ГОТАРА БОНА ҺИНБУНЕ 45
Йаһоԝа Чаԝа Али Мә Дькә кӧ Әм Хьзмәтийа Хԝә Биньн Сери?
«[Әԝе] бьзаньбьн кӧ нав ԝанда пʹехәмбәрәк һәйә» (ҺӘЗӘԚЕЛ 2:5).
КʹЬЛАМА 67 «Хьзмәт кә»
ВЕ ГОТАРЕДА a
1. Гәрәке әм бона чь һазьр бьн у әм дькарьн чьда баԝәр бьн?
ӘМ ЗАНЬН кӧ хьзмәтийеда, әм дькарьн рʹасти пәйкʹәтьна бен. Ахьрийеда, пәйкʹәтьн ԝе дьһа зедә бьн (Данийел 11:44; 2 Тимотʹейо 3:12; Әʹйанти 16:21). Ле диса жи, әм дькарьн баԝәр бьн кӧ Йаһоԝа ԝе али мә бькә, чьмки Йаһоԝа һәртʹьм али хьзмәткʹаред хԝә кьрийә, ԝәки әԝана щабдарийед хԝә нава тәнгасийада жи биньн сери. Мәсәлә, ԝәрә әм чәнд дәрәщед жийина Һәзәԛел пʹехәмбәр шеԝьр кьн, кʹижан кӧ Щьһуйед аксоркьрирʹа пʹехәмбәрти дькьр.
2. Мәрьвед кӧ рʹасти Һәзәԛел дьһатьн, мәрьвед чь щурʹәйи бун? Ве готареда, әме дәрһәԛа чь шеԝьр кьн? (Һәзәԛел 2:3-6)
2 Гәло мәрьвед кӧ рʹасти Һәзәԛел дьһатьн, чь щурʹәйи бун? Ль гора готьнед Йаһоԝа, әԝ мәрьвед рʹабәр у «дьл һʹьшк» бун. Әԝана мина стьруйе кӧ зийан дьдан у мина дупʹьшка хоф бун. Ләма жи, Йаһоԝа чәнд щара Һәзәԛелрʹа гот нәтьрсә! (Һәзәԛел 2:3-6 бьхунә) Һәзәԛел дькарьбу щабдарийа хԝә бинә сери, чьмки (1) Йаһоԝа әԝ шандьбу, (2) әԝи бь сайа рʹӧһʹе Хԝәде ԛәԝат дьстанд у (3) готьнед Хԝәде баԝәрийа ԝи ԛәԝи дькьрьн. Гәло әв йәк ча али Һәзәԛел дькьр у чаԝа али мә дькә?
ЙАҺОԜА ҺӘЗӘԚЕЛ ШАНД
3. Һәзәԛел жь кʹижан готьна ԛәԝат дьстанд, у Йаһоԝа чаԝа нишани ԝи кьр, ԝәки кʹеләка ԝи йә?
3 Йаһоԝа Һәзәԛелрʹа гот: «Әз тә дьшиньм» (Һәзәԛел 2:3, 4). Бәле, Һәзәԛел жь ван готьна ԛәԝат дьстанд. Гәло чьрʹа? Бешьк, әԝи заньбу, кӧ гава Йаһоԝа Муса у Ишайа ча пʹехәмбәр кʹьфш кьрьбун, әԝи ԝанрʹа жи ӧса готьбу (Дәркʹәтьн 3:10; Ишайа 6:8). Ӧса жи, Һәзәԛел заньбу, ԝәки Йаһоԝа али ван дӧ пʹехәмбәра кьрьбу, кӧ әԝана нава тәнгасийада сәркʹәвьн. Бь сайа ве йәке кӧ Йаһоԝа дӧ щара Һәзәԛелрʹа гот «әз тә дьшиньм», әԝи дькарьбу хԝә бьсперә аликʹарийа Йаһоԝа. Хенщи ве йәке, кʹьтеба Һәзәԛелда гәләк щара ӧса те готьне: «Готьна Хӧдан жь мьнрʹа һат» (Һәзәԛел 3:16; 6:1). Һәзәԛел бешьк баԝәр бу кӧ Йаһоԝа әԝ шандьбу. Ӧса жи, Һәзәԛел кӧрʹе кʹаһин бу, у бешьк баве ԝи жерʹа гьли кьрьбу, ԝәки Йаһоԝа чаԝа пʹехәмбәред хԝәрʹа готьбу, кӧ әԝ кʹеләка ԝан ә. Мәсәлә, Йаһоԝа Исһаԛ, Аԛуб у Йерәмйарʹа ӧса готьбу: «Әз тʹәви тә мә» (Дәстпебун 26:24; 28:15; Йерәмйа 1:8).
