1. Гәләк хушк-бьра һазьр ьн чь бькьн?

ХЬЛАЗИЙА ве дьнйайе незик ә, ләма жи шьхӧле мә гәләк ә (Мәтта 24:14; Луԛа 10:2; 1 Пәтрус 5:2). Әм гьшк дьхԝазьн бь дьл у щан Йаһоԝарʹа хьзмәт бькьн. Гәләк хушк у бьра хьзмәта хԝә зедә дькьн. Һьнә кәс дьхԝазьн бьбьн пешәнг. Һьнә хушк у бьра жи дьхԝазьн Бәйтʹәледа йан проектед авакьрьнеда бьхәбьтьн. Ӧса жи, гәләк бьра дьхԝазьн бьбьн бәрдәстийед щьвате йан рʹуспи (1 Тимотʹейо 3:1, 8). Гава Йаһоԝа рʹәзәдьли у хирәта хьзмәткʹаред хԝә дьвинә, бешьк дьле ԝи гәләки ша дьбә! (Зәбур 110:3; Ишайа 6:8)

2. Һәгәр әм нькарьн бьгьһижьн һьнә нета, әв йәк дькарә сәр мә ча һʹӧкӧм кә?

² Ле һьнә кәс хәмгин ьн, чьмки гәләк ԝәхт дәрбаз буйә, ле әԝана һе нәгьһиштьнә нета дьле хԝә. Һьнә хушк-бьра ида кал у пир бунә йан сәва тәнгасийед дьн нькарьн һьнә щабдарийа бьстиньн (Мәтʹәлок 13:12). Мәсәлә, һʹале хушка мә Мелиса * ӧса йә. Әԝе дьхԝәст бьчуйа Бәйтʹәле йан жи Мәкʹтәба бона Мьзгинванед Пʹадшатийе, ле йазьх кӧ әԝ нькарә бьгьһижә ван нетед хԝә. Мелиса дьбежә: «Әʹмре мьн ида мәзьн ә. Әв хԝәстьнед мьн мьнрʹа ча хәйал ьн. У щарна әз бәрхԝә дькʹәвьм».

3. Һәгәр кәсәк дьхԝазә һе зедә щабдарийа бьстинә, ԝе баш бә кӧ әԝ чь бькә?

³ Гәләк хушк-бьред мәйә щаһьл сьһʹәт-ԛәԝат у сәрхԝә  нә. Диса жи, сәва кӧ әԝана щабдарийед тʹәзә бьстиньн, лазьм ә кӧ әԝана жь алийе рʹӧһʹанива дьһа пешда һәрʹьн. Мәсәлә, дьбәкә лазьм ә кӧ әԝана һе зедә бь сәбьр бьн, рʹьнд шьхӧлед хԝә биньн сери у һьндава мәрьва дьһа бь ԛәдьр бьн. Һәгәр тӧ сәр хԝә бьхәбьти у һʹӧнӧред ӧса нав хԝәда пешда бини, дьбәкә рʹожәке тӧйе һе зедә щабдарийа бьстини. Дина хԝә бьдә сәрһатийа бьре мә Ник. Гава әԝ 20 сали бу, әԝ гәләк бәрхԝә дькʹәт, чьмки әԝ ча бәрдәстийе щьвате нәдьһатә кʹьфшкьрьне. Әԝ дьбежә: «Мьн фәʹм нәдькьр кемасийа мьн чь бу». Диса жи, Ник нәсәкьни, әԝи бь дьл у щан чьԛас дәсте ԝи дьһат, щьватеда шьхӧл дькьр у бь хирәт хьзмәт дькьр. Иро әԝ бьра әндәме Комитейәкә Филиале йә.

4. Ве готареда, әме дәрһәԛа чь хәбәр дьн?

⁴ Һәгәр тӧ хәмгин и, чьмки тӧ һе нәгьһиштийи нетәкә рʹӧһʹани, дьле хԝә Йаһоԝарʹа вәкә (Зәбур 37:5-7). Ӧса жи, жь бьред гьһишти бьпьрсә һәла тӧ чаԝа дькари хьзмәтеда пешда һәрʹи, у ширәтед ԝан һьлдә һʹәсаб. Һәгәр тӧ ӧса бьки, тӧйе бькарьби бьгьһижи нета хԝә. Ле мина Мелисайе, һәгәр дәрәща тә наһелә кӧ тӧ щабдарики бьстини, тӧ чаԝа дькари шабуна хԝә хԝәй ки? Ве готареда, тӧйе бьвини кӧ (1) чь дькарә тәрʹа шабуне бинә, (2) тӧ чаԝа дькари шабуна хԝә зедә бьки у (3) тӧ дькари чь щурʹә нета хԝәрʹа дәйни кӧ шабуна хԝә зедә бьки.

