ӘЗ ҺАТЬМӘ буйине сала 1926 дь Круксвиледа, Оһайода, Дәԝләтед Йәкбуйида. Де у баве мьн тʹәви тʹӧ религийа нибун, ле ԝана мә һʹәйшт зарʹарʹа дьготьн кӧ әм һәрʹьнә дере. Әз чумә Дера Методисте. Чахе әз 14 сали бум, хьзмәткʹарәки ԝе дере пʹешкʹеш да мьн бона ве йәке, кӧ нава саледа, мьн рʹожа Ләʹде хьзмәткьрьн бәрнәдьда.

Ԝи ԝәʹдәйи, щинарәкә мә бь наве Маргарет Ԝолкер, йа кӧ Шәʹде Йаһоԝа бу, дьһатә щәм дийа мьн у дәрһәԛа Кʹьтеба Пироз тʹәви ԝе хәбәрдьда. Рʹожәке мьн сафи кьр кӧ тʹәви ԝан рʹунем. Дийа мьн дьфькьри кӧ әзе ԝана әʹщьз кьм ԝәʹде һинбуне, ләма әԝе мьнрʹа гот кӧ жь мал дәрем. Ле мьн бәрдәԝам дькьр шеԝьркьрьна ԝан дьбьһист. Паши һьнә шеԝьркьрьна, Маргарете жь мьн пьрси: «Тӧ зани наве Хԝәде чь йә?» Мьн гот: «Һәр кәс занә кӧ наве ԝи Хԝәде йә». Әԝе мьнрʹа гот: «Һьлдә Кʹьтеба хԝәйә Пироз у бьньһерʹә Зәбур 83:18». Мьн ӧса жи кьр, у мьн дит кӧ наве Хԝәде Йаһоԝа йә. Әз рʹәвийам щәм һәвалед хԝә у мьн ԝанрʹа гот: «Чахе һун еваре һәрʹьнә мал, Кʹьтеба Пирозда бьньһерʹьн Зәбур 83:18 у һуне бьвиньн кӧ наве Хԝәде чь йә». Һун дькарьн бежьн кӧ мьн дәрберʹа дәстпекьр шәʹдәтийе бьдьм.

 Паше мьн дәстпекьр Кʹьтеба Пироз һин бьм у сала 1941 һатьмә ньхӧмандьне. Зутьрәке паши ньхӧмандьне, әз һатьмә кʹьфшкьрьне кӧ щьватеда һинбуна кʹьтебе дәрбаз кьм. Мьн дийа хԝә у хушк-бьред хԝә һелан кьр кӧ бенә сәр щьвате, у ԝана гьшка жи дәстпекьрьн бенә сәр щьвате йа һинбуна кʹьтебе, кʹижан кӧ мьн дәрбаз дькьр. Ле әԝ йәк баве мьн хԝәш нәдьһат.

Дь щьватеда һе зедә щабдари данә мьн, у мьн хԝәха кʹьтебхана әʹдәбйәтед мә саз кьр. Щарәке, баве мьн дина хԝә да сәр кʹьтебед мьн у гот: «Тӧ әван һʹәму тьшта дьвини? Әз дьхԝазьм ԝана жь мале дәрхьм, у тӧ жи дькари һәрʹи». Әз жь мале дәркʹәтьм у мьн незики Зенесвиле Оһайойеда отʹахәк дәстхьст у теда мам, ле сәва кӧ нәфәред мале ԛәԝи кьм, әз щара дьчумә мале.

Баве мьн мьԛабьли дийа мьн дәрдькʹәт кӧ әԝ нәчә щьвине. Щара чахе дийа мьн рʹеда бу кӧ һәрʹә щьвате, баве мьн дьда пәй ԝе у әԝ зоре дьбьрә мале. Ле дийа мьн дәрберʹа дәрики дьнрʹа дәрдькʹәт у дьчу сәр щьвате. Мьн дийа хԝәрʹа гот: «Бәрхԝә нәкʹәвә. Әԝ ԝе паше бьԝәстә у ида пәй тә нәкʹәвә». Паше ԝәʹдә дәрбаз бу, у баве мьн ида пәй дийа мьн нәдькʹәт, у әԝ бе шәрʹ-дәʹԝ дьчу сәр щьвате.

Сала 1943 щьвата мә дәстпекьр дәрбаз кә Мәкʹтәба Даннасинкьрьне, у әз бь готара дәрдькʹәтьм. Ширәтед кӧ мьн дьстанд паши готаред мьнә сәр мәкʹтәбе, али мьн кьрьн кӧ хәбәрдана хԝә һе баш кьм.

