ПЕШИЙА ԝе йәке кӧ Иса һьлкʹьшә ль әʹзмен, әԝи готә шагьртед хԝә: «Һʹәта сәре дьне жи бьбьнә шәʹдед мьн» (Кʹар. Шанд. 1:8). Ле гәло Мәсиһийед пешьн ча дькарьбун әԝ тʹәми бьанийана сери?

Мартин Гудмен, професоре Университета Оксфорде, дина хԝә дьдә кӧ «әԝ борщдарийа Мәсиһийа, ԝана башԛә дькә жь кʹомед рʹелигийед дьн, ӧса жи жь ԝан Щьһуйа, кʹижан кӧ бәре, ԝәʹде Имперйа Рʹоме дьжитьн». Иса дьчу щурʹә-щурʹә щийа, сәва кӧ хьзмәт бькә. Мәсиһийед рʹаст чʹәʹв дьдьнә Иса, у фәʹм дькьн кӧ бәлакьрьна «мьзгинийа Пʹадшатийа Хԝәде» те һʹәсабе бьгәрʹьн ԝан мәрьва, йед кӧ дьхԝазьн рʹастийа Кʹьтеба Пироз пебьһʹәсьн (Луԛа 4:43). Әԝа йәк жь ԝан мәʹнийа йә кӧ чьрʹа ԛьрʹна йәкеда дь щьвата Мәсиһийада һәбун «шанди». Әв термин рʹастә-рʹаст те һʹәсабе кәсед кӧ тенә шандьне сәва кӧ мьзгине бәла кьн (Марԛ. 3:14). Иса тʹәми да пәйчуйед хԝә: «Ньһа һәрʹьн һʹәму мьләта һин кьн» (Мәт. 28:18-20).

Рʹожа иройин 12 шандийед Иса тʹӧ йәк тʹәви мә нинә, ле йәкә гәләк хьзмәткʹаред Йаһоԝа рʹӧһʹе мисйонерти дьдьнә кʹьфше. Чахе әԝана тенә тʹәглифкьрьне кӧ хьзмәткьрьнеда һе зедә бькьн, әԝана щаба хԝә ӧса дьдьн: «А вай әз, мьн бьшинә!» (Иша. 6:8). Һьнәк, чаԝа кӧ бь һʹәзара шагьртед Мәкʹтәба Гиләд, чунә ԝәлатед дур хәриб. Ле һьнәк жи дәрбази щики дьн дьбьн ԝәлате хԝәда. Гәләк жи зьмане тʹәзә һин бунә, сәва кӧ аликʹарийе бьдьнә ԝан щьвата у кʹома, кʹижан кӧ һʹәԝщә нә. Әԝ хушк-бьрайед кӧ дәрбази ԝан щийа бунә кʹидәре кӧ һʹәԝщәти һәйә, йан жи әԝед кӧ зьмане тʹәзә һин бунә, дьбәкә жи әԝ йәк ԝанарʹа нәһеса бу. Ԝанрʹа лазьм бу  рʹӧһʹе хԝәԛӧрбанкьрьне бьдьнә кʹьфше, ԝәки һʹьзкьрьна хԝә һьндава Йаһоԝа у мәрьва нишан кьн. Ԝана һʹәсабе хԝә кьрьнә, у сафи кьрьнә аликʹарийе бьдьн (Луԛа 14:28-30). Хушк-бьред кӧ сафикьрьнед ӧса дькьн, гәләк ԛимәт у лазьм ьн.

Ле дәрәще һәр кәса щӧдә йә. Нә һәр кәс жь Шәʹде Йаһоԝа дькарә дәрбази ԝи щийи бә, кʹидәре кӧ һʹәԝщәти һәйә, йан жи зьманәки дьн һин бә. Ле гәло әм дькарьн щьвата хԝәда рʹӧһʹе мисйонерти бьдьнә кʹьфше?

Мәсиһийед ԛьрʹна йәкеда бь рʹӧһʹе мисйонерти бун, ле дьԛәԝьмә кӧ һʹәчʹи зәʹф жь ԝан шәһәре хԝәда хьзмәт дькьрьн. Ле әԝ тʹәмийа кӧ Тимотʹейорʹа һатьбу дайине керһати бу һьн Мәсиһийед ԛьрʹна йәкерʹа, һьн жи һʹәму хьзмәткʹаред Хԝәдерʹа: «Кьре мьзгиндар бькә, ԛӧльхе хԝә бьԛәдинә» (2 Тимтʹ. 4:5). Әԝ тʹәмийа кӧ мьзгинийа дәрһәԛа Пʹадшатийе бәла кьн у шагьрта һазьр кьн, бона һәр Мәсиһи йә. Хенщи ԝе йәке, шьхӧлед кӧ мисйонер дькьн, щьвата мәда жи дькарә бе кьрьне.