4. Һәзәԛел жь кʹижан готьна дьлбини у ԛәԝат дьстанд?
4 Гәло Исраелийа ԝе гӧһ бьда Һәзәԛел? Йаһоԝа жерʹа ӧса гот: «Мала Исраеле [ԝе] нәхԝазә кӧ тә гӧһдари бькә; жь бәр нахԝазьн кӧ мьн гӧһдари бькьн» (Һәзәԛел 3:7). Бь ве йәке кӧ Исраелийа Һәзәԛел инкʹар кьр, бь рʹасти ԝана Йаһоԝа инкʹар кьр. Жь ван готьна, Һәзәԛел фәʹм дькьр, ԝәки нәгӧһдарикьрьна щьмәʹте найе һʹәсабе, кӧ әԝ пʹехәмбәрәки бекер ә. Сәрда жи, Йаһоԝа Һәзәԛелрʹа гот кӧ гава диԝанед кӧ әԝи әʹлам дькьр, бенә сери, щьмәʹт ԝе бьзаньбә ԝәки «нав ԝанда пʹехәмбәрәк һәйә» (Һәзәԛел 2:5; 33:33). Ван готьнед Йаһоԝа дьлбини у ԛәԝат дьда Һәзәԛел, ԝәки хьзмәтийа хԝә бинә сери.
ЙАҺОԜА МӘ ЖИ ДЬШИНӘ
Мина Һәзәԛел, дьбәкә мәрьв гӧһ нәдьн мә у пәй мә кʹәвьн, ле әм заньн кӧ Йаһоԝа тʹәви мә йә (Абзаса 5 у 6 бьньһерʹә)
5. Ль гора Ишайа 44:8, чь ԛәԝате дьдә мә?
5 Йаһоԝа әм жи шандьнә, у әв йәк ԛәԝате дьдә мә. Әм сәрбьльнд ьн, кӧ әԝ мә ча «Шәʹдед» хԝә нав дькә (Ишайа 43:10, ИМ). Әв ԛәдьрәки гәләк мәзьн ә! Чаԝа кӧ Йаһоԝа Һәзәԛелрʹа готьбу «нәтьрсә», әԝ мәрʹа жи дьбежә: «Нәтьрсьн!». Гәло чьрʹа әм гәрәке дьжмьна нәтьрсьн? Чьмки мина Һәзәԛел, Йаһоԝа әм жи шандьнә, у әԝ пьштгьрийа мә дькә (Ишайа 44:8 бьхунә).
6. (а) Йаһоԝа чь соз дьдә мә? (б) Чь дькарә дьлбини у ԛәԝате бьдә мә?
