БЬФЬКЬРӘ дәрһәԛа ве рʹожа кӧ тӧ пʹьрʹ шабуйи. Дьбәкә әԝ рʹож бу чахе тӧ зәԝьщийи йан чахе зарʹа тәйә пешьн һатә буйине. Йан жи әԝ рʹожа кӧ тә хԝә тʹәсмили Йаһоԝа кьр у һати ньхӧмандьне. Дьбәкә чахе тӧ әве рʹоже тини бира хԝә, тӧ һʹәсаб дьки кӧ әԝ рʹожәкә лапә фәрз у пʹьрʹ ша бу. У хушк-бьра чьԛас ша бун, чахе дитьн кӧ тӧ бь ньхӧмандьне әʹйан избат дьки кӧ Хԝәде һʹьз дьки бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә (Марԛ. 12:30).

Бәле, һьнгеда чахе тӧ һати ньхӧмандьне, тӧ шабунәкә мәзьн дьстини жь хьзмәткьрьна хԝә Йаһоԝарʹа. Ле һьнә мьзгинванед Пʹадшатийе әв шабуна кӧ пешийе щәм ԝан һәбу ӧнда кьрьнә. Ле гәло чьрʹа әԝ йәк дьԛәԝьмә? У кʹижан мәʹнийед мә һәнә кӧ диса бәрдәԝам кьн бь шабуне Йаһоԝарʹа хьзмәт кьн?

Бешьк, мьзгина Пʹадшатийе бона мә мәʹнийа шабуна мәзьн ә. Чьмки әԝ соз дьдә кӧ Йаһоԝа ԝе зутьрәке хьлазийа ве дьнйа зӧлм бинә у ԝе дьнйа тʹәзә бе. Сефанйа 1:14 мә дьлгәрм дькә: «Рʹожа мәзьн йа Хӧдан нез ә [незик ә], нез ә у зәʹф бьләзи те, дәнге рʹожа Хӧдан!» Әм гәләк һивийа ԝе рʹоже нә. Ле дьбәкә әм һивийе нибун кӧ ԝе һаԛас дьреж бькʹьшинә. У ләма жи дькарә ӧса бьԛәԝьмә кӧ әм шабуна хԝәйә пешийе ӧнда кьн у ӧса жи хьзмәткьрьнеда сьст бьн (Мәтʹлк. 13:12).

Чьмки әм нава щьмәʹта Хԝәдеда ньн, әм һелан дьбьн кӧ бәрдәԝам кьн Йаһоԝарʹа бь шабуне хьзмәт кьн. Дьбәкә рʹабун-рʹуньштандьна хьзмәткʹаред Хԝәде әм кʹьшандьн бәрбь рʹастийе у али мә кьр кӧ бь шабуне дәстпекьн Хԝәдерʹа хьзмәт кьн (1 Пәт. 2:12). Ле чь дькарә бьԛәԝьмә һәрге Мәсиһик бь принсипед Хԝәде нажи? Һьнге, әԝед кӧ рʹабун-рʹуньштандьна щьмәʹта Йаһоԝайә баш дитьн у һатьнә нава рʹастийе, дькарьн дьлтәнг бьн у шабуна хԝә ӧнда кьн.

Әԝ дьнйа Шәйтʹанә зӧлм жи, кʹижан кӧ һәбуне у комерсийайе реклам дькә, дькарә шабуне жь мә бьстинә. Мире-щьн бь ве дьнйа хԝә дьхԝазә мә бьдә баԝәркьрьне кӧ әм һʹәԝще ԝан тьшта нә, кʹижан кӧ бь рʹастийе мәрʹа лазьм ниньн. Ле ԝе баш бә кӧ әм тʹьме ван гьлийед Иса бира хԝәда хԝәй кьн: «Тʹӧ кәс нькарә дӧ ахарʹа хӧламтийе бькә, чьмки йан ԝе һʹиле ԝи жь йәки һәрʹә у йе дьне һʹьз бькә, йан жи ԝе ԛәдьре йәки бьгьрә у йе  дьне беһӧрмәт кә. Һун нькарьн һьн Хԝәдерʹа, һьн жи һәбукерʹа хӧламтийе бькьн» (Мәт. 6:24). Демәк, әм нькарьн һьн Хԝәдерʹа бь шабуне хьзмәт кьн, һьн жи пәй тьштед ве дьнйайе кʹәвьн.

