НЬВИСКʹАРЕД Кʹьтеба Пироз щара һьнә готьнед хԝә, хәбәр бь хәбәр дьԝәкʹьландьн. Гәло чьрʹа? Ԝәрә әм дина хԝә бьдьнә ван се мәʹнийа, кӧ дьбәкә чьрʹа ԝана ӧса дькьр:

Кʹәнге һатә ньвисаре? Ԝәʹде бәре, ньвисаред Ԛануна Муса дәсте гәләк Исраелийада тʹӧнә бун. Чахе щьмәʹт бәр коне пироз тʹоп дьбу, Ԛанун дьһатә хԝәндьне, у гәләка готьнед Ԛануне тʹәне һьнге дьбьһистьн (Ԛануна Дӧщари 31:10-12). Әԝана нав әʹлаләтәкә мәзьнда бь сьһʹәта пʹийа дьсәкьнин, ләма жи дьԛәԝьмә ԝанрʹа һеса нибу, кӧ рʹьнд гӧһ бьдьн (Нәһәмийа 8:2, 3, 7). Ԝәхтед ӧсада, ԝәкʹьландьна фькьред фәрз али гӧһдара дькьр, ԝәки рʹеза бира хԝәда хԝәй кьн у бьдьнә хәбате. Ԝәкʹьландьна һьнә хәбәра али ԝан дькьр, кӧ әԝана ԛанунед Йаһоԝа бир нәкьн (Ԛануна Кʹаһинтийе 18:4-22; Ԛануна Дӧщари 5:1).

Чаԝа һатә ньвисаре? Һьнә пʹаред Кʹьтеба Пироз ча кʹьлам һатьнә ньвисаре, мәсәлә Зәбур, Стьрана Сьлеман у Луринед Йерәмйа. Һьнә кʹьламада готьн тенә ԝәкʹьландьне, йед кӧ фькьред сәрәкә дӧбарә дькьн у али гӧһдара дькьн, ԝәки әԝ готьнед кʹьламе әзбәри һин бьн. Мәсәлә, дина хԝә бьдә готьнед жь Зәбур 115:9-11: «Гәли Исраелийа! Хӧданда гӧман бьн, Әԝ ә кʹомәкдар у мәртʹала ԝә. Мала Һарун! Хӧданда гӧман бә, Әԝ ә кʹомәкдар у мәртʹала ԝә. Гәли Хԝәдехофа! Хӧданда гӧман бьн, Әԝ ә кʹомәкдар у мәртʹала ԝә». Бь сайа ԝәкʹьландьна һьнә готьна, фькьред кʹьламе һеса дьгьһиштьн һʹьш у дьле кʹьламбежа.

Чьрʹа һатә ньвисаре? Ньвискʹаред Кʹьтеба Пироз щарна готьнед фәрз дӧбарә дькьрьн. Мәсәлә, Йаһоԝа Исраелийарʹа гот кӧ гәрәке әԝана хуне нәхԝьн, у әԝи мәʹнийа ве ԛануне бь сайа Муса чәнд щара ԝәкʹьландьбу. Йаһоԝа дьхԝәст, ԝәки щьмәʹт рʹьнд фәʹм кә, кӧ хун жийин те һʹәсабе (Ԛануна Кʹаһинтийе 17:11, 14). Чәнд ԛьрʹнә шунда, гава шандийед Иса у рʹуспийед ль Оршәлиме бәʹса тьштед кӧ ль Хԝәде хԝәш найен, кьрьн, ԝана диса гот кӧ гәрәке хԝә жь хуне дур бьгьрьн (Кʹаред Шандийа 15:20, 29).

Ле Йаһоԝа нәдьхԝәст кӧ ԝәкʹьландьна һьнә рʹеза у готьна бьбә әʹдәт. Мәсәлә, Иса гот: «Дӧайед хԝәда әʹйни хәбәра диса у диса [нәԝәкʹьлиньн]» (Мәтта 6:7). Паше, әԝи зәлал кьр кӧ әм дькарьн бона чь дӧа бькьн (Мәтта 6:9-13). Ләма жи гәрәке әм дӧайед хԝәда һәр гав әʹйни хәбәра нәдьнә хәбате, ле һәмьки әм дькарьн әʹйни тʹема бьԝәкʹьлиньн (Мәтта 7:7-11).

Мәʹнийед баш һәнә, кӧ Кʹьтеба Пирозда һьнә готьн тенә ԝәкʹьландьне. Йаһоԝа бь ви щурʹәйи рʹебәрийа мә дькә, чь кӧ һәр тʹьм бона кʹара мә йә (Ишайа 48:17, 18).