ПАШИ ве йәке чахе Кевин ^[1] рʹастийе пеһʹәсийа, әԝи гәләк дьхԝәст кӧ бьбә досте Йаһоԝа. Ле пешийа кӧ әԝ дәрһәԛа рʹастийе пебьһʹәсийа, әԝ гәләк сала хӧмарбаз бу, щьхарә дькʹьшанд, гәләк ичʹкә вәдьхԝар, у наркотика дьда хәбате. Сәва кӧ Кевин ԛәбулкьрьна Хԝәде бьстинә, ԝирʹа лазьм бу әԝан кьред хьраб бьтʹәрькинә. У әԝи бь аликʹарийа Йаһоԝа у бь Кʹьтеба Пироз әԝ тьшт тʹәрькандьн (Ибрн. 4:12).

² Чахе Кевин һатә ньхӧмандьне, паше ԝирʹа лазьм бу диса һьнә хәйсәт-һʹӧнӧред хԝә бьгӧһезә, сәва кӧ бьбә Мәсиһийе һе баш (Әфәс. 4:31, 32). Мәсәлә, бәре әԝ зу һерс дькʹәт. Ле әԝ әʹщебмайи ма, кӧ чьԛас чәтьн ә һерса хԝә контрол бькә. Кевин гьли дькә: «Мьнрʹа һе зор бу һин бума һерса хԝә контрол кьра, нә кӧ кьред хԝәйә хьраб йе бәре бьһишта!» Кевин нав хԝәда гӧһастьн кьрьн, бь дӧа у леколинкьрьна Кʹьтеба Пироз.

 ³ Мина Кевин, мә гәләкарʹа лазьм бу пешийа ньхӧмандьне гӧһастьнед мәзьн бькьн, сәва кӧ бьжин ӧса, чаԝа Кʹьтеба Пироз мәрʹа дьбежә. Ле паши ньхӧмандьне, мә фәʹм кьр кӧ әм гәрәке диса нав хԝәда гӧһастьна бькьн, сәва кӧ һе зедә чʹәʹв бьдьнә Хԝәде у Иса Мәсиһ (Әфәс. 5:1, 2; 1 Пәт. 2:21). Мәсәлә, дьбәкә мә дит кӧ хәйсәтәки мәйи ӧса һәйә кӧ әм дькьнә кӧтә-кӧт, йан гәвәстийе дькьн. Йан жи дьбәкә жь мәрьва дьтьрсьн, у диса кемасийед дьн. Дьԛәԝьмә ԝә тʹәхмин кьр кӧ хәйсәт-һʹӧнӧред ӧса нав хԝәда дәрхьн һе чәтьн ә, нә кӧ ча һун дьфькьрин. У ләма дьбәкә пьрсед ӧса щәм ԝә пешда тен: «Чьрʹа мьнрʹа һе һеса бу гӧһастьнед мәзьн бькьн, ле тьштед бьчʹук гәләк чәтьн ә бьгӧһезьм? Әз чь дькарьм бькьм сәва кӧ Кʹьтеба Пироз бәрдәԝам кә мьн бьгӧһезә?»

4. Чьрʹа әм нькарьн пе һʹәму кьред хԝә дьле Йаһоԝа ша кьн?

⁴ Әм Йаһоԝа гәләк һʹьз дькьн у дьхԝазьн бь тʹәмамийа дьле хԝә ԝи ша кьн. Ле йазьх, чьԛас жи әм бьхԝазьн, әм нькарьн һʹәму тьштида дьле ԝи ша кьн, чьмки әм гӧнәкʹар ьн. Әм жи хԝә мина Паԝлосе шанди тʹәхмин дькьн, йе кӧ гот: «Дахԝаза мьн һәйә, ле әз нькарьм тьште ԛәнщ пек биньм» (Рʹом. 7:18, ИМ; Аԛуб 3:2).

5. Пешийа ньхӧмандьне, чь гӧһастьна мә кьр, ле кʹижан кемаси дькарьн диса нав мәда бьминьн?

