ТӦ ЧА дькари чʹәʹв бьди пʹехәмбәра? Дәрхьстьна «Ԝәлгәрʹандьна Дьнйа Тʹәзә» йа сала 2013 тʹәзәкьрида, пʹара «Фәрһәнга Терминед Кʹьтеба Пироз», хәбәра пʹехәмбәр ӧса һатә шьровәкьрьне: «Пʹехәмбәр әԝ ә, бь кʹижани әʹйан дьбьн нетмәрәмед Хԝәде. Пʹехәмбәр ча бежи хәбәрванед Хԝәде бун, ле ԝана нә кӧ тʹәне пʹехәмбәрти дькьрьн, ле ӧса жи һинкьрьнед Хԝәде, тʹәмийед ԝи у щәзакьрьна ԝи әʹйан дькьрьн». Рʹаст ә һун пʹехәмбәртийе накьн, ле йәкә һун дәԝса Хԝәде хәбәрдьдьн, чахе мәрьварʹа гьли дькьн чь кӧ дь Хәбәра ԝида һәйә (Мәт. 24:14).

Бона мә ԛәдьрәки чьԛас мәзьн ә мәрьварʹа гьли кьн дәрһәԛа Хԝәдейе хԝә Йаһоԝа, у мәрьва һин кьн дәрһәԛа ԛьрара ԝи һьндава мәрьва! Әм ԝи шьхӧлида һәвкʹарийе дькьн тʹәви «мьлйакʹәтәки . . . кӧ әʹзменда» дьфьрʹә (Әʹйан. 14:6, ИМ). Рʹожед иройин әм дькарьн рʹасти проблема бен, жь бо чь жи әм дькарьн дина хԝә нәдьнә сәр тьштед фәрз. Кʹижан ьн һьнә жь ԝан проблема? Мәсәлә, әм дькарьн бьԝәстьн, дьлтәнг бьн у хԝә бекер тʹәхмин кьн. Пʹехәмбәред амьнә бәре жи рʹасти проблема дьһатьн, ле йәкә тʹӧ щар сьст нәдьбун. У Йаһоԝа али ԝан дькьр сәва кӧ кʹьфшкьрьнед хԝә биньн сери. Һьнә мәсәла шьровәкә у дьшьрмиш бә чаԝа тӧ дькари чʹәʹв бьди пʹехәмбәра.

Әм рʹож бь рʹож, жь бо шьхӧле хԝәйи һәр рʹожи дьԝәстьн. Ләма әм дькарьн тʹәхмин кьн кӧ нькарьн һәрʹьнә хьзмәтийе. Бәле, мәрʹа лазьм ә кӧ әм һеса бьн, чьмки Иса у шагьртед ԝи жи һеса дьбун (Марԛ. 6:31). Ле бьфькьрә дәрһәԛа Һәзәԛел у щабдарийа ԝи Бабилонеда, йе кӧ әԝи дьани сери нава щьмәʹта Исраеледа, кʹижан кӧ дилтийеда бун. Щарәке Хԝәде Һәзәԛелрʹа гот кӧ әԝ агурʹ һьлдә у шәһәре Оршәлиме ль сәр бьнәхьшинә. У Һәзәԛел гәрәке бь симболик дора шәһәре бьчʹук бьгьрта бь ԝи щурʹәйи, кӧ 390 рʹожа сәр кʹеләка хԝәйә чʹәпе ԝәләзийа у паше 40 рʹожа сәр кʹеләка хԝәйә рʹасте  ԝәләзийа. Әԝе йәке гәрәке дина Исраелед дил бькʹьшанда. Йаһоԝа готә Һәзәԛелрʹа: «А вай, әзе бәндан [тʹога] ль тә бьхьм у һʹәта кӧ тӧ рʹожед доргьртьна хԝә бьԛәдини тӧйе жь алики хԝә нәзьвьрʹи алийе хԝәйи дьн» (Һәзԛл. 4:1-8). Һәзәԛел гәрәке саләке зедәтьр әԝ шьхӧле физикийә чәтьн бькьра. Ле Һәзәԛел ча дькарьбу әԝе йәке бинә сери?

Һәзәԛел фәʹм кьр кӧ чьрʹа әԝ чаԝа пʹехәмбәр һатә шандьне. Хԝәде чахе Һәзәԛел шанд, готә ԝи: «Дьхԝазә бьла гӧһдари бькьн, [Исраел] дьхԝазә бьла бьрʹәвьн . . . , диса ԝе бьзаньбьн кӧ дь нав ԝанда пʹехәмбәрәк һәйә» (Һәзԛл. 2:5). Әԝи нета щабдарийа хԝә бира хԝәда хԝәйи дькьр. Ләма жи әԝи бь һазьрбун, бь симболик дора шәһәре Оршәлиме гьрт. Әԝи избат кьр кӧ әԝ пʹехәмбәре рʹаст ә. Һәзәԛел у һәвалкʹаред ви бьһистьн кӧ: «Бажар һатә лехьстьн»! Бәле, щьмәʹта Исраел фәʹм кьр, кӧ пʹехәмбәр нав ԝанда йә (Һәзԛл. 33:21, 33).

