радиойе һазьр кьрьн, сәва кӧ дәстпекьн бьдьнә хәбате. Ле чәнд тьшт рʹийа ԝан дьгьртьн.

Бьрарʹа чәтьн бу антена мәзьн дайньн. Дьрежайа антене 91 метр бу, у әԝ гәрәке ортʹа дӧ стунед дарда бьһата дардакьрьне, бьльндайа кʹижана 61 метр бу. Щара пешьн әԝ йәк нәһатә стандьне. Ле паше, ԝана хԝә спартә Йаһоԝа у щәм ԝан һатә стандьне. Бьре мә Калвин Просер, йе кӧ ве проектеда кʹар дькьр, гот: «Һәрге мә дәрберʹа бькарьбуйа ԝи шьхӧли бькьра, мәйе пәсьне хԝә бьда у бьгота: ‹Бьньһерʹьн, мә шьхӧләки чьԛас баш кьр!›» Ле ньһа, бьра бона ве пешдачуйине пәсьне Йаһоԝа дан. Ле бәле, әԝана рʹасти проблемед дьн жи һатьн.

Техноложийа радиойе һе нә һаԛас бәлабуйи бу, ләма бьрарʹа һеса нибу, кӧ хԝәрʹа һащәтед професйонали бькʹьрʹьн. Ԝана һащәтәкә хәбьтанди хԝәрʹа кʹьрʹи, ԛәԝата кʹижани 500-ԝатт бу. Дәԝса кӧ микрофонәкә мәхсус бькʹьрʹьн, ԝана микрофона тʹеле данә хәбате. Еварәке мәһа Сьбате, ԝана сафи кьр ван һʹәму һащәта бьщерʹьбиньн. Ԝана ньзаньбу кӧ чь програм пе радиойе дәрхьн, ләма жи әԝана тʹәвайи бәр микрофоне сәкьнин у һьнә кʹьламед бона пәсьндайина Йаһоԝа стьран. Бьре  мә Ернест Лоԝ бь бәшәра хԝәш ани бира хԝә, кӧ гава ԝана кʹьлам дьгот, Рутерфорде Һʹакьм b ԝанрʹа тʹеле хьст. Рутерфорд пе радиойа хԝә, дәнге ԝан жь Бруклине бьһист, кӧ ԝәкә 25 километр дури ԝедәре бу.

Әԝи гот: «Ви дәнге хьраб бьбьрʹьн! Дәнге ԝә ӧса йә те бежи чәнд пʹьшик тʹәвайи дьԛирʹьн!» Бьра шәрм кьрьн у дәрберʹа програм весандьн. Диса жи әԝана ша бун, кӧ радио дьхәбьти у ида һазьр бун програма хԝәйә пешьн пе радиойе дәрхьн.

Сала 1924, 24 Сьбате бьре Рутерфорд бәрнама пешьнда гот, кӧ әв радио-стансйа ԝе «бона шьхӧле Пʹадшатийа Иса Мәсиһ» бе хәбьтандьне. Әԝи зәлал кьр, кӧ нета ве радио-стансйайе әԝ ә, ԝәки «нишани һʹәму мәрьва бькә кӧ ль гора Кʹьтеба Пироз зәманед мә чь те һʹәсабе».

Бәрнама пешьн гәләк рʹьнд дәрбаз бу. Паши ве йәке, WBBR 33 сала ча радио-стансйайә тʹәшкиләта мә дьһатә хәбьтандьне.

Мәһа Тирмәһе, сала 1924, Лекʹолинкʹаред Кʹьтеба Пироз бона щьвата мәзьнә серʹожи Колумбуседа (Оһайо) ль һәв тʹоп бун. Жь тʹәмамийа дьнйайе меван һатьн сәр ве щьвата мәзьн, ԝәки гӧһ бьдьн готаред сәр зьмане Алмани, Әʹрәби, Франси, Инглизи, Итали, Йунани, Һунгари, Литвани, Полони, Урьси, Украини у зьманед Скандинави. Һьнә пʹаред бәрнама щьвата мәзьн пе радиойе дьбьһистьн, у бьра жь рʹожнәʹмәванед ве журнале Оһайо Стейт хԝәстьн, ԝәки әԝана репорта дәрһәԛа бәрнама ве щьвата мәзьн һәр рʹож бьньвисьн.

