«Һун пе наве мьн чь жь Баве бьхԝазьн, әԝе бьдә ԝә» (Йуһʹәнна 16:23).

Гьлийе Иса рʹьнд дьдьнә кʹьфше, ԝәки Йаһоԝа нахԝазә кӧ әм ԝирʹа, бь сайа шькла, пʹута, мәләка йан рʹӧһʹе кал-бава, дӧа бькьн. Әԝ дьхԝазә кӧ әм бь наве Иса Мәсиһ дӧа бькьн. Чахе әм бь наве Иса Хԝәдерʹа дӧа дькьн, әм дьдьнә кʹьфше, кӧ рола Исайә фәрз фәʹм дькьн. Иса гот: «Тʹәне пе мьн йәк дькарә бе щәм Баве» (Йуһʹәнна 14:6).

«Дьле хԝә бьрʹежә бәр ԝи» (Зәбур 62:8).

Чахе әм Йаһоԝарʹа дӧа дькьн, әм гәрәке ӧса хәбәр дьн, ча тʹәви баве хԝәйи һʹьзкьри. Дәԝса кӧ жь кʹьтебе дӧа бьхуньн йан жи тьштәки бь әзбәри бежьн, ԝе баш бә жь дьл у бь ԛәдьр ԝирʹа хәбәр дьн.

«Һәгәр әм тьштәки ль гора хԝәстьна ԝи же бьхԝазьн, әԝ дәнге мә дьбьһе» (1 Йуһʹәнна 5:14).

Йаһоԝа Хԝәде бь Кʹьтеба Пироз мәрʹа дьбежә, кӧ әԝе бона мә чь бькә у дьхԝазә әм бона ԝи чь бькьн. Сәва кӧ дӧайед мә ль Хԝәде ԛәбул бьн, әм гәрәке «ль гора хԝәстьна ԝи» дӧа бькьн. Ве йәкеда леколина Кʹьтеба Пироз ԝе али мә бькә, ԝәки һе рʹьнд ԝи нас бькьн. Һәрге әм ӧса бькьн, дӧайед мә ԝе ԝи хԝәш бен.

Бона Һʹәԝщед Хԝә Дӧа Бькә. Әм дькарьн бона һʹәԝщед хԝәйә һәррʹожи дӧа бькьн, мәсәлә бона хԝарьне, кʹьнща у щи-сьтʹаре. Әм ӧса жи дькарьн биланийе жь Хԝәде бьхԝазьн, кӧ бькарьбьн сафикьрьнед рʹаст бькьн. Ԝе баш бә ӧса жи ԛәԝате жь ԝи бьхԝазьн кӧ нава чәтьнайада тәйах кьн. Хенщи ве йәке әм дькарьн бона баԝәрийе у бахшандьне дӧа бькьн у аликʹарийе жь Хԝәде бьхԝазьн (Луԛа 11:3, 4, 13; Аԛуб 1:5, 17).

Бона Мәрьвед Дьн Дӧа Бькә. Де-бавед кӧ зарʹед хԝә һʹьз дькьн, ша дьбьн гава зарʹед ԝан һәвдӧ һʹьз дькьн. Йаһоԝа жи дьхԝазә, ԝәки зарʹед ԝийи сәр әʹрде, бона һәв хәм бькьн. Әм дькарьн бона жьн йан мере хԝә, малбәта хԝә, зарʹ у һәвалед хԝә жи дӧа бькьн. Аԛубе шанди ӧса ньвиси: «Бона һәв дӧа бькьн» (Аԛуб 5:16).

Рʹазибуна Хԝә Бьдә Кʹьфше. Кʹьтеба Пироз дәрһәԛа Әʹфьрандаре мә дьбежә: «Ԛәнщи ԝәрʹа кьр, жь әʹзмен баран баранд, рʹәз жи дәмсалада данә ԝә, бь хӧрәква һун тʹер кьрьн у шабун жи кьрә дьле ԝә» (Кʹаред Шандийа 14:17). Гава әм дьфькьрьн дәрһәԛа һәр тьштед кӧ Хԝәде сәва мә кьрийә, әм һелан дьбьн дӧайед хԝәда рʹазибуна хԝә ԝирʹа бьдьнә кʹьфше. Һәмьки рʹазибуна мә Хԝәдерʹа жь ԝе йәке жи те кʹьфше, чахе әм гӧрʹа ԝи дькьн (Колоси 3:15).

Щарна әм дьлтәнг дьбьн, гава дәрберʹа щаба дӧайед хԝәйи жь дьл настиньн. Ле әв те һʹәсабе, ԝәки Хԝәде бона мә хәм накә? На! Ԝәрен әм чәнд мәсәла шеԝьр кьн, йед кӧ дьдьнә кʹьфше, ԝәки чьԛас фәрз ә бәрдәԝам кьн дӧа бькьн.