6 Йаһоԝа соз дьдә кӧ әԝе али мә бькә. Мәсәлә, пешийа кӧ Йаһоԝа гот «һун Шәʹдед мьн ьн», әԝи ӧса готьбу: «Гава тӧ аварʹа дәрбаз бьби, әзе бь тәрʹа бьм. Гава тӧ чʹәмарʹа дәрбаз бьби жи, ԝе сәр тәрʹа нәԛәльбьн. Гава тӧ нав егьррʹа дәрбаз бьби, те нәшәԝьти у ԝе пʹета егьр тә нәшәԝьтинә» (Ишайа 43:2, ИМ). Ԝәʹде хьзмәтийе, әм щарна рʹасти чәтьнайед ӧса тен, йед кӧ ча бежи мина «ав» йан «егьр» ьн. Ле диса жи, бь аликʹарийа Йаһоԝа, әм бәрдәԝам дькьн хьзмәтийа хԝә тиньн сери (Ишайа 41:13). Чаԝа рʹожед Һәзәԛелда, иро жи гәләк мәрьв гӧһ надьн мьзгинийа Хԝәде, йа кӧ әм бәла дькьн. Ле әв йәк найе һʹәсабе, кӧ әм хьзмәткʹаред баш ниньн. Әм заньн кӧ гава әм хьзмәтийа хԝә бь амьни тиньн сери, Йаһоԝа жь мә рʹази йә. Паԝлосе шанди ӧса готьбу: «Һәр кәсе һәԛе хԝә бьстинә, ԝәкә хәбата хԝә» (1 Корьнтʹи 3:8; 4:1, 2). Хушкәк кӧ гәләк сала пешәнг ә, ӧса дьбежә: «Әз заньм кӧ Йаһоԝа ԝе хирәта мә хәлат кә, у әв йәк дьле мьн ша дькә».
ҺӘЗӘԚЕЛ БЬ САЙА РʹӦҺʹЕ ХԜӘДЕ ԚӘԜАТ ДЬСТАНД
Һәзәԛел хәԝн-хәйаледа әʹрәба Йаһоԝайә әʹзмани дьвинә. Әԝ хәԝн-хәйал баԝәрийа ԝи ԛәԝи дькә, кӧ Йаһоԝа ԝе али ԝи бькә хьзмәтийа хԝә бинә сери (Абзаса 7 бьньһерʹә)
7. Һәр щар гава Һәзәԛел әв хәԝн-хәйал дьани бира хԝә, әԝ йәк бешьк чаԝа сәр ԝи һʹӧкӧм дькьр? (Бьньһерʹә шькьле рʹуйе журнале.)
7 Һәзәԛел пʹехәмбәр пе чʹәʹве хԝә дитьбу, ԝәки рʹӧһʹе Хԝәде чьԛас ԛәԝат ә. Хәԝн-хәйаледа, Йаһоԝа нишани ԝи кьр, ԝәки рʹӧһʹе пироз чаԝа сәр мәләка у сәр тʹәкәрәкед мәзьн йед әʹрәба әʹзмани, һʹӧкӧм дькә (Һәзәԛел 1:20, 21). Гава Һәзәԛел әв йәк дит, әԝ дәвәрʹуйа кʹәтә сәр әʹрде (Һәзәԛел 1:28). Паше, һәр щар чахе Һәзәԛел әв хәԝн-хәйал дьани бира хԝә, баԝәрийа ԝи бешьк дьһа ԛәԝи дьбу, кӧ бь аликʹарийа рʹӧһʹе Хԝәде, әԝе бькарьбә хьзмәтийа хԝә бинә сери.
8-9. (а) Йаһоԝа Һәзәԛелрʹа чь гот? (б) Йаһоԝа чаԝа ԛәԝат да Һәзәԛел, ԝәки әԝ бькарьбә хьзмәтийа хԝә бинә сери?
