РʹОЖА Чаршәме, 18 Чьләйе, сала 2023, сәр jw.org әʹламәтийа мәхсус һатә дәрхьстьне. Әʹламәти әв бу, кӧ бьред мә Гейщ Флигьл у Щефри Ԝиндер ча әндәмед Кʹома Рʹебәрийейә Шәʹдед Йаһоԝа һатьнә кʹьфшкьрьне. Һәр дӧ бьра жи гәләк сала бь амьни Йаһоԝарʹа хьзмәт дькьн.

Бьре Гейщ Пәнсилванйайеда (Дәԝләтед Йәкбуйи), малбәтәкә Шәʹдед Йаһоԝада мәзьн буйә. Гава әԝ щаһьл бу, малбәта ԝи дәрбази бажарәки бьчʹук бу, кʹидәре һʹәԝщәтийа мьзгинвана һәбу. Дәмәкә кьн паши ве йәке, 20 Мьждаре, сала 1988, әԝ һатә ньхӧмандьне.

Де-баве ԝи тʹьме бона хьзмәтийа һәртʹьм ԝи һелан дькьрьн. Ԝана гәләк щар бәрпьрсийаред мьһале у Бәйтʹәлван тʹәглифи мала хԝә дькьрьн, у бьре Гейщ дьдит кӧ әԝана чьԛас бәхтәԝар ьн. Бьре Гейщ ԝәхтәкә кьн паши ньхӧмандьна хԝә, 1 Илоне, сала 1989 бу пешәнге һәртʹьм. Дӧ сал шунда, мәһа Щотмәһе, сала 1991, әԝи дәстпекьр Бәйтʹәледа хьзмәт кә у бь ви аԝайи гьһиштә нетәкә хԝә, кʹижан кӧ 12 салийа хԝәда дабу пешийа хԝә.

Бәйтʹәледа, бьре мә 8 сала идара пʹечʹандьна кʹьтебада хәбьти. Паше, әԝ дәрбази Идара Хьзмәтийе бу. Ԝе дәме, әԝи чәнд сала щьватәкә бь зьмане Урьсида хьзмәт кьр. Сала 2006-да, әԝи хушкәкә бь наве Надиа станд, у һәр дӧ жи Бәйтʹәледа хьзмәт дькьрьн. Ԝана тʹәвайи һьм ль дәшта Португали һьм жи 10 сала зедәтьр ль дәшта Испанида хьзмәт кьрьнә. Паши кӧ бьре Гейщ гәләк сал Идара Хьзмәтийеда бу, әԝ һатә кʹьфшкьрьне Офиса Комитейа Һинкьрьнеда у паше жи Офиса Комитейа Хьзмәтийеда. Сала 2022, мәһа Адаре, әԝ ча аликʹарчийе Комитейа Хьзмәтийе йа Кʹома Рʹебәрийе һатә кʹьфшкьрьне.

Бьре мә Щефри Ԝиндер бажаре Муррйетайеда (Калифорнйа, Дәԝләтед  Йәкбуйи) мәзьн буйә. Де-баве ԝи Шәʹдед Йаһоԝа бун, у 29 Адаре, сала 1986 әԝ һатә ньхӧмандьне. Мәһәк шунда, әԝ бу пешәнге кʹомәкдар. Әԝи жь ве хьзмәтийе һаԛас шабун дьстанд кӧ дьхԝәст бәрдәԝам кә. Әԝи чәнд мәһа ча пешәнге кʹомәкдар хьзмәт кьр, у паше 1 Щотмәһе, сала 1986 бу пешәнге һәртʹьм.

Рʹожәке, гава бьре Щефри һе щаһьл бу, әԝ чу тʹәсәлийа дӧ бьред хԝәйи мәзьн бькә, йед кӧ һьнге Бәйтʹәледа хьзмәт дькьрьн. Бь сайа ве тʹәсәлийе, әԝи ида хԝәрʹа кьрә нет, ԝәки Бәйтʹәледа хьзмәт кә. Сала 1990, мәһа Гӧлане, бона хьзмәтийа ль Бәйтʹәла Ԝолкиле һатә тʹәглифкьрьне.

Бәйтʹәледа, әԝ гәләк идарада дьхәбьти, мәсәлә Идара Тʹәмьзкьрьнеда, Идара Кʹарханеда у Бийуройа Бәйтʹәледа. Сала 1997, әԝи хушкәкә бь наве Анщела станд, у һʹәта иро әԝана тʹәвайи Бәйтʹәледа хьзмәт дькьн. Сала 2014, әԝана дәрбази Ԝорԝике бун. Ԝедәре, бьре Щефри шьхӧле авакьрьна офиса сәрәкәда хәбьти. Сала 2016, әԝана чун Патерсоне, кʹидәре мәкʹтәбед тʹәшкиләта мә дәрбаз дьбьн. Ԝедәре, бьре мә хьзмәт дькьр Идара Аудио/Видеойеда. Чар сал шунда, әԝана диса дәрбази Ԝорԝике бун, у бьре мә һатә кʹьфшкьрьне Офиса Комитейа Кʹьфшкьрьна Әндәмада. Сала 2022, мәһа Адаре, әԝ ча аликʹарчийе Комитейа Кʹьфшкьрьна Әндәма йа Кʹома Рʹебәрийе һатә кʹьфшкьрьне.

Бьра Йаһоԝа кʹәрәма хԝә бьдә ван бьред һежа, йед кӧ бь дьл у щан шьхӧле Пʹадшатийа Хԝәдеда дьхәбьтьн у бона мә ча «пʹешкʹеш» ьн жь Хԝәде (Әфәси 4:8).