1-2. Ль гора Зәбур 34:8, әм чаԝа дькарьн ԛәнщийа Йаһоԝа бьвиньн?

БЬДӘ бәр чʹәʹве хԝә ԝәки тӧ меванти дьчи у хԝәйе мале хԝарьнәкә нәнас датинә бәр тә. Гәло тӧ чаԝа дькари бьзаньби һәла әв хԝарьн хԝәш ә йан на? Мәсәлә, тӧ дькари сәр хԝарьне бьньһерʹи, бина хԝарьне һьлди, ресепта ве хԝарьне пебьһʹәси йан жи кәсед дьн бьпьрси һәла әԝ дәрһәԛа ве хԝарьне чь дьфькьрьн. Ле һʹәта тӧ ве хԝарьне тәʹм нәки, те нькарьби тедәрхи һәла әв хԝарьн ԝе тә хԝәш бе йан на.

² Мина ве йәке, гава әм Кʹьтеба Пироз у әʹдәбйәтед мә дьхуньн, йан гава кәсед дьн бәʹса кʹәрәмед жь Йаһоԝа дькьн, әм дәрһәԛа ԛәнщийа Йаһоԝа һьнә тьшта педьһʹәсьн. Ле һәгәр әм ԛәнщийа Йаһоԝа хԝәха «тәʹм кьн», әме бьвиньн кӧ Йаһоԝа чьԛас ԛәнщ ә (Зәбур 34:8 бьхунә). Ве мәсәле бинә бәр чʹәʹве хԝә: Тӧ дьхԝази хьзмәта һәртʹьм дәстпеки, ле сәва кӧ тӧ бькарьби бьгьһижи ве нете, гәрәке тӧ жийина хԝә дьһа сьвьк ки. Дьбәкә тә гәләк щар дәрһәԛа ве созе Иса хԝәндийә, кӧ һәгәр әм бәре пешьн Пʹадшатийа Хԝәде бьгәрʹьн, Йаһоԝа ԝе бона һʹәму һʹәԝщед мә хәм бькә. Дьԛәԝьмә һʹәта ньһа тә жийина хԝәда нәдитийә кӧ Йаһоԝа ве созе хԝә чаԝа тинә сери (Мәтта 6:33). Ле чьмки тӧ баԝәрийа хԝә созе Иса тини, тӧ хәрщед хԝә у хәбата хԝә дьһа кем дьки у бь тʹәмами дина хԝә дьди хьзмәта хԝә. Һьнге тӧ дьвини кӧ Йаһоԝа бона һʹәԝщед тә чаԝа хәм дькә у тӧ хԝәха ‹тәʹм дьки› ԝәки Йаһоԝа чьԛас ԛәнщ ә.

3. Ль гора Зәбур 31:19, һәри зедә кʹе ԛәнщийа Йаһоԝа дьвинә?

³ Йаһоԝа һьндава «һʹәмуйа ԛәнщ ә», һәла һе һьндава  ԝан жи, йед кӧ ԝи нас накьн (Зәбур 145:9; Мәтта 5:45). Ле илаһи кәсед кӧ Йаһоԝа һʹьз дькьн у бь дьл у щан ԝирʹа хьзмәт дькьн, жь ԝи гәләк кʹәрәма дьстиньн  (Зәбур 31:19 бьхунә). Ньһа әм дина хԝә бьдьн һьнә кʹаред кӧ әм жь ԛәнщийа Йаһоԝа дьстиньн.

4. Йаһоԝа чаԝа ԛәнщийа хԝә ԝан мәрьварʹа дьдә кʹьфше, йед кӧ незики ԝи дьбьн?

⁴ Гава әм чь кӧ жь Йаһоԝа һин дьбьн, әʹмре хԝәда дьдьнә хәбате, әм кʹарәкә мәзьн дьстиньн. Чахе мә Йаһоԝа тʹәзә нас дькьр, әԝи али мә дькьр ԝәки әм тʹәрка фькьр у кьрьнед хьраб бьдьн, йед кӧ әм жь ԝи дур дьхьстьн (Колоси 1:21). Гава мә жийина хԝә тʹәсмили Йаһоԝа кьр у һатьнә ньхӧмандьне, мә ԛәнщийа ԝи һе зедә дит, чьмки әԝи исафа тʹәмьз да мә у әм ча достед хԝә ԛәбул кьрьн (1 Пәтрус 3:21).

5. Хьзмәтеда әм чаԝа ԛәнщийа Йаһоԝа дьвиньн?