5. Ль гора Ԝаиз 6:9, гәрәке әм дина хԝә бьдьн чь?

⁵ Ԝаиз 6:9-да те готьне, кӧ әм дькарьн жь чь шабуне бьстиньн (Бьхунә, ИМ). Мәрьве кӧ бь тьштед «кӧ чʹәʹв дьвинә» ша дьбә, жь һʹале хԝә рʹази йә. Ле мәрьве кӧ һәр тʹьм дьфькьрә тʹәне сәр ве йәке чь кӧ ‹щане ԝи дьхԝазә›, пәй ван тьшта дькʹәвә, йед кӧ щәм ԝи тʹӧнә нә. Әв бона мә чь дәрс ә? Сәва кӧ әм шабуне бьвиньн, гәрәке әм дина хԝә бьдьн сәр тьштед кӧ щәм мә ида һәнә у сәр нетед ӧса кӧ әм бь рʹасти дькарьн бьгьһижьне.

6. Ньһа әме кʹижан мәсәле леколин бькьн, у чьрʹа?

⁶ Гәло бь рʹасти дьбә ԝәки әм жь тьштед кӧ щәм мә һәнә, рʹази бьн? Һьнә кәс дьфькьрьн кӧ әв йәк набә, чьмки мәрьв щики насьтьрә у һәр тʹьм тьштед тʹәзә дьгәрʹә. Ле бь рʹасти әԝ йәк дьбә! Әм дькарьн бь тьштед «кӧ чʹәʹв дьвинә» һьм рʹази бьн һьм жи шабуне бьстиньн. Гәло чь щурʹәйи? Ньһа әме мәсәла Иса дәрһәԛа тәланта леколин бькьн, йа кӧ Мәтта 25:14-30-да ньвисар ә. Әме жь ве мәсәле пебьһʹәсьн, кӧ әм ча дькарьн һʹале хԝәда шабуне ӧнда нәкьн у һьм жи чаԝа шабуна хԝә дьһа зедә кьн.

7. Кьн мәсәла Иса дәрһәԛа тәланта гьли кьн.

⁷ Ве мәсәледа мерәки дьхԝәст һәрʹә ԝәлатәки дьн. Пешийа кӧ әԝ чу, әԝи гази хӧламед хԝә кьр у тәлант дан ԝан, ԝәки әԝана ван тәланта бькьнә нава шьхӧл. * Ахайе ԝан ль гора фәрәсәт у ԛәԝата ԝан, тәлант данә ԝан, хӧламәкирʹа пенщ тәлант, йе дьнрʹа дӧ тәлант у йе сьсийарʹа жи тәлантәк да. Дӧ хӧлама тәлантед кӧ ԝанрʹа һатьбун тʹәсмилкьрьне, рʹьнд данә хәбате, ле йе сьсийа тʹӧ тьшт нәкьр, ләма жи ахайе ԝи бәри ԝи да.

8. Хӧламе пешьн чьрʹа ша бу?

 ⁸ Бешьк хӧламе пешьн гәләк ша бу кӧ ахайе ԝи пенщ тәлант тʹәсмили ԝи кьрьн. Пенщ тәлант бь рʹасти жи пʹәре мәзьн бу, у ве йәке нишан дькьр кӧ ахайе ԝи чьԛас итʹбарийа хԝә ԝи дьани! Ле гәло хӧламе дӧда хәмгин бу, кӧ әԝи тʹәне дӧ тәлант стандьн?

9. Ль гора мәсәла Иса, ча те кʹьфше хӧламе дӧда чь нәкьр? (Мәтта 25:22, 23)

⁹ Мәтта 25:22, 23 бьхунә. Иса нәгот кӧ хӧламе дӧда хәмгин бу у һерс кʹәт, чьмки әԝи тʹәне дӧ тәлант стандьн. Әԝи нәгот: «Аха чьрʹа тʹәне дӧ тәлант данә мьн? Фәрәсәтед мьн жи бь ԛаси хӧламе дьн ьн, йе кӧ пенщ тәлант стандьн. Һәгәр аха мьн ԛимәт накә, әзе ван тәланта вәшерьм у пәй шьхӧле хԝә бьньһерʹьм».