Рʹожа иройин, әм мәрьварʹа әʹлам дькьн кӧ хьлазийа дьнйа Шәйтʹан незик дьбә. Рʹаст ә дьбәкә әм бь физики дьԝәстьн, ле йәкә әм ԛәԝате хәрщ дькьн Хәбәра Хԝәде гьли дькьн, сәрледанед дӧбарә дькьн у һинбунед Кʹьтеба Пироз дәрбаз дькьн. Пʹехәмбәрти дәрһәԛа хьлазийа ԝе дьнйайе те сери, у әм ша нә кӧ бь сайа мә «әʹйан дьбьн нет-мәрәмед Хԝәде».

Бь рʹӧһʹе Хԝәдейи пироз әм ԛәԝат дьбьн, ле йәкә щар-щара әм дькарьн дьлтәнг бьн жь бо ԝе йәке кӧ мәрьв ча ԛәбул дькьн мьзгина, кӧ әм бәла дькьн. Әм дькарьн бькьн бира хԝә мәсәла пʹехәмбәр Йерәмийа. Әԝ беһӧрмәт кьрьн у пе кʹәнийан, чьмки әԝи дәрһәԛа әʹламәтийа Хԝәде Исраелийарʹа гьли дькьр. Щарәке Йерәмийа дьлтәнг бу, у һәла һе гьлийед ӧса жи гот: «Әзе ԝи дь бира хԝәда нәйньм у еди әзе бь наве ԝива нәбежьм». Йерәмийа мәрьвәки мина мә бу у һәстед ԝи жи йед ӧса һәбун чаԝа йед мә. Ле йәкә әԝи бәрдәԝам дькьр дәрһәԛа Хәбәра Хԝәде хьзмәт дькьр. Гәло чьрʹа? Әԝ пʹехәмбәр дьбежә: «Ԝе гаве дь дьле мьнда бу мина агьрәки векʹәти, дь нав һәстийед мьнда йә у әз жь бь хԝә гьртьне ԝәстийам, еди жь дәсте мьн вә найе» (Йерәм. 20:7-9).

Бь ԝи щурʹәйи, әм жи дькарьн дьлтәнг бьн жь бо реаксиа мәрьвайә сәр мьзгина мә. Ле әм дькарьн пешбәри ԝан һәста шәрʹ кьн, һәрге әм бьфькьрьн сәр ве мьзгина кӧ әм бәла дькьн. Әԝ йәк дькарә ԝәк «агьрәки векʹәти, дь нав һәстийед» мәда бә. Хԝәндьна Кʹьтеба Пирозә һәр рʹожи, дькарә али мә бькә ԝәки әԝ агьре дьле мәда нәтәмьрә.

Һьнә Мәсиһи тʹәвиһәв дьбун чахе щабдарийед кӧ ԝанрʹа нәфәʹмдари бу дьстандьн. Пʹехәмбәр Һосәйа жи дьԛәԝьмә әԝ йәк сәр хԝә тʹәхмин дькьр. Йаһоԝа тʹәми да ԝи: «Һәрә, бь пирәкәк хьрабрʹа бьзәԝьщә у бьла жь ԝе, зарʹокед тәйи зьне чебьбьн» (Һос. 1:2). Бьдә бәр чʹәʹве хԝә кӧ Хԝәде тәрʹа бьгота, кӧ тӧ гәрәке жьнәкә ԛав бьстини! Һосәйа әԝ тʹәми ԛәбул кьр. Әԝи Гомәр сьтанд у әԝе ԝирʹа кӧрʹәк ани. Паше ԛизәк ани, у паши ԛизе диса кӧрʹәк жи ани. Те кʹьфше кӧ әԝ һәрдӧ зарʹед пашԝәхтийе нә жь Һосәйа бун. Йаһоԝа готә Һосәйа кӧ жьна ԝи «ԝе бь пей достькед [йаред, ДТʹ] хԝә бькʹәвә». Дина хԝә бьдьнә ԝе йәке кӧ хәбәра «йаред» гәләканида те готьне. У паше әԝ гәрәке пашда вәгәрʹә бал Һосәйа. Һәрге тӧ дәԝса ԝи пʹехәмбәри буйайи, тәйе әԝ жьн пашда бьанийа? Әԝ һәма әԝ бу, чь кӧ Йаһоԝа готә Һосәйа кӧ бькә! Һе сәрда жи, пʹехәмбәр һәла һе һәԛе мәзьн жи да, сәва кӧ ԝе жьне пашда ԝәгәрʹинә (Һос. 2:7; 3:1-5).

Дьбәкә Һосәйа дьхԝаст пебьһʹәсийа, гәло кʹара ԝе йәке чь йә, һәрге әԝ ӧса бькә. Йәкә, Һосәйа Хԝәдерʹа амьн ма у ӧса кьр ча Хԝәде жерʹа гот. Кьре Һосәйа али мә дькә, кӧ әм фәʹм кьн Хԝәде чь еш сәр хԝә тʹәхмин кьр чахе Исраели ԝирʹа нә амьн ман. Ле йәкә, һьнә Исраелед дьлтʹәмьз пашда вәгәрʹийанә бал Хԝәде.

