1. Йаһоԝа чьрʹа хԝә бәрамбәри де кьр?

«МА Пирәк дькарә кӧ лаԝе хԝәйи бьмәмьква жь бир бькә?» Әԝ пьрс Йаһоԝа да ԝәʹде рʹожед пʹехәмбәре хԝә Ишайа. Ле Хԝәде готә щьмәʹта хԝә: «Бәле, әԝ дькарьн жь бир бькьн, ле бәле әз тә жь бир накьм!» (Иша. 49:15). Ве дәрәщеда Йаһоԝа хԝә бәрамбәри де дькә, ле нә һәртʹьм. Йаһоԝа дәрһәԛа һәләԛәтийа ортʹа де у зарʹе мәсәлә ани, ԝәки бьдә кʹьфше, кӧ әԝ хьзмәткʹаред хԝә чьԛас һʹьз дькә. Гәләк де сәр хԝә тʹәхмин дькьн ве йәке, чь кӧ хушка мә Жасмин сәр хԝә тʹәхмин кьрийә. Әԝ дьбежә: «Чахе де бона зарʹа хԝә хәм дькә, һәләԛәтийа ортʹа ԝан гәләк ԛәԝи дьбә у әԝ һәләԛәти тʹәмамийа әʹмьре ԝанда бәрдәԝам дьбә».

2. Йаһоԝа ча хԝә тʹәхмин дькә, гава һәла һе хьзмәткʹарәки ԝи жи, ԝи дьһелә?

² Һәла һе жи чахе тʹәне зарʹокә Йаһоԝа щьвате дьһелә у ида хьзмәтийеда кʹар накә, Әԝ дәрһәԛа ве зарʹа хԝә жи занә. Бьдьнә бәр чʹәʹве хԝә, дьле Йаһоԝа чьԛас дьшәԝьтә чахе әԝ дьвинә, ԝәки һәр сал бь һʹәзара хьзмәткʹаред ԝи рʹӧһʹанида сьст дьбьн у хьзмәтийа хԝә дьдьнә сәкьнандьне. *

3. Йаһоԝа бь дьл у щан чь дьхԝазә?

³ Гәләк хушк-бьра кӧ рʹӧһʹанида сьст бунә, диса вәдьгәрʹьн щьвате у дьле мә сәва ԝан гәләк ша дьбә! Йаһоԝа у ӧса жи әм, бь дьл у щан дьхԝазьн кӧ әԝана вәгәрʹьн (1 Пәт. 2:25). Ле әм ча дькарьн али ԝан хушк-бьра бькьн? Пешийа кӧ әм щаба ве пьрсе пебьһʹәсьн, ԝәрә әм шеԝьр кьн кӧ чьрʹа һьнә хушк-бьра ида найенә  щьвате у хьзмәтийа хԝә данә сәкьнандьне.

4. Хәбат ча дькарә сәр һьнәка һʹӧкӧм бькә?

⁴ Һьнә хушк-бьра пәй хәбате дькʹәвьн у әԝ дьбә мәʹни, кӧ әԝана хьзмәти дьдьнә сәкьнандьне. Һанг, * бьраки мә жь Асйайе, дәрһәԛа хԝә дьбежә: «Әз педа кʹәтьбум нав хәбате. Мьн хԝәха хԝә дьхапанд, чьмки дьфькьрим, кӧ һәрге пʹәре мьн зәʹф бә, әзе бькарьбьн һе зедә Йаһоԝарʹа хьзмәт кьм. Ләма жи әз гәләк сьһʹәта дьхәбьтим, у мьн һеди-һеди щьват бәрʹдьда у ахьрийеда ԛә нәдьчум щьвата. Рʹасти жи әв дьнйа һеди-һеди мәрьва жь Йаһоԝа дур дьхә».

5. Проблем ча сәр хушкәкә мә һʹӧкӧм бун?