Рʹожа Пешәме, 24 Тирмәһе, 5 000 зедәтьр хушк-бьра чунә хьзмәтийе. Ԝана ԝәкә 30 000 кʹьтеб бәла кьр у бь һʹәзара һинбунед Кʹьтеба Пироз дәстпекьрьн. Журнала Бьрща Ԛәрәԝьлийеда дәрһәԛа ве рʹоже һатә готьне, кӧ әв «пʹарәкә һәрә хԝәш бу, йа ве щьвата мәзьн».

Рʹожа Инийе, 25 Тирмәһе, бьре Рутерфорд сәр ве щьвата мәзьн документәкә мьԛабьли кʹәшишед дере хԝәнд. Әԝи гот, ԝәки сәрԝеред политики, религи у тʹӧщарәтийе, «рʹийа мәрьва дьгьрьн, кӧ әԝана дәрһәԛа Пʹадшатийа Хԝәде пенәһʹәсьн, бь сайа чь жи Хԝәде ԝе тʹәмамийа инсанәте кʹәрәм кә». Әԝи ӧса жи гот, ԝәки әԝ мәрьв нәрʹаст бун, чьмки пьштгьрийа Лига Мьләта дькьрьн у дьготьн  ԝәки әԝ ә щурʹе сәрԝертийа Хԝәде. Лекʹолинкʹаред Кʹьтеба Пирозрʹа бь рʹасти жи мерхасикә мәзьн лазьм бу, ԝәки ве информасийайе бәла кьн.

Журнала Бьрща Ԛәрәԝьлийе дәрһәԛа һʹӧкӧмкьрьна ве щьвата мәзьн ӧса гот: «Әв ордийа бьчʹук йа Хӧдайе мә, кʹижан кӧ сәр щьвата мәзьнә ль Колумбусе тʹәвайи тʹоп бьбун, бь баԝәрийа дьһа ԛәԝи жь ԝедәре дәркʹәтьн. . . . Тʹӧ ԛәԝат у тʹӧ тиред агьри йед дьжмьна, нькарьбу ԝана бьдана сәкьнандьне». Бьре мә Лео Клаус, йе кӧ чубу сәр ве щьвата мәзьн, ӧса гот: «Гава әм жь щьвата мәзьн дәркʹәтьн, әм һазьр бун ве әʹламәтийе нав мәрьвада бәла кьн».

Мәһа Щотмәһе, Лекʹолинкʹаред Кʹьтеба Пироз дәстпекьрьн ве бәлавоке бәла кьн (Ecclesiastics Indicted). Ве бәлавокеда әʹламәтийа бьре Рутерфорд һатә нәшьркьрьне, у бь милйона копийед ве бәлавоке һатьнә бәлакьрьне. Рʹожәке, бьре Франк Щонсон бажарәки бьчʹукда, бь наве Кливленд (Оклаһома), дәстпекьр ве бәлавоке бәла кә. Гава әԝи шьхӧле хԝә хьлаз кьр, һе 20 дәԛед ԝи һәбун, һʹәта кӧ мьзгинванед дьн бьһатана у ԝи тʹәви хԝә бьвьрана. Ле әԝи нькарьбу дәрва һивийа ԝан бьсәкьнә, чьмки һьнә бьнәлийед бажер жь бо хьзмәта ԝи һерс кʹәтьбун у ԝи дьгәрʹийан. Ләма жи бьре Франк кʹәтә дерәке, кӧ хԝә вәшерә. Дереда тʹӧ кәс тʹӧнә бу, ләма әԝи бәлавок данин сәр һʹәму щийед рʹуньштьне у йәк жи кьрә ортʹа Кʹьтеба Пироз, кӧ йа кʹәшиш бу. Паше әԝ жь дере зу дәркʹәт. Һе ԝәʹде ԝи һәбу, ләма әԝ кʹәтә дӧ деред дьн жи у ԝедәре жи ӧса кьр.