Кʹе кӧ Йаһоԝа һʹьз дькә, бона ԝи баргьрани нинә кӧ Йаһоԝарʹа хьзмәт кә (1 Йуһʹн. 5:3). Биньн бира хԝә Иса чь гот: «Ԝәрьнә щәм мьн һʹәмуйед ԝәстийайи у баргьран у әзе рʹьһʹәтийе бьдьмә ԝә. Нире мьн һьлдьнә сәр хԝә у жь мьн һин бьн, чьмки әз шкәсти мә у дьлмьлаһим ьм у һуне хԝәрʹа рʹьһʹәтийе бьбиньн. Чьмки нире мьн рʹьһʹәт ә у баре мьн сьвьк ә» (Мәт. 11:28-30). Нире кӧ шагьртед Мәсиһи һьлдьдьнә сәр хԝә рʹьһʹәтийе у шабуне тинә. У бь рʹастийе мәʹни һәйә кӧ әм бәхтәԝар ьн кӧ Йаһоԝарʹа хьзмәт дькьн. Ԝәрә әм шеԝьр кьн се мәʹнийед фәрз, кӧ чьрʹа әм дькарьн ша бьн бь Хԝәдайе мә Хьлазкʹаррʹа (Һәбԛ. 3:18).

Әм хьзмәт дькьн Хԝәдайе бәхтәԝаррʹа, йе кӧ әʹмьр дьдә (Кʹар. Шанд. 17:28; 1 Тимтʹ. 1:11). Әм фәʹм дькьн кӧ әм бь сайа Хԝәде дьжин. Ләма әм бәрдәԝам дькьн ԝирʹа бь шабуне хьзмәт кьн, у фьрԛи тʹӧнә әм чьԛас ԝәхт ньхӧманди нә.

Ԝәрә шеԝьр кьн мәсәла Һектор, йе кӧ 40 сали чаԝа бәрпьрсийаре мьһале хьзмәт кьрийә. Әԝ һәла һе ԝәʹде әʹмьре хԝәйи мәзьн жи гәш ә (Зәб. 92:12-14). Һектор жь бо бесьһʹәтбуна жьна хԝә, ида һаԛас нькарьбу Хԝәдерʹа хьзмәт кьра. Ле әԝи шабуна хԝә ӧнда нәкьр. Әԝ дьбежә: «Рʹаст ә гәләк чәтьн ә бьвиньм кӧ сьһʹәт-ԛәԝата жьна мьн һе хьраб дьбә, у гәләк чәтьн ә мьԛати ԝе бьм, ле мьн нәһишт кӧ әԝ чәтьнайи шабуне жь мьн бьстинә хьзмәткьрьнеда йа Хԝәдейе рʹастрʹа. Әз заньм кӧ Йаһоԝа әʹмьр дайә мьн, у әԝ йәк мьн һелан дькә кӧ әз ԛайим ԝи һʹьз кьм, у бь дьл у щан ԝирʹа хьзмәт кьм. Әз ӧса дькьм кӧ шьхӧле бәлакьрьна мьзгинеда кʹар бькьм, у әз һʹьше хԝәда бәре әʹԝльн созед Пʹадшатийе хԝәй дькьм, сәва кӧ шабуна хԝә ӧнда нәкьм».

Йаһоԝа Кӧрʹе хԝә ԛӧрбан кьр, сәва кӧ әм бькарьбьн бь жийина бәхтәԝар бьжин. Бь рʹастийе жи, «Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹн. 3:16). Гӧнед мә дькарьн бенә бахшандьне у әм дькарьн жийина һʹәта-һʹәтайе бьстиньн, һәрге әм баԝәр дькьн ԛӧрбана Иса, йе кӧ Хԝәде жь бо һʹьзкьрьне да. Гәло әԝ йәк мәщал нинә кӧ әм гәләк рʹази бьн жь Хԝәде? У гәло рʹазибуна мә һьндава ве ԛӧрбане гәрәке мә һелан накә кӧ Йаһоԝарʹа бь шабуне хьзмәт кьн?

Бьраки жь Мәксикайе кӧ наве ԝи Щесус ә, гот: «Әз хӧламе хәбата хԝә бум, щара әз һәла һе рʹож пәй рʹожерʹа бе һʹәмде хԝә гәләк сьһʹәта  дьхәбьтим, ле йәкә һʹәԝщәти нибу ӧса бьхәбьтьм. Мьн тʹәне дьхԝаст кӧ һе зедә пʹәра чекьм. Паше, әз пеһʹәсийам дәрһәԛа Йаһоԝа, у кӧ ча әԝи Кӧрʹе хԝәйи дәлал ԛӧрбан да бона инсанәте. Бал мьн хԝәстьна ԛайим пешда һат кӧ ԝирʹа хьзмәт кьм. Ләма мьн әʹмьре хԝә тʹәсмили Йаһоԝа кьр, у паши 28 сале дь компанйайеда, мьн сафи кьр кӧ әве хәбате бьһельм у дәстпекьм хьзмәткьрьна һәртʹьм. Әԝ хьзмәткьрьна Йаһоԝарʹа бу дәстпека салед мьнә бәхтәԝар».

