Пол гьли дькә: «Чахе кӧрʹе хале мьн дәстпекьр тʹәви мьн шәрʹ бькә, мьн дәсте хԝә кьрә хәнәԛа ԝи у дьхԝәст ԝи бьхәньԛанда. Мьн дьхԝәст ԝи бькӧшта».

Марко дьбежә: «Малда һәла һе сәр тьштед бьчʹук жи һерса мьн рʹадьбу. Һʹәму тьшт чь жи бәр дәсте мьн дькʹәт, мьн кәвки дькьр».

Дьԛәԝьмә әм ӧса һерс накʹәвьн мина ԝан дӧ бьра. Ле йәкә щара мәрʹа чәтьн ә хԝә контрол кьн. Мәʹнийа пешьн әԝ ә, кӧ гӧне Адәм дәрбази сәр һʹәму мәрьва буйә (Рʹом. 5:12). Мина Пол у Марко, дьбәкә һьнәкарʹа чәтьн ә хԝәгьртьне бьдьнә кʹьфше. Ле һьнәкарʹа дьбәкә чәтьн ә фькьред хԝә контрол кьн. Мәсәлә, әԝана дьфькьрьн дәрһәԛа ԝан тьшта, чь кӧ тьрсе дькә дьле ԝан у ԝана дьлтәнг дькә. Һьнә мәрьварʹа жи чәтьн ә алийе бенамусийеда хԝә контрол кьн, пәй ичʹке нәкʹәвьн у наркотика нәдьнә хәбате.

Мәрьвед кӧ фькьр, хԝәстьн у кьред хԝә контрол накьн, әʹмьре хԝә дькьнә бьн ԛәзийе. Ле әм дькарьн жь ԝан дәрәща хԝә хԝәй кьн. Ча? Һәрге хԝәгьртьне нав хԝәда пешда биньн. Ԝәрә се тьшта шеԝьр кьн, кʹижан кӧ ве йәкеда дькарьн али мә бькьн: 1) Хԝәгьртьн чь йә? 2) Чьрʹа әԝ йәк фәрз ә? 3) Ча әм дькарьн әԝи һʹӧнӧри нав хԝәда пешда биньн, кʹижан кӧ бәре рʹӧһʹе пироз ә? (Галт. 5:22, 23) Паше әме шеԝьр кьн, әм чь дькарьн бькьн һәрге щара нькарьн хԝәгьртьне бьдьнә кʹьфше.

Мәрьве кӧ хԝәгьртьне дьдә кʹьфше, ԝе зу һерс нәкʹәвә сәр һәр тьшти. Әԝ ԝе жь хәбәрдан у кьред ӧса хԝә дур бьгьрә, кʹижан кӧ дькарьн дьле Йаһоԝа бешиньн.

Иса нишан кьр кӧ чь дькʹәвә нава хԝәгьртьне. Кʹьтеба Пирозда те готьне: «Гава дьһатә рʹәзилкьрьне, жь бәрва кәс рʹәзил нәдькьр, гава щәфа дькʹьшанд, гәф ль кәсәки нәдьхԝар, ле хԝә спартьбу һʹакьме сәр рʹастийе» (1 Пәт. 2:23). Чахе дьжмьнед Иса ԝи дькʹәнийан, гава әԝ сәр стуна щәфе бу, һьнге әԝи хԝәгьртьне да кʹьфше (Мәт. 27:39-44). Ле пешийа ве йәке, Иса әԝ һʹӧнӧр да кʹьфше, чахе сәрԝеред рʹелигийа гәләк пьрс дьданә ԝи, сәва кӧ ԝи шаш кьн у әԝ тьштәки нәрʹаст бежә (Мәт. 22:15-22). У чахе Щьһуйед һерс кәвьр һьлдан кӧ бавежьнә ԝи, һьнге жи Иса хԝәгьртьнеда мәсәләкә мәзьн һишт! Дәԝса кӧ щаба ԝан бьдә, «Иса хԝә жь ԝан вәдьзи у жь пʹарьстгәһе дәркʹәтә дәрва чу» (Йуһʹн. 8:57-59).

Әм жи дькарьн чʹәʹв бьдьнә мәсәла Иса. Пәтрусе шанди ньвиси: «Мәсиһ хԝәха жи бона ԝә щәфа кʹьшанд у нәхшәк ԝәрʹа һьшт» (1 Пәт. 2:21). Рʹаст ә әм нәԛәданди нә, ле йәкә әм дькарьн хԝәгьртьнеда чʹәʹв бьдьнә мәсәла Иса. Ле чьрʹа фәрз ә әм чʹәʹв бьдьнә ԝи?