⁵ Пешийа кӧ әм һатьнә ньхӧмандьне, мә кьред хьраб һишт, кʹижан кӧ Йаһоԝа нәфрʹәт дькә (1 Корн. 6:9, 10). Ле йәкә әм диса жи гӧнәкʹар ьн (Колс. 3:9, 10). Ләма жи, паши ньхӧмандьне у һәла һе паши гәләк сала жи, әм диса жи шашийа бәрдьдьн. Дьԛәԝьмә щара хԝәстьнед нәрʹаст щәм мә дькарьн пешда бен йан һәстед нәбаш, йан жи чәтьн бә сьстбунед хԝә контрол кьн. Дьбәкә жи мәрʹа лазьм бә гәләк сала бьхәбьтьн сәр хәйсәт-һʹӧнӧред хԝә.

6, 7. а) Рʹаст ә әм гӧнәкʹар ьн, ле бь сайа чь әм дькарьн бьбьнә достед Йаһоԝа? б) Чьрʹа әм гәрәке хԝә нәгьрьн кӧ жь Йаһоԝа бахшандьне бьхԝазьн?

⁶ Рʹаст ә әм гӧнәкʹар ьн, ле йәкә әм дькарьн бьбьнә достед Йаһоԝа у ԝирʹа хьзмәт кьн. Чьрʹа әм дькарьн ӧса бежьн? Ԝәрә бьфькьрьн: Чахе Йаһоԝа әм незики хԝә кьрьн, әԝи заньбу кӧ әме щара шашийа бькьн (Йуһʹн. 6:44). Йаһоԝа мә рʹьнд нас дькә у занә дьле мәда чь йә, демәк әԝи заньбу кӧ чь сьстбун у кемасийед мә һәнә. Ле йәкә, Йаһоԝа хԝаст кӧ әм бьбьнә достед ԝи.

⁷ Йаһоԝа мә гәләк һʹьз дькә, у ләма әԝи Кӧрʹе хԝәйи һʹьзкьри сәва мә кьрә ԛӧрбан (Йуһʹн. 3:16). Чахе әм шашийа дькьн, бь сайа ве ԛӧрбане әм дькарьн жь Йаһоԝа бахшандьне бьхԝазьн. У әм гәрәке дӧдьли нәбьн, кӧ Йаһоԝа ԝе мә бьбахшинә у диса мә һʹәсаб кә достед хԝә (Рʹом. 7:24, 25; 1 Йуһʹн. 2:1, 2). Гәло гәрәке әм хԝә бьгьрьн кӧ кʹара ԛӧрбане нәстиньн, чьмки әм гӧнәкʹар ьн у бь ԛьсур ьн? Һәрге әм хԝә дьгьрьн кӧ кʹара ԛӧрбане нәстиньн, әԝ мина ве йәке йә, кӧ мәсәлә чахе дәсте мә ԛьрʹеж ә, ле әм аве нахԝазьн сәва кӧ дәстед хԝә бьшон. Ԛӧрбана Иса һатә дайине бона мәрьвед гӧнәкʹар, йед кӧ гӧнед хԝә тиньн рʹуйе хԝә. Әм гәләк рʹази нә бона ве ԛӧрбане, чьмки рʹаст ә әм мәрьвнә гӧнәкʹар ьн, ле йәкә әм дькарьн бьбьнә достед Йаһоԝа! (Бьхунә 1 Тимотʹейо 1:15.)

8. Чьрʹа әм гәрәке кемасийед хԝә пьшт гӧһе хԝәва нәвежьн?

⁸ Бәле, әм кемасийед хԝә гәрәке пьшт гӧһе хԝәва нәвежьн. Һәрге әм дьхԝазьн досте Йаһоԝа бьн, әм гәрәке сәр хԝә бьхәбьтьн, кӧ һе рʹьнд чʹәʹв бьдьнә ԝи у  Кӧрʹе ԝи. Әм гәрәке мәрьве ԝи щурʹәйи бьн, чаԝа кӧ Йаһоԝа дьхԝазә (Зәб. 15:1-5). Әм гәрәке бьхәбьтьн кӧ сьстбунед хԝә контрол кьн, у чьԛас дькарьн ԝан кемасийа нав хԝәда дәрхьн. Фьрԛи тʹӧнә әм тʹәзә һатьнә ньхӧмандьне йан ида гәләк сала нава рʹастийеда ньн, әм гәрәке бәрдәԝам кьн тʹьме хԝә рʹаст кьн (2 Корн. 13:11).