Ԝи чахи, мьләта шәрʹ дькьрьн дь Шәрʹе Һʹәмдьнйайе II-да. Сала 1944 гази мьн кьрьн кӧ һәрʹьм әскәрийе. Әз чумә офиса әскәрийе дь Оһайойеда, у ль ԝедәре сьһʹәт-ԛәԝата мьн ньһерʹин, у документәк данә мьн у мьн тʹьжи кьр. Мьн ӧса жи офисеред әскәрийерʹа гот кӧ әзе нәбьмә әскәр. Ԝана әз бәрдам. Паши чәнд рʹожа, офисере полисе һатә бәр дәре мьн у мьнрʹа гот: «Корԝин Робисон, изьна мьн һәйә кӧ тә бьгьрьм».

Паши дӧ һʹәфтийа, дь диԝанеда һʹакьм гот: «Һәрге дәсте мьнда буйа, мьне сәр тʹәмамийа әʹмьре тә, тӧ бькьрайи кәле. Тӧ дьхԝази тьштәки бежи?» Мьн щаба хԝә да: «Йа Һʹакьм, әз хьзмәткʹаре Хԝәде мә. Шемика һәр дәрийа бона мьн щийе бәлакьрьна мьзгине йә, у мьн ида гәләкарʹа әв мьзгина дәрһәԛа Пʹадшатийе бәла кьрийә». Һʹакьм готә кʹома аликʹарчийа *: «Һун нә бона ԝе йәке ль ԝьр ьн кӧ тедәрхьн, һәла әԝ мәрьв хьзмәткʹар ә йан на. Һун ләма ԝьра нә ԝәки сафи кьн һәла әԝи әԝ газикьрьн ани сери йан на». Паши нив сьһʹәти кемтьр, кʹома аликʹарчийа вәгәрʹийан бь ве сафикьрьне кӧ әз нәһәԛ ьм. Һʹакьм пенщ сал да мьн, у әз кьрьмә кәла Ашланде дь Кентукеда.

Дӧ һʹәфтийа әз дь кәла Колумбусе дь Оһайойеда бум, у рʹожа пешийе әз ода хԝәйә кәледа мам. Мьн Йаһоԝарʹа дӧа кьр: «Әз нькарьм пенщ сала ве одеда бьм. Әз ньзаньн һʹале мьн ԝе чаԝа бә».

Рʹожа дьн, нобәдара изьн данә мьн кӧ дәрем дәрва. Әз чумә бәр пʹәнщәре кʹидәре кӧ гьртики бәжн-бьльнд у намьл-бәр сәкьни бу. Әԝи жь мьн пьрси: «Тӧ бона чь кʹәти вьр,  Бощи?». Мьн гот: «Әз Шәʹде Йаһоԝа мә». Әԝи мьнрʹа гот: «Әре? Ижа, тӧ чьма ԝьрʹа йи?» Мьн гот: «Шәʹдед Йаһоԝа начьнә шәрʹ у мәрьва накӧжьн». Әԝи гот: «Ԝана тә кьрьнә кәле чьмки тӧ мәрьва накӧжи. Ле мәрьвед дьн дькьнә кәле, чьмки әԝана мәрьва дькӧжьн. Әԝа бь логики йә?» Мьн гот: «На».

Паше әԝи гьли кьр: «Әз 15 сала кәла дьнда бум, у ԝедәре мьн һьнә әʹдәбйәтед ԝә хԝәндийә». Һьнге мьн дӧа кьр: «Йаһоԝа, али мьн бькә кӧ әв мәрьв алийе мьн бә». Һәма һьнге, Паул, әԝ наве ԝи мәрьви бу, мьнрʹа гот: «Һәрге жь ԝан гьртийа кәсәк дәсте хԝә бьдә тә, тӧ тʹәне бькә гази. Ида әз заньм әзе чь сәре ԝан бькьм». Жь бо ве йәке, проблемед мьн тʹәви 50 гьртийед кӧ ве сектореда бун тʹӧнә бун.

Чахе офисеред кәле әз дәрбази кәла Ашланде кьрьм, әз ԝедәре пеһʹәсийам кӧ гәләк бьред мәйи щерʹьбанди ԝедәре нә. Хәбәрдана тʹәви ԝан али мьн у йед майин кьр кӧ рʹӧһʹанида ԛәԝи бьминьн. Ԝана бәрнама хԝәндьна Кʹьтеба Пироз саз дькьрьн, у һәр һʹәфти мәрʹа дьготьн кӧ кʹижан сәрийа жь Кʹьтеба Пироз бьхуньн. У мә пьрс у щаб һазьр дькьрьн, бона щьвине кʹижан кӧ бьра саз дькьрьн. Ԝедәре һәбу бьра кӧ щабдар бу бона мьһалед сәва хьзмәткьрьне. Әм гәләк мәрьв дь одәкә мәзьнда дьман, кʹидәре кӧ щи-ньвин рʹәх диԝара бун. Әԝе кӧ щабдар бу бона мьһале, дьготә мьн: «Робисон, тӧ щабдари бона ԝи у ԝи щи-ньвина. Мьһала тә әԝ ә, демәк хԝәйе ван щи-ньвина. Пешийа чуйина әԝан һәр кәса, тӧ гәрәке баԝәр би кӧ тә жерʹа шәʹдәти дайә». Ӧса мә бь организә мьзгини бәла дькьр.

