1, 2. а) Чьрʹа әԝ пьрс: «Һʹәта кʹәнге?», бал мә жи дькарә пешда бе? б) Чьрʹа мәсәлед хьзмәткʹаред бәре йед амьн, мә дьлгәрм дькьн?

«ҺʹӘТА чь ԝәхти?» Әԝ пьрс пʹехәмбәред амьн Ишайа у Һәбаԛуԛ дан (Иша. 6:11; Һәбԛ. 1:2). Чахе Даԝьд Пʹадша Зәбура 13 ньвиси, ԝе зәбуреда әԝи жи чар щара әԝ пьрс да: «Һʹәта кʹәнге?» (Зәб. 13:1, 2). Һәла һе Иса жи әԝ пьрс да чахе кʹәтә нав ԝан мәрьва баԝәрийа кʹижана тʹӧнә бу (Мәт. 17:17). Ләма әʹщебмайи нинә ԝәки щара бал мә жи әв пьрс пешда те.

² Ле чьрʹа бал мә жи дькарә әԝ пьрс пешда бе? Чьмки дьԛәԝьмә нәрʹастийе һьндава мәда бькьн. Йан дьбәкә әм әʹмьрда мәзьн ьн у нәхԝәш дькʹәвьн. Йан жи дьбәкә әм дькʹәвьнә стресе, чьмки «зәманед» хьрабда дьжин (2 Тимтʹ. 3:1). Йан дьԛәԝьмә ньһерʹандьна хьраб йа мәрьвед дор бәре мә, мә бинтәнг дькьн у әʹщьз дькьн. Ле чь жи һәбә, әм гәләк дьлгәрм дьбьн чахе педьһʹәсьн кӧ хьзмәткʹаред Йаһоԝайи бәре жи әԝ пьрс дьдан у Хԝәде әԝана сущдар нәдькьрьн сәва ԝе йәке.

3. Чь дькарә али мә бькә чахе әм дькʹәвьнә дәрәщед чәтьн?

³ Чь дькарә али мә бькә гава әм рʹасти дәрәщед чәтьн тен? Аԛубе бьре Иса гот: «Хушк-бьрано, сәбьр кьн һʹәта  һатьна Хӧдан» (Аԛуб 5:7). Бәле, мә һʹәмуйарʹа жи сәбьр лазьм ә. Ле чь те һʹәсабе сәбьр, у ча әм дькарьн әԝи һʹӧнӧри бьдьнә кʹьфше?

4, 5. а) Чь те һʹәсабе бь сәбьр бьн? б) Аԛуб чь мәсәлә ани дәрһәԛа сәбьре? (Бьньһерʹә шькле әʹԝльн.)

⁴ Ль гора Кʹьтеба Пироз, сәбьр әԝ һәйә бәре рʹӧһʹе пироз, ләма жи бей аликʹарийа Хԝәде мәрьв нькарьн ча лазьм ә әԝи һʹӧнӧри бьдьнә кʹьфше. Әм дькарьн бежьн, кӧ сәбьр әԝ пʹешкʹеш ә жь Хԝәде. У чахе сәбьра мә һәйә, бь ԝе йәке әм һʹьзкьрьна хԝә Хԝәдерʹа нишан дькьн. Әм ӧса жи һʹьзкьрьне һьндава йед майин дьдьн кʹьфше, гава бь сәбьр ьн. Ле чахе әм бе сәбьр ьн, һʹьзкьрьн ортʹа мә у мәрьвед дьнда сьст дьбә (1 Корн. 13:4; Галт. 5:22). Сәбьр әԝ ә, кӧ ԝәʹде чәтьнайед гьран әм диса жи тәйах дькьн у шабуна хԝә ӧнда накьн (Колс. 1:11; Аԛуб 1:3, 4). Сәбьр ӧса жи әԝ ә, чахе әм һʹәйфе вәнакьн, ле тәйах дькьн, ԛәԝи дьминьн у чь чәтьнайи рʹасти мә тен, йәкә әм сьст набьн. Хенщи ве йәке, Кʹьтеба Пироз мә һелан дькә, ԝәки бь дьл у щан ԛәбул кьн әве йәке кӧ лазьм ә һивийе бьн. Әв йәк рʹьнд те кʹьфше жь Аԛуб 5:7, 8 (Бьхунә.)