⁵ Һьнә хушк-бьред мә жь бо гәләк проблема дьлтәнг дьбьн, ләма жи хьзмәтийа хԝә дьдьнә сәкьнандьне. Хушкәкә мә жь Британйайе Анна, дийа пенщ зарʹа йә. Әԝ гьли дькә: «Зарʹәкә мьн сәԛәт һатә буйине, паше ԝәʹдә шунда ԛизәкә мьн жь щьвате һатә дәрхьстьне, ле бал кӧрʹәки мьн жи нәхԝәшийа психики пешда һат. Әз кʹәтьмә депресийа ӧса гьран, кӧ ахьрийеда әз рʹӧһʹанида сьст бум. Әз ида нә дьчумә щьвате у мьн нә жи хьзмәт дькьр». Дьле мә ча бона хушка мә Аннайе у нәфәред ԝе дьшәԝьтә, ӧса жи бона ԝан хушк-бьра, йед кӧ рʹасти проблемед ӧса тен.

6. Һәрге мәрьв рʹеза жь Колоси 3:13 нәдә хәбате, ча әԝ дькарә жь щьмәʹта Йаһоԝа дур кʹәвә?

⁶ Бьхунә Колоси 3:13. Һьнә хушк-бьра хьзмәтийа хԝә данә сәкьнандьне, чьмки жь щьвате кәсәки әԝана данә хәйидандьне. Паԝлосе шанди заньбу, ԝәки щара ԝе «газьне» мә һьндава хушк йан бьрада һәбә. Һәла һе дьԛәԝьмә нәһәԛийе жи мә бькьн. Һәрге әм фәсал нибьн, әм дькарьн бьбьнә йәки зӧлм у һерс. Әв һерс ахьрийеда дькарә мә жь щьмәʹта Йаһоԝа дур хә. Дина хԝә бьдьнә сәрһатийа бьраки мә Пабло жь Америка Башуре. Бӧхдан авитьнә ԝи, кӧ йан чь әԝи хьраби кьрийә. Әԝи жь бо ве йәке щабдарийа хԝә щьватеда ӧнда кьр. Әв дәрәщә сәр ԝи ча һʹӧкӧм бу? Пабло дьбежә: «Әз гәләк һерс кʹәтьм, у һеди-һеди әз жь щьвате дур кʹәтьм».

7. Чь дькарә бьԛәԝьмә тʹәви ԝи мәрьви, исафа кʹижани ле дьчәрчьринә?

⁷ Әԝе кӧ гӧнәки гьран кьрийә, исафа ԝи дькарә гәләк ԝәхт ԝи бьчәрчьринә, у әԝ дькарә бьфькьрә кӧ ида һежайи һʹьзкьрьна Хԝәде нинә. Һәла һе жи һәрге әԝи бь дьл гӧне хԝә анийә рʹуйе хԝә, йәкә әԝ дькарә һʹәсаб кә кӧ ида лайиԛ нинә Йаһоԝарʹа хьзмәт кә. Ле бьраки мә Франсиско һʹаләки ӧсада бу. Әԝ гьли дькә: «Мьн бенамуси кьр у әз һатьмә щәзакьрьне. Пешийе әз диса дьчумә щьвате, ле әз кʹәтьмә депресийе у дьфькьрим кӧ ида һежа ниньм нава щьмәʹта Хԝәдеда бьминьм. Исафа мьн гәләк әз дьчәрчьрандьм у әз дьфькьрим кӧ Йаһоԝа нәбахшандийә мьн. Ԝәʹдә шунда мьн ида хьзмәтийа хԝә да сәкьнандьне у әз нә жи дьһатьмә щьвате». Ле һун чь дьфькьрьн дәрһәԛа дәрәща ԝан хушк-бьра, бәʹса кʹижана мә жоре кьр? Дьле ԝә дьшәԝьтә бона ԝан? Ле йа лапә фәрз, Йаһоԝа чь дьфькьрә дәрһәԛа ԝан?

8. Гәло Йаһоԝа ча нә һьндава ԝан, йед кӧ хьзмәтийа хԝә данә сәкьнандьне? Шьровәкьн.