9. Әм жь кʹӧ заньн кӧ әм дькарьн тʹьме мәрьве ну ль сәр хԝә ԝәргьрьн?

⁹ Әм гәрәке тʹьме сәр хԝә бьхәбьтьн, сәва кӧ тʹьме «мәрьве ну» бьн. Паԝлос готә Мәсиһийа: «Дә һун хәйсәте хԝәйи бәре жь хԝә дур хьн, ԝи мәрьве кәвьни кӧ бь һавьжийед һʹьләкʹарва дерьсбуйи йә у бь рʹӧһʹ у фькьред хԝәда нуйәжийин бьн, мәрьве ну ль сәр хԝә ԝәргьрьн, кӧ кьрасе Хԝәдеда бь рʹастийе у һʹәлалийе бе ԛәлпи хӧльԛи йә» (Әфәс. 4:22-24). Гьли «нуйәжийин бьн», дьдә кʹьфше кӧ әм гәрәке һәргав сәр хԝә бьхәбьтьн, сәва кӧ мәрьве ну бьн. Демәк, фьрԛи тʹӧнә әм чьԛас ԝәхт Йаһоԝарʹа хьзмәт дькьн, йәкә әм дькарьн тʹьме һин бьн чʹәʹв бьдьнә һʹӧнӧред Йаһоԝа. Бь рʹастийе жи, Кʹьтеба Пироз али мә дькә кӧ әм хәйсәт-һʹӧнӧред хԝә һе баш кьн, у нав хԝәда гӧһастьнед ӧса бькьн, кӧ һе рʹьнд чʹәʹв бьдьнә Хԝәде.

10. Әм чь гәрәке бькьн сәва кӧ бь сайа Кʹьтеба Пироз гӧһастьна бькьн, у кʹижан пьрс дьбәкә әм дьдьнә хԝә?

¹⁰ Һәрге әм дьхԝазьн кӧ Хәбәра Хԝәде бәрдәԝам кә мә бьгӧһезә, әм гәрәке гәләк сәр хԝә бьхәбьтьн. Ле гәло чьрʹа ӧса чәтьн ә әве йәке бькьн? Һәрге Йаһоԝа ԛәԝата мә кʹәрәм дькә, ԝәки ӧса нә, гәло мәрʹа гәрәке һеса нибә кӧ гӧһастьна бькьн? Гәло Йаһоԝа нькарә ӧса бькә, кӧ мәрʹа һеса бә һʹӧнӧред ԝи нав хԝәда пешда биньн?

¹¹ Чахе әм дьфькьрьн дәрһәԛа гәрдуне, әм әʹщебмайи дьминьн кӧ ԛәԝата Йаһоԝа чьԛас пʹьрʹ мәзьн ә. Мәсәлә, сәникида, тәʹв гәләк зәʹф рʹонайи у гәрмайе дьдә. Ле сәва кӧ мәрьв бьжин сәр әʹрде, лап һьндьк енергийа тәʹве лазьм ә (Зәб. 74:16; Иша. 40:26). Жь ве йәке те кʹьфше кӧ ԛәԝата Йаһоԝа гәләк ә, у әԝ дькарә ԛәԝате бьдә хьзмәткʹаред хԝә жи, чахе ԝанрʹа лазьм бә (Иша. 40:29). Демәк, Йаһоԝа дькарә ԛәԝате бьдә мә, сәва әм һәр кемаси йан сьстбунед хԝә алт кьн. Ле гәло чьрʹа әԝ әԝе йәке накә?

