1. Гьли кьн һьнә ԛанунед Кʹьтеба Пироз, у әм чь кʹаре дьстиньн чахе ԝан ԛануна тиньн сери?

ЙАҺОԜА бь Кʹьтеба Пироз ԛанун у тʹәмийед зәлал дайә мә. Мәсәлә, Йаһоԝа ԛәдәхә дькә бенамусийе, пʹутпʹарьстийе, дьзийе, у сәрхԝәшийе (1 Корн. 6:9, 10). Хенщи ве йәке, Кӧрʹе Хԝәде, Иса Мәсиһ әв тʹәмийа конкрет да пәйчуйед хԝә: «Һәрʹьн һʹәму мьләта һин кьн у ԝана бь наве Бав, Кӧрʹ у Рʹӧһʹе Пироз бьньхӧминьн у ԝан һʹәму тʹәмийед кӧ мьн данә ԝә мьләта һин кьн, ԝәки әԝ хԝәй кьн. Әз ирода тʹьме һʹәта ахьрийа дьнйайе тʹәви ԝә мә!» (Мәт. 28:19, 20). Рʹасти жи, ԛанун у тʹәмийед Хԝәде чьԛас мә хԝәй дькьн у кʹаре мәрʹа тиньн! Әԝ тʹәмийед Хԝәде мә һин дькьн кӧ ԛәдьре хԝә бьзаньбьн, сьһʹәт-ԛәԝата хԝә хԝәй кьн, у ча малбәтеда бәхтәԝар бьн. У һе зедә, чахе әм тʹәмийед Йаһоԝа тиньн сери, у мьзгине бәла дькьн, әԝ мә ԛәбул дькә у мә кʹәрәм дькә.

2, 3. а) Чьрʹа Кʹьтеба Пирозда дәрһәԛа һʹәму щурʹә дәрәща тʹәми тʹӧнәнә? б) Ве тʹемайеда әме кʹижан пьрса шеԝьр кьн? (Бьньһерʹә шькьле әʹԝльн.)

² Кʹьтеба Пироз дәрһәԛа һʹәму дәрәща тʹәмийед конкрет надә. Мәсәлә, Кʹьтеба Пирозда найе готьне кӧ Мәсиһи чь кʹьнщ гәрәке хԝә кьн. Ве йәкеда рʹасти жи биланийа Йаһоԝа те кʹьфше. Һәр ԝәлатәкида стил у ԛәйде кʹьнщхԝәкьрьне щурʹә-щурʹә йә, у һьн жи чьԛас ԝәʹдә дәрбаз дьбә, һаԛас щурʹе кʹьнщхԝәкьрьне тенә гӧһастьне. Ләма жи, һәрге Кʹьтеба Пирозда бьһата рʹезкьрьне щурʹе кʹьнщхԝәкьрьне у  хәмьландьне, әԝ йәк ԝе лайиԛи кʹьнщхԝәкьрьна иро нибуйа. Ӧса жи Кʹьтеба Пироз надә тʹәмийа конкрет дәрһәԛа ве йәке кӧ Мәсиһи кʹижан хәбате гәрәке бьжберә, ча мьԛати сьһʹәт-ԛәԝата хԝә бә, у ча ԝәʹде хԝә дәрбаз кә. Ԝан пьрса Мәсиһи гәрәке хԝәха сафи кә. Ле малбәтеда гәрәке малхе мале сафи бькә.

³ Ле гәло әԝ те һʹәсабе кӧ Йаһоԝарʹа фьрԛи тʹӧнә, әм ча ԝан сафикьрьна дькьн? Гәло Йаһоԝа ԝе һʹәму сафикьрьнед мә ԛәбул кә, кʹижан кӧ мьԛабьли ԛанун у принсипед Кʹьтеба Пироз начьн? Әм ча гәрәке тедәрхьн, һәла ԝе Йаһоԝа хԝәш бе сафикьрьна мә, һәрге Кʹьтеба Пирозда тʹәмийа рʹастә-рʹаст тʹӧнә йә?

4, 5. Сафикьрьнед мә ча дькарьн сәр мә у сәр йед дьн һʹӧкӧм бьн?