Паше Франк ләзә-ләз чу ԝи щийи, кʹидәре гәрәке рʹасти бьра бьһата. Әԝи хԝә щийе дагьртьна петроле вәшарт у дьньһерʹи һәла әԝ меред кӧ ԝи дьгәрʹьн, кʹӧ нә. Әв мер бь әʹрәба бәр ԝирʹа дәрбаз бун, ле ԝана әԝ нәдит. Чахе әԝана чун, мьзгинванед дьн, йед кӧ незики ԝи щийи хьзмәт дькьрьн, һатьн у әԝ бьрьн.

Бьраки гот: «Гава әм жь бажер дәрдькʹәтьн, әм бәр се дерарʹа дәрбаз бун. Бәр һәр дерәке ԝәкә 50 мәрьв сәкьнибун. Һьнә кәса бәлавок дьхԝәндьн, һьнәка жи әԝ бәлавок гьртьбун, ԝәки кʹәшиш бәлавоке бьвинә. Бь рʹасти әм анщах рʹәвийан. Ле мә рʹазибуна хԝә Йаһоԝарʹа да кʹьфше бона ԝе йәке, кӧ әԝи әм пʹарастьн у али мә кьр, кӧ әм жь дьжмьнед Пʹадшатийе сәрԝахттьр бьн».

Ԝәлатед дьнда жи, Лекʹолинкʹаред Кʹьтеба Пироз мьзгини бь мерхаси бәла дькьрьн. Ль бакӧра Франсайе, бьре мә Щозеф Крет мьзгинийа Пʹадшатийа Хԝәде нава кʹочʹбәред Полони бәла дькьр, йед кӧ мәдәнада (шахтада) дьхәбьтин. Щарәке әԝи гәрәке готарәкә бь наве «Рʹабуна Мьрийа Незик ә» бьхԝәнда. Гава бәлге тʹәглифе ль бажер дьһатьнә бәлакьрьне, кʹәшишәки мәрьварʹа гот, кӧ әԝана нәчьнә сәр ве готаре. Ле бь рʹасти ӧса дәркʹәт, кӧ әԝи реклама ве готаре кьрьбу. Зедәтьри 5 000 мәрьв һатьн, ԝәки гӧһ бьдьнә ве готаре, у әԝ кʹәшиш жи һат! Бьре Щозеф кʹәшишрʹа гот, ԝәки әԝ дәркʹәвә сәр сене у избат кә ԝәки һинкьрьнед ԝи рʹаст ьн, ле әԝи ԛәбул нәкьр. Бьре Щозеф һʹәму әʹдәбйәтед кӧ дәсте ԝида һәбун, бәла кьрьн, у әԝи дит, кӧ мәрьв бь рʹасти жи дьхԝазьн дәрһәԛа Кʹьтеба Пироз пебьһʹәсьн (Амос 8:11).

Ль Африкайе, бьре мә Клауд Браун мьзгини ль Голд Косте (ньһа ча Гана әʹйан ә) бәла дькьр. Бь сайа готаред ԝи у әʹдәбйәтед кӧ әԝи бәла дькьрьн, дәнге рʹастийе ль тʹәмамийа ԝәлет зу һатә бьһистьне. Мерәки бь наве Щон Бланксон, йе кӧ дьчу заньнгәһа фармасептийе, гӧһ да готарәкә бьре Клауд. Әԝи зу фәʹм  кьр, ԝәки рʹийа рʹаст әв ә. Щон ӧса гот: «Жь бо ве рʹастийе, ньге мьн әʹрд нәдьгьрт, у мьн занингәһеда жи дәрһәԛа ве йәке гьли дькьр».

Рʹожәке, Щон чу дерәкә Англикани, ԝәки дәрһәԛа һинкьрьна сейәканә жь кʹәшиш бьпьрсә, чьмки Щон ида фәʹм дькьр кӧ әв фькьр Кʹьтеба Пирозда тʹӧнә йә. Кʹәшиш пәй ԝи кʹәт у кьрә ԛирʹин: «Тӧ Мәсиһи нини, тӧ жь Мире-щьна йи. Жь вьра һәрʹә!»