⁵ Чьрʹа мәрʹа лазьм ә сәбьр бьн у һивийа Йаһоԝа бьн? Аԛуб дәрәща мә бәрамбәри щоткʹар дькә. Мәсәлә, щоткʹар зәʹф дьхәбьтә сәва зәвийе бьчинә, ле әԝ нькарә сәр һәԝайе һʹӧкӧм кә, йан жи ӧса бькә ԝәки зәви зу шин бә. Әԝ нькарә ԝәʹдә ләз хә. Әԝ фәʹм дькә ԝәки гәрәке бь сәбьр һивийе бә сәва «бәре әʹрдейи бь ԛимәт» бьстинә. Дәрәща мә жи ӧса нә. Гәләк тьшт дәсте мәда нинә у лазьм ә әм һивийе бьн һʹәта Йаһоԝа созед хԝә бинә сери (Марԛ. 13:32, 33; Кʹар. Шанд. 1:7). Бәле, мина щоткʹар әм гәрәке бь сәбьр һивийе бьн.

6. Чьда әм дькарьн чʹәʹв бьдьнә Миха пʹехәмбәр?

⁶ Дәрәщед кӧ иро рʹасти мә тен, мина дәрәщед ԝәʹде Миха пʹехәмбәр ьн. Әԝи ԝәʹде пʹадшатийа Аһазда дьжит, чахе һʹәму щурʹә корупсийа һәбу. Аһаз пʹадшаки гәләк зӧлм бу. Щьмәʹте жи хԝә хьрабийе дьгьрт у «кʹаре хьрабда» дәстед ԝан бь хирәт бу. (Бьхунә Миха 7:1-3.) Миха фәʹм дькьр кӧ әԝ пе ԛәԝата хԝә нькарә әԝан дәрәщед хьраб бьгӧһезә. Ле әԝи чь дькарьбу бькьра? Әԝ дьбежә: «Ле әзе Йаһоԝа бьгәрʹьм. Әзе һивийа Хԝәде хьлазкʹаре хԝә бьм. Хԝәдайе мьн, ԝе мьн бьбьһе» (Мих. 7:7, ДТʹ). Әм жи мина Миха гәрәке бь сәбьр һивийе бьн.

7. Ча әм гәрәке һивийа созед Йаһоԝа бьн?

⁷ Һәрге баԝәрийа мә мина йа Миха йә, әме бь дьл у щан һивийа Йаһоԝа бьн. Мәсәлә, гьртийе кәледа кʹижан кӧ һивийа рʹожа щәза хԝә йә, бьхԝазә нәхԝазә гәрәке һивийа ве рʹоже бә, ле әԝ нә жи дьхԝазә әв рʹож бе. Ле дәрәща мә ӧса нинә. Әм бь дьл у щан һивийа Йаһоԝа нә, чьмки заньн кӧ әԝ ԝе ԝәʹдәда созе хԝә бинә сери у жийина һʹәта-һʹәтайе бьдә мә! Ләма жи «бь думька дьреж» у бь шабуне сәбьр бькьн (Колс. 1:11, 12). Ле һәрге әм бесәбьр бьн у бькьнә кӧтә-кӧт кӧ чьрʹа Йаһоԝа ләз накʹәвә, әԝ йәк ԝе ԝи хԝәш нәйе (Колс. 3:12).

8. Жь хьзмәткʹаред бәре әм чь дькарьн һин бьн?

⁸ Һәрге әм бьфькьрьн сәр мәсәлед хьзмәткʹаред бәре йед кӧ бь сәбьр һивийа созед Йаһоԝа бун, әме жи һелан бьн бь дьл у щан һивийе бьн (Рʹом. 15:4). Ԝе керһати бә һәрге әм биньн бира хԝә кӧ әԝана чьԛас ԝәʹдә һивийе бун, чьрʹа бь дьл у щан һивийе бун, у сәва сәбьра хԝә ԝана чь кʹәрәм сьтандьн.