⁴ Һьнәк мәрьв дьфькьрьн, ԝәки фьрԛи тʹӧнә әԝана сафикьрьна ча дькьн. Ле әм дьхԝазьн дьле Йаһоԝа ша кьн, у ләма чахе әм сафикьрьна дькьн, гәрәке ԛанун у принсипед Кʹьтеба Пироз һьлдьнә һʹәсаб. Мәсәлә, Кʹьтеба Пирозда те готьне дәрһәԛа ньһерʹандьна Хԝәде сәва хуне, ләма әм гәрәке ӧса бькьн ча Кʹьтеба Пироз дьбежә (Дәстп. 9:4; Кʹар. Шанд. 15:28, 29). Дӧа ԝе али мә бькә кӧ сафикьрьнед рʹаст бькьн, кʹижан ль гора ԛанун у принсипед Кʹьтеба Пироз ьн.

⁵ Сафикьрьнед мә дькарьн йан баш йан хьраб сәр мә һʹӧкӧм бьн. Чахе әм сафикьрьна баш дькьн, әԝ йәк һәләԛәтийа мә тʹәви Йаһоԝа ԛәԝи дькә. Ле чахе әм сафикьрьна нәбаш дькьн, әԝ йәк дькарә һәләԛәтийа мә тʹәви Йаһоԝа хьраб кә. Хенщи ԝе йәке сафикьрьнед мә сәр мәрьвед дьн жи һʹӧкӧм дьбьн. Сафикьрьнед мәйә нәрʹаст дькарьн рʹӧһʹанида зийане бьдьнә мәрьвед дьн, йан жи ԝан әʹщьз кьн. Ӧса жи әм нахԝазьн сәва ԝе йәке ԝанрʹа бьбьнә кәвьре лькʹӧмандьне, у ӧса йәктийа щьвате ӧнда бә. Бәле, гәләк фәрз ә кӧ әм чь сафикьрьна дькьн. (Бьхунә Рʹомайи 14:19; Галати 6:7.)

6. Әм ча гәрәке сафикьрьна бькьн?

⁶ Әм чь гәрәке бькьн, чахе тьштәки дьхԝазьн сафи кьн, ле дәрһәԛа ве йәке Кʹьтеба Пирозда рʹастә-рʹаст тʹәми тʹӧнә йә? Ԝан дәрәщада, әм гәрәке нә кӧ сафи кьн ӧса ча әм дьхԝазьн, ле гәрәке дәрһәԛа дәрәща хԝә леколин бькьн, у сафикьрьна ӧса бькьн, кʹижан ԝе Йаһоԝа ԛәбул кә у кʹәрәм кә. (Бьхунә Зәбур 37:5.)

7. Чахе Кʹьтеба Пирозда тʹәмийа конкрет тʹӧнә, әм ча дькарьн фәʹм бькьн кӧ Йаһоԝа ча дьхԝазә кӧ әм бькьн?

⁷ Ԝәʹде сафикьрьна дьбәкә әм дьфькьрьн: «Әз ча дькарьм тедәрхьм кӧ чь ԝе Йаһоԝа хԝәш бе, һәрге дәрһәԛа дәрәща мьн тʹәмийа конкрет Кʹьтеба Пирозда тʹӧнә йә?» Әфәси 5:17-да те готьне: «Бьзаньбьн чь йә ԛьрара Хӧдан». Чахе Кʹьтеба Пирозда дәрһәԛа дәрәща мә, ԛануна рʹастә-рʹаст тʹӧнә, әм ча дькарьн ԛьрара Хԝәде бьзаньбьн? Әм гәрәке ԝирʹа дӧа бькьн у бь сайа рʹӧһʹе пироз рʹебәрийа ԝи бьвиньн.

8. Иса ча тедәрдьхьст ԛьрара Йаһоԝа? Мәсәле биньн.

