1. Йаһоԝа чьрʹа йед дьн тʹәглиф дькә кӧ тʹәви ԝи бьхәбьтьн, нә әԝ Хԝәдайе Һьмзор ә?

ЙАҺОԜА Хԝәдайе Һьмзор, Әʹфьрандаре һʹәму тьшти йә, у билани у ԛәԝата беһʹәсаб тʹәне йа Ԝи йә. Чахе Йаһоԝа али Ибо кьр кӧ әԝе йәке фәʹм кә, Ибо гьлийед ӧса ԝирʹа гот: «Тӧ дькари һәр тьшти бьки, әз пе дьзаньм у мьразәки тә жи найе сәкьнандьн» (Иб. 42:2). Әм заньн кӧ Йаһоԝа дькарә бе аликʹарийа тʹӧ кәси, бинә сери һәр тьшти чь кӧ әԝ бьхԝазә бькә. Ле жь бо һʹьзкьрьне әԝ йед дьнена тʹәглиф дькә кӧ тʹәви ԝи бьхәбьтьн, сәва кӧ ԛьрара ԝи бе сери.

2. Йаһоԝа Кӧрʹе хԝә тʹәглиф кьр кӧ кʹижан шьхӧле фәрз бькә?

² Әʹфьрине Хԝәдейи пешьн, Кӧрʹе ԝи бу. Йаһоԝа изьн да Кӧрʹе хԝә, ԝәки дь әʹфьрандьна һәр тьштед дьнда әԝ али ԝи бькә (Йуһʹн. 1:1-3, 18). Дәрһәԛа Иса Паԝлос ньвиси: «Бь дәсте ԝи һәр тьштед ль әʹрд у әʹзмана әʹфьринә, чь кӧ хӧйа дьбьн, чь кӧ хӧйа набьн, һәгәр кʹӧрси йан хӧданти бьн, һәгәр сәрԝерти йан һʹӧкӧмәти бьн, һәр тьшт бь дәсте ԝи у бона ԝи әʹфьринә» (Колс. 1:15-17). Йаһоԝа нә кӧ тʹәне ԛәдьрәки  мәзьн да Кӧрʹе хԝә кӧ әʹфьрандьнеда кʹар бькә, ле әԝи ӧса жи рола ԝийә фәрз йед дьненарʹа әʹйан кьр.

3. Йаһоԝа Адәм тʹәглиф кьр кӧ чь бькә у чьрʹа?

³ Йаһоԝа ӧса жи мәрьв тʹәглиф кьрьн, кӧ тʹәви ԝи шьхӧлкʹарийе бькьн. Мәсәлә, әԝи изьн да Адәм, кӧ нав бьдә сәр һʹәйԝана (Дәстп. 2:19, 20). Адәм шабунәкә мәзьн дьстанд, чахе пәй һʹәйԝана дьньһерʹи, сәва кӧ дәрһәԛа ԝан рʹьнд бьзаньбә у сафи кә һәла чь нави бьдә сәр кʹижани. Йаһоԝа хԝәха дькарьбу әԝ йәк бькьра, чьмки әԝи һʹәйԝан әʹфьрандийә. Ле йәкә, Йаһоԝа бь һʹьзкьрьне изьн да Адәм сәва кӧ нав бьдә сәр һʹәйԝана. Хԝәде ӧса жи изьн да Адәм кӧ тʹәмамийа әʹрде бькә щьнәт (Дәстп. 1:27, 28). Ле йазьх, Адәм сафи кьр кӧ шьхӧлкʹарийе тʹәви Хԝәде нәкә, жь бо ԝе йәке әԝи ԛәзийа һьн хԝәрʹа, һьн жи зӧрʹәта хԝәрʹа ани (Дәстп. 3:17-19, 23).

4. Чаԝа йед дьн тʹәви Хԝәде шьхӧлкʹари дькьрьн сәва кӧ ԛьрара ԝи биньн сери?