8 Йаһоԝа Һәзәԛелрʹа ӧса гот: «Лаԝе мәрьв, рʹабә сәр пʹийа кӧ әз бь тәрʹа бьахьфьм [хәбәр дьм]!». Ван готьна у рʹӧһʹе Хԝәдейи пироз ԛәԝат да Һәзәԛел, ԝәки әԝ рʹабә сәр пʹийа. Әԝи ньвиси: «Рʹӧһʹ кʹәт һьндӧрʹе мьн у мьн ль сәр пʹийа рʹакьр» (Һәзәԛел 2:1, 2). Гава Һәзәԛел хьзмәтийа хԝә дьани сери, «дәсте» Йаһоԝа, демәк рʹӧһʹе пироз, һәртʹьм рʹебәрийа ԝи дькьр (Һәзәԛел 3:22; 8:1; 33:22; 37:1; 40:1). Рʹӧһʹе Хԝәде ԛәԝат дьда Һәзәԛел, ԝәки әԝ шьхӧле хԝә бинә сери у диԝана Хԝәде мәрьвед сәрһʹьшкрʹа әʹлам кә (Һәзәԛел 3:7). Йаһоԝа Һәзәԛелрʹа гот: «Мьн рʹуйе тә мина рʹуйе ԝан у әʹнийа тә жи мина әʹнийа ԝан һʹьшк кьрийә. Мьн әʹнийа тә кьрийә мина алмасәке, жь кәвьре һәстә һʹьшктьр. Жь ԝан нәтьрсә у жь рʹуйе ԝан зьравԛәти нәбә, чьмки әԝ щьмәʹтәкә рʹабәр ә» (Һәзәԛел 3:8, 9, ДТʹ). Демәк, Йаһоԝа Һәзәԛелрʹа ӧса дьгот: «Сәва сәрһʹьшкийа мәрьва әʹщьз нәбә. Әзе тә ԛәԝи кьм».
9 Паши ве йәке, рʹӧһʹе Хԝәдейи пироз рʹебәрийа Һәзәԛел дькьр. Һәзәԛел ӧса ньвиси: «Дәсте Хӧдан ль сәр мьнва хԝӧрт [ԛәԝи] бу». Жерʹа һʹәфтек лазьм бу, ԝәки хәбәра кӧ гәрәке әԝ бьгьһинә мәрьва һин бә у рʹьнд фәʹм бькә (Һәзәԛел 3:14, 15). Паше, Йаһоԝа әԝ бьрә дәштәке кӧ ԝедәре «рʹӧһʹ кʹәтә һӧндӧрʹе [ԝи]» (Һәзәԛел 3:23, 24). Һәзәԛел ида һазьр бу, ԝәки хьзмәтийа хԝә дәстпекә.
РʹӦҺʹЕ ХԜӘДЕ ԚӘԜАТЕ ДЬДӘ МӘ ЖИ
Мина Һәзәԛел, чь али мә дькә, кӧ әм хьзмәтийа хԝә биньн сери? (Абзаса 10 бьньһерʹә)
10. Сәва кӧ әм хьзмәтийа хԝә биньн сери, әм һʹәԝще чь аликʹарийе нә, у чьрʹа?
10 Гәло әм һʹәԝще чь аликʹарийе нә, ԝәки гьлийед Хԝәде бәла кьн? Сәрһатийа Һәзәԛел бинә бира хԝә. Пешийа кӧ әԝи хьзмәтийа хԝә дәстпекьр, рʹӧһʹе Хԝәде ԛәԝат да ԝи. Мина Һәзәԛел, әм жи һʹәԝще рʹӧһʹе Хԝәде нә, сәва кӧ әм бькарьбьн хьзмәтийа хԝә биньн сери. Гәло чьрʹа? Чьмки Мире-щьна мьԛабьли мә шәрʹ дькә, ԝәки әм хьзмәтийа хԝә бьдьнә сәкьнандьне (Әʹйанти 12:17). Мире-щьна чьԛас жи жь мә ԛәԝаттьр ә, йәкә әм бь сайа хьзмәтийа хԝә сәрдькʹәвьн! (Әʹйанти 12:9-11) Гәло чаԝа? Гава әм хьзмәт дькьн, әм нишан дькьн, ԝәки әм Мире-щьна натьрсьн. Чьԛас әм хьзмәт дькьн, һаԛас Шәйтʹан дьдә дәр. Әв йәк кӧ әм дькарьн хьзмәтийа хԝә ԝәʹде пәйкʹәтьна жи биньн сери, нишан дькә, ԝәки рʹӧһʹе пироз ԛәԝате дьдә мә у Йаһоԝа жь мә рʹази йә (Мәтта 5:10-12; 1 Пәтрус 4:14).