⁵ Әм ԛәнщийа Йаһоԝа хьзмәтеда жи дьвиньн. Гәло тӧ йәки шәрмокә йи? Гәләк хьзмәткʹаред Йаһоԝа шәрмокә нә. Пешийа кӧ тӧ буйи хьзмәткʹаре Йаһоԝа, тӧ дьбәкә дьфькьрийи кӧ тӧйе тʹӧ щара нькарьби һәрʹи бәр дәре кәсед нәнас, ԝәки мьзгине ԝанрʹа гьли ки. Ле иро тӧ ви шьхӧли бәрдәԝам дьки. Сәрда жи, бь сайа аликʹарийа Йаһоԝа, тӧ ида жь бәлакьрьна мьзгине шабуне дьстини! Тә гәләк щар пьштгьрийа Йаһоԝа дитийә. Гава тӧ рʹасти пәйкʹәтьна дьһати, әԝи али тә дькьр дьлрʹьһʹәт бьмини. Ӧса жи, әԝи али тә кьрийә һьнә рʹезед лазьм бини бира хԝә ԝәки ԝан мәрьварʹа бьхуни, йед кӧ гӧһ дьданә тә. Гава тʹӧ кәс гӧһ нәдьда тә жи, әԝ ԛәԝат дьда тә ԝәки тӧ хьзмәта хԝә бәрдәԝам бьки (Йерәмйа 20:7-9).

6. Һинкьрьна кӧ әм жь Йаһоԝа дьстиньн, чаԝа ԛәнщийа ԝи нишан дькә?

⁶ Йаһоԝа ӧса жи ԛәнщийа хԝә мәрʹа нишан дькә кӧ мә һин дькә чаԝа хьзмәт бькьн (Йуһʹәнна 6:45). Мәсәлә, сәр щьвата «Бьжин у Хьзмәт кьн», әм һин дьбьн ча тʹәви мәрьва хәбәрдане дәстпекьн. Серида дьбәкә мәрʹа һʹәвәки чәтьн ә методәкә тʹәзә бьдьнә хәбате, ле ԝәʹдә шунда әм дьвиньн ԝәки әв метод бона дәшта мә керһати йә. Ӧса жи, щарна сәр щьвата у щьватед мәзьн те готьне, ԝәки әм мьзгине бь щурʹед тʹәзә бәла кьн. Чьԛас мәрʹа зор бә жи, ԝе баш бә ԝәки әм һәр тьшти бькьн кӧ ве йәке бьщерʹьбиньн у бь ви щурʹәйи рʹе бьдьн Йаһоԝа мә кʹәрәм бькә. Ньһа әме дина хԝә бьдьн һьнә жь ван кʹәрәма, у әме бьвиньн кӧ әм ча дькарьн хьзмәта хԝә зедә бькьн.

7. Һәгәр әм хирәт бькьн кӧ хьзмәта хԝәда зедә бькьн, әме чь кʹәрәма бьстиньн?

⁷ Әм һе незики Йаһоԝа дьбьн. Дина хԝә бьдьн мәсәла рʹуспики бь наве Самуйел, * йе кӧ тʹәви жьна хԝә Коломбйайеда хьзмәт дькә. Әԝана щьвата хԝәда пешәнг бун, ле ԝана дьхԝәст дәрбази щьватәкә дьн бьн ԝәки хьзмәтеда һе зедә бькьн. Ле сәва кӧ бьгьһижьн ве нете, ԝанрʹа лазьм бу һьнә тьшта ԛӧрбан бькьн. Самуйел дьбежә: «Мә ширәта жь Мәтта 6:33 ани сери, у мә ида тьштед кӧ мәрʹа бь рʹасти нә лазьм бун, нәдькʹьрʹин. Ле йа һәри зор әв бу кӧ әм мала хԝә бьһельн. Мә мала хԝә гәләк һʹьз дькьр, чьмки мә бь хԝәстьна дьле хԝә әв ава кьрьбу, у мә дәйн бона авакьрьна ве һьлнәдабу». Паши кӧ әԝана дәрбази щьвата тʹәзә бун, ԝана дит кӧ һьнә пʹәрә жи бәси ԝан ә. Самуйел дьбежә: «Мә дитийә кӧ Йаһоԝа чаԝа рʹебәрийа мә дькә у щаба дӧайед мә дьдә. Әԝи бь щурʹәки тʹәзә нишани мә кьрийә кӧ әԝ жь мә рʹази йә у мә һʹьз дькә». Гәло тӧ жи дькари хьзмәта хԝә зедә бьки?  Һәгәр тӧ ве йәке бьки, тӧйе дьһа незики Йаһоԝа би, у әԝ ԝе бона тә хәм бькә (Зәбур 18:25).