⁴ Паше Йаһоԝа мәрьвед дьн тʹәглиф дькьр, сәва кӧ тʹәви ԝи бьхәбьтьн. Нӧһ гәми ава кьр, сәва кӧ хԝә у малбәта хԝә ԝәʹде Селафе хьлаз кә. Муса щьмәʹта Исраел жь Мьсьре аза кьр. Йешу әԝ щьмәʹт бьрә Әʹрде Создайи. Сьлеман дь Оршәлимеда пʹарьстгәһ ава кьр. Мәрйәм бу дийа Иса. Һәр жь ԝан хьзмәткʹаред амьн у гәләкед дьн тʹәви Хԝәде шьхӧлкʹари дькьрьн, сәва кӧ ԛьрара ԝи биньн сери.

5. Дь кʹижан шьхӧлида әм дькарьн кʹар бькьн, у гәло Йаһоԝа һʹәԝще аликʹарийа мә бу? (Бьньһерʹьн шькьле әʹԝльн.)

⁵ Рʹожа иройин, Йаһоԝа мә тʹәглиф дькә, ԝәки әм бь тʹәмами пьштгьрийа Пʹадшатийа ԝи бькьн. Иро щурʹә-щурʹә хьзмәткьрьн һәйә. Рʹаст ә һʹәму Мәсиһи нькарьн бь щурʹәки Хԝәдерʹа хьзмәт кьн, ле һәр кәс жь мә дькарә мьзгина Пʹадшатийе бәла кә. Һьлбәт, Йаһоԝа һʹәԝщә нибу әԝи шьхӧли бьдә мә. Әԝи дькарьбу тʹәви мәрьва жь әʹзмен хәбәр да. Иса гот ԝәки Йаһоԝа дькарьбу ӧса бькьра, кӧ һәла һе кәвьр жи ԝе бькьрана ԛирʹин дәрһәԛа Пʹадшайе Пʹадшатийа Хԝәде (Луԛа 19:37-40). Ле йәкә Йаһоԝа изьне дьдә мә ԝәки әм «һәвпаред» ԝи бьн (1 Корн. 3:9). Паԝлосе шанди ньвиси: «Әм жи чаԝа һәвал-хәбатед Хԝәде иди һиви жь ԝә дькьн, йед кӧ кʹәрәма Хԝәде стандьнә, нәһельн кӧ әԝ кʹәрәм бефәйдә бә» (2 Корн. 6:1). Әԝ ԛәдьрәки мәзьн ә кӧ Йаһоԝа мә тʹәглиф кьрийә сәва кӧ тʹәви ԝи шьхӧлкʹарийе бькьн. Ԝәрен бьньһерʹьн чәнд мәʹнийа, кӧ чьрʹа әԝ йәк мәрʹа шабунәкә мәзьн тинә.

6. Ча Кӧрʹе Хԝәде әʹйан кьр, кӧ әԝи чь тʹәхмин дькьр чахе тʹәви Баве хԝә шьхӧлкʹари дькьр?

⁶ Шьхӧлкʹарийа тʹәви Йаһоԝа, шабунәкә мәзьн дьани хьзмәткʹаред ԝирʹа. Кӧрʹе Хԝәдейи тайе тʹәне пешийа ԝе йәке кӧ бьһата сәр әʹрде, ӧса гот: «Хӧдан дь дәстпека рʹейа хԝәда хԝәдийе мьн бу . . . Әз бь сәр һостәйи ль щәм ԝи бум у әз рʹож бь рʹож, бь кʹефхԝәшийе вә тʹьжи бум, ль бәр ԝи, һәртʹьм бь щошийе вә кʹәтьм» (Мәтʹлк. 8:22, 30). Чахе Иса шьхӧлкʹари дькьр тʹәви Баве хԝә, әԝ гәләк ша дьбу чьмки әԝе йәке бькә, у заньбу кӧ Йаһоԝа ԝи һʹьз дькә. Ле чь әм дькарьн бежьн дәрһәԛа мә?

7. Чьрʹа шьхӧле бәлакьрьна мьзгине шабуне мәрʹа тинә?