Иро Хԝәде тӧ кәсирʹа набежә кӧ жьнәкә «хьрабрʹа» бьзәԝьщә. Ле әм чь дәрсе дькарьн хԝәрʹа һьлдьн жь кьре Һосәйа, кʹижан әԝи бь һазьрбуне ани сери? Дәрсәк әԝ ә, кӧ бь һазьрбуне мьзгина дәрһәԛа Пʹадшатийа Хԝәде «ашкәрә мал бь мал» бәла кьн, һәрге мәрʹа чәтьн бә жи (Кʹар. Шанд. 20:20). Дьбәкә, һьнә щурʹед хьзмәтийе бона тә нәһеса бә. Гәләк мәрьвед кӧ Шәʹдед  Йаһоԝа тʹәви ԝан һинбуна Кʹьтеба Пироз дәрбаз дькьн, дьбежьн кӧ әԝ һинбун ԝан хԝәш те, ле әԝана ԝе тʹӧ щар мал бь мал хьзмәт нәкьн. Жь ԝана гәләка паше дәстпекьрьнә бькьн ԝе йәке, чь кӧ ԝана тʹьре ԝе нькарьбьн. Тӧ жь ԝе йәке сәва хԝә дәрсе дьвини?

Жь мәсәла Һосәйа әм ӧса жи дькарьн дәрсе хԝәрʹа һьлдьн, кӧ әԝи ча ԛәбул кьр әԝ шьхӧле гьран. Гәләк мәʹнийед ԝи һәбун, сәва кӧ әԝи әԝ шьхӧл нәанийа сери. Һʹәта кӧ Һосәйа дәрһәԛа ԝе йәке нәньвисийа, мәрьв ԝе ча пебьһʹәсийана? Әм жи дькарьн бькʹәвьнә дәрәщәкә ӧса, кʹидәре кӧ мәщала мә һәбә гьли кьн дәрһәԛа Йаһоԝа, ле бона ԝе мәщале кәсәк ԝе ньзаньбә. Дәрәщәкә ӧса ԛәԝьми тʹәви Аннайе, кʹижан кӧ һин дьбә мәкʹтәба Дәԝләтед Йәкбуйида дәрсхана бьльндда. Щарәке дәрсдаре шагьртарʹа гот, кӧ әԝана готаре һазьр кьн, кʹидәре кӧ гәрәке гьли кьн дәрһәԛа баԝәрийа хԝә, у паше әԝана гәрәке шагьртарʹа избат кьн, кӧ әԝ йәк рʹаст ә. Аннайе дькарьбу әԝ мәщал бәрда у шәʹдәти нәда. Ле әԝе тʹәхмин кьрьбу, кӧ әԝ мәщал жь Йаһоԝа йә. Әԝе дьда бәр чʹәʹве хԝә кӧ реаксиа шагьрта ԝе ча бә, у сәва ԝе йәке Йаһоԝарʹа дӧа кьр. У ләма хԝәстьна ԝе һе гәләк мәзьн бу кӧ әԝе мәщәле бьдә хәбате. Наве готара ԝе ӧса бу «Еволусиа: Шеԝьр кьн Избаткьрьна».

Чахе Аннайе готара хԝә гот, кәчʹька кӧ еволусиа баԝәр дькьр, гәләк пьрс да Аннайе, сәва избат кә кӧ Анна нәрʹаст ә. Ле Аннайе гәләк избаткьрьнед баш ани, чь жи кʹар ани. Дәрсдара ԝе зәндәгьрти ма, у ләма әԝе ле хәлат кьр бь ԝе йәке кӧ һʹәсаб кьр ԝәки готара ԝе йа лапә баш ә. Паши ԝе йәке Аннайе һе гәләк щар дәрһәԛа әʹфрандьне хәбәр дьда тʹәви ԝе кәчʹьке. Әԝ мәщал жь Йаһоԝа бу кӧ Аннайе дәрсәкә ӧса сьтанд, чьмки әԝе карьбу дәрһәԛа Йаһоԝа дәрсханеда һʹәмуйарʹа гьли кә. Аннайе хԝәха жи заньбу кӧ әԝ йәк жь Хԝәде йә. Анна дьбежә: «Әз ньһа бь мерхасийе у бе тьрс мьзгине бәла дькьм».

Рʹаст ә, әм пʹехәмбәр ниньн, ле йәкә әм дькарьн чʹәʹв бьдьнә ԝан рʹӧһʹе ԝани хԝәԛӧрбанкьрьне бьдьнә кʹьфше, мәсәлә Һәзәԛел, Йерәмийа у Һосәйа, әме жи бькарьбьн бь һазьрбуне тʹәмийед Хԝәде биньн сери! Ԝе баш бә кӧ әм ԝәʹде һинбуна Кʹьтеба Пирозә тʹәви малбәте, йан жи һинбуна шәхси, дәрһәԛа пʹехәмбәред бәре бьхуньн, у бьфькьрьн кӧ әм ча дькарьн чʹәʹв бьдьнә ԝан?