⁸ Йаһоԝа бир накә ԝан мәрьва, йед кӧ жерʹа хьзмәт дькьрьн, ле ԝәʹдәлу жь щьмәʹта ԝи дур кʹәтьнә. Әԝ нә жи  бир дькә кьред ԝан, кʹижан кӧ бона ԝи кьрьнә (Ибрн. 6:10). Ишайа пʹехәмбәр мәсәләкә ӧса дьлгәрми ани, кӧ дьдә кʹьфше ԝәки Йаһоԝа ча бона щьмәʹта хԝә хәм дькә. «Ԝе мина шьванәки пәзе хԝә бажо, бь баске хԝә ԝе бәрхька бьщьвинә» (Иша. 40:11). Ле Йаһоԝа ча Шьване Мәзьн, чь тʹәхмин дькә гава пәзәкә ԝи жь кәри дур дькʹәвә? Иса әʹйан кьр әԝ йәк гава пьрс да шагьртед хԝә: «Һун чаԝа тʹәхмин дькьн? Һәгәр сәд пәзед мәрьвәки һәбьн у йәк жь ԝан ӧнда бә, әԝе нод нәһа нәһелә чʹийабанийа у нәчә кӧ йа ӧндабуйи бьгәрʹә? Ле гава бьбинә, әз рʹаст ԝәрʹа дьбежьм, әԝе бона ԝе һе гәләки ша бә, нә кӧ бона нод нәһед дьнә кӧ ӧнда нәбунә» (Мәт. 18:12, 13).

9. Бәре, шьван ча бун һьндава пәзед хԝәда? (Бьньһерʹә шькле рʹуйе журнале.)

⁹ Чьрʹа әм Йаһоԝа бәрамбәри шьван дькьн? Чьмки бәре шьване ԛәнщ гәләк мьԛати пәзед хԝә дьбун. Мәсәлә, Даԝьд тʹәви шер у һʹьрчʹ шәрʹ кьр, ԝәки кәрийе хԝә хԝәй кә (1 Сам. 17:34, 35). Һәрге тʹәне пәзәк жи ӧнда дьбу, шьване ԛәнщ тʹәхмин дькьр (Йуһʹн. 10:3, 14). Шьване ӧса, 99 пәзед хԝә щийе хԝәйкьрида йан щәм шьване майин дьһишт, сәва йа ӧндабуйи бьгәрʹә. Иса әв мәсәла шьван да хәбате сәва рʹастийа фәрз һин кә: «Баве ԝәйи әʹзмана нахԝазә кӧ жь ван бьчʹука йәк ӧнда бә» (Мәт. 18:14).

10. Ль гора Һәзәԛел 34:11-16, Йаһоԝа чь соз дабу кӧ бона пәзед хԝәйи ӧндабуйи бькә?

¹⁰ Йаһоԝа мә һәр кәси һʹьз дькә, у ӧса жи ԝан «бьчʹука», йед кӧ жь кәрийе ԝи дур кʹәтьнә. Хԝәде бь сайа Һәзәԛел пʹехәмбәр соз да, ԝәки ԝе пәзед хԝәйә ӧндабуйи бьгәрʹә у рʹӧһʹанида ԝана ԛәнщ кә. У әԝи гот кӧ ԝе чь бькә сәва ԝана хьлаз кә. Чь кӧ әԝи гәрә бькьра, бәре шьване Исраели дькьр гава пәзәк ӧнда дьбу. (Бьхунә Һәзәԛел 34:11-16.) Пешийе, әԝ шьван дьчу пәза ӧндабуйи бьгәрʹә, у сәва ве йәке лазьм бу ԝәʹдә хәрщ кә у щәфе бьвинә. Чахе шьван әԝ пәз дьдит, дьани нава кәри. Хенщи ве  йәке, һәрге әԝ пәз бьриндар йан тʹи-бьрʹчи буйа, әԝи шьвани бь һʹьзкьрьн али ве һʹәйԝана сьст дькьр, бьринед ԝе дьпʹечʹа, һьлдьда һʹәмеза хԝә у ле тʹер дькьр. Рʹуспи жи, демәк шьванед «кәрийе пәзе Хԝәде», гәрәке ӧса бькьн гава али ԝи кәси дькьн, йе кӧ жь щьвате дур кʹәтийә (1 Пәт. 5:2, 3). Рʹуспи ԝан кәса дьгәрʹьн, али ԝан дькьн сәва вәгәрʹьн щьвате, у бь һʹьзкьрьне рʹӧһʹанида ԝана ԛәнщ дькьн. *

11. Шьване ԛәнщ чь фәʹм дькьр?