⁷ Иса гот кӧ мәрьв бәхтәԝар дьбә чахе дьдә у чахе дьстинә (Кʹар. Шанд. 20:35). Чахе әм рʹастийа дәрһәԛа Хԝәде пеһʹәсийан, әм гәләк ша бун, у әм шабуне дьстиньн гава әм әве рʹастийе бәла дькьн. Чахе әм мәрьварʹа рʹастийа  Кʹьтеба Пироз гьли дькьн, әм дьвиньн чаԝа әԝана бь емосийа у бь рʹазибуне тʹьжә дьбьн һьндава Хԝәде у рʹастийа ԝи кӧ Хәбәра ԝида йә. Бәлакьрьна мьзгина Хԝәде гәләк фәрз ә бона әʹмьр. Әԝ рʹийа жийина һʹәта-һʹәтайе вәдькә бона ԝан мәрьва, кʹе кӧ һазьр ә незики Хԝәде бә (2 Корн. 5:20). Әм чахе шьхӧле бәлакьрьна мьзгине дькьн, әм шабунәкә мәзьн дьстиньн, чьмки бь сайа ԝи шьхӧли мәрьв дькарә әʹмьре һʹәта-һʹәтайе бьстинә.

8. Һьнәк чь дьбежьн дәрһәԛа ԝе шабуне, кʹижан кӧ ԝана дьстанд дь шьхӧлкʹарийа тʹәви Йаһоԝада?

⁸ Чахе әм али мәрьва дькьн кӧ дәрһәԛа Хԝәде пебьһʹәсьн, әм ша нә кӧ бь ԝе йәке әм дьле Йаһоԝа ша дькьн у ӧса жи кӧ әԝ ԛимәт дькә ԛәԝата мә кӧ әм дьдьнә хәбате дь хьзмәткьрьнеда. (Бьхунә 1 Корьнтʹи 15:58.) Марко кʹижан дь Италйайеда дьжи, дьбежә: «Әз шабунәкә мәзьн дьстиньм, чахе әз йа һәрә баш дьдьмә Йаһоԝа, нә кӧ ԝан кʹе дькарә зу бир кә». Ӧса жи Франко кʹижан кӧ дь Италйайеда хьзмәт дькә, дьбежә: «Йаһоԝа бь Хәбәра хԝә у бь хԝарьна рʹӧһʹани, һәр рʹож дькә бира мә кӧ әԝ мә һʹьз дькә. У һәр тьште кӧ әм бона ԝи дькьн фәрз ә бона ԝи, ԝи чахи жи чахе әм дьфькьрьн кӧ кьрьна мә ԛә тьштәк нинә. Ләма жи әз бәхтәԝар ьм кӧ тʹәви Йаһоԝа шьхӧлкʹарийе дькьм у нета әʹмьре мьн жи һәйә».

9. Чь һәләԛәти һәбу ортʹа Йаһоԝа у Иса, у чьрʹа?

⁹ Чахе әм шьхӧлкʹарийе дькьн тʹәви ԝан кʹижана әм һʹьз дькьн, әм һе незики ԝан дьбьн, у һе гәләк педьһʹәсьн дәрһәԛа ԝан у һʹӧнӧред ԝан. Һьн жи әм педьһʹәсьн дәрһәԛа нетед ԝан, у ӧса жи кӧ әԝана ча дьхԝазьн нетед хԝә биньн сери. Иса тʹәви Йаһоԝа ԝәкә милиард сала шьхӧлкʹари дькьр. Һʹьзкьрьна ԝан у һәләԛәтийа ԝан һьндава һәвдӧ, ӧса ԛәԝи дьбу кӧ тʹӧ тьшти нькарьбу зийане бьда һәләԛәтийа ԝан. Иса гот: «Әз у Бав йәк ьн» (Йуһʹн. 10:30). Иса бь ԝан гьлийа да кʹьфше кӧ һәләԛәтийа ԝи тʹәви Баве ԝи чьԛас незик ә. Ԝана жь ве һәләԛәтийа незик, шабун дьстандьн у тʹәвайи әʹдьлайеда шьхӧлкʹари дькьрьн.

10. Чьрʹа хьзмәткьрьн мә незики Йаһоԝа у йед дьнена дькә?

