ӘМ ГЬШК баԝәр дькьн, ԝәки Йаһоԝа ван «рʹожед ахьрийеда» рʹӧһʹанида али щьмәʹта хԝә дькә (2 Тимтʹ. 3:1). Ле мәва гьредайи йә, әме гӧһ бьдьнә ԝи йан на. Әм дәрәща хԝә дькарьн бәрамбәри дәрәща Исраелийед бәрʹийеда бькьн. Ԝана тʹьме гӧһ дьда дәнгед борʹийе.

Йаһоԝа Мусарʹа гот, ԝәки «дӧ борʹийед зивинә кʹоланди» чекә, «бона газикьрьна щьвине у бона рʹекʹәтьна зома» (Жьмар 10:2). Кʹаһина пе борʹийа щурʹә-щурʹә дәнг дәрдьхьстьн, ӧса щьмәʹте фәʹм дькьр кӧ гәрәке чь бькә (Жьмар 10:3-8). Иро щьмәʹта Хԝәде бь щурʹә-щурʹә метода рʹебәрийа дьстинә. Ԝәрә әм тʹәне дәрһәԛа се метода шеԝьр кьн, у бәрамбәри дәнгед борʹийед Исраела бәре бькьн. Йа пешьн, щьмәʹта Хԝәде те тʹәглифкьрьне сәр щьвинед мәзьн, йа дӧда рʹуспи тенә һинкьрьне, у йа сьсийа, чахе рʹебәрийед бона һʹәму щьвата тенә гӧһастьне.

Чахе Йаһоԝа дьхԝәст «тʹәмамийа щьвине» бәр дәре коне пироз алийе рʹоһьлатеда бьщьвинә, кʹаһин гәрәке һәр дӧ борʹийа хьстана (Жьмар 10:3). Һьнге һʹәму ԛәбилед кӧ дор бәре коне пироз чар алийава зом данибун, дәнге борʹийа дьбьһистьн. Әԝед кӧ незики дәре коне пироз бун, зу дькарьбун бьһатана. Ле йед майин дьһа дур бун, ԝанрʹа һе зедә ԝәʹдә у щәфа лазьм бу, ԝәки бен. Чь жи һәбу, Йаһоԝа дьхԝәст кӧ һʹәмушк бьщьвьн у рʹебәрийа бьбьһен.

Иро әм коне пирозда тʹоп набьн. Ле әм тенә тʹәглифкьрьне кӧ тʹәви щьмәʹта Хԝәде бьщьвьн, мәсәлә, сәр щьватед мәзьн у сәр ԛәԝьмандьнед мәхсусә майин, кʹидәре әм әʹламәти у рʹебәрийед фәрз педьһʹәсьн. Сәр һәр чар ԛӧлбед дьнйайе, щьмәʹта Йаһоԝа бәрнамәке дьбьһе. Әԝед кӧ тенә сәр ԝан щьвина, пʹара щьмәʹта мәзьн ьн, кʹижан кӧ шабуне дьстинә. Һьнәк жь щийед дур тен, ле йәкә тʹӧ щар пʹошман набьн кӧ әԝана һатьн, чьмки әв щәфа һежа бу.

Ле әԝед кӧ дур дьжин у нькарьн бен сәр ван щьвина, ча кʹаре дьстиньн жь ван бәрнама? Чьԛас баш ә, ԝәки техноложийа иро гәләк пешда чуйә. Бь сайа ве йәке, әԝана жи дькарьн бәрнаме бьбьһен у хԝә ӧса тʹәхмин кьн, кӧ әԝана жи сәр ԝан щьвинед мәзьн ьн. Мәсәлә, ԝәʹде сәрледана ԝәкʹиле кʹома рʹебәрийе, филиала Бенине видео-трансласийа дәрбаз кьр бона шәһәре бьчʹук Арлите кӧ Нижәрйайеда йә. Ԝедәре 21 хушк-бьра у йед кӧ дьхԝәстьн һе зедә дәрһәԛа рʹастийе пебьһʹәсьн, тʹоп бун.  Рʹаст ә әԝана дур бун, ле хԝә ӧса тʹәхмин дькьрьн, кӧ те бежи тʹәви ԝан 44 131 мәрьва бун. Бьраки ньвиси: «Әз бь тʹәмамийа дьле хԝә дьхԝазьм ԝәрʹа бежьм зәʹф рʹази мә, кӧ ԝә видео-трансласийа мәрʹа вехьст. Әԝе йәке диса жи мәрʹа избат кьр, кӧ һун чьԛас зәʹф мә һʹьз дькьн».

Чахе кʹаһинед Исраели тʹәне щарәке борʹийе дьхьстьн, «сәрԝер, аԝа готи сәрәк» гәрәке бәр коне щьвине тʹоп буна (Жьмар 10:4). Әԝана ԝедәре жь Муса рʹебәри у һинкьрьн дьстандьн. Бь сайа ве йәке ԝана ԛәбилед хԝәда дькарьбун щабдарийед хԝә р›ьнд банийана сери. Һәрге һун сәрԝере ԝи чахи буна, ԝәйе һәр тьшт бькьра, ԝәки бьһатана ԝедәре у һинкьрьн бьстандана?