¹¹ Шьване ԛәнщ фәʹм дькьр, ԝәки пәз дькарә ӧнда бә. У чахе пәз хԝәха жь кәри дур дькʹәт, шьван сәва ве йәке ле щәза нәдькьр. Дина хԝә бьдьнә мәсәла Хԝәде, кӧ әԝи ча али хьзмәткʹаред хԝә дькьр, йед кӧ ԝәʹдәлу жь ԝи дур кʹәтьбун.

12. Йаһоԝа һьндава Уньсда ча бу?

¹² Уньс пʹехәмбәр гӧрʹа Йаһоԝа нәкьр у жь щабдарийа хԝә рʹәви. Ле Йаһоԝа тʹәрка Уньс нәда. Йаһоԝа мина шьване ԛәнщ әԝ хьлаз кьр у али ԝи кьр, ԝәки ԛәԝи бә у щабдарийа хԝә бинә сери (Унс. 2:7; 3:1, 2). Паше, Йаһоԝа пе мәсәла кʹол али Уньс кьр кӧ фәʹм кә, ԝәки әʹмьре һәр мәрьвәки бона ԝи чьԛас ԛимәт ә (Унс. 4:10, 11). Жь ве йәке әм чь дәрсе һин дьбьн? Рʹуспи гәрәке дәрберʹа нәфькьрьн, ԝәки хушк-бьред кӧ хьзмәтийа хԝә данә сәкьнандьне, ԝе ида вәнәгәрʹьн. Дәԝсе, рʹуспи гәрәке тедәрхьн кӧ мәʹни чь бу, ԝәки әԝ пәз жь кәри дур кʹәт. У чахе әԝ вәдьгәрʹә щәм Йаһоԝа, рʹуспи гәрәке бәрдәԝам кьн бь һʹьзкьрьн бона ԝи хәм бькьн.

13. Йаһоԝа һьндава ньвискʹаре Зәбур 73 ча хԝә да кʹьфше, у әм жь ве йәке чь һин дьбьн?

¹³ Ньвискʹаре Зәбура 73, дьлшкәсти бу чахе дьдит кӧ мәрьвед хьраб ча бежи тʹьме пешда дьчьн. Әԝ кʹәтә шьке кӧ гәло рʹасти һежа йә Хԝәдерʹа хьзмәт кә (Зәб. 73:12, 13, 16). Ле Йаһоԝа ча хԝә да кʹьфше һьндава ԝи? Йаһоԝа әԝ сущдар нәкьр. Әԝ те кʹьфше жь ве йәке,  кӧ Хԝәде гьлийед ԝи зәбурбежи Кʹьтеба Пирозда дайә ньвисаре. Ахьрийеда зәбурбеж фәʹм кьр, ԝәки бь рʹасти достийа тʹәви Йаһоԝа жь һәр тьшти ԛимәттьр ә (Зәб. 73:23, 24, 26, 28). Әԝ йәк чь дәрсе мә һин дькә? Рʹуспи гәрәке ләз нәкʹәвьн кӧ ԝан хушк-бьра сущдар кьн, йед кӧ дӧдьли дьбьн, ԝәки хьзмәти Йаһоԝарʹа бадиһәԝа нинә. Дәԝсе, әԝана гәрәке фәʹм бькьн, кӧ чьрʹа әԝ хушк йан бьра ӧса дьфькьрә йан ӧса дькә. Тʹәне һьнге рʹуспи ԝе бькарьбьн бь сайа Кʹьтеба Пироз һе баш дьл бьдьнә ԝи у али ԝи бькьн.

14. Елйас чьрʹа һʹәԝще аликʹарийе бу, у Йаһоԝа ча али ԝи кьр?