⁸ Шеԝьр кьн кӧ Иса ча тедәрдьхьст ԛьрара Баве хԝә. Мәсәлә, чахе дӧ дәрәщада Иса бь кʹәрәмәт әʹлаләта мәзьн тʹер кьр, пешийе әԝи Хԝәдерʹа дӧа кьр (Мәт. 14:17-20; 15:34-37). Ле чахе бәрʹийеда Иса бьрʹчи бу у Шәйтʹан ԝи дьщерʹьбанд, йәкә әԝи инкʹар кьр кӧ бь кʹәрәмәт кәвьр бькә нан. (Бьхунә Мәтта 4:2-4.) Гәло чьрʹа? Чьмки әԝи рʹьнд заньбу  ньһерʹандьна Баве хԝә, у ләма заньбу кӧ гәрәке ӧса нәкә. Иса фәʹм дькьр кӧ Йаһоԝа хԝәш найе, кӧ әԝ ԛәԝата ԝи бона кʹара хԝә бьдә хәбате. У чьмки Иса ӧса сафи кьр, бь ве йәке әԝи да кʹьфше кӧ итʹбарийа хԝә рʹебәрийа Йаһоԝа тинә, у баԝәр ә кӧ әԝе али ԝи бькә.

9, 10. Чь ԝе али мә бькә кӧ сафикьрьнед билан бькьн? Мәсәле биньн.

⁹ Һәрге әм дьхԝазьн сафикьрьнед билан бькьн, әм гәрәке мина Иса итʹбарийа хԝә рʹебәрийа Йаһоԝа биньн. Кʹьтеба Пироз дьбежә: «Бь һʹәмуйа дьле хԝә, бь Хӧданва әԝлә бьбә у пьшта хԝә нәсьперә аԛьле хԝә. Дь һәр кʹаре кӧ тӧ дьки, ԝи нас бькә у әԝ жи рʹийа тә дәрхә рʹастийе. Хԝә мина йәки занийар нәвинә, жь Хӧдан бьтьрсә у жь хьрабийе дур бьсәкьнә» (Мәтʹлк. 3:5-7). Чахе әм бь леколинкьрьна Кʹьтеба Пироз ԛьрара Йаһоԝа педьһʹәсьн, әме бькарьбьн тʹьме тедәрхьн, кӧ сафикьрьна мә ԝе ԝи хԝәш бе йан на. У әм чьԛас рʹьнд Йаһоԝа нас кьн, һаԛас зәʹф әме рʹебәрийа ԝи бьвиньн у пәй ԝи һәрʹьн (Зәб. 119:11, 12).

¹⁰ Шеԝьр кьн мәсәлә: Бьдьнә бәр чʹәʹве хԝә кӧ кʹӧлфәтәк дькʹанеда дьхԝазә тьшта бькʹьрʹә. Дькʹанеда соле рʹьнд ԝе хԝәш һатьн, кʹижан кӧ гәләк бьһа нә. Ньһа әԝ дьфькьрә кӧ малхе ԝе чь ԝе бежә чахе әԝ ԝан солед бьһа бькʹьрʹә. Рʹаст ә малхе ԝе тʹәви ԝе нинә, ле әԝ кʹӧлфәт рʹьнд занә ньһерʹандьна малхе хԝә, дәрһәԛа хәрщкьрьна пʹәра. Ле әԝ ча занә? Ида епʹещә ԝәхт ә кӧ әԝана зәԝьщинә, у ләма әԝ занә кӧ малхе ԝе ча дьньһерʹә сәр хәрщкьрьна пʹәра. Демәк, әԝ фәʹм дькә фькьред малхе хԝә дәрһәԛа кʹьрʹина тьштед бьһа. Һәма ԝи щурʹәйи, чахе әм ньһерʹандьна Йаһоԝа у рʹийед ԝи рʹьнд заньн, әме һе рʹьнд бькарьбьн тедәрхьн, кӧ әм ча гәрәке щурʹә-щурʹә дәрәща сафи кьн.

11. Әм кʹижан пьрса дькарьн бьдьнә хԝә, чахе Кʹьтеба Пироз дьхуньн йан һинбуна шәхси дәрбаз дькьн? (Бьньһерʹә чаргошә «Чахе Тӧ Хәбәра Хԝәде Дьхуни, Пьрсед Ӧса Бьдә Хԝә».)

