СӘРҺАТИ
«Мьн Дьхԝәст бона Йаһоԝа Кʹар Бькьм»
СУРИНӘМЕДА, незики гӧнде Гранборийе, кӧ нав мешәда йә, кʹомәкә бьчʹук әм вәрʹекьрьн. Паше, әм бь ԛәйькәкә дар ль сәр Чʹәме Тапанаһони рʹе кʹәтьн. Һьнәк ԝәхт шунда, гава әм нав зьнаред чʹәмда дәрбаз дьбун, ԛәйька мә зьнарәки кʹәт. Сәре ԛәйьке нӧԛ бу, у әм бьн аведа ман. Зьраве мьн ԛәтийа! Рʹаст ә мьн бь гәләк сала ча бәрпьрсийаре мьһале пе ԛәйька рʹеԝити дькьр, диса жи мьн нькарьбу хԝә аве хьста.
Пешийа кӧ гьли кьм паше чь ԛәԝьми, әз дьхԝазьм бежьм кӧ мьн чаԝа хьзмәтийа һәртʹьм дәстпекьр.
Әз сала 1942 ль Карибе, сәр гьрава бәдәԝ йа Киурасао, һатьм буйине. Баве мьн бь әʹсле хԝә жь Суринәме бу, ле әԝ бона хәбате дәрбази ԝьр бьбу. Чәнд сал пешийа буйина мьн, баве мьн йәк жь кәсед пешьн бу, йе кӧ ль Киурасао һатьнә ньхӧмандьне у бунә Шәʹдед Йаһоԝа. a Әм пенщ хушк-бьра нә, у чахе әм бьчʹук бун, мә щарна нәдьхԝәст Кʹьтеба Пироз бьхԝәнда, ле диса жи, баве мә һәр һʹәфтә тʹәви мә Кʹьтеба Пироз леколин дькьр. Гава әз 14 сали бум, әм дәрбази Суринәме бун, чьмки лазьм бу кӧ баве мьн мьԛати дийа хԝә бә.
ҺӘВАЛЕД БАШ АЛИ МЬН ДЬКЬРЬН
Щьвата Суринәмеда, мьн тʹәви щаһьлед кӧ хьзмәтийеда хирәт бун, һәвалти дькьр, йед кӧ чәнд сала мьн мәстьр бун. Әԝана пешәнгед һәртʹьм бун, у ԝана бь шабуне бәʹса ԛәԝьмандьнед хьзмәтеда дькьр. Паши щьвина, мә щарна бьн стәйркед әʹзманада Кʹьтеба Пироз шеԝьр дькьр. Бь сайа ван һәвалед баш, мьн фәʹм кьр кӧ әз жийина хԝәда чь дьхԝазьм бькьм: Мьн дьхԝәст бона Йаһоԝа кʹар бькьм. Ләма жи, гава әз 16 сали бум, әз һатьмә ньхӧмандьне, ле чахе әз бумә 18 сали, мьн дәстпекьр ча пешәнге һәртʹьм хьзмәт кьм.
ДӘРСЕД ԚИМӘТ
Чахе әм ль Парамарибойе пешәнг бун
Гава әз пешәнг бум, мьн гәләк дәрсед ԛимәт стандьн, йед кӧ али мьн кьрьн, ԝәки әз хьзмәтийа һәртʹьм ча лазьм ә биньм сери. Әз һин бум кӧ чьԛас фәрз ә, ԝәки әз кәсед дьн һин кьм. Гава мьн дәстпекьр ча пешәнг хьзмәт кьм, мьзгинванәки мисйонер бь наве Ԝиләм
ван Сәл, әз кьрьм бьн пʹәрʹе хԝә. Әԝи әз һин кьрьм, ԝәки щьватеда гәрәке әз щабдарийед хԝә чаԝа биньм сери. Әз бь рʹасти жи гәләк һʹәԝще ве йәке бум. Саләк шунда, әз ԝәк пешәнге мәхсус һатьмә кʹьфшкьрьне, у паше, мьн али кʹомед бьчʹук дькьр, йед кӧ нав меша Суринәмеда, дури щьвата бун. Әз бона һинкьрьна кӧ мьн жь Ԝиләм у бьред дьн станд, гәләк рʹази бум. Жь һьнгеда әз жи хирәт дькьм кӧ мина ԝан, бона һинкьрьна кәсед дьн ԝәхт вәԛәтиньм.Ӧса жи әз һин бум, кӧ бь жийинәкә сьвьк у организә бьжим. Гава әз у һәвале мьн пешәнгед мәхсус бун, мә дәстпека һәр мәһеда шеԝьр дькьр, кӧ ԝе мәһе чь һʹәԝщед мә ԝе һәбьн. Паше, йәк жь мә рʹийа дур дьчу һʹәта шәһәр, ԝәки тьштед лазьм бькʹьрʹә. Мә пʹәре мәһе бь сәрԝахти хәрщ дькьр у һәр тьшт ӧса дьда хәбате, ԝәки бькарьбьн мәһәке әʹбура хԝә бькьн, чьмки мә заньбу кӧ һәрге ньшкева мәрʹа тьштәк лазьм бә, ль дәр-дора мә кәс тʹӧнә кӧ али мә бькә. Әв йәк кӧ әз щаһьлтийа хԝәда һин бум, кӧ бь жийинәкә сьвьк у организә бьжим, али мьн кьр ԝәки әз тʹәмамийа әʹмьре хԝә дина хԝә бьдьмә шьхӧле Йаһоԝа.