Шәрʹе Һʹәмдьнйайе II сала 1945 хьлаз бу, ле әз диса һе һьнәк ԝәʹдә кәледа бум. Әз хәмгин дьбум жь бо малбәта хԝә, чьмки баве мьн готә мьн: «Һәрге әз жь тә хьлаз бьм, әз дькарьм йед дьнена дәсте хԝәда бьгьрьм». Паши дәркʹәтьна мьн жь кәле, мьн шабунәкә пʹьрʹ мәзьн сьтанд. Һʹәфт кәс жь малбәта мьн дьчунә сәр щьвате у хушкәкә мьн һатә ньхӧмандьне.

Чахе сала 1950 Корейайеда шәрʹ дәстпебу, щара дӧда гази мьн кьрьн кӧ һәрʹьмә әскәрийе. Паше мьнрʹа тест дан бона щерʹьбандьна аԛьле мьн, у офисере әскәрийе готә мьн: «Тесте әʹйан кьр кӧ аԛьле тә пʹьрʹ баш ә». Мьн гот: «Әԝ баш ә, ле әз начьмә әскәрийе». Мьн жерʹа рʹеза 2 Тимотʹейо 2:3 әзбәри гот, у мьн зедә кьр: «Әз ида әскәре Мәсиһ мә». Әԝи ләʹзәке хԝә кәрʹ кьр, у паше гот: «Тӧ дькари һәрʹи».

 Паши һьнә ԝәʹдә, әз сәр щьвата мәзьнә дь Синсинатеда, Оһайойеда, чумә сәр щьвина Бәйтʹәле. Бьре Милтон Һеншел мәрʹа гот кӧ һәрге бьра дьхԝазьн дь шьхӧле Пʹадшатийеда гәләки бьхәбьтьн, тʹәшкиләт дькарә ԝана Бәйтʹәледа бьдә хәбате. Мьн бланка Бәйтʹәле тʹьжә кьр, у әз һатьм ԛәбулкьрьне, у әз һатьмә кʹьфшкьрьне ль Бәйтʹәла Бруклинеда мәһа Тʹәбахе сала 1954. Һьнгеда әз Бәйтʹәледа хьзмәт дькьм.

Дь Бәйтʹәледа епʹещә хәбата мьн һәбу. Бь сала, әз мьԛати боилеред мәкʹинед нәшьркьрьне у йед офиса бум, ӧса жи мьн мәкʹинә у кʹупе кʹьлита тʹәзә дькьрьм. Әз ӧса жи дьхәбьтим дь Ода Щьвата Мәзьнә дь Нийу Йоркеда.

Мьн Бәйтʹәледа гәләк һʹьз кьр, кӧ ча ԝәʹдә сәр шьхӧлед рʹӧһʹани дьһатә хәрщкьрьн. Мәсәлә, ԛӧльхкьрьна шәбәԛе у Һинбуна «Бьрща Ԛәрәԝьлийе» тʹәви малбәте у ӧса жи хьзмәткьрьна тʹәви щьвате. Һәрге һун бьфькьрьн сәр ве йәке, әԝ һʹәму тьшт дькарә һәбә у гәрәке һәр малбәта Шәʹдед Йаһоԝада һәбә. Чахе де-бав у зарʹ тʹәвайи рʹеза рʹоже шеԝьр дькьн, у тʹьме Ԛӧльхкьрьна Малбәте дәрбаз дькьн, ӧса жи дь щьватеда у шьхӧле бәлакьрьна мьзгинеда гәләк кʹар дькьн, бь ԝе йәке һәр нәфәр ԝе рʹӧһʹанида ԛәԝи бә.

Бәйтʹәледа у щьватеда мьн хԝәрʹа гәләк һәвал дитьн. Жь ԝана һьнәк рʹункьри бун у ида хәлата хԝәйә әʹзмана стандьнә, ле йед дьн нәрʹункьри нә. Ле чаԝа һʹәму хьзмәткʹаред Йаһоԝа, ӧса жи йед дь Бәйтʹәледа гӧнәкʹар ьн. У ләма жи чахе хәйд дькʹәвә ортʹа мьн у бьра, әз тʹьме дьхәбьтьм кӧ әʹдьлайе хԝәй кьм. Ԝи чахи әз дьфькьрьм сәр Мәтта 5:23, 24 у ча жь мә те хԝәстьне кӧ әм әԝе дәʹԝ-дозе сафи кьн. Бәле, бахшандьне бьхԝазьн нәһеса йә. Ле әз дьвиньм кӧ чахе әз дьбежьм бьбахшинә, тʹәк щара дәʹԝ-доз дьреж дькʹьшинә.