¹¹ Ле әм ча дькарьн ньһерʹандьна Йаһоԝа бьзаньбьн? Гәләк фәрз ә кӧ Кʹьтеба Пироз бьхуньн у леколин бькьн. Чахе әм әве йәке дькьн, ԝе баш бә әм пьрсед ӧса бьдьнә хԝә: «Әԝ информасийа дәрһәԛа Йаһоԝа, рʹийед ԝи, у ньһерʹандьна ԝи мьн чь һин дькә?» Әм гәрәке чʹәʹв бьдьнә Даԝьде зәбурбеж, йе кӧ ньвиси: «Йа Хӧдан, тӧ һини мьн бькә рʹийед хԝә, нишани мьн бьдә алийед хԝә. Бь рʹастийа хԝәрʹа нишани мьн бьдә, жь бо мьн бьбә һиндар. Чьмки тӧ йи жь бо мьн Хԝәдайе рьзгаркʹар [хьлазкʹар]. Һевийа мьн һәргав тӧ йи» (Зәб. 25:4, 5, ИМ). Чахе әм Кʹьтеба Пироз дьхуньн, әм гәрәке бьфькьрьн кӧ әм кʹидәре дькарьн бьдьнә хәбате чь кӧ мә хԝәнд. Пьрсед ӧса бьдьнә хԝә: «Әз ча дькарьм әве информасйайе бьдьмә хәбате малбәтеда, мәкʹтәбеда, у хьзмәтийеда?» Чахе әме сафи кьн кӧ кʹидәре әм дькарьн әве информасйайе бьдьнә хәбате, һьнге мәрʹа ԝе дьһа һеса бә фәʹм бькьн кӧ чаԝа бьдьнә хәбате.

12. Ча әʹдәбйәт у щьвинед мә али мә дькьн, кӧ әм бьзаньбьн Йаһоԝа чь дьфькьрә дәрһәԛа щурʹә-щурʹә дәрәща?

¹² Әм дькарьн һе зедә ньһерʹандьна Йаһоԝа бьзаньбьн, чахе гӧһ дьдьнә рʹебәрийа тʹәшкиләта ԝи. Мәсәлә, «Индекса Әʹдәбйәтед Бьрща Ԛәрәԝьлийе» у «Рʹебәрийа Леколинкьрьне бона Шәʹдед Йаһоԝа», дькарьн али мә бькьн кӧ бьзаньбьн фькьред Йаһоԝа дәрһәԛа щурʹә-щурʹә дәрәща. Ӧса жи чахе әм  рʹьнд гӧһе хԝә дьдьнә сәр щьвата у щаба хԝә дьдьн, у дьфькьрьн сәр ве чь кӧ әм пеһʹәсийан, ӧса әм гәләк кʹаре дьстиньн. Әԝ йәк али мә дькә кӧ һе рʹьнд фәʹм кьн ньһерʹандьна Йаһоԝа у чʹәʹв бьдьнә ньһерʹандьна ԝи. У ахьрийеда, әме сафикьрьна ӧса бькьн кʹижан кӧ ԝи хԝәш те у әԝ ԝе мә кʹәрәм кә.

13. Мәсәле биньн, кӧ чаԝа занәбуна ньһерʹандьна Йаһоԝа, али мә дькә сафикьрьнед билан бькьн.

¹³ Шеԝьр кьн мәсәле, кʹижан кӧ әʹйан дькә, кӧ чаԝа занәбуна ньһерʹандьна Йаһоԝа, али мә дькә кӧ сафикьрьнед рʹаст бькьн. Чаԝа хьзмәткʹаред Хԝәде, дьбәкә әм дьхԝазьн пешәнгед һәртʹьм бьн. Сәва кӧ әве нете биньн сери, әм дәстпедькьн әʹмьре хԝә һеса кьн, сәва һе зедә хьзмәт кьн. Һьнге дьбәкә әм хәмгин дьбьн, кӧ дьбәкә әм бәхтәԝар нибьн, чьмки алийе материалида әме дәԝләти нибьн. Бәле, Кʹьтеба Пирозда найе готьне кӧ әм әʹсә гәрәке пешәнг бьн. Әм дькарьн пешәнг нибьн, ле бәрдәԝам кьн Йаһоԝарʹа бь амьни хьзмәт кьн. Ле Иса гот кӧ һәрге әм бона Пʹадшатийе ԛӧрбана дькьн, әме гәләк кʹәрәма бьстиньн. (Бьхунә Луԛа 18:29, 30.) Хенщи ве йәке, Кʹьтеба Пирозда те готьне, кӧ чахе әм «пәсне жь дьл» дьдьнә Йаһоԝа, у бь дьл у щан ԝирʹа хьзмәт дькьн, дьле ԝи гәләк ша дьбә (Зәб. 119:108, ИМ; 2 Корн. 9:7). Бәле, һәрге әм бьфькьрьн сәр ԝан рʹеза, у Йаһоԝарʹа дӧа бькьн кӧ рʹебәрийа мә бькә, әме фәʹм бькьн ԛьрара ԝи. Бь сайа ве йәке, әме бькарьбьн сафикьрьна баш бькьн, кʹижан кӧ бона мә керһати бә у Йаһоԝа ԝе мә кʹәрәм кә.