Диса дәрсәк кӧ әз һин бум әв бу, кӧ чьԛас фәрз ә, ԝәки әз мәрьва сәр зьмане ԝан һин кьм. Зарʹотийеда әз зьманед Һоланди, Инглизи, Папайаменти у Сранантонго һин бьбум. Ле мешәда, гава мә бь зьмане дайике хәбәр дьда, мәрьва дьһа баш гӧһ дьда мә. Һьнә жь ван зьмана бона мьн зор бун, мәсәлә зьмане Сарамакайи, йе кӧ теда дәнгед бьльнд у ньмьз һәнә. Диса жи, һинбуна ван зьмана гәләк һежа бу, чьмки бь сайа ԝан зьмана, мьн рʹастийа Кʹьтеба Пироз гиһандә гәләк мәрьва.
Һинбуна зьманәки тʹәзә һьлбәт нә һеса йә, у щарна мьн тьштәки шаш дьгот у шәрми дьмам. Мәсәлә, щарәке мьн дьхԝәст бь зьмане Сарамакайи жьнькәкә кӧ зьке ԝе дешийа бьпьрсийа, кӧ әԝ ньһа ча нә, ле мьн бь шаши ле пьрси, һәла әԝ һʹәмлә йә. Бьдьнә һʹәсабе хԝә әԝе жьньке чьԛас шәрм кьр! Нава чәтьнайед ӧсада жи, әз һәртʹьм хирәт дькьм кӧ бь зьмане дайике тʹәви мәрьва хәбәр дьм.
ЩАБДАРИЙЕД ТʹӘЗӘ
Сала 1970-да, әз ча бәрпьрсийаре мьһале һатьм кʹьфшкьрьне. Ԝе сале, мьн бәрнамәкә пе слайда, демәк шькьла, бь наве «Сәрледана Офиса Сәрәкә йа Шәʹдед Йаһоԝа» нишани гәләк кʹома кьр, йед кӧ мешәда бун. Әз у чәнд бьра, сәва кӧ бьгьһижьн ван щийед дур, мә пе ԛәйькәкә дар чʹәмарʹа рʹеԝити дькьр. Мә генератор, балоне бензине, ләмпед ньфте, прожектор у һащәта бона нишанкьрьна слайда тʹәви хԝә дьбьрьн. Гава әм дьгьһиштьн щи, мә әв тьшт бар дькьрьн щийе кӧ бәрнамә дьһатә дәрбазкьрьне. Те бира мьн, кӧ ԝан мәрьва жь бәрнама чьԛас шабун дьстандьн. Мьн гәләк һʹьз дькьр мәрьва дәрһәԛа Йаһоԝа у тʹәшкиләта ԝи һин кьм. Шьхӧле кӧ мьн
бона Йаһоԝа дькьр, бь рʹасти жи гәләк баш бу у һежайи һәр тьшти бу.ВӘГЬРТЬНА БӘНӘКИ СЕԚӘТИ
Әз у Етʹел, әм мәһа Илоне, сала 1971-да зәԝьщин
Рʹаст ә жийина азәп бона хьзмәтийе гәләк баш бу, ле йәкә мьн дьхԝәст бьзәԝьщьм. Ләма жи, мьн Йаһоԝарʹа дӧа кьр, ԝәки әз хԝәрʹа һәваләке бьвиньм, йа кӧ һазьр ә тʹәви мьн мешәда хьзмәтийа һәртʹьмда кʹар бькә. Ԝәкә саләк шунда, мьн хушкәкә хирәт бь наве Етʹел нас кьр, йа кӧ ча пешәнга мәхсус хьзмәт дькьр. Жь зарʹотийеда, Етʹел Паԝлосе шандирʹа һʹәйр-һʹӧжмәкʹар дьма, у хԝәстьна ԝе әԝ бу, кӧ мина Паԝлос хьзмәт бькә. Мәһа Илоне, сала 1971-да, әм зәԝьщин, у мьн ида тʹәви жьна хԝә бәрдәԝам кьр ча бәрпьрсийаре мьһале хьзмәт кьм.