¹⁰ Иса дӧайе хԝәда жь Йаһоԝа һиви дькьр, кӧ шагьртед ԝи хԝәй кә. Ле мәʹни чь бу? Әԝи дӧайе хԝәда ӧса гот: «Ԝәки бьбьн йәк, чаԝа әз у тӧ йәк ьн» (Йуһʹн. 17:11). Һәрге әм тʹәмийед Хԝәде биньн сери у дь хьзмәткьрьнеда кʹар бькьн, әме бькарьбьн пебьһʹәсьн дәрһәԛа һʹӧнӧред ԝийи баш. У ӧса жи дәрһәԛа ԝе йәке, чьрʹа әм гәрәке баԝәрийа хԝә ԝи биньн у пәй рʹебәрийа ԝи һәрʹьн. Һәрге әм незики Хԝәде бьн, әԝ жи ԝе незики мә бә. (Бьхунә Аԛуб 4:8.) Әме ӧса жи бькарьбьн незики хушк-бьра бьн, чьмки әм жи ԝәк ԝан рʹасти щерʹьбандьна у шабуне тен, у нете мә жи йәк ьн. Бәле, әм тʹәвайи дьхәбьтьн, тʹәвайи ша  дьбьн, у тʹәвайи сәбьр дькьн. Октавиа кʹижан кӧ дь Британйайеда дьжи, дьбежә: «Шьхӧлкʹарийа тʹәви Йаһоԝа мьн һе зәʹф незики йед дьн дькә, чьмки һәвалтийа мьн тʹәви ԝан нә кӧ тʹәне әԝ ә кӧ әз ԝана нас дькьм, ле нет у мәрәмед мә йәк ьн». Тӧ жи ӧса дьфькьри? Дьбәкә тӧ жи тʹәхмин дьки кӧ тӧ ләма незики йед дьн дьби, чьмки дьвини кӧ әԝана гәләк ԛәԝате хәрщ дькьн сәва кӧ дьле Йаһоԝа ша кьн.

11. Чьрʹа дьнйа тʹәзәда әме һе незики Йаһоԝа у хушк-бьра бьн?

¹¹ Рʹаст ә һʹьзкьрьна мә һьндава Хԝәде у хушк-бьра ньһа ԛәԝи йә, ле дьнйа тʹәзәда ԝе һе ԛәԝи бә. Бьдә бәр чʹәʹве хԝә әԝе хәбате, кʹижан кӧ дь ахьрийеда һивийа мә йә! Ԝедәре ԝе мәрьв жь мьрьне рʹабьн, әме бь шабуне рʹасти ԝан бен у дәрһәԛа Йаһоԝа ԝана һин кьн. Әме әʹрде бькьнә щьнәт. Әԝ шьхӧл нә һеса нә, ле әԝ йәк ԝе шабунәкә мәзьн бә, чьмки әме тʹәвайи бьхәбьтьн у бәрбь беԛьсуртийе һәрʹьн бьн Пʹадшатийа Хԝәдеда! Мәрьв ԝе незики һәвдӧ у незики Хԝәдейе хԝә бьн, кʹижан кӧ ԝе «дахԝаза һәр жийандари бь щиһ» бинә (Зәб. 145:16, ИМ).

12. Чьда шьхӧле хьзмәткьрьне мә хԝәй дькә?

¹² Әм гәрәке рʹӧһʹанийа хԝә хԝәй кьн. Чьмки әм дьжин ве дьнйайеда кӧ бьн һʹӧкӧме Шәйтʹанда йә, у һьн жи әм гӧнәкʹар ьн, ләма жи һеса дькарьн дәстпекьн нәрʹаст бьфькьрьн у бьжин ӧса ча әв дьнйа. Әм дькарьн рʹӧһʹе ԝе дьнйайе бәрамбәри чʹем бькьн, кʹижан кӧ мә дькʹьшинә ль ԝедәре, кʹидәре кӧ әм нахԝазьн һәрʹьн. Сәва кӧ ава чʹем мә нәбә алики дьн, әм гәрәке хԝә аве хьн мьԛабьли ԛәԝата аве. Бь ԝи щурʹәйи әм гәрәке ԛәԝате бьдьнә хәбате, сәва кӧ рʹӧһʹе ԝе дьнйайе мә нәбә алики дьн. Ԝәʹде хьзмәтийе, әм дина хԝә дьдьн сәр тьштед рʹӧһʹани кӧ керһати нә, нә кӧ сәр ԝан тьшта кʹижан кӧ дькарьн баԝәрийа мә сьст кьн (Фили. 4:8). Бәлакьрьна мьзгине баԝәрийа мә һе ԛәԝи дькә, у дькә бира мә дәрһәԛа созед Хԝәде у принсипед ԝийи бь һʹьзкьрьн. Әԝ йәк ӧса жи али мә дькә кӧ һащәте хԝәйә рʹӧһʹани хԝәй кьн. (Бьхунә Әфәси 6:14-17.)