11. Рʹӧһʹе пироз чаԝа али мә дькә, у сәва кӧ әм һәртʹьм рʹӧһʹе пироз бьстиньн, гәрәке әм чь бькьн?
11 Әв йәк кӧ Йаһоԝа рʹу у әʹнийа Һәзәԛел һʹьшк кьрьбу, мә һин дькә кӧ хьзмәтийеда әм рʹасти чь жи бен, рʹӧһʹе Хԝәде дькарә ԛәԝате бьдә мә, ԝәки әм сәркʹәвьн (2 Корьнтʹи 4:7-9). Һәрге ӧса йә, әм чаԝа дькарьн бәрдәԝам кьн рʹӧһʹе Хԝәде бьстиньн? Лазьм ә кӧ әм һәр гав бона рʹӧһʹе пироз дӧа бькьн у баԝәр бьн, кӧ Йаһоԝа ԝе дӧайед мә бьбьһе. Иса шагьртед хԝәрʹа готьбу: «Бьхԝазьн, . . . бьгәрʹьн, . . . дәри хьн». Бәле, ԝи чахи Йаһоԝа ԝе әʹсәйи «рʹӧһʹе пироз бьдә әԝед кӧ жь ԝи дьхԝазьн» (Луԛа 11:9, 13; Кʹаред Шандийа 1:14; 2:4).
ГЬЛИЙЕД ХԜӘДЕ ҺӘЗӘԚЕЛ ХԜӘЙ ДЬКЬРЬН
12. Ль гора Һәзәԛел 2:9–3:3, кʹьтеба гӧломәтккьри жь кʹидәре һат, у теда чь һәбу?
12 Һәзәԛел пʹехәмбәр нә тʹәне бь сайа рʹӧһʹе Хԝәде мерхаси дьстанд, ле ӧса жи гьлийед Хԝәде баԝәрийа ԝи ԛәԝи дькьрьн. Хәԝн-хәйаледа, Һәзәԛел дәсте кәсәки дит, йе кӧ кʹьтеба гӧломәтккьри дьрежи ԝи дькьр (Һәзәԛел 2:9–3:3 бьхунә). Гәло әв кʹьтеба гӧломәтккьри жь кʹидәре һат у теда чь һәбу? Гәло әв кʹьтеб чаԝа Һәзәԛел хԝәй дькьр у ԛәԝи дькьр? Ԝәрә әм шеԝьр кьн. Кʹьтеба гӧломәтккьри жь тʹәхте Хԝәде һат. Дьԛәԝьмә Йаһоԝа әв кʹьтеба гӧломәтккьри бь сайа мәләкәки, кӧ Һәзәԛел бәре дитьбу, да ԝи (Һәзәԛел 1:8; 10:7, 20). Кʹьтеба гӧломәтккьрида, гьлийед Хԝәде ньвисар бун, у Хԝәде дьхԝәст ԝәки Һәзәԛел ве әʹламәтийа диԝане ԝан Исраелийарʹа әʹлам кә, йед кӧ дилтийеда бун (Һәзәԛел 2:7). Әв әʹламәти сәр һәрдӧ рʹуйед кʹьтеба гӧломәтккьри ньвиси бун.
13. Йаһоԝа Һәзәԛелрʹа гот, кӧ ве кʹьтеба гӧломәтккьри ча бькә, у гәло әв кʹьтеб чьрʹа ширьн бу?