Гава Етʹел зарʹ бу, малбәта ԝе дәсттәнг бу, ләма жи жерʹа чәтьн нибу һини жийина мешәда бә. Мәсәлә, гава әм дьчун щьватед кӧ кʹурайа мешәда бун, мә гәләк тьшт тʹәви хԝә нәдьбьрьн. Мә сәре хԝә у кʹьнщед хԝә чʹәмада дьшушт. Ӧса жи, хԝәйе мале чь дьданә бәр мә, мә әԝ жи дьхԝар, мәсәлә мәʹрәгиск, пиран у һʹәйԝанед дьн, йед кӧ мешәда йан жи чʹәмада дьһатьнә гьртьне. Чахе тʹәбах тʹӧнә бун, мә бәлгед банана дьда хәбате, у гава кәвчʹи тʹӧнә бу, мә пе дәста дьхԝар. Бь сайа ԛӧрбанед кӧ мә тʹәвайи хьзмәтийа Йаһоԝада дькьр, әм бунә бәнәки сеԛәти (Ԝаиз 4:12). Әм жь жийина хԝә тʹӧ щар пʹошман нәбун!
Щарәке, гава әм жь щики дур вәдьгәрʹийанә мале, әм кʹәтьнә ве дәрәще дәрһәԛа кʹижани мьн серида гот. Чахе ԛәйьк кʹәтә нав зьнара, әԝ нӧԛ бу, ле паше зу сәр аве кʹәт. Ча баш ә кӧ мә еләк ль хԝә кьрьбун, ԝәки нәхәньԛьн у әм жь ԛәйьке нәкʹәтьнә аве. Ле ԛәйьк бь аве тʹьжә бу. Мә кʹупькед хԝарьне вала кьр у пе ԝан ав жь ԛәйьке дәрхьст.
Хԝарьна мә тʹӧнә бу, мә дьхԝәст мәʹси бьгьрта, ле мә ԛә мәʹси нәгьрт. Ләма жи, мә дӧа кьр ԝәки Йаһоԝа нане ԝе рʹоже бьдә мә. Дәрберʹа паши дӧа, бьрак мәʹсики ӧса мәзьн гьрт, кӧ ԝе еваре тʹера мә пенщ кәса кьр.
МЕР, БАВ У БӘРПЬРСИЙАРЕ РʹЕԜИ
Паши кӧ мә пенщ сал шьхӧле рʹеԝитийе кьр, әм пеһʹәсийан кӧ зарʹ ԝе мәрʹа бе буйине. Әз гәләк ша бум, ле әз бәрхԝә дькʹәтьм кӧ жийина мә ԝе чаԝа бә. Әз у Етʹел, мә гәләк дьхԝәст хьзмәтийа һәртʹьм бәрдәԝам кьра. Сала 1976-да, кӧрʹе мә Етʹниел һатә буйине. Кӧрʹе мәйи бьчʹук Щовани дӧ сал у нив шунда һатә буйине.
Незики Годо Һолойе, Суринәма Рʹоһьлат, 1983: Кәсәк Чʹәме Тапанаһонийеда те ньхӧмандьне
Һьнге, Суринәмеда һʹәԝщәти һәбу, ләма жи Бәйтʹәле изьн да ԝәки әз ча бәрпьрсийаре мьһале бьминьм, у һьм жи зарʹед хԝә мәзьн кьн. Чахе кӧрʹед мә бьчʹук бун, һәремед кӧ теда щьват һьндьк бун, тʹәсмили мьн дькьрьн. Ләма жи, мьн дькарьбу һәр мәһ чәнд һʹәфте ча бәрпьрсийаре рʹеԝи хьзмәт кьм, у һʹәфтийед дьн, мьн щьвата хԝәда ча пешәнг хьзмәт дькьр. Гава әз дьчум щьватед незики мала мә, Етʹел у кӧрʹед мә тʹәви мьн дьһатьн. Ле гава әз дьчум щьват у кʹомщьвинед нава мешә, мьн тʹәне рʹеԝити дькьр.