Мәсәлә, мисйонер ԝәлате хәрибда гәрәке һини щийе тʹәзә бьн. Ԝәлате хәрибда гәләк тьшт ԝанрʹа нәнас ьн у щурʹәки майин ьн. Ле чь әм дькарьн бежьн дәрһәԛа хԝә, һәрге әм нькарьн дәрбази ԝи щийи бьн, кʹидәре кӧ һʹәԝщәти һәйә? Гәло әм гәрәке бьфькьрьн кӧ һʹәму тьшти заньн дәрһәԛа територйа щьвата хԝә? Йан әм гәрәке бьфькьрьн ԝәки мәщалед тʹәзә бьгәрʹьн кӧ хәбәре бьгьһиньн мәрьва? Мәсәлә, сала 1940, бьра дьһатьнә һеланкьрьне ԝәки һʹәфте щарәке ль мәйданада хьзмәт кьн. Ле һун дькарьн ве йәкеда тьштәки бькьн? Йан һун дькарьн хьзмәт кьн пе стенда? Нета ԝан пьрса әԝ ьн: Һун хԝәха дьньһерʹьн, һәла бона ԝә кʹижан рʹейед тʹәзә һәнә сәва мьзгине бәла кьн?

Ньһерʹандьна мәйә позитив ԝе али мә бькә кӧ әм бь дьл у щан хьзмәт кьн. Әԝед кӧ бь һазьрбуне дәрбази ԝан щийа дьбьн кʹидәре кӧ һʹәԝщәти һәйә, йан жи хьзмәт дькьн дь ԝан територийада кʹидәре кӧ сәр зьмане дьн хәбәрдьдьн, гәләк щерʹьбанди нә. Бь ԝи щурʹәйи әԝана ча кʹәрәм ьн бона гәләка, мәсәлә чахе рʹебәрийа шьхӧле бәлакьрьна мьзгине һьлдьдьнә сәр хԝә. Гәләк щар мисйонер рʹебәрийа дәрбазкьрьна щьвинед щьвате һьлдьдьнә сәр хԝә, һʹәта кӧ ве мьһаледа бьре щерʹьбанди һәбьн. Ԝәки тӧ бьре  ньхӧманди йи, тӧ һазьр и али хушк-бьра бьки щьвата хԝәда? (1 Тимтʹ. 3:1).

Хенщи ԝе йәке кӧ бь хирәт хьзмәтийе бькьн, у һазьр бьн кӧ щабдарийе һьлдьн сәр хԝә щьватеда, диса жи әм дькарьн дәрәщед дьнда аликʹарийе бьдьнә щьвата хԝә. Ча йед щаһьл ӧса жи мәрьве әʹмьрда мәзьн, мер йан жьн дькарьн бьбьнә «һәвалкʹар» бона хушк-бьред хԝә щьватеда (Колс. 4:11, ИМ).

Сәва кӧ аликʹарийе бьдьнә хушк-бьред хԝә, әм гәрәке рʹьнд ԝана нас бькьн. Кʹьтеба Пироз мә һелан дькә кӧ бона «һәвдӧ хәм бькьн» чахе тʹоп дьбьн (Ибрн. 10:24). Әԝ гьли найе һʹәсабе, кӧ гәрәке бькʹәвьнә нав шьхӧле мәрьва. Ле дәԝсе әм гәрәке пебьһʹәсьн у тедәрхьн һʹәԝщед хушк-бьред хԝә. Әԝ һʹәԝщәти дькарә алийе материйали, емосийали у рʹӧһʹанида бә. Аликʹарийе бьдьнә хушк-бьра, нә тʹәне щабдарийа рʹуспийа у бәрдәстийед щьвате йә. Рʹаст ә һәнә дәрәщед ӧса кӧ һе баш ә ԝәки йәк жь ԝан бьра аликʹарийе бьдә (Галт. 6:1). Ле йәкә, һәр кәс жь мә дькарә али хушк-бьред әʹмьрда мәзьн бькә йан али ԝан малбәта, йед кӧ рʹасти чәтьнайа тен.

Мәсәлә чахе Салватор рʹасти чәтьнайед матерйали һат, әԝ һʹәԝщә бу бизнеса хԝә, мала хԝә у гәләк тьштед дьн бьфьрошә. Әԝ гәләк бәрхԝә дькʹәт дәрһәԛа ԝе йәке кӧ малбәта ԝи ча ԝе бәр ве чәтьнайе тәйах кә. Малбәтәкә щьвата ԝанда һʹәԝщәтийа ԝан дит у алийе матерйалида али ԝан кьрьн. Ԝана хәбат Салваторрʹа у жьна ԝирʹа дитьн, у гәләк евар ԝана гӧһ дьданә малбәта ԝи у әԝана дьшьдандьн. У бь сайа ԝе йәке әԝана бунә һәвале незик, у әԝ һәвалтийа ԝан бь сала кʹьшанд. Рʹаст ә ԝана чәтьнайе мәзьн дәрбаз кьрьн, ле ньһа әԝ һәрдӧ малбәт бь шабуне тиньн бира хԝә ԝәʹде баш, чахе тʹәвайи дәрбаз дькьрьн.

Бона Мәсиһийед рʹаст, религийа нә тьштәки шәхси йә. Чаԝа кӧ Иса мәрʹа мәсәлә һишт, әм гәрәке һәр кәсирʹа гьли кьн дәрһәԛа созед баш жь Кʹьтеба Пироз. Әм дькарьн һәр тьшти бькьн чь кӧ ԝе кʹаре бинә йед дьненарʹа, фьрԛи тʹӧнә әм дькарьн дәрбази щики дьн бьн йан на. У әм һәма ӧса дькарьн бькьн щьвата хԝәда (Галт. 6:10). Чахе әм ӧса бькьн, әме шабуне жь дайине бьстиньн, у бьбьнә аликʹар кӧ «һәр ԛәнщикьрьнеда хԝәйибәр» бьн (Колс. 1:10; Кʹар. Шанд. 20:35).