¹⁴ Елйас пʹехәмбәр жь Изабела Жьн-пʹадша, рʹәви (1 Пʹадш. 19:1-3). Әԝи тʹьре хенщи ԝи тʹӧ кәс жь пʹехәмбәре Йаһоԝа нәмайә у шьхӧле кӧ әԝи кьр бадиһәԝа бу. Әԝ ӧса дьлшкәсти бу, кӧ хԝәрʹа мьрьн дьхԝәст (1 Пʹадш. 19:4, 10). Йаһоԝа сәва ве йәке Елйас сущдар нәкьр, ле дәԝсе ԝи да баԝәркьрьне кӧ әԝ тʹәне нинә, у дькарә итʹбарийа хԝә ԛәԝата Хԝәде бинә, у һәла һе гәләк шьхӧл майә кӧ әԝ гәрәке бькә. Чахе Елйас дәрдед хԝә Йаһоԝарʹа гьли кьр, Йаһоԝа бь дьл гӧһ да ԝи у шьхӧлед тʹәзә да ԝи (1 Пʹадш. 19:11-16, 18). Әԝ йәк чь дәрсе мә һин дькә? Һәр кәс жь мә, илаһи рʹуспи гәрәке һьндава хьзмәткʹаред Йаһоԝа нәрм у ԛәнщ бьн. Һәрге кәсәк һерсә-һерс дәрде хԝә рʹуспийарʹа гьли дькә, йан жи кәсәк дьбежә, ԝәки әԝ һежайи бахшандьна Йаһоԝа нинә, йәкә рʹуспи гәрәке р›ьнд гӧһ бьдьнә ԝи, гава  әԝ дьле хԝә вәдькә. Паше рʹуспи гәрәке әԝ пәза ӧндабуйи бьдьнә баԝәркьрьне, кӧ Йаһоԝа ԝи гәләк һʹьз дькә.

15. Ль гора Йуһʹәнна 6:39, Иса ча бу һьндава пәзед Баве хԝә?

¹⁵ Ле Йаһоԝа дьхԝазә әм ча бьн һьндава пәзед ԝийи ӧндабуйида? Иса мәрʹа мәсәләкә баш һиштийә. Әԝи заньбу кӧ Йаһоԝа һʹәму пәзед хԝә ԛимәт дькә. Ләма Иса һәр тьшт чь дәсте ԝива дьһат дькьр, сәва «пәзед мала Исраелейә ӧндабуйи» вәгәрʹинә щәм Йаһоԝа (Мәт. 15:24; Луԛа 19:9, 10). Ӧса жи Иса мина шьване һʹәйф, һәр тьшт дькьр сәва тʹӧ пәзәкә Йаһоԝа ӧнда нәбә. (Бьхунә Йуһʹәнна 6:39.)

16-17. Рʹуспи гәрәке ча бьн һьндава ԝан, йед кӧ жь щьвате дур кʹәтьнә? (Бьньһерʹьн чаргошә бь наве « Пәзед Ӧндабуйи Ча Хԝә Тʹәхмин Дькьн».)

¹⁶ Паԝлосе шанди рʹуспийед жь щьвата Әфәси ширәт кьр, ԝәки чʹәʹв бьдьнә Иса. Әԝи гот: «Гәрәке бьхәбьтьн кʹомәке бьдьнә кʹәтийа у хәбәра Хӧдан Иса бир биньн кӧ дьгот: ‹Хԝәзи ль дайийа, нә кӧ ль стандийа›» (Кʹар. Шанд. 20:17, 35). Әʹйан ә ԝәки ԝи шьхӧлида иро щабдарийа рʹуспийа мәзьн ә. Салвадор, рʹуспики жь Испанйайе дьбежә: «Чахе әз дьфькьрьм кӧ Йаһоԝа пәзед хԝәйә ӧндабуйи чьԛас зәʹф һʹьз дькә, әз дьһа зәʹф дьхԝазьм һәр тьшти бькьм чь дәсте мьн те, ԝәки али ԝан бькьм. Әз баԝәр ьм ԝәки Йаһоԝа дьхԝазә, кӧ әз ча шьване рʹӧһʹани бона ԝана хәм бькьм».

¹⁷ Ве готареда бәʹса кʹижана мә кьр, йед кӧ жь Йаһоԝа дур кʹәтьнә, ԝана аликʹари станд у диса вәгәрʹийан щәм Йаһоԝа. Ньһа жи гәләкед кӧ жь щьвате дур кʹәтьнә, дьхԝазьн вәгәрʹьн. Готара дьнда әме һе һур бь һур шеԝьр кьн, кӧ ча али ԝан бькьн, ԝәки вәгәрʹьн щәм Йаһоԝа.