Гава әз бәрпьрсийаре мьһале бум, әз гәләк щара бь ԛәйьке дьчумә щьватед дур
Сәва кӧ мьн һʹәму щабдарийед хԝә бьанийа сери, лазьм бу кӧ мьн һәр тьшт рʹьнд организә кьра. Мәсәлә, бона мьн фәрз бу кӧ ԛӧльхкьрьна тʹәви малбәте һәр һʹәфте дәрбаз бә. Гава әз дьчум щьватед нава мешәда, ле малбәта мьн малда дьма, Етʹеле ԛӧльхкьрьна малбәте тʹәви зарʹа дәрбаз дькьр. Диса жи, чьԛас жь дәсте мә дьһат, мә һʹәму тьшт тʹәвайи дькьр. Ӧса жи, мә тʹәвайи листьк дьлистьн у дьгәрʹийан. Мьн гәләк щара һʹәта ниве шәве хԝә бона щабдарийед щьвате һазьр дькьр. Мина жьна жир жь Мәтʹәлок 31:15, Етʹел жи сьбәһе зу рʹадьбу, ԝәки әм бькарьбьн тʹәвайи рʹеза рʹоже бьхуньн у тәʹште бьхԝьн, пешийа кӧ зарʹ һәрʹьн мәкʹтәбе. Етʹел бь рʹасти жи жьнәкә хирәт ә, йа кӧ һәртʹьм али мьн дькә, ԝәки әз һʹәму щабдарийед хԝә, кӧ Йаһоԝа данә мьн, биньм сери.
Мә һәртʹьм бь дьл у щан али кӧрʹед хԝә дькьр, ԝәки әԝана Йаһоԝа у хьзмәтийе һʹьз бькьн. Мә дьхԝәст ԝәки кӧрʹед мә нә сәва хԝәстьна мә, ле бь дьле хԝә
хьзмәтийа һәртʹьм бьжберьн. Ләма жи, мә һәртʹьм ԝанрʹа дьгот, кӧ хьзмәтийа һәртʹьм чьԛас шабуне тинә. Ӧса жи, мә дьгот кӧ чьԛас чәтьнайед мә һәбун жи, Йаһоԝа али мә кьрийә у әм кʹәрәм кьрьнә. Хенщи ве йәке, мә тʹьме мәщал дьда кӧрʹед хԝә, ԝәки әԝана тʹәви хушк-бьред хирәт ԝәʹдә дәрбаз кьн.Гава мә зарʹед хԝә мәзьн дькьрьн, Йаһоԝа бона һʹәму һʹәԝщед мә хәм дькьр. Мьн һәмьки һәр тьшт дькьр, ԝәки әʹбура малбәта хԝә бькьм. Бь сайа ве йәке кӧ мьн ча пешәнгәки азәп мешәда хьзмәт кьрьбу, мьн заньбу кӧ чьԛас фәрз ә, ԝәки әм бона һʹәԝщед хԝәйә материали пешда бьфькьрьн. Ле щарна, әм диса жи алийе материйалида дькʹәтьн тәнгасийе, у ԝи чахи Йаһоԝа али мә дькьр. Мәсәлә, жь сала 1986 һʹәта сала 1992, ль Суринәме тʹәвльһәвбун дәстпебу. Ԝан салада, щарна зор бу кӧ әм һʹәԝщед сәрәкә дәст хьн. Диса жи, Йаһоԝа әм бьрʹчи нәдьһиштьн (Мәтта 6:32).
ӘЗ ԚӘ ПʹОШМАН НӘБУМӘ
Жь алийе чʹәпе һʹәта алийе рʹасте: Әз у жьна мьн Етʹел
Кӧрʹе мәйи мәзьн Етʹниел у жьна ԝи Натали
Кӧрʹе мә Щовани у жьна ԝи Кристал
Тʹәмамийа әʹмьре мәда, Йаһоԝа һәртʹьм мә хԝәй дькьр у дьле мә ша дькьр. Зарʹед мә бь рʹасти жи пʹешкʹешед жь Хԝәде нә, у әм гәләк ша нә кӧ мә ԝана сәр рʹийа Йаһоԝа мәзьн кьрийә. Әм ша нә кӧ ԝана жи хьзмәтийа һәртʹьм кьрийә нета жийина хԝә. Етʹниел у Щовани һинбунед тʹәшкиләте хьлаз кьрьнә у ньһа тʹәви жьнед хԝә Бәйтʹәла Суринәмеда хьзмәт дькьн.
Әз у Етʹел, әм ида әʹмьрда мәзьн ьн, ле әм һе ча пешәнгед мәхсус хьзмәт дькьн. Һаԛас шьхӧле мә һәйә, кӧ әз һе һин нәбумә хԝә аве хьм! Ле рʹаст бежьм, әз ԛә пʹошман нәбумә. Гава әз жийина хԝә дьдьм бәр чʹәʹве хԝә, әз гәләк ша мә кӧ әз жь щаһьлтийе ча хьзмәткʹаре һәртʹьм Йаһоԝарʹа хьзмәт дькьм!