8. Готьнед Иван у Викторийайе чь мә һин дькьн?

⁸ Әм жь хьзмәте шабуне дьстиньн. Дина хԝә бьдә сәрһатийа Викторийа у Иван, жьн-мерәки жь Ԛьргьзьстане кӧ пешәнг ьн. Ԝана бь жийинәкә сьвьк дьжит, ԝәки бькарьбьн щурʹә-щурʹә кʹьфшкьрьнада – мәсәла проектед авакьрьнеда бьхәбьтьн. Иван дьбежә: «Әм бь дьл у щан сәр һәр проекте дьхәбьтин. Хьлазийа рʹоже әм чьԛас ԝәстийайи бун жи, дьле мә бь әʹдьлайе тʹьжә дьбу, чьмки мә заньбу кӧ мә ԛәԝата хԝә бона шьхӧле Пʹадшатийе хәрщ кьрийә. Ӧса жи, мә рʹожед гәләк хԝәш дәрбаз дькьрьн, у мә хԝәрʹа гәләк һәвалед тʹәзә дитьн» (Марԛос 10:29, 30).

9. Хушкәкә кӧ һʹале ԝе гьран ә, хьзмәта хԝә чаԝа зедә кьрийә, у әԝе чь кʹар стандийә?

⁹ Дәрәщед мә чьԛас зор бьн жи, әм дькарьн жь хьзмәта Йаһоԝа шабуне бьстиньн. Мәсәлә, хушкәкә әʹмьрда мәзьн бь наве Мира, йа кӧ Африкайа Рʹоавайеда дьжи, доктор бу. Паши кӧ әԝ бу пенсйонер, әԝе дәстпекьр ча пешәнг хьзмәт кә. Мира һьм жьнәби йә һьм жи бь артрите нәхԝәш ә, ләма жи әԝ нькарә сьһʹәтәке зедәтьр мал бь мал хьзмәт бькә. Ле хьзмәта пе стенда бона ԝе дьһа һеса йә. Гәләк хԝәндәкʹаред ԝе һәнә, у әԝ пе тʹеле тʹәви ԝан хәбәр дьдә. Гәло чь али Мирайе дькьр хьзмәта хԝә зедә бькә? Әԝ ӧса дьбежә: «Әз Йаһоԝа у Иса Мәсиһ гәләк һʹьз дькьм. Әз гәләк щар дӧа дькьм кӧ Йаһоԝа али мьн бькә, ԝәки әз чьԛас жь дәсте мьн те ԝирʹа хьзмәт бькьм» (Мәтта 22:36, 37).

10. Ль гора 1 Пәтрус 5:10, йед кӧ хьзмәта хԝә зедә дькьн жь Йаһоԝа чь дьстиньн?

¹⁰ Әм жь Йаһоԝа дьһа зедә һинкьрьне дьстиньн. Һәла дина хԝә бьдә сәрһатийа пешәнгәки бь наве Кени, йе кӧ сәр гьрава Мәԝритусе дьжи. Гава әԝ дәрһәԛа рʹастийе пеһʹәсийа, әԝ жь университете дәркʹәт, һатә ньхӧмандьне у дәстпекьр хьзмәт кә ча пешәнге һәртʹьм. Әԝ дьбежә: «Нета мьн әв ә кӧ әз ль гора готьнед Ишайа пʹехәмбәр бьжим, йе кӧ гот: ‹А вай әз, мьн бьшинә!›» (Ишайа 6:8). Кени чәнд проектед авакьрьнеда у шьхӧле ԝәлгәрʹандьнеда хәбьти. Әԝ дьбежә: «Бь сайа һинкьрьна кӧ мьн жь тʹәшкиләте стандийә, әз пʹешед ӧса һин бум кӧ али мьн кьрьн щабдарийед хԝә дьһа баш биньм сери». Хенщи ван пʹеша, әԝ бьра тьштед дьн жи һин бу. Әԝ дьбежә: «Мьн синоред хԝә тедәрхьст, у мьн дит кӧ гәрәке әз кʹижан һʹӧнӧра нав хԝәда пешда биньм, ԝәки Йаһоԝарʹа дьһа баш хьзмәт бькьм» (1 Пәтрус 5:10 бьхунә). Дьбәкә тӧ жи дькари мәщалед тʹәзә бьгәрʹи, ԝәки дьһа зедә һинкьрьне жь Йаһоԝа бьстини.