9, 10. Бьраһим у Сәра чьԛас ԝәхт гәрәке һивийа Йаһоԝа буна?

⁹ Биньн бира хԝә сәрһатийа Бьраһим у Сәрайе. Әԝана «бь баԝәрийе у сәбьре созед Хԝәде ԝар дьбун». Кʹьтеба Пироз дьбежә ԝәки «Бьраһим бь думька дьреж гьһиштә» ԝи сози, кӧ Йаһоԝа ԝи кʹәрәм кьра у зӧрʹәта ԝи ль һәв зедә кьра (Ибрн. 6:12, 15). Ле чьрʹа Бьраһим гәрәке сәбьр кьра у һивийе буйа? Чьмки ԝәʹдә лазьм бу сәва әв соз бьһата сери. Пәймана кӧ Йаһоԝа тʹәви Бьраһим гьреда, дәстпебу бе сери 14 Нисане сала 1943-да Б.Д.М.. Ве рʹоже Бьраһим тʹәви Сәрайе у һʹәму мәрьвед кӧ мала ԝида дьман, Чʹәме Фәратрʹа дәрбаз бун у кʹәтьнә Әʹрде Создайи. Паше Бьраһим 25 сала һивийе бу һʹәта Исһаԛ жерʹа бу сала 1918-да Б.Д.М., у паше 60 сала һивийе бу һʹәта нәби жерʹа бун Әсаԝ у Аԛуб (Ибрн. 11:9).

¹⁰ Ле Бьраһим чьԛас әʹрд станд? Кʹьтеба Пироз дьбежә: «[Йаһоԝа] ԝаргәһ нәда ԝи [Бьраһим] . . . , нә жи дәԝса ньгәки, ле соз да кӧ ви ԝәлати чаԝа мьлкʹ бьдә ԝи у пәй ԝирʹа  жи бьдә зӧрʹәта ԝи, гава кӧ һе зарʹед ԝи тʹӧнәбун» (Кʹар. Шанд. 7:5). Паши 430 сала чахе Бьраһим Чʹәме Фәратрʹа дәрбаз бу, рʹькʹьнйата ԝи бу мьләт, кʹижан кӧ гәрәке ԝи әʹрди ԝар буйа (Дәркʹ. 12:40-42; Галт. 3:17).

11. Чьрʹа Бьраһим бь дьл һивийа Йаһоԝа бу, у әԝ сәва сәбьра хԝә ԝе чь кʹәрәма бьстинә?

¹¹ Бьраһим бь дьл һивийе бу у сәбьр дькьр, чьмки баԝәрийа хԝә Йаһоԝа у созе ԝи дьани. (Бьхунә Ибрани 11:8-12.) Рʹаст ә Бьраһим бь тʹәмами пе чʹәʹве хԝә нәдит әв соз ча һатә сери, йәкә әԝ бь шабуне сәбьр дькьр. Ле бьдьнә бәр чʹәʹве хԝә чахе Бьраһим дьнйа тʹәзәда жь мьрьне рʹабә, әԝ ԝе чьԛас ша бә. Әԝ ԝе әʹщебмайи бьминә кӧ Кʹьтеба Пирозда сәрһатийа ԝи у рʹькʹьнйата ԝи гәләк щийада һатийә ньвисаре. * Бьдьн бәр чʹәʹве хԝә, әԝ ԝе ча зәндәгьрти бьминә гава пебьһʹәсә, кӧ әԝи роләкә чьԛас мәзьн листийә ԛьрара Хԝәдеда дәрһәԛа Мәсиһ! Бешьк, әԝ ԝе бьвинә кӧ чьԛас һежа бу ԝәки һаԛас ԝәхт сәбьр кьр у һивийе ма.

12, 13. Чьрʹа Усьврʹа сәбьр лазьм бу, у тәнгасийада әԝи ча хԝә да кʹьфше?