13 Йаһоԝа Һәзәԛел пʹехәмбәррʹа гот, кӧ бьра әԝ кʹьтеба гӧломәтккьри бьхԝә у зьке хԝә пе тʹер кә. Һәзәԛел гӧрʹа Хԝәде кьр у әв кʹьтеба гӧломәтккьри бь тʹәмами хԝар. Гәло әԝ йәк чь дьһатә һʹәсабе? Лазьм бу Һәзәԛел әʹламәтийа Хԝәде рʹьнд фәʹм бькә у ча бежи бькә пʹара хԝә, ԝәки әԝ сәр һʹьш у дьле ԝи һʹӧкӧм бькә. Паше, тьштәки әʹщебмайи ԛәԝьми. Гава Һәзәԛел әв кʹьтеба гӧломәтккьри хԝар, әԝ бона ԝи «мина һьнгьв ширьн бу» (Һәзәԛел 3:3). Гәло чьрʹа? Бона Һәзәԛел, хԝәш у ширьн бу кӧ пе наве Йаһоԝа хәбәр дә (Зәбур 19:8-11). Әԝ шекьрдар бу, кӧ Йаһоԝа әԝ ча пʹехәмбәр кʹьфш кьрийә.
14. Чь али Һәзәԛел кьр, ԝәки хьзмәтийа хԝә бинә сери?
14 Паше, Йаһоԝа Һәзәԛелрʹа ӧса гот: «Һʹәму готьнед мьн йед кӧ әзе тәрʹа бежьм бьгьрә у бьхә дьле хԝә» (Һәзәԛел 3:10). Демәк, Йаһоԝа дьхԝәст кӧ Һәзәԛел готьнед кʹьтеба гӧломәтккьри бира хԝәда хԝәй кә у сәр ԝан кʹур бьфькьрә. Һәзәԛел жь ве йәке гәләк кʹар дьстанд, у әԝи рʹьнд заньбу, кӧ гәрәке мәрьварʹа кʹижан әʹламәтийа фәрз бәла кә (Һәзәԛел 3:11). Хәбәра Хԝәде ида сәр дьл у левед Һәзәԛел бу, ләма жи әԝ һазьр бу кӧ хьзмәтийа хԝә бинә сери (Бәрамбәр кә Зәбур 19:14).
ГЬЛИЙЕД ХԜӘДЕ МӘ ЖИ ХԜӘЙ ДЬКЬН
15. Сәва кӧ әм бькарьбьн сәбьр кьн, гәрәке әм чь ‹бькьнә дьле хԝә›?
15 Сәва кӧ әм бькарьбьн хьзмәтийеда сәбьр кьн, мәрʹа жи лазьм ә ԝәки гьлийед Хԝәде мә хԝәй кьн у ԛәԝи кьн. Гәрәке әм һʹәму готьнед Йаһоԝа ‹бькьнә дьле хԝә›. Иро, Йаһоԝа бь сайа Хәбәра хԝә, демәк бь сайа Кʹьтеба Пироз, тʹәви мә хәбәр дьдә. Сәва кӧ Хәбәра Хԝәде бәрдәԝам кә сәр фькьр, һәст у нетед мә һʹӧкӧм кә, гәрәке әм чь бькьн?
16. Әм чаԝа дькарьн Кʹьтеба Пироз бькьнә дьле хԝә?
16 Чаԝа кӧ хԝарьн бәдәна мә хԝәй дькә, хԝарьна рʹӧһʹани жи, демәк леколина Хәбәра Хԝәде у фькьрандьна кʹур сәр ԝе, мә алийе рʹӧһʹанида хԝәй дькә. Дәрса дәрһәԛа кʹьтеба гӧломәтккьри бона мә гәләк фәрз ә. Йаһоԝа дьхԝазә кӧ әм зьке хԝәйә симболик бь Хәбәра ԝи тʹер бькьн. Бона ве йәке, гәрәке әм дӧа бькьн, Хәбәра ԝи бьхуньн у сәр ԝе кʹур бьфькьрьн. Йа пешьн, гәрәке әм дӧа бькьн кӧ дьле мә һазьр бә, ԝәки фькьред Хԝәде ԛәбул кә. Паше, гәрәке әм пʹарәкә Кʹьтеба Пироз бьхуньн у ль сәр тьштед кӧ мә хԝәндьнә, кʹур бьфькьрьн. Чьԛас әм сәр Хәбәра Хԝәде кʹур бьфькьрьн, һаԛас дьле мәйи симболик ԝе бь готьнед ԝева тʹьжә бә.