Стив, дәрһәԛа кʹижани кӧ готара пешьнда һатьбу готьне, дьбежә: «Һәрге мьн дӧа нәкьра, мьне нета жийина хԝә ӧнда кьра». Ле чь һатә гӧһастьне? Әԝи дәстпекьр Кʹьтеба Пироз һин бә у пеһʹәсийа, ԝәки чьԛас фәрз ә дӧа бькьн, ләма жи тʹьме дӧа дькьр. Стив зедә дькә: «Әз Хԝәдерʹа дӧа дькьм, кӧ рʹазибуна хԝә сәва пьштгьрийа ԝи бьдьмә кʹьфше. Әԝ ве йәке жь һʹьзкьрьне бь сайа һәвалед мьнә дәлал дькә. Ньһа әз дьһа бәхтәԝар ьм».

Ле әм чь дькарьн бежьн дәрһәԛа Щени, йа кӧ дьфькьри ԝәки әԝ нәһежа йә кӧ Хԝәде дӧайе ԝе бьбьһе? Әԝ дьбежә: «Гава мьн хԝә бекер тʹәхмин дькьр, мьн лавайа Хԝәде дькьр ԝәки али мьн бькә, кӧ фәʹм бькьм чьма әз хԝә ӧса тʹәхмин дькьм». Әве йәке чаԝа али ԝе кьр? Әԝ бәрдәԝам дькә: «Чахе мьн дьле хԝә Хԝәдерʹа вәдькьр, әве йәке али мьн дькьр кӧ бь ньһерʹандьна Хԝәде сәр хԝә бьньһерʹьм. Демәк һәрге дьле мьн жи мьн сущдар дькә, Йаһоԝа мьн сущдар накә. Әве фькьре али мьн кьр, кӧ сьст нәбьм у бәрдәԝам кьм ԛәԝате бьдьмә хәбате». Гәло кʹара ве йәке һәбу? «Дӧа али мьн кьр бьвиньм, ԝәки Йаһоԝа кәсе зенди йә, әԝ мә һʹьз дькә, у мина Бав у Достәки әʹзиз, бона мә хәм дькә. Йаһоԝа тʹьме тʹәви мьн ә у һʹәта кӧ әз ве йәке дькьм, чь кӧ әԝ дьхԝазә, әԝе һәртʹьм али мьн бькә».

Ԝәрен әм сәрһатийа хушкәкә мә Изабеле шеԝьр кьн. Чахе әԝ һʹәмлә бу, дохдьра жерʹа готьбун, ԝәки зарʹ ԝе ньвишкан бе буйине. Изабел гәләк дьлтәнг бьбу. Һьнәка һәла һе жи ширәт дьдане, ԝәки зарʹе бәрхԝә бькә. Әԝ дьбежә: «Мьн хԝә ӧса тʹәхмин дькьр, те бежи жь бо еша дәрде дьле хԝә дьмьрьм». Ле гәло әԝе чь кьр? Изабел дьбежә: «Мьн бесәкьнандьн Хԝәдерʹа дӧа дькьр, ԝәки пьштгьрийа мьн бькә». Ԝәʹдә шунда жерʹа кӧрʹ һатә буйине, наве кʹижани данин Герард. Һәмьки зарʹ ньвишкан һатә буйине. Ле Изабел дьфькьрә кӧ Хԝәде щаба дӧайе ԝе да? Бәле! Чь щурʹәйи? Әԝ дьбежә: «Гава әз кӧрʹе хԝәйи 14 сали дьньһерʹьм у дьвиньм кӧ ве нәхԝәшийа хԝәда әԝ жь жийине ләзәте дьвинә, әз фәʹм дькьм, ԝәки әв щабәкә пʹьрʹ баш ә сәр дӧайед мьн. У һьм жи әԝ кʹәрәмәкә мәзьн ә жь Йаһоԝа Хԝәде».

Сәрһатийед ви щурʹәйи гьлийе зәбурбеж дькьнә бира мә, йе кӧ гот: «Тӧ хԝәстьна бәләнгаза дьбьһейи, йа Хӧдан! Дьле ԝан бьшьдин у гӧһ бьдә сәр ԝан» (Зәбур 10:17). Бь рʹасти жи мәʹнийед чьԛас баш ьн, кӧ бәрдәԝам кьн дӧа бькьн!

Кʹьтеба Пирозда әм гәләк дӧайед Иса дьвиньн. Йәк жь ԝана, кʹижан кӧ рʹьнд нас ә әԝ ә, гава әԝи шагьртед хԝә һин дькьр дӧа бькьн. Ле әм жь ве йәке чь дькарьн һин бьн?