¹² Йаһоԝа азайа бьжартьне дайә мә. Ләма чахе әм гӧрʹа Хԝәде дькьн у ԛьрара ԝи тиньн сери, әм дьдьнә кʹьфше кӧ әм Йаһоԝа гәләк һʹьз дькьн у дьхԝазьн дьле ԝи ша кьн. Хенщи ве йәке, әм дьдьнә кʹьфше кӧ әм пьштгьрийа һʹӧкӧмәтийа ԝи дькьн, чьмки Шәйтʹан изьна һʹӧкӧмәтийа Йаһоԝа кьрә бьн шьке. У ләма чахе әм гәләк дьхәбьтьн сәва гӧрʹа Йаһоԝа бькьн, әм дьдьнә кʹьфше кӧ әм дьхԝазьн ԝәки әԝ Сәрԝере мә бә. Әм гәрәке дӧдьли нәбьн кӧ Йаһоԝа гәләк ԛимәт дькә, чахе әм бь дьл ԛәԝата хԝә дьдьнә хәбате, сәва гӧрʹа ԝи бькьн (Иб. 2:3-5; Мәтʹлк. 27:11). Ле һәгәр Йаһоԝа әм аза кьрана жь ве йәке кӧ әм шәрʹ кьн тʹәви кемаси у хәйсәтед хԝәйә нәбаш, сәва кӧ әм ԝи хԝәш бен, ԝи чахи амьнийа мә у пьштгьрийа мә һьндава сәрԝертийа Хԝәде, ԝе ԛәԝата хԝә ӧнда кьра.

¹³ Йаһоԝа дьбежә мә, кӧ әм «һәр алийава» ԛәԝата хԝә бьдьнә хәбате, сәва кӧ чʹәʹв бьдьнә һʹӧнӧред ԝи (Бьхунә 2 Пәтрус 1:5-7; Колс. 3:12). Әԝ дьхԝазә кӧ әм фькьр у һәстед хԝә  контрол кьн (Рʹом. 8:5; 12:9). Чахе әм гәләк дьхәбьтьн кӧ әве йәкеда гӧһастьна бькьн, әм бәхтәԝар дьбьн, чьмки дьвиньн кӧ Кʹьтеба Пироз мә дьгӧһезә.

14, 15. Әм чь дькарьн бькьн сәва чʹәʹв бьдьнә һʹӧнӧред Йаһоԝа? (Бьньһерʹә чаргошә «Кʹьтеба Пироз у Дӧа, Әʹмьре Ԝан Гӧһаст».)

¹⁴ Әм чь дькарьн бькьн сәва чʹәʹв бьдьнә һʹӧнӧред Йаһоԝа у дьле ԝи ша кьн? Бәс нинә хԝәрʹа сафи кьн, кӧ әм чьда гәрәке хԝә бьгӧһезьн. Сәва әм хԝә бьгӧһезьн, әм гәрәке ширәтед Хԝәде бьдьнә хәбате. Рʹомайи 12:2-да те готьне: «У нәкʹәвьнә кьрасе бәнде ве дьнйайе, ле сәр һʹьше хԝәда ԝәрьн, нет-фькьред ԝә бьра ну бьн, ԝәки бьзаньбьн чь йә ԛьрара Хԝәде, кӧ ԛәнщи, хԝәши у кʹамьли йә». Йаһоԝа бь сайа Хәбәра хԝә у рʹӧһʹе хԝәйи пироз, али мә дькә кӧ әм ԛьрара ԝи фәʹм бькьн, биньн сери у әʹмьре хԝә ӧса бьгӧһезьн, чаԝа Хԝәде хԝәш те. Әм гәрәке һәр рʹож Кʹьтеба Пироз бьхуньн у сәр бьфькьрьн. Хенщи ве йәке, әм гәрәке Хԝәдерʹа дӧа бькьн, кӧ рʹӧһʹе хԝәйи пироз бьдә мә (Луԛа 11:13; Галт. 5:22, 23). Чахе әм ԝан һʹәму тьшта бькьн, әме фькьр, хәбәрдан, у кьред хԝәда һе рʹьнд чʹәʹв бьдьнә Йаһоԝа. Ле йәкә, паши ве йәке жи әм гәрәке диса бәрдәԝам кьн сәр кемасийед хԝә бьхәбьтьн (Мәтʹлк. 4:23).

¹⁵ Хенщи хԝәндьна Кʹьтеба Пироз һәр рʹож, әм гәрәке пе әʹдәбйәтед мә Хәбәра Хԝәде леколин бькьн. Ӧса әме бькарьбьн чʹәʹв бьдьнә һʹӧнӧред Йаһоԝа. Мәсәлә, һьнәк хԝәрʹа дьжберьн у тʹоп дькьн тʹемед жь «Бьрща Ԛәрәԝьлийе» йан «Һʹьшйар Бьн!», йан щара башԛә хԝәрʹа рʹезед Кʹьтеба Пироз дьньвисьн, кʹижан кӧ али ԝан дькьн һʹӧнӧред Мәсиһити нав хԝәда пешда биньн. Мәрʹа жи ԝе гәләк керһати бә кӧ ӧса бькьн, у паше щар-щара хԝәрʹа бьхуньн. Әԝ йәк ԝе али мә бькә чʹәʹв бьдьнә һʹӧнӧред Йаһоԝа у сьстбунед хԝә алт кьн.