¹² Усьв нәбичʹьрке Бьраһим жи бь сәбьр бу. Усьврʹа гәләк хьраби кьрьн. Мәсәлә, чахе әԝ ԝәкә 17 сали бу, бьред ԝийи һʹәлал ԝи ча дил фьротьн. Паше, чахе әԝ Мьсьреда бу, шәрʹ авитьнә ԝи йанчь әԝи хԝәстийә тʹәви жьна ахайе хԝә рʹазе у ләма ԝи кьрьнә кәле (Дәстп. 39:11-20; Зәб. 105:17, 18). Усьв мәрьвәки амьн у һʹәйф бу, ле те бежи әԝ дьһатә щәзакьрьне, нә кӧ кʹәрәмкьрьне. Ле паши 13 сала, һʹале ԝи ньшкева һатә гӧһастьне. Ԝи жь кәле аза кьрьн, у әԝ бу сәрԝере дӧда Мьсьреда (Дәстп. 41:14, 37-43; Кʹар. Шанд. 7:9, 10).

¹³ Ле гәло жь бо ԝан нәһәԛийа Усьв һатә гӧһастьне у бу йәки зӧлм? Гәло әԝи итʹбарийа хԝә һьндава Йаһоԝа ӧнда кьр? Тʹӧ щар на. Ле чь али ԝи кьр кӧ бь сәбьр һивийе бә? Баԝәрийа ԝи һьндава Йаһоԝа али ԝи кьр. Әԝи заньбу ԝәки Йаһоԝа һаш жь һәр тьшти һәйә у һәр тьшт дәсте ԝида йә. Баԝәрийа ԝи те кʹьфше жь ԝан гьлийа кӧ әԝи бьред хԝәрʹа гот: «Нәтьрсьн, чьма әз дәԝса Хԝәде дьгьрьм? Рʹаст ә һун һьндава мьнда хьраб фькьрин, ле Хԝәде фькьри кӧ ԝе бькә ԛәнщи, ԝәки мина рʹожа ироин, әʹмьре гәләк мәрийа хԝәй кә» (Дәстп. 50:19, 20). Бәле, Усьв фәʹм кьр ԝәки һежа бу әԝ һивийе бә.

14, 15. а) Әм жь сәбьра Даԝьд чь һин дьбьн? б) Чь али Даԝьд дькьр кӧ бь сәбьр һивийе бә?

¹⁴ Даԝьд Пʹадша жи рʹасти гәләк нәһәԛийа һат. Чахе Йаһоԝа Даԝьд бьжарт сәва әԝ ахьрийеда бьбә пʹадше Исраеле, әԝ һәла һе щаһьл бу. Ле Даԝьд 15 сала һивийе бу һʹәта әԝ бьбуйа пʹадше бәрәка хԝә (2 Сам. 2:3, 4). Һьнге, Пʹадша Шаԝул пәй Даԝьд кʹәт у дьхԝәст ԝи бькӧжә. * Ләма Даԝьд ча хәриб дьжит, әԝ щара дьрʹәвийа ԝәлатед хәриб, щара жи бәрʹийеда шкәфтада дьма. Ле һәла һе паши мьрьна Шаԝул жи, Даԝьд ԝәкә 7 сала һивийе бу сәва пʹадшатийе бькә сәр тʹәмамийа Исраеле (2 Сам. 5:4, 5).

 ¹⁵ Ле чьрʹа Даԝьд бь сәбьр һивийе бу? Щаба ве пьрсе әԝ хԝәха зәбура хԝәда дьдә, кʹидәре кӧ чар щара пьрсәкә ӧса дайә: «Һʹәта кʹәнге?» Әԝ дьбежә: «Мьн хԝә спартийә амьнийа Тә, дьле мьне ша бә, бь хьлазкьрьна Тә. Әзе бьстьрем әшԛи Хӧданә, бона ԛәнщийа кӧ ль мьн кьрийә» (Зәб. 13:5, 6). Даԝьд заньбу ԝәки Йаһоԝа амьн ә у ԝи һʹьз дькә. Әԝ дьфькьри кӧ чаԝа Йаһоԝа али ԝи дькьр, у әԝ бь дьл һивийа хьлазкьрьна хԝә бу. Бәле, Даԝьд заньбу ԝәки әԝ бадиһәԝа һивийе нинә.