Иро рʹуспийед щьвате «сәрԝер» ниньн, у нә жи сәр кәрийе пәзе Хԝәде һʹӧкӧм дькьн (1 Пәт. 5:1-3). Ле алийе хԝәда әԝана һәр тьшти дькьн, ԝәки шьвантийа кәри бькьн. Әԝана бь дьл у щан тʹәглифкьрьне ԛәбул дькьн, ԝәки һинкьрьне бьстиньн, мәсәлә Мәкʹтәба Хьзмәтийеда. Ԝәʹде мәкʹтәбед ӧса, рʹуспи һин дьбьн кӧ чаԝа һе зедә шьхӧлед щьватеда хирәт бьн. Бь сайа ве йәке рʹуспи у хушк-бьред щьвате рʹӧһʹанида һе пешда дьчьн. Һәрге һун әве мәкʹтәбе дәрбаз нәбунә, йәкә әԝед кӧ дәрбаз бунә, чь кӧ һин бунә щьватеда дьдьнә хәбате.

Кʹаһинед Исраели щара дәнге борʹийе кьнә-кьн ледьхьстьн. Әԝи дәнги әʹлам дькьр, ԝәки Йаһоԝа дьхԝазә кӧ тʹәмамийа зоме рʹе кʹәвә (Жьмар 10:5, 6). Рʹаст ә рʹекʹәтьна зоме гәләк бь организә бу, ле чәтьнайи жи һәбун бона һәр кәси. Һьнәк, щара ԝәʹде рʹекʹәтьне дьԛәԝьмә тʹәвһәв дьбун. Ле чьрʹа?

Дьбәкә һьнәк әʹщьз дьбун, кӧ дәнге борʹийе гәләк щар дьһат у ньшкева дәнг дәрдькʹәт, ԝәки рʹекʹәвьн. «Дьбу ԝәки әʹԝр жь еваре һʹәта сьбәһе дьма», ле щара жи «дӧ рʹожа, йан мәһәке, йан саләке» (Жьмар 9:21, 22). Ле гәло чьԛас щар зома Исраелийа рʹе дькʹәт? Кʹьтеба Жьмарда сәре 33-да те готьне, ԝәки 40 щара Исраели рʹе кʹәтьн у зомед хԝә щигӧһасти кьрьн.

Щара, әԝана щийе сида щиԝар дьбун. Нава «ԛумьстана мәзьн» у хофда, щийед ӧса бона зоме щики баш бу (Ԛан. Дщр. 1:19). Ле йәкә, щара дьбәкә фькьред ӧса жи дьһатә һʹьше ԝан, ԝәки чахе зом диса рʹе кʹәвә, дьбәкә ида ԝе щийе ӧса баш тʹӧнәбә.

Гава ԛәбил рʹе дькʹәтьн, сәбьра һьнәка дьбәкә дьһатә щерʹьбандьне, чьмки гәрәке һивийа сьрийа хԝә буна. Гьшка дәнге борʹийейә кьн дьбьһист, ле нә һʹәмушк дәрбәкерʹа дькарьбун рʹекʹәтана. Әԝ дәнге борийейә кьн, дьһатә һʹәсабе, ԝәки ԛәбилед Щьһуда, Исахар у Зәбулон, кӧ алийе рʹоһьлатеда зома хԝә данибун, гәрәке рʹе кʹәтана (Жьмар 2:3-7; 10:5, 6). Паши рʹекʹәтьна ԝана, кʹаһина щара дӧда дәнге борʹийе кьн дәрдьхьстьн, ԝәки зома себәрәки тʹәви ала хԝә рʹекʹәвьн у алийе башуреда щиԝар бун. Кʹаһин бәрдәԝам дькьр ӧса бькә һʹәта кӧ тʹәмамийа зоме рʹе кʹәта.

Дьбәкә чахе тʹәшкиләта мәда гӧһастьн дьбьн, ԝәрʹа жи чәтьн ә дәрберʹа һини ван гӧһастьна бьн. Дьԛәԝьмә һун дьфькьрьн, кӧ гәләк тьшт пәй һәврʹа тенә гӧһастьне. Йан жи дьбәкә һун һини тьштәки бьбун, у ԝә нәдьхԝәст әԝ тьшт бе гӧһастьне. Фьрԛи тʹӧнә чь жи һәбуйа, сәбьра ԝә дьһатә щерʹьбандьне һʹәта кӧ һун һини ван гӧһастьна бун. Ле һәрге әм ԝан гӧһастьна ԛәбул кьн у бьфькьрьн, кӧ әԝ бона кʹара мә йә, бона ве йәке Хԝәде ԝе мә кʹәрәм кә.

Ԝәʹде Мусада, Йаһоԝа бь милйона мер, жьн у зарʹ бәрʹийерʹа дәрбаз дькьр. Әԝана бейи хԝәйкьрьн у рʹебәрийед Хԝәде ԝе ԝедәре сах нәмана. Иро жи әм ван рʹожед ахьрийеда рʹӧһʹанида сах дьминьн, чьмки Йаһоԝа рʹебәрийе мә дькә у мә хԝәй дькә. Ләма ԝәрә әм гьшк мина ԝан Исраелийед амьн, гӧһ бьдьнә дәнгед борʹийед мәхсус у пәй рʹебәрийа Йаһоԝа һәрʹьн!