16. Чьрʹа әм гәрәке бәрхԝә нәкʹәвьн, һәрге әм зу гӧһастьна накьн?

¹⁶ Һәрге тӧ тʹәхмин дьки, кӧ тӧ рʹӧһʹанида һеди пешда дьчи, бира хԝәда хԝәй кә кӧ ԝәʹдә лазьм ә сәва ԝе йәке. Чьмки әм гәрәке тʹьме сәр хԝә бьхәбьтьн, ԝәки чʹәʹв бьдьнә һʹӧнӧред Хԝәде. У әм гәрәке сәбьр бьн, чахе дьхԝазьн кӧ Кʹьтеба Пироз нав мәда гӧһастьна бькә. Пешийе, әм гәрәке хԝә һин кьн кӧ ль гора һинкьрьнед Кʹьтеба Пироз бьжин. Паше, ԝе мәрʹа дьһа һеса бә кӧ мина Йаһоԝа бьфькьрьн, у кьред  ӧса бькьн, кʹижан ԝи хԝәш тен (Зәб. 37:31; Мәтʹлк. 23:12; Галт. 5:16, 17).

17. Чь ахьрийа баш әм дькарьн ԛазанщ кьн, һәрге әм Йаһоԝарʹа амьн ьн?

¹⁷ Әм һивийа ԝи ԝәʹдәйи нә, чахе әме беԛьсур бьн у һʹәта-һʹәтайе Йаһоԝарʹа хьзмәт бькьн. Ԝи чахи, мәрʹа ида ԝе нәлазьм бә, кӧ ԛәԝате хәрщ кьн сәва кемаси у сьстбунед хԝә алт кьн. Мәрʹа ԝе дьһа һеса бә, кӧ чʹәʹв бьдьнә Йаһоԝа. Ле бь сайа ԛӧрбана Иса әм ньһа жи дькарьн Йаһоԝарʹа хьзмәт кьн. Рʹаст ә әм гӧнәкʹар ьн, ле йәкә дькарьн дьле Хԝәде ша кьн, һәрге бәрдәԝам кьн бь сайа Хәбәра ԝи нав хԝәда гӧһастьна бькьн.

18, 19. Чьрʹа әм дькарьн баԝәр бьн, кӧ Кʹьтеба Пироз дькарә тʹьме мә бьгӧһезә?

¹⁸ Кевин, дәрһәԛа кʹижани жоре һатә готьне, һин бу һерса хԝә контрол бькә. Әԝ дьфькьри сәр Кʹьтеба Пироз у чь кӧ педьһʹәсийа дьда хәбате. Әԝи ӧса жи ширәт һьлдьда жь хушк-бьред щьватеда. У паши һьнә сала, Кевин хәйсәте хԝә алийе башда гӧһаст. Ахьрийе, әԝ һатә кʹьфшкьрьне ча бәрдәстийе щьвате, у ида 20 сал ә кӧ әԝ рʹуспи йә. Ле әԝ занә кӧ һʹәта ньһа жи ԝирʹа лазьм ә сәр хԝә бьхәбьтә, у сьстбунед хԝә алт кә.

¹⁹ Әм жи мина Кевин дькарьн нав хԝәда гӧһастьна бькьн. Ләма, ԝәрә тʹӧ щар нәсәкьньн у бь сайа Кʹьтеба Пироз бәрдәԝам кьн бьбьнә мәрьве ну. Ӧса әме һе незики Йаһоԝа бьн (Зәб. 25:14). У чахе әм дьвиньн кӧ Йаһоԝа ча мә кʹәрәм дькә, әме дьһа избат бьн, кӧ Кʹьтеба Пироз дькарә бәрдәԝам кә әʹмьре мә бьгӧһезә (Зәб. 34:8).