13. Хушкәк жь Австралйайе чь дьшьрмиш дьбә дәрһәԛа хьзмәткьрьне?

¹³ Һәрге әм дь хьзмәткьрьнеда у шьхӧлед дьнә рʹӧһʹанида кʹар бькьн, ԝи чахи ԝе ԝәʹде мә тʹӧнә бә хәм кьн дәрһәԛа проблемед хԝә, у әԝ йәк али мә дькә кӧ әм хԝә хԝәй кьн. Щоел, кӧ дь Австралйайеда дьжи дьбежә: «Шьхӧле бәлакьрьна мьзгине али мьн дькә ԝәки бь реали сәр тьшта бьньһерʹьм. Әв тинә бира мьн кӧ мәрьв һʹаләки чьԛас хьрабда ньн у әз чь кʹаре дьстиньм чахе бь принсипед Хԝәде дьжим. Шьхӧле хьзмәткьрьне али мьн дькә кӧ мьлук бьм, у ӧса жи мәщале дьдә мьн кӧ итʹбарийа хԝә Йаһоԝа у хушк-бьра биньм».

14. Әԝ йәк кӧ әм бәрдәԝам дькьн хьзмәт кьн, ча дьдә кʹьфше кӧ рʹӧһʹе Хԝәдейи пироз тʹәви мә йә?

¹⁴ Бәлакьрьна мьзгине баԝәрийа мә ԛәԝи дькә кӧ рʹӧһʹе Хԝәдейи пироз тʹәви мә йә. Бьфькьрә сәр ԝе мәсәле: Тәрʹа хәбат дан кӧ тӧ мьһалада нан бәла ки. Ле тӧйе сәва ве хәбате у хәрще хԝә пʹәра нәстини. Хенщи ԝе йәке, тӧ дьвини кӧ гәләк мәрьв әԝи нани нахԝазьн, у һәла һе һьнәк жи тә нәфрʹәт дькьн жь бо ԝе йәке кӧ тӧ әԝи нани бәла дьки. Тәйе һʹәта кʹәнге әԝ хәбат бькьра? Жь бо реаксиа мәрьвайә нәбаш тӧйе дьлтәнг буйайи, у ԝе ԛәԝата тә тʹӧнә  буйа кӧ әԝ хәбат бәрдәԝам кьра. Ле әм дәрһәԛа хԝә дькарьн бежьн, кӧ гәләк жь мә сал бь сал бәрдәԝам дькьн бь хәрще хԝә хьзмәт дькьн, у наньһерʹьн сәр пәйкʹәтьн у ԛәрфе мәрьвед бешекьр. Ле гәло әԝ йәк избат накә кӧ рʹӧһʹе Хԝәдейи пироз сәр мә йә?

15. Чаԝа бәлакьрьна мьзгине гьредайи йә тʹәви ԛьрара Хԝәде бона инсанәте?

¹⁵ Бәлакьрьна мьзгине гьредайи йә тʹәви ԛьрара Хԝәде бона инсанәте. Ԛьрара ԝи әԝ бу кӧ мәрьв әʹрде тʹьжә кьн у тʹӧ щар нәмьрьн. Рʹаст ә Адәм гӧнә кьр, ле йәкә ԛьрара Хԝәде нәһатә гӧһастьне (Иша. 55:11). Хԝәде ӧса кьр кӧ әм жь гӧнә у мьрьне аза бьн. Сәва кӧ ԛьрара Хԝәде бе сәри, Иса һатә сәр әʹрде у әʹмьре хԝә бона мәрьвед гӧһдар да. Ле мәрьвед гӧһдар гәрәке фәʹм бькьн кӧ Хԝәде жь ԝана чь дәʹԝа дькә. Ләма жи Иса мәрьв ӧса жи һин дькьрьн, кӧ Хԝәде чь жь ԝан дәʹԝа дькә, у тʹәми да кӧ шагьрте ԝи жи әве йәке бькьн. Гава әм али мәрьва дькьн незики Хԝәде бьн, әм шьхӧлкʹарийе дькьн кӧ ԛьрара ԝи бе сери, демәк кӧ мәрьв хьлаз бьн жь гӧнә у мьрьне.