Әԝ бәр кʹижан кӧ әм тиньн, мәрʹа шабуне тинә нә кӧ дьлтәнги. Те бира тә кӧ әʹмьре тә чаԝа бу, пешийа кӧ тә Йаһоԝа нас кьра? Паԝлосе шанди ани бира Мәсиһийед Рʹоме кӧ әԝана «ԝәхтәке хӧламед гӧнә бун», ле паше «бунә хӧламед рʹастийе». Ԝана «бәре һʹәлалийә» дьанин, кʹижан кӧ ԝе жийина һʹәта-һʹәтайе бинә (Рʹом. 6:17-22). Әм пәй ԝе рʹийа пироз дьчьн, йе кӧ аза йә жь дьлтәнгийе, кʹижан кӧ жь кьред хьраб у бенамуси пешда те. Бь рʹастийе жи әԝ йәк мәʹнийа шабуне йә!

Ԝәрә әм шеԝьр кьн мәсәла дәрһәԛа Щеим, йе кӧ атеист у еволусйонист бу, у ӧса жи кӧ бокс дьлист. Щеим дәстпекьр бе сәр щьвина Мәсиһити у гәләк дьле ԝи гьрт кӧ ча щьватеда һʹьзкьрьн дьданә кʹьфше һьндава ԝи. Сәва кӧ Щеим жийина хԝә бьгӧһезә, ԝирʹа лазьм бу кӧ жь Йаһоԝа һиви кә, сәва кӧ әԝ али ԝи бькә кӧ Ԝи баԝәр кә. Щеим дьбежә: «Һеди-һеди, мьн фәʹм кьр кӧ бь рʹастийе Баве һʹьзкьри у Хԝәдейе рʹәʹм һәйә. Чахе мьн принсипед Йаһоԝа дьани сери, әԝе йәке әз хԝәй дькьрьм. Һәрге әз нәһатама гӧһастьне, ньһа әз кӧшти бум, чаԝа кӧ һьнә һәвалед мьнә бәре йе кӧ бокс дьлистьн. Салед мьнә бәхтәԝар әԝ бун, кʹижан кӧ мьн хәрщ кьр хьзмәткьрьна Хԝәдерʹа».

Әм һивийе нә чахе хьлазийа ве дьнйа зӧлм бе. Ләма әм гәрәке чь бькьн? Биньн бира хԝә, кӧ әм «бона рʹӧһʹ» дьчиньн у әме «жийина һʹәтаһʹәтайе» бьчьньн. Ләма, әм гәрәке «жь ԛәнщикьрьне жи ащьз нәбьн, чьмки әме ԝәхтда бьчьньн һәгәр әм нәдьнә дәр» (Галт. 6:8, 9). Тʹәне бь аликʹарийа Йаһоԝа әм дькарьн сәбьр кьн, у һʹӧнӧред ӧса нав хԝәда пешда биньн, кʹижан мәрʹа лазьм ьн сәва кӧ ԝәʹде «тәнгасийа мәзьн» хьлаз бьн. У әԝ ӧса жи дькарә али мә бькә кӧ бь шабуне ԝирʹа бәрдәԝам кьн хьзмәт кьн һәла һе ԝәʹде чәтьнайа жи (Әʹйан. 7:9, 13, 14; Аԛуб 1:2-4).

Әм гәрәке дӧдьли нәбьн кӧ сәбьркьрьна мә ԝе бе кʹәрәмкьрьне. Чьмки Хԝәде рʹьнд занә кьред мә у һʹьзкьрьна мә һьндава ԝи у наве ԝи. Һәрге әм бәрдәԝам кьн бь шабуне Йаһоԝарʹа хьзмәт кьн, әме мина Даԝьде зәбурбеж бьн, йе кӧ гот: «Әз һәргав Хӧдан датиньм пеш хԝә, жь бәр кӧ жь мьле мьни рʹасте йә, мьн нәди ләрз ль хԝә. Жь бәр ԝе һьндӧре мьн бь кʹеф, дьле мьн ша йә, бәдәна мьн дь әʹԝләһийеда йә» (Зәб. 16:8, 9, ИМ).