14. Тӧ ча дькари тедәрхи, һәла стила кʹьнщхԝәкьрьна тә, Йаһоԝа хԝәш те йан на?

¹⁴ Ԝәрә мәсәле дьн шеԝьр кьн: Бьдә бәр чʹәʹве хԝә кӧ стиләкә кʹьнщхԝәкьрьне тә хԝәш те, кʹижан кӧ дьбәкә һьнә хушк-бьред щьватеда дькарә әʹщьз кә. Ле тӧ зани ԝәки Кʹьтеба Пирозда тʹәмийа конкрет тʹӧнә, кʹижан кӧ ԛәдәхә дькә әԝе стила кʹьнщхԝәкьрьне. Ле ча тӧ дькари тедәрхи ньһерʹандьна Йаһоԝа дәрһәԛа ве йәке? Кʹьтеба Пироз мәрʹа дьбежә: «Бьра кʹӧлфәт бь кʹьнщед лайиԛ, шәрме у бәрбьһерийе хԝә бьхәмьлиньн, нә кӧ бь гӧли-гӧжанга, йан зерʹ, йан бь дӧрʹа, йан жи бь кʹьнщед бьһа, ле бь кьред ԛәнщ, чаԝа ль ԝан кʹӧлфәта дькʹәвә, йед кӧ наве хԝәденасийе һьлданә сәр хԝә» (1 Тимтʹ. 2:9, 10). Бәле, әԝ ширәт бона һʹәму  хьзмәткʹаред Йаһоԝа йә, демәк бона кʹӧлфәта, у ӧса жи бона мера. Чахе әм сафи дькьн кʹижан кʹьнща хԝә кьн у ча хԝә бьхәмьлиньн, әм гәрәке нә кӧ тʹәне бона хԝә дьшьрмиш бьн, ле ӧса жи бьфькьрьн кӧ чаԝа кʹьнщхԝәкьрьн у хәмьландьна мә ԝе сәр йед дьн һʹӧкӧм бә. Мьлукти у һʹьзкьрьн мә һелан дькьн кӧ ньһерʹандьна хушк-бьред хԝә һьлдьнә һʹәсаб, сәва ԝана әʹщьз нәкьн йан ԝана нәхәйидиньн (1 Корн. 10:23, 24; Фили. 3:17). Әм дькарьн дәрһәԛа ве йәке ньһерʹандьна Йаһоԝа фәʹм бькьн, һәгәр әм бьфькьрьн сәр рʹезед жь Кʹьтеба Пироз. Ӧса әме бькарьбьн сафикьрьнед рʹаст бькьн, кʹижан кӧ ԝе Хԝәде хԝәш бен.

15, 16. а) Йаһоԝа ча дьньһерʹә сәр ве йәке, һәрге әм дәрһәԛа тьштед бенамуси дьфькьрьн? б) Чахе әм сафи дькьн кӧ ча ԝәʹде хԝә дәрбаз кьн, әм ча дькарьн бьзаньбьн кӧ ԝе Йаһоԝа чь хԝәш бе? в) Сафикьрьнед фәрз әм ча гәрәке бькьн?