16. Ча шьхӧле бәлакьрьна мьзгине гьредайи йә тʹәви тʹәмийед Хԝәдейә һәри мәзьн?

¹⁶ Чахе әм али мәрьва дькьн сәва кӧ әԝана рʹийа һʹәта-һʹәтайе бьвиньн, бь ԝе йәке әм нишан дькьн һʹьзкьрьна хԝә һьндава ԝан у Йаһоԝа, кʹижан кӧ «дьхԝазә һʹәму мәрьв хьлаз бьн у рʹастийе нас кьн» (1 Тимтʹ. 2:4). Чахе йәк жь ԛанунзана жь Иса пьрси кӧ ԛанунеда кʹижан ә тʹәмийа һәрә мәзьн, Иса гот: «‹Хӧдан Хԝәдейе хԝә һʹьз бькә бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә›. Әв ә тʹәмийа пешьн у һәрә мәзьн. У йа дӧда жи мина ве йә: ‹Һәвале хԝә ԝәкә хԝә һʹьз бькә›». (Мәт. 22:37-39). Чахе әм шьхӧле бәлакьрьна мьзгине дькьн, бь ԝе йәке әм нишан дькьн гӧһдарикьрьна хԝә һьндава ԝан тʹәмийед Хԝәде. (Бьхунә Кʹаред Шандийа 10:42.)

17. Һун чь дьфькьрьн дәрһәԛа ԝи ԛәдьри кӧ әм дькарьн мьзгине бәла кьн?

¹⁷ Кʹәрәмәкә чьԛас мәзьн ә кӧ Йаһоԝа мәрʹа шьхӧләки ӧса дайә, кʹижан кӧ шабуне мәрʹа тинә, мә незики ԝи у йед дьнена дькә у рʹӧһʹанийа мә хԝәй дькә. Һьн жи әԝ шьхӧл мәщале дьдә мә, кӧ әм һʹьзкьрьна хԝә Хԝәдерʹа у йед дьненарʹа бьдьнә кʹьфше. Нав тʹәмамийа дьнйайе щьмәʹта Хԝәде щурʹә-щурʹә һʹалада дьжин, ле фьрԛи тʹӧнә йә әԝ щаһьл ьн йан әʹмьрда мәзьн ьн, дәԝләти нә йан кʹәсиб ьн, ԛәԝи нә йан сьст ьн, йәке әԝана һʹәму тьшти дькьн сәва кӧ мәрьв дәрһәԛа мьзгине пебьһʹәсьн. Дьԛәԝьмә һун жи ӧса тʹәхмин дькьн чаԝа кӧ Шантел, кʹижан дь Франсайеда дьжи. Әԝ дьбежә: «Кәсе Һәри Зор дь гәрдунеда, Әʹфьрандаре һʹәму тьшти, Хԝәдейе шабуне, дьбежә мьн: ‹Һәрʹә! Хәбәрдә! Хәбәрдә дәрһәԛа мьн, бь дьл у щан хәбәрдә. Әз дьдьмә тә ԛәԝате, Хәбәра хԝә Кʹьтеба Пироз, һәвалхәбаткарʹед сәр әʹзмана у сәр әʹрде, һинкьрьн, у рʹебәри ԝәʹдәда›». Бь рʹастийе жи, ԛәдьрәки чьԛас мәзьн ә бона мә, кӧ әм ԝан тьшта дькьн, чь кӧ Йаһоԝа жь мә дьхԝазә у тʹәви ԝи шьхӧлкʹарийе дькьн!