10. Хӧламе дӧда пе тәлантед хԝә чь кьр?

¹⁰ Мина хӧламе пешьн, йе дӧда жи щабдарийа хԝә рʹьнд ани сери. Әԝи бь дьл у щан шьхӧле ахайе хԝә пешда бьр, у тәлантед кӧ әԝи стандьбун, дӧ щар зедә кьр. Әв хӧлам жи сәва һʹӧнӧр у хирәта хԝә һатә хәлаткьрьн. Аха һьм жь ԝи рʹази бу, һьм жи сафи кьр ԝәки әв хӧлам һежа йә кӧ дьһа зедә щабдарийа бьстинә.

11. Әм чаԝа дькарьн шабуна хԝә зедә кьн?

¹¹ Мина ве йәке, ԝе баш бә кӧ тӧ жи щабдарийед хԝә бь хирәт бини сери. Һәгәр тӧ «тʹәмамийа ԝәхте хԝә» тʹәсмили шьхӧле бәлакьрьна мьзгине дьки у шьхӧлед щьвате бь дьл у щан тини сери, тӧйе шабуне бьстини (Кʹаред Шандийа 18:5; Ибрани 10:24, 25). Хԝә рʹьнд һазьр  бькә, ԝәки тӧ бькарьби щьватеда пе щабед хԝә хушк-бьра бьшьдини. Дәрсед кӧ тӧ бона щьвата «Бьжин у Хьзмәт кьн» дьстини, рʹьнд у бь хирәт һазьр кә. Һәгәр щьватеда тәрʹа шьхӧләк бе дайине, ви шьхӧли ԝәʹдәда у бь тʹәмами бинә сери. Дәрһәԛа тʹӧ шьхӧле рʹӧһʹани нәфькьрә кӧ һежа нинә ԝәхте хԝә сәр хәрщ ки. Фәрәсәтед хԝәда пешда һәрʹә у шьхӧлед хԝәда бьбә һостә (Мәтʹәлок 22:29). Чьԛас тӧйе бь шьхӧлед рʹӧһʹани у шьхӧлед щьватева мьжул би, тӧйе һе зу пешда һәрʹи у дьһа зедә шабуне бьстини (Галати 6:4). Сәрда жи, гава кәсәки дьн кʹьфшкьрьнәке дьстинә, йа кӧ тә жи дьхԝәст бьстанда, әв йәк кӧ тӧ шьхӧлед щьватева мьжул и, ԝе али тә бькә ԝәки тӧ тʹәви ԝи ша би (Рʹомайи 12:15; Галати 5:26).

12. Дӧ мьзгинвана шабуна хԝә чаԝа зедә кьр?

¹² Те бира тә кӧ хушкәкә бь наве Мелиса чьԛас дьхԝәст бьчуйа Бәйтʹәле йан Мәкʹтәба бона Мьзгинванед Пʹадшатийе? Рʹаст ә хԝәстьна ԝе нәһатә сери, ле диса жи әԝ дьбежә: «Әз хирәт дькьм кӧ хьзмәта пешәнгийе бь дьл у щан бькьм, у әз һʹәму методед хьзмәте дьдьмә хәбате. Әв йәк дьле мьн ша дькә». Ӧса жи, гава бьре мә Ник ча бәрдәстийе щьвате нәһатә кʹьфшкьрьне, әԝи чь кьр? Әԝ дьбежә: «Мьн дина хԝә дьда тьштед кӧ щәм мьн ида һәбун. Мәсәлә, мьн тʹьме бь хирәт хьзмәт дькьр у щьватеда щабед фькьранди дьда. Хенщи ве йәке, мьн бланка бона хьзмәта Бәйтʹәледа тʹьжә кьр, у саләк шунда әз һатьм тʹәглифкьрьн».