Жь бо әʹмьре мьни мәзьн, мьнрʹа чәтьн ә кӧ мал бь мал мьзгине бәла кьм. Ле әз бәрхԝә накʹәвьм. Әз һьнәки зьмане Чинайи йа Мандарини һин бумә, у әз шабуне дьстиньм чахе сәр кʹуче мәрьвед Чинайирʹа мьзгине бәла дькьм. Щара ӧса дьԛәԝьми кӧ шәбәԛе мьн 30 йан 40 журнал бәла дькьр.

 Мьн һәла һе жи сәрледана дӧбарә Чинеда кьр! Рʹожәке, кәчʹькәкә щаһьл реклама дькʹана емиш бәла дькьр. Әԝе бь бәшәра хԝәш мьн ньһерʹи, у әз жерʹа кʹәнийам у мьн журналед «Бьрща Ԛәрәԝьлийе» у «Һʹьшйар Бьн!» йед сәр зьмане Чинайи дайе. Әԝе һьлда у гот кӧ наве ԝе Кети йә. Паши ԝе йәке чахе Кетийе әз дьдитьм, әԝ незики мьн дьбу у тʹәви мьн хәбәрдьда. Мьн наве емиша у щурʹә-щурʹә шинкайа сәр зьмане Инглизи әԝ һин дькьр, у әԝе жи әԝ хәбәр дьԝәкʹьландьн. Мьн ӧса жи жерʹа рʹезед жь Кʹьтеба Пироз шьровәкьр, у әԝе һьлда кʹьтеба «Чь Һин Дькә Кʹьтеба Пироз?». Паши чәнд һʹәфтийа, әԝ ида нәдьһатә кʹьфше.

Паши чәнд мәһа, кәчʹькәкә дьн кӧ реклам бәла дькьр, жь мьн чәнд журнал һьлда. Һʹәфтийа дьн, чахе мә һәв дит, әԝе тʹела хԝә да дәсте мьн у гот: «Тӧ Чинерʹа хәбәрдьди». Мьн гот: «Әз тʹӧ кәси нас накьм дь Чинеда». Ле әԝе зоре мьн кьр кӧ әз хәбәрдьм, у ләма мьн тʹел һьлда у гот: «Рʹожхера ԝә, наве мьн Робисон ә». Дәнг жь тʹеле те: «Робби, әԝа әз ьм Кети. Әз пашда вәгәрʹийамә Чине». Мьн гот: «Чине?». Кети щаба хԝә да: «Әре. Робби, тӧ зани әв ԛизька кӧ тʹел дайә тә кʹе йә? Әԝ хушка мьн ә. Әз жь тә тьштед гәләк баш пеһʹәсийам. Жь кʹәрәма хԝә ԝан тьшта хушка мьнрʹа жи гьли кә». Мьн жи гот: «Әзе әԝе йәке бькьм чьԛас дькарьм. Зәʹф рʹази мә кӧ тә мьнрʹа гот кӧ тӧ кʹидәрейи». Паши ԝе йәке, зутьрәке мьн ида щара пашьн тʹәви хушка Кети хәбәрда. Фьрԛи тʹӧнә әԝ дӧ кәчʹьк ньһа кʹидәре нә, йәкә әз баԝәр ьм кӧ әԝана ԝе һе зедә дәрһәԛа Йаһоԝа пебьһʹәсьн.

Ида 73 сал ә кӧ әз Йаһоԝарʹа хьзмәт дькьм. Әз гәләк бәхтәԝар ьм кӧ әԝи али мьн кьр тʹәвнәбуйине хԝәй кьм у кәледа жи ԝирʹа амьн бьминьм. Ӧса жи, хушк у бьред мьни һʹәлал мьнрʹа гьли дькьн, кӧ ԝана мерхаси дьстандьн, чахе дьдитьн кӧ ча баве мә пәй мьн дькʹәт, ле йәкә әз нәдьһатьмә шкенандьн. Ахьрийеда, дийа мьн у 3 хушк у 3 бьред мьн һатьнә ньхӧмандьне. Һәла һе баве мә жи нәрм бу, у пешийа бьмьра, чәнд щара һатә сәр щьвина щьвате.

Һәрге Хԝәде бьхԝазә, нәфәред мала мьн у һәвалед мьнә кӧ мьрьнә, ԝе сах бьн дьнйа тʹәзәда. Бьдьнә бәр чʹәʹве хԝә әве шабуне, чахе әм тʹәви мәрьвед хԝәйә һʹьзкьри Йаһоԝарʹа хьзмәт кьн. *