¹⁵ Жь Кʹьтеба Пироз әм педьһʹәсьн кӧ дьле Йаһоԝа дешә чахе мәрьв кьред хьраб дькьн у фькьред дьле ԝан жи хьраб ьн. (Бьхунә Дәстпебун 6:5, 6.) Жь ве йәке әм фәʹм дькьн, һәрге әм дәрһәԛа тьштед бенамуси бьфькьрьн, әԝ йәк ԝе Йаһоԝа хԝәш нәйе. Чьмки әԝ йәк дькарә мә бәрбь гӧне мәзьн бьвә. Йаһоԝа дьхԝазә ԝәки фькьред мә тʹәмьз бьн. Аԛуб ньвиси: «Сәрԝахтийа жорьн, бәре пешьн паԛьж ә, паше әʹдьл ә, мьлук у бәрбьһер ә, бь рʹәʹме у бәред ԛәнщийева тʹьжи йә, бе тʹагер у бе һʹьләкʹари йә» (Аԛуб 3:17). Демәк, әм гәрәке ԝәʹдәрбазкьрьна ӧса нәжберьн, кʹижан кӧ фькьред нәтʹәмьз пешда тиньн. У һәрге әм рʹьнд заньн кӧ Йаһоԝа чь һʹьз дькә у чь нәфрʹәт дькә, әме һеса тедәрхьн кӧ ԝәʹдәдәрбазкьрьна чь щурʹәйи бьжберьн, мәсәлә кʹижан кʹьтеб бьхуньн, филм бьньһерʹьн, йан кʹижан листьк бьлизьн. Мәсиһийе сәрԝахтрʹа, нәлазьм ә жь кәсәки бьпьрсә кӧ чь бьжберә, чьмки дәрһәԛа ԝан тьшта, фькьред Йаһоԝа Хәбәра ԝида зәлал ьн.

¹⁶ Әм дькарьн сафикьрьна бь щурʹә-щурʹә бькьн, у һәр щурʹе сафикьрьне Йаһоԝа дькарә ԛәбул кә. Ле чахе мәрʹа лазьм ә сафикьрьнәкә фәрз бькьн, ԝе керһати бә һәрге әм жь рʹуспийа йан жь хушк-бьред щерʹьбанди ширәта һьлдьн (Тито 2:3-5; Аԛуб 5:13-15). Ле бәле, әԝ найе һʹәсабе кӧ әм жь ԝана бьхԝазьн, ԝәки дәԝса мә сафи кьн. Чьмки әм гәрәке һин бьн хԝәха тедәрхьн, кʹижан сафикьрьн ԝе рʹаст бьн у кʹижан на (Ибрн. 5:14). Паԝлосе шанди гот: «Чьмки һәр кәсе хӧрща хԝә һьлгьрә» (Галт. 6:5).

17. Әме чь кʹаре бьстиньн, һәрге сафикьрьнед ӧса дькьн, кʹижан кӧ Йаһоԝа хԝәш тен?

¹⁷ Чахе әм ԝәʹде сафикьрьна, ньһерʹандьна Йаһоԝа һьлдьдьнә һʹәсаб, әм һе незики ԝи дьбьн (Аԛуб 4:8). Ӧса әм дьле ԝи ша дькьн у кʹәрәмед ԝи дьстиньн. Әԝ йәк баԝәрийа мә һе ԛәԝи дькә һьндава Баве мәйи әʹзмана. Ләма, ԝәрә әм тʹьме ӧса бькьн кӧ ԛанун у принсипед Кʹьтеба Пироз рʹебәрийа мә бькьн, чьмки ӧса әме һе рʹьнд ньһерʹандьна Йаһоԝа бьзаньбьн. Бәле, әме тʹьме һе зедә дәрһәԛа Йаһоԝа пебьһʹәсьн (Иб. 26:14). Әм һәла һе ньһа жи дькарьн билани, занәбун, у сәрԝахтийе ԛазанщ кьн, чьмки әԝ мәрʹа лазьм ьн сәва сафикьрьнед рʹаст бькьн (Мәтʹлк. 2:1- 5). Фькьред у нетед мәрьвед гӧнәкʹар тʹьме тенә гӧһастьне. Ле зәбурбеж гот: «Шеԝра Хӧдан һәр у һәр ә, фькьра дьле ԝи, дь дәма тʹӧ ньфшида [ньслида] нагӧһәрә» (Зәб. 33:11, ИМ). Әʹйан ә, кӧ әм дькарьн сафикьрьнед лапи баш бькьн, чахе әм рʹьнд ньһерʹандьна Йаһоԝа бьзаньбьн у кьред ӧса бькьн кӧ ԝи хԝәш тен.