13. Ԝе чьма баш бә кӧ тӧ бь тʹәмами дина хԝә бьди сәр щабдарийед кӧ ньһа щәм тә һәнә? (Ԝаиз 2:24)

¹³ Һәгәр тӧ бь тʹәмами дина хԝә бьди сәр щабдарийед кӧ ньһа щәм тә һәнә, дьбәкә рʹожәке тӧйе мина Ник щабдарийед дьһа мәзьн бьстини. Ле һәгәр на, мина Мелисайе тӧ диса жи дькари шабуна хԝә зедә ки, жь һʹале хԝә рʹази би у ԝан тьштарʹа кӧ щәм тә һәнә ша би (Ԝаиз 2:24 бьхунә). Ӧса жи, әв йәк кӧ ахайе мә Иса Мәсиһ жь хирәта тә рʹази йә, дькарә дьле тә рʹьһʹәт бькә.

14. Чьрʹа лазьм ә әм нетед рʹӧһʹани дайньн пешийа хԝә?

¹⁴ Ԝе баш бә кӧ әм һәри зедә дина хԝә бьдьн кʹьфшкьрьнед кӧ ньһа щәм мә һәнә. Ле гәло әԝ йәк те һʹәсабе кӧ нә лазьм ә әм хирәт бькьн ԝәки хьзмәтеда дьһа пешда һәрʹьн? Һьлбәт на! Әм дькарьн у һьм жи лазьм ә кӧ әм нетед рʹӧһʹани дайньн пешийа хԝә. Һәгәр нетед мәйә рʹӧһʹани һәбьн, әме чь жь дәсте мә те бькьн, ԝәки һьм хьзмәтеда бьбьнә һостә һьм жи щьватеда кери хушк-бьра бен. Сәва әм бьгьһижьн ван нета, гәрәке әм бь сәрԝахти у мьлукти дина хԝә бьдьн ве йәке, кӧ әм чаԝа дькарьн али кәсед дьн бькьн (Мәтʹәлок 11:2; Кʹаред Шандийа 20:35).

15. Кʹижан нет дькарьн шабуна тә зедә бькьн?

¹⁵ Гәло тӧ дькари хԝәрʹа кʹижан нета дайни? Жь Йаһоԝа аликʹарийе бьхԝазә ԝәки тедәрхи һәла тӧ дькари бьгьһижи кʹижан нета (Мәтʹәлок 16:3; Аԛуб 1:5). Мәсәлә, гәло тӧ дькари бьби пешәнге ԝәʹдәлу йан пешәнге һәртʹьм? Гәло тӧ дькари Бәйтʹәледа йан проектед авакьрьнеда хьзмәт бьки? Йан жи, сәва кӧ тӧ мьзгине дьһа зедә бәла ки, гәло тӧ дькари зьманәки тʹәзә һин би йан дәрбази дәштәкә дьн би? Сәва кӧ тӧ бьгьһижи нетед ӧса, ԝе баш бә кӧ тӧ әʹдәбйәтед мәда леколина бьки у тʹәви  рʹуспийа хәбәр ди. * Чьԛас тӧ хирәт бьки кӧ бьгьһижи нетед ӧса, пешдачуйина тә ԝе әшкәрә бә, у шабуна тә ԝе зедә бә.

16. Һәгәр әм нькарьн бьгьһижьн нетәке, ԝе баш бә кӧ әм чь бькьн?

¹⁶ Һәгәр тӧ нькари бьгьһижи нетед ӧса кӧ жоре мә бәʹса ԝан кьрьбу, гәло тӧ дькари чь бьки? Хԝәрʹа нетәкә дьн дайнә! Гәләк фәрз ә ԝәки нетед кӧ тӧ хԝәрʹа датини, ԛаси ԛәԝата тә бьн. Ньһа әме дәрһәԛа һьнә нетед ӧса хәбәр дьн.

17. Ль гора 1 Тимотʹейо 4:13, 15, сәва кӧ бьрак бьбә дәрсдарәки дьһа баш, ԝе баш бә кӧ әԝ чь бькә?

