Диса жи, Йаһоԝа дьхԝазә кӧ әм бь сәбьр һивийе бьн, һʹәта кӧ Әԝ ԝәʹде кʹьфшкьрида һәр тьшти рʹаст кә. Гәло Йаһоԝа чьрʹа дьхԝазә әм бь сәбьр һивийа ԝи бьн? Чь дькарә али мә бькә, кӧ әм бь шабун һивийа Йаһоԝа бьн?

ЙАҺОԜА ЧЬРʹА ДЬХԜАЗӘ, ԜӘКИ ӘМ ҺИВИЙЕ БЬН?

Кʹьтеба Пироз дьбежә: «Хӧдан дьсәкьнә кӧ кʹәрәма хԝә нишани ԝә бьдә. Диса жи рʹадьбә кӧ рʹәʹма хԝә нишани ԝә бьдә. Чьмки Хӧдан, Хԝәдайе әдаләте [һәԛийе] йә. Хԝәзи бь һәр кәсе кӧ ль бәнда [һивийа] ԝи йә» (Ишайа 30:18, ИМ). Әв готьнед Ишайа пешийе бона Щьһуйед сәрһʹьшк бун (Ишайа 30:1). Ле нав ԝан Щьһуйада, йед амьн жи һәбун, у ван готьна гӧман дьда ԝан. Әв готьн иро жи гӧмане дьдьнә хьзмәткʹаред Йаһоԝайә амьн.

Бәле, әм гәрәке бь сәбьр һивийе бьн, чьмки Йаһоԝа хԝәха жи бь сәбьр һивийе йә. Әԝи бона ԛьрʹкьрьна ве дьнйа хьраб рʹож кʹьфш кьрийә, у әԝ һивийа ве рʹож у сьһʹәте йә (Мәтта 24:36). Ԝи чахи, ԝе бь тʹәмами әшкәрә бә, ԝәки бӧхданед Мире-щьна, кӧ әԝи авитә Йаһоԝа у хьзмәткʹаред ԝи, дәрәԝ бун. Йаһоԝа ԝе Мире-щьна у пьштгьред ԝи ԛьрʹ кә у «рʹәʹма хԝә нишани [мә] бьдә».

Һʹәта ԝе дәме, Йаһоԝа һʹәму тәнгасийа жь мә дур нахә, ле әԝ дьбежә кӧ әм дькарьн бь шабун һивийа ԝи бьн. Чаԝа Ишайа пʹехәмбәр готьбу, гава әм бь һʹьзрәт һивийа тьштәки баш ьн, әм дькарьн бәхтәԝар бьн (Ишайа 30:18, ИМ) a. Гәло әм чаԝа дькарьн ве шабуне бьстиньн? Ве йәкеда чар гав дькарьн али мә бькьн.

ӘМ ЧАԜА ДЬКАРЬН БӘХТӘԜАР БЬМИНЬН?

Дина хԝә бьдә тьштед баш. Даԝьд Пʹадша жийина хԝәда гәләк тьштед хьраб дитьбун (Зәбур 37:35). Диса жи, әԝи гот: «Ль бәр Хӧдан бәрбьһер бә у һивийа Ԝи бә, бина хԝә ԝи мәрьви тәнг нәкә кӧ жерʹа ль һәв те у ԝи  мәрьве кӧ дьгьһижә мәрәме хьраб» (Зәбур 37:7). Даԝьд хԝәха ль гора ве ширәте дьжит у гӧмана хԝә ӧнда нәдькьр кӧ Хԝәде ԝе ԝи хьлаз кә. Ӧса жи, әԝ бона һәр ԛәнщийа кӧ әԝи жь Йаһоԝа стандьбу, рʹази бу (Зәбур 40:5). Һәрге әм жи мина ԝи зәʹф дина хԝә нәдьн проблемед хԝә, ле дина хԝә бьдьн тьштед баш, ԝе мәрʹа дьһа һеса бә һивийа Йаһоԝа бьн.

Һәр тʹьм пәсьне Йаһоԝа бьдә. Ньвискʹаре Зәбура 71, йе кӧ дьԛәԝьмә Даԝьд бу, Йаһоԝарʹа ӧса готьбу: «Гӧмана мьне тʹьме Тӧ би, әзе пәсьндари у шькьрдарийе Тә зедә кьм» (Зәбур 71:14). Бәле, Даԝьд дьхԝәст мәрьварʹа дәрһәԛа Йаһоԝа гьли кә у бь кʹьлама пәсьне Йаһоԝа бьдә (Зәбур 71:16, 23). Әм жи мина Даԝьд, дькарьн бь шабун һивийа Йаһоԝа бьн. Гава әм хьзмәт дькьн, һәвал у нәфәред хԝәрʹа дәрһәԛа ԝи гьли дькьн у щьватеда кʹьлама дьстьрен, әм пәсьне ԝи дьдьн. Чахе тӧ щарәкә дьн кʹьламәкә мә бьстьрейи, дина хԝә бьдә хәбәред кʹьламе у бьфькьрә һәла әԝ ча һелане дьдьнә тә.

Жь хушк-бьра һелане бьстинә. Гава Даԝьд тәнгасийада бу, әԝи Йаһоԝарʹа гот: «Бәр амьнед Тә бькьм дәнги наве Тә» (Зәбур 52:9). Әм нә тʹәне ԝәʹде хьзмәтийе йан щьвата, ле гава әм тʹәвайи ԝәʹдә дәрбаз дькьн жи жь һәвдӧ һелане дьстиньн (Рʹомайи 1:11, 12).

Гӧмана хԝә ԛәԝи кә. Зәбур 62:5 дьбежә: «Әз тʹәне кәрʹ у лал һивийа Хԝәде мә, чьмки гӧмана мьн жь Ԝи йә». Гәрәке әм баԝәри у һевийа хԝә һе дьһа ԛәԝи кьн, илаһи һәрге хьлазийа ве дьнйа хьраб ӧса зу найе ча әм дьхԝазьн. Әм чьԛас һивийе бьн жи, гәрәке әм дӧдьли нәбьн, кӧ созед Йаһоԝа ԝе бенә сери. Әм дькарьн гӧмана хԝә бь сайа лекʹолина Кʹьтеба Пироз дьһа ԛәԝи кьн. Мәсәлә, әм дькарьн сәр ве йәке бьфькьрьн, кӧ Йаһоԝа бәреда чь готьбу у готьнед ԝи чаԝа һатьнә сери. Йан жи, әм дькарьн дина хԝә бьдьне кӧ готьнед ньвискʹаред Кʹьтеба Пироз чаԝа һәв дьгьрьн у Йаһоԝа дәрһәԛа хԝә чь әшкәрә кьрийә (Зәбур 1:2, 3). Ӧса жи, гәрәке әм бәрдәԝам кьн «бь рʹӧһʹе пироз дӧа бькьн», ԝәки әм достийа хԝә тʹәви Йаһоԝа ԛәԝи кьн, һʹәта кӧ созе ԝи дәрһәԛа жийина һʹәта-һʹәтайе бе сери (Щьһуда 20, 21).

Мина Даԝьд Пʹадша, дӧдьли нәбә кӧ Йаһоԝа ԝан мәрьва дьвинә у һʹәз дькә, йед кӧ һивийа ԝи нә (Зәбур 33:18, 22). Ләма жи һәр гав дина хԝә бьдә тьштед баш, пәсьне Йаһоԝа бьдә, жь хушк у бьра һелане бьстинә у һевийа хԝәйә ԛимәт ԛәԝи кә. Бь ви аԝайи, тӧ дькари бь сәбьр һивийа Йаһоԝа би.