16, 17. Йаһоԝа Хԝәде у Иса Мәсиһ ча сәбьра мәзьн данә кʹьфше?

¹⁶ Йаһоԝа жь мә нахԝазә тьштәки ӧса, чь кӧ әԝ хԝәха накә. Әԝ хԝәха гәләк сәбьр дькә, у ве йәкеда әԝи мәрʹа мәсәла мәзьн һиштийә. (Бьхунә 2 Пәтрус 3:9.) Йаһоԝа ида бь һʹәзара сала һивийе йә, һʹәта сафи бә әԝ шәрʹе кӧ Әдәнеда авитьнә ԝи. Әԝ бь сәбьр һивийа ԝи ԝәʹдәйи йә чахе наве ԝи бь тʹәмами бе пирозкьрьне. Гава әв ԝәʹдә бе, мәрьвед кӧ бь дьл һивийа ԝи нә, ԝе кʹәрәмед мәзьн бьстиньн (Иша. 30:18).

¹⁷ Иса жи сәбьр дькә у һивийе йә. Чахе әԝ сәр әʹрде бу, әԝ һʹәта мьрьне Йаһоԝарʹа амьн ма, у сала 33 Д.М.-да әʹмьре хԝә да ԛӧрбан у чу ль әʹзмана. У паше әԝ һʹәта сала 1914 һивийе бу сәва пʹадшатийа хԝә дәстпекә (Кʹар. Шанд. 2:33-35; Ибрн. 10:12, 13). Ле Иса ньһа жи һивийе йә һʹәта кӧ һʹәму дьжмьнед ԝи ԛьрʹ бьн паши хьлазийа Һʹәзарсалийа Пʹадшатийа ԝи (1 Корн. 15:25). Рʹаст ә әԝ ԝәʹдәки кьн нинә сәва һивийе бә, ле әԝ йәк ԝе кʹәрәмед мәзьн бинә.

18, 19. Чь ԝе али мә бькә бь сәбьр һивийе бьн?

¹⁸ Бешьк, әм жи гәрәке сәбьр кьн у бь дьл у щан һивийе бьн. Ле ве йәкеда ԝе чь али мә бькә? Хԝәдерʹа дӧа бькьн, ԝәки рʹӧһʹе хԝәйи пироз бьдә ԝә, чьмки сәбьр жи бәре рʹӧһʹе пироз ә (Әфәс. 3:16; 6:18; 1 Тʹеслн. 5:17-19). Жь Йаһоԝа һиви кьн сәва али ԝә бькә кӧ һун сәбьр кьн у ԛәԝи бьминьн.

¹⁹ Биньн бира хԝә кӧ чь али Бьраһим, Усьв, у Даԝьд кьр, кӧ әԝана бь сәбьр һивийа созед Йаһоԝа бун. Баԝәри у итʹбарийа һьндава Йаһоԝа али ԝан кьр. Әԝана нәдькʹәтьнә һʹәйра хԝә у хԝәстьнед хԝә. Һәрге әм бьфькьрьн кӧ сәбьра ԝан ча һатә кʹәрәмкьрьне, әме һелан бьн кӧ мина ԝан бь сәбьр һивийе бьн.

20. Әм гәрәке бьхԝазьн бь дьл чь бькьн?

²⁰ Һәрге жи әм ньһа рʹасти тәнгасийа у щерʹьбандьна тен, йәкә әм бь дьл у щан һивийа Хԝәде нә. Дьбәкә щара әм жи жь кʹәсәра дьле хԝә дьбежьн: «Һʹәта кʹәнге йа Йаһоԝа?» (Иша. 6:11). Ле бь аликʹарийа ԛәԝата Хԝәде, демәк рʹӧһʹе пироз, һәр кәс жь мә дькарә чʹәʹв бьдә Йерәмйа пʹехәмбәр йе кӧ гот: «Пʹара мьн Хӧдан ә; жь бәр вейа әз һевийа хԝә бь ԝива гьре дьдьм» (Лур. Йерәм. 3:21, 24).