Гава Щон чу мале, әԝи кʹәшишрʹа нәʹмәк ньвиси у жерʹа гот кӧ әԝ сәр щьвинәке бәр һʹәмушка ве һинкьрьне избат кә. Ле кʹәшиш Щонрʹа гот, ԝәки әԝ бе офиса лекторе сәрәкә ль занингәһа фармасепти. Лектор ле пьрси, һәла әԝи бь рʹасти әв нәʹмә кʹәшишрʹа шандьбу, йан на.

Щон гот: «Бәле, мьн шандийә».

Лектор хԝәст кӧ Щон нәʹмә бьньвисә у жь кʹәшиш бахшандьне бьхԝазә. Ләма жи Щон ӧса кʹәшишрʹа ньвиси:

«Лекторе мьн жь мьн хԝәст, ԝәки әз тәрʹа бьньвисьм у бахшандьне жь тә бьхԝазьм. Һәрге тӧ ԛәбул ки, ԝәки һинкьрьнед тә нәрʹаст ьн, әзе бахшандьне жь тә бьхԝазьм».

Лектор шаш ма у гот: «Бланксон, тӧ бь рʹасти дьхԝази ӧса бьньвиси?»

Щон гот: «Бәле, дәрсдар, әз тʹәне дькарьм ӧса бьньвисьм».

Лектор гот: «Әзе тә жь занингәһе дәрхьм. Ԛә мәрьв дькарә мьԛабьли кʹәшише дера дәԝләте дәркʹәвә у диса жи ча хәбаткʹаре дәԝләте бьминә?»

Щон гот: «Ле дәрсдар, гава тӧ мә һин дьки у әм тьштәки фәʹм накьн, нә әм пьрса дьдьнә тә?»

Лектор гот: «Бәле».

Щон гот: «Дәрсдар, әва жи һәма ӧса йә. Кʹәшиш Кʹьтеба Пироз мә һин дькьр у мьн пьрсәк дайе. Һәрге әԝ нькарә щаба ве пьрсе бьдә, чьрʹа әз гәрәке жь ԝи бахшандьне бьхԝазьм?»

Бланксон жь занингәһе нәһатә дәрхьстьне, у әԝи нә жи бахшандьн хԝәст.

Дәрһәԛа һьнә шьхӧлед ԝе сале, журнала Бьрща Ԛәрәԝьлийеда ӧса һатә ньвисаре: «Мина Даԝьд, әм жи дькарьн ӧса бежьн: ‹Тә бона шерʹ пьштәк мьн да гьредан› (Зәбур 18:39). Исал мә пʹьрʹ һелан стандийә, чьмки мә дәсте Хԝәде дитийә . . . Кәсед кӧ бь рʹасти пʹара ԝи нә . . . мьзгини бь шабуне бәла кьрьнә».

Незики хьлазийа сале, бьра сафи кьрьн диса радио-стансйәке ава кьн. Әв радио-стансйа незики бажаре Чикагойе һатә авакьрьне. Наве ве стансйа тʹәзә, «WORD» бу, чь кӧ те ԝәлгәрʹандьне «ХӘБӘР». Бь сайа пʹелед радиойе 5 000-ԝатт, әв стансйа мьзгинийа Пʹадшатийа Хԝәде дьгиһандә щийед гәләк дур, һʹәта бакӧра Канадайе жи.

Сала 1925-да, рʹонайа рʹӧһʹани зедә бу. Мәсәлә, Лекʹолинкʹаред Кʹьтеба Пироз, кʹьтеба Әʹйанти сәре 12 дьһа зәлал фәʹм кьрьн. Йазьх, ԝәки һьнә кәс әв әʹламәтийа ну ԛәбул нәкьрьн у тʹәрка хьзмәтийе дан. Ле диса жи, гәләк хушк-бьра пʹьрʹ ша бун, чьмки ԝана ида фәʹм дькьр кӧ ль әʹзмана чь ԛәԝьми, у әв йәк чаԝа сәр хьзмәткʹаред Хԝәде һʹӧкӧм дькә.