17. Чьма фәрз ә кӧ әм сәр Кʹьтеба Пироз кʹур бьфькьрьн?
17 Бәлакьрьна мьзгинийа Пʹадшатийе щарна нә һеса йә. Сәрда жи, дьбәкә дәмәкә незикда лазьм бә, кӧ әм диԝана Хԝәде мәрьварʹа әʹлам кьн. Сәва кӧ ԛәԝата мә һәбә, ԝәки әм ван щабдарийа пек биньн, гәләк фәрз ә кӧ әм Кʹьтеба Пироз бьхуньн у сәр ԝе кʹур бьфькьрьн. Хенщи ве йәке, гава әм дина хԝә дьдьн һʹӧнӧред Йаһоԝайә хԝәш, достийа мә тʹәви ԝи дьһа ԛәԝи дьбә. Ахьрийеда, әме мина Һәзәԛел тьштәки хԝәш у ширьн ԛазанщ кьн, демәк әʹдьлайе у шабуне (Зәбур 119:103).
СӘБЬР КӘ!
18. Мәрьвед жь мьһала мә ԝе чь фәʹм бькьн, у чьрʹа?
18 Бәле, Һәзәԛел пʹехәмбәр бу, ле әм пʹехәмбәр ниньн. Диса жи, хԝәстьна мә әв ә, ԝәки әм мьзгинийа кӧ Йаһоԝа Хәбәра хԝәда хԝәй кьрийә, бәла кьн, һʹәта кӧ Йаһоԝа бежә «Бәс ә». Гава рʹожа диԝане бе, тʹӧ кәс ԝе нькарьбә бежә кӧ әԝ һаш жь ве әʹламәтийе тʹӧнә бу йан жи кӧ Хԝәде дина хԝә нәда ԝи (Һәзәԛел 3:19; 18:23). На, һәр кәс ԝе фәʹм бькә, ԝәки хәбәра кӧ мә бәла кьрийә, жь Хԝәде йә.
19. Чь ԛәԝате дьдә мә, ԝәки әм хьзмәтийа хԝә биньн сери?
19 Чаԝа Йаһоԝа али Һәзәԛел дькьр ԝәки әԝ хьзмәтийа хԝә бинә сери, әԝ али мә жи дькә хьзмәтийа хԝә биньн сери. Әм бәлакьрьна мьзгинийе надьн сәкьнандьне, чьмки әм заньн, кӧ Йаһоԝа әм шандьнә, әм бь сайа рʹӧһʹе пироз ԛәԝате дьстиньн у Хәбәра Хԝәде баԝәрийа мә дьһа ԛәԝи дькә. Бәле, бь аликʹарийа Йаһоԝа, әме «һʹәта хьлазийе» сәбьр кьн у хьзмәтийа хԝә биньн сери (Мәтта 24:13).
КʹЬЛАМА 65 Тʹьме Пеш!
a Ве готареда, әме дина хԝә бьдьнә се тьшта, кʹижан кӧ али Һәзәԛел пʹехәмбәр дькьрьн, ԝәки щабдарийа хԝә бинә сери. Чахе әм шеԝьр кьн, кӧ Йаһоԝа чаԝа али ԝи кьрьбу, баԝәрийа мә ԝе дьһа ԛәԝи бә, кӧ Йаһоԝа ԝе али мә жи бькә, ԝәки әм хьзмәтийа хԝә биньн сери.