11. Һьнә хушкед жь Корейа Башуре чь кьрьн, ԝәки хьзмәта хԝә зедә бькьн, у ахьри чь бу? (Бьньһерʹә шькле рʹуйе журнале.)

¹¹ Хушк у бьред щерʹьбанди жи дькарьн жь һинбуне кʹаре бьстиньн. Мәсәлә, ԝәʹде пандәмийа COVID-19, рʹуспийед жь щьватәкә Корейа Башуре ӧса ньвисин: «Һьнә кәсед кӧ дьфькьрин ԝәки сьһʹәт-ԛәԝата ԝан рʹийа ԝан дьгьрә мьзгине бәла кьн, ньһа ве йәке ида бь сайа видео-конференсийа дькьн. Се хушкед кӧ 80 сали зедәтьр ьн һини тәкʹноложийа тʹәзә бунә, у әԝана ньһа һәр рʹож бь ве методе хьзмәт дькьн» (Зәбур 92:14, 15). Гәло тӧ жи дьхԝази хьзмәта хԝәда һе зедә бьки у ԛәнщийа Йаһоԝа һе зедә ‹тәʹм ки›? Һәла дина хԝә бьдә һьнә гавед кӧ дькарьн али тә бькьн бьгьһижи ве нете.

12. Йаһоԝа чь соз дьдә кәсед кӧ итʹбарийа хԝә ԝи тиньн?

¹² Итʹбарийа хԝә Йаһоԝа бинә. Әԝи соз дайә кӧ һәгәр әм бь дьл у щан ԝирʹа хьзмәт бькьн, әԝе кʹәрәма сәр мәда бьбаринә (Малахи 3:10). Коломбйайеда хушкәкә бь наве Фабиола дит ԝәки Йаһоԝа ве созе хԝә ча тинә сери. Паши ньхӧмандьне, әԝе дьхԝәст бьбә пешәнга һәртʹьм. Ле жерʹа лазьм бу бьхәбьтә, ԝәки әʹбура малбәта хԝә бькә. Гава ԝәхт һат кӧ әԝ дәркʹәвә сәр пенсйайе, әԝе жь дьл дӧа кьр ԝәки Йаһоԝа али ԝе бькә. Әԝ дьбежә: «Бь рʹасти гәләк ԝәхт лазьм  ә, ԝәки бь ԛануни бьби пенсйонер у документед тә ԛәбул бькьн, ле шьхӧле мьн нава мәһәкеда һатә ԛәбулкьрьн. Әԝ ча кʹәрәмәт бу!» Дӧ мәһ шунда, әԝ бу пешәнг. Фабиола ньһа 70 сали зедәтьр ә у ида 20 сал зедәтьр ә кӧ әԝ пешәнг ә. Әԝе ида али 8 кәса кьрийә кӧ бьбьн шагьртед Иса Мәсиһ. Әԝ дьбежә: «Әз хԝә щарна бетʹаԛәт тʹәхмин дькьм, ле Йаһоԝа һәр рʹож али мьн дькә ԝәки хьзмәта хԝә бәрдәԝам бькьм».

13-14. Кʹижан сәрһати дькарьн али мә бькьн, ԝәки әм итʹбарийа хԝә Йаһоԝа биньн у хьзмәта хԝә зедә бькьн?

¹³ Жь сәрһатийед кәсед кӧ хԝә дьспартьн Йаһоԝа, дәрса һин бә. Кʹьтеба Пироз бәʹса гәләк кәса дькә, йед кӧ бь дьл у щан Йаһоԝарʹа хьзмәт дькьрьн. Гәләк щара лазьм бу, ԝәки ԝана гава пешьн бьавитана, сәва кʹәрәмед Йаһоԝа бьстандана. Мәсәлә, Бьраһим рʹе кʹәт «ле ньзаньбу жи кʹӧда дьчә» у паши ве йәке  жь Йаһоԝа кʹәрәмед мәзьн станд (Ибрани 11:8). Аԛуб паши кӧ тʹәви мәләкәки гӧлаш гьрт, кʹәрәмәкә мәхсус станд (Дәстпебун 32:24-30). Гава мьләте Исраел гәрәке бькʹәта Әʹрде Создайи, ԝана тʹәне паши ве йәке ча кʹаһина ньгед хԝә кьрьнә Чʹәме Урдӧне, дькарьбун чʹәмрʹа дәрбаз бьбуна (Йешу 3:14-16).

¹⁴ Ӧса жи, тӧ дькари жь сәрһатийед хушк у бьред иройин, йед кӧ итʹбарийа хԝә Йаһоԝа анинә у хьзмәта хԝә зедә кьрьнә, кʹаре бьстини. Мәсәлә, бьраки бь наве Пейтьн у жьна ԝи Дианайе жь сәрһатийед хушк-бьред кӧ хьзмәта хԝә зедә кьрьнә, шабун дьстанд. Сәрһатийед ӧса рʹеза готареда бь наве «Әԝана бь Рʹәзәдьли Хьзмәт Дькьн» * һәнә. Пейтьн дьбежә: «Гава мә сәрһатийед ԝан дьхԝәндьн, бона мә әв ӧса бу ча те бежи мә сәр ԝан кәса дьньһерʹи, йед кӧ хԝарьнед тәʹмхԝәш дьхԝьн. Ләма мә жи хԝәст ‹тәʹм кьн у бьзаньбьн, кӧ Хӧдан ча ԛәнщ ә›». Ԝәхт шунда, Пейтьн у Диана дәрбази дәштәкә дьн бун, кʹидәре кӧ мьзгинван һьндьк бун. Гәло тә сәр jw.org видеойед дәрһәԛа хушк-бьред кӧ бона хьзмәте чунә щийед дур, дитийә? Готар у видеойед ӧса дькарьн али тә бькьн мәщала бьгәрʹи, ԝәки хьзмәта хԝә зедә ки.

15. Һәвалтийа бь кәсед кӧ бәре пешьн Пʹадшатийе дьгәрʹьн ча дькарә али мә бькә?

¹⁵ Тʹәви кәсед кӧ бәре пешьн Пʹадшатийе дьгәрʹьн, һәвалтийе бькә. Гава мәрьв тʹәви кәсед кӧ хԝарьнәке һʹьз дькьн ԝәхт дәрбаз дькә, дьԛәԝьмә рʹожәке әԝе жи бьхԝазә ве хԝарьне тәʹм бькә. Мина ве йәке, һәгәр тӧ тʹәви кәсед кӧ һәри зедә дина хԝә дьдьн хьзмәта Йаһоԝа, ԝәхт дәрбаз бьки, әв йәк ԝе али тә бькә ԝәки тӧ жи мәщала бьгәрʹи хьзмәта хԝә зедә бьки. Бьраки бь наве Кент ӧса дьбежә: «Һәвалтийа тʹәви кәсед кӧ бәре пешьн Пʹадшатийе дьгәрʹьн, мерхаси да мьн у жьна мьн, ԝәки әм жи тьштәки тʹәзә бьщерʹьбиньн». Иро Кент у жьна ԝи Вероника Сербйайеда ча пешәнгед мәхсус хьзмәт дькьн.

16. Ль гора мәсәла Иса, кӧ Луԛа 12:16-21-да ньвисар ә, чьрʹа әм гәрәке һазьр бьн ԛӧрбана бькьн?

¹⁶ Һазьр бә бона Йаһоԝа ԛӧрбана бьки. Сәва кӧ әм дьле Йаһоԝа ша кьн, нә лазьм ә әм тʹәрка һәр тьшти бьдьн, чь кӧ әм һʹьз дькьн (Ԝаиз 5:19, 20). Ле һәгәр әм хьзмәта хԝә зедә накьн, чьмки һазьр ниньн ԛӧрбана бькьн, әм дькарьн бьбьнә мина мәрьве жь мәсәла Иса, йе кӧ бь жийинәкә рʹьһʹәт дьжит, ле Хԝәде нә хәма ԝи бу (Луԛа 12:16-21 бьхунә). Бьраки бь наве Кристиан, йе кӧ Франсайеда дьжи, ӧса дьбежә: «Мьн ча лазьм ә ԝәхт у ԛәԝата хԝә бона Йаһоԝа у бона малбәта хԝә хәрщ нәдькьр». Кристиан у жьна ԝи сафи кьрьн бьбьнә пешәнг. Ле сәва бьгьһижьн ве нете, лазьм бу әԝана хәбата хԝә бьһельн. Сәва кӧ әʹбура хԝә бькьн, ԝана мал у офис тʹәмьз дькьрьн, у һин бун бь пʹәре бьчʹук рʹази бьн. Гәло әԝана пʹошман бун кӧ һаԛас тьшт жь хԝә кем кьрьн? На! Кристиан дьбежә: «Әм жь хьзмәта хԝә дьһа зедә шабуне дьстиньн, чьмки дьвиньн ча хԝәндәкʹаред Кʹьтеба Пироз у йед кӧ әм сәрледана ԝан дькьн, дәрһәԛа Йаһоԝа педьһʹәсьн у рʹӧһʹанида пешда дьчьн».

17. Һьнә кәс чьрʹа хьзмәтеда методед тʹәзә нащерʹьбиньн?

¹⁷ Хьзмәтеда методед тʹәзә бьщерʹьбинә (Кʹаред Шандийа 17:16, 17; 20:20, 21). Пешәнгәкерʹа бь наве Ширли жь  Дәԝләтед Йәкбуйи, ԝәʹде пандәмийа COVID-19 лазьм бу методед хьзмәта хԝә бьгӧһезә. Серида, әԝе нәдьхԝәст пе тʹеле хьзмәт бькә. Ле паши сәрледана бәрпьрсийаре мьһале, әԝ һин бу ве метода хьзмәте бьдә хәбате. Ширли дьбежә: «Әз пешийе дьтьрсийам, ле ньһа әз жь ве метода хьзмәте гәләк шабуне дьстиньм. Бь ве методе, әм мьзгине дьгьһиньн дьһа зедә мәрьва!»

18. Гава әм һәр тьшти дькьн, ԝәки хьзмәта хԝә зедә бькьн, чь дькарә али мә бькә бәр чәтьнайа сәбьр бькьн?

¹⁸ Хԝәрʹа нетәке дайнә у хирәт бькә кӧ бьгьһижи ве. Гава әм рʹасти тәнгасийа тен, гәрәке әм дӧа бькьн у рʹьнд бьфькьрьн, һәла әм дькарьн ве дәрәщеда чь бькьн (Мәтʹәлок 3:21). Пешәнгәкә бь наве Сониа, йа кӧ Әԝропайеда ль кʹомәкә бь зьмане Романи хьзмәт дькә, дьбежә: «Әз нетед хԝә сәр кʹахазәке дьньвисьм у ве кʹахазе щики бәр чʹәʹв датиньм. Ль сәр сьфьра мьн шькләк һәйә у сәр ве шькле дӧ рʹе щурʹә-щурʹә алийава дьчьн. Гава лазьм дьбә кӧ әз сафикьрьнәке бькьм, әз сәр ве шькле дьньһерʹьм у дьфькьрьм, гәло кʹижан рʹе, демәк кʹижан сафикьрьна мьн ԝе мьн бәрбь нета мьн бьвә». Сониа сәр хԝә дьхәбьтә, ԝәки жь бо чәтьнайа гәләк бәрхԝә нәкʹәвә. Әԝ дьбежә: «Һәр дәрәщәкә тʹәзә йан дькарә бьбә ча диԝарәк кӧ рʹийа мьн дьгьрә, йан жи ча пʹьрәк кӧ рʹийа мьн вәдькә ԝәки бьгьһижьмә нета хԝә. Һәр тьшт ньһерʹандьна мьнва гьредайи йә».

19. Әм чаԝа дькарьн нишан бькьн ԝәки әм ԛәнщийа Йаһоԝа дьшекьриньн?

¹⁹ Йаһоԝа мә бь гәләк щурʹа кʹәрәм дькә. Сәва кӧ әм рʹазибуна хԝә бона ԝан кʹәрәма нишан кьн, ԝе баш бә чь жь дәсте мә те бькьн, ԝәки пәсне ԝи бьдьн (Ибрани 13:15). Мәсәлә, лазьм ә бьфькьрьн һәла әм чаԝа дькарьн хьзмәта хԝә зедә бькьн. Бь ви щурʹәйи, әме кʹәрәмед дьн жи бьстиньн. Бәле, гәрәке әм мәщалед тʹәзә бьгәрʹьн ԝәки «тәʹм кьн у бьзаньбьн кӧ Хӧдан ча ԛәнщ ә». Һьнге, әме жи мина Иса бежьн: «Хԝарьна мьн әԝ ә, кӧ әз хԝәстьна йе кӧ әз шандьмә бькьм у шьхӧлед ԝи биньмә сери» (Йуһʹәнна 4:34).