¹⁷ 1 Тимотʹейо 4:13, 15 бьхунә. Һәгәр тӧ бьраки ньхӧманди йи, ԝе баш бә кӧ тӧ пешда һәрʹи у бьби готарван у дәрсдарәки дьһа баш. Бь ви щурʹәйи, гӧһдаред тә ԝе жь хԝәндьн, хәбәрдан у һинкьрьна тә дьһа кʹаре бьстиньн. Мәсәлә, хԝәрʹа бькә нет ԝәки һʹәму методед кӧ ль брошура «Хԝәндьн у Һинкьрьнеда Щерʹьбанди бә» һәнә, йәк пәй йәкерʹа леколин бьки у бьди хәбате. Дәрсәке бьжберә у ԝәхтәки сәр бьхәбьтә. Пешда хԝә һазьр бькә у ван ширәта, дәрс у готаред хԝәда бьдә хәбате. Жь бьре ширәткʹар * йан жь рʹуспийед дьн, кӧ «хәбәрдан у һинкьрьнеда дьхәбьтьн», ширәте бьхԝазә (1 Тимотʹейо 5:17). Һьлбәт бәс нинә кӧ тӧ тʹәне ԝан метода кӧ брошуреда һатьнә дайине, бьди хәбате. Нета тә гәрәке әв бә ԝәки баԝәрийа гӧһдара дьһа ԛәԝи бьки у ԝана һелан ки ԝәки тьштед кӧ әԝана  дьбьһен, жийина хԝәда бьдьнә хәбате. Бь ви щурʹәйи, тӧйе һьм шабуна ԝан һьм жи шабуна хԝә зедә ки.

18. Чь дькарә али мә бькә кӧ хьзмәтеда әм бьгьһижьн нетед хԝә?

¹⁸ Мә һʹәмуйарʹа шьхӧл һатийә дайине, ԝәки мьзгине бәла кьн у мәрьва бькьн шагьртед Иса (Мәтта 28:19, 20; Рʹомайи 10:14). Һәгәр тӧ дьхԝази ви шьхӧле фәрзда бьби һостә, хԝәрʹа нет дайнә ԝәки тӧ ширәтед жь брошура «Хԝәндьн у Һинкьрьнеда Щерʹьбанди бә», леколин бьки у бьди хәбате. Ӧса жи, бәрнама щьвинеда «Мина Иса Мәсиһ Бьжин у Хьзмәт кьн», у видеойед щурʹе бәлакьрьна мьзгинеда, гәләк фькред керһати һәнә. Бьщерʹьбинә һәла кʹижан фькьр у метод бона дәшта тә һәри керһати нә. Чьԛас тӧ ван ширәта бини сери, тӧйе һаԛас бьби мьзгинванәки һостә, у әв йәк ԝе шабуне тәрʹа бинә (2 Тимотʹейо 4:5).

19. Әм ча дькарьн һʹӧнӧред баш нав хԝәда пешда биньн?

¹⁹ Гава тӧ хԝәрʹа нета датини, бир нәкә ԝәки нета һәри фәрз әԝ ә кӧ тӧ һʹӧнӧред баш нав хԝәда пешда бини (Галати 5:22, 23; Колоси 3:12; 2 Пәтрус 1:5-8). Гәло чаԝа? Мәсәлә, һәгәр тӧ дьхԝази баԝәрийа хԝә дьһа ԛәԝи бьки, тӧ дькари әʹдәбйәтед мәда ширәта бьгәрʹи. Ӧса жи, тӧ дькари һьнә видеойед жь JW Бродкастинг бьньһерʹи, йед кӧ нишан дькьн ԝәки хушк-бьред мә чаԝа һьмбәри тәнгасийа у щерʹьбандьна амьнийе хԝәй дькьн. Паше, бьфькьрә тӧ ча дькари чʹәʹв бьди баԝәрийа ԝан.

20. Әм чаԝа дькарьн шабуна хԝә зедә бькьн?

²⁰ Бешьк әм гьшк дьхԝазьн Йаһоԝарʹа һе зедә хьзмәт бькьн. Дьнйа тʹәзәда, әме бькарьбьн бь щурʹе һәри баш ԝирʹа хьзмәт бькьн. Һʹәта әв рʹож бе, ԝе баш бә әм һʹәму мәщала кӧ дькʹәвә дәсте мә, бьдьнә хәбате, чьмки ӧса шабуна мә ԝе зедә бә, у әме гәләк бәрхԝә нәкʹәвьн. Сәрда жи, әме пәсне Йаһоԝа бьдьн, йе кӧ «Хԝәдейе хԝәзьли» йә (1 Тимотʹейо 1:11). Ләма ԝәрә әм тʹьме щабдари у шьхӧлед хԝәрʹа ша бьн, йед кӧ щәм мә ида һәнә!