Әм гәрәке хԝәгьртьне бьдьнә кʹьфше сәва кӧ ԛәбулкьрьна Йаһоԝа бьстиньн. Һәрге жи әм ида гәләк ԝәʹдә йә Йаһоԝарʹа бь амьни хьзмәт дькьн, йәкә һәрге әм хәбәрдан йан кьред хԝә контрол нәкьн, әм дькарьн достийа хԝә тʹәви Хԝәде ӧнда кьн.

 Бьфькьрьн дәрһәԛа Муса, йе кӧ «гәләки шкәсти бу, жь һʹәму мәрьвед ль сәр рʹуйе әʹрде гәләктьр» (Жьмар 12:3). Муса гәләк сала бь сәбьр кӧтә-кӧтә Исраелийа тʹаб дькьр. Ле щарәке әԝи хԝә контрол нәкьр у һерс кʹәт, чьмки ԝана диса кьрә кӧтә-кӧт жь бо ве йәке, кӧ ава ԝан тʹӧнәбу. Әԝи сәрт тʹәви ԝан хәбәр да у гот: «Бьбьһен гәли рʹабәрикʹара, дьбә кӧ әм жь ви ԛәйайи ԝәрʹа аве дәрхьн?» (Жьмар 20:2-11)

Ве дәрәщеда Муса хԝәгьртьн нәда кʹьфше. Әԝи Йаһоԝа рʹумәт нәкьр бона ве йәке, кӧ Әԝи бь кʹәрәмәти ав да ԝан (Зәб. 106:32, 33). Ахьрийа ве йәке әԝ бу, кӧ Хԝәде изьн нәда Муса, ԝәки бькʹәвә Әʹрде Создайи (Жьмар 20:12). Һʹәта мьрьна хԝә жи, Муса дьбәкә пʹошман дьбу, кӧ әԝи чьрʹа ӧса хԝә да кʹьфше (Ԛан. Дщр. 3:23-27).

Мәсәла Муса чь дәрс ә бона мә? Һәрге әм ида гәләк ԝәʹдә йә нава рʹастийеда ньн, йәкә әм гәрәке тʹӧ щар беԛәдьр нибьн һьндава ԝан мәрьва, йед кӧ һерса мә рʹадькьн, йан жи һьндава ԝанда, кʹижанарʹа ширәт лазьм ә (Әфәс. 4:32; Колс. 3:12). Әм чьԛас мәзьн дьбьн, сьһʹәт-ԛәԝата мә һе хьраб дьбә, ләма щара мәрʹа дьһа чәтьн дьбә сәбьре бьдьнә кʹьфше, ле мәсәла Муса гәрәке тʹьме бира мәда бә. Әм нахԝазьн достийа хԝә тʹәви Йаһоԝа хьраб кьн жь бо ве йәке, кӧ хԝәгьртьне нәдьнә кʹьфше. Ле чь ԝе али мә бькә, ԝәки әв һʹӧнӧре фәрз нав хԝәда пешда биньн?

Бона рʹӧһʹе пироз дӧа бькьн. Чьрʹа? Чьмки хԝәгьртьн бәре рʹӧһʹе пироз ә, у Йаһоԝа рʹӧһʹе хԝәйи пироз дьдә ԝан мәрьва, кʹе жь ԝи дьхԝазә (Луԛа 11:13). Бь сайа рʹӧһʹе хԝәйи пироз, Әԝ ԛәԝате дьдә мә, ԝәки әм бькарьбьн әви һʹӧнӧри бьдьнә кʹьфше (Фили. 4:13). Хԝәде ӧса жи дькарә али мә бькә, ԝәки һʹӧнӧред дьн жи бьдьнә кʹьфше, кʹижан кӧ дькʹәвьнә нава бәре рʹӧһʹе пироз, мәсәлә һʹьзкьрьн. Жь бо ԝи һʹӧнӧри мәрʹа дьһа һеса йә хԝәгьртьне бьдьнә кʹьфше (1 Корн. 13:5).

Хԝә дур бьгьрьн жь ԝан тьшта, чь кӧ дькарә рʹе мә бьгьрә кӧ хԝәгьртьне бьдьнә кʹьфше. Мәсәлә, хԝә дур бьгьрьн жь малпәр у ԝәʹдәдәрбазкьрьнед ӧса, кʹижан дькарьн хьраб һʹӧкӧм кьн (Әфәс. 5:3, 4). Мәсәлә, әм гәрәке хԝә жь ԝан тьшта дур бьгьрьн, чь кӧ дькарә мә бәрбь хьрабийе бьвә (Мәтʹлк. 22:3; 1 Корн. 6:12). Ӧса жи, мәрьве кӧ һеса дькарә бькʹәвә тʹәлька бенамусийе, дьԛәԝьмә гәрәке сафи кә, ԝәки кʹьтебед романтики нәхунә у нә жи филмед ӧса бьньһерʹә.

 Дьбәкә мәрʹа чәтьн бә әԝе ширәте әʹмьре хԝәда бьдьнә хәбате. Ле һәрге әм ԛәԝате бьдьнә хәбате сәва әԝе ширәте биньн сери, Йаһоԝа ԝе али мә бькә, ԝәки әм хԝәгьртьне бьдьнә кʹьфше (2 Пәт. 1:5-8). Ԝе ӧса жи али мә бькә фькьр, хәбәрдан у кьред хԝә контрол кьн. Әм ве йәкеда баԝәр ьн, чьмки мәсәла Пол у Марко ве йәке избат дькьн, йед кӧ һин бунә һерса хԝә контрол кьн. Ԝәрә мәсәла бьраки шеԝьр кьн, йе кӧ чахе авто дажот, хԝә контрол нәдькьр у һәла һе жи сәр ажованед дьн һерс дькʹәт у тʹәви ԝан дькʹәтә дәʹԝе. Ле паше әԝи чь кьр? Әԝ дьбежә: «Мьн һәр рʹож Хԝәдерʹа гәләк дӧа дькьр. Мьн тʹемед дәрһәԛа хԝәгьртьне леколин дькьр у рʹезед жь Кʹьтеба Пироз, кʹижан кӧ али мьн дькьрьн, бира хԝәда хԝәй дькьр. Рʹаст ә әз ида бь сала сәр хԝә дьхәбьтьм, әз һʹәта рʹожа иро һәр шәбәԛ дькьмә бира хԝә, кӧ әз гәрәке һерса хԝә контрол кьм. Ле ньһа сәва әз ԝәʹде ажотьне ләз нәкʹәвьм, ида зу дәртем кӧ һәрʹьм пәй шьхӧле хԝә».

Щара бал мә ԝе нәйе стандьне хԝәгьртьне бьдьнә кʹьфше. Һьнге дьбәкә әме шәрм бькьн Йаһоԝарʹа дӧа бькьн. Ле илаһи ԝи чахи, әм гәрәке Йаһоԝарʹа дӧа бькьн, ԝәки Әԝ али мә бькә. Ләма жи перʹа-перʹа Ԝирʹа дӧа бькьн. Лавайа ԝи бькьн кӧ бьбахшинә ԝә, аликʹарийе жь ԝи бьхԝазьн у һʹәму тьшти бькьн, ԝәки диса шашийед ӧса нәкьн (Зәб. 51:9-11). Нәфькьрьн ԝәки Йаһоԝа ԝе гӧһ нәдә дӧайед ԝәйә жь дьл (Зәб. 102:17). Йуһʹәннайе шанди тинә бира мә, кӧ хуна Кӧрʹе Хԝәде «мә жь һʹәму гӧна паԛьж» дькә (1 Йуһʹн. 1:7; 2:1; Зәб. 86:5). Бир нәкьн, кӧ Йаһоԝа дьбежә хьзмәткʹаред хԝә, ԝәки зу бьбахшиньн һәв. Ләма жи әм дькарьн баԝәр бьн, кӧ Хԝәде жи ԝе бьбахшинә мә (Мәт. 18:21, 22; Колс. 3:13).

Дьле Йаһоԝа хԝәш нәһат чахе Муса бәрʹийеда хԝәгьртьн нәда кʹьфше. Ле йәкә Йаһоԝа бахшандә ԝи. Хенщи ве йәке, Хәбәра Хԝәдеда те готьне, кӧ Муса мәрьвәки гәләк амьн бу, у әм жи ве йәкеда гәрәке чʹәʹв бьдьнә ԝи (Ԛан. Дщр. 34:10; Ибрн. 11:24-28). Рʹаст ә Йаһоԝа изьн нәда Муса ԝәки бькʹәвә Әʹрде Создайи, ле мәщал да ԝи, кӧ щьнәтеда һʹәта-һʹәтайе бьжи. Һәрге әм жи алийе хԝәда һʹәму тьшти бькьн, ԝәки әв һʹӧнӧре фәрз нав хԝәда пешда биньн, демәк хԝәгьртьне, әме бькарьбьн әʹмьре һʹәта-һʹәтайерʹа